Bible in one year - Пэ Балтитко Романи чиб

Bible in one year July 14

1. Нэ пэ эфта́то бэрш ґаздыя́пэ дро ду́хо Иодаё, и прилыя́ дро кхэтанякирибэн пэ́са шэлэнгирэ барыдырэ́н: Азарияс, Иерохамоскирэ-чхавэ́с, и Исмаилос, Иегохананоскирэ-чхавэ́с, и Азарияс, Оведоскирэ-чхавэ́с, и Маасеяс, Адаиёскирэ-чхавэ́с, и Елишафатос, Зихрискирэ-чхавэ́с.

2. И ёнэ прогинэ́ пир Юдэ́я, и скэдынэ́ Левитэ́н сарэ́ Юдэя́кирэ форье́ндыр и Израилёскирэ шэралэн пэ стрэ́чы (поколе́нии), и явнэ́ дро Ерусалимо.

3. И кэрдя́ саро́ скэдыибэ́н заве́то дрэ Дэвлэ́скиро Кхэр (Кхангири́) крали́са, и пхэндя́ лэ́нгэ Иодаё: “Ѓа́да, крали́скирэ чхавэ́скэ трэй тэ явэ́л крали́са, сыр ракирдя́ Рай Дэвэ́л пал Давидо́скирэ чхавэ́ндэ.

4. Ѓа́да, со тумэ́нгэ трэй тэ кэрэ́н: три́то паш тумэ́ндыр, савэ́ явэ́на дро са́вато (суботонэ), рашандыр и Левитэндыр, явэ́на ракхибна́рья пашы́л проги,

5. и три́то паш пашы́л крали́скиро кхэр, и три́то паш пашы́л Иесодоскири по́рта; а сарэ́ мануша́ пэ Ра́скирэ-Дэвлэ́скирэ Кхэрэскирэ грэды (дворы).

6. И нико́н мэк тэ на заджа́л дро Ра́скирэ-Дэвлэ́скиро Кхэр, апри́ч рашандэ и Левитэндэ бутярнэндэ. Ёнэ могинэ́на тэ заджа́н, пал-дова́ со исын высвэнцындлэ; сарэ́ мануша́ мэк тэ тэрдён пэ ракхибэн Ра́скирэ-Дэвлэ́скиро.

7. И мэк Леви́ты тэ тэрдён трусця́л (кругом) крали́стэ сарэ́ ригэ́ндыр, кажно пэ́скирэ мардытконэ́са дро пэ́скиро васт, и кон явэ́ла тэ заджа́л дрэ Кхангири́, мэк тэ явэ́л мулякирдо. И явэ́н тумэ́ пашы́л крали́стэ, ке́ли ёв явэ́ла тэ заджа́л и тэ выджа́л.”

8. И кэрдэ́ Леви́ты и сарэ́ Юды, со припхэндя́ Иодаё раша́й, и лынэ́ кажно пэ́скирэ манушэ́н, савэ́ явэ́на дро са́вато и савэ́ уджана дро са́вато; пал-дова́ со на отмэкця́ раша́й Иодаё манушэ́н, савэ́ парудэпэ.

9. И роздыя Иодаё раша́й шэлэнгирэ барыдырэ́нгэ чхурдыибнытка бустя́ (коп΄и) и тыкнэ́ и барэ́ шчы́ты Давидо́скирэ крали́скирэ, савэ́ сыс дрэ Дэвлэ́скиро Кхэр.

10. И чхудэ́ сарэ́ мануша́ сваконэс (кажнонэс) лэ́скирэ мардытконэса дро лэ́скиро васт, чачэ́-кхангирья́кирэ рига́тыр кэ зэ́рво (ле́во) кхангирья́кири риг, пашы́л алтаре и пашы́л Кхэр трусця́л крали́стэ.

11. И вылыджинэ́ кралискирэс чхавэ́с, и чхудэ́ пэ лэ́стэ вя́нка, и гожыпэна и чхудэ́ лэс крали́са; и помакхнэ лэс Иодаё и лэ́скирэ чхавэ́, и пхэндлэ́: “Мэк тэ дживэ́л кра́ли!”

12. И шундя́ Гофолия манушэ́нгири зан (глос), савэ́ праста́ндынэ и ракирдэ́ пал крали́стэ, и выгия́ кэ мануша́ дро Ра́скирэ-Дэвлэ́скиро Кхэр,

13. И ке́ли дыкхця́, и, акэ со: сыс тэрдо́ кра́ли пэ пэ́скиро вучипэ́н пашы́л загиибэ́н, и тхага́рья, и ро́ги (трубы) пашы́л крали́стэ, и сарэ́ мануша́ пхувья́кирэ радынэ́напэ, и башавэна рогэ́нца, и мануша́, савэ́ баганас багаибнытконэ струментэнца и савэ́ сыс лачхэ́ тэ шарэ́н. И роскустя Гофолия пэ́скирэ и́ди, и задыя го́дла: “Зракирибэ́н! Зракирибэ́н!”

14. И выкхардя Иодаё, раша́й, шэлэнгирэ барыдырэ́н, савэ́ сыс барыдыра́ пэ халадэ́ндэ, и пхэндя́ лэ́нгэ: “Лыджа́н ла яври́, и, кон джа́ла пал ла́тэ, мэк тэ мулякирэ́н куртала́са.” Пал-дова́ со раша́й пхэндя́: “На мулякирэ́н ла дрэ Ра́скирэ-Дэвлэ́скиро Кхэр.”

15. И дынэ́ ла́кэ штэ́то, и, ке́ли ёй явдя́ кэ загиибэ́н дрэ грэнгири по́рта крали́скирэ-кхэрэ́скири, одо́й мулякирдэ́ ла.

16. И кэрдя́ Иодаё заве́то машки́р пэ́стэ, и машки́р сарэ́ манушэ́ндэ, и крали́стэ, соб (кай) тэ явэ́н ёнэ Ра́скирэ-Дэвлэ́скирэ мануша́.

17. И гинэ́ сарэ́ мануша́ пэ мангипнытко штэ́то Ваалоскиро, и роспхагирдэ́ лэс, и алта́ри лэ́скирэ, и лэ́скирэ вычхиндлэ́ муя́ пхагирдэ́: и Матфанос, жрецос Ваалоскирэс мулякирдэ́ анги́л алта́ри.

18. И допатяндыя Иодаё Ра́скирэ-Дэвлэ́скирэ Кхэрэскирэ рэ́нды рашангэ и Левитэ́нгэ, сыр лэн росчхудя́ пир бутя́ Дави́до дро Ра́скирэ-Дэвлэ́скиро Кхэр, тэ ґаздэ́н цэ́ло схачкирибэ́н Ра́скэ-Дэвлэ́скэ, сыр исын зачхиндло́ дро Мойза́скиро Зако́но, радыма́са и багаибнаса, пир Давидо́скиро упхэныбэ́н.

19. И чхудя́ ёв ракхибнарье́н пашы́л Ра́скирэ-Дэвлэ́скирэ Кхэрэ́скири по́рта, соб (кай) на могиндя́ тэ заджа́л ние́кх нажужо пир вари-со.

20. И лыя́ Иодаё шэлэнгирэ барыдырэ́н, и барэ́ ран, и барыдырэ́н пэ манушэ́ндэ, и сарэ́ пхувья́кирэ манушэ́н, и пролыджия крали́с Ра́скирэ-Дэвлэ́скирэ Кхэрэскир, и прогинэ́ пирда́л упратуны по́рта дро крали́скиро Кхэр, и чхудэ́ тэ бэшэ́л крали́с пэ крали́скиро троно.

21. И радындлэпэ сарэ́ мануша́ пэ пхув, и фо́ро яця́ штыл. А Гофолия замардэ́ куртала́са.

2 Chronicles 24:1-27

1. Эфта́ бэрш сыс Иоасоскэ, ке́ли ёв яця́ крали́са, и штардэша́ бэрш ёв сыс крали́са дро Ерусалимо, лав лэ́скирэ да́киро сыс Цывья, Вирсавиятыр.

2. И кэрдя́ Иоа́со лачхэ́с дрэ Ра́скирэ-Дэвлэ́скирэ якха́ дрэ сарэ́ дывэса́, сыр сыс раша́й Иодаё.

3. И лыя́ лэ́скэ Иодаё дуе́н ромне́н, и лэ́стэ сыс лэ́ндыр чхавэ́ и чхая́.

4. И пало́ дава́ (после) явдя́ пэ ило́ Иоасоскэ тэ нэвякирэл Ра́скирэ-Дэвлэ́скиро Кхэр;

5. и скэдыя́ ёв раша́н и Левитэ́н, и пхэндя́ лэ́нгэ: “Джа́н пир Юдэя́кирэ фо́рья, и скэдэ́н сарэ́ндыр Израильтянэндыр руп тэ кэрэ́н ремо́нто пэ тумарэ́ Ра́скирэ-Дэвлэ́скиро Кхэр бэрш бэршэстыр, и сыгнякирэн дро дава́ рэ́ндо.” Нэ на сыгнякирдэ Леви́ты ваш подрикирибэ́н.

6. И кхардя́ кра́ли Иодаёс, лэ́нгирэ шэралэс, и пхэндя́ лэ́скэ: “Со́скэ ту на трэбинэса Левитэндыр, соб (кай) ёнэ тэ янэ́н Юдэя́тыр и Ерусалимо́стыр дыибэ́н, саво́ чхудя́ Мо́йза, Дэвлэ́скиро писха́ри, и скэдыибэ́н Израильёскиро ваш скэдыибна́скири ски́ния?

7. Пал-дова́ со нажужы Гофолия и ла́кирэ чхавэ́ роспхагирдэ́ (росчордэ) Ра́скирэ-Дэвлэ́скиро Кхэр, и саро́, со сыс обсвэнцындло ваш Дэвлэ́скиро Кхэр, сыс дрэ буты́ ваш Ваалы.

8. И припхэндя́ кра́ли, и кэрдэ́ екх мохто́ (яшчыко), и чхудэ́ лэс пашы́л загиибэ́н дро Ра́скирэ-Дэвлэ́скиро Кхэр яврял.

9. И дыя́ тэ джинэ́н Иодаё пир Юдэ́я и Ерусалимо, соб (кай) тэ янэ́н Ра́скэ-Дэвлэ́скэ дыибэ́н, саво́ чхудя́ Мо́йза, Ра́скирэ-Дэвлэ́скиро писха́ри пэ Израильтянэндэ пэ чхучи́ пхув.

10. И обрадындлэпэ сарэ́ барыдыра́ и сарэ́ мануша́, и яндлэ́ и чхудэ́ дро мохто́, пака ёв яця́ пхэрдо́.

11. Дрэ долэ́ дывэса́, ке́ли янэ́на мохто́ (яшчыко) кэ кральенгирэ барыдыра́ пирда́л Левитэндэ, и ке́ли ёнэ дыкхнэ́, со сыс бут руп, то явэ́лас крали́скиро зачхиныбнари и допатякирдо англатунэ́ рашастыр, и ёнэ вычхувэнас мохтостыр; и отлыджанас лэс и чхувэ́нас лэс пэ пэ́скиро штэ́то. Адя́кэ кэрдэ́ ёнэ дывэ́с дро дывэ́с, и скэдынэ́ древа́н бут руп.

12. И отдэнас лэс кра́ли и Иодаё манушэ́нгэ, савэ́ дыкхнэ́ пал бутя́ пир Ра́скирэ-Дэвлэ́скиро Кхэр, и ёнэ прилэнас манушэ́н, савэ́ бара́ чингирдэ и кхэра́-кэрибнаскирэн (плотникэн) тэ нэвякирэн Ра́скирэ-Дэвлэ́скиро Кхэр, адя́кэ-паць фаурнарье́н (кузнецэн) и манушэ́н, савэ́ кэрдэ́ буты́ харкомаса (медяса) тэ зорьякирэн Ра́скирэ-Дэвлэ́скиро Кхэр.

13. И кэрдэ́ буты́ мануша́, и кэрдэ́ ремо́нто лэ́нгирэ васта́; и кэрдэ́ Ра́скирэ-Дэвлэ́скиро Кхэр адя́кэ, сыр лэ́скэ трэиндя́ тэ явэ́л, и зоралякирдэ лэс.

14. И сыр кэрдэ́ ёнэ саро́, то ёнэ отдынэ́ крали́скэ и Иодаёскэ руп, саво́ яця́пэ. И кэрдэ́ лэ́стыр кхорэ́ (сасу́ды) ваш Ра́скирэ-Дэвлэ́скиро Кхэр, кхорэ́ тэ дынаринэ́н и цэ́ло схачкирибэ́н, тахтая́ и яви́р кхорэ́ сувнакунэ́ и рупувэ́. И янэ́нас цэ́ло схачкирибэ́н дро Ра́скирэ-Дэвлэ́скиро Кхэр кажно мо́ло дрэ сарэ́ Иодаёскирэ дывэса́.

15. И пхурия Иодаё, чалыя дывэсэнца дро джиибэ́н, и мыя́: шэл трия́нда бэрш сыс лэ́скэ, ке́ли ёв мыя́.

16. И гарадэ́ лэс дро Давидо́скиро фо́ро, пал-дова́ со ёв кэрдя́ лачхипэ́н дрэ Израилё и ваш Дэвлэ́скэ, и ваш Лэ́скиро кхэр.

17. Нэ пало́ (после) Иодаёскиро мэрибэ́н, явнэ́ Юдэя́кирэ тхага́рья и поклониндлэпэ крали́скэ, и тэды кра́ли лыя́ тэ кандэл лэн.

18. И ёнэ ячкирдэ́ пэ́скирэ-дадэ́нгиро Ра́скирэ-Дэвлэ́скиро, Дэвлэ́скиро Кхэр, и лынэ́ тэ дэн паты́в вэшэнгэ, савэ́ сыс свэ́нта, и идолэ́нгэ, и сыс холы́ Ра́скирэ-Дэвлэ́скири пэ Юдэ́я и Ерусалимо пал дая́ лэ́нгири банг.

19. И Ёв бичхадя́ кэ ёнэ пророкэ́н, соб (кай) ёнэ тэ рискирэ́н палэ кэ Ёв, и ёнэ досыкавэнас лэ́нгэ, нэ одолэ́ на шундлэ́.

20. И Дэвлэ́скиро Ду́хо (Фа́но) гия́ тэлэ́ пэ Захариястэ, Иодаёскирэ чхавэ́стэ, рашастэ, и ёв тэрдия́ пэ вучипэ́н анги́л манушэ́ндэ, и пхэндя́ лэ́нгэ: “Адя́кэ ракирэ́ла Рай Дэвэ́л: ‘Ваш со тумэ́ пириуштавэна упхэныбэ́н Ра́скирэ-Дэвлэ́скиро? На явэ́ла бахт тумэ́нгэ; и сыр тумэ́ ячкирдэ́ Рас-Дэвлэ́с, то адя́кэ и Ёв ячкирэ́ла тумэн.’”

21. И зракирдэпэ проти лэ́стэ, и мардэ́ лэс барэ́нца, пир крали́скиро упхэныбэ́н, пэ Ра́скирэ-Дэвлэ́скири Кхэрэ́скири грэ́да (дво́ро).

22. И на пририпирдя кра́ли Иоа́со лачхипэ́н, саво́ кэрдя́ лэ́скэ Иодаё, лэ́скиро дад, и замардя́ лэ́скирэ чхавэ́с. И ёв, ке́ли мэрэлас, то ракирдя́: “Мэк тэ дыкхэ́л Рай Дэвэ́л и мэк тэ отплэскирэл палэ!”

23. И, сыр прогия́ бэрш, выгинэ́ проти лэ́стэ Сириякирэ халадэ́, и загинэ́ пэ Юдэ́я и дро Ерусалимо, и вымардэ сарэ́н тхагарье́н манушэнгирэн; и саро́ дорэсыбэ́н, саво́ лынэ́ лэ́ндыр, отбичхадэ кэ кра́ли дро Дама́ско.

24. Мэк и ёнэ на́бут манушэ́н сыс машки́р Сириякирэ халадэ́ндэ, нэ Рай Дэвэ́л отдыя́ дрэ лэ́нгирэ васта́ древа́н нисметно зор пал дава́, со ячкирдэ́ ёнэ Рас-Дэвлэ́с, дадэнги́рэ Дэвлэ́с. И пэ Иоасостэ кэрдэ́ ёнэ сэ́ндо.

25. И ке́ли ёнэ гинэ́ пэ́скэ лэ́стыр, ячкири лэс дрэ пхаро́ насвалыпэн, тэды счхудэ проти лэ́стэ зракирибэ́н лэ́скирэ писха́рья, пал рат Иодаёскирэ-чхавэ́скиро, рашаскиро, и замардэ́ лэс пэ лэ́скиро чхуибэ́н, и ёв мыя́. И гарадэ́ лэс дрэ Давидо́скиро фо́ро, нэ на гарадэ́ лэс дрэ крали́скирэ коплицы.

26. Мануша́, савэ́ зракирдэпэ проти лэ́стэ сыс: Завадо, Шимеафакирэ-Амонитянкакиро чхаво́, и Иегозавадо, Шимрифакирэ-Моавитянкакиро чхаво́.

27. Пал лэ́скирэ чхавэ́ндэ, и пал бут ангилпхэныбэна проти лэ́стэ, и пал пхари́ буты́, со ёв лыя́ пэ пэ́стэ, сыр кэрдэ́ буты́ (ремо́нто) пэ Дэвлэ́скиро Кхэр, исын зачхиндло́ дрэ кралье́нгири лылвари́. И яця́ крали́са Ама́сия, лэ́скиро чхаво́, пэ штэ́то лэ́скиро.

Psalms 83:9-18

9. Асирия адя́кэ-паць гия́ лэ́нца; ёнэ дынэ́ васт Лотоскирэ чхавэ́нгэ. Сэ́ла.

10. Кэр адя́кэ-паць Мидианэнгэ сыр Сисараскэ, сыр Иадиноскэ пашы́л сы́гно панинг Кисоно,

11. савэ́ хасинэ́ пашы́л Ендоро, савэ́ ячнэ́ сыр пхувья́киро гнэё (гноё).

12. Кэр лэ́нгирэ тхагарьенца (князьенца) сыр Оревоса (Аребоса), Зивоса и сарэ́ лэ́нгирэ крали́скирэ сэмэнцэнца, сыр Зэбоса и Салманоса,

13. пал-дова́ со ёнэ пхэндлэ́: “Явэ́н, ла́са пэ́скэ Дэвлэ́скирэ чаритка пхувья́.”

14. О, мро Дэ́вла! Кэр лэ́ндыр вихроскиро пыло, пирикэр лэн дрэ чхучо́ пхус анги́л балва́л.

15. Сыр яг хачкирэ́ла вэш, сыр бари яг подхачкирэла бэ́рги,

16. адя́кэ-паць традэ лэн барэ́ штормоса и трашакир лэн Тырэ́-холямэ́ балваляса.

17. Раё Дэ́вла! Учхакир лэ́нгирэ муя́ ладжакирибнаса, соб (кай) ёнэ тэ родэ́н паты́в Тырэ́ лавэ́скэ.

18. Тэ явэ́н ёнэ ладжакирдэ́ и трашакирдэ пэ сарэ́ ве́ки, тэ нашавэн ёнэ паты́в и тэ хасён:

Proverbs 21:2-3

2. Кажнонэ́-манушэ́скиро дром исын чачуно́ дрэ лэ́скирэ якха́, нэ Рай Дэвэ́л ублавэла (важынэла) илэ.

3. Тэ кэрэ́н чачипэ́н и чачуно́ сэ́ндо исын кучэдыр Ра́скэ-Дэвлэ́скэ сыр свэ́нта дыибэна́.

Skutki 18:1-28

1. Пало́ дава́ Па́вли гия́ Афинэндыр, и явдя́ дро Коринфо;

2. кай ёв стрэниндя (пирилыя) Юдос, савэ́с кхардэ́ Акила, и саво́ бия́ндыя дрэ Понтия, и ёв наґара явдя́ Италиятыр пэ́скирэ ромня́са Прискиласа (пал-дова́ со Клавдио припхэндя́ сарэ́ Юдэ́нгэ тэ джа́н Римостыр); кэ ёнэ и явдя́ Па́вли,

3. а сыр лэ́ндэ сыс екх буты́ Павлиса, ёнэ судэ ша́тры, и палдава́ Па́вли яця́пэ лэ́са тэ кэрэ́л буты́.

4. И кажно са́вато (субо́та) ёв ракирдя́ дрэ синагога и допхэнэлас, сыр Юдэ́нгэ, адя́кэ и Грекэ́нгэ (Баламэ́нгэ).

5. Нэ ке́ли Сила и Хима явнэ́ Македониятыр, Па́вли отдыя́ саро́ пэ́скиро часо, соб (кай) тэ допхэнэл Юдэ́нгэ, со Ису́со исын Христо́со.

6. Нэ пал-дова́ со ёнэ сыс проти и кошнэ лэс, тэды ёв тринскирдя пэ́скирэ и́ди и пхэндя́ лэ́нгэ: “Рат тумаро́ мэк тэ явэ́л пэ тумарэ́ шэрэ́: мэ сом жужо́; и какана́ мэ джа́ва кэ На́юды.”

7. И Па́вли гия́ одотхы́р и явдя́ дро дэвлытконэ́ – манушэ́скиро кхэр, савэ́с кхардэ́ Юста, кон дживдя́ пашы́л синагога.

8. А Криспо, синагогакиро барыдыро́, патяндыя дрэ Дэвлэ́стэ сарэ́нца пэ́скирэ кхэритконэнца; и бут Коринфяни, савэ́ шундлэ́ Павли́с, патяндынэ́ и болдэпэ.

9. е́кхвар раты́ дрэ дыкхибэ́н Рай Дэвэ́л пхэндя́ Павлискэ: “На андырша, а ра́кир, и на яв штыл тэ ракирэ́с,

10. палдова́ со Мэ сом ту́са, и нико́н на кэрэ́ла ту́кэ чорипэ́н; Ма́ндэ исын бут чачунэ́ мануша́ дрэ дава́ фо́ро.”

11. И Па́вли сыс одо́й бэрш и шов чхона́, сыклякири Дэвлэ́скиро лав лэ́нгэ.

12. Ке́ли дрэ Ахая сыс балунитко (проконсуло) Галионо, Юды ґаздынэ́пэ проти Павлистэ и яндлэ́ лэс пэ сэ́ндо,

13. ракири́: “Адава́ ману́ш сыклякирэ́ла тэ патя́н Дэвлэ́скэ на пир Зако́но.”

14. Ке́ли Па́вли кэдыяпэ тэ откэрэл муй, тэды Галионо пхэндя́ Юдэ́нгэ: “Ко́ли кадава́ ману́ш тэ кэрэ́л вари-саво́ сэндытко проштавибэн (преступлениё) ци чорипэ́н, тэды, Юды, мэ вышунавас тумэн;

15. а, ко́ли машки́р тумэ́ндэ джа́ла кошыбэ́н пал лава́ и кхарибэна и пал тумаро́ Зако́но, тэды роскэдэнпэ кокорэ́, мэ на кама́м тэ явав сэнда́ри дро дава́ рэ́ндо.”

16. И ёв традыя́ лэн криг сэндостыр.

17. И сарэ́ ухтылдэ́ Сосфенос, синагогакирэс барыдырэ́с, и мардэ́ лэс анги́л сэ́ндо. Галионоскэ ж на сыс кэ дава́ нисаво́ рэ́ндо.

18. Па́вли сыс бут дывэса́ дро Коринфо, тэ́ньчи ёв розяцяпэ пшалэ́нца и традыя́ кэ Сирия, а кхэтанэ́ лэ́са гинэ́ Прискила и Акила, нэ анги́л традыпэн Па́вли обчхиндя бала́ дрэ Кенхрея, соб (кай) тэ кэрэ́л пир совла́х;

19. тэды ёнэ явнэ́ дрэ Ефесо, одо́й Па́вли ячкирдя́ Прискила и Акилас. Ёв кокоро́ ж гия́ дрэ синагога и лыя́ тэ ракирэ́л Юдэнца.

20. Ёнэ мангнэ́ лэс, соб (кай) ёв буты́р тэ ячэ́лпэ кхэтанэ́ лэ́нца, нэ ёв отпхэндяпэ,

21. а розяцяпэ лэ́нца и пхэндя́: “Ма́нгэ трэй тэ явав пэ свэ́нко, саво́ сыг явэ́ла, дро Ерусалимо; мэ рисёва́ва кэ тумэ́, ко́ли пэ дава́ явэ́ла Дэвлэ́скиро во́ля, и кокоро́ традыя́ Ефесостыр.”

22. Ке́ли Па́вли явдя́ дрэ Кесария, ёв загия́ дро Ерусалимо, пхэндя́ “рама́нё” дэвлытконэнгэ дрэ штэты́тко кхангири́, и гия́ дрэ Антио́хия.

23. Ёв сыс вари-саво́ часо дрэ Антио́хия, и гия́ одотхы́р пир сари́ Галатиякири риг и Фиргия, и подрикирэлас патяибнаскирэн.

24. Дрэ дова́ часо явдя́ дро Ефесо екх Юдо, Александриятыр и лэс кхардэ́ Аполосо, ёв мишто́ ракирдя́ и мишто́ джиндя́ Свэ́нто Чхиныбэ́н.

25. Ёв джиндя́ Ра́скирэ-Дэвлэ́скиро Дром и ракирдя́ барэ́ Духо́скирэ патыва́са, ёв роспхэнэлас и сыклякирдя́ саро́ чачипэ́н пал Исусо́стэ, а кокоро́ ёв джиндя́ екх Ианоскиро болдэипэн.

26. Аполосо муршканэ́с лыя́ тэ ракирэ́л дрэ синагога. Ке́ли Акила и Прискила шундлэ́ лэс, ёнэ кхардэ́ лэс кэ пэ, и пиридынэ фэдэды́р лав дро лав Дэвлэ́скиро Дром.

27. И ке́ли ёв кэдыяпэ тэ джал дрэ Ахайя, пша́ла бичхадэ́ лыл долэ́ штэтоскирэ сыкляибнытнытконэнгэ, соб (кай) ёнэ лэс тэ прилэ́н; ке́ли Аполосо явдя́ одори́к, ёв помогиндя (дыя васт) бут одолэ́нгэ, кон патяндыя пир Дэвлэ́скиро бахталыпэ́н.

28. Пал-дова́ со ёв барэ́ зорья́са и анги́л сарэ́ндэ патякирэлас Юдэ́н и допхэнэлас Свэнтонэ́ Чхиныбна́стыр, со Ису́со исын Христо́со (Месия).

Romani Bible Baltic 2019

Maintained by the United Bible Societies for the Baltic Romani Mission