Bible in one year
June 9

1. Неемано, халадэ́нгиро барыдыро́ кэ Сирия́киро кра́ли, сыс славу́тно ману́ш пэ́скирэ хуластэ и дрэ паты́в, пал-дова́ со пирда́л лэ́стэ дыя́ Рай Дэвэ́л Сириянэнгэ тэ пиризорьякирэн. И адава́ ману́ш сыс лачхо́ халадо, нэ сыс проказытко.
2. Сирияни екх мо́ло гинэ́ отрядэнца и лынэ́ дрэ пле́но Израилёскирэ пхувья́тыр тыкнинькона раклорья, и ёй дынариндя́ Нееманоскирэ ромнякэ.
3. И пхэндя́ ёй пэ́скирэ хуланякэ: “Ко́ли бы миро хула́й тэ явэ́л кэ проро́ко, саво́ исын дрэ Сама́рия, тэды ёв лэла бы криг лэ́стыр лэ́скири прока́за!”
4. И гия́ Неемано, и роспхэндя́ дава́ пэ́скирэ хула́скэ, ракири́: “Адя́кэ и адя́кэ ракирэ́ла раклори, сави́ исын Израилёскирэ пхувья́тыр.
5. И пхэндя́ Сирия́киро кра́ли Нееманоскэ: “Джа́, спсир, а мэ бичхава́ва лыл Израилёскирэ крали́скэ.” Ёв гия́ и лыя́ пэ́са дэш таланы руп, и шов тысёнцы шэкэли сувнака́й, и дэш змены и́ди.
6. И яндя́ Израилёскирэ крали́скэ лыл, дрэ саво́ сыс пхэндло́: “Кхэтанэ́ далэ́ лылэса, ґа́да, мэ бичхава́ва кэ ту Нееманос, мирэ́ дынари́с, соб (кай) ёв тэ лэл криг лэ́стыр лэ́скири прока́за.
7. Израилёскиро кра́ли, прогиндя лыл, роскустя пэ́скирэ и́ди: “Со мэ Дэвэ́л сом, соб (кай) тэ мулякирав и тэ отджидякирав, со ёв бичхавэ́ла кэ мэ, соб (кай) мэ тэ лав криг манушэ́стыр лэ́скири прока́за. Ѓа́да, какана́ джинэ́н и дыкхэ́н, со ёв родэ́ла причына тэ джал марибна́са проти ма́ндэ.”
8. Ке́ли шундя́ о Елисе́ё, Дэвлэ́скиро ману́ш, со Израилёскиро кра́ли роскустя пэ́скирэ и́ди, то бичхадя́ манушэ́с тэ пхэнэ́л крали́скэ: “Ваш со ту роскустян пэ́скирэ и́ди? Мэк ёв тэ явэ́л кэ мэ, и ёв уджинэла, со исын проро́ко дро Израилё.”
9. И явдя́ Неемано пэ пэ́скирэ грэ́ндэ и пэ пэ́скиро марибны́тко вурдэ́н, и тэрдия́ пашы́л загиибэ́н дро Елисеёскиро кхэр.
10. И бичхадя́ кэ ёв Елисе́ё дынари́с тэ пхэнэ́л: “Джа́, обморпэ эфта́ мо́лы дро Иорда́но, и явэ́на нэвэ маса́ ту́тэ, и ту явэ́са жужо́.”
11. И росхолясыя Неемано, и гия́, и пхэндя́: “Ѓа́да, мэ думиндём, со ёв выджа́ла, тэрдёла, и кхарэ́ла Ра́скирэ-Дэвлэ́скиро, пэ́скирэ Дэвлэ́скиро лав, и чхувэ́ла пэ́скиро васт пэ дова́ штэ́то, и лэла криг прока́за.
12. Нау́што Авана и Фарфаро, рэ́ки (лэня́) Дамаскоскирэ, нанэ фэды́р сарэ́ Израилёскирэ пане́стыр? Нау́што мэ на могиндём тэ обморавпэ дрэ лэ́ндэ и тэ выжужакиравпэ?” И рисия́, и гия́ пэ́скэ холя́са.
13. И подгинэ́ лэ́скирэ писха́рья, и ракирдэ́ лэ́скэ, и пхэндлэ́: “Миро да́до, ко́ли бы вари-со главно пхэндя́ ту́кэ проро́ко, тэды, ци на кэрэ́са бы ту? А ишчо (инкэ́) буты́р, ке́ли ёв пхэндя́ ту́кэ екх: “Обморпэ и явэ́са жужо́”.”
14. И гия́ ёв, и обмордяпэ дро Иорда́но эфта́ мо́лы, пир Дэвлэ́скирэ-манушэ́скиро лав, и ячнэ́ нэвэ лэ́скирэ маса́, сыр маса́ тыкнэ́-чхаворэскирэ, и выжужакирдяпэ.
15. И рисия́ ёв кэ Дэвлэ́скиро ману́ш – ёв и сарэ́ лэ́скирэ мануша́, савэ́ сыс лэ́са, и явдя́, и тэрдия́ анги́л лэ́стэ, и пхэндя́: “Ѓа́да, мэ уджиндём, со пэ сари́ пхув нанэ Дэвлэ́с, сыр исын дрэ екх Израилё; и адя́кэ прилэ́ да́ро тырэ́ писхаристыр.”
16. И пхэндя́ ёв: “Тэ явэ́л джидо́ пэ ве́ки Рай Дэвэ́л, анги́л муй Савэскиро мэ сом тэрдо́! На прилава.” И дова́ зачхувэлас лэс тэ лэл, нэ ёв на подыяпэ (на дыя́ лав).
17. И пхэндя́ Неемано: “Ко́ли со на адя́кэ, тэды мэк тырэ́ писхари́скэ тэ дэн пхув, ци бут злыджана дуй мулы; пал-дова́ со на явэ́ла буты́р тыро́ писха́ри тэ янэл цэ́ло схачкирибэ́н и свэ́нта яныбэна́ явирэ дэвлорэ́нгэ, апри́ч Растэ-Дэвлэ́стыр.
18. Екх, ґа́да дрэ со мэк тэ примангэл (тэ простинэл) Рай Дэвэ́л тырэ́ писхари́с; ке́ли джа́ла миро хула́й дро кхэр Римоноскиро ваш мангипэ́н одо́й и облокотинэлапэ пэ миро васт, и клонинавапэ мэ дрэ Римоноскиро кхэр, то тэды, ке́ли мэ клонинавапэ дро́ кхэр Римоноскиро, мэк тэ примангэл Рай Дэвэ́л писхари́с тырэ́с дрэ дая́ ваканцыя (дава́ случаё).”
19. И пхэндя́ лэ́скэ: “Джа́ Дэвлэ́са.” И ёв традыя́ криг лэ́стыр пэ нобаро дром пхувья́киро.
20. Нэ пхэндя́ Гие́зиё, Елисеёскиро дына́ри, Дэвлэ́скирэ-манушэ́скиро: “Ѓа́да, миро хула́й отпхэндяпэ тэ лэл Нееманоскирэ вастэ́стыр, далэ́ Сирияниностыр дова́, со ёв яндя́.” “Тэ явэ́л джидо́ пэ ве́ки Рай Дэвэ́л! Прастава мэ пал лэ́стэ; и лава́ лэ́стыр вари-со.”
21. И потрадыяпэ Гие́зиё пал Нееманостэ. И дыкхця́ Неемано манушэ́с, саво́ прасталас пал лэ́стэ, и згия марибнытконэ́ вурдэнэстыр пэ стреч лэ́скэ, и пхэндя́: “Ци раманёса (миро́са) ту сан?”
22. Ёв отпхэндя́: “Раманёса (миро́са); миро хула́й бичхадя́ ман тэ пхэна́в: Ѓа́да, акана́ явнэ́ кэ мэ Ефремо́скирэ бэрга́тыр дуй тэрнэ́ мануша́ пророкэ́нгирэ чхавэ́ндыр; дэ лэ́нгэ тала́но руп и дуй змены и́ди.”
23. И пхэндя́ Неемано: “Лэ, мэ манга́ва, дуй таланы.” И мангдя́ лэс. И запхандя ёв дуй таланы руп дрэ дуй гонэ́ и дуй змены и́ди, и отдыя́ дуе́ пэ́скирэ дынарье́нгэ, и лыджинэ́ анги́л лэ́ндэ.
24. Ке́ли ёв явдя́ кэ бэ́ргица, то тэды лыя́ лэ́нгирэ вастэ́ндыр и гарадя кхэрэ́. И отмэкця́ манушэ́н, и ёнэ гинэ́ пэ́скэ.
25. Ке́ли ёв явдя́ и явдя́ кэ пэ́скиро хула́й, то Елисе́ё пхэндя́ лэ́скэ: “Каты́р сан ту, Гиезе́ё?” И пхэндя́ ёв: “Никарик на псирдём, тыро́ писха́ри.”
26. И пхэндя́ ёв лэ́скэ: “Нау́што ило́ миро на помогиндя ту́кэ, ке́ли рисия́ гил ту́кэ одова́ ману́ш пэ́скирэ вурдэнэстыр? Ци часо (пора) тэ лэс руп и тэ лэс и́ди, ци ксилытка вэша́ и винаградники, и тыкно́ ци баро́ ското, ци дынарье́н, ци дынарицэн?”
27. Мэк Нееманоскири прока́за тэ пириячэл кэ ту и кэ тыро́ ро́до пэ ве́ко.” И выгия́ ёв лэ́стыр парно́ проказатыр, сыр ив.
1. И пхэндлэ́ чхавэ́ пророкэ́нгирэ Елисеёскэ: “Ѓа́да, штэ́то, кай амэ дживаса пашы́л ту́тэ, тясно (танго) исын ваш амэ́нгэ.
2. Джа́са кэ Иорда́но, и ла́са одотхы́р кажно (сва́ко) пир екх бэрно, и кэра́са пэ́скэ одо́й штэ́то ваш джиибэ́н.” Ёв пхэндя́: “Джа́н.”
3. И пхэндя́ екх: “Кэр лачхипэ́н, джа́ и ту дынарье́нца тырэнца.” И пхэндя́ ёв: “Джа́ва.”
4. И явдя́ лэ́нца, и явнэ́ кэ Иорда́но, и лынэ́ тэ чингирэн вэш.
5. И ке́ли екх лэ́ндыр радя вэш, то лэ́скиро товэр пыя́ дрэ пани́. И задыя го́дла ёв, и пхэндя́: “Ай, миро хула́ё! Товэр лыно́ сыс пэ подрикирибэ́н!”
6. И пхэндя́ Дэвлэ́скиро ману́ш: “Кай ёв пыя́?” Ёв сыкадя́ лэ́скэ штэ́то. И отчхингирдя ёв котэ́р (куско) вэшэ́стыр, и чхурдыя́ одори́к, и выплывиндя (дыя пли́ма упрэ) товэр.
7. И пхэндя́ ёв: “Лэ пэ́скэ.” Ёв протырдыя́ пэ́скиро васт и лыя́ лэс.
8. Кра́ли Сирия́киро гия́ марибна́са пэ Израильтянэндэ и радиндяпэ пэ́скирэ дынарье́нца, ракири́: “Дро дасаво́ и дро дасаво штэ́то мэ тэрдякирава пэ́скиро халадыбэ́н.”
9. И бичхадя́ Дэвлэ́скиро ману́ш кэ кра́ли Израилёскиро тэ пхэнэ́н: “Ракхпэ тэ джас далэ́ штэтоса, пал-дова́ со одо́й Сирияни запасинэ.”
10. И бичхадя́ Израилёскиро кра́ли пэ дова́ штэ́то, пал саво́ ракирдя́ лэ́скэ Дэвлэ́скиро ману́ш и приракхця лэс; и зракхця́ пэс одо́й на е́кхвар и на дуй мо́лы.
11. И лыя́ тэ пхарьёл Сириякирэ-крали́скиро ило́ пир дая́ ваканцыя (дава́ случаё), и кхардя́ ёв пэскирэн дынарье́н, и пхэндя́ лэ́нгэ: “Пхэнэ́н ма́нгэ, кон амарэндыр исын пало́ екх Израилёскирэ крали́са?”
12. И пхэндя́ екх лэ́скирэ дынарье́ндыр (слугэ́ндыр): “Нико́н, миро хула́ё, кра́ли; а Елисе́ё проро́ко, саво́ исын кэ Израилё, ёв пирипхэнэла Израилёскирэ крали́скэ и долэ́ лава́, савэ́ ту ракирэ́са дрэ соибнытко тыри́ шту́ба.”
13. И пхэндя́ ёв: “Джа́н, доджинэнпэ, кай ёв исын; мэ бичхава́ва и лава́ лэс.” И роспхэндлэ́ лэ́скэ, и пхэндлэ́: “Ѓа́да, ёв исын дрэ Дофаима.”
14. И бичхадя́ одори́к грэн, и марибны́тка вурдэна́, и бут халадэ́н. И явнэ́ раты́, и облынэ трусця́л фо́ро.
15. Пэ зло́ко (ра́нко) Дэвлэ́скирэ-манушэ́скиро бутярно уштыя́ и выгия́; и ґа́да, халадэ́ сыс трусця́л фо́ро, и граё, и марибны́тка вурдына́. И пхэндя́ лэ́скэ дына́ри лэ́скиро: “Саро́, миро хула́ё, со амэ́нгэ тэ кэра́с?”
16. И пхэндя́ ёв: “На дар, пал-дова́ со одолэ́н, савэ́ исын амэ́нца, буты́р сыр одолэ́н, савэ́ исын лэ́нца.”
17. И мангдя́пэ Елисе́ё, и ракирдя́: “Раё Дэ́вла! Отчхакир лэ́скэ якха́, соб (кай) ёв тэ дыкхэ́л.” И отчхакирдя́ Рай Дэвэ́л якха́ дынари́скэ, и ёв дыкхця́, и ґа́да, сари́ бэ́рга исын пхэрды́ грэнца и марибнытконэ́ вурдынэнца дрэ яг трусця́л Елисеёстэ.
18. Ке́ли гинэ́ кэ ёв Сирияни, Елисе́ё мангдя́пэ Ра́скэ-Дэвлэ́скэ и пхэндя́: “Корьякир лэн.” И Ёв корьякирдя лэн, пир Елисеёскиро лав.
19. И пхэндя́ лэ́нгэ Елисе́ё: “Дава́ исын на дова́ дром и на дова́ фо́ро; джа́н пал ма́ндэ, мэ лыджа́ва тумэн кэ одова́ ману́ш, савэ́с тумэ́ родэ́на.” И яндя́ лэн дрэ Сама́рия.
20. Ке́ли ёнэ явнэ́ дрэ Сама́рия, Елисе́ё пхэндя́: “Раё Дэ́вла! Отчхакир якха́ лэ́нгэ, соб (кай) ёнэ тэ дыкхэ́н.” И отчхакирдя́ Рай Дэвэ́л якха́ лэ́нгэ, и дыкхнэ́, со ёнэ сыс машкира́л Сама́рия.
21. И пхэндя́ Израилёскиро кра́ли Елисеёскэ, дыкхи́ лэн: “Ци тэ на домарэс лэн, миро да́до?”
22. И пхэндя́ ёв: “На домар. Нау́што тырэ́ куртала́са и тырэ́ лукоса ту лыян лэн дро пле́но, соб (кай) тэ домарэс лэн? Сыка́в лэ́нгэ маро́ и пани́; мэк ёнэ тэ хан и тэ пьен, и мэк ёнэ тэ джа́н кэ пэ́скиро кхенинго.”
23. И кэрдя́ ёв лэ́нгэ баро́ хабэ́н, и ёнэ ханэ́ и пинэ́. И отмэкця́ ёв лэн, и гинэ́ ёнэ кэ пэ́скиро кхенинго. И на псирдэ́ буты́р долэ́ барэ́ кэ дар халадыбэна Сириякирэ пэ Израилёскири пхув.
24. Пало́ дава́ (после) скэдыя́ о Венададо, Сирия́киро кра́ли, сарэ́н пэ́скирэ халадэ́н, и выгия́, и обчхудя́ трусця́л халадыбнаса Сама́рия.
25. И сыс бари бокх дрэ Сама́рия, ке́ли ёнэ обчхудэ трусця́л халадыбнаса ла, адя́кэ, со ослытко шэро́ бикиндяпэ пир охтодэша́ шэ́кели руп, и шта́рто паш голумбоскирэ ґнэицо – пэ пандж шэ́кели руп.
26. Екхвар Израилёскиро кра́ли гия́ пир ва́нта, и джувлы́ годла́са ракирдя́ лэ́скэ: “Помо́гин, хула́ё миро, кра́ли.”
27. И пхэндя́ ёв: “Ко́ли на помогинэла ту́кэ Рай Дэвэ́л, ци помогинава мэ ту́кэ, ци шурнатыр, ци пресостыр?”
28. И пхэндя́ кра́ли ла́кэ: “Со ту́кэ?” И пхэндя́ ёй: “Адая джувлы́ ракирдя́ ма́нгэ: ‘Отдэ́ пэ́скирэс чхавэ́с, соб (кай) тэ хас лэс ададывэ́с, а мирэс чхавэ́с схаса атася́.’
29. И кэрадям амэ мирэ́ чхавэ́с, и хаям лэс. И мэ пхэндём ла́кэ пэ яви́р дывэ́с: ‘Отдэ́ тырэ́ чхавэ́с, и хаса лэс.’ Нэ ёй гарадя пэ́скирэс чхавэ́с.”
30. Кра́ли вышундя лава́ джувлякирэ, роскустя пэ́скирэ и́ди: и гия́ ёв пир ва́нта, и мануша́ дыкхнэ́, со гоно́ праскаса (золаса) сыс пэ кокорэ́ лэ́скирэ маса́.
31. И пхэндя́ ёв: “Мэк дова́ и дова́ кэрэ́ла ма́нгэ Дэвэ́л, и ишчо (инкэ́) буты́р кэрэ́ла, ко́ли ячэ́лапэ шэро́ Елисеёскиро, Сафатовоскирэ-чхавэ́скиро, пэ лэ́стэ ададывэ́с.”
32. Елисе́ё сыс бэшто́ дро пэ́скиро кхэр, и годэпхурэ́ сыс бэштэ́ лэ́стэ. И бичхадя́ кра́ли манушэ́с пэ́стыр. Англэды́р, сыр явдя́ ману́ш, савэ́с бичхадэ́ кэ ёв, ёв пхэндя́ годэ́ пхурэнгэ: “Ци дыкхэ́на тумэ́, со адава́ ману́ш, чхаво́ умарибнарискиро, бичхадя́ тэ злэн ма́ндыр шэро́? Дыкхэ́н, ке́ли явэ́ла ману́ш, савэ́с бичхадэ́, закэрэн вуда́р и притасавэн лэс вударэнца. А ґа́да, и лопотымо лэ́скирэ хула́скирэ ґэрэнгиро пал лэ́стэ.”
33. Ишчо ёв ракирдя́ лэ́нца, и ґа́да, ману́ш, саво́ сыс бичхадо́, явдя́ кэ ёв и пхэндя́: “Ѓа́да, саво́ фуипэ́н Ра́стыр-Дэвлэ́стыр, со ишчо (инкэ́) ма́нгэ анги́л тэ ужакирав Ра́стыр-Дэвлэ́стыр?”
1. Соломоно́скиро Пса́лмо. О Дэ́вла! Сыкля́кир крали́с тэ сэндякирэ́л и крали́скирэ чхавэ́с Пэ́скирэ чачипнаскэ.
2. Ёв явэ́ла тэ сэндякирэ́л Тырэ́ манушэ́н пир чачипэ́н, а Тырэ́ чорорэн пир Зако́но.
3. Бэ́рги янэ́на рама́нё (миро) манушэ́нгэ, а бэ́ргицы чачипэ́н.
4. Ёв явэ́ла чачунэ́с тэ сэндякирэ́л чорорэ́ манушэ́н и Ёв дэ́ла зор одолэ́нгэ, кон исын дрэ трэ́бима и Ёв роспхаравэла кодолэ́с, кон притасавэлас лэн.
5. Лэ́ндэ явэ́ла трашаибэ́н анги́л Ту́тэ, пака кхам и чхон исын пир сарэ́ манушы́тка ро́ды.
6. Кра́ли явэ́ла сыр брышы́нд пэ фэ́лда чарьяса, сыр баро́ панинг, со чхувэ́лапэ пэ пхув.
7. Дрэ лэ́скирэ дывэса́ чачипэ́н и рама́нё явэ́на пэ най шукарэдыр штэ́то ўсенде (везде), пака чхон исын пэ болыбэ́н.
10. Ра́скирэ-Дэвлэ́скирэ лав исын сыр зоралы́ вучарды́ (башня), чачуно́ ману́ш нашэла дрэ ла́тэ, и тэ́ньчи ёв исын бидаракиро.
11. Барвалэ́-манушэ́скиро миштыпэ́н исын лэ́скиро зорало́ фо́ро, и ёв исын сы́рбы вучи́ ва́нта дрэ лэ́скирэ-годякири паты́в.
1. Ке́ли Ису́со мэкця́ тэ ракирэ́л, Ёв гия́ Пэ́скирэ сыкляибнытконэ́нца пал Кедроноскири сы́гно рэ́кица (лэнори́) пэ дова́ штэ́то, кай сыс у́нта (садо), дрэ сави́ загия́ Ёв Кокоро́ и Лэ́скирэ сыкляибны́тка.
2. О Юда, Лэ́скиро здыибнари, джиндя́ дава́ штэ́то, пал-дова́ со Ису́со скэдэласпэ бут мо́лы Пэ́скирэ сыкляибнытконэ́нца одо́й.
3. И, ґа́да, Юда лыя́ хевра халадэ́н и дынарье́н, раша́нгирэ барыдырэндыр и Фарисиендыр, и ёнэ явнэ́ одори́к захачкирдэ ягэнца, ягэнгирэнца и курталэнца.
4. Ису́со джиндя́ саро́, со явэ́ла Лэ́са, выгия́ кэ ёнэ и пхуця́ лэ́ндыр: “Конэ́с тумэ́ родэ́на?”
5. Лэ́скэ отпхэндлэ́: “Исусо́с Назареёс.” Ису́со пхэндя́ лэ́нгэ: “Ѓа́да, сом Мэ.” О Юда, Лэ́скиро здыибнари, сыс тэрдо́ кхэтанэ́ лэ́нца.
6. И ке́ли Ису́со пхэндя́ лэ́нгэ: “Ѓа́да, Мэ сом”, ёнэ дынэпэ палэ и пынэ́ пэ пхув.
7. Нэвэ́стыр Ёв пхуця́ лэ́ндыр: “Конэ́с тумэ́ родэ́на?” Ёнэ пхэндлэ́: “Исусо́с Назареёс.”
8. Ису́со отпхэндя́: “Мэ пхэндём тумэ́нгэ, со дава́ сом Мэ; ко́ли тумэ́ родэ́на Ман, мэк тэ джа́н адалэ́ мануша́,
9. мэк тэ кэрэ́лпэ лав, саво́ Ёв пхэндя́: “Одолэ́ндыр, савэ́н Ту Ма́нгэ дыя́н, Мэ ни екхэ́с на хасякирдём”.”
10. Си́моно (Симеоно), адава́-паць Пэ́три, савэ́стэ сыс курта́ла, вытырдыя ла и чингирдя ла́са дынари́с раша́нгирэ барыдырэскирэс и отчингирдя лэ́скэ чачо́ кан. Адалэ́ дынари́с кхардэ́ Малхо.
11. Нэ Ису́со пхэндя́ Пэтрискэ: “Чхув палэ курта́ла; нау́што Ма́нгэ тэ на пья́в дава́ тахта́й, саво́ Дад дыя́ Ма́нгэ?”
12. Тэды халадэ́ и лэ́нгирэ-тысёнцэнгиро барыдыра́ и Юдэ́нгирэ дына́рья лынэ́ Исусо́с, и пхандлэ Лэс:
13. англэды́р ёнэ лыджинэ́ Лэс кэ Анна; ёв сыс Каиафаскэ састро, саво́ сыс пэ́рво раша́нгиро барыдыро́ дро дова́ бэрш.
14. Дава́ сыс одова́ Каиа́фа, саво́ подпхэндя Юдэ́нгэ, со явэ́ла фэды́р, ко́ли екх ману́ш хасёла пал сарэ́ манушэ́ндэ.
15. Пал Исусо́стэ гинэ́ Си́моно Пэ́три и яви́р Лэ́скиро сыкляибны́тко. Нэ одова́ сыкляибны́тко сыс джиндло́ (пинджкирдо) раша́нгирэ барыдырэ́скэ и ёв гия́ кхэтанэ́ Исусо́са дрэ раша́нгирэ-барыдырэскири грэ́да (дво́ро).
16. Пэ́три ж яця́пэ яври́ пашы́л по́рта. Коригэды́р (позжэды́р) яви́р сыкляибны́тко, саво́ сыс джиндло́ раша́нгирэ барыдырэ́скэ, выгия́ и пириракирдя вударэнгирэ ракхибнаскирьяса и залыджия́ Пэтрис андрэ́.
17. Ада́й вударэнгири ракхибнаскири ракирэ́ла Пэтрискэ: “Ци на сан ту екх кадалэ́ Манушэ́скирэ сыкляибнытконэндыр? Ёв пхэндя́: “Над.”
18. Сыс шылало, слу́ги (дына́рья) и дынарицы, кэрдэ́ яг и лынэ́ тэ татён; Пэ́три адя́кэ-паць сыс тэрдо́ кхэтанэ́ лэ́нца и татия.
Romani Bible Baltic 2019
United Bible Societies for the Baltic Romani Mission