Bible in one year June 271 Chronicles 17:1-271. Ке́ли Дави́до дживдя́ дро пэ́скиро кхэр, то тэды пхэндя́ Дави́до Нафаноскэ пророкоскэ: Ѓа́да, мэ джива́ва дро кедрытко кхэр, а Дэвлэ́скирэ-завето́скиро ковчэго исын тэл ша́тра.”2. И пхэндя́ Нафано Давидо́скэ: “Саро́, со ту́тэ исын пэ ило́, кэр; пал-дова́ со ту́са исын Дэвэ́л.”3. Нэ дрэ доя́-паць рат сыс Дэвлэ́скиро лав кэ Нафано:4. “Джа́ и пхэн Мирэ́ писхари́скэ Давидо́скэ: ‘Адя́кэ ракирэ́ла Рай Дэвэ́л: на ту кэрэ́са Ма́нгэ кхэр тэ джива́в,5. пал-дова́ со Мэ на дживдём дро кхэр долэ́ дывэсэ́стыр, сыр вылыджиём Израилёскирэ чхавэ́н, и кэ дава́ дывэ́с, а псирдём скиниятыр дрэ ски́ния и кхэрэ́стыр дро кхэр.6. Кай Мэ на псирдём сарэ́ Израилёса, ци пхэндём Мэ екх лав вари-савэ́скэ Израилёскирэ сэндарьенгэ, савэ́нгэ Мэ пхэндём тэ ракхэ́н Мирэ́ манушэ́н: со́скэ тумэ́ на кэрэ́на Ма́нгэ кхэр кедрытко?’7. И акана́ адя́кэ пхэн Мирэ́ писхари́скэ Давидо́скэ: ‘Адя́кэ ракирэ́ла Рай Дэвэ́л, Дэвэ́л болыбна́скирэ-янголэ́нгиро: Мэ лыём тут бакрэ́нгирэ стадатыр, соб (кай) ту явэс шэралэса Мирэ́ Израилёскирэ манушэ́нгэ;8. и Мэ со́мас ту́са ўсе́нде (везде́), карик ту на псирдян, и вымардём сарэ́н Тырэ́ вэргэ́н анги́л тыро́ муй, и кэрдём лав тыро́, сыр барэн-манушэ́нгирэ лав, савэ́ исын пэ пхув;9. и Мэ кэра́ва штэ́то ваш Мирэ́ Израилёскирэ манушэ́нгэ и Мэ зоралякирава лэн, и явэ́на ёнэ штылэ́с тэ дживэ́н пэ пэ́скиро штэ́то, и на явэ́ла буты́р чиладо, и нажужэ́ на лэ́на буты́р тэ притасавэн лэн, сыр англэды́р,10. дрэ долэ́ дывэса́, ке́ли Мэ чхудём сэндарьен пэ Мирэ́ Израилёскирэ манушэ́ндэ, и Мэ штылякирдём сарэ́ тырэ́ вэргэ́н, и Мэ да́ва тэ джинэ́с ту́кэ, со Рай Дэвэ́л кэрэ́ла ту́кэ кхэр.11. Ке́ли сполнинэнапэ тырэ́ дывэса́, и ту отджаса кэ тырэ́ дада́, тэды Мэ чхува́ва ро́до тыро́ пало́ (после) ту́тэ, саво́ явэ́ла тырэ́ чхавэ́ндыр, и чхува́ва лэ́скиро кралипэ́н.12. Ёв кэрэ́ла Ма́нгэ кхэр и чхува́ва троно лэ́скиро пэ ве́ко.13. Мэ ява́ва лэ́скэ дадэ́са, и ёв явэ́ла Ма́нгэ чхавэ́са, – и тангипэ́н (жалима) Миро Мэ на отлава лэ́стыр, сыр Мэ отлыём долэ́стыр, саво́ сыс англэды́р ту́тыр.14. Мэ чхува́ва лэс дро Миро кхэр и дро Миро кралипэ́н пэ ве́ко, и троно лэ́скиро явэ́ла твардо пэ ве́ко.’”15. Сарэ́ далэ́ лава́ и сарэ́ дыкхибэна украт (точнэс) пирипхэндя Нафано Давидо́скэ.16. И явдя́ кра́ли Дави́до, и тэрдия́ анги́л Растэ-Дэвлэ́стэ, и пхэндя́: “Кон мэ сом, Раё Дэ́вла, и со дасаво кхэр миро исын, со Ту адя́кэ чхудя́н упрэ́ ман.17. Нэ и дава́ ишчо (инкэ́) на́бут сыкадыя́ дрэ Тырэ́ якха́, Дэ́вла; Ту ракирэ́са пал кхэр Тырэ́-писхарискиро дура́л, и дыкхэ́са пэ ма́ндэ, сыр пэ барэ́ манушэ́стэ, Раё Дэ́вла! Дэ́вла!18. Со ишчо (инкэ́) могинэ́ла тэ дочхувэл анги́л Ту́тэ Дави́до ваш барипэ́н Тырэ́ писхари́скэ? Ту джинэ́са Тырэ́ писхари́с!19. Раё Дэ́вла! Ваш Тырэ́ писхари́скэ, пир ило́ Тыро́, Ту кэрэ́са саро́ дава́ баро́, соб (кай) тэ сыкавэс кажно райканыпэн.20. Раё Дэ́вла! Нанэ явирэ́с, сыр Ту сан, и нанэ Дэвлэ́с, апри́ч Ту́тэ, пир саро́, со шундя́м амэ пэ́скирэ канэнца.21. И кон исын яви́р, сыр Тырэ́ Израилёскирэ мануша́, е́кх мануша́ пэ пхув, кэ савэ́ сыс яви Дэвэ́л, соб (кай) тэ выракхэл лэн Пэ́скэ дрэ манушэ́ндэ, тэ кэрэ́л Пэ́скэ лав барэ́ и даранэ рэндоса – манушэ́нгирэ традыпнаса криг Тырэ́ манушэ́нгирэ мо́стыр, савэ́н Ту зракхця́н Египто́стыр.22. Ту кэрдя́н Тырэ́ Израилёскирэ манушэ́н, Пэскирэнца манушэ́нца пэ ве́ко, и Ту, Раё Дэ́вла, яця́н лэ́нгирэ Дэвлэ́са.23. И адя́кэ акана́, о, Раё Дэ́вла, лав, саво́ Ту пхэндя́н пал Тырэ́ писхаристэ и пал лэ́скиро кхэр, кэр твардонэса пэ ве́ко и кэр, сыр Ту пхэндя́н.24. И мэк тэ явэ́л и мэк тэ барьёл лав Тыро́ дро ве́ко, соб (кай) ракирдэ́: “Рай Дэвэ́л, болыбна́скирэ-янголэ́нгиро Дэвэ́л Израилёскиро, исын Дэвэ́л пэ Израилё”; и кхэр Тырэ́ писхарискиро Давидо́скиро, мэк тэ явэ́л твардо анги́л Тыро́ муй.25. Пал-дова́ со Ту, Дэ́вла миро, откэрдян Тырэ́ писхари́скэ, со Ту кэрэ́са лэ́скэ кхэр; палдова́ Тыро́ писха́ри и ячян муршкано́ тэ мангэ́лпэ анги́л Ту́тэ.26. И акана́, Раё Дэ́вла, Ту Дэвэ́л, и Ту пхэндя́н пал Тырэ́ писхаристэ дасаво лачхипэ́н.27. Сыр сыс лачхо́ Ту́кэ лэ тэ бахтякирэс кхэр Тырэ́ писхарискиро, соб (кай) ёв тэ явэ́л пэ ве́ко анги́л Тыро́ муй. Пал-дова́, со ко́ли Ту, Раё Дэ́вла, бахтякирэса, тэды явэ́ла ёв бахтякирдо́ ве́чнэс пэ ве́ки.”1 Chronicles 18:1-171. Пало́ (после) дава́ Дави́до пиримардя Филистимлянэн, и штылякирдя лэн, и лыя́ Ге́фо и фо́рья, савэ́ сыс тэл лэ́скири зор.2. Ёв пиримардя адя́кэ-паць Моавитянэн, и кэрдэ́пэ Моавитяни Давидо́скирэ писхарье́нца, и лыджинэ́ лэ́скэ дыибэ́н (дань).3. И пиримардя Дави́до Адраазарос, Сувакирэ крали́с, дро Емафо, ке́ли одова́ гия́ тэ зоралякирэл пэ́скиро васт пашы́л рэка (лэнь) Евфрато.4. И лыя́ Дави́до лэ́стыр тысёнцо марибны́тка вурдына́, эфта́ (битринэ́нгиро дэш) тысёнцы манушэ́н, савэ́ сыс уклистэ́ пэ грэ́ндэ и биш тысёнцы манушэ́н, савэ́ гинэ́ пэзал, и роспхагирдя́ Дави́до сарэ́ марибны́тка вурдына́, (пиричхины жылы грэ́ндэ) и ячкирдя́ лэ́ндыр фэ́ни шэл.5. Сирияни Дамаскостыр явнэ́ тэ подэн васт (пэ помош) Адраазароскэ, Сувакирэ крали́скэ, нэ Дави́до домардя́ биш тэ дуй тысёнцы Сириянэн.6. И чхудя́ Дави́до ракхибнытконэ халадэ́н дрэ Сирия Дамаскоскири, и кэрдэ́пэ Сирияни Давидо́скирэ писхарье́нца, лыджыи лэ́скэ дыибэ́н. И помогиндя Рай Дэвэ́л усе́нде (кай ёв тэ на джал) Давидо́скэ.7. И лыя́ Дави́до сувнакунэ́ шчы́ты, савэ́ сыс Адраазароскирэ писхарье́ндэ, и яндя́ лэн дро Ерусалимо.8. А Тивхафатыр и Куностыр Адраазароскирэ форье́ндыр лыя́ Дави́до древа́н бут харко́ма (медь). Ла́тыр Соломо́но кэрдя́ харкуно мо́рё (дэрья́в), и сты́лбы харкунэ́, и кхорэ́ (сасу́ды) харкунэ́.9. И шундя́ Фоё, кра́ли Имафостыр, со Дави́до домардя́ сарэ́ халадэ́н Адраазароскирэн, Сувакирэн кралискирэн.10. И бичхадя́ Иорамос, пэ́скирэ чхавэ́с, кэ кра́ли Дави́до, тэ выпхэнэл “шэл лачхэ́ дывэса́” лэ́скэ и тэ парикирэл лэ́скэ пал дова́, со ёв мардя́пэ Адраазароса и замардя́ лэс, – пал-дава́ со Фоё сыс дрэ марибэ́н Адраазароса, – и ёв лыя́ пэ́са кажна (ра́зна) кхорэ́ сувнакунэ́, рупувэ́ и харкунэ́.11. И отдыя́ лэн кра́ли Дави́до Ра́скэ-Дэвлэ́скэ кхэтанэ́ рупэ́са и сувнака́са, саво́ ёв лыя́ сарэ́ Наюдытконэ́ манушэ́ндыр: Идумеянэндыр, Моавитянэндыр, Амонитянэндыр, Филистимлянэндыр и Амаликитянэндыр.12. И Авеса, Саруяскиро чхаво́, домардя́ Идумеянэн, пэ Лондо до́ло, дэшуохто тысёнцы;13. И чхудя́ Дави́до дрэ Идуме́я ракхибнарье́нгирэ халадэ́н, и кэрдэ́пэ сарэ́ Идумеяни Давидо́скэ писхарье́нца. Рай Дэвэ́л помогиндя Давидо́скэ ўсенде, карик ёв на псирдя́.14. И сыс крали́са Дави́до пэ саро́ Израилё, и кэрдя́ сэ́ндо и чачипэ́н сарэ́нгэ пэ́скирэ манушэ́нгэ.15. Иоа́во, Саруяскиро чхаво́, сыс халадэ́нгиро барыдыро́, и Иосафа́то, Ахилудоскиро чхаво́ сыс канцэляри (писарё),16. Садоко, Ахитувоскиро чхаво́, и Авимеле́хо, Авиафароскиро чхаво́ – рашая́, а Суса – чхиныбнари пэ лыла́.17. О Ване́я, Иодаёскиро чхаво́ – пэ Хелефее́ндэ и Фелефее́ндэ; а Давидо́скирэ чхавэ́ сыс англатунэ́ шэритка пашы́л крали́стэ.Psalms 78:17-2517. Нэ ёнэ сароекх буты́р кэрдэ́ грэ́хи проти Лэ́стэ и ґаздэнас бу́нто пэ чхучи́ пхув пэ Най Вучэдырэскирэстэ,18. и ёнэ пропатякирэнас Дэвлэ́с дро пэ́скиро ило́, ке́ли ёнэ мангнэ́ хабэ́н пир пэ́скиро ди;19. и ёнэ ракирдэ́ пэ Дэвлэ́стэ, пхэни́: “Ци дэ́ла ра́да Дэвэ́л тэ кэрэ́л сками́нд пэ чхучи́ пхув?”20. Дыкхэ́н! Ёв пэкадя́ дрэ ска́ла и паня́ дынэпэ тэ тхадэн и барэ́ панинга́ пхэрдякирдэ саро́. Ци дэ́ла ра́да Ёв адя́кэ-паць тэ дэл маро́? Ци дорэсэ́ла Ёв мас Пэ́скирэ манушэ́нгэ?21. Палдава́ Рай Дэвэ́л шундя́ дава́, и Ёв древа́н холя́сыя, Лэ́скири холы́ росхачия пэ Израилёскирэ манушэ́ндэ и адя́кэ-паць холякирибэ́н ґаздыя́пэ пэ лэ́ндэ,22. со ёнэ на патяндынэ́ дрэ Дэвлэ́стэ и на рикирдэ наде́я, со Ёв дэ́ла васт лэ́нгэ.23. Нэ Ёв припхэндя́ облокэнгэ, со исын упра́л, и Ёв псирадя (откэрдя) болыбна́скирэ вудара́,24. и Ёв чхудя́ сыр брышы́нд пэ лэ́ндэ (манна) тэ хан и Ёв дыя́ лэ́нгэ болыбна́скиро гив.25. Мануша́ ханас Янголэ́нгиро хабэ́н: Ёв бичхадя́ лэ́нгэ хабэ́н чалэ́с.Proverbs 19:25-2625. Пэкав одолэ́с, кон сыкавэ́ла бипатыв кэ яви́р, и простонэ-годякирэ явэ́на годэдыр, выракир годьварэ́ манушэ́с и ёв явэ́ла тэ дживэ́л.26. Кон исын бибахтало́ кэ пэ́скиро дад, и традэ́ла яври́ пэ́скирэ да, кодова́ исын биладжаипнытко и бипатывакиро чхаво́.Skutki 8:1-251. Савло сыс одо́й и подрикирэлас Стехваноскиро замарибэн. Дро долэ́ дывэса́ сыс баро́ традыпэн пэ Кхангири́ дро Ерусалимо, и сарэ́, апри́ч Апостолэндэ, розгинэпэ пир кажно Юдэя́кирэ и Самариякирэ штэ́ты.2. Дэвлытка мануша́ гарадэ́ Стехванос и древа́н рондлэ́ пал лэ́стэ.3. Нэ Савло кэрдя́ бипатыв пэ кхангири́, ёв псирдя́ пир кхэра́, закэдэлас муршэ́н и джувле́н, и чхувэлас лэн дро штарибэ́н.4. Дэвлытка мануша́, савэ́н традынэ пэ́скирэ штэтэ́ндыр, псирдэ́ пир сарэ́ рига́ и роспхэнэнас бахталы́ зан (звесь).5. Филипо явдя́ дро Самариякиро фо́ро, и роспхэнэ́ла лэ́нгэ пал Христосо́стэ;6. а сарэ́ мануша́ ракхунэс шундлэ́, со ракирдя́ Филипо, и дыкхнэ́, савэ́ ёв кэрдя́ ди́вы и знаме́нии (ґертыка́).7. Пал-дова́ со бутэ́ манушэ́ндэ сыс бэштэ́ бэнгланэ ду́хи, савэ́ джа́нас яври́ барэ́ годла́са; мануша́, савэ́ндыр сыс праличо и савэ́ на псирдэ́, высастинэ.8. И манушэ́нгэ, савэ́ дживдэ́ кэ дова́ фо́ро, сыс бари ра́дыма.9. Дрэ дава́ фо́ро дживдя́ екх ману́ш, саво́ залэласпэ човаханыбнаса, и лэс кхардэ́ Си́моно и ёв дивиндя сарэ́ Самариякирэ манушэ́н пэ́скирэ рэндэ́нца, сыкави пэс вари-савэ́ барэ́ манушэ́са.10. И сарэ́ пэ лэ́стэ дивиндлэ́пэ, тыкнэстыр кэ баро́ и ракирдэ́: “Адалэ́ манушэ́стэ исын бари зор Дэвлэ́стыр.”11. Мануша́ патяндынэ́ лэ́скэ, пал-дова́ со ёв баро́ часо дивиндя лэн пэ́скирэ човаханыбнаса.12. Нэ, ке́ли мануша́ упатя́ндынэ Филипоскэ, саво́ роспхэнэлас пал Дэвлэ́скиро Кралипэ́н и пал Исусо́скиро Христосо́скиро лав, бут мурша́ и джувля́ болдэпэ.13. Патяндыя и кокоро́ Си́моно и болдяпэ, ёв никарик на отджалас Филипостыр: ёв дивиндяпэ пэ барэ́ ди́вы и ґертыка́, савэ́ Филипо кэрдя́.14. И Апо́столы, савэ́ сыс дро Ерусалимо, шундлэ́, со Самаряни прилынэ́ Дэвлэ́скиро лав и бичхадя́ кэ ёнэ Пэтрис и Ианос,15. савэ́ явнэ́ и мангнэпэ Дэвлэ́скэ пал лэ́ндэ, соб (кай) ёнэ тэ прилэ́н Свэ́нто Ду́хо (Фа́но);16. пал-дова́ со ни пэ конэ́стэ лэ́ндыр Ду́хо (Фа́но) на зджалас, ёнэ екх со сыс болдэ ваш Ра́скирэ-Дэвлэ́скиро Исусо́скиро лав.17. Тэды Пэ́три и Иа́но чхудэ́ васта́ упрэ́ пэ лэ́ндэ, и ёнэ прилынэ́ Свэ́нто Ду́хо (Фа́но).18. Ке́ли Си́моно дыкхця́, со Свэ́нто Ду́хо (Фа́но) дэ́лапэ пир Апостолэнгирэ-вастэнгиро чхуибэ́н, тэды ёв яндя́ ловэ́ лэ́нгэ, пхэни́:19. “Дэн и ма́нгэ дасави́ зор, мангдя́ ёв, соб (кай) одова́, пэ конэ́стэ мэ чхува́ва васта́, тэ прилэл Свэ́нто Ду́хо (Фа́но).”20. Нэ Пэ́три пхэндя́ лэ́скэ: “Мэк тырэ́ ловэ́ тэ явэ́н дро хасибэ́н ту́кэ, пал-дова́ со ту закамдян Дэвлэ́скиро тала́но тэ кинэс пал ловэ́.21. Нанэ ту́кэ паш и до́ля тэ кэрэ́с дова́, со амэ кэра́са, пал-дова́ со тыро́ ило́ исын на чачуно́ анги́л Дэвлэ́стэ.22. Ри́скир пэс далэ́ грэхостыр и мангпэ Дэвлэ́скэ; соб (кай) Ёв тэ примангэн ту́кэ дова́, со сыс дро тыро́ ило́;23. пал-дова́ со мэ дыкха́ва, со ту сан пхэрдо́ киркипнаса и начачипнаса.”24. И Си́моно отпхэндя́, пхэни́: “Мангэ́нпэ Дэвлэ́скэ тумэ́ пал ма́ндэ, соб (кай) ма́нца нисо́ тэ на кэрэ́лпэ долэ́стыр, пал со тумэ́ ракирдэ́.”25. Апо́столы ж допхэнэнас и роспхэнэнас Дэвлэ́скиро лав и гинэ́ палэ дро Ерусалимо, а пир дром дрэ бут Самариякирэ гава́ ёнэ роспхэнэнас бахталы́ зан (звесь). Romani Bible Baltic 2019 Maintained by the United Bible Societies for the Baltic Romani Mission