Bible in one year - Пэ Балтитко Романи чиб

Bible in one year July 13

1. И пасия́ ве́чнэс Иосафа́то пэ́скирэ дадэ́нца, и сыс гарадо́ пэ́скирэ дадэ́нца дрэ Давидо́скиро фо́ро. И яця́ крали́са Иора́мо, лэ́скиро чхаво́, пэ штэ́то лэ́скиро.

2. И лэ́стэ сыс пша́ла, Иосафатоскирэ чхавэ́: Аза́рия, и Иехиило (Ехиило), и Заха́рия, и Аза́рия, и Михаило, и Сафатия: сарэ́ далэ́ Иосафатоскирэ сыс чхавэ́, Израилёскирэ крали́скирэ.

3. И дыя́ лэ́нгэ дад лэ́нгирэ барэ́ почасту́нки (подарки) рупэ́са, и сувнака́са, и дрогонэ́ барэ́нца, кхэтанэ́ зоралэ́-тынэнгирэ форье́нца дрэ Юдэ́я; а кралипэ́н ёв отдыя́ Иорамоскэ, пал-дова́ со ёв сыс англатуно́.

4. И тэрдия́ Иора́мо пэ пэ́скирэ-дадэ́скиро кралипэ́н и яця́ зорало́, и мулякирдя́ сарэ́н пэ́скирэ пшалэ́н куртала́са и адя́кэ-паць вари-савэ́н Израилёскирэ тхагарье́ндыр.

5. Трия́нда дуй бэрша́ сыс Иорамоскэ, ке́ли ёв яця́ крали́са, и охто́ (бидуе́нгиро дэш) бэрш ёв сыс крали́са дро Ерусалимо;

6. и псирдя́ ёв Израилёскирэ кралье́нгирэ дромэ́са, сыр кэрдя́ Ахавоскиро кхэр – пал-дова́ со Ахавоскири чхай сыс лэ́скири ромны́, – и кэрдя́ ёв налачхэ́с дрэ Ра́скирэ-Дэвлэ́скирэ якха́.

7. Усае́кх на камдя́ Рай Дэвэ́л тэ хасякирэ́л Давидо́скиро кхэр ваш Заве́то, саво́ кэрдя́ Ёв Давидоса, и пал-дова́ со ёв дыя́ лав (обисциндя) тэ дэл лэ́скэ и лэ́скирэ чхавэ́нгэ пэ сарэ́ дывэса́.

8. Дрэ лэ́скирэ дывэса́ выгия́ Эдо́мо Юда́скирэ зорья́тыр и чхудэ́ ёнэ пэ пэ́стэ крали́с.

9. И гия́ Иора́мо пэ́скирэ халадэ́нгирэ барыдырэ́нца, и сарэ́ марибны́тка вурдына́ сыс лэ́са; и, уштыи раты́, домардя́ Идумеянэн, савэ́ облынэ трусця́л лэс, и барыдырэ́н пэ марибны́тка вурдына́.

10. Усае́кх выгия́ Эдо́мо Юда́скирэ зорья́тыр кэ дава́ дывэ́с. Дрэ долэ́-паць дывэса́ выгия́ и Ливна лэ́скирэ зорья́тыр, пал-дова́ со ёв ячкирдя́ Рас-Дэвлэ́с, пэ́скирэ дадэнгирэс Дэвлэ́с.

11. Адя́кэ-паць вучипэна́ кэрдя́ ёв пэ бэ́рги дрэ Юдэ́я, и залыджия́ дро блэ́ндо Ерусалимо́скирэ манушэ́н, и злыджия Юдэ́я.

12. И явдя́ кэ ёв тэ лыл Илиястыр пророкостыр, дро саво́ сыс пхэндло́: “Адя́кэ ракирэ́ла Рай Дэвэ́л, тырэ́ дадэ́скирэ-Давидо́скиро Дэвэ́л: пал-дова́, со ту на ги́ян тырэ́ дадэ́скирэ Иосафатоскирэ дромэ́нца, и Юдэя́кирэ-крали́скирэ Асаскирэ дромэ́нца,

13. а ги́ян Израилёскирэ-кралье́нгирэ дромэ́са и лыджиян дро блэ́ндо Юдэ́я и Ерусалимо́скирэ манушэ́н адя́кэ-паць, сыр залыджия́ манушэ́н дро блэ́ндо Ахавоскиро кхэр; ишчо (инкэ́) и тырэ́ пшалэ́н, тырэ́-дадэ́скиро кхэр, савэ́ фэды́р ту́тыр, ту мулякирдян лэн:

14. пал-дова́, ґа́да, Рай Дэвэ́л мулякирэ́ла барэ́ марибна́са тырэ́ манушэ́н, и тырэ́ чхавэ́н, и тырэ́ ромне́н, и саро́ тыро́ барвалыпэ́н,

15. тут кокорэс-барэ́ насвалыпнаса, тырэ́-кужумэнгирэ дукхаса кэ дова́, со явэ́на тэ пэрэ́н яври́ тырэ́ кужума насвалыпнастыр дывэ́с дывэсэ́стыр.”

16. И ґаздыя́ Рай Дэвэ́л проти Иорамостэ ду́хо (фа́но) Филистимлянэнгиро и Аравитянэнгиро (Арабэнгиро), савэ́ дживдэ́ пашы́л Ефиоплянэндэ;

17. и ёнэ гинэ́ пэ Юдэ́я, и пынэ́ марибна́са пэ ла́тэ, и заухтылдэ саро́ миштыпэ́н (барвалыпэ́н), саво́ сыс дро крали́скиро кхэр, адя́кэ-паць и лэ́скирэ чхавэ́н, и ромнен лэскирэн; и на яця́пэ лэ́стэ чхавэ́с, апри́ч Охозиёстэ, тыкнэдыршонэс лэ́скирэ чхавэ́ндыр.

18. И пало́ (после) саро́ дава́ Рай Дэвэ́л дукхадя лэ́скирэ кужума насвалыпнаса, саво́ сыс нашты́ тэ высастякирэс.

19. Адя́кэ сыс дывэсэ́стыр пэ дывэ́с, а пэ явирэ-бэршэскиро ко́нцо (яго́ро) выпынэ лэ́скирэ кужума насвалыпнастыр лэскирэстыр, и ёв мыя́ дрэ барэ́ мэ́ньки; и мануша́ лэ́скирэ на схачкирдэ́ ваш лэ́скэ лачхэ́-кхандыпнытка (парфуны), сыр кэрдэ́ дава́ ваш лэ́скирэ дадэ́нгэ.

20. Трия́нда дуй бэрш сыс лэ́скэ, ке́ли ёв яця́ крали́са, и охто́ (бидуе́нгиро дэш) бэрш ёв сыс крали́са дро Ерусалимо, и мыя́ на оброндло, и ґарадэ́ лэс дрэ Давидо́скиро фо́ро, нэ на дрэ кралипнаскирэ коплицы.

2 Chronicles 22:1-12

1. И чхудэ́ крали́са Ерусалимо́скирэ мануша́ Охозияс, лэ́скирэ тыкнэдыршонэ чхавэ́с, пэ штэ́то лэ́скиро лэ́стэ, адя́кэ сыр сарэ́н пхурыдыршонэн домардя́ баро́ кэ дар халадыбэ́н, савэ́ сыс Аравитянэнца кэ ста́но (лод), и яця́ крали́са Охозия, Иорамо́скиро чхаво́, саво́ сыс кра́ли пэ Юдэ́я.

2. Биш тэ дуй бэрш сыс Охозияскэ, ке́ли ёв яця́ крали́са, и екх бэрш ёв сыс крали́са дро Ерусалимо; лав лэ́скирэ-да́киро сыс Гофолия, Амвариёскири чхай.

3. Ёв адя́кэ-паць псирдя́ Ахавоскирэ-кхэрэ́скирэ дромэ́нца, пал-дова́ со лэ́скири дай дыя́ годы́ лэ́скэ пал би-законо́скирэ рэ́нды.

4. И кэрдя́ ёв налачхэ́с дрэ Ра́скирэ-Дэвлэ́скирэ якха́, адя́кэ-паць сыр кэрдя́ Ахавоскиро кхэр: пал-дова́ со ёв лэ́скэ дэ́лас годы́ пало́ (после) лэ́скирэ-дадэ́скиро мэрибэ́н, пэ хасибэ́н лэ́скэ.

5. Адя́кэ-паць, кэри пир лэ́нгири годы́, ёв гия́ Иорамоса, Ахавоскирэ-чхавэ́са, Израилёскирэ крали́са, пэ марибэ́н проти Азаилостэ, Сириякирэ крали́стэ, дро Рамо́фо Галаадоскиро. И дукхадэ (раниндлэ) Сирияни Иорамос.

6. И рисия́ ёв дро Изреелё тэ драбакирэлпэ ранэндыр (франсэндыр), савэ́ кэрдэ́ лэ́скэ дрэ Ра́ма, ке́ли ёв мардя́пэ Азаилоса, Сириякирэ крали́са. И Охозия, Иорамо́скиро чхаво́, пэ Юдэ́я кра́ли, явдя́ тэ дыкхэлпэ Иорамоса, Ахавоскирэ чхавэ́са, дро Изреелё, пал-дова́ со дова́ сыс насвало́.

7. И Дэвлэ́стыр сыс дава́ пэ мэрибэ́н Охозияскэ, со ёв явдя́ кэ Иора́мо: палдова́ со ёв гия́ проти Ииуёстэ, Намесиёскирэ чхавэ́стэ, савэ́с помакхця Рай Дэвэ́л пэ Ахавоскирэ-кхэрэ́скиро хасибэ́н.

8. Ке́ли кэрдя́ Ииу́ё сэ́ндо пэ Ахавоскиро кхэр, тэды ёв латхя́ Юдэя́кирэ тхагарье́н и Охозияскирэ-чхавэ́нгирэ-пшалэ́н, савэ́ дынариндлэ́ (служындлэ) Охозияскэ, и мулякирдя́ лэн.

9. И припхэндя́ ёв тэ родэ́н Охозияс, и лынэ́ лэс, ке́ли ёв гарадыя дрэ Сама́рия, и яндлэ́ лэс кэ Ииу́ё, и замардэ́ лэс, и ґарадэ́ лэс; пал-дова́ со ракирдэ́: ёв сыс Иосафато́скиро чхаво́, саво́ латхя́ Рас-Дэвлэ́с сарэ́ пэ́скирэ илэ́стыр. И на яця́пэ ние́кх дро Охозияскиро кхэр, кон бы могиндя́ тэ явэ́л крали́са.

10. Пал-дова́ со Гофолия, Охозияскири дай, сыр дыкхця́, со мыя́ ла́киро чхаво́, то уштыя́ и мулякирдя́ саро́ крали́скиро ро́до Юда́скирэ кхэрэ́стыр.

11. Нэ Иосавеф, крали́скири чхай лыя́ Иоасос, Охозияскирэ чхавэ́с, и чордя лэс крали́скирэ чхавэ́ндыр, савэ́н замарэнас, и гарадя лэс и одоля джувля́, сави́ лэс барьякирдя дрэ шту́ба, кай сыс сутэ́; и адя́кэ Иосаве́ф, Иорамоскирэ-крали́скири чхай, ромны́ рашаскири Иодаёскири, Охозияскири пхэн, гарадя Иоасос Гофолиятыр; и ёй на мулякирдя́ лэс.

12. И сыс ёв лэ́ндэ, дро Дэвлэ́скиро Кхэр, гарадо́ шов бэрш; Гофолия сыс кралицаса пэ пхув.

Psalms 83:1-8

1. Гилы́. Асафоскиро Пса́лмо.

2. О, Дэ́вла! На бэш штыл, и на яв муто (немо), на яв штыл, о Дэ́вла:

3. пал-дова́ со, акэ, Тырэ́ вэ́рги годлэна, и одолэ́, савэ́ бидыкхэна Тут, ґаздэ́на пэ́скирэ шэрэ́,

4. Ёнэ зракирэнапэ фрэнтэс пэ Тырэ́ манушэ́ндэ, ёнэ задуминэна фуипэ́н проти одолэ́ндэ, савэ́н Ту приракхэса;

5. ёнэ ракирэ́на: “Явэ́н тэ кэра́с, соб (кай) тэ вычхурдас лэн сыр нацыя, соб (кай) буты́р Израилёскиро лав тэ на рипирэлпэ.”

6. Пал-дова́ со ёнэ зракирдэпэ дрэ екх годы́, ёнэ кхэтанякирдэпэ проти Ту́тэ.

7. Ша́тры Едомоскирэ и Исмаильтянэнгирэ, Моа́во и Агаро,

8. Ѓевало и Амоно и Амалико, Филистимля́ни и Тироскирэ джиибна́скирэ,

Proverbs 21:1-1

1. Крали́скиро ило́ исын дрэ Ра́скирэ-Дэвлэ́скирэ васта́ сы́рбы панитка ручаи, со тхадэна: Ёв рискирэ́ла лэн, сыр Лэ́скэ исын трэй.

Skutki 17:16-34

16. И пака Па́вли ужакирдя лэн дрэ Афины, ёв дивиндяпэ и пиридживэлас, дыкхи́, со дро фо́ро сыс пхэрдо́ и́долы.

17. Палдава́ ёв ракирдя́ Юдэнца дрэ синагоги и Наюдэнца (дэвлытконэ́ манушэ́нца), и пэ форуны́ (пло́шча), кажно дывэ́с ракирдя́ манушэ́нца, савэ́н ёв стрэнинэлас (пирилэлас).

18. А вари-савэ́ Эпикуреинэ и Стоиконэ философэндыр гинэ́ тэ ханпэ лэ́са дро ракирибэ́н. И вари-савэ́ пхучнэ́: “Со дава́ балвалитко ману́ш камэ́ла тэ пхэнэ́л?” А яви́р ракирдэ́: “Ёв, здэлапэ, роспхэнэ́ла пал чужонэ́ наамарэ дэвлэндэ?” – пал-дова́ со Па́вли роспхэнэлас лэ́нгэ бахталы́ зан (звесь) пал Христосо́стэ и Лэ́скиро отджидыибэн мулэ́ндыр

19. И ёнэ яндлэ́ Павли́с дро Ареопаго и пхэндлэ́: “Ци сашты́ (можна) тэ джинас амэ́нгэ, саво́ дава́ исын дасаво нэво́ сыклякирибэ́н, со ту роспхэнэса?

20. Пал-дова́ со дова́, со ту ракирэ́са, амэ ние́кхвар на шундя́м; и амэ камаса тэ джинас, со дава́ саро́ значынэ́ла?”

21. Сарэ́ Афиняни и мануша́, савэ́ дживдэ́ одо́й явирэ ригэ́ндыр, нисоса на залэнаспэ дрэ пэ́скиро во́льно часо, апри́ч дова́, со ракирэ́нас, ци шунэнас вари-савэ́ нэвипэна́.

22. И, ґа́да, Па́вли уштыя́ машкира́л Ареопаго и пхэндя́: “Афиняня́лэ! Пир саро́ мэ дыкха́ва, со тумэ́ древа́н кутякирэна пэ́скирэ дэвлэн:

23. ке́ли мэ псирдём и дыкхцём тумарэ́ свэ́нта штэ́ты, мэ латхём алта́рё, пэ саво́ сыс чхиндло́: “Наджиндлэ Дэвлэ́скэ.” Пал Адалэстэ, Савэс тумэ́ на джины́, приґалёна, мэ и кама́м тумэ́нгэ тэ роспхэнав.

24. Дэвэ́л, Саво́ создыя́ свэ́то и саро́, со исын дрэ лэ́стэ, Ёв, Саво́ исын Дэвэ́л болыбнаскэ и пхувьякэ; Ёв на дживэ́ла дрэ кхангирья, савэ́ кэрдэ́ манушы́тка васта́.

25. Лэ́скэ на трэй, соб (кай) мануша́ тэ дынаринэ́н (тэ служынэн) Лэ́скэ пэ́скирэ вастэ́нца; Ёв Кокоро́ дэ́ла сарэ́нгэ джиибэ́н и саро́;

26. и Ёв кэрдя́ саро́ манушы́тко ро́до екхэ манушэ́стыр, соб (кай) мануша́ тэ дживэ́н пир сари́ пхув; Дэвэ́л выкэдыя́ ваш сарэ́ манушэ́нгэ часо и штэ́то ваш джиибэ́н пэ пхув,

27. соб (кай) мануша́ тэ родэ́н, тэ камэн тэ явэ́н пашылэды́р кэ Ёв и тэ латхэ́н Лэс, пал-дова́ со Ёв исын на́дур амэ́ндыр:

28. со амэ дрэ Лэ́стэ дживаса и псираса и амэ сам, сыр вари-савэ́ и тумарэ́ поэты пхэндлэ́: ‘Амэ адя́кэ-паць бияндыям Лэ́стыр’.

29. И ко́ли амэ бияндыям Лэ́стыр, тэды амэ́нгэ на трэй тэ думинас, со дава́ исын Дэвэ́л, ци саво́ исын кэрдо́ сувнака́стыр ци рупэ́стыр, ци барэстыр, саво́ исын кэрдо́ манушытконэ́ вастэ́нца и пир манушы́тко годы́.

30. Палдава́ Дэвэ́л промэкця дова́ часо, ке́ли амэ на джиндям чачипэ́н, а Дэвэ́л какана́ ракирэ́ла сарэ́ манушэ́нгэ пир саро́ свэ́то, соб (кай) ёнэ тэ рискирэ́н пэ́скиро джиибэ́н кэ Дэвэ́л,

31. пал-дова́ со Ёв выкэдыя́ дывэ́с, ке́ли Ёв явэ́ла тэ сэндякирэ́л свэ́то чачунэ́ сэндоса пир Манушэ́стэ, Савэс Ёв выкэдыя́, Ёв сыкадя́ дава́ выкэдыибэн сарэ́ манушэ́нгэ, ке́ли отджидякирдя́ Лэс мулэ́ндыр.”

32. И ке́ли ёнэ шундлэ́ пал отджидякирибэн мулэ́ндыр, вари-савэ́ лэ́ндыр сандлэпэ, а яви́р пхэндлэ́: “Амэ ява́са тэ шунас пал дава́ тут яви́р мо́ло.”

33. И Па́вли гия́ криг лэ́нгирэ скэдыибна́стыр.

34. А вари-савэ́ мануша́ пиригинэ́ пэ Павлискири риг и патяндынэ́; машки́р лэ́ндэ сыс Дионисиё, Ареопагоскиро барыдыро́, и джувлы́, савья́ кхардэ́ Дамарь, и яви́р мануша́.

Romani Bible Baltic 2019

Maintained by the United Bible Societies for the Baltic Romani Mission