Bible in one year
July 15

1. Биш тэ пандж бэрш сыс Амасияскэ, ке́ли ёв яця́ крали́са и биш тэ еня́ бэрш ёв сыс крали́са дро Ерусалимо; лав лэ́скирэ да́киро сыс Иегоаадань Ерусалимо́стыр.
2. И кэрдя́ ёв лачхэ́с дрэ Ра́скирэ-Дэвлэ́скирэ якха́, нэ на сарэ́ илэ́стыр.
3. Ке́ли яця́ зорало́ пал лэ́стэ кралипэ́н, тэды ёв мулякирдя́ пэскирэн писхарье́н, савэ́ замардэ́ крали́с, лэ́скирэ дадэ́с.
4. Нэ лэнгирэн чхавэ́н на мулякирдя́, адя́кэ сыр исын чхиндло́ дро Зако́но, дрэ Мойзаскири лылвари́, кай припхэндя́ Рай Дэвэ́л, ракири́: “Нашты́ тэ мулякирэ́н дадэн пал чхавэ́ндэ, и чхавэ́н нашты́ тэ мулякирэ́н пал дадэндэ; нэ кажно (сва́ко) пал пэ́скиро грэ́хо исын банго́ (мусинэла) тэ мэрэ́л.”
5. И скэдыя́ Ама́сия Юдэе́нгирэн, и чхудя́ лэн пир стрэ́чы (поколе́нии) тэл зор тысёнцэнгирэ-барыдырэнгири и шэлэнгирэ-барыдырэнгири, сарэ́н Юдэе́н и Вениаминянэн; и пиригиндя лэн бишэ́ бэршэ́ндыр и буты́р, и латхя́ (ластя) лэ́ндыр трин шэла́ тысёнцы манушэ́н фэдыршонэн, савэ́ псирдэ́ пэ марибэ́н, савэ́ рикирдэ чхурдыпнытко буст (коп΄ё) и шчы́то.
6. И ишчо (инкэ́) ёв лыя́ Израильтянэндыр шэл тысёнцы муршканэн халадэ́н пал шэл тала́нты руп.
7. Нэ явдя́ кэ ёв Дэвлы́тко ману́ш и пхэндя́: “Кра́лё! Мэк тэ на джа́н ту́са Израилёскирэ халадэ́; пал-дова́ со Рай Дэвэ́л нанэ Израильтянэнца, сарэ́ Ефремо́скирэ чхавэ́нца.
8. Нэ ту джа́ екхджино́, кэр рэ́ндо, муршканэ́с марпэ пэ марибэ́н. А пэ яви́р (явирчанэс) тут Дэвэ́л равэла тэлэ́ анги́л муй вэргоскиро; пал-дова́ со исын зор Дэвлэ́стэ тэ подрикирэ́л и тэ равэл тэлэ́.”
9. И пхэндя́ Ама́сия Дэвлэ́скирэ манушэ́скэ: “Со тэ кэра́в шэлэ талантэнца, савэ́ мэ отдыём Израилёскирэ халадэнгэ?” И пхэндя́ Дэвлэ́скирэ ману́ш: “Сашты тэ явэ́л (могинэ́ла) Рай Дэвэ́л тэ дэл ту́кэ буты́р далэ́стыр.”
10. И росчхудя́ пир рига́ лэн Ама́сия, – халадэ́н, савэ́ явнэ́ кэ ёв Ефремо́скирэ пхувья́тыр, – соб (кай) ёнэ тэ джа́н пэ пэ́скиро штэ́то. И захачи́я зоралэ́с лэ́нгири холы́ пэ Юдэ́я, и ёнэ гинэ́ палэ дрэ пэ́скиро штэ́то, дрэ яг холякири.
11. А Ама́сия лыя́ пэс дрэ васта́, и лыджия́ пэ́скирэ манушэ́н, и гия́ пэ Лондо до́ло, и домардя́ Сеироскирэ чхавэ́н дэш тысёнцы;
12. и дэш тысёнцы джидэн лынэ́ Юда́скирэ чхавэ́ дро пле́но; и яндлэ́ лэн пэ бэрга́киро вучипэ́н, и чхурдынэ́ тэлэ лэн бэргакирэ вучипна́стыр, и сарэ́ ёнэ розмардэпэ кэ екх.
13. Халадэ́, савэ́н Ама́сия отбичхадя палэ, соб (кай) ёнэ тэ на джа́н лэ́са пэ марибэ́н, розгинэпэ пир Юдэя́кирэ фо́рья, Самариятыр кэ Вефороно; и пиримардэ лэ́ндыр трин тысёнцы, и скэдынэ́ древа́н бут дорэсыбэ́н.
14. Ама́сия, сыр явдя́ пало́ (после) Идумеянэнгиро мулякирибэн, то яндя́ Сеироскирэ чхавэ́нгирэ дэвлорэ́, и чхудя́ лэн пэ́стэ дэвлорэнца, и анги́л лэ́ндэ клониндяпэ, и лэ́нгэ кадиндя.
15. И захачи́я холы́ Ра́скирэ-Дэвлэ́скири пэ Амасиястэ, и бичхадя́ Ёв кэ ёв пророко́с, и одова́ пхэндя́ лэ́скэ: “Со́скэ ту прастаса кэ дэвлорэ́, далэ́-манушэ́нгирэ, савэ́ на зракхнэ́ пэскирэн манушэ́н тырэ́ вастэ́стыр?”
16. Ке́ли ёв ракирдя́ лэ́скэ, о кра́ли отпхэндя́: “Нау́што крали́скирэ юнкароса (советникоса) чхудэ́ тут? Пирияч, соб (кай) тэ на мулякирэ́н тут.” И пирияця́ проро́ко, пхэни́: “Джинав, со скэдыяпэ Дэвэ́л тэ хасякирэ́л тут, пал-дова́ со ту кэрдя́н дава́ и на шунэса миро радиныбэн.”
17. И ке́ли дорэсця́ годы́ Ама́сия, Юдэя́киро кра́ли, и бичхадя́ кэ Иоа́со, Иоахазоскиро чхаво́, Ииуёскирэ чхавэ́с, Израилёскиро кра́ли, тэ пхэнэ́л: “Выджа, дыкхасапэ муй кэ муй.”
18. И бичхадя́ Иоа́со, Израилёскиро кра́ли, кэ Ама́сия, Юдэя́киро кра́ли, тэ пхэнэ́л: “Тёрно (жылто хру́сто сувье́нца), саво́ сыс пэ Лива́но, бичхадя́ кэ кедро, саво́ сыс пэ Лива́но, тэ пхэнэ́л. Отдэ́ пэ́скирэ чха палоро́м пал мирэ́ чхавэ́стэ.” Нэ гинэ пашыл буса (дика) рискирибна́скирэ мурдала́ (звери), савэ́ сыс пэ Лива́но, и штакурдэ (стопчындлэ) дава́ тёрно.
19. Ту ракирэ́са: Ѓа́да, мэ домардём Идумеянэн, – и ґаздыя́пэ тыро́ ило́ кэ шарибэ́н пэс. Бэш фэды́р пэ́скэ кхэрэ́. Кэ со ту́кэ тэ рэсэс дро дарано рэ́ндо? Хасёса ту и Юдэя́кирэ ту́са.”
20. Нэ на кандыя́ лэс Ама́сия, адя́кэ сыр Дэвлэ́стыр сыс дава́, соб (кай) тэ отдэ́н лэн дрэ Иоасоскирэ васта́, пал-дова́, со лынэ́ тэ родэ́н годыпэ́н Идумеякирэ дэвлорэндыр.
21. И выгия́ Иоа́со, Израилёскиро кра́ли и дыкхнэпэ ёнэ муй кэ муй, ёв и Ама́сия, Юдэя́киро кра́ли, дро Вефсамисо Юдэя́киро.
22. И розмардэ Израильтя́ни Юдэякирэн манушэ́н, и рознашнэпэ кажно (сва́ко) дрэ пэ́скири ша́тра.
23. И Амасияс, Юдэя́кирэ крали́с, Иоасоскирэ чхавэ́с, Иоахазоскирэ чхавэ́с, заухтылдя Иоа́со, Израилёскиро кра́ли, дро Вефсамисо, и яндя́ лэс дро Ерусалимо, и роспхагирдя́ Ерусалимо́скири ва́нта Ефремо́скирэ портатыр кэ вэнглоскири по́рта, пэ штаршэла́ куня́;
24. И лыя́ саро́ сувнака́й, и руп, и сарэ́ кхорэ́ (сасу́ды), савэ́ сыс дрэ Дэвлэ́скиро Кхэр пашы́л Овед-Эдо́мо, и крали́скирэ-кхэрэ́скиро барвалыпэ́н, и сымадытконэн (заложникэн), и рисия́ дрэ Сама́рия.
25. И дживдя́ Ама́сия, Иоасоскиро чхаво́, Юдэя́киро кра́ли, пало́ (после) Иоасоскиро мэрибэ́н, Иоахазоскирэ-чхавэ́скиро, Израилёскирэ-крали́скиро, дэшупандж бэрш.
26. Яви́р рэ́нды Амасияскирэ, англатунэ́ и палатунэ́ (последня), исын зачхиндлэ́ дрэ Юдэе́нгирэ и Израилёскирэ-кралье́нгири лылвари́.
27. И пало́ (после) долэ́ дывэса́, сыр Ама́сия отгия́ Ра́стыр-Дэвлэ́стыр, счхудэ проти лэ́стэ зракирибэ́н, дро Ерусалимо, и ёв наштя дрэ Лахисо. И бичхадэ́ пал лэ́стэ дрэ Лахисо, и мулякирдэ́ лэс одо́й.
28. И яндлэ́ лэс пэ грэ́ндэ, и ґарадэ́ лэс дадэ́нца лэскирэнца дрэ Юда́скиро фо́ро.
1. И лынэ́ сарэ́ Юдэя́кирэ мануша́ Озияс, савэ́скэ сыс дэшушов бэрш, и чхудэ́ лэс крали́са пэ лэ́скирэ-дадэ́скиро Амасияскиро штэ́то.
2. Ёв кэрдя́ Елафо и отдыя́ лэс Юдэ́нгэ, пало́ дова́ (после), сыр пасия́ кра́ли ве́чнэс пэ́скирэ дадэ́нца.
3. Дэшушов бэрш сыс Озияскэ, сыр яця́ ёв крали́са, и пандждэша́ дуй бэрш ёв сыс крали́са пэ Ерусалимо; лав лэ́скирэ-да́киро сыс Иехолия́, Ерусалимо́стыр.
4. И кэрдя́ ёв лачхэ́с дрэ Ра́скирэ-Дэвлэ́скирэ якха́ адя́кэ-паць, сыр кэрдя́ Ама́сия, лэ́скиро дад;
5. И рисёлас годя́са ёв кэ Дэвэ́л дрэ Захарияскирэ дывэса́, саво́ сыклякирдя́ пал Дэвлэ́скири дар; и дрэ долэ́ дывэса́, ке́ли ёв рисёлас годя́са кэ Рай Дэвэ́л, то помогиндя лэ́скэ Дэвэ́л.
6. И ёв выгия́, и мардя́пэ Филистимлянэнца, и роспхагирдя́ Гефоскирэ ва́нты, ва́нты дрэ Иавне́я, ва́нты дрэ Азото; и кэрдя́ фо́рья дрэ Азотоскири округа и Филистимлянэндэ.
7. И помогиндя лэ́скэ Дэвэ́л проти Филистимлянэндэ и проти Аравитянэндэ, савэ́ дживдэ́ дро Гур-Ваало, и проти Меунитянэндэ;
8. И дэ́нас Амонитяни дань Озияскэ, и догия́ лэ́скиро лав кэ Египто́скири риг; пал-дова́ со ёв сыс древа́н зорало́.
9. И кэрдя́ Ози́я вучардя (башни) дро Ерусалимо пэ вэнглытко по́рта и пэ долоскири по́рта и пэ вэнгло, и зоралякирдя лэн.
10. И кэрдя́ ёв туры пэ чхучи́ пхув (пушча) и ґанадя бут вэндариня (водоё΄мы), пал-дова́ со лэ́стэ сыс бут кхэри́тка мурдала́, и пэ тэлатунэ́ пхувья́, и пэ лошчыны, и пхувья́кирэ бутярнэн и садовникэн (барьякирэ́н) пэ бэ́рги и пэ Кармило; пал-дова́ со ёв камдя́, соб (кай) тэ обкэрэн пхув.
11. Сыс Озиястэ и халадэ́, савэ́ выджа́нас пэ марибэ́н отрядэнца, пир лэ́нгиро чысло (гин) дрэ чхиныбэ́н дрэ пиричхиныбэн, саво́ сыс чхудо вастэ́са Иеиэлоскирэса чхиныбнариса (писарё΄са) и Маасеяскирэ дыкхибнариса (надзирателё΄са), тэл васт Хананияскиро, екхэ кралье́нгирэндыр рас пэ халадэ́ндэ.
12. Сарэ́н манушэнгирэн шэралэн пэ стрэ́чы (поколе́нии), муршканэ́ халадэ́н, сыс дуй тысёнцы шовшэла́,
13. и тэл васт лэ́нгирэ халадэ́нгирэ-зорьякиро сыс трин шэла́ эфта́ тысёнцы панджшэла́, савэ́ выгинэ́ пэ марибэ́н муршканэ́ халадэнца, тэ дэн васт крали́скэ проти вэргостэ.
14. И скэдыя́ ваш лэ́нгэ Ози́я, ваш сарэ́ халадэнгэ, шчы́ты, и чхурдыпнытка бустя́ (коп΄и) и шлёмы, и латы, и луки, и прашчы тэ чхурдэ́н бара́.
15. И кэрдя́ ёв дро Ерусалимо годэс-придуминдлэ машыны, соб (кай) ёнэ тэ явэ́н пэ туры и пэ вэ́нглы тэ чхурдэ́н марибны́тка бустя́ (стре́лы) и барэ́ бара́. И розлыджияпэ лэ́скиро лав дур; пал-дова́ со ёв дивнэс дурьякирдя пэс, и кэрдя́пэ зорало́.
16. Нэ ке́ли ёв кэрдя́пэ зорало́, то запхутия лэ́скиро ило́ пэ лэ́скиро хасибэ́н, и ёв кэрдя́пэ злыдариса анги́л Растэ-Дэвлэ́стэ, Дэвлэ́стэ пэскирэстэ; пал-дова́ со ёв загия́ дрэ Кхангири́ Ра́скирэ-Дэвлэ́скири, соб (кай) тэ хачкирэл фимиа́мо пэ алта́рё кадиласа.
17. И гия́ пал лэ́стэ Аза́рия, раша́й, и лэ́са охтодэша́ Ра́скирэ-Дэвлэ́скирэ рашая́, фэдыршонэн манушэ́н.
18. И ґаздынэ́пэ проти Озиястэ, крали́стэ, и пхэндлэ́ лэ́скэ: “На ту́кэ, Охо́зие, тэ кадинэс Ра́скэ-Дэвлэ́скэ; дава́ рэ́ндо исын раша́нгиро, Аароно́скирэ-чхавэ́нгиро, савэ́ исын высвэнцындлэ тэ кадинэн; выджа свэнтонэ́ штэто́стыр, пал-дова́ со ту кэрдя́н на пир Зако́но, и дава́ на явэ́ла ту́кэ дрэ паты́в Растэ-Дэвлэ́стэ.
19. И розхолясыя Ози́я, – а дрэ васт лэ́стэ сыс кадила тэ тхувлякирэл, и, ке́ли ёв холя́сыя, то прока́за явдя́ пэ лэ́скиро чэкат, анги́л муй раша́нгиро, дрэ Ра́скирэ-Дэвлэ́скиро Кхэр, пашы́л алта́рё кадилытко.
20. И подыкхця́ пэ лэ́стэ Аза́рия, англатуно́ раша́й, и сарэ́ рашая́; и ґа́да, сыс лэ́стэ прока́за пэ лэ́скиро чэкат. И зачхудэ лэс тэ выджа́л одотхы́р, нэ и кокоро́ ёв лыя́ сыгэды́р тэ джал криг, адя́кэ сыр дукхадя лэс Рай Дэвэ́л.
21. И сыс кра́ли Ози́я насвало́ проказаса кэ пэ́скирэ-мэрибнаскиро дывэ́с, и дживдя́ дро особно кхэр, и одлыно сыс Ра́скирэ-Дэвлэ́скирэ Кхэрэскир. А Иоафамо, лэ́скиро чхаво́, сыс барыдырэ́са пэ крали́скиро кхэр и хулаиндя манушэ́нца пэ пхув.
22. Яви́р Озияскирэ рэ́нды, англатунэ́ и палатунэ́ (последня), зачхиндя́ Исаё, Амососкиро чхаво́, проро́ко.
23. И пасия́ Ози́я пэ́скирэ дадэ́нца, и ґарадэ́ лэс дадэ́нца лэскирэнца пэ фэ́лда кралье́нгири дрэ коплицы; пал-дова́ со ракирдэ́: ёв исын насвало́ проказаса. И яця́ крали́са Иоафамо, лэ́скиро чхаво́, пэ штэ́то лэ́скиро.
1. Биш тэ пандж бэрш сыс Иоафамоскэ, ке́ли ёв яця́ крали́са, и дэшушов бэрш ёв сыс крали́са дро Ерусалимо; лав лэ́скирэ-да́киро сыс Иеруша́, Садокоскири чхай.
2. И кэрдя́ ёв лачхэ́с дрэ Ра́скирэ-Дэвлэ́скирэ якха́ адя́кэ-паць, сыр кэрдя́ Ози́я, лэ́скиро дад; екх со ёв на загия́ дрэ Ра́скирэ-Дэвлэ́скири Кхангири́; нэ и мануша́ на мэкнэ́ тэ кэрэ́н грэ́хи.
3. Ёв кэрдя́ упратуны по́рта дро Ра́скирэ-Дэвлэ́скиро Кхэр, и бут со кэрдя́ пэ Офелоскири ва́нта;
4. И фо́рья кэрдя́ ёв пэ Юдэякири бэ́рга, и дрэ вэша́ кэрдя́ тва́рдыми/диза́ (кре́пости) и вучардя (башни).
5. Ёв мардя́пэ Амонитянэнгирэ крали́са и пиризорьякирдя лэн; и дынэ́ лэ́скэ Амонитяни дрэ дова́ бэрш шэл тала́нты руп и дэш тысёнцы коры парно́ гив и дэш тысёнцы ґэрсто (ячме́нё). Дава́ дынэ́ лэ́скэ Амонитяни ада́кицы, и пэ яви́р бэрш и пэ три́то.
6. Адя́кэ зорало́ сыс Иоафамо, пал-дова́ со кэрдя́ ёв пэ́скирэ дрома́ дро джиибэ́н анги́л Растэ-Дэвлэ́стэ, пэ́скирэ Дэвлэ́стэ.
7. Яви́р Иоафамоскирэ рэ́нды, и сарэ́ лэ́скирэ марибэна, и сыр ёв хулаиндя, исын зачхиндлэ́ дрэ Израилёскирэ и Юдэя́кирэ-кралье́нгири лылвари́.
8. Биш тэ пандж бэрш сыс лэ́скэ, ке́ли ёв яця́ крали́са, и дэшушов бэрш ёв сыс крали́са дро Ерусалимо.
9. И пасия́ ве́чнэс Иоафамо пэ́скирэ дадэ́нца, и ґарадэ́ лэс дрэ Давидо́скиро фо́ро. И яця́ крали́са Аха́зо, лэ́скиро чхаво́, пэ штэ́то лэ́скиро.
1. Хоро́скирэ Дирижоро́скэ пэ Гедоскирэ Струме́нты. Пса́лмо Кареёскирэ-Чхавэ́нгиро.
2. Савэ кучонэ́ исын Тырэ́ ша́тры, о Раё Дэ́вла, болыбна́скирэ-янголэ́нгиро.
3. Дро миро ди исын смэга/труш (жажда) и ёв аж нашавэла зор, соб (кай) ма́нгэ тэ явав дрэ мирэ́ Ра́скирэ-Дэвлэ́скири грэ́да (дво́ро), миро ило́ и мири́ лоч, хай, кхарэ́на радымакирэ заня́са джидэ́ Дэвлэ́с.
4. Дыкх! И чириклы латхя́ кхэр пэ́скэ и бахирка (ласточка) ку́фо (ґнязда) пэ́скэ, кай ёй чхувэ́ла пэ́скирэ тыкнорэн пэ Тырэ́ алта́ри, о Раё Дэ́вла, болыбна́скирэ-янголэ́нгиро, миро Кра́ли и миро Дэвэ́л.
5. Бахталэ́ исын одолэ́, савэ́ дживэ́на дро Тыро́ кхэр: ёнэ кажно мо́ло явэ́на тэ шарэ́н Тут. Сэ́ла.
6. Бахтало́ исын кодова́ ману́ш, конэ́скири зор исын Ту́тыр, конэ́скиро ило́ исын пэ дром кэ Сио́но;
7. сыр ёнэ джа́на дурэды́р пир Ровибнаскиро до́ло, ёнэ пирикэрэна лэс дрэ панескирэ ґанынгорья, брышы́нд учхакирэ́ла дая́ пхув бахтякирибнаса.
4. Якха́, савэ́ задэнапэ, пхутькирдо ило́-дава́ исын момолы́тко (свети́льнико) фуе́-манушэ́нгиро, саво́ исын грэ́хо.
5. Добусово ману́ш придуминэла дова́, со дэ́ла прибарипэн, нэ кодова́, саво́ кэрэ́ла сыгнымаса, явэ́ла дрэ урежа (убытко).
1. И сыс адя́кэ: дро дова́ часо (цы́ро), ке́ли Аполосо сыс дро Коринфо, Па́вли, прогии бэргитка штэ́ты, явдя́ дрэ Ефесо, и ке́ли ёв латхя́ одо́й вари-кицы́ сыкляибнытконэ́н,
2. то пхэндя́ лэ́нгэ: “Ци прилынэ́ тумэ́ Свэ́нто Ду́хо (Фа́но), ке́ли тумэ́ упатяндлэ?” Нэ ёнэ отпхэндлэ́ лэ́скэ: “Амэ и на шундя́м, со исын Свэ́нто Ду́хо (Фа́но).”
3. Тэды Па́вли пхуця́ лэ́ндыр: “Дро саво́ болдэипэн тумэ́ болдэпэ?” Ёнэ отпхэндэ: “Дро Ианоскиро болдэипэн.”
4. И пхэндя́ Па́вли: “Иа́но болдя болдэипнаса ваш рискирибэн кэ Дэвэ́л, ёв ракирдя́ манушэ́нгэ тэ патя́н дрэ Одолэ́стэ, Кон банго́ тэ явэ́л пал лэ́стэ, дрэ Исусо́стэ Христосо́стэ.”
5. Ке́ли ёнэ шундлэ́ пал дава́, ёнэ болдэпэ дро Дэвлэ́скирэ-Исусо́скиро лав.
6. И ке́ли Па́вли чхудя́ васта́ упрэ́ пэ лэ́ндэ, пэ лэ́ндэ гия́ тэлэ́ Свэ́нто Ду́хо (Фа́но), и ёнэ лынэ́ тэ ракирэ́н пэ яви́р чиба́ (чибья́) и тэ ракирэ́н, со явэ́ла анги́л.
7. Ёнэ сарэ́ сыс мануша́ пашэ́ дэшуду́й мануша́.
8. И ке́ли Павлия загия́ дрэ синагога, ёв трин чхона́ муршканэ́с ракирдя́, допхэнэлас манушэ́нгэ и патякирэлас лэн дрэ чачипэ́н пал Дэвлэ́скиро Кралипэ́н.
9. Нэ ке́ли вари-савэ́ мануша́ лынэ́ тэ холясон и на патяндынэ́, а кошнэ анги́л сарэ́ манушэ́ндэ Дэвлэ́скиро Дром, тэды Па́вли ячкирдя́ лэн, скэдыя́ сыкляибнытконэ́н и кажно дывэ́с ракирдя́ пэ Тираноскирэ-сыклядякиро штэ́то.
10. Сыс адя́кэ дуй бэрш, со сарэ́ мануша́, савэ́ дживдэ́ кэ Асия, шундлэ́ Дэвлэ́скиро лав сыр Юды, адя́кэ и Гре́ки (Баламэ́).
11. Дэвэ́л кэрдя́ пир Павлистэ барэ́ ди́вы,
12. со пэ насвалэндэ чхувэ́нас дыкхлэ и и́ди лэ́скирэ масэ́ндыр, и насвалэндэ пириячэнас дукха́ и налачхэ́ ду́хи джа́нас криг лэ́ндыр.
13. Вари-савэ́ Юдэ́нгирэ човаханэ адя́кэ-паць псирдэ́ и традынэ налачхэ́ ду́хи Дэвлэ́скирэ-Исусо́скирэ лавэ́са, ракири́: “Засовлахава тут Исусо́са, пал Савэ́стэ лав пхэнэ́ла Па́вли.”
14. Дава́ сыс Юдэ́нгирэ – раша́нгирэ барыдырэскирэ Скеваскирэ охто́ (бидуе́нгиро дэш) чхавэ́.
15. Нэ на́лачхо ду́хо (фа́но) пхэндя́ лэ́нгэ: “Исусо́с мэ джино́м, и Па́вли ма́нгэ джиндло́, а тумэ́ кон сан?”
16. И чхурдыяпэ пэ лэ́ндэ ману́ш, дрэ савэ́стэ сыс на́лачхо ду́хо (фа́но) и домардя́ адя́кэ лэн, со ёнэ нангэ и сарэ́ дро рат нашнэ́ долэ́ кхэрэ́стыр.
17. Пал дава́ уджиндлэ́ сарэ́ Юды и На́юды, савэ́ дживдэ́ кэ Ефесо и бари дар облыя сарэ́н лэн, и Дэвлэ́скирэ-Исусо́скирэ лавэ́скэ барьякирдэ́ паты́в.
18. И бут мануша́, савэ́ упатя́ндынэ, явэ́нас, и приґалёнаспэ анги́л сарэ́ндэ дрэ пэ́скирэ рэ́нды.
19. Нэ бут мануша́, савэ́ англэды́р сыс човаханэ, яндлэ́ пэ́скирэ лылваря, и хачкирдэ́ лэн анги́л сарэ́ндэ. И ёнэ подгиндлэ, ци бут ловэ́ сыс мол далэ́ сарэ́ лылваря; и выгия́, со далэ́ лылваря сыс мол панджшэла́ тысёнцы (бара́) рупувэ́ ловэ́.
20. Дасавэ́ зорья́са уса́ бутэды́р мануша́ уджинэнас и пиридэнас Дэвлэ́скиро лав.
Romani Bible Baltic 2019
United Bible Societies for the Baltic Romani Mission