Bible in one year - Пэ Балтитко Романи чиб

Bible in one year June 21

1. Чхавэ́ Рувимо́скирэ, англатунэ́-Израилёскирэ чхавэ́скирэ, – ёв сыс англатуно́ чхаво́; нэ ке́ли ёв магирдя пэ́скирэ-дадэ́скиро чхуибэ́н, нэ лэ́скиро англатуныбэн сыс отдыно́ Ёза́скирэ (Иосифо́скирэ) чхавэ́нгэ, чхавэ́скэ Израилёскирэскэ долэса, соб (кай) тэ на гинэнпэ лэ́нгэ [Ёзаскирэнгэ] англатунэ́ бияныбнытконэнца;

2. пал-дова́ со Юда сыс зоралэды́р пэ́скирэ пшалэ́ндыр, и тхагариса яця́ ёв, нэ англатуныбэн зачхиндло́ сыс пэ Ёзастэ (Иосифостэ).

3. Чхавэ́ Рувимо́скирэ, англатунэ́ Израилёскирэ-чхавэ́скирэ сыс: Ханохо, Фалу, Хецроно и Харми.

4. Чхавэ́ Иоилёскирэ сыс: Шэмаё, лэ́скиро чхаво́; лэ́скиро чхаво́ Гого, лэ́скиро чхаво́ Шымеё,

5. лэ́скиро чхаво́ Миха, лэ́скиро чхаво́ Реаия, лэ́скиро чхаво́ Ваало,

6. лэ́скиро чхаво́ Беера, савэ́с залыджия́ дрэ пле́но Феглафеласаро, Асирия́киро кра́ли. Ёв сыс тхага́ри Рувимлянэнгэ.

7. И лэ́скирэ пша́ла, пир лэ́нгирэ кхэри́тка ро́ды (пле́ми), пир лэ́нгирэ родоскиро зачхиныбэн сыс: шэрало́ Иеиэлё (Уиэлё), пало́ лэ́стэ Заха́рия.

8. И Бэла, чхаво́ Азазоскиро, Шэмаёскирэ-чхавэ́скиро, Иоилёскирэ-чхавэ́скиро. Ёв дживдя́ кэ Ароэро кэ Не́во и Ваал-Меоно;

9. а кэ васто́ко ёв дживдя́ кэ загиибэ́н пэ чхучи́ пхув (пустыня), сави́ гия́ рэка́тыр (лэня́тыр) Евфратостыр, пал-дова́ со кхэритка мурдала́ ското лэ́нгиро сыс бут пэ Галаадоскиро пхув.

10. Дрэ дывэса́ Сауло́скирэ лыджинэ́ ёнэ марибэ́н Агарянэнца, савэ́ хасинэ́ лэ́нгирэ вастэ́стыр; а ёнэ лынэ́ тэ дживэ́н дрэ лэ́нгирэ ша́тры, пир сари́ Галаадо́скирэ-васточно риг.

11. Чхавэ́ Гадо́скирэ дживдэ́ проти лэ́ндэ пэ Васаноскири пхув кэ Салха:

12. дро Васа́но Иоилё сыс шэрало́, Шафано яви́р, пало́ лэ́стэ Иаанаё (Яанаё) и Шафато.

13. Лэ́нгирэ пшалэ́н лэ́нгирэ чэкарьятыр [лэ́нгирэ-дадэнги́рэ сэмэнцатыр-ю.о.] сыс эфта́: Михаило, Мешуламо, Шэва, Иораё, Якано (Иакано), Зия и Еве́ро.

14. Ѓа́да, сыс Авихаилоскирэ чхавэ́, Хуриёскирэ-чхавэ́скирэ, Иороахоскирэ (Яроахоскирэ) чхавэ́скирэ, Галаадо́скирэ чхавэ́скирэ, Михаилоскирэ чхавэ́скирэ, Ешышаёскирэ чхавэ́скирэ, Яхдоскирэ (Иахдоскирэ) чхавэ́скирэ, Бузаскирэ чхавэ́скирэ.

15. Ахи, чхаво́ Авдиилоскиро, Гуниёкирэ-чхавэ́скиро, сыс шэрало́ пэ пэ́скиро ро́до.

16. Ёнэ дживдэ́ кэ Галаа́до, кэ Васа́но и дрэ фо́рья, савэ́ сыс тэл зор лэ́стэ и дрэ сарэ́ фо́рья, савэ́ сыс трусця́л Сароно, кэ/жы́ко лэ́нгири ме́жа.

17. Сарэ́ ёнэ сыс пиригиндлэ дрэ дывэса́ Иоафамоскирэ, Юдэя́кирэ крали́скирэ, и дрэ дывэса́ Иеровоамоскирэ, Израилёскирэ крали́скирэ.

18. Чхавэ́ндэ Рувимо́скирэ и Гадоскирэндэ и дро паш кхэри́тко ро́до Манасия́скиро сыс мануша́ марибны́тка, мурша́, савэ́ лыджа́нас шчы́то и курта́ла, савэ́ мардэ́ лукостыр и сыс сыклякирдэ́ кэ марибэ́н, лэн сыс штардэша́ штар тысёнцы эфташэла́ шовдэша́ манушэ́н, савэ́ выгинэ́ пэ марибэ́н.

19. И мардэ́пэ ёнэ Агарянэнца: Иетуромоса, Нафишоса и Надавомоса.

20. И дыно́ сыс лэ́нгэ васт проти лэ́ндэ, и отдынэ́ сыс дрэ лэ́нгирэ васта́ Агаряни и саро́, со лэ́ндэ сыс. Пал-дова́ со ёнэ дрэ марибнаскиро часо (цы́ро) кхардэ́ зоралэ́с Дэвлэ́с, и Ёв шундя́ лэн, пал-дова́ со ёнэ патяндынэпэ дрэ Лэ́стэ.

21. И лынэ́ ёнэ лэ́нгирэ кхэритконэ́ мурдалэ́н: верблюдэн пандждэша́ тысёнцы, тыкнэ́ мурдалэ́ндыр дуйшэла́ пандждэша́ тысёнцы, ослэн дуй тысёнцы, и шэл тысёнцы манушэ́н,

22. пал-дова́ со бут лэ́ндыр пынэ́ мулэнца, адя́кэ, сыр Дэвлэ́стыр сыс дава́ марибэ́н. И дживдэ́ ёнэ пэ лэ́нгиро штэ́то кэ пиритрадыпэн.

23. Чхавэ́ Манасия́скирэ пашэ́-родыцо́стыр, дживдэ́ пэ доя́ пхув, Васаностыр кэ Ваал-Ермоно и Сениро и кэ/жы́ко бэ́рга Ермоноскири; и лэн сыс бут.

24. И ґа́да, сыс лэ́нгирэ славутна шэралэ́ пэ стрэ́чы (поколении): Еферо, Ишы, Елиило, Азриило, Еремее, Годавия и Ягдиило (Иагдиило), мурша́ зоралэ́, мурша́ славутна, савэ́ сыс шэралэ́ пэ пэ́скирэ ро́ды.

25. Нэ ке́ли ёнэ кэрдэ́ грэ́хо проти пэ́скирэ-дадэнги́рэ Дэвлэ́стэ и лынэ́ биладжакунэс тэ псирэ́н пала́л пал долэ́-пхувья́кирэ манушэ́нгирэ дэвлорэндэ, савэ́н традыя́ криг Дэвэ́л лэ́нгирэ мо́стыр,

26. то тэды Израилёскиро Дэвэ́л ґаздыя́ ду́хо (фа́но) Фулоскиро, Асирия́кирэ-крали́скиро, и ду́хо (фа́но) Феглафеласароскиро, Асирия́кирэ-крали́скиро, и ёв традыя́ криг Рувимлянэн и Гадитянэн и паш ро́дыцо Манасияскири/о, и лыджия́ лэн дро Халахо, и дро Хаворо, и дро Аро, и пэ рэка (лэнь) Гозано, кай ёнэ дживэ́на кэ дава́ дывэ́с.

1 Chronicles 6:1-81

1. Чхавэ́ Левиёскирэ сыс: Гирсоно, Каафо и Мерари.

2. Чхавэ́ Каафоскирэ сыс: Амрамо, Ицгаро, Хевро́но и Узиило.

3. Чхавэ́ Амрамоскирэ сыс: Ааро́но, Моисе́ё (Мо́йза/ Мося) и Мариам. Чхавэ́ Аароно́скирэ сыс: Надаво, Авиудо, Елиза́ро и Ифамаро.

4. Елизаростыр бия́ндыя Финее́со, Финеесостыр бия́ндыя Авишуё;

5. Авишуёстыр бия́ндыя Букиё, Букиёстыр бия́ндыя Ози́я;

6. Озиястыр бия́ндыя Зэрахия; Зэрахиястыр бия́ндыя Мераиофо;

7. Мераиофостыр бия́ндыя Амария, Амариястыр бия́ндыя Ахитуво;

8. Ахитувостыр бия́ндыя Садоко, Садокостыр бия́ндыя Ахимаасо;

9. Ахимаасостыр бия́ндыя Аза́рия, Азариястыр бия́ндыя Иоанано;

10. Иоананостыр бия́ндыя Аза́рия, – акэ, сыс одова́, саво́ сыс раша́й дрэ Кхангири́, сави́ чхудя́ Соломо́но дро Ерусалимо.

11. И бия́ндыя Азариястыр Амария, Амариястыр бия́ндыя Ахитуво;

12. Ахитувостыр бия́ндыя Садоко, Садокостыр бия́ндыя Селумо;

13. Селумостыр бия́ндыя Хелкия, Хелкиястыр бия́ндыя Аза́рия;

14. Азариястыр бия́ндыя Сераё, Сераёстыр бия́ндыя Иоседеко.

15. Иоседеко гия́ дро пле́но, ке́ли Рай Дэвэ́л пирилыджия тэ дживэ́н Юдэ́н и Ерусалимлянэн вастэ́са Навуходонососкирэса.

16. И адя́кэ чхавэ́ Левиёскирэ сыс: Гирсоно, Каафо и Мерари.

17. Ѓа́да, лава́ Гирсоновоскирэ чхавэ́нгирэ сыс: Ливни и Шыме́ё.

18. Чхавэ́ Каафоскирэ сыс: Амрамо, Ицгаро, Хевро́но и Узиило.

19. Чхавэ́ Мерарискирэ сыс: Махли и Мушы. Ѓа́да, сыс ро́до Левиёскиро пир лэ́нгиро ро́до.

20. Гирсоностэ сыс: Ливни, чхаво́ лэ́скиро; Иахаво, чхаво́ лэ́скиро; Зима, чхаво́ лэ́скиро;

21. Иоахо, чхаво́ лэ́скиро; Идо, чхаво́ лэ́скиро; Зерахо, чхаво́ лэ́скиро; Иеафраё, чхаво́ лэ́скиро.

22. Чхавэ́ Каафоскирэ сыс: Аминада́во, чхаво́ лэ́скиро; Кореё, чхаво́ лэ́скиро; Асиро, чхаво́ лэ́скиро;

23. Елкано, чхаво́ лэ́скиро; Евиасафо, чхаво́ лэ́скиро; Асиро, чхаво́ лэ́скиро;

24. Тахафо, чхаво́ лэ́скиро; Уриило, чхаво́ лэ́скиро; Узия, чхаво́ лэ́скиро; Са́уло, чхаво́ лэ́скиро.

25. Чхавэ́ Елканоскирэ сыс: Амаса и Ахимофо.

26. Елкано, чхаво́ лэ́скиро; Цофаё, чхаво́ лэ́скиро; Нахафо, чхаво́ лэ́скиро;

27. Елиафо, лэ́скиро чхаво́; Ерохамо (Иерохамо), чхаво́ лэ́скиро; Елкана, чхаво́ лэ́скиро.

28. Чхавэ́ Самуилоскирэ: англатуно́ Иоилё, яви́р Авия́.

29. Чхавэ́ Мерарискирэ: Махли, Ливни, чхаво́ лэ́скиро; Шыме́ё, чхаво́ лэ́скиро; Уза, чхаво́ лэ́скиро;

30. Шыма, чхаво́ лэ́скиро; Хагия, чхаво́ лэ́скиро; Асаия, чхаво́ лэ́скиро.

31. Ѓа́да, исын одолэ́, савэ́н Дави́до чхудя́ барыдырэ́нца пэ манушэ́ндэ, савэ́ багандлэ дро Ра́скирэ-Дэвлэ́скиро Кхэр, долэ́ дывэсэ́ндыр, сыр чхудэ́ дрэ лэ́стэ ковчэго.

32. Ёнэ дынариндлэ́ (служиндлэ) манушэ́нгэ, савэ́ багандлэ анги́л скэдыибна́скири ски́ния, пака Соломо́но чхудя́ Ра́скирэ-Дэвлэ́скиро Кхэр дрэ Ерусалимо. И ёнэ тэрдинэ́ пэ пэ́скири буты́ пир пэ́скиро гиибэн (порядко).

33. Ѓа́да, исын, одолэ́, савэ́ тэрдинэ́ пэ́скирэ чхавэ́нца: чхавэ́ндыр Каафоскирэндыр – Емано багандя, чхаво́ Иоилёскиро, чхаво́ Самуилоскиро,

34. чхаво́ Елканаскиро, чхаво́ Ерохамоскиро (Иерохамоскиро), чхаво́ Елиилоскиро, чхаво́ Тоахаскиро,

35. чхаво́ Цуфоскиро, чхаво́ Елканаскиро, чхаво́ Махафоскиро, чхаво́ Амасаёскиро,

36. чхаво́ Елканаскиро, чхаво́ Иоилёскиро, чхаво́ Азарияскиро, чхаво́ Цэфанияскиро,

37. чхаво́ Тахафоскиро, чхаво́ Асироскиро, чхаво́ Ависафоскиро, чхаво́ Кореёскиро,

38. чхаво́ Ицгароскиро, чхаво́ Каафоскиро, чхаво́ Левиёскиро, чхаво́ Израилёскиро;

39. и лэ́скиро пшал Асафо, саво́ сыс тэрдо́ пэ лэ́скири чачи́ (право) риг, – Асафо, чхаво́ Берехияскиро, чхаво́ Шымаскиро,

40. чхаво́ Михаилоскиро, чхаво́ Ваасеяскиро, чхаво́ Малхияскиро,

41. чхаво́ Ефнияскиро, чхаво́ Зерахоскиро, чхаво́ Адаияскиро,

42. чхаво́ Ефаноскиро, чхаво́ Зимаскиро, чхаво́ Шымиёскиро,

43. чхаво́ Иахафоскиро, чхаво́ Гирсоноскиро, чхаво́ Левиёскиро.

44. А чхавэ́ндыр Мерарискирэндыр, лэ́нгирэ пшалэ́н, – пэ зэ́рво (ле́во) риг: Ефано, чхаво́ Кишыёскиро, чхаво́ Авдиёскиро, чхаво́ Малухаскиро,

45. чхаво́ Хашавияскиро, чхаво́ Амасияскиро, чхаво́ Хелкияскиро,

46. чхаво́ Амцыёскиро, чхаво́ Ванияскиро, чхаво́ Шэмероскиро,

47. чхаво́ Махлиёскиро, чхаво́ Мушыскиро [Мушыёскиро-р.с.], чхаво́ Мерарискиро, чхаво́ Левиёскиро.

48. Лэ́нгирэ пша́ла, адя́кэ-паць Леви́ты, сыс чхудэ́ пэ ра́зна бутя́ пашы́л Дэвлэ́скиро Кхэр;

49. Нэ Ааро́но и лэ́скирэ чхавэ́ хачкирдэ́ пэ алта́рё (жэртвенико) цэ́ло схачкирибэ́н и пэ алта́рё кадилэнца, и кэрдэ́ кажно свэ́нто рэ́ндо дрэ Свэ́нто – свэнтэдыр штэ́то и ваш жужакирибэн Израилё дро саро́, сыр припхэндя́ писха́ри Дэвлэ́скиро Моисе́ё (Мо́йза).

50. Ѓа́да, исын чхавэ́ Аароно́скирэ: Елиза́ро, чхаво́ лэ́скиро; Финеесо, чхаво́ лэ́скиро; Авиудо, чхаво́ лэ́скиро;

51. Букиё, чхаво́ лэ́скиро; Узиё, чхаво́ лэ́скиро; Зэрахия, чхаво́ лэ́скиро;

52. Мераифо, чхаво́ лэ́скиро; Амария, чхаво́ лэ́скиро; Ахитуво, чхаво́ лэ́скиро;

53. Садоко, чхаво́ лэ́скиро; Ахимаасо, чхаво́ лэ́скиро.

54. И ґа́да, исын кхэра́ лэ́нгирэ пир гава́ лэ́нгирэ дрэ ме́жы лэ́нгирэ: чхавэ́ Аароно́скирэ Каафовоскирэ кхэритконэ́ родэндыр, адя́кэ сыр жре́биё выгия́ лэ́нгэ,

55. то дынэ́ лэ́нгэ Хевро́но, пэ Юдаскири пхув, и штэ́ты пашы́л фо́ро лэ́скиро трусця́л (вокруг) лэ́стэ;

56. далэ́-форо́скирэ фэ́лды и гава́ лэ́скирэ отдынэ́ Халевоскэ, чхавэ́скэ Ефонияскирэскэ.

57. Чхавэ́нгэ Аароноскирэскирэ адя́кэ-паць дынэ́ знашыбнытка фо́рья: Хевро́но и Ливна лэ́нгирэ штэтэнца пашы́л фо́ро, Ятиро (Иатиро) и Ештэмоа и лэ́скирэ штэ́ты пашы́л фо́ро,

58. и Хиле́но и лэ́скирэ штэ́ты пашы́л фо́ро, Давиро и лэ́скирэ штэ́ты пашы́л фо́ро.

59. И Ашано и лэ́скирэ штэ́ты пашы́л фо́ро, Вефсамисо и лэ́скирэ штэ́ты пашы́л фо́ро.

60. А Вениамино́скирэ кхэрэ́скирэ родо́скэ – Гева и лэ́скирэ штэ́ты пашы́л фо́ро, и Алемефо, и лэ́скирэ штэ́ты пашы́л фо́ро, и Анафофо и лэ́скирэ штэ́ты пашы́л фо́ро: сарэ́ лэ́нгирэ фо́рья дрэ лэ́нгирэ ро́ды сыс трия́нда фо́рья.

61. Каафоскирэ чхавэ́нгэ, савэ́, ячнэ́пэ, далэ́ чэкарьендыр пир дава́ ро́дыцо, дыно́ сыс пир жре́биё дэш фо́рья миштыпнаскирэ мератыр Манасия́скирэ родыцо́стыр.

62. Чхавэ́нгэ Гирсоноскирэнгэ пир лэ́нгирэ ро́ды, Исахароскирэ родыцо́стыр и Асироскирэ родыцо́стыр, и Нефалимоскирэ родыцо́стыр, и Манасия́скирэ родыцо́стыр дро Васа́но, дыно́ дэшутрин фо́рья.

63. Чхавэ́нгэ Мерарискирэнгэ пир лэ́нгирэ ро́ды, Рувимо́скирэ родыцо́стыр, и Гадо́скирэ родыцо́стыр, и Завулоноскирэ родыцо́стыр, сыс дыно́ пир жре́биё дэшуду́й фо́рья.

64. Адя́кэ дынэ́ Израилёскирэ чхавэ́ Левитэ́нгэ далэ́ фо́рья и лэ́нгирэ штэ́ты пашы́л фо́рья.

65. И дынэ́ ёнэ пир жре́биё Юда́скирэ-чхавэ́нгирэ родыцо́стыр, и Симёноскирэ чхавэ́нгирэ родыцо́стыр, и Вениамино́скирэ-чхавэ́нгирэ родыцо́стыр долэ́ фо́рья, савэ́ ёнэ кхардэ́ пир лэ́нгирэ лава́.

66. Вари-савэ́нгэ Каафоскирэ чхавэ́нгирэ кхэритконэ́ родэ́нгэ дынэ́ сыс фо́рья Ефремо́скирэ родыцо́стыр.

67. И дынэ́ сыс лэ́нгэ знашыбнытка фо́рья: Сихе́мо и лэ́скирэ штэ́ты пашы́л фо́ро пэ Ефремо́скири бэ́рга, и Гезеро и лэ́скирэ штэ́ты пашы́л фо́ро,

68. и Иокмеамо и лэ́скирэ штэ́ты пашы́л фо́ро, и Беф-Ороно и лэ́скирэ штэ́ты пашы́л фо́ро,

69. и Аиалоно и лэ́скирэ штэ́ты пашы́л фо́ро, и Гаф-Римоно и лэ́скирэ штэ́ты пашы́л фо́ро;

70. пашатыр Манасия́скирэ родыцо́стыр – Ане́ро и лэ́скирэ штэ́ты пашы́л фо́ро, Билеамо и лэ́скирэ штэ́ты пашы́л фо́ро. Дава́ сыс Каафоскирэ чхавэ́нгирэ стрэчакэ, савэ́ ячнэ́пэ.

71. Чхавэ́нгэ Гирсоноскирэ кхэритконэ́ родыцо́стыр Манасия́скирэ пашэ́-родыцо́стыр дынэ́ сыс Голано дрэ Васана и лэ́скирэ штэ́ты пашы́л фо́ро, и Аштарофо и лэ́скирэ штэ́ты пашы́л фо́ро.

72. Исахароскирэ родыцо́стыр – Кеде́со и лэ́скирэ штэ́ты пашы́л фо́ро, Даврафо и лэ́скирэ штэ́ты пашы́л фо́ро,

73. и Рамо́фо и лэ́скирэ штэ́ты пашы́л фо́ро, и Ане́мо и лэ́скирэ штэ́ты пашы́л фо́ро;

74. Асироскирэ родыцо́стыр – Машало и лэ́скирэ штэ́ты пашы́л фо́ро, и Авдоно и лэ́скирэ штэ́ты пашы́л фо́ро,

75. и Хукоко и лэ́скирэ штэ́ты пашы́л фо́ро, и Рехово и лэ́скирэ штэ́ты пашы́л фо́ро;

76. Нефалимоскирэ родыцо́стыр – Кеде́со дрэ Галиле́я и лэ́скирэ штэ́ты пашы́л фо́ро, и Хамоно и лэ́скирэ штэ́ты пашы́л фо́ро, и Кириафаимо и лэ́скирэ штэ́ты пашы́л фо́ро.

77. А явирэ Мерарискирэ чхавэ́нгэ – дыно́ сыс Завулоноскирэ родыцо́стыр Римоно и лэ́скирэ штэ́ты пашы́л фо́ро, Фаворо и лэ́скирэ штэ́ты пашы́л фо́ро.

78. Пэ доя́ Иорданоскири риг, проти Ерихо́но, пэ васто́ко Иорданостыр, Рувимо́скирэ родыцо́стыр дынэ́ сыс Восоро пэ чхучи́ пхув и лэ́скирэ штэ́ты пашы́л фо́ро, и Иааца (Яаца) и ла́кирэ штэ́ты пашы́л фо́ро,

79. и Кедемофо и лэ́скирэ штэ́ты пашы́л фо́ро, и Мефаафо и лэ́скирэ штэ́ты пашы́л фо́ро;

80. Гадо́скирэ родыцо́стыр – Рамо́фо дро Галаа́до и лэ́скирэ штэ́ты пашы́л фо́ро, и Маханаимо и лэ́скирэ штэ́ты пашы́л фо́ро,

81. и Есево́но и лэ́скирэ штэ́ты пашы́л фо́ро, и Иазе́ро и лэ́скирэ штэ́ты пашы́л фо́ро.

Psalms 77:1-3

1. Хоро́скирэ Дирижоро́скэ. Пир Идифумостэ Едуциностэ (Едутуностэ). Асафоскиро Пса́лмо.

2. Мири́ зан исын кэ Дэвэ́л и мэ ява́ва тэ ґодлав кэ Дэвэ́л мирэ́ заня́са и Ёв шунэ́ла ман.

3. Мэ родыём Рас-Дэвлэ́с дрэ пхарэ́ мирэ́ дывэса́, миро васт сыс ґаздыно́ раты́ и на обмэкэлапэ, миро ди отпхэндяпэ, соб (кай) тэ тангинэ́л Лэс.

Proverbs 19:10-12

10. Пэсьтима (пышныма) на подджа́ла дылыниньконэскэ, пэ бут буты́р адя́кэ-паць и дынари́скэ на подджа́ла тэ хулаинэ́л пэ тхагарьендэ.

11. Кон хор розлэла, одова́ насыгэс (поволинькэс) холясо́ла, и кодова́ кэрэ́ла барипэ́н пэ́скэ, кон сы́рбы на дыкхэ́ла, ке́ли лэ́скэ кэрэ́на чорипэ́н.

12. Кра́ли, саво́ холясо́ла, исын сы́рбы шчэр (ле́во), саво́ рыкинэла, лэ́скири ла́ска исын сы́рбы пахлын (роса) пэ чар.

Skutki 5:1-21

1. Екх ману́ш, савэ́с кхардэ́ Анания, пэ́скирэ ромня́са Сапфираса, бикиндя фэлатин,

2. и ґарадя пэ́скэ барэды́р паш ловэ́, и лэ́скири ромны́ джиндя́ пал дава́, а паш, сави́ яця́пэ, ёв яндя́ и чхудя́ кэ Апостолэнгирэ ґэра́.

3. Нэ Пэ́три пхэндя́: “Анание! Ваш со ту домэкцян налачхэ́с тэ хулаинэ́л, со ту хохадян Свэнтонэ́ Духоскэ и ґарадян пэ́скэ паш ловэ́, савэ́ ту дорэсцян пал бикиндлы пхув?

4. Ци на сыс пхув кэ дова́ часо, сыр ту ла бикиндян, тыри́, и ловэ́, савэ́ ту лыян пал ла́тэ, ци на адя́кэ-паць сыс тырэ́, сыр жа ту ги́ян пэ дасаво рэ́ндо? Ту хохадян на манушэ́нгэ, а Дэвлэ́скэ!”

5. Ананиё, сыр шундя́ далэ́ лава́, пыя́ муло́; и бари дар лыя́ сарэ́н манушэ́н, савэ́ сыс одо́й и шундлэ́ дава́.

6. И подгинэ́ тэрнэ́ мануша́, закрэнцындлэ лэ́скиро тру́по, лыджинэ́ яври́ лэс и ґарадэ́.

7. Пир мардэ́ (штунды) трин коригэды́р (позжэды́р) явдя́ и лэ́скири ромны́, ёй нисо́ на джиндя́ пал дова́, со кэрдя́пэ.

8. Пэ́три пхуця́ ла́тыр: “Ци пал дасави́ тими́н тумэ́ ромэса бикиндлэ пэ́скири пхув?” “Адя́кэ, – пхэндя́ ёй, – пал дасави́ тими́н.”

9. Нэ Пэ́три пхэндя́ ла́кэ: “Сыр да тумэ́ могиндлэ́ тэ зракирэнпэ и тэ хохавэн Дэвлэ́скирэ Духоскэ? Ѓа́да, пашы́л вудара́ исын ґэра́ одолэ́-манушэ́нгирэ ґэра́, савэ́ ґарадэ́ тырэ́ ромэс: ёнэ и тут лыджа́на яври́.”

10. И дро дова́-паць часо ёй пыя́ мулы кэ лэ́нгирэ ґэра́. И ке́ли тэрнэ́ мануша́ загинэ́, ёнэ латхнэ́ ла муля, и лыджинэ́ яври́ ла, и ґарадэ́ пашы́л ла́кирэ ромэстэ.

11. И бари дар облыя сари́ Кхангири́ и сарэ́ манушэ́н, савэ́ шундлэ́ пал дава́.

12. Апо́столы кэрдэ́ бут знаме́нии (ґертыка́) и ди́вы пэ́скирэ вастэ́нца машки́р манушэ́ндэ; и сарэ́ скэдэнаспэ кхэтанэ́ дро Соломоно́скиро трэ́мо,

13. нэ никонэстэ явирэ́стэ на сыс муршыпэн тэ подджа́л кэ ёнэ, нэ мануша́ кутякирэнас и барьякирэнас паты́в лэ́нгэ;

14. и уса́ буты́р ячэнас мануша́, савэ́ лынэ́ тэ патя́н дрэ Растэ-Дэвлэ́стэ сыр муршэ́н, адя́кэ и джувле́н,

15. сыр мануша́ вылыджанас насвалэн пэ вули́ца (га́са) и чхувэ́нас лэн пэ пасиндля (постели) и чхуибэна, соб (кай) ке́ли Пэ́три явэ́ла тэ джал маму́й, тэ пэрэ́л Лэ́скири зэр (тенё) пэ вари-конэ́стэ лэ́ндыр.

16. Бут мануша́ явэ́нас явирэ форье́ндыр, савэ́ сыс пашы́л Ерусалимо, ёнэ янэ́нас насвалэ манушэ́н и адасавэн, дрэ савэ́ндэ сыс бэшто́ на́лачхо ду́хо (фа́но), савэ́ сарэ́ высастёнас.

17. Пэ́рво раша́нгиро барыдыро́ уштыя́, и сарэ́, кон сыс кхэтанэ́ лэ́са Садукеенгирэ скэдыибна́стыр лынэ́ тэ зэвлынэн,

18. и закэдынэ Апостолэн, и чхудэ́ лэн дро штарибэ́н.

19. Нэ Дэвлэ́скиро Янго́ло ратя́киро псирадя вудара́ дро штарибэ́н и вылыджия́ лэн, пхэни́:

20. “Джа́н дрэ Кхангири́, тэрдён и роспхэнэ́н сарэ́ манушэ́нгэ пал дава́ нэво́ джиибэ́н.”

21. Сыр Апо́столы шундлэ́ дава́, ёнэ пэ зло́ко (ра́нко) явнэ́ дрэ Кхангири́ и сыклякирдэ́. Нэ, ке́ли пэ́рво раша́нгиро барыдыро́ кхэтанэ́ пэ́скирэ манушэ́нца явнэ́, ёнэ кэдынэ Синедрионо и сарэ́ годэпхурэн Израилёскирэ чхавэ́ндыр и бичхадя́ халадэ́н дро штарибэ́н, соб (кай) тэ янэ́н лэн.

Romani Bible Baltic 2019

Maintained by the United Bible Societies for the Baltic Romani Mission