Bible in one year June 231 Chronicles 9:1-441. Адя́кэ, сыс пиригиндлэ пир пэ́скирэ ро́ды сарэ́ Израильтя́ни, и, акэ, ёнэ сыс зачхиндлэ́ дрэ бэршы́тка архи́вы Израилёскирэ кралье́ндэ. Мануша́ Юдэя́тыр пал пэ́скиро чорипэ́н сыс пирилыджинэ тэ дживэ́н кэ Вавило́но.2. Англатунэ́ мануша́, савэ́ дживдэ́ пэ пэ́скирэ штэ́ты, пир Израилёскирэ фо́рья, сыс Израильтя́ни, рашая́, Леви́ты и Нефинеи, кон дживдя́ кэ Ерусалимо.3. Кэ Ерусалимо дживдэ́ вари-савэ́ мануша́ Юда́скирэ чхавэ́ндыр и Вениамино́скирэ чхавэ́ндыр, и Ефремо́скирэ и Манасия́скирэ чхавэ́ндыр:4. Уфаё, чхаво́ Амиудоскиро, чхаво́ Омрискиро, чхаво́ Имриёскиро, чхаво́ Ваниёскиро – чхавэ́ндыр Фаресоскирэндыр, Юда́скирэ-чхавэ́скирэ;5. чхавэ́ндыр Шылоноскирэндыр – Асаия, англатуно́ бия́то и лэ́скирэ чхавэ́;6. Чхавэ́ндыр Зараскирэндыр – Иеуило и лэ́нгирэ пша́ла, – шовшэла́ енядэша;7. чхавэ́ндыр Вениаминоскирэндыр, Салу, чхаво́ Мешуламоскиро, чхаво́ Годавиёскиро, чхаво́ Гасенуёскиро;8. и Ивния, чхаво́ Ерохамоскиро, и Эла, чхаво́ Узиёскиро, Михриёскирэ-чхавэ́скиро, и Мешуламо, чхаво́ Шэфатияскиро, Регуилоскирэ чхавэ́скиро, Ивнияскирэ чхавэ́скиро,9. и лэ́нгирэ пша́ла, пир лэ́нгирэ ро́ды; еняшэла пандждэша́ шов, – сарэ́ адалэ́ мурша́ сыс родэнгирэ шэралэ́ дрэ пэ́скирэ стрэ́чы (поколении).10. А рашандыр: Едаия, Иоиариво, Иахино,11. и Аза́рия, чхаво́ Хелкияскиро, чхаво́ Мешуламоскиро, чхаво́ Садокоскиро, чхаво́ Мераиофоскиро, чхаво́ Ахитувоскиро, саво́ сыс барыдырэ́са дро Дэвлэ́скиро Кхэр;12. и Адаия, чхаво́ Ерохамоскиро, чхаво́ Пашхуроскиро, чхаво́ Малхияскиро; и Маасаё, чхаво́ Адиелоскиро, чхаво́ Яхзероскиро, чхаво́ Мешуламоскиро, чхаво́ Имероскиро;13. и лэ́нгирэ пша́ла, савэ́ сыс шэралэ́ пэ пэ́скирэ ро́ды: тысёнцо эфташэла́ шовдэша́ – мануша́ сама фэды́р дрэ буты́ сыр рашая́ дро Дэвлэ́скиро Кхэр.14. А Левитэндыр: Шэмаия, чхаво́ Хашувоскиро, чхаво́ Азрикамоскиро, чхаво́ Хашавияскиро, – Мерарискирэ чавэндыр;15. и Вакбакаро, Хере́шо, Галало, и Матфания, чхаво́ Михаскиро чхаво́ Зихриёскиро, чхаво́ Асафоскиро;16. и Овадия, чхаво́ Шемаияскиро, чхаво́ Галалоскиро, чхаво́ Идифуноскиро, и Берехия, чхаво́ Аса́скиро, чхаво́ Елканоскиро, саво́ дживдя́ дрэ гава́ Нетофафоскирэ.17. Портэнгирэ ракхибна́рья (привратники): Шалумо, Акубо, Талмоно и Ахимано, и лэ́нгирэ пша́ла; Шалумо сыс шэрало́.18. И кэ далэ́ дывэса́ далэ́ ракхибна́рья исын пашы́л кральенгири по́рта, кэ васто́ко, рикирэ́на стрэ́га ваш Левиёскирэ чхавэ́нгэ.19. Шалумо, чхаво́ Корескиро, чхаво́ Евиасафоскиро, чхаво́ Кореёскиро, и лэ́скирэ пша́ла лэ́скирэ родо́стыр, Кореяни, пир пэ́скиро бутярно рэ́ндо, сыс ракхибна́рья пашы́л скиниякирэ проги, а лэ́нгирэ дада́ ракхнэ загиибэ́н дро Ра́скирэ-Дэвлэ́скиро ста́но (лод).20. Финее́со, чхаво́ Елизароскиро, сыс англэды́р (вагэдыр) барыдыро́ пэ лэ́ндэ, и Рай Дэвэ́л сыс лэ́са.21. Заха́рия, чхаво́ Мешэлемияскиро, сыс портэнгиро ракхибнари пашы́л вудара́ дрэ скэдыибна́скири ски́ния.22. Сарэ́н лэн, выкэдынэн дрэ ракхибнарье́ндэ пашэ́ по́рта кэ проги, сыс дуйшэла́ дэшуду́й. Лэн зачхиндлэ́ дрэ родоскирэ списки пир лэ́нгирэ гава́. Лэн чхудя́ Дави́до и Самуи́ло – ясновидцо (магико) пал лэ́нгиро чачипэ́н.23. И ёнэ, и лэ́нгирэ чхавэ́ сыс пэ ракхибэн пашы́л Ра́скирэ-Дэвлэ́скирэ-Кхэрэ́скири по́рта, пашы́л скиниякиро кхэр.24. Пэ штар рига́ сыс портэнгирэ ракхибна́рья: пэ васточно, за́падно (пэ пал-панякири риг), паш-дывэсы́тко (южно).25. Пша́ла лэ́нгирэ дживдэ́ дрэ пэ́скирэ гава́, ёнэ явэ́нас кэ пша́ла часостыр кэ часо пэ эфта́ (битринэ́нгиро дэш) дывэса́.26. Адалэ́ штар барыдыра́ пэ портэнгирэ ракхибнарьендэ, Леви́ты, сыс дрэ паты́в; ёнэ сыс чхудэ́ тэ ракхэ́н кхэра́ и пираля́ Дэвлэ́скирэ Кхэрэскир.27. Трусця́л (кругом) Дэвлэ́скиро Кхэр ёнэ и ратькирдэ, пал-дова́ со пэ лэ́ндэ сыс отпхэныбэ́н тэ ракхэ́н, и лэ́нгэ сыс трэй кажно зло́ко тэ отчхакирэн вудара́.28. Вари-савэ́ лэ́ндыр сыс чхудэ́ кэ кхорэ́ (сасу́ды) ваш свэ́нто буты́, адя́кэ со гиныбнаса ёнэ прилэнас кхорэ́ и гиныбнаса ёнэ выдэнас.29. Явирэнгэ лэ́ндыр сыс допатяндлэ яви́р кхангирья́кирэ чарэ́ и сарэ́ свэ́нта хабэна: фэды́р яржо́, и мол, и еле́ё, и ладано, и ароматытка чарья́.30. А вари-савэ́ раша́нгирэ чхавэ́ндыр счхувэнас миро ароматытконэ чарье́ндыр.31. Матафия Левитэндыр, – ёв сыс англатуно́ Селумоскирэ-Кореяниноскиро, лэ́скэ сыс допатяндло тэ пэкэл пэ скорове́ды (хича),32. Вари-савэ́нгэ лэ́нгирэ пшалэ́ндыр, Каафоскирэ чхавэ́ндыр, сыс допатяндло тэ скэдэ́н (тэ приготовинэн) свэ́нта марэ́, соб (кай) тэ янэс лэн кажно са́вато (субо́та).33. Мануша́, савэ́ баганас, сыс шэралэ́ пэ Левитэ́нгирэ стрэ́чы (поколе́нии), дрэ кхангирья́кирэ шту́бы, и сыс вольна (псирэ) залыибнастыр, пал-дова́ со дывэ́с и рат ёнэ сыс бангэ́ тэ залэнпэ пэ́скирэ багаибнаса.34. Адалэ́ сыс шэралэ́ пэ Левитэ́нгирэ стрэ́чы, шэралэ́ дрэ пэ́скирэ ро́ды. Ёнэ дживдэ́ кэ Ерусалимо.35. Кэ Гавао́но дживдэ́: дад Гаваонитянэнгиро Иеило – лав лэ́скирэ-ромнякиро сыс Мааха, –36. и чхаво́ лэ́скиро, англатуно́ Авдоно, пал лэ́стэ Цуро, Кисо, Ваало, Не́ро, Надаво,37. Гедоро, Ахио, Заха́рия и Миклофо.38. Миклофостыр бия́ндыя Шымеамо. И ёнэ дживдэ́ пашы́л пэскирэндэ пшалэ́ндэ кэ Ерусалимо, кхэтанэ́ пэ́скирэ пшалэ́нца.39. Неростыр бия́ндыя Кисо, Кисостыр бия́ндыя Са́уло, Саулостыр бия́ндыя Ионафа́но, Мелхисуё, Авинадаво и Ешбаало.40. Чхаво́ Ионафаноскиро сыс Мерибаало; Мерибаалостыр бия́ндыя Миха.41. Чхавэ́ Михаскирэ сыс: Пифоно, Меле́хо, Фаре́ё и Аха́зо.42. Ахазостыр бия́ндыя Иае́ро; Иаеростыр бия́ндыя Алеме́фо, Азмаве́фо и Замврия; Замвриястыр бия́ндыя Моца;43. Моцастыр бия́ндыя Бине́ё: Рефаия, лэ́скиро чхаво́; Елеаса, чхаво́ лэ́скиро; Ацэло, чхаво́ лэ́скиро.44. Ацэлостыр сыс шов чхавэ́, и ґа́да, лэ́нгирэ лава́ сыс: Азрикамо, Бохру, Исмаило, Шэария, Овадия и Ханано. Адалэ́ сыс чхавэ́ Ацэлоскирэ.1 Chronicles 10:1-141. Филистимля́ни мардэ́пэ Израилёса, и пиризорьякирэнас дро марибэ́н Филистимля́ни Израильтянэ́н, и пынэ́ домардэ́ пэ бэ́рга Гелвуа.2. И традынэпэ Филистимля́ни пал Саулостэ и лэ́скирэ чхавэ́ндэ, и домардэ́ Филистимля́ни Ионафанос, и Авинадавос, и Мелхисуёс, Саулоскирэн чхавэ́н.3. Марибэ́н проти Саулостэ яця́ зоралэды́р, и карье́-дыибнаскирэ (стрелки) лукэндыр сы́гэс гинэ́ пэ лэ́стэ, адя́кэ со ёв сыс пхусадо андрэ лукэнца.4. И пхэндя́ Са́уло пэ́скирэ манушэ́скэ, саво́ лыджалас марды́тко (оружыё): “Вылэ тыри́ курта́ла и пхусав пэ мэрибэн ла́са ман, соб (кай) тэ на явэ́н адалэ́ наобчхиндлэ, и тэ на здекинэнпэ пэ ма́ндэ.” Нэ ману́ш, саво́ лыджа́ла марды́тко, на дэ́лас ра́да; пал-дова́ со древа́н страхадыя. Тэды Са́уло лыя́ курта́ла и пыя́ пэ ла́тэ.5. Лэ́скиро ману́ш, саво́ лыджалас марды́тко, дыкхця́, со Са́уло мыя́, и кокоро́ пыя́ пэ курта́ла, и мыя́.6. И мыя́ Са́уло, и трин лэ́скирэ чхавэ́, и саро́ лэ́скиро кхэр кхэтанэ́ лэ́са мыя́.7. Ке́ли дыкхнэ́ Израильтя́ни, савэ́ сыс пэ до́ло, со сарэ́ нашэ́на, и со Са́уло и лэ́скирэ чхавэ́ мынэ́, тэды мэкнэ́ пэ́скирэ фо́рья и рознашнэпэ; а Филистимля́ни явнэ́ и лынэ́ тэ дживэ́н дрэ лэ́ндэ.8. Пэ яви́р дывэ́с явнэ́ Филистимля́ни тэ обкэдэн мулэн и латхнэ́ Саулос и лэ́скирэ чхавэ́н, мулэн пэ Гелвуяскири бэ́рга.9. И розуридэ лэс, и злынэ лэ́стыр лэ́скиро шэро́ и лэ́скири марды́тко, и бичхадэ́ пир Филистимиякири пхув, соб (кай) дэн тэ джинэ́н пал дава́ анги́л лэ́нгирэ и́долы и анги́л манушэ́ндэ.10. И чхудэ́ лэ́скиро марды́тко пэ мангипнытко штэ́то (капишча) пэ́скирэ дэвлорэнгиро, и лэ́скиро шэро́ чхудэ́ дро Дагоноскиро кхэр.11. И шундя́ саро́ Иависо Галаадоскиро саро́, со кэрдэ́ Филистимля́ни Саулоса.12. И ґаздынэ́пэ сарэ́ зоралэ́ мануша́, лынэ́ Саулоскиро тру́по и лэ́скирэ-чхавэ́нгирэ тру́пы, и яндлэ́ лэс дро Иависо, и гарадэ́ лэ́нгирэ кокалы́ тэл дэмбо дро Иависо, и постындлэ эфта́ дывэса́.13. Адя́кэ мыя́ Са́уло пал пэ́скиро чорипэ́н, саво́ ёв кэрдя́ анги́л Растэ-Дэвлэ́стэ, пал дова́, со на ракхця́ Ра́скирэ-Дэвлэ́скиро лав и обрисия кэ човаханы пхучыбнаса,14. а на пхуцяпэ Ра́стыр-Дэвлэ́стыр. Палдава́ Ёв и мулякирдя́ лэс, и пиридыя кралипэ́н Давидо́скэ, Есеёскирэ чхавэ́скэ.Psalms 77:10-1510. Ци Дэвэ́л бистырдя тэ тангинэ́л? Ци Ёв парудя Пэ́скиро мило лачхэ́-илы́ткима пэ холы́?” Сэ́ла.11. И пхэндём мэ: “Кадава́ исын мири́ илытко дукх, со Най Вучэдырэскиро чачо́ васт парудыя.”12. Мэ ява́ва тэ рипирав Ра́скирэ–Дэвлэкирэ бутя́; чачо́, мэ ява́ва тэ рипирав Тырэ́ шука́р ди́вы, со Ту ґара́ кэрдя́н,13. и Мэ ява́ва тэ розлав ґодяса сарэ́ Тырэ́ бутя́ и ява́ва ле́нтэс тэ роспхэнав пал дова́, со Ту кэрдя́н.14. Дэ́вла! Саро́, со Ту кэрэ́са, исын свэ́нто: кон исын дасаво баро́, сыр Ту сан, Дэ́вла?15. Ту сан Дэвэ́л, Саво́ кэрэ́ла ди́вы, Ту сыкадян Пэ́скири зор машки́р манушы́тка на́цыи.Proverbs 19:15-1615. Набутякирибэн (кирнэ-масэнгирипэн) лыджа́ла манушэ́с дро хор соибэн, и биталанытко ману́ш явэ́ла тэ страдынэл бокха́тыр.16. Кон рикирлапэ кэ припхэныбэ́н, одова́ зракхэ́ла пэ́скиро ди. Кон на дыкхэ́ла, со ёв кэрэ́ла, кодова́ мэрэ́ла.Skutki 6:1-151. Нэ дрэ долэ́ дывэса́, ке́ли сыкляибны́тка ячнэ́ буты́р, выгия́ Елинистэндыр холямо́ ракирибэ́н пэ Юдэ́ндэ, со ёнэ бистрэна пал лэ́нгирэ пивлендэ (удовэндэ), ке́ли роздэна кажнонэ́-дывэсы́тко хабэ́н.2. Тэды дэшуду́й Апо́столы кэдынэ кхэтанэ́ сарэ́н сыкляибнытконэ́н и пхэндлэ́: “Намишто амэ́нгэ тэ ячкирас Дэвлэ́скиро лав, а тэ заласпэ скаминдэса.3. Палдава́, пшала́лэ, выкэдэн тумэ́ндыр эфта́ джиндлэ́ манушэ́н, савэ́ тэ явэ́н пхэрдэ́ Свэнтонэ́ Духо́са и годя́са, соб (кай) лэ́нгэ и тэ дыкхэ́н пал дая́ буты́;4. амэ кокорэ́ ява́са буты́р часо тэ отдас мангипнаскэ Дэвлэ́скэ и тэ роспхэнас Лэ́скиро лав.”5. Дасаво ракирибэ́н сыс сарэ́нгэ пир ило́; и ёнэ выкэдынэ́ Стехванос (Стефанос), манушэ́с, саво́ сыс пхэрдо́ Свэнтонэ́ Духо́са и патяибна́са и Филипос, и Прохорос, и Никанорос, и Тимонос, и Парменос, и Микалаёс (Николаёс), нэвонэ́-патяибнаскирэс, Наюдос Антиохиятыр,6. и савэ́н чхудэ́ анги́л Апостолэндэ, и ке́ли ёнэ мангнэпэ Дэвлэ́скэ, тэды ёнэ чхудэ́ васта́ упрэ́ пэ лэ́ндэ.7. И Дэвлэ́скиро лав розджаласпэ буты́р, и сыкляибны́тка дро Ерусалимо ячнэ́ древа́н бут, адя́кэ-паць и бут рашая́ упатя́ндынэ.8. Стехвано (Стефано), савэ́стэ сыс пхэрдо́ бахтякирибэ́н Дэвлэ́стыр и зор, кэрдя́ барэ́ ди́вы и знаме́нии (ґертыка́) машки́р манушэ́ндэ.9. Нэ вари-савэ́ мануша́ Либертийцынэнгирэ синагогатыр, и Киринейцынэнгирьятыр и Александрийцынэнгирьятыр, и одолэ́, савэ́ сыс Киликиятыр и Асиятыр, лынэ́ тэ допхэнэн Стехваноскэ.10. Адалэ́ мануша́ сыс бизорья́кирэ анги́л Духоскири зор и годы́, савья́са ракирдя́ Стехвано.11. Тэды ёнэ подракирдэ манушэ́н тэ пхэнэ́н: “Амэ шундя́м, сыр ёв ракирдя́ налачхэ́ лава́ пэ Мойзастэ и пэ Дэвлэ́стэ.”12. Лэ́нгэ удыяпэ хохаибнаса тэ подракирэн манушэ́н и годэпхурэн и лылваритконэн. Одолэ́ пынэ́ и ухтылдэ́ Стехванос, и лыджинэ́ лэс анги́л Синедрионо.13. И ёнэ яндлэ́ хоханэ́ якхитконэн, савэ́ допхэнэнас: “Адава́ ману́ш уса́ ракирэ́ла проти Свэ́нто Кхангири́ и Зако́но;14. амэ, хай, шундя́м, сыр ёв ракирдя́, со Ису́со Назаретостыр роспхагирэла Кхангири́ и парувэла присыкляибэн, саво́ амэ́нгэ дыя́ Мо́йза.”15. Сарэ́, кон сыс бэшто́ дрэ Синедрионо, ракхунэс дыкхнэ́ пэ Стехваностэ, и дыкхнэ́, со муй лэ́скиро зяинэла сы́рбы муй Янголостэ. Romani Bible Baltic 2019 Maintained by the United Bible Societies for the Baltic Romani Mission