Bible in one year - Пэ Балтитко Романи чиб

Bible in one year June 24

1. И скэдынэ́пэ сарэ́ Израильтя́ни кэ Дави́до дрэ Хевро́но, и пхэндлэ́: “Ѓа́да, амэ сам тыро́ кокало и лоч (плоть) тыри́;

2. и тася́, и три́то дывэ́с, ке́ли ишчо (инкэ́) Са́уло сыс крали́са, ту вылыджиян и залыджиян Израилё, и Рай Дэвэ́л, тыро́ Дэвэ́л, пхэндя́ ту́кэ: ‘Ту явэ́са тэ ракхэ́с Мирэн Израилёскирэ манушэ́н, и ту явэ́са Мирэ́-Израилёскирэ манушэ́нгирэ барыдырэ́са.’”

3. И явнэ́ сарэ́ пхурыдыра́ Израилёскирэ кэ кра́ли дро Хевро́но, и кэрдя́ лэ́нца Дави́до заве́то дро Хевро́но анги́л Ра́скирэ-Дэвлэ́скиро муй; и ёнэ помакхнэ Давидо́с дрэ крали́стэ пэ Израилё, пир Ра́скирэ-Дэвлэ́скиро лав, пирда́л Самуилостэ.

4. И гия́ Дави́до и саро́ Израилё кэ Ерусалимо, кэ Евусо. А одо́й сыс Евусеи, мануша́, савэ́ дживдэ́ пэ доя́ пхув.

5. И пхэндлэ́ Евусоскирэ мануша́ Давидо́скэ: “Ту на заджаса адари́к.” Нэ Дави́до лыя́ тва́рдыма/диз (кре́пость) Сио́но; дава́ исын фо́ро Давидо́скиро.

6. И пхэндя́ Дави́до: “Кон англэды́р сарэ́ндыр пиримарэла Евусее́н, одова́ ману́ш явэ́ла шэралэса и халадэ́нгирэ барыдырэ́са.” И загия́ англэды́р сарэ́ндыр Иоа́во, чхаво́ Саруяскиро, и кэрдя́пэ шэралэса.

7. Дави́до дживдя́ дрэ доя́ тва́рдыма/диз, палдава́ и кхардэ́ ла Давидо́скирэ фороса.

8. И ёв обкэрдя фо́ро трусця́л, лыи Милостыр (форо́стыр), саро́ трусця́л, и Иоа́во, обнэвякирдя палатунэ́ (после́дня) форо́скирэ паша́.

9. Саро́ гия́ лачхэ́с Давидо́стэ, и барьёлас ёв дрэ паты́в буты́р и буты́р, и Рай Дэвэ́л, болыбна́скирэ-янголэ́нгиро Дэвэ́л сыс лэ́са.

10. Ѓа́да, исын шэралэ́ зоралэ́ муршэндыр Давидо́стэ, савэ́ зоралэ́с лынэпэ лэ́са дро лэ́скиро кралипэ́н, кхэтанэ́ сарэ́ Израилёса, соб (кай) тэ чхувэ́с лэс крали́са, пир Ра́скирэ-Дэвлэ́скиро лав, пэ Израилё,

11. и ґа́да, ци бут исын зоралэ́ мурша́, савэ́ сыс Давидо́стэ: Иесваало [Ешобеамо-ю.о.], чхаво́ Ахаманияскиро, шэрало́ пэ трия́нда манушэ́ндэ. Ёв ґаздыя́ пэ́скиро чхурдыибнытко буст пэ триншэла́ манушэ́ндэ и домардя́ лэн пал е́кх мо́ло.

12. Пал лэ́стэ сыс Елеазаро (Елиза́ро), чхаво́ Додоскирэ-Ахохияниноскиро, ёв сыс тринэ́ зоралэндыр.

13. Ёв сыс Давидоса кэ Фасдамимо, карик Филистимля́ни скэдынэ́пэ пэ марибэ́н. Одо́й паш фэ́лда сыс засеиндлы ґэрстоса (ячменёса), и мануша́ нашнэ́ Филистимлянэндыр.

14. Нэ ёнэ тэрдинэ́ машки́р фэ́лда, зракхнэ́ ла и домардэ́ Филистимлянэн. И дариндя Рай Дэвэ́л баро́ зракхибэ́н!

15. Тринджинэ адалэн шэралэн трияндатыр гинэ́ упрэ́ пэ бэ́рга кэ Дави́до, дрэ ґеба́р (пешчэра) Одоламо, ке́ли Филистимлянэнгиро ста́но сыс тэрдо́ пэ до́ло Рефаимэнгиро.

16. Дави́до тэды сыс дро зоралэ́ тынэ́нца штэ́то, а ракхибнытка халадэ́ Филистимлянэнгирэ сыс тэды дро Вифлее́мо.

17. И зоралэ́с закамдяпэ тэ пьел Давидо́скэ, и ёв пхэндя́: “Кон панякирэла ман пане́са Вифлеемоскирэ ґанынгатыр, со исын пашы́л по́рта?”

18. Тэды адалэ́ трин промардэпэ пирда́л Филимстимиякиро ста́но, и кэдынэ пхэрдэ́с пани́ Вифлеемоскирэ ґанынгатыр, со исын пашы́л по́рта, и лынэ́, и яндлэ́ Давидо́скэ. Нэ Дави́до на закамдя́ тэ пьел лэс и вычхудя́ лэс ваш Ра́скирэ-Дэвлэ́скири сла́ва,

19. и пхэндя́: “Зра́кх ман, Раё Дэ́вла, соб (кай) мэ тэ кэра́в дава́! Ци лава́ мэ тэ пья́в рат адалэнгирэ муршэнгирэ, савэ́ отдэнас пэ́скирэ дия́! Пал-дава́ со ёнэ рискиндэ пэ́скирэ джиибнаса, и ёнэ яндлэ́ пани́.” И на закамдя́ тэ пьел лэс. Ѓа́да, со кэрдэ́ трин адалэ́ муршканэ́ мануша́.

20. И Аве́са, пшал Иоавоскиро, сыс шэрало́ тринэндыр; ёв домардя́ пэ́скирэ чхурдыибнытконэ бустяса триншэла́ манушэ́н, и сыс дрэ сла́ва одолэ́ тринэндэ.

21. Тринэндыр ёв сыс славутнэдыр и сыс барыдырэ́са; нэ одолэнца тринэнца ёв на ровниндяпэ.

22. О Ване́я, чхаво́ Иодаёскиро, муршканэ́-муршэскиро, баро́ пир рэ́нды, Кавцеилостыр. Ёв домардя́ дуе́н Армилоскирэ Моавитонскирэн чхавэ́н; ёв згия и замардя́ шчэрэс дро рово (хохой), дро ивитко часо.

23. Ёв мулякирдя́ Египтянинос, манушэ́с барипнаса дрэ пандж куня́. Дрэ васт Египтяниноскиро сыс чхурдыибнытко буст, сыр навое ткачостэ (катвалэстэ); а ёв подги́я кэ ёв каштэса, и, выкусця чхурдыибнытко буст Египтяниноскирэ вастэ́стыр, и замардя́ лэс лэ́скирэ бустяса;

24. Ѓа́да, со кэрдя́ Ванея, чхаво́ Иодаёскиро. И ёв сыс дрэ сла́ва одолэ́ тринэндэ муршканэндэ;

25. ёв сыс славутнэдыр триндэшэндыр, нэ пэрвонэ́ тринэнца на ровниндяпэ. И Дави́до чхудя́ лэс ординарцоса, саво́ сполнинэлас лэ́скирэ припхэныбэна́.

26. А шэралэ́ халадэндыр сыс: Асаило, пшал Иоавоскиро; Елханано, чхаво́ Додоскиро, Вифлеемостыр;

27. Шама Гародитянино; Хере́цо Пелонитянино;

28. Ира, чхаво́ Икешоскиро, Фекоитянино; Евиезе́ро Анафофянино;

29. Сивхаё Хушатянино, Илаё Ахохиянино;

30. Магараё Нетофатитянино; Хеле́до, чхаво́ Ваанаскиро, Хетофафянино;

31. Итаё, чхаво́ Рибаёскиро, Гиватыр Вениаминовоскирьятыр; Ване́я Пирафонянино;

32. Хураё Нагалё-Гаашостыр; Авие́ло Араватыр;

33. Азмаве́фо Бахарумиянино; Елияхба Шаалбонянино.

34. Чхавэ́ Гашемоскирэ Гизонитяниноскирэ сыс: Ионафа́но, чхаво́ Шаге́скиро, Гараритянино;

35. Ахиамо, чхаво́ Сахароскиро, Гараритянино; Елифало, чхаво́ Уроскиро;

36. Хефе́ро Махеростыр; Ахиа Пелонитянино;

37. Хецроё Кармилитянино; Наараё, чхаво́ Езбаёскиро;

38. Иоилё, пшал Нафаноскиро; Мивхаро, чхаво́ Гагриёскиро;

39. Цэле́ко Амонитянино; Нахараё Берофянино, ману́ш, саво́ лыджалас марды́тко (оружыё) Иоавоскэ, чхавэ́скэ Саруяскирэскэ;

40. Ира Ифриянино; Гаре́бо Ифриянино;

41. Урия Хетеянино; Завадо, чхаво́ Ахлаёскиро;

42. Адина, чхаво́ Шызаскиро, Рувимлянино, шэрало́ Рувимлянэнгиро, и лэ́стэ сыс дэшутрин;

43. Ханано, чхаво́ Маахаскиро; Иосафа́то Мифниянино;

44. Узия Аштерофянино; Шамо и Иеие́лё [Ехиэлё-ю.о.], чхавэ́ Хофамоскирэ Ароеряниноскирэ;

45. Иедиаэло, чхаво́ Шимрияскиро, и Иоха, пшал лэ́скиро Фицыянино;

46. Елие́лё Махавимостыр, и Иериваё и Иошавия, чхавэ́ Елнаамоскирэ, и Ифма Моавитянино;

1 Chronicles 12:1-40

1. И адалэ́ мануша́ адя́кэ-паць явнэ́ кэ Дави́до дро Секелаго, ке́ли ёв ишчо (инкэ́) гарадёлас (чхакирэласпэ) кригал Саулостыр, чхавэстыр Кисоскирэстыр, и сыс муршканэндыр, савэ́ подынэ васт (помогиндлэ) дро марибэ́н,

2. лэ́ндэ сыс луки, ёнэ и чхурдэнас зэрвонэ (левонэ) и чачэ́ (правонэ) вастэ́са бара́ и, ёнэ дэ́нас карье лукэндыр. Ёнэ сыс пшалэ́ндыр Саулоскирэндыр, Вениаминостыр:

3. шэрало́ сыс Ахиезе́ро, пал лэ́стэ сыс Иоа́со, пал лэ́стэ сыс чхавэ́ Шемаяскирэ Гиватыр; Езие́ло и Феле́то; чхавэ́ Азмавефоскирэ; Бераха и Иегу Анафофостыр;

4. Ишмаия Гаваонитянино, муршари трияндэндыр и барыдыро́ пэ трияндэндэ; Ереме́ё, Яхазиило, Иозавадо Гедератыр.

5. Елузаё, Еримофо, Веалия, Шемария, Сафатия Харифиянино;

6. Елкана, Ишыяху, Азариило, Иоезе́ро и Иошавамо, Кореяни;

7. и Иоела и Зевадия, чхавэ́ Ерохамоскирэ Гедоростыр.

8. И вари-савэ́ мануша́ Гадитянэндыр пиригинэ́ кэ Дави́до дрэ фо́рья зоралэ́ тынэ́нца, пэ чхучи́ пхув, мануша́ муршканэ́, марибны́тка, савэ́ндэ сыс шчы́ты и чхурдыбнытка бустя́ (коп΄и); лэ́ндэ сыс муя́ сыр шчэрэндэ (левэндэ) – муя́ лэ́нгирэ, и ёнэ сыс сыгна сыр серны пэ бэ́рги.

9. Шэрало́ Езеро, яви́р Овадия, три́то Елиаво,

10. шта́рто Мишмана, па́нджто Ереме́ё,

11. шо́вто Афаё, эфта́то (битринэ́нгиро дэ́што) Елиэло,

12. охто́то (бидуе́нгиро дэ́што) Иоханано, еня́то Елзавадо,

13. дэ́што Ереме́ё, дэшупе́рво Махбанаё.

14. Ёнэ сыс шэралэ́ чхавэ́ндыр Гадоскирэндыр пэ халадэ́ндэ: тыкнэды́р пэ шэла́, и барыдыро́ пэ тысёнцы.

15. Ёнэ пиригинэ́ Иорда́но дро пэ́рво чхон, ке́ли ёв выджа́ла пэ́скирэ бэргэндыр, и рострадынэ сарэ́н манушэ́н, савэ́ дживдэ́ пэ до́ло, кэ васто́ко и кэ западо (кэ пал-паня).

16. И явнэ́ адя́кэ-паць вари-савэ́ мануша́ чхавэ́ндыр Вениаминоскирэндыр и Юдаскирэндыр дрэ фо́рья зоралэ́ тынэ́нца кэ Дави́до.

17. Дави́до гия ангил пэ стре́ч лэ́нгэ и пхэндя́ лэ́нгэ: “Ко́ли раманёса (миро́са) явнэ́ тумэ́ кэ мэ, соб (кай) тэ помогинэн ма́нгэ, тэды мэк тэ явэ́л ма́ндэ тумэ́нца екх ило́; а ко́ли ваш дова́, соб (кай) хохавэс тэ отдэ́н ман вэргэ́нгэ мирэнгэ, то дыкхи́, со нанэ дош пэ мирэ́ васта́, тэды мэк тэ дыкхэ́л Дэвэ́л амарэ́ дадэ́нгиро и тэ розсэндякирэл.”

18. Тэ́ньци згия ду́хо (фа́но) пэ Амасаёстэ, кон сыс шэрало́ пэ трия́нда, и пхэндя́ ёв: “Рама́нё (миро) ту́кэ, Дави́дэ, и тэ явэ́л ту́са, чхаво́ Есеёскиро; рама́нё ту́кэ, и рама́нё помогибнаскирэнгэ тырэнгэ; пал-дова́ со помогинэла ту́кэ Дэвэ́л тыро́.” Тэды прилыя́ лэн Дави́до и чхудя́ лэн шэралэнца пэ халадэ́ндэ.

19. И вари-савэ́ мануша́ Манасия́скирэ родо́стыр пиригинэ́ кэ Дави́до, ке́ли ёв гия́ Филистимлянэнца пэ марибэ́н пэ Саулостэ, нэ на помогиндя лэ́нгэ, пал-дова́ со шэралэ́ Филистимска, порадины, отбичхадэ лэс, ракири́: “Пэ амаро́ шэро́ ёв пириджала кэ хула́й лэ́скиро, Са́уло.”

20. Ке́ли ёв рисия́ дро Секелаго, тэды пиригинэ́ кэ ёв Манасиянэндыр: Аднахо, Иозавадо, Иедиаэло, Михаило, Иозавадо, Елигу и Цыльфаё, тысёнцэнгирэ барыдыра́ Манасиянэндэ.

21. И ёнэ помогиндлэ Давидо́скэ проти барэ́ кэ дар халадыбэна, пал-дова́ со сарэ́ адалэ́ мануша́ сыс муршарья и сыс барыдыра́ пэ халадэ́ндэ.

22. Адя́кэ кажнонэ́ дывэсэса явэ́нас кэ Дави́до тэ подэн васт кэ дова́, со лэ́скиро халадыбэ́н яця́ баро́, сыр баро́ халадыбэ́н Дэвлэ́скиро.

23. Ѓа́да, ци бут сыс шэралэ́ пэ халадэ́ндэ, савэ́ явнэ́ кэ Дави́до дро Хевро́но, соб (кай) тэ пиридэ́н лэ́скэ кралипэ́н Саулоскиро, пир Ра́скирэ-Дэвлэ́скиро лав:

24. чхавэ́н Юдаскирэндыр, савэ́ лыджинэ́ шчы́то и чхурдыпнытко буст (коп΄ё), сыс шов тысёнцы охтошэла скэдымэ пэ марибэ́н;

25. чхавэ́ндыр Симеоноскирэндыр, манушэ́н муршканэн, дрэ халадыбэ́н сыс охто́ тысёнцы и шэл;

26. чхавэ́ндыр Левиёскирэндыр сыс штар тысёнцы шовшэла́,

27. и Иодаё, тхага́ри кхэритконэ́ родо́стыр Аароноскирэстыр, и лэ́са сыс трин тысёнцы эфташэла́;

28. и Садоко, муршкано́ тэрно́ ману́ш, и ро́до лэ́скиро сыс биш тэ дуй барыдыра́;

29. чхавэ́ндыр Вениаминоскирэндыр, пшалэ́н Саулоскирэн, сыс трин тысёнцы, – нэ ишчо (инкэ́) бут лэ́ндыр рикирдэпэ кэ кхэр Саулоскиро;

30. чхавэ́ндыр Ефремоскирэндыр сыс биш тысёнцы охтошэла манушэ́н муршканэн, манушэ́н славутнонэн пир пэ́скирэ ро́ды;

31. пашэ́-родыцо́стыр Манасияскирэстыр сыс дэшуохто тысёнцы, савэ́ сыс пир лав выкхардэ, соб (кай) тэ джа́н тэ чхувэ́н Давидо́с крали́са;

32. чхавэ́ндыр Исахароскирэндыр явнэ́ мануша́ годьварэ́, савэ́ джиндлэ́, со, ке́ли трэиндя́ тэ кэрэ́н Израилёскэ, – лэн сыс дуйшэла́ шэралэн, и сарэ́ пша́ла лэ́нгирэ рикирдэпэ лэ́нгирэ лавэ́скэ;

33. родыцо́стыр Завулоноскирэстыр скэдынэ́ пэ марибэ́н, савэ́ рикирдэ кажно халадытко марды́тко, сыс пандждэша́ тысёнцы, дрэ строё екхэ-дие́нгиро;

34. родыцо́стыр Нефалимоскирэстыр сыс тысёнцо шэралэ́; лэ́нца сыс трия́нда эфта́ тысёнцы шчытэнца и чхурдыбнытконэ бусте́нца;

35. родыцо́стыр (чангатыр) Даноскирэстыр, савэ́ сыс скэдынэ́ пэ марибэ́н, сыс биш тэ охто́ тысёнцы шовшэла́;

36. Асиростыр халадэ́н, скэдынэ́ пэ марибэ́н, сыс штардэша́ тысёнцы;

37. пал Иорданостыр, родыцо́стыр Рувимоскирэстыр, Гадоскирэстыр и пашы́л-родыцо́стыр Манасияскирэстыр, сыс шэл биш тысёнцы, кажно халадытконэ мардытконэнца.

38. Сарэ́ адалэ́ халадэ́, дро строё, сарэ́ илэ́стыр явнэ́ дро Хевро́но тэ чхувэ́н крали́са Давидо́с пэ саро́ Израилё. Адя́кэ и сарэ́ яви́р Израильтя́ни сыс дро екх ду́хо (фа́но), соб (кай) тэ чхувэ́с крали́са Давидо́с.

39. И сыс ёнэ одо́й кэ Дави́до трин дывэса́, ханэ́ и пинэ́; пал-дова́ со лэ́нгирэ пша́ла саро́ кэрдэ́ ваш лэ́нгэ;

40. адя́кэ-паць и пашатунэ́ кэ ёнэ, аж кэ ро́дыцо Исахароскиро, Завулоноскиро и Нефалимоскиро, янэ́нас саро́ хабэ́н пэ ослэндэ, и верблюдэндэ, и гурувэндэ: яржо́, инжыро, и зюмо, и мол (вино), и еле́ё, и бут барэ́ и тыкнэ́ кхэри́тка мурдала́; адя́кэ, сыр ра́дыма сыс ваш Израилё.

Psalms 77:16-20

16. Ту выракхцян грэхэ́ндыр Тырэ́ манушэ́н Пэ́скирэ зорья́са, Яково́скирэ и Ёза́скирэ чхавэ́н. Сэ́ла.

17. Паня́ дыкхнэ́ Тут, Дэ́вла! Паня́ дыкхнэ́ Тут и ёнэ тринскирдэпэ. Чачо́, хор паня́ издрандынэ.

18. Пхэрдэ́ о́блоки пэ болыбэ́н дынэ́ тэлэ́ паня́, болыбэ́н пхэндя́ заня́са, и Тырэ́ марибны́тка бустя́ (стре́лы) вурняндынэ криг;

19. Тырэ́-громоскири зан (глос) сыс барэ́ штормо́са, блискави́цы кэрдэ́ зяиндло дуд пир саро́ свэ́то, пхув израндыя и тринскирдяпэ.

20. Тыро́ дром сыс пир мо́рё (дэрья́в) и Ту пиригиян барэ́ паня́ и Тырэ́ шпэры (сляды) на джиндлэ́.

Proverbs 19:17-19

17. Кон исын лачхэ́-дескиро кэ чорорэ́, кодова́ сы́рбы дэ́ла дро длуго (покэрэла) Ра́скэ-Дэвлэ́скэ, Ёв плэскирэла палэ одолэ́скэ, кон дыя́.

18. Сыкля́кир кэ дукха́ пэ́скирэ чхавэ́с пака исын наде́я и на кэр дава́ пир ме́ра, соб (кай) ёв тэ на мэрэ́л и на дыкх пэ лэ́скири го́дла.

19. Древа́н-холынакиро ману́ш явэ́ла тэ страдынэл сэндостыр; ко́ли ту выракхэса (потангинэса) лэс, тэды ту́кэ трэй явэ́ла тэ кэрэ́с дава́ нэвэ́стыр.

Skutki 7:1-21

1. Тэды пэ́рво раша́нгиро барыдыро́ пхуця́ Стехваностыр: “Ци саро́ дава́ исын чачипэ́н, дрэ со ёнэ тут бангякирэна?”

2. И ёв отпхэндя́: “Пшала́лэ мирэ́, дадолэ! Вышунэн ман. Славу́тно Дэвэ́л сыкадыя́ амарэ́ дадэ́скэ Авраамо́скэ дрэ Месопатамия анги́л лэ́скиро пиритрадыпэн дро Харано,

3. и пхэндя́ лэ́скэ: ‘Мэк пэ́скири пхув и пэ́скиро ро́до, и джа́ дрэ доя́ риг, сави́ Мэ ту́кэ сыкава́ва’.

4. Тэды Авраа́мо мэкця́ Халдеенгири пхув и пиритрадыя дро Харано; коригэды́р, сыр лэ́скиро дад мыя́, Дэвэ́л пирикхардя лэс пэ дая́ пхув, пэ сави́ тумэ́ какана́ дживэ́на.

5. Ёв на дыя́ лэ́скэ мэкно́ миштыпэ́н ни пэ екх пиро́ (стопа) гэрьякиро барипнаса, нэ Ёв дыя́ лав лэ́скэ тэ дэл дая́ пхув сыр лэ́скири и со лэ́скирэ-чхавэ́нгирэ родо́скэ чхавэ́ явэ́на хулая́ пэ ада́я пхув, ке́ли дро дова́ часо Авраамостэ сарэ́са на сыс чхаворэ́н.

6. И ґа́да, Дэвэ́л пхэндя́ лэ́скэ: ‘Со лэ́скирэ-чхавэ́нгиро ро́до явэ́ла чу́жо пэ кодоя пхув и лэ́ндыр скэрэна писхарье́н и явэ́на тэ притасавэн штаршэла́ бэрш;

7. нэ Мэ, – пхэндя́ Дэвэ́л, – ява́ва тэ сэндякирав пхарэ́с одолэ́ – нацыякирэ манушэ́н, ваш конэ́скэ ёнэ явэ́на писха́рья; и палэ дава́ ёнэ выджа́на долэ́ пхувья́тыр и явэ́на тэ дынаринэ́н Ма́нгэ пэ дава́ штэ́то.

8. И Дэвэ́л кэрдя́ Завето Авраамоса тэ обчхинэнпэ; и адя́кэ Авраа́мо яця́ дадэ́са Исаако́скэ и ёв обчхиндя лэс пэ эфта́то дывэ́с; а Исаа́ко яця́ дадэ́са Яково́скэ, и Яково яця́ дадэ́са дэшудуенгэ патриархэнгэ.

9. И патриархи пир зэвлыныпэ́н бикиндлэ Ёзас сыр писхари́с дро Еги́пто; нэ Дэвэ́л сыс лэ́са,

10. и помогинэлас лэ́скэ дрэ сарэ́ лэ́скирэ пхарипэна, и дыя́ лэ́скэ годы́ и Фараоно́скирэ-Египто́скирэ крали́скири паты́в, саво́ и чхудя́ лэс балунитконэса пэ Еги́пто и пэ саро́ лэ́скиро кхэр.

11. Нэ бокх пыя́ пэ сари́ Египто́скири и Ханаано́скири пхув, и сыс бари би́да; и амарэ́ дада́ на латхэнас пэ́скэ хабэ́н.

12. Нэ ке́ли Яково шундя́ пал дова́, со дрэ Еги́пто исын маро́, ёв бичхадя́ одори́к екх мо́ло амарэ́ дадэн;

13. а ке́ли ёнэ явнэ́ яви́р мо́ло, Ёза (Иосифо) приґалыяпэ пэ́скирэ пшалэ́нгэ, и Фарао́но уджиндя́, савэ́ родо́стыр сыс Ёза.

14. Пало́ дава́ Ёза бичхадя́ пал пэскирэстэ дадэ́стэ Яковостэ и пал сари́ пэ́скири сэмэнцатэ, а сыс лэн эфтадэша́ панджджинэ.

15. Яково явдя́ дрэ Еги́пто, кай ёв мыя́ кокоро́ и адя́кэ-паць амарэ́ дада́;

16. и пирилыджинэ лэ́нгирэ тру́пы дро Сихемо и чхудэ́ дрэ копли́ца, сави́ киндя Авраа́мо дро Сихемо Еморэнгирэ чхавэ́ндыр пал руп.

17. Ке́ли лыя́ тэ подджа́л дава́ часо тэ кэрэ́лпэ пхэндло́ лав, пал саво́ дыя́ лав Дэвэ́л Авраамо́скэ, и Юды барьёнас дро Еги́пто и ячнэ́ бутыдыр,

18. пака яви́р кра́ли явдя́, саво́ на джиндя́ Ёзас.

19. Ёв хохаибнаса отлыджаласпэ кэ амарэ́ мануша́ и ёв на дэ́лас джиибэ́н амарэ́ дадэ́нгэ; ёв зачхувэлас лэн тэ вычхурдэн пэскирэн тыкнэ́ биятэ́н, соб (кай) одолэ́ тэ на дживэ́н.

20. Дро дасаво часо бия́ндыя о Мо́йза (Моисеё), савэ́стэ сыс шукарипэ́н Дэвлэ́стыр, трин чхона́ лэс барьякирдэ́ дрэ лэ́скирэ-дадэ́скиро кхэр.

21. Нэ ке́ли лэс тыкниньконэс чхурдынэ́ яври́, Фараоноскири чхай и лыя́ лэс кэ пэ и барьякирдя лэс, сыр пэ́скирэс чхавэ́с.

Romani Bible Baltic 2019

Maintained by the United Bible Societies for the Baltic Romani Mission