Bible in one year
June 18

1. Пэ еня́то (биекхэ́скиро дэ́што) бэрш пэ́скирэ кралипнаскэ, дро дэ́што чхон, дрэ дэ́што-чхонэ́скиро дывэ́с, явдя́ о Навуходоносо́ро, Вавилоно́скиро кра́ли, сарэ́ пэ́скирэ халадэнца кэ Ерусалимо, и залыя лэс, и кэрдя́ трусця́л (кругом) лэ́стэ рово (хохо́й).
2. И сыс фо́ро дрэ осада кэ дэшупэрво бэрш Сэдекияскиро.
3. Пэ еня́то дывэ́с чхонэ́скиро яця́ барэды́р бокх дро фо́ро, и на сыс маро́ пхувья́кирэ манушэ́ндэ.
4. И лыно́ сыс фо́ро, и праста́ндынэ сарэ́ халадэ́ раты́ пир дром кэ по́рта, машки́р дуй ва́нты, со сыс пашы́л крали́скири у́нта (садо); Халде́и сыс тэрдэ́ трусця́л фо́ро, и кра́ли гия́ дромэ́са, кэ лошчы́на (равнина).
5. И традынэпэ Халдеенгирэ халадэ́ пал крали́стэ, и дотрадынэ лэс пэ Ерихоноскирэ лошчыны, и сарэ́ лэ́скирэ халадэ́ нашнэ́ лэ́стыр.
6. И лынэ́ крали́с, и лыджинэ́ лэс кэ Вавилоно́скиро кра́ли дрэ Ривла: и кэрдэ́ пэ лэ́стэ сэ́ндо.
7. И Сэдэкияскирэ чхавэ́н запхусадэ анги́л лэ́скирэ якха́; а кокорэскэ Сэдекияскэ выпхусадэ якха́, закуиндлэ лэс састырэнца, и лыджинэ́ лэс дро Вавило́но.
8. Пэ па́нджто чхон, пэ эфтатонэ-чхонэ́скиро дывэ́с, (саво́ сыс дро дэшуенято бэрш Навуходоносороскиро), явдя́ Навузардано, писха́ри Вавилоно́скиро крали́скиро манушэ́нгирэ-ракхибнарье́нгиро барыдыро́, Вавилоно́скиро крали́скиро дро Ерусалимо.
9. И схачкирдя́ Ра́скирэ-Дэвлэ́скиро Кхэр и крали́скиро кхэр; и сарэ́ кхэра́ дро Ерусалимо, и сарэ́ барэ́ кхэра́ хачкирдя́ яга́са.
10. И ва́нты трусця́л (кругом) Ерусалимо роспхагирдэ́ Халдеёскирэ халадэ́, савэ́ сыс тэл барыдырэстэ пэ ракхибнарье́ндэ.
11. И яви́р мануша́, савэ́ ячнэ́пэ дро фо́ро, савэ́ пиригинэ́ кэ Вавилоно́скиро кра́ли, и яви́р простонэ манушэ́н выбичхадя Навузардано, барыдыро́ ракхибнарье́нгиро.
12. Екхэ вари-кицы́ одолэ́ чорорэ́ манушэ́н пхувья́тыр ячкирдя́ барыдыр пэ ракхибнарье́ндэ, бутярнэнца дрэ винаградники и пхув тэ пашынэн.
13. И сты́лбы харкунэ́ (меди́тка), савэ́ сыс пашы́л Ра́скирэ-Дэвлэ́скиро Кхэр, и мо́рё (дэрья́в) харкуно, саво́ сыс дро Ра́скирэ-Дэвлэ́скиро Кхэр, пхагирдэ́ Халде́и, и лыджинэ́ лэ́нгири харко́ма (медь) дро Вавило́но.
14. И хор чарэ́ (мыски), и лопаткицы, и чхурья, и роя, и сарэ́ харкунэ́ кхорэ́ (сасу́ды), савэ́ сыс дрэ буты́, ке́ли мангнэпэ Ра́скэ-Дэвлэ́скэ, Халде́и лынэ́.
15. И кадилы, и тахтая́ (чашы), савэ́ сыс сувнакунэ́ и со сыс рупуво́, лыя́ барыдыро́ ракхибнарье́нгиро.
16. Дуй сты́лбы, екх мо́рё (дэрья́в), и прэдки пэ ро́ты (подставки) савэ́ кэрдя́ Соломо́но дро Кхэр Ра́скирэ-Дэвлэ́скиро, – харко́ма дрэ сарэ́ далэ́ предме́ты (чысы́) на сыс важындлэ.
17. Дэшуохто куня́ вучипэ́н сыс дро екх сты́лбо; вя́нка пэ лэ́стэ сыс харкуны, а вучипэ́н вянкакиро сыс трин куня́, и сетка и гранатытка пхаба́ трусця́л вя́нка – сарэ́ харкунэ́. Дова́-паць и пэ яви́р сты́лбо сеткаса.
18. И лыя́ барыдыро́ ракхибнарье́нгиро Сераияс, англатунэ́ раша́с, и Цэфанияс, явирэ раша́с, и тринэн, савэ́ сыс тэрдэ́ пэ ракхибэн пашы́л прого.
19. И форо́стыр лыя́ екхэ скопцос, саво́ сыс барыдыро́ пэ халадэ́ндэ, и панджэ́ манушэ́н, савэ́ сыс тэрдэ́ анги́л крали́скиро муй, савэ́ сыс дрэ фо́ро, и халадэ́нгирэ шэралэс, саво́ зачхинэлас дро халадыбэ́н пхувья́кирэ манушэ́н, и шовдэша́ манушэ́н долэ́-пхувья́кирэ манушэ́ндыр, савэ́ сыс дрэ фо́ро.
20. И лыя́ лэн Навузардано, барыдыро́ ракхибнарье́нгиро, и лыджия́ лэн кэ Вавилоно́скиро кра́ли дрэ Ривла.
21. И замардя́ лэн Вавилоно́скиро кра́ли, и мулякирдя́ лэн дрэ Ривла, пэ Емафоскири пхув. И вытрадынэ́ Юдэ́н дро пле́но пэ́скирэ пхувья́тыр.
22. Пэ манушэ́ндэ, савэ́ ячнэ́пэ пэ Юдэякири пхув, савэ́н ячкирдя́ Навуходоносо́ро, Вавилоно́скиро кра́ли, – пэ лэ́ндэ чхудя́ барыдырэ́са Годолияс, чхавэ́с Ахикамоскирэс, Шафаноскирэс чхавэ́с.
23. Ке́ли шундлэ́ сарэ́ халадэ́нгирэ барыдыра́, ёнэ и лэ́нгирэ мануша́, со Вавилоно́скиро кра́ли чхудя́ барыдырэ́са Годолияс, то тэды явнэ́ кэ Годолия дрэ Маси́фа, и савэ́: Исмаило, чхаво́ Нефанияскиро, и Еханано, Кареёскиро чхаво́, и Сераия, Танхумефоскиро чхаво́ Нетофафостыр, и Иезания (Езания), Маахитяниноскиро чхаво́, ёнэ и лэ́нгирэ мануша́.
24. И совлахадя́ Годолия лэ́нгэ и лэ́нгирэ манушэ́нгэ, и пхэндя́ лэ́нгэ: “На дарэ́н тэ явэ́н тэл Халдее́нгири зор, дживэ́н пэ пхув и дынаринэ́н Вавилоно́скирэ крали́скэ, и явэ́ла тумэ́нгэ миштэ́с.”
25. Нэ пэ эфта́то чхон явдя́ Исмаило, чхаво́ Нефанияскиро, Елишамоскирэ чхавэ́с, крали́скирэ родо́стыр, дэшэ манушэ́нца, и замардя́ Годалияс, и ёв мыя́, и Юдэ́н, и Халдее́н, савэ́ сыс лэ́са дрэ Маси́фа.
26. И уштынэ́ сарэ́ мануша́, тыкнэстыр кэ баро́, и халадэ́нгирэ барыдыра́, и гинэ́ дро Еги́пто, пал-дова́ со дара́ндынэ Халдее́ндыр.
27. Дрэ трия́нда эфта́то (битринэ́нгиро дэ́што) бэрш, сыр пиричхудэ тэ дживэ́л Ехонияс, Юдэя́кирэ крали́с дро дэшуявир чхон, пэ биш тэ эфта́то дывэ́с чхонэ́скиро, о Евилмеродахо, Вавилоно́скирэ кра́ли, дро бэрш пэ́скирэ кралипнаскиро, ёв лыджия́ Ехонияс, Юдэя́кирэ крали́с бэшыбнытконэ кхэрэ́стыр.
28. И ракирдя́ лачхэ́с лэ́са, и чхудя́ троно лэ́скиро вучэды́р кралье́нгирэ тронэндыр, савэ́ сыс лэ́стэ дро Вавило́но.
29. И парудя Ехония лэ́скирэ бэшыбнытка и́ди, и лэ́стэ ўса́ды (сак) сыс хабэ́н лэ́стэ, дрэ сарэ́ лэ́скирэ джиибна́скирэ дывэса́.
30. И подрикирибэ́н (харчо) лэ́скиро, подрикирибэ́н ваш лэ́скэ пэ сарэ́ дывэса́, дыно́ сыс лэ́скэ крали́стыр, дывэ́с дро дывэ́с, дрэ сарэ́ лэ́скирэ джиибна́скирэ дывэса́.
1. Хоро́скирэ Дирижоро́скэ. “На хасякир” пэ Мелодия, Асафоскиро Пса́лмо. Гилы́.
2. Амэ парикираса Ту́кэ, о Дэ́вла, амэ шараса и парикираса Ту́кэ, пал-дова́ со Тырэ́ ди́вна бутя́ сы́рбы ракирэ́на сарэ́нгэ, со Ту сан пашы́л.”
3. “Ке́ли Мэ выкэдава лачхо́ часо – ракирэ́ла Дэвэ́л, Мэ ява́ва тэ сэндякирав пир чачипэ́н.
4. Пхув и сарэ́ ла́кирэ джиибнарья кунинэнапэ, нэ Мэ чхудём сты́лбы зоралэ́с.” Сэ́ла.
5. Мэ пхэндём пхутькирдэнгэ: “На пхутён!” И фуе́ манушэ́нгэ: “На ґаздэ́н шынга́ (ро́ги).
6. На ґаздэ́н вучэ́с шынга́, на ракирэ́н нахратэс, пхарэ́-илытка мануша́лэ.”
7. Пал-дова́ со сэ́ндо джа́ла на одотхы́р, кай кхам уштэ́ла, ци кай джа́ла тэлэ́, ци чхучэ́ пхувья́тыр:
8. Нэ Дэвэ́л исын сэнда́ри, Саво́ чхувэ́ла тэлэ́ екхэн, и Саво́ ґаздэ́ла упрэ́ явирэ́н.
9. Тахта́й исын дрэ Дэвлэ́скирэ васта́, и мол (вино) пенинэлапэ, дрэ сави́ исын бут со мешындло. Ёв росчхувэла ла: чачо́, сарэ́ фуй мануша́ исын бангэ́ тэ пьен и тэ смокчынэн жыжа, со ячэ́лапэ.
10. Нэ мэ ява́ва якхи́тко (свидетелё) ўса́ды (сак), мэ ява́ва тэ шара́в Яково́скирэ Дэвлэ́с.
4. Барвалэ́ манушэ́стэ ячэ́напэ бут буты́р мала́, нэ чорорэстыр дурьёла лэ́скиро мала́.
5. Начачуно якхи́тко явэ́ла сэндякирдо, и кодова́, кон хохавэла, на зракхэ́лапэ.
1. Пэ́три и Иа́но е́кхвар гинэ́ кхэтанэ́ дрэ Кхангири́ пэ бэльвэлитко мангипэ́н:
2. и сыс одо́й екх ману́ш, саво́ сыс лангало бияныпнастыр, савэ́с со дывэ́с янэ́нас и чхувэ́нас тэ бэшэ́л пашы́л Кхангирья́кири по́рта, сави́ кхарэ́на Лолы, соб (кай) ёв тэ мангэ́л дыибэ́н манушэ́ндыр, савэ́ заджанас дрэ Кхангири́;
3. ке́ли адава́ ману́ш дыкхця́ Пэтрис Ианоса анги́л загиибэ́н дрэ Кхангири́, ёв лыя́ тэ мангэ́л лэ́ндыр.
4. И Пэ́три ракхунэс дыкхця́ Ианоса пэ лэ́стэ и пхэндя́: “Дыкх по амэ́ндэ.”
5. И ёв лыя́ ракхунэс тэ дыкхэ́л пэ лэ́ндэ, ужакири, со ёнэ дэ́на вари-со лэ́скэ.
6. Нэ Пэ́три пхэндя́: “Сувнака́й и руп ма́ндэ нанэ; нэ дова́, со ма́ндэ исын, мэ да́ва ту́кэ: ваш лав Исусо́скиро Христосо́скиро Назаретостыр, ушты́ и псир.”
7. И ёв лыя́ лэс пал чачо́ васт и ґаздыя́; и дрэ дова́-паць часо лангалэскирэ ґэра́ высастинэ.
8. Ману́ш ухтя пэ ґэра́ и лыя́ тэ псирэ́л, и кхэтанэ́ лэ́нца гия́ дрэ Кхангири́, ёв псирдя́ и ухтя и шардя Дэвлэ́с.
9. И сарэ́ мануша́ дыкхнэ́ лэс, сыр ёв псирэлас и шарэлас Дэвлэ́с;
10. и ёнэ ґалынэ́ лэс, со ёв сыс дова́-паць ману́ш, саво́ сыс бэшто́ пашы́л Кхангирья́кири Лолы по́рта и мангэлас дыибэ́н; дар и ди́во облынэ лэн, со кэрдя́пэ адалэ́ манушэ́са.
11. Нэ палдова́, со лангало, саво́ высастия, на отджалас Пэтристыр Ианоса, сарэ́ мануша́ прастандынэпэ одори́к кэ ёнэ, пэ дова́ штэ́то, саво́ кхарэ́на Соломоно́скиро трэ́мо.
12. И ке́ли Пэ́три дыкхця́ дава́, ёв пхэндя́ манушэ́нгэ: “Мануша́лэ Израилёскирэ! Со тумэ́ дивинэнапэ пэ дава́? Со́скэ тумэ́ дыкхэ́на адя́кэ пэ амэ́ндэ, сы́рбы, акэ, амэ пэ́скирэ зорья́са ци джиибнаса дрэ дар анги́л Дэвлэ́стэ кэрдя́м адя́кэ, со адава́ ману́ш лыя́ тэ псирэ́л?
13. Дэвэ́л Авраамо́скиро и Исако́скиро и Яково́скиро, Дэвэ́л амарэ́ дадэ́нгиро, прославиндя Пэ́скирэ Чхавэ́с Исусо́с, Савэс тумэ́ здынэ и Савэ́стыр отпхэндлэпэ анги́л Пилатостэ, ке́ли Пила́то отсэндиндя тэ отмэкэ́л Лэс пэ во́ля.
14. Нэ тумэ́ Свэнтонэстыр и Чачунэстыр отпхэндлэпэ, а вымангнэ, соб (кай) тумэ́нгэ тэ отмэкэн розмарибнарис;
15. нэ тумэ́ мулякирдэ́ джиибна́скирэ Шэрэ Рас, Конэ́с Дэвэ́л отджидякирдя́ мэрибна́стыр и амэ сам якхи́тка дро дава́.
16. И патяибна́са дро Лэ́скиро лав кэрдя́ зоралэды́р адалэс, савэ́с тумэ́ дыкхэ́на и джинэ́на, и патяибэ́н, саво́ исын Лэ́стыр, высастякирдя́ лэс анги́л тумэ́ндэ сарэ́ндэ.
17. Пшала́лэ! Какана́ мэ джино́м (джина́в), со тумэ́ и тумарэ́ раё, кэрдэ́ дава́ пир наджиныбэн;
18. нэ Дэвэ́л саро́ кэрдя́ кэ ко́нцо/яго́ро (сполниндя), со ракирдэ́ Лэ́скирэ проро́ки, со Лэ́скирэ Христосо́скэ явэ́на барэ́ мэ́ньки.
19. Рискирэ́н пэ́скиро джиибэ́н и рисён кэ Дэвэ́л, соб (кай) тумарэ́ грэ́хи тэ явэ́н кхослэ тумэ́ндыр;
20. соб (кай) тэ бичхавэл Рай Дэвэ́л тумэ́нгэ яви́р лачхо́ часо тэ подрикирэ́л тумэн, соб (кай) Ёв могинэлас тэ бичхавэл Исусо́с Христосо́с, Саво́ сыс ужэ выкэдыно тумэ́нгэ;
21. Савэс болыбэ́н сыс банго́ тэ прилэл кэ/жы́ко дава́ часо, пака Дэвэ́л кэрэ́ла саро́, и пал Конэ́стэ англэды́р ракирдя́ пир Пэ́скирэ свэнтонэ́ пророкэ́ндэ свэто́скирэ англыпна́стыр.
22. Мо́йза ж пхэндя́: “Тумаро Рай Дэвэ́л чхувэ́ла тумарэ́ пшалэ́ндыр Пророко́с, сыр и ман; кандэ́н Лэс дро саро́, со Ёв явэ́ла тэ ракирэ́л тумэ́нгэ.
23. И явэ́ла адя́кэ, со кажно ману́ш, кон на явэ́ла тэ кандэл одолэ́ Пророко́с, лэ́лапэ криг манушэ́ндыр тэ хасёл.”
24. Сарэ́ проро́ки, Самуилостыр и савэ́ сыс коригэды́р (позжэ) лэ́стэ, сарэ́ ракирдэ́, упхэндлэ пэ далэ́ дывэса́.
25. Тумэ́ сан пророкэ́нгирэ чхавэ́ и заветоскирэ, пал савэ́ндэ Дэвэ́л дыя́ лав тумарэ́ дадэ́нгэ; Ёв ракирдя́ Авраамо́скэ: ‘Сарэ́ мануша́ тырэ́ родо́стыр пэ пхув явэ́на бахтякирдэ Дэвлэ́стыр’.
26. Кэ тумэ́ пэ́рва, Дэвэ́л отджидякирдя́ мэрибна́стыр Пэ́скирэ Чхавэ́с и бичхадя́ Лэс кэ тумэ́, соб (кай) тэ бахтякирэ́л тумэн, соб (кай) кажнонэс тумэ́ндыр тэ отрискирэл налачхэ́ тумарэ́ рэндэ́ндыр.”
Romani Bible Baltic 2019
United Bible Societies for the Baltic Romani Mission