Bible in one year
June 26

1. И кэрдя́ Дави́до пэ́скэ кхэра́ дрэ Давидо́скиро фо́ро, и скэдыя́ штэ́то ваш Дэвлэ́скиро ковчэго и кэрдя́ ваш лэ́скэ бари ша́тра (ски́ния).
2. Тэды пхэндя́ Дави́до: “Никонэ́скэ нашты́ тэ лыджа́л Дэвлэ́скиро ковчэго, апри́ч Левитэндэ; пал-дова́ со лэн выкэдыя́ пэ дава́ Дэвэ́л, соб (кай) тэ лыджа́н Дэвлэ́скиро ковчэго и тэ дынаринэ́н (тэ служинэн) Лэ́скэ пэ ве́ко.”
3. И скэдыя́ Дави́до сарэ́н Израильтянэ́н дро Ерусалимо, соб (кай) тэ лыджа́н Дэвлэ́скиро ковчэго пэ лэ́скиро штэ́то, саво́ ёв ваш лэ́скэ кэрдя́.
4. И кхардя́ кэ пэ Дави́до Аароноскирэн и Левитэнгирэн чхавэ́н:
5. чхавэ́ндыр Каафоскирэндыр, Уриилос барыдырэ́с и лэ́скирэ пшалэ́н – шэл тэ биш манушэ́н;
6. чхавэ́ндыр Мерарискирэндыр, Асаияс барыдырэ́с и лэ́скирэ пшалэ́н – дуйшэла́ биш манушэ́н;
7. чхавэ́ндыр Гирсоноскирэндыр, Иоилёс барыдырэ́с и лэ́скирэ пшалэ́н – шэл тэ трия́нда манушэ́н;
8. чхавэ́ндыр Елисафаноскирэндыр, Шэмаияс барыдэрэс и лэ́скирэ пшалэ́н – дуйшэла́;
9. чхавэ́ндыр Хевроноскирэндыр, Елиелос барыдырэ́с и лэ́скирэ пшалэ́н – охтодэша́;
10. чхавэ́ндыр Узиилоскирэндыр, Аминадавос барыдырэ́с и лэ́скирэ пшалэ́н – шэл тэдэшудуй.
11. И кхардя́ Дави́до раша́н: Садокос и Авиафарос, и Левитэ́н: Уриилос, Асаияс, Иоилёс, Шемаияс, Елиелос и Аминадавос,
12. и пхэндя́ лэ́нгэ: “Тумэ́, барыдыра́ Левитэ́нгирэ родэнгирэ, высвэнцынэнпэ кокорэ́ и тумарэ́ пша́ла, и янэ́н Ра́скирэ-Дэвлэ́скиро, Израилёскирэ-Дэвлэ́скирэ ковчэго пэ штэ́то, саво́ мэ приготовиндём ваш лэ́скэ;
13. пал-дова́ со сыр англэды́р на тумэ́ кэрдэ́ дава́, то тэды Рай Дэвэ́л, амаро́ Дэвэ́л, пхагирдя́ (домардя́) амэн пал дова́, со амэ на пхуцямпэ Лэ́стыр, сыр трэй.”
14. И высвэнцындлэпэ рашая́ и Леви́ты ваш дова́, соб (кай) тэ лыджа́н Ра́скирэ-Дэвлэ́скиро, Израилёскирэ Дэвлэ́скиро ковчэго.
15. И лыджинэ́ Левитэ́нгирэ чхавэ́ Дэвлэ́скиро ковчэго, сыр припхэндя́ Мо́йза пир Ра́скирэ-Дэвлэ́скиро лав, пэ псикэ́ пэ шосты (баландиня́).
16. И припхэндя́ Дави́до барыдырэ́нгэ Левитэнгирэнгэ тэ чхувэ́н пэ́скирэ пшалэ́н, савэ́ баганас пэ музыкакирэ струме́нты, арфы, и луты, и цымбалы, соб (кай) ёнэ зоралэ́с тэ поддэн зан радымакири.
17. И чхудэ́ Леви́ты Еманос, Иоилёскирэс чхавэ́с, и лэ́скирэ пшалэ́ндыр, Асафос, Верехииноскирэ чхавэ́с, а Мерарискирэ чхавэ́ндыр, пшалэ́н лэнгирэн, Ефанос, Кушаияскирэс чхавэ́с;
18. и лэ́нца пшалэ́н лэнгирэн явирэ́н пир тала́но: Захарияс, Бенос, Иазиилос (Яазиилос), Шэмирамофос, Иехиилос, Униёс, Елиавос, Ванеяс, Маасеяс, Матанияс, Елифлеёс, Микнеёс и Овед-Эдомос и Еиэлёс, сыр ракхибнарьен пэ по́рты.
19. Емано, Асафо и Ефано башадэ зоралас пэ харкунэ́ (меди́тка) цымбалы,
20. а Заха́рия, Азиило, Шэмирамофо, Ехиило, Униё, Елиаво, Маасе́ё и Ване́я – пэ арфы, санэ башадэ заня́са.
21. А Матафия, Елифлеуё, Микне́ё, Овед-Эдо́мо, Иеиэлё и Азазия – пэ луты, соб (кай) тэ кэрэ́н начало.
22. А Хенания, Левитэнгиро барыдыро́, сыс багаибнаскиро сыклякирибнари, пал-дова́ со ёв сыс таланытко дрэ пэ́стэ.
23. Верехия и Елкана сыс ракхибна́рья пашы́л ковчэго.
24. Шэвания, Иосафа́то, Нафанаило, Амасаё, Заха́рия, Ване́я и Элиэзеро, рашая́ пхурдынэ рогэ́нца анги́л Дэвлэ́скиро ковчэго. Овед-Эдо́мо и Ехия сыс ракхибна́рья пашы́л ковчэго.
25. Адя́кэ Дави́до и пхурыдыра́ Израилёскирэ и барыдыра́ пэ тысёнцы гинэ́ тэ янэ́н Дэвлэ́скирэ-завето́скиро ковчэго Овед-Едомоскирэ кхэрэ́стыр, радыма́са.
26. И ке́ли Дэвэ́л помогиндя Левитэ́нгэ, савэ́ лыджинэ́ ковчэго Ра́скирэ-Дэвлэ́скирэ завето́скиро, тэды зачхиндлэ́ дро свэ́нто дыибэ́н Дэвлэ́скэ эфта́ (битринэ́нгиро дэш) гуруворэ́н и эфта́ бакрэ́н.
27. Дави́до сыс уридо́ дрэ висонытко и́дя, и адя́кэ-паць и сарэ́ Леви́ты, савэ́ лыджинэ́ ковчэго, и мануша́, савэ́ багандлэ, и Хенания, барыдыро́ манушэ́нгиро, савэ́ башадэ и багандлэ. Пэ Давидо́стэ сыс ишчо (инкэ́) эфо́до паркалёстыр.
28. Адя́кэ саро́ Израилё залыджалас Ра́скирэ-Дэвлэ́скирэ завето́скиро ковчэго радыма́са, пашы́л рогоскири зан и горнэнгири и цымбалэнгири, башави пэ арфы и луты.
29. Ке́ли Ра́скирэ-Дэвлэ́скиро завето́скиро ковчэго загия́ дрэ фо́ро Давидо́скиро, э Мелхола, э Саулоскири чхай, дыкхця́ дрэ фэнштра и, дыкхця́ крали́с Давидо́с, саво́ ухтэлас радыма́кирэс (радыныбнаса), то ёй лыя́ тэ тэлякирэл лэс дро пэ́скиро ило́.
1. И яндлэ́ Дэвлэ́скиро ковчэго, и чхудэ́ лэс машки́р ски́ния, сави́ кэрдя́ ваш лэ́скэ Дави́до, и яндлэ́ Дэвлэ́скэ цэ́ло схачкирибэ́н и мирна (раманёна) свэ́нта дыибэна́.
2. Ке́ли Дави́до кэрдя́ цэ́ло схачкирибэ́н и свэ́нто дыибэ́н Дэвлэ́скэ, тэды бахтякирдя́ манушэ́н Ра́скирэ-Дэвлэ́скирэ лавэ́са.
3. И роздыя сарэ́нгэ Израильтянэнгэ, и муршэнгэ, и джувленгэ, пир екх маро́, и пир котэ́р мас, и пир кучик (кружка) мол (вино).
4. И чхудя́ тэ дынаринэ́н (тэ служинэн) анги́л Ра́скирэ-Дэвлэ́скиро ковчэго вари-савэ́н Левитэндыр, соб (кай) ёнэ тэ рипирэ́н (тэ славинэ́н), тэ парикирэ́н и тэ барьякирэ́н Рас-Дэвлэ́с, Дэвлэ́с Израилёскирэс:
5. Асафос шэралэса, явирэ́с пал лэ́стэ Захарияс, Иеилос, Шэмирамофос, Иехиилос, Матафияс, Елиавос, и Ванеяс, Оведо-Эдомос и Еиэлос арфэнца и лутэнца и Асафос ваш башаибэн пэ кимвалы.
6. А Ванеяс и Озиилос, раша́н, соб (кай) ёнэ саро́ часо тэ трубинэн анги́л Дэвлэ́скирэ-завето́скиро ковчэго.
7. Дрэ дова́ дывэ́с Дави́до, дрэ пэ́рво мо́ло, дыя́ пса́лмо тэ парикирэ́н Ра́скэ-Дэвлэ́скэ пир Асафостэ и лэ́скирэ пшалэ́ндэ;
8. “Парикирэ́н Ра́скэ-Дэвлэ́скэ, кхарэ́н зоралэ́с Лэ́скиро лав; роспхэнэ́н манушэ́нгэ пал Лэ́скирэ рэ́нды;
9. бага́н Лэ́скэ, башавэн псалмы Лэ́скэ; ракирэ́н пал сарэ́ Лэ́скирэ ди́вы;
10. шарэнпэ Лэ́скирэ свэнтонэ́ лавэ́са; мэк тэ радынэ́лпэ ило́ манушэ́нгиро, савэ́ндэ исын Рай-Дэвэ́л;
11. родэ́н Рас-Дэвлэ́с и Лэ́скири зор, родэ́н саро́ часо Лэ́скиро муй;
12. пририпирэн ди́вы, савэ́ Ёв кэрдя́, Лэ́скирэ знаме́нии (ґертыка́) и сэнды Лэ́скирэ уштэндыр,
13. тумэ́, Израилёскиро ро́до, сан писха́рья Лэ́скирэ, чхавэ́ Яково́скирэ, выкэдынэ́ Лэ́скирэ!
14. Ёв, Рай Дэвэ́л, Дэвэ́л амаро́; сэнды Лэ́скирэ джа́на пир сари́ пхув.
15. Рипирэн усады (сак) Завето Лэ́скиро, лав, саво́ Ёв ракирдя́ дрэ тысёнцы родэ́нгэ,
16. Дова́, пал со Ёв доракирдяпэ Авраамоса, и дрэ со Ёв совлахадя́ Исаако́скэ,
17. И со чхудя́ Яково́скэ дро зако́но, и Израилёскэ дрэ заве́то векоскиро,
18. ракири́: “Ту́кэ Мэ да́ва пхув Ханаоскири, дрэ мэкны миштыпна́скири ме́ра тумэ́нгэ.”
19. Ёнэ сыс тэды тыкнэ́ и набарэ́, мануша́, савэ́ явнэ́ явирэ ригэ́ндыр пэ ла́тэ,
20. и ёнэ пиригинэ́ манушэ́ндыр кэ мануша́, екхэ кралипнастыр кэ яви́р мануша́;
21. нэ Ёв никонэ́скэ на дыя́ во́ля тэ кэрэ́л фуипэ́н лэ́нгэ и выракирдя пал лэ́ндэ кралье́н:
22. “На чилавэн касынэнпэ кэ помакхнэ Мирэ́, и на кэрэ́н фуипэ́н Мирэ́ пророкэнгэ.”
23. Бага́н Ра́скэ-Дэвлэ́скэ, сари́ пхув роспхэн зоралэ́с дывэ́с дро дывэ́с пал Лэ́скиро зракхибэ́н.
24. Роспхэнэ́н Наюдэ́нгэ пал Лэ́скири сла́ва, сарэ́ манушэ́нгэ пал Лэ́скирэ ди́вы.
25. Пал-дова́ со баро́ исын Рай Дэвэ́л и исын мол, соб (кай) тэ шарэ́н Лэс, Ёв исын даранэдыр сарэ́ явирэ дэвлорэндыр.
26. Пал-дова́ со сарэ́ манушэ́нгирэ дэвлорэ́ исын нисо́; а Рай Дэвэ́л создыя́ болыбэ́н.
27. Паты́в и райканыпэн анги́л муй Лэ́скиро, зоралыпэ́н и ра́дыма пэ штэ́то Лэ́скиро.
28. Отдэ́н Ра́скэ-Дэвлэ́скэ, ро́дыцы манушэ́нгирэ, отдэ́н Дэвлэ́скэ барипэ́н и паты́в.
29. Отдэ́н Ра́скэ-Дэвлэ́скэ сла́ва лавэ́скэ Лэскирэскэ. Лэн да́ро, джа́н анги́л муй Лэ́скиро, клонинэнпэ Ра́скэ-Дэвлэ́скэ дро шукарипэ́н Лэ́скирэ свэнтымакири.
30. Издран анги́л Лэ́стэ, сари́ пхув, пал-дова́ со Ёв создыя́ свэ́то; ёв на зджа́ла штэто́стыр.
31. Мэк тэ радынэ́нпэ болыбэна, мэк тэ веселинэлпэ (тэ лошалёл) пхув, и мэк тэ пхэнэ́н дрэ манушэ́ндэ: ‘Тэ дживэ́л Рай Дэвэ́л пэ ве́ки!’
32. Мэк тэ плэскинэл зорья́са мо́рё (дэрья́в), и дова́, со пхэрдякирэла лэс, мэк тэ радынэ́лпэ фэ́лда и саро́, со исын пэ ла́тэ.
33. Мэк тэ радынэ́нпэ кхэтанэ́ сарэ́ вэша́ дэмбитка анги́л муй Ра́скирэ-Дэвлэ́скиро; пал-дова́ со Ёв джа́ла тэ сэндинякирэл пхув.
34. Славинэ́н Рас-Дэвлэ́с, пал-дова́ со дрэ ве́ко тангипэ́н Лэ́скиро,
35. И пхэнэ́н: “Зра́кх амэн, Дэ́вла, Зракхибнари амаро́! Скэ́дэ амэн и выракх (збавин) амэн Наюдытконэ́ манушэ́ндыр, амэ барьякираса свэ́нто лав Тыро́ и шарасапэ слава́са Тырьяса!
36. Тэ явэ́л бахтякирдо́ Рай Дэвэ́л, Дэвэ́л Израилёскиро, векостыр и кэ ве́ко!” И пхэндлэ́ сарэ́ мануша́: “Ами́нь! Аллилуя!”
37. Дави́до ячкирдя́ одо́й, анги́л Ра́скирэ-Дэвлэ́скирэ завето́скиро ковчэго, Асафос и лэ́скирэ пшалэ́н, соб (кай) ёнэ тэ дынаринэ́н анги́л ковчэго саро́ часо, кажно дывэ́с,
38. и Овед-Эдомос и лэ́скирэ пшалэ́н шовдэша́ охто́ манушэ́н; Овед-Эдомос, чхавэ́с Идифуноскирэс, и Хосас – ракхибнарьенца пэ по́рта.
39. А раша́с Садокос и лэ́скирэ пшалэ́н раша́н – анги́л Ра́скирэ-Дэвлэ́скири ски́ния, со сыс пэ вучипэ́н дрэ Гавао́но,
40. ваш дова́ тэ янэ́н цэ́ло схачкирибэ́н Ра́скэ-Дэвлэ́скэ пэ алта́рё, кай хачкирэна саро́ часо, злокоса (ранкоса) и бэльвэле́, и ваш саро́, со исын чхиндло́ дрэ Ра́скирэ-Дэвлэ́скиро Зако́но, саво́ Ёв припхэндя́ Израилёскэ;
41. и лэ́нца сыс Емано и Идифуно и яви́р выкэдынэ́, савэ́н упхэндлэ пир лав, соб (кай) тэ славинэ́н Рас-Дэвлэ́с, пал-дова́ со тангипэ́н Лэ́скиро ячэ́лпэ пэ ве́ко.
42. Пашы́л лэ́ндэ сыс Емано и Идифуно, и, соб (кай) тэ славинэ́н Дэвлэ́с, тэ башавэн пэ ро́ги, цымбалы и яви́р башаибнытка струме́нты; а чхавэ́н Идифуноскирэн ёв чхудя́ пашы́л по́рта.
43. И гинэ́ сарэ́ мануша́, кажно дрэ пэ́скиро кхэр; рисия́ и Дави́до, соб (кай) тэ бахтякирэ́л пэ́скиро кхэр.
12. Анги́л лэ́нгирэ-дадэнги́рэ якха́ Ёв кэрдя́ ди́вы пир Египто́скири пхув, пэ Цоаноскири фэ́лда.
13. Ёв роскэрдя́ пэ дуй паша́ мо́рё (дэрья́в) и пирилыджия лэн пир пани́. Ёв кэрдя́ адя́кэ, со паня́ тэрдинэ́ сыр ва́нта.
14. И Ёв лыджия́ лэн болыбна́скирэ облокоса дывэсэ́, а ягакирэ дудэса (свэтоса) раты́.
15. Ёв роскэрдя́ пэ дуй паша́ скалы пэ чхучи́ пхув и панякирдя лэн чалэ́с лэ́ндыр, сыр барэ́ панингэндыр;
16. и Ёв кэрдя́ адя́кэ, со сыгна паня́ тхадынэ скалэндыр, и со паня́ тхадынэ сы́гэс сыр барэ́ панинга́.
22. Манушэ́скиро кучипэ́н исын лэ́скиро лачхипэ́н, и чороро́ ману́ш исын фэды́р хоханэстыр.
23. Кон дарэ́ла Дэвлэ́стыр, кодова́ дживэ́ла. Конэ́стэ исын дар, одова́ ячэ́лапэ чало, и биба́хт на пэрэ́ла пэ лэ́стэ.
24. Набутитко (кирнэ-масэ́нгиро) ману́ш чхувэ́ла тэлэ́ пэ́скиро васт дро чаро́, и ёв аж на ґаздэ́ла васт палэ дро пэ́скиро муй.
44. Дая́ ша́тра сыс тумарэ́ дадэндэ пэ чхучи́ пхув сы́рбы доракирибэ́н, со пхэндя́ Дэвэ́л Мойза́скэ, тэ чхувэ́л дасави́ ша́тра, сави́ ёв дыкхця́;
45. сави́ амарэ́ дада́ кхэтанэ́ Исусо́са (Ёхошуаса) лынэ́ Пэ́са ша́тра дрэ дая́ риг, сави́ ёнэ заухтылдэ и савья́тыр Дэвэ́л вытрадыя́ амарэ́ дадэнги́рэ якхэ́ндыр манушэ́н, савэ́ дживдэ́ одо́й кэ Давидо́скирэ дывэса́;
46. адава́ Дави́до яця́ дро́го Дэвлэ́скэ и ёв мангдя́ Лэ́стыр тэ кэрэ́л ша́тра Яково́скирэ Дэвлэ́скэ;
47. нэ Соломо́но чхудя́ Лэ́скэ Кхэр.
48. Нэ Са́мо Вучэды́р Дэвэ́л на дживэ́ла дрэ кхэра́, савэ́ кэрдэ́ манушы́тка васта́, адя́кэ, сыр ракирэ́ла пал дава́ проро́ко:
49. “Болыбэ́н исын Миро троно, и пхув исын тэл Мирэ́ ґэра́: саво́ кхэр тумэ́ могинэ́на Ма́нгэ тэ кэрэ́н? – ракирэ́ла Дэвэ́л, – ци кай могинэ́ла тэ явэ́л штэ́то Ма́нгэ ваш откхиныбэн?
50. Ци на Мирэ́ вастэ́са кэрдо́ дава́ саро́?”
51. Тумэ́ сан пхарэ́-илытка мануша́, савэ́ шунэ́на Дэвлэ́скиро лав, а сы́рбы кашукэ усае́кх кэрэ́на пир пэ́скиро! Тумэ́ сан адасавэ́-паць, сыр и тумарэ́ дада́, тумэ́ ўса́ды (сак) (усегда) са́нас проти Свэ́нто Ду́хо (Фа́но).
52. Конэ́с пророкэндыр на традынэ тумарэ́ дада́? Ёнэ замардэ́ (умардэ) одолэ́н, кон анги́л ракирдя́ пал Христосо́скиро явибэн, нэ тумэ́ какана́ ячнэ́ Лэ́скирэ здыибнарья и замарибнарья!
53. Тумэ́, савэ́ дорэснэ́ (лынэ́) янголэндыр Зако́но, и савэ́ на зракхнэ́ лэс.”
54. Ке́ли ёнэ шундлэ́ дава́, лэ́нгирэ илэ пхарадынэ холя́тыр и ёнэ скрежындлэ дандэнца пэ лэ́стэ.
55. Нэ Стехвано, саво́ сыс пхэрдо́ Свэнтонэ́ Духо́са, дыкхця упрэ́ пэ болыбэ́н и дыкхця́ Дэвлэ́скири сла́ва и Исусо́с, саво́ сыс тэрдо́ пир чачи́ риг Дэвлэ́стыр,
56. И пхэндя́ ёв: “Дыкхэ́н! Мэ дыкха́ва отчхакирдо болыбэ́н и Манушэ́скирэ Чхавэ́с, Саво́ сыс тэрдо́ пир чачи́ риг Дэвлэ́стыр.”
57. Нэ ёнэ задынэ го́дла и закэрдэ пэ́скирэ кана́, и сарэ́ кхэтанэ́ чхурдынэпэ пэ лэ́стэ;
58. и ёнэ тырдынэ лэс пал фо́ро и домардэ́ лэс барэ́нца. А якхи́тка чхудэ́ пэ́скирэ и́ди пашы́л тэрнэ́-манушэ́скирэ ґэра́, савэ́с кхардэ́ Савло.
59. Ёнэ ишчо (инкэ́) мардэ́ Стехванос барэ́нца, а Стехвано мангдя́пэ Дэвлэ́скэ и ракирдя́: “Раё Дэ́вла, Ису́се! Прилэ́ миро ду́хо (фа́но).”
60. И ёв пыя́ пэ чанга́ и зоралэ́ заня́са пхэндя́: “Раё Дэ́вла! На гин дава́ грэ́хо пал лэ́ндэ.” И далэ́ лавэ́нца Стехвано мыя́.
Romani Bible Baltic 2019
United Bible Societies for the Baltic Romani Mission