Bible in one year June 31 Kings 15:1-341. Пэ дэшуохтото бэрш, сыр лыя́ тэ кралинэ́л Еровоа́мо (Иеровоамо), Наватоскиро чхаво́, Авия́ яця́ кра́ли пэ Юдэякирэндэ.2. Трин бэрш ёв сыс кра́ли дро Ерусалимо; лав лэ́скирэ-да́киро сыс Мааха, Авесаломоскири чхай.3. Ёв псирдя́ дрэ сарэ́ грэ́хи лэ́скирэ дадэ́скирэ, савэ́ одова́ кэрдя́ англэды́р ла́тыр, и ило́ лэ́скиро на сыс сарэ́са отдыно́ Ра́скэ-Дэвлэ́скэ, лэ́скирэ Дэвлэ́скэ, сыр ило́ Давидо́скиро, лэ́скирэ-дадэ́скиро.4. Нэ ваш Давидо́скэ Рай Дэвэ́л, Дэвэ́л лэ́скиро, дыя́ лэ́скэ момолы́тко (свети́льнико) дро Ерусалимо, чхудя́ пало́ лэ́стэ кра́ли чхавэ́с лэскирэс и зоралякирдя Ерусалимо.5. Пал-дова́ со Дави́до кэрдя́ лачхипэ́н анги́л якха́ Ра́скирэ-Дэвлэ́скирэ и ёв на отгия́ сарэ́стыр долэ́стыр, со Ёв ракирдя́ лэ́скэ, дрэ сарэ́ пэ́скирэ джиибна́скирэ дывэса́, апри́ч дова́, со выгия́ Урияса Хетеяниноса.6. И марибэ́н сыс машки́р Ровоамостэ и Еровоамостэ дрэ сарэ́ лэ́нгирэ джиибна́скирэ дывэса́.7. Яви́р рэ́нды (де́лы) Авияскирэ, саро́, со ёв кэрдя́, исын зачхиндлэ́ дрэ бэршы́тка архи́вы кралье́нгирэ пэ Юдэ́я. И сыс марибэ́н машки́р Авиястэ и Еровоамостэ.8. И мыя́ Авия́ и гарадэ́ лэс дадэ́нца лэскирэнца дро Давидо́скиро фо́ро. И Аса́ яця́ кра́ли, лэ́скиро чхаво́, пэ штэ́то лэ́скиро.9. Дро бишэнгиро бэрш, сыр лыя́ тэ кралинэ́л Еровоа́мо, Израилёскиро кра́ли, яця́ тэ кралинэ́л Аса́ пэ Юдэякирэндэ.10. И штардэшаекх бэрш ёв сыс кра́ли дро Ерусалимо. Лав да́кирэ-лэскирьякиро сыс Ана [Маха-ю.о.], чхай Авесаломоскири.11. О Аса́ кэрдя́ лачхипэ́н анги́л якха́ Ра́скирэ-Дэвлэ́скирэ, сыр Дави́до, лэ́скиро дад.12. Ёв традыя́ криг биладжакунэн нэ манушэн пхувья́тыр и вычхурдыя сарэ́ и́долы, савэ́ кэрдэ́ лэ́скирэ дада́.13. И адя́кэ-паць датыр пэскирьятыр, Анатыр, ёв отлыя кхарибэн (титуло) кралицакиро пал дова́, со ёй кэрдя́ вычхиндло муй Астартакиро. И росчингирдя Аса́ вычхиндло муй ла́киро, и хачкирдя́ лэс пашы́л сы́гно рэ́кица (лэнори́) Кедроно.14. Вучипэна́ на сыс пхагирдэ́. Нэ ило́ Аса́скиро сыс отдыно́ Ра́скэ-Дэвлэ́скэ дрэ сарэ́ лэ́скирэ джиибна́скирэ дывэса́.15. И яндя́ ёв дро Кхэр Ра́скирэ-Дэвлэ́скиро предме́ты и кхорэ́, савэ́ сыс обсвэнцындэ лэ́скирэ дадэ́са, и предметы, савэ́ ёв обсвэнцындя: руп, и сувнака́й, и кхорэ́.16. И марибэ́н сыс машки́р Асастэ и Ваасастэ, крали́стэ Израильсконэстэ, дрэ сарэ́ дывэса́ лэ́нгирэ.17. И выгия́ Вааса, кра́ли Израилёскиро, проти Юдэ́я, и лыя́ тэ кэрэ́л Ра́ма, соб (кай) нико́н тэ на выджа́л и тэ на заджа́л кэ Аса́, кра́ли Юдэя́киро.18. И лыя́ Аса́ саро́ руп и сувнака́й, саво́ сыс ячкирдо дрэ пираля́ кучипнаскирэ дро Кхэр Ра́скирэ-Дэвлэ́скиро, и дыя́ лэс дрэ васта́ дынарье́нгэ пэскирэнгэ, и бичхадя́ лэн кра́ли Аса́ кэ Венададо, чхаво́ Тавримоноскиро, чхаво́ Хезионоскиро, кра́ли Сирия́киро, саво́ дживдя́ кэ Дама́ско, и пхэндя́:19. “Доракирибэ́н (союзо) мэк тэ явэ́л машки́р ма́ндэ и машки́р ту́тэ, сыр сыс машки́р дадэ́стэ мирэстэ и машки́р тырэ́ дадэ́стэ; ґа́да, мэ бичхава́ва ту́кэ дро да́ро руп и сувнака́й; роскуш доракирибэ́н тыро́ Ваасаса, кра́ли Израилёскирэса, соб (кай) ёв тэ отджал ма́ндыр.”20. И кандыя́ Венададо крали́с Асас, и бичхадя́ пэ́скирэ халадэ́нгирэ барыдырэ́н проти Израилёскирэ фо́рья, и розмардя́ Аино и Дано, и Авел-Беф-Мааха, и саро́ Кинерофо, пир сари́ пхув Нефалимско.21. Сыр шундя́ пал дава́ Вааса, то пирияця́ тэ кэрэ́л Ра́ма и рисия́ дрэ Фирца.22. Кра́ли Аса́ кхардя́ сарэ́н Юдэякирэн, никонэ́с на промэки, и вылыджинэ́ ёнэ Раматыр бара́ и вэша́, савэ́ Вааса мэкця́ тэ чхувэ́л кхэра́. И кэрдя́ лэ́ндыр кра́ли Аса́ Гива́ Вениаминоскири и Мицпа.23. Сарэ́ яви́р рэ́нды (де́лы) Асаскирэ, и сарэ́ славутна рэ́нды (подвиги) лэ́скирэ, и саро́, со ёв кэрдя́, и фо́рья, савэ́ ёв кэрдя́, исын зачхиндлэ́ дрэ бэршы́тка архи́вы кралье́нгирэ Юдэя́тыр, апри́ч дова́, со дро пхурипэн пэ́скиро ёв сыс насвало́ ґэрэ́нца.24. И мыя́ Аса́ и гарадо́ сыс пэ́скирэ дадэ́нца дрэ фо́ро Давидо́скиро, пэ́скирэ дадэ́скиро. И Иосафа́то яця́ кра́ли, чхаво́ лэ́скиро, пэ штэ́то лэ́скиро.25. О Навато, чхаво́ Еровоамоскиро, яця́ кра́лиса пэ Израилё дро яви́р бэрш Аса́скиро, Юдэя́кирэ крали́скиро, и сыс кра́ли пэ Израилё дуй бэрш.26. И кэрдя́ ёв фуипэ́н анги́л якха́ Ра́скирэ-Дэвлэ́скирэ, псирдя́ пэ́скирэ дадэ́скирэ дромэ́са и дрэ грэ́хи лэ́скирэ, савэ́нца одова́ залыджия́ Израилё дрэ грэ́хо.27. И кэрдя́ зракирибэ́н проти лэ́стэ о Вааса, чхаво́ Ахиёскиро, кхэрэ́стыр Исахаронэскирэстыр, и замардя́ лэс Вааса пашы́л Гавафоно Филистимско, ке́ли Навато и сарэ́ Израильтя́ни обчхувэнас трусця́л Гавафоно.28. И замардя́ лэс Вааса пэ три́то бэрш Аса́скиро, крали́скиро Юдэякирэскиро, и яця́ кра́ли пэ штэ́то лэ́скиро.29. Ке́ли ёв яця́ кра́ли, то тэды вымардя саро́ кхэр Еровоамоскиро, и на ячкирдя́ ни екх ди Еровоамостыр, пака на замардя́ лэс, пир лав Ра́скирэ-Дэвлэ́скиро, саво́ Ёв ракирдя́ пирда́л писхаристэ Пэскирэстэ, Ахиястэ Силомляниностэ.30. Пал грэ́хи Еровоамоскирэ, савэ́ ёв кокоро́ кэрдя́, и савэ́нца лыджия́ дро грэ́хо Израилё, пал киркипэн, савэ́са ёв холякирдя Рас-Дэвлэ́с, Дэвлэ́с Израилёскирэс.31. Яви́р рэ́нды Наватоскирэ, саро́, со ёв кэрдя́, исын зачхиндлэ́ дрэ бэршы́тка архи́вы кралье́нгирэ Израилёскирэ.32. И марибэ́н сыс машки́р Асастэ и Ваасастэ, крали́стэ Израилёскирэстэ, дрэ сарэ́ дывэса́ лэ́нгирэ.33. Пэ три́то бэрш Аса́скиро, сыр крали́с Юдэякирэс, яця́ кра́ли Вааса, чхаво́ Ахиёскиро, пэ сарэ́ Израильтянэндэ дрэ Фирца, и сыс кра́ли биш тэ штар бэрш.34. И кэрдя́ фуипэ́н анги́л якха́ Ра́скирэ-Дэвлэ́скирэ, и псирдя́ дромэ́са Еровоамоскирэса и дрэ грэ́хи лэ́скирэ, савэ́нца одова́ лыджия́ дро грэ́хо Израилё.1 Kings 16:1-341. И сыс лав Ра́скирэ-Дэвлэ́скиро кэ Иуё, чхаво́ Ананискиро, пал Ваасастэ:2. “Пал дова́, со Мэ ґаздыём тут прахостыр и кэрдём тут Мирэ́ Израилёскирэ манушэ́нгирэ шэралэса, ту ги́ян дромэ́са Еровоамоскирэса и лыджиян дро грэ́хо Мирэ́ манушэ́н Израильтянэ́н, соб (кай) ёнэ тэ холякирэн Ман грэхэ́нца пэскирэнца.3. Ѓа́да, Мэ вымарава кхэр Ваасаскиро и кхэр лэ́скирэ-родоскиро, и кэра́ва кхэрэса лэскирэса дова́-паць, со кэрдём Еровоамоскирэ, Наватоскирэ чхавэскирэса.4. Кон мэрэ́ла Ваасастэ дро фо́ро, одолэ́с схана джукэла; а кон мэрэ́ла лэ́стэ пэ фэ́лда, одолэ́с росклюинэна болыбна́скирэ чирикля́.”5. Яви́р рэ́нды Ваасаскирэ, саро́, со ёв кэрдя́, и славутна рэ́нды лэ́скирэ исын зачхиндлэ́ дрэ бэршы́тка архи́вы Израилёскирэ кралье́нгирэ.6. И мыя́ Вааса и гарадо́ сыс пэ́скирэ дадэ́нца дрэ Фирца. И Ила яця́ кра́ли, чхаво́ лэ́скиро, пэ штэ́то лэ́скиро.7. Нэ пирда́л Иуёстэ, чхавэ́стэ Ананискирэстэ, анги́л сыс пхэндло́ лав Ра́скирэ-Дэвлэ́скиро пал Ваасастэ, и пал кхэр лэ́скиро, и пал саро́ фуипэ́н, саво́ ёв кэрдя́ анги́л якха́ Ра́скирэ-Дэвлэ́скирэ, холякири Лэс пэ́скирэ вастэнгирэ рэндэ́нца, ёв кэрдя́ дова́-паць со анги́л лэ́стэ кэрдя́ Еровоамоскири сэ́м΄я (ири́), палсо́ ёв замардо сыс.8. Пэ биш тэ шо́вто бэрш Аса́скиро, сыр Юдэя́киро кра́ли, яця́ крали́са Ила, чхаво́ Ваасаскиро, пэ Израилё дрэ Фирца и ёв сыс кра́ли дуй бэрш.9. И кэрдя́ проти лэ́стэ зракирибэ́н дына́ри лэ́скиро Замвриё, саво́ сыс барыдыро́ пэ паш марибны́тка вурдэна́. Ке́ли ёв дрэ Фирца выпия зоралэ́с дро кхэр Арсоскиро, саво́ сыс шэритко пэ фелатин дрэ Фирца,10. то тэды загия́ Замвриё, и замардя́ лэс, дрэ биш тэ эфта́то бэрш Аса́скиро, Юдэя́кирэ-крали́скиро, и яця́ кра́ли, пэ штэ́то лэ́скиро.11. Ке́ли ёв яця́ кра́ли и бэстя́ пэ лэ́скиро троно, тэды ёв замардя́ сари́ Ваасаскири сэ́м΄я (ири́), на ячкирдя́ лэ́скэ ни екхэ муршэ́с кэ ва́нта, ни лэ́скирэ сэмэнцэн, ни лэ́скирэ малэн.12. И замардя́ Замвриё сари́ Ваасаскири сэ́м΄я (ири́), пир лав Ра́скирэ-Дэвласкиро, саво́ Ёв ракирдя́ пал Ваасастэ пирда́л пророкостэ Иуёстэ.13. Пал сарэ́ Ваасаскирэ грэ́хи и пал Иласкирэ грэ́хи, лэ́скирэ чхавэ́скирэ, савэ́ ёнэ кокорэ́ кэрдэ́ и савэ́нца лыджинэ́ Израилё дро грэ́хо, холякири Рас-Дэвлэ́с, Дэвлэ́с Израилёскирэс, пэ́скирэ идолэнца.14. Яви́р рэ́нды Илоскирэ, сарэ́, со ёв кэрдя́, исын зачхиндлэ́ дрэ бэршы́тка архи́вы Израилёскирэ кралье́нгирэ.15. Пэ биш тэ эфта́то бэрш Аса́скиро сыр Юдэя́киро кра́ли, яця́ крали́са Замвриё, и сыс кра́ли эфта́ дывэса́ дрэ Фирца, ке́ли мануша́ обчхувэнас трусця́л Гавафоно Филистимиякиро.16. Ке́ли мануша́ шундлэ́, со Замвриё кэрдя́ зракирибэ́н и мулякирдя́ крали́с, тэды сарэ́ Израильтя́ни чхудэ́ крали́са Амвриёс, халадэ́нгирэ барыдырэ́с, пэ Израилё дрэ дова́-паць дывэ́с, дро ста́но.17. И отгинэ́ Амвриё и сарэ́ Израильтя́ни лэ́са Гавафоностыр, и обчхудэ трусця́л Фирца.18. Ке́ли дыкхця́ Замвриё, со фо́ро лыно́, загия́ дрэ андратуны́ шту́ба, крали́скирэ-кхэрэ́скири, и захачкирдя пал пэ́стэ крали́скиро кхэр яга́са, и мыя́.19. Пал пэ́скирэ грэ́хи, дро со ёв кэрдя́ грэ́хи, сыр ёв кэрдя́ фуипэ́н анги́л якха́ Ра́скирэ-Дэвлэ́скирэ, псирдя́ дромэ́са Еровоамоскирэса и дрэ грэ́хи лэ́скирэ, савэ́ дова́ кэрдя́, соб (кай) тэ залыджал Израилё дро грэ́хо.20. Яви́р рэ́нды Замвриёскирэ и зракирибэ́н лэ́скиро, саво́ ёв счхудя, исын зачхиндлэ́ дрэ бэршы́тка архи́вы кралье́нгирэ Израилёскирэнгирэ.21. Тэды розгинэпэ мануша́ Израилёскирэ пэ дуй рига́: паш мануша́ сыс тэрдэ́ пал Фамниёстэ, чхавэ́стэ Гонафоскирэстэ, соб (кай) тэ чхувэ́н лэс крали́са, а яви́р паш пал Амвриёстэ.22. И пирилынэ зор мануша́, савэ́ сыс пал Амвриёстэ, пэ манушэ́ндэ, савэ́ сыс пал Фамниёстэ, чхавэ́стэ Гонафоскирэстэ, и мыя́ Фамниё, и Амвриё яця́ кра́ли.23. Пэ трияндатрито бэрш Аса́скиро, сыр Юдэя́киро крали́скиро, яця́ тэ кралинэ́л Амвриё пэ Израилё, и кралиндя дэшуду́й бэрша́. Дрэ Фирца кралиндя ёв шов бэрша́.24. И киндя Амвриё бэ́рга Семерон Семиростыр пал дуй тала́нты рупэ́са, и лыя́ ёв тэ чхувэ́л кхэра́, и дыя́ лав фороскэ, со ёв кэрдя́, Сама́рия, пир лав Семиро, конэ́скири сыс дая́ бэ́рга.25. Нэ Амвриё кэрэ́лас фуипэ́н анги́л якха́ Ра́скирэ-Дэвлэ́скирэ, и кэрдя́ буты́р фуипэ́н сарэ́ндыр, кон сыс кра́лья анги́л лэ́стэ.26. Ёв псирдя́ Еровоамоскирэ дромэ́са дро саро́, саво́ сыс чхаво́ Наватоскиро, и дрэ сарэ́ грэ́хи лэ́скирэ, савэ́нца одова́ залыджия́ дро грэ́хо Израильтянэ́н, соб (кай) тэ холякирэс Рас-Дэвлэ́с, Дэвлэ́с Израилёскирэс лэ́скирэ идолэнца.27. Яви́р рэ́нды (де́лы) Амвриёскирэ, савэ́ ёв кэрдя́, и муршыпэн, саво́ ёв сыкадя́, исын зачхиндлэ́ дрэ бэршы́тка архи́вы кралье́нгирэ Израилёстыр.28. И гия́ тэ откхинёл ве́чнэс Амвриё пэ́скирэ дадэ́нца, и гарадэ́ лэс дрэ Сама́рия. И лыя́ тэ кралинэ́л Аха́во, чхаво́ лэ́скиро, пэ штэ́то лэ́скиро.29. О Аха́во, чхаво́ Амвриёскиро, лыя́ тэ кралинэ́л пэ Израилё, сыр сыс трияндаохтото бэрш, ке́ли лыя́ тэ кралинэ́л Аса́ пэ Юдэ́я, и Аха́во кралиндя пэ Израилё дрэ Сама́рия биш тэ дуй бэрша́.30. И кэрдя́ Аха́во фуипэ́н анги́л якха́ Ра́скирэ-Дэвлэ́скирэ буты́р сарэ́ндыр, савэ́ сыс анги́л лэ́ндэ.31. Лэ́скэ на ухтылэлас (сыс на́доси) дова́, со ёв пыя́ дрэ грэ́хи Еровоамоскирэ, кон сыс чхаво́ Наватоскиро, а ёв ишчо (инкэ́) лыя́ Езавель дрэ ромня́тэ, чха Ефваалоскирья, кон сыс кра́ли Сидоноскиро, и ёв лыя́ тэ дынаринэ́л Ваалоскэ и тэ дэл паты́в лэ́скэ.32. И чхудя́ ёв алта́рё Ваалоскэ пэ мангипнытко штэ́то Ваалоскэ, саво́ ёв ґаздыя́ дрэ Сама́рия.33. И кэрдя́ Аха́во дэмбитко вэшоро (Астарта), и буты́р сарэ́ндыр кралье́ндыр Израилёстыр, савэ́ сыс анги́л лэ́стэ Аха́во кэрдя́ дова́, со́са ёв холякирэлас Рас-Дэвлэ́с, Дэвлэ́с Израилёскирэс.34. Дрэ лэ́скирэ дывэса́ Ахиило Вефилянино зачхудя Ерихо́но: пэ пэ́скирэ Пэрвонэстэ Авирамостэ ёв чхудя́ фунда́менто, и пэ пэ́скирэ тэрнэдыршонэ чхавэ́стэ, Сегубастэ, ёв зачхудя форо́скири по́рта, пир лав Ра́скирэ-Дэвлэ́скиро, саво́ Ёв выпхэндя пирда́л Исусо́стэ, чхавэ́стэ Навиноскирэстэ.Psalms 69:22-2822. Ёнэ адя́кэ-паць дынэ́ ма́нгэ жэлучо дро миро хабэ́н; и ке́ли мэ камдём тэ пья́в, ёнэ дынэ́ шут (уксусо) ма́нгэ.23. Мэк лэ́нгиро сками́нд тэ кэрдёл кхудяса (сеткаса) ваш лэ́нгэ, мэк лэ́нгиро миштыпэ́н тэ явэ́л дукхаса тэ ухтылэл лэн.24. Мэк тэ калён лэ́нгирэ якха́, соб (кай) ёнэ тэ на дыкхэ́н лэ́нца и мэк лэ́нгиро трушу́л пэ думо ўса́ды (сак) тэ издрал.25. Вычхув пэ лэ́ндэ Тыри́ холы́, и мэк Тырэ́-холякири яг тэ дорэсэл лэн.26. Мэк тэ мэкэ́н мануша́ лэ́нгиро кхэр, мэк ние́кх тэ на дживэ́л дрэ лэ́нгирэ ша́тры.27. Пал-дова́ со, конэ́с Ту пэкадян, кодолэ́н ёнэ традэ́на, и ёнэ ракирэ́на пал калыпэ́н пэ ило́ одолэнгиро, конэ́с Ту дукхадян.28. Причху́в чорипэ́н кэ лэ́нгиро чорипэ́н, и на домэк лэн тэ доджан кэ Тыро́ чачипэ́н.Proverbs 17:25-2625. Дылынэ́ чхавэстыр калёла ило́ дадэ́стэ, киркипэн одолэ́ джувля́кэ, сави́ бияндя́ лэс.26. Тэ сэндякирэс чачунэ́ манушэ́с исын намишто, и тэ марэс крали́скирэ барыдырэ́н пал лэ́нгиро патяибэ́н.Jan 13:1-201. Анги́л свэ́нко Патради́ Ису́со, сыр джиндя́, со явдя́ пашылэды́р мардо́ (шту́нда) ваш Лэ́скэ тэ мэкэл дава́ свэ́то и тэ рисёл кэ Дад, Лэ́скэ ячнэ́ древа́н дро́га одолэ́, савэ́ дживдэ́ Лэ́са пэ дава́ свэ́то, и какана́ Ёв сыкадя́ сари́ зор Пэ́скирэ ласкаса кэ ёнэ.2. Бэльвэле́, ке́ли ёнэ ханас, на́лачхо чхудя́ мысля дро ило́ Юда́скэ, Симоноскирэ чхавэ́скэ Искариотоскирэскэ тэ здэл Исусо́с.3. Ису́со джиндя́, со Дад саро́ отдыя́ дрэ Лэ́скирэ васта́, и со Ёв явдя́ Дэвлэ́стыр и рисёла кэ Дэвэ́л.4. Ису́со уштыя́ скаминдэстыр, злыя́ Пэ́стыр упратуно урибэ́н, лыя́ рушника (кхосно) и подпхандяпэ ла́са.5. Пало́ (после) Ёв чхудя́ пани́ дро морибнаскиро чаро́ и лыя́ тэ морэл ґэра́ сыкляибнытконэ́нгэ и тэ кхосэл рушникаса, савья́са Ёв сыс подпхандло.6. Ке́ли Ёв подги́я кэ Си́моно Пэ́три, одова́ ракирэ́ла Лэ́скэ: “Раё Дэ́вла! Ту явэ́са тэ морэс ґэра́ ма́нгэ?7. Ису́со отпхэндя́ лэ́скэ: “Со Мэ кэра́ва, какана́ ту на ґалёса, нэ саро́ ту ґалёса коригэды́р.”8. Пэ́три ракирэ́ла Лэ́скэ: “Ту ние́кхвар на выморэса ґэра́ мирэ́.” Ису́со отпхэндя́ лэ́скэ: “Ко́ли Мэ на выморава ту́кэ ґэра́, тэды ту на сан Ма́нца кхэтанэ́ дрэ паш.”9. Тэды Пэ́три ракирэ́ла Лэ́скэ: “Раё Дэ́вла! Мор, на екх ґэра́ и васта́ мирэ́, нэ и шэро́.”10. Ису́со ракирэ́ла Лэ́скэ: “Жужэ́ (чыстонэ) манушэ́скэ трэй екх ґэра́ тэ выморэл, пал-дова́ со ёв исын жужо́; и тумэ́ сан жужэ́, нэ на сарэ́.11. Пал-дова́ со Ёв джиндя́ Пэ́скирэс здыибнарис, палдава́ адя́кэ и пхэндя́, со на сарэ́ ёнэ сыс жужэ́.12. Нэ ке́ли Ису́со вымордя лэ́нгэ ґэра́ и уридя Пэ́скиро урибэ́н, Ёв бэсця́ пэ Пэ́скиро штэ́то и пхэндя́ лэ́нгэ: “Ци тумэ́ на джинэ́на, со Мэ кэрдём ваш тумэ́нгэ?13. Тумэ́ Ман кхарэ́на “Сыклякирибна́скиро” и “Дэвэ́л”, и мишто́ кэрэ́на, пал-дова́ со Мэ адасаво́ и Сом.14. И ко́ли Мэ, Дэвэ́л и Сыклякирибна́скиро вымордём тумэ́нгэ ґэра́, адя́кэ-паць и тумэ́нгэ трэй тэ морэн ґэра́ екх екхэ́скэ.15. Мэ дыём тумэ́нгэ приме́ро (сыкаибэ́н), соб (кай) и тумэ́ тэ кэрэ́н адя́кэ-паць, со Мэ кэрдём тумэ́нгэ.16. Чачэс, чачэс Мэ ракира́ва тумэ́нгэ: дына́ри исын на барэды́р пэ́скирэ Ра́стыр, и одова́, кон бичхадо́, нанэ барэды́р одолэ́стыр, Кон бичхадя́ лэс.17. Ко́ли тумэ́ джинэ́на дава́, тумэ́ явэ́на бахталэ́, ко́ли и явэ́на тэ кэрэ́н адя́кэ-паць.18. Мэ на пал сарэ́ндэ тумэ́нгэ ракира́ва. Мэ джино́м (джина́в) одолэ́н, савэ́н Мэ выкэдыём; нэ мэк тэ сполнинэ́лпэ Свэ́нто Чхиныбэ́н: Одова́, кон ха́ла маро́ кхэтанэ́ Ма́нца, ґаздыя́ ґэро́й пэ Ма́ндэ.19. Какана́ Мэ ракира́ва тумэ́нгэ: анги́л, сыр дава́ сполнинэлапэ, соб (кай) тумэ́ тэ патя́н, со дава́ сом Мэ.20. Чачэс, чачэс Мэ ракира́ва тумэ́нгэ: кон прилэ́ла одолэ́с, конэ́с Мэ бичхава́ва, прилэ́ла Ман; нэ кон прилэ́ла Ман, прилэ́ла Одолэ́с, Кон бичхадя́ Ман.” Romani Bible Baltic 2019 Maintained by the United Bible Societies for the Baltic Romani Mission