Bible in one year
June 22

1. Чхавэ́ Исахароскирэ сыс: Фола, Фуа, Иашуво (Яшуво) и Шымроно, штарджинэ.
2. Чхавэ́ Фоласкирэ сыс: Узиё, Рефаия, Ериило, Яхмаё, Ивсамо и Самуи́ло, шэралэ́ пэ Фоласкирэ стрэ́чы (поколе́нии), мануша́, савэ́ дрэ пэ́скирэ ро́ды сыс муршканэ́ ваш марибэ́н; сыс лэн дрэ Давидо́скирэ дывэса́ биш тэ дуй тысёнцы и шовшэла́.
3. Чхаво́ Узиёскиро сыс: Израхия; чхавэ́ Израхиёскирэ сыс: Михаило, Овадия, Иоилё и Ишыя, панджинэ. Сарэ́ ёнэ сыс шэралэ́ мануша́.
4. Лэ́ндэ, пир ро́ды лэ́нгирэ, пир стрэ́чы лэ́нгирэ, сыс скэдынэ́ кэ марибэ́н халадэ́н трия́нда шов тысёнцы; пал-дова́ со лэ́ндэ сыс бут ромне́н и чхавэ́н.
5. Лэ́нгирэ пшалэ́н, дрэ сарэ́ Исахароскирэ стрэ́чы, манушэ́н, савэ́ псирдэ́ пэ марибэ́н, сыс охтодэша́ эфта́ (бибишэнгиро шэл) тысёнцы, зачхиндлэ́ дрэ родоскирэ зачхиныбэна (списки).
6. Вениаминостэ сыс: Бэла, Бехе́ро и Едиаило, трин чхавэ́.
7. Чхавэ́ Беласкирэ сыс: Ецбоно, Узиё, Узиило, Еримофо (Иеримофо) и Ири, пандж, шэралэ́ пэ стрэ́чы (поколении) мануша́, савэ́ псирдэ́ пэ марибэ́н. Дрэ родоскирэ зачхиныбэна (списки) ёнэ сыс зачхиндлэ́: биш тэ дуй тысёнцы трияндаштар.
8. Чхавэ́ Бехероскирэ: Земира, Иоашо, Елиезэро (Елизе́ро), Елиоэнаё, Омри, Иремофо, Авия́, Анафофо и Алеме́фо: сарэ́ адалэ́ сыс чхавэ́ Бехероскирэ.
9. Дрэ родоскирэ списки сыс зачхиндлэ́ ёнэ пир ро́ды лэ́нгирэ, пир шэралэндэ пэ стрэ́чы, манушэ́н, савэ́ сыс муршканэ́ ваш марибэ́н – биш тысёнцы и дуйшэла́.
10. Адя́кэ-паць чхаво́ Едиалоскиро сыс: Билгано. Чхавэ́ Билганоскирэ сыс: Еусо, Вениамино, Егудо, Хенаана, Зефано, Фарсисо и Ахишахаро.
11. Сарэ́ адалэ́ Иедиаилоскирэ чхавэ́ сыс стрэчакирэ шэралэ́, мануша́, савэ́ сыс мурша́ ваш марибэ́н; дэшуэфта тысёнцы и дуйшэла́ сыс, савэ́ выгинэ́ пэ марибэ́н.
12. И Шупимо и Хупимо, сыс чхавэ́ Ираскирэ: Хушымо, сыс чхаво́ Ахероскиро.
13. Чхавэ́ Нефалимоскирэ сыс: Яхцэило (Иахцеилё), Гуни, Ецэро и Шиле́мо, чхавэ́ Валакирэ.
14. Чхавэ́ Манасия́скирэ сыс: Асриило, савэ́с бияндя́ лэ́скири наложница Арамеянка; ёй бияндя́ Махирос, Галаадоскирэс дадэ́с.
15. Махиро лыя́ палоро́м Хупимоскирэ и Шупимоскирэ пхэня́, – лэ́нгирэ-пхэнякиро лав сыс Мааха; лав явирэскэ сыс Салпаадо. Салпаадостэ сыс екх чхая́.
16. Мааха, Махироскири ромны́, бияндя́ чхавэ́с и дыя́ лэ́скэ лав Кере́шо, а лав лэ́скирэ пшалэ́скэ сыс Шэре́шо. Чхавэ́ лэ́скирэ сыс: Уламо и Реке́мо.
17. Чхаво́ Уламоскиро сыс: Бедано. Ѓа́да, сыс чхавэ́ Галаадо́скирэ, Махироскирэ-чхавэ́скирэ, Манасия́скирэ-чхавэ́скирэ.
18. Лэ́скири пхэн Молехе́ф бияндя́ Ишгодас, Авиезерос и Махлос.
19. Чхавэ́ Шэмидаскирэ сыс: Ахиано, Шэхемо, Ликхи и Аниамо.
20. Чхавэ́ Ефремо́скирэ сыс: Шутелахо, и Бере́до, чхаво́ лэ́скиро, и Елеадо, чхаво́ лэ́скиро, и Фамафо, чхаво́ лэ́скиро.
21. И Завадо, чхаво́ лэ́скиро, и Шутелахо, чхаво́ лэ́скиро, и Езе́ро и Елеада. И мулякирдэ́ лэн мануша́ Гефоскирэ, савэ́ бия́ндынэ пэ доя́ пхув, пал-дова́, со ёнэ гинэ́ тэ залэн лэ́нгирэ кхэритконэ́ мурдалэ́н.
22. И рондя́ пал лэ́ндэ Ефре́мо, дад лэ́нгиро, бут дывэса́, и явэ́нас лэ́скирэ пша́ла тэ штылякирэн лэс.
23. Пало́ (после) дава́ ёв загия́ кэ пэ́скири ромны́, и ёй запхария и бияндя́ чхавэ́с, и ёв дыя́ лэ́скэ лав: Берия, пал-дова́ со би́да (биба́хт) латхя́ кхэр лэ́скиро.
24. И чхай лэ́стэ сыс Шее́ра. Ёй чхудя́ Беф-Ороно тэлатуно и упратуно, и Узе́н-Шэе́ро.
25. И Рефаё, чхаво́ лэ́скиро, и Решэфо, и Ослахо, чхаво́ лэ́скиро, и Фахано, чхаво́ лэ́скиро,
26. Лаедано, чхаво́ лэ́скиро, Амиудо, чхаво́ лэ́скиро, Елишамо, чхаво́ лэ́скиро,
27. Ноно, чхаво́ лэ́скиро, Ису́со, чхаво́ лэ́скиро.
28. Маёнки лэ́нгирэ и лэ́нгирэ штэ́ты, кай ёнэ дживдэ́, сыс: Вефи́лё (Бет-Эль) и фо́рья, савэ́ сыс тэл лэ́скири зор; кэ васто́ко Наарано, кэ западо Гезе́ро и фо́рья, савэ́ сыс тэл лэ́скири зор; Сихе́мо и фо́рья, савэ́ сыс тэл лэ́скири зор кэ Газа и фо́рья, савэ́ сыс тэл ла́кири зор.
29. А Манасия́скирэ-чхавэ́нгирэ рига́тыр: Беф-Сано и фо́рья, савэ́ сыс тэл лэ́скири зор, Фаанахо и фо́рья, савэ́ сыс тэл лэ́скири зор, Мегидо и фо́рья, савэ́ сыс тэл лэ́скири зор, Доро и фо́рья, савэ́ сыс тэл лэ́скири зор. Дрэ лэ́ндэ дживдэ́ Иосифо́скирэ (Ёза́скирэ) чхавэ́, Израилёскирэ чхавэ́скирэ.
30. Чхавэ́ Асироскирэ сыс: Имна, Ишва, Ишви и Берия, и лэ́нгири пхэн Серах.
31. Чхавэ́ Берияскирэ сыс: Хеве́ро и Малхиило. Ёв сыс Бирзаифоскиро дад.
32. Хеверостыр бия́ндыя Яфле́то (Иафле́то), Шоме́ро и Хофамо, и Шуя, лэ́нгирэ пхэн.
33. Чхавэ́ Яфлетоскирэ сыс: Пасахо, Бимгало и Ашвафо. Ѓа́да, сыс чхавэ́ Иафлетоскирэ.
34. Чхавэ́ Шэмероскирэ сыс: Ахи, Рохга, Ихуба и Ара́мо.
35. Чхавэ́ Гелемоскирэ, лэ́скирэ-пшалэ́скирэ сыс: Цофахо, Имна, Шэле́шо и Амало.
36. Чхавэ́ Цофахоскирэ сыс: Суахо, Харнефе́ро, Шуало, Бэри, Имра,
37. Бецэро, Годо́, Шама, Шылшо, Ифрано и Бее́ра.
38. Чхавэ́ Ефероскирэ сыс: Ефуниё, Фиспо и Ара.
39. Чхавэ́ Уласкирэ сыс: Арахо, Ханиило и Рицыя.
40. Сарэ́ адалэ́ чхавэ́ Асироскирэ сыс шэралэ́ пэ лэ́нгирэ стрэ́чы (поколе́нии), мануша́ выкэдынэ́, мануша́, савэ́ сыс мурша́ пэ марибэ́н, шэралэ́ барыдыра́. Зачхиндлэ́ сыс ёнэ дрэ родоскирэ списки ваш халадэнгэ, ваш марибэ́н, пир гиныбэ́н сыс лэн биш тэ шов тысёнцы мануша́.
1. Вениаминостыр бия́ндыя Бэла, лэ́скиро англатуно́ чхаво́, яви́р Ашбе́ло, три́то Ахраё,
2. Шта́рто Ноха и па́нджто Рафа.
3. Чхавэ́ Бэласкирэ сыс: Адаро, Гера, Авиудо,
4. Авишуа, Наамано, Ахоахо,
5. Гера, Шефуфано и Хурамо.
6. И ґа́да, сыс чхавэ́ Егудоскирэ, савэ́ сыс родэнгирэ шэралэ́, савэ́ дживдэ́ кэ Ге́ва и пиритрадынэ дро Манахафо:
7. Наамано, Ахия и Гера, саво́ вытрадыя́ лэн, лэ́стыр бия́ндыя Уза и Ахихудо.
8. Шегараимостыр бия́ндынэ чхавэ́ пэ Моавитоскири пхув пало́ дава́, сыр ёв отмэкця́ пэ́стыр Хушима и Баара, пэ́скирэ ромнен.
9. И бияндя́ лэ́стыр Ходеша, лэ́скири ромны́, Иовавос, Цывиёс, Мешос, Малхамос,
10. Еуцос, Шахиёс и Мирмос: ґа́да, сыс лэ́скирэ чхавэ́, шэралэ́ пэ стрэ́чы.
11. Хушыма бияндя́ лэ́скэ Авитувос и Елпаалос.
12. Чхавэ́ Елпаалоскирэ сыс: Еве́ро, Мишамо и Шэме́ро, саво́ чхудя́ Оно и Лодо и фо́рья, савэ́ сыс тэл лэ́скири зор, –
13. и Берия и Шэма. Ёнэ сыс шэралэ́ пэ Аиалоноскирэ-манушэ́нгирэ стрэ́чы. Ёнэ вытрадынэ́ Гефоскирэ манушэ́н.
14. Ахио, Шашако, Иремофо,
15. Зэвадия, Арадо, Еде́ро,
16. Михаило, Ишфа и Иоха – Берияскирэ чхавэ́.
17. Зэвадия, Мешуламо, Хизкиё, Хеве́ро,
18. Ишмераё, Излия и Иоваво – чхавэ́ Елпаалоскирэ.
19. Якимо, Зихриё, Завдиё,
20. Елиенаё, Цылфаё, Елиило,
21. Адаия, Бераия и Шымрафо – Шымеяскирэ чхавэ́.
22. Ишпано, Еве́ро, Елиило,
23. Авдоно, Зихриё, Ханано,
24. Ханания, Еламо, Антофия,
25. Ифдия и Фенуило – Шашакоскирэ чхавэ́.
26. Шамшэраё, Шэхария, Афалия,
27. Иаре́шыя (Яре́шия), Елия и Зихриё, Ерохамоскирэ чхавэ́.
28. Адалэ́ сыс родэнгирэ шэралэ́, дрэ пэ́скирэ стрэ́чы шэралэ́. Ёнэ дживдэ́ кэ Ерусалимо.
29. Кэ Гавао́но дживдэ́: Гаваонитянэнгиро дад, – лэ́скирэ-ромнякиро лав сыс Мааха, –
30. И лэ́скиро чхаво́, англатуно́ Авдоно, пал лэ́стэ Цуро, Кисо, Ваало, Надаво,
31. Гедоро, Ахио, Зехе́ро и Миклофо.
32. Миклофостыр бия́ндыя Шымея. И ёнэ дживдэ́ пашы́л пэ́скирэ пшалэ́ндэ кэ Ерусалимо, кхэтанэ́ пэ́скирэ пшалэ́нца.
33. Неростыр бия́ндыя Кисо; Кисостыр бия́ндыя Са́уло; Саулостыр бия́ндыя Ионафа́но, Мелхисуё, Авинадаво и Эшбаало.
34. Чхаво́ Ионафаноскиро сыс Мерибаало, Мерибаалостыр бия́ндыя Миха.
35. Чхавэ́ Михаскирэ: Пифоно, Меле́го, Фааре́я и Аха́зо.
36. Ахазостыр бия́ндыя Иоиада; Иоиадостыр бия́ндыя Алеме́фо, Азмаве́фо и Замвриё; Замвриёстыр бия́ндыя Моца;
37. Моцастыр бия́ндыя Бинэё. Рефаия лэ́скиро чхаво́; Елеасо, лэ́скиро чхаво́; Ацэло, лэ́скиро чхаво́.
38. Ацэлостэ сыс шов чхавэ́, и, ґа́да, сыс лэ́нгирэ лава́: Азрикамо, Бохру, Исмаило, Шэария, Овадия и Ханано; сарэ́ ёнэ сыс Ацэлоскирэ чхавэ́.
39. Чхавэ́ Ешэкоскирэ, лэ́скирэ пшалэ́скирэ сыс: Уламо, лэ́скиро англатуно́ чхаво́, яви́р Иеушо, три́то Елифеле́то.
40. Чхавэ́ Уламоскирэ сыс мануша́ муршканэ́, савэ́ дэ́нас карье лукостыр, лэ́ндэ сыс бут чхавэ́ и ўнуки (непо́ты): шэл тэ пандждэша́. Сарэ́ ёнэ сыс Вениамино́скирэ чхавэ́ндыр.
4. Мэ пририпирдём Дэвлэ́с, ке́ли ма́нгэ яця́ пхаро́, мэ лыём тэ жалинавпэ и миро ду́хо (фа́но) пыя́.
5. Ёв рикирэ́ла мирэ́ якха́ тэ явэ́н откэрдэ, ма́нгэ исын пхаро́ и мэ на могина́ва тэ ракира́в.
6. Мэ думиндём (да́вас годы пэ́скэ) пал пхуранэ́ дывэса́, ґаратунэ́ дывэса́.
7. Мэ пририпирава мири́ гилы́ раты́, мэ рипирава мирэ́ илэ́са и миро ду́хо (фа́но) добусовэс (стара́тельнэс) допхучэлас:
8. “Ци Рай Дэвэ́л ячкирэ́ла амэн пэ сарэ́ ве́ки? Ци Лэ́скири ла́ска на рисёла палэ?
9. Ци Лэ́скири лачхэ́-илы́ткима кончындяпэ? Ци лэ́скиро пхэндло́ лав на явэ́ла буты́р кэ амэ?
13. Дылыно́ чхаво́ кэрэ́ла бари би́да дадэ́скэ; ромны́, сави́ чингардэлапэ, исын сы́рбы пани́, со пэрэ́ла и ўса́ды (сак) чхинэла дрэ кана́.
14. Кхэр и барвалыпэ́н исын мэкно́ миштыпэ́н дадэндыр, нэ барэ́-годякири ромны́ исын да́ро Ра́стыр-Дэвлэ́стыр.
22. Ке́ли халадэ́нгирэ барыдыра́ явнэ́ дро штарибэ́н, ёнэ никонэ́с одо́й на латхнэ́, рисинэ́ палэ и роспхэндлэ́ пал дава́, пхэни́:
23. “Штарибэ́н исын пхандло зоралэ́с, и ракхибна́рья исын тэрдэ́ пашы́л вудара́, нэ, ке́ли амэ загиям андрэ́, одо́й на латхям никонэ́с.
24. Нэ ке́ли шундлэ́ далэ́ лава́, – пэ́рво раша́нгиро барыдыро́, ракхибнарьенгиро барыдыро́ и яви́р раша́нгирэ барыдыра́, ёнэ на могиндлэ́ нисо́ тэ ґалён, сыр дава́ саро́ могиндя́ тэ явэ́л?
25. Нэ вари-саво́ ману́ш явдя́ и пхэндя́ лэ́нгэ: “Ѓа́да, одолэ́ мануша́, савэ́н тумэ́ чхудэ́ дро штарибэ́н, исын тэрдэ́ дрэ Кхангири́ и сыклякирэ́на манушэ́н.”
26. Тэды ракхибнарье́нгиро барыдыро́ пэ́скирэ халадэнца гия́ и лачхипна́са яндлэ́ палэ лэн, пал-дова́ со дара́ндынэ манушэ́ндыр, соб (кай) тэ на домарэн лэн барэ́нца.
27. И ёнэ яндлэ́ лэн и чхудэ́ анги́л Синедрионо. О пэ́рво раша́нгиро барыдыро́ пхуця́ лэ́ндыр, ракири́:
28. “Ци на шылалэс амэ припхэндям тумэ́нгэ тэ на сыклякирэ́н пал Адалэ́-Манушэ́скиро лав? Нэ тумэ́ усае́кх розлыджинэ сыклякирибэ́н пир саро́ Ерусалимо, и кэ саро́ тумэ́ камэ́на тэ чхувэ́н пэ амэ́ндэ банг пал Адалэ́-Манушэ́скиро рат.”
29. Нэ Пэ́три и Апо́столы отпхэндлэ́: “Амэ сам бангэ́ (мусинаса) тэ кандас Дэвлэ́с, а на манушэ́н.
30. Амарэ́-дадэ́нгиро Дэвэ́л отджидякирдя́ Исусо́с мэрибна́стыр, савэ́с тумэ́ мулякирдэ́, ублави Лэс пэ кашт.
31. Нэ Дэвэ́л ґаздыя́ Лэс Пэ́скирэ чачэ́ вастэ́са, сыр Шэрэ Рас и Зракхибнарис, соб (кай) Израилё пир Лэ́стэ тэ рискирэ́л пэ́скиро джиибэ́н кэ Дэвэ́л, и соб (кай) тэ отмэкэнпэ грэ́хи.
32. И амэ сам якхи́тка далэскэ сарэскэ и Свэ́нто Ду́хо (Фа́но), Савэс Дэвэ́л дыя́ одолэ́нгэ, кон кандэ́ла Лэс.”
33. Нэ ке́ли ёнэ шундлэ́ дава́ саро́, лэн лэлас бари холы́ и ёнэ камэнас тэ замарэ́н Апостолэн.
34. Машкир лэ́ндэ сыс екх Фарисеё, сыклякирибнари пир Зако́но, савэ́стэ сыс паты́в анги́л манушэ́ндэ, кхардэ́ лэс Гамалиило’, ёв уштыя́ анги́л Синедрионо и припхэндя́ тэ лыджа́н яври́ Апостолэн пэ вари-саво́ часо,
35. а лэ́нгэ пхэндя́: “Мануша́лэ Израилёскирэ! Миштэ́с дэн годы́ пэ́скэ (подуминэн) пал дова́, со тумэ́ камэ́на тэ кэрэ́н адалэ́ манушэ́нца;
36. сарэ́са наґара явдя́ адари́к вари-саво́ Февда, саво́ выдыя пэс пал барэ́ манушэ́стэ, и пал лэ́стэ гинэ́ пашэ́ штар шэла́ тысёнцы мануша́; ёв сыс замардо, и сарэ́, кон гия́ пал лэ́стэ, рознашнэпэ и хасинэ́.
37. Пало́ (после) лэ́стэ ґаздыя́пэ Юда Галилеятыр, ёв явдя́ дрэ дава́ часо, ке́ли сыс манушэ́нгиро пиричхиныбэн, ёв злыджия пал пэ́стэ бут манушэ́н, и лэс адя́кэ-паць замардэ́ и сарэ́, кон сыс лэ́са, рознашнэпэ.
38. А какана́ мэ ракира́ва тумэ́нгэ: отячэн адалэ́ манушэ́ндыр и мэкэ́н лэн; ко́ли далэ́ ду́мы и буты́ манушэ́ндыр, то дава́ саро́ хасёла;
39. а ко́ли Дэвлэ́стыр, тэды тумэ́ на дэ́на ра́да тэ пиризорьякирэн лэн; ракхэ́нпэ, соб (кай) и тумэ́ тэ на тэрдён марибна́са проти Дэвлэ́стэ.”
40. Ёнэ кандынэ́ лэс и кхардэ́ Апостолэн, и ёнэ мардэ́ лэн; и ке́ли ёнэ припхэндлэ лэ́нгэ тэ на ракирэ́н пал Исусо́скиро лав, отмэкнэ лэн.
41. Палдава́ Апо́столы гинэ́ Синедрионостыр радыма́са, пал-дова́ со лэ́нгэ приявдяпэ тэ пирилыджан дасаво ладжаипэ́н ваш Дэвлэ́скирэ-Исусо́скиро лав.
42. И со дывэ́с дрэ Кхангири́ и пир кхэра́, ёнэ на мэкэнас тэ сыклякирэ́н и тэ роспхэнэ́н бахтало́ лав пал Исусо́стэ Христосо́стэ.
Romani Bible Baltic 2019
United Bible Societies for the Baltic Romani Mission