Bible in one year
July 16

1. Биш бэрш сыс Ахазоскэ, ке́ли ёв яця́ крали́са, и дэшушов бэрш ёв сыс крали́са дро Ерусалимо; и ёв на кэрдя́ лачхэ́с дрэ Ра́скирэ-Дэвлэ́скирэ якха́, сыр кэрдя́ Дави́до, лэ́скиро дад;
2. Ёв гия́ Израилёскирэ-кралье́нгирэ дромэ́нца и адя́кэ-паць кэрдя́ вычхудэ́ статулы Ваалоскэ;
3. и ёв хачкирдя́ дро́га смо́лы пэ Еномоскирэ-чхавэ́нгиро до́ло, и пролыджия пэ́скирэ чхавэ́н пирда́л яг, подрикири манушэ́нгирэ магирипэна, савэ́н вытрадыя́ Рай Дэвэ́л анги́л Израилёскирэ-чхавэ́нгиро муй.
4. И янэлас ёв свэ́нта дыибэна́ и хачкирдя́ дро́га смо́лы пэ вучипэна́, и пэ бэ́рги, и тэл кажно ґэнсто кашт.
5. И отдыя́ лэс Рай Дэвэ́л, Дэвэ́л лэ́скиро, дрэ Сириянэнгирэ-крали́скирэ васта́, и ёнэ мулякирэндэ лэс, и лынэ́ лэ́стэ древа́н бут пленонэн, и лыджинэ́ лэн дро Дама́ско. Адя́кэ-паць и дрэ Израилёскирэ-крали́скиро васт сыс отдыно́ ёв, и одова́ домардя́ лэ́стэ древа́н бут манушэ́н.
6. И домардя́ Факе́ё, Ремалииноскиро чхаво́, Юдэ́н шэл тэ биш тысёнцы дро екх дывэ́с, марибнытконэ́ манушэ́н, пал-дова́ со ёнэ ячкирдэ́ Рас-Дэвлэ́с, пэ́скирэ-дадэнги́рэ Дэвлэ́с.
7. О Зихриё [Зихри-ю.о.], зоралюко Ефремлянэндыр, замардя́ Маасеёс, крали́скирэ чхавэ́с, и Азрикамос, саво́ сыс барыдыро́ пэ крали́скири фелатин, и Елканос, явирэ́с манушэ́с пал крали́стэ.
8. И лынэ́ Израилёскирэ чхавэ́ дро пле́но пэ́скирэ пшалэ́ндыр, Юдэе́ндыр, дуйшэла́ тысёнцы джувле́н, чхавэ́н и чхае́н; адя́кэ-паць и древа́н бут дорэсыбэ́н скэдынэ́ лэ́ндэ, и отбичхадэ дорэсыбэ́н дрэ Сама́рия.
9. Одо́й сыс Ра́скирэ-Дэвлэ́скиро проро́ко; лав лэ́скиро сыс Оде́до. Ёв выгия́ анги́л халадэ́нгиро муй, савэ́ гинэ́ дрэ Сама́рия, и пхэндя́ лэ́нгэ: “Акэ, Рай Дэвэ́л, Дэвэ́л тумарэ́-дадэ́нгиро, дрэ холы́ пэ Юдэ́ндэ, отдыя́ лэн дро тумаро́ васт, и тумэ́ домардэ́ лэн дасавэ́ холя́са, сави́ догия́ кэ болыбэ́н.
10. И акана́ тумэ́ думинэ́на тэ кэрэ́н дынарье́нца Юдаскирэн и Ерусалимоскирэн чхавэ́н дрэ дынарье́ндэ и дынарицэндэ пэ́скэ. А нау́што (со́скэ) пэ тумэ́ндэ кокорэндэ нанэ банг анги́л Растэ-Дэвлэ́стэ, тумарэ́ Дэвлэ́стэ?
11. И адя́кэ шунэ́н ман и рискирэ́н палэ пленонэн, савэ́н тумэ́ закэдынэ тумарэ́ пшалэ́ндыр; пал-дова́ со холынакири яг исын Ра́скирэ-Дэвлэ́скири пэ тумэ́ндэ.”
12. И уштынэ́ вари-савэ́ барыдырэндыр Ефремо́скирэ чхавэ́ндыр: Аза́рия, Иегохананоскиро чхаво́, Бере́хия, Мешылемофоскиро чхаво́, и Езэки́я, Шалумоскиро чхаво́, и Амаса́, Хадлаёскиро чхаво́, проти манушэ́ндэ, савэ́ гинэ́ (явнэ́) марибнастыр,
13. И пхэндлэ́ лэ́нгэ: “На лыджа́н адари́к пленонэн, пал-дова́ со грэ́хо явэ́ла амэ́нгэ анги́л Растэ-Дэвлэ́стэ. Нау́што тумэ́ думинэ́на тэ дочхувэн кэ тумарэ́ грэ́хи и кэ тумаро́ чорипэ́н? Бари исын банг амари́, и яг холынакири Ра́скирэ-Дэвлэ́скири пэ Израилё.”
14. И ячкирдэ́ халадэ́ пленонэн и дорэсыбэ́н халадэ́нгирэ барыдырэ́нгэ и сарэ́ скэдыибнаскэ.
15. И уштынэ́ мурша́, упхэндлэ пир лав, и лынэ́ пленонэн, и сарэ́н лэ́ндыр нангэн, и уридэ́ лэн дорэсыбнастыр, – и уридэ́ лэ́нгирэ ґэра́, и чалякирдэ лэн, и панякирдэ лэн, и помакхнэ лэн елеёса, и чхудэ́ пэ ослэндэ сарэ́н, савэ́ сыс бизорья́кирэ лэ́ндыр, и бичхадэ́ лэн дро Ерихо́но, фо́ро пальмэнгиро; кэ лэ́нгирэ пша́ла, и рисинэ́ дрэ Сама́рия.
16. Дрэ долэ́ дывэса́ бичхадя́ кра́ли Аха́зо кэ Асирия́киро кра́ли, соб (кай) ёнэ тэ дэн васт (тэ помогинэн) лэ́скэ.
17. Пал-дова́ со Идумеяни и ишчо (инкэ́) явэ́нас, и бутэн домардэ́ дрэ Юдэ́я, и лынэ́ дрэ пле́но;
18. и Филистимля́ни розгинэпэ пир фо́рья пэ тэлатуны округа и паш-дывэ́с Юдэе́нгиро, и лынэ́ Вефсамисо и Аиалоно, и Гедерофо, и Сохо и фо́рья, савэ́ сыс тэл лэ́скири зор, и Фимна, и фо́рья, савэ́ сыс тэл лэ́скири зор, и Гимзо и фо́рья, савэ́ сыс тэл лэ́скири зор, и лынэ́ тэ дживэ́н одо́й.
19. Адя́кэ чхудя́ тэлэ́ Рай Дэвэ́л Юдэ́я пал Ахазостэ, Юдэя́кирэ крали́стэ, пал-дова́ со ёв лыджия дро блэ́ндо Юдэ́я и пхарэ́с кэрдя́ грэ́хо анги́л Растэ-Дэвлэ́стэ.
20. И явдя́ кэ ёв Феглафеласаро, Асирия́киро кра́ли; нэ ёв сыс дро пхарипэ́н лэ́скэ, заме́ст дова́, соб (кай) тэ помогинэл лэ́скэ;
21. пал-дова́ со Аха́зо лыя́ барвалыпэ́н Ра́скирэ-Дэвлэ́скирэ Кхэрэскир и крали́скирэ кхэрэ́стыр и тхагарье́ндыр, и отдыя́ Асирия́кирэ крали́скэ; нэ одова́ на помогиндя лэ́скэ.
22. И дрэ пхарэ́ ваш пэ́скэ дывэса́ ёв усае́кх кэрдя́ на пир Зако́но анги́л Растэ-Дэвлэ́стэ, ёв – кра́ли Аха́зо.
23. И янэлас ёв свэ́нта дыибэна́ Дамасконэ дэвлорэ́нгэ, думины, со ёнэ дукхадэ лэс, и ракирдя́: “Дэвэла́ Сириякирэ-кралье́нгирэ помогинэна лэ́нгэ: яна́ва мэ свэ́нто дыибэ́н лэ́нгэ, и ёнэ помогинэна ма́нгэ.” Нэ ёнэ сыс пэ хасибэ́н лэ́скэ и сарэ́ Израилёскэ.
24. И скэдыя́ Аха́зо кхорэ́ (сасу́ды) Дэвлэ́скирэ Кхэрэскир, и роспхагирдя́ пэ котэра́ кхорэ́ Дэвлэ́скирэ Кхэрэскир запхандя Ра́скирэ-Дэвлэ́скирэ Кхэрэскирэ вудара́, и кэрдя́ пэ́скэ алта́ри пир сарэ́ вэ́нглы дрэ Ерусалимо;
25. И пир сарэ́ Юда́скирэ фо́рья ёв кэрдя́ вучипэна́ тэ кадинэн явирэ дэвлорэ́нгэ, и холякирдя Рас-Дэвлэ́с, пэ́скирэ-дадэнгирэс Дэвлэ́с.
26. Яви́р лэ́скирэ рэ́нды (де́лы) и сарэ́ лэ́скирэ кэрибэна, англатунэ́ и палатунэ́ (последня), исын зачхиндлэ́ дрэ Юдэя́кирэ и Израилёскирэ-кралье́нгири лылвари́.
27. И пасия́ ве́чнэс Аха́зо пэ́скирэ дадэ́нца, и гарадэ́ лэс дрэ фо́ро, дро Ерусалимо; нэ на лыджинэ́ лэс дрэ коплицы Израилёскирэ-кралье́нгирэ. И яця́ крали́са Езэки́я, лэ́скиро чхаво́, пэ штэ́то лэ́скиро.
1. Езэки́я яця́ крали́са, ке́ли лэ́скэ сыс биш тэ пандж бэрш, и биш тэ еня́ бэрш сыс ёв крали́са дро Ерусалимо; лав лэ́скирэ-да́киро сыс Авия́, Захарияскири чхай.
2. И кэрдя́ ёв лачхэ́с дрэ Ра́скирэ-Дэвлэ́скирэ якха́ адя́кэ-паць, сыр кэрдя́ Дави́до, лэ́скиро дад.
3. Пэ англатуно́ бэрш пэ пэ́скиро кралипэ́н, дро англатуно́ чхон, ёв псирадя (отчхакирдя́) Ра́скирэ-Дэвлэ́скирэ Кхэрэскирэ вудара́ и нэвякирдя лэн;
4. и пхэндя́ тэ явэ́н рашангэ и Левитэ́нгэ, и скэдыя́ лэн пэ васточно форуны́ [пло́шча.-р.с.].
5. И пхэндя́ лэ́нгэ: “Шунэ́н ман, Левита́лэ! Акана́ высвэнцынэнпэ кокорэ́, и обсвэнцынэн Кхэр Ра́скирэ-Дэвлэ́скиро, тумарэ́-дадэ́нгиро Дэвлэ́скиро, и вычхурдэн нажужыпэн (мэлалыпэн) Кхангирья́тыр.
6. Пал-дова́ со, акэ, амарэ́ дада́ кэрдэ́ на пир зако́но и кэрдэ́ налачхэ́с дрэ якха́ Ра́скирэ-Дэвлэ́скирэ, амарэ́ Дэвлэ́скирэ, и ячкирдэ́ Лэс, и отрискирдэ ёнэ пэ́скирэ муя́ Ра́скирэ-Дэвлэ́скирэ Кхэрэскир, и рисинэ́ думэса;
7. и пхандлэ вудара́ дро трэ́мо, и мудькирдэ момолытка (светильники), и на хачкирдэ́ дро́га смо́лы, и на ґаздынэ́ цэ́ло схачкирибэ́н дрэ Израилёскирэ-Дэвлэ́скири Кхангири́.
8. И сыс Ра́скирэ-Дэвлэ́скири холы́ пэ Юдэ́я и пэ Ерусалимо; и Ёв отдыя́ лэн пэ ладж, пэ чхучыпэн и пэ сабэн, сыр тумэ́ дыкхэ́на якхэ́нца тумарэнца.
9. И, акэ, пынэ́ амарэ́ дада́ куртала́тыр; а амарэ́ чхавэ́, и амарэ́ чхая́, и джувля́ амарэ́, пал дава́ исын дро пле́но кэ далэ́ дывэса́.
10. Акана́ ма́ндэ пэ ило́ – тэ кэра́в Завето Ра́са-Дэвлэ́са, Израилёскирэ Дэвлэ́са, мэк тэ рискирэ́л амэ́ндыр Лэ́скирэ-холякири яг.
11. Чхава́лэ мрэ! На явэ́н бишэритка; пал-дова́ со тумэн выкэдыя́ Рай Дэвэ́л тэ тэрдён анги́л Лэ́скиро муй, тэ дынаринэ́н Лэ́скэ и тэ явэ́н Лэ́стэ дынарье́нца и тэ хачкирэ́н дро́га смо́лы.
12. И уштынэ́ Леви́ты: Махафо, Амасаёскиро чхаво́, и Иое́лё, Азарияскиро чхаво́, Каафоскирэ чхавэ́ндыр; и Мерарискирэ чхавэ́ндыр; Кисо, Авдиёскиро чхаво́, и Аза́рия, Егалелелоскиро чхаво́; и Гирсоноскирэ родыцо́стыр: Иоахо, Зиммаскиро чхаво́, и Едэно, Иоахоскиро чхаво́;
13. Елицафаноскирэ чхавэ́ндыр; Шимри и Иеиэло, Асафоскирэ чхавэ́ндыр: Заха́рия и Матфания;
14. И Еманоскирэ чхавэ́ндыр: Иехие́ло и Шыме́ё; и Идифуноскирэ чхавэ́ндыр: Шемаия и Узиэло.
15. Ёнэ скэдынэ́ пэскирэн пшалэ́н и высвэнцындлэпэ; и гинэ́, пир крали́скиро припхэныбэ́н, тэ жужакирэн (тэ чыстинэн) Ра́скирэ-Дэвлэ́скиро Кхэр пир лава́ Ра́скирэ-Дэвлэ́скирэ.
16. И гинэ́ андрэ́ рашая́ дро Ра́скирэ-Дэвлэ́скиро Кхэр тэ жужакирэн, и вылыджинэ́ саро́ нажужо, со латхнэ́ дрэ Ра́скирэ-Дэвлэ́скири Кхангири́, пэ грэ́да (дво́ро) Дэвлэ́скирэ Кхэрэ́скиро. А Леви́ты лынэ́ дава́, соб (кай) тэ лыджа́н криг яври́ кэ Кедроноскири сы́гно рэ́кица (лэнори́).
17. И лынэ́ ёнэ тэ освэнцынэн дро пэ́рво (англатуно́)-чхонэ́скиро дывэ́с, и пэ охто́то (бидуе́нгиро дэ́што) дывэ́с долэ́-паць чхонэ́скиро дывэ́с загинэ́ дро Ра́скирэ-Дэвлэ́скиро грэ́да (дво́ро); и обсвэнцынэнас Ра́скирэ-Дэвлэ́скиро Кхэр охто́ дывэса́, и пэ дэшушовто англатунэ́-чхонэ́скиро дывэ́с ёнэ кэрдэ́.
18. Тэ́ньци явнэ́ ёнэ дро кхэр кэ кра́ли Езэки́я и пхэндлэ́: “Амэ выжужакирдям Ра́скирэ-Дэвлэ́скиро Кхэр, и алта́рё ваш цэ́ло схачкирибэ́н, и сарэ́ лэ́скирэ кхорэ́ (сасу́ды), и сками́нд ваш свэ́нто маро́, и сарэ́ лэ́скирэ кхорэ́.
19. И сарэ́ кхорэ́, савэ́ зачхурдыя кра́ли Аха́зо дрэ пэ́скирэ кралипнаскирэ дывэса́, кэри́ чорипэ́н, амэ скэдыям и обсвэнцындям, и, ґа́да, ёнэ исын анги́л Ра́скирэ-Дэвлэ́скиро алта́рё.”
20. И уштыя́ кра́ли Езэки́я пэ зло́ко (пэ ра́нко), и скэдыя́ форо́скирэ барыдырэ́н, и гия́ дро Ра́скирэ-Дэвлэ́скиро Кхэр.
21. И яндлэ́ эфта́ гуруворэ́н и эфта́ бакрэ́н, и эфта́ бакрорэ́н, и эфта́ бузнэн (козлэн) пэ свэ́нто дыибэ́н Ра́скэ-Дэвлэ́скэ пал грэ́хо пал кралипэ́н, и пал свэ́нто штэ́то, и пал Юдэ́я; и припхэндя́ ёв Аароно́скирэ чхавэ́нгэ, рашангэ, тэ ґаздэ́н цэ́ло схачкирибэ́н пэ Ра́скирэ-Дэвлэ́скиро алта́рё.
22. И зачхиндлэ́ гуруворэ́н, и лынэ́ рашая́ рат, и почхудэ ратэ́са алта́рё; и зачхиндлэ́ бакрэ́н, и почхудэ ратэ́са алта́рё; и зачхиндлэ́ бакрорэ́н, и почхудэ ратэ́са алта́рё.
23. И яндлэ́ бузнэн пал грэ́хо анги́л крали́скиро муй и скэдыибэ́н, и ёнэ чхудэ́ пэ́скирэ васта́ пэ лэ́ндэ.
24. И зачхиндлэ́ лэн рашая́, и лэ́нгирэ ратэ́са выжужакирдэ алта́рё, соб (кай) тэ явэ́н жужэ́ бангипнастыр пал сарэ́ Израилёскирэ грэ́хи, пал-дова́ со пал саро́ Израилё припхэндя́ кра́ли тэ янэ́н цэ́ло схачкирибэ́н и свэ́нто яныбэ́н Ра́скэ-Дэвлэ́скэ пал грэ́хо.
25. И чхудя́ ёв Левитэ́н дрэ Ра́скирэ-Дэвлэ́скиро Кхэр цымбалэнца, арфэнца и лутэнца, пир Давидо́скиро и Гадоскиро упхэныбэ́н, саво́ сыс крали́скиро магико, и Нафанос, пророко́с, адя́кэ сыр Ра́стыр-Дэвлэ́стыр сыс дава́ упхэныбэ́н пирда́л Лэ́скирэ пророкэ́ндэ.
26. И тэрдинэ́ Леви́ты башаибнытконэ струментэнца Давидоскирэнца и рашая́ рогэ́нца (трубэнца).
27. И припхэндя́ о Езэки́я тэ ґаздэ́н цэ́ло схачкирибэ́н пэ алта́рё. И дрэ дова́ моменто, сыр лыя́ цэ́ло схачкирибэ́н тэ хачол, лынэ́ тэ бага́н Ра́скэ-Дэвлэ́скэ, тэл зан рогоскири и тэл струме́нты Давидо́скирэ, Израилёскирэ крали́скирэ.
28. И сарэ́ мануша́ дро скэдыибэ́н мангнэпэ и мануша́ багандлэ, и ро́ги башадэ, пака хачолас цэ́ло схачкирибэ́н.
29. Сыр схачия цэ́ло схачкирибэ́н, то кра́ли и сарэ́ мануша́, савэ́ сыс пашы́л лэ́стэ, тэрдинэ́ пэ чанга́ и поклониндлэпэ (кэрдэ шэрэ́са).
30. И припхэндя́ кра́ли Езэки́я и тхага́рья Левитэ́нгэ, соб (кай) и ёнэ тэ барьякирэ́н (тэ славинэ́н) Рас-Дэвлэ́с Давидо́скирэ лавэ́нца и Асафоскирэ магикэнца; и ёнэ славиндлэ радыма́са, и тэрдинэ́ пэ чанга́, и клониндлэпэ.
31. И ракирдя́ Езэки́я, и пхэндя́: “Акана́ тумэ́ отдынэ́ пэс Ра́скэ-Дэвлэ́скэ; джа́н и янэ́н свэ́нта дыибэна́ и яныбэ́н тэ парикирэ́н дро Ра́скирэ-Дэвлэ́скиро Кхэр”, и лыджия́ саро́ скэдыибэ́н свэ́нта дыибэна́ и парикирибнаскиро яныбэ́н, кажно (сва́ко), кон сыс лыджино илэ́са, – цэ́ло схачкирибэ́н.
32. И сыс цэ́ло схачкирибэ́н, саво́ яндлэ́ мануша́, савэ́ скэдынэ́: эфтадэша́ гурувэ́н, шэл бакрэ́н, дуйшэла́ бакрорэ́н; саро́ дава́ сыс ваш цэ́ло схачкирибэ́н Ра́скэ-Дэвлэ́скэ.
33. Яви́р свэ́нта дыибэна́ Ра́скэ-Дэвлэ́скэ сыс шовшэла́ барэ́ кхэритконэ́ мурдалэ́ндыр (ското́стыр) и трин тысёнцы тыкнэ́ мурдалэ́ндыр (ското́стыр).
34. Нэ рашая́ сыс на́бут (куты́), и ёнэ на могиндлэ́ тэ злэн зандирья́ (цэ́пи) сарэ́ндыр цэлонэ́ схачкирибнастыр; и протырдынэ васт (помогиндлэ) лэ́нгэ лэ́нгирэ пша́ла, Леви́ты, пэ рэндоскиро ко́нцо и пака высвэнцындлэпэ яви́р рашая́; пал-дова́ со Леви́ты сыс буты́р добусова тэ свэнцынэн пэс, сыр рашая́.
35. Апри́ч цэ́ло схачкирибэ́н, савэ́ сыс древа́н бут чэкэнэса (тукоса) мирнонэ свэнтонэ́ дыибнэндыр Ра́скэ-Дэвлэ́скэ и росчхуибнаса пашы́л цэ́ло схачкирибэ́н. Адя́кэ нэвэ́стыр кэрдо́ сыс дынарибэ́н (служыныбэн) дро Ра́скирэ-Дэвлэ́скиро Кхэр.
36. И радындяпэ Езэки́я и сарэ́ мануша́ пал дова́, со Дэвэ́л адя́кэ рискирдя́ манушэ́н; пал-дова́ со дава́ кэрдя́пэ наужакири.
8. Ёнэ джа́на екхэ зорья́тыр кэ яви́р зор, кажно лэ́ндыр явэ́ла пэ бэ́рга Сио́но анги́л Дэвлэ́стэ.
9. Раё Дэ́вла, Дэвэ́л болыбна́скирэ-янголэ́нгиро, шун мири́ па́тери, пришунпэ Яково́скиро Дэвэ́л. Сэ́ла.
10. Ѓа́да, Дэ́вла, Ту сан амаро́ шчы́то, подыкх пэ муя́ Тырэ́ манушэ́нгиро, конэ́с Ту помакхцян.
11. Пал-дова́ со екх дывэ́с пэ Тыри́ грэ́да исын фэды́р, сыр бар (тысёнцо) дывэса́. Мэ выкэдыём фэды́р тэ тэрдёвав пашы́л вуда́р Дэвлэ́скирэ-Кхэрэ́скиро, сыр тэ джива́в дрэ ша́тры, кай фуй мануша́.
12. Пал-дова́ со Рай Дэвэ́л, Дэвэ́л, исын кхам и шчы́то: Рай Дэвэ́л дэ́ла бахталыпэ́н и сла́ва. Ёв на явэ́ла тэ зарикирэл лачхипэ́н одолэ́нгэ, савэ́ дживэ́на чачипнаскирэс.
6. Кон кэдэла кучипэ́н хоханэ́ чиба́са (чибьяса), одова́ исын сы́рбы сы́гно балва́л, сави́ родэ́ла мэрибэ́н.
7. Нахратыма фуе́-манушэ́нгиро хасякирэ́ла лэн, пал-дова́ со ёнэ на камэ́на тэ кэрэ́н чачо́ сэ́ндо.
8. Злыдня ману́ш скэдэлапэ тэ кэрэ́л чорипэ́н пэфроми (смыслоса), нэ бидошэнгирэ-манушэ́нгирэ бутя́ исын чачунэ́.
21. Ке́ли саро́ дава́ кэрдя́пэ, Па́вли скэдыяпэ пир Свэ́нто Ду́хо (Фа́но) тэ джал дро Ерусалимо, прогии Македония и Ахаия, и пхэндя́: “Коригэды́р (позжэ) долэ́стыр, сыр мэ ява́ва дро Ерусалимо, ма́нгэ трэй адя́кэ-паць тэ дыкха́в Римо.”
22. И ке́ли ёв бичхадя́ кэ Македония пэ́скирэ дуе манушэ́н, савэ́ лэ́скэ дэ́нас васт, Химас и Ерастос, ёв кокоро́ пэ вари-саво́ часо яця́пэ дрэ Асия.
23. Дрэ одова́ часо бут мануша́ ґаздынэ́пэ проти Ра́скирэ-Дэвлэ́скиро Дром.
24. Палдова́ со екх рупунари, савэ́с кхардэ́ Митра (Дмитриё), кэрдя́ рупунэ мангипнытка кхэра́ Артемидакэ и далэ́са ёв дэ́лас буты́ манушэ́нгэ тэ закэрэн ловэ́,
25. савэ́н ёв скэдыя́ явирэ дасавэ́ бутякирэ манушэ́нца и пхэндя́: “Мала́лэ, тумэ́ джинэ́на, со далэ́ бутя́тыр амэ закэраса лачхэ́ ловэ́;
26. и тумэ́ ж дыкхэ́на и шунэ́на, со на дрэ екх Ефесия, а адя́кэ-паць пир сари́ Асия, сыр адава́ Па́вли патякирдя и отрискирдя бутэ́ манушэ́н дро пэ́скиро патяибэ́н и со дэвэла́, савэ́ кэрдэ́ манушы́тка васта́, исын на дэвэла́.
27. И дава́ исын дар ваш амэ́нгэ на дро екх дава́, со амари́ буты́ на явэ́на тэ кутякирэн, нэ и ваш кхангири́ барэ́-дэвэлнякири Артемидакири на явэ́ла тэ гинэлпэ ни дро со, и кокори дэвэлны, савьякэ мануша́ мангэ́напэ дрэ Асия и пир саро́ свэ́то хасякирэ́ла пэ́скиро райкано барипэ́н.”
28. И ке́ли ёнэ шундлэ́ саро́ дава́, ёнэ сарэ́ лынэ́ тэ дэн го́дла барэ́ холя́са: “Бари исын Артемида Ефесакири.”
29. И пир саро́ яця́ конфузо, мануша́ ухтылдэ́ Гаёс и Аристархос, савэ́ кхэтанэ́ Павлиса явнэ́ Македониятыр, и тырдынэ лэн дро тиятро.
30. Нэ Па́вли камдя́ тэ выштавэл анги́л манушэ́ндэ, нэ лэ́скирэ сыкляибны́тка на домэкнэ лэс;
31. адя́кэ-паць вари-савэ́ барыдыра́ далэ́ рига́тыр, савэ́ сыс Павлискирэ дру́ги (мала́), бичхадя́ тэ мангэ́н лэс, соб (кай) ёв тэ на сыкадёл дро тиятро.
32. Бут мануша́ на джиндлэ́, палсо́ ёнэ явнэ́ адари́к, и палдава́ дрэ скэдыибэ́н сыс бизладо и кон пэ́скэ дыя́ го́дла.
33. Юды лынэ́ тэ трэбинэн, соб (кай) Лександро тэ выджа́л кэ мануша́, савэ́с ёнэ выкэдынэ́ и тэ выштавэл. Лександро сыкадя́ вастэ́са, соб (кай) мануша́ тэ шунэ́н лэс, пал-дова́ со ёв камдя́ тэ пхэнэ́л лав пал пэ́стэ анги́л манушэ́ндэ.
34. Нэ ке́ли ёнэ ґалынэ́, со ёв сыс Юдо, тэды лынэ́ сарэ́ тэ дэн го́дла дрэ екх зан, и пашэ́ дуй мардэ́ (штунды) годлэнас: “Бари исын Артемида Ефесоскири!”
35. Тэды форо́скиро барыдыро́ штылякирдя лэн и пхэндя́: “Ефесяниялэ, кон манушэ́ндыр на джинэ́ла, со амаро́ фо́ро ракхэ́ла кхангири́ барэ́-дэвлынякири Артемидакири и патри́н (о́бразо).
36. Ко́ли нашты́ тэ пхэна́в вари-со проти саро́ дава́, тумэ́ сан бангэ́ (мусинэна) тэ явэ́н штыл и нисаво́ фуипэ́н тэ на кэрэ́н.
37. Тумэ́ яндлэ́ адалэ́ манушэ́н, савэ́ на обчордэ амари́ кхангири́ и савэ́ на кошнэ тумарья дэвэлня.
38. Ко́ли Митрастэ (Дмитриёстэ) и лэ́скирэ малэндэ исын пир буты́ пэ вари-конэ́стэ рэ́ндо проти вари-конэ́стэ лэ́ндыр, тэды амэ́ндэ ваш дава́ исын сэнды, и исын балунитка (проконсулы) дрэ сэнды: мэк тэ джа́н одори́к и тэ жалинэнпэ екх пэ екхэ́стэ.
39. Нэ ко́ли тумэ́ родэ́на вари-со яви́р, тэды далэ́ рэ́нды явэ́на тэ роздыкхэнпэ пэ манушы́тко скэдыибэна.
40. Пал-дова́ со амэ могинаса тэ явас бангэ́ пал ададывэсатуно кошыбэ́н, и амэ́нгэ нанэ, дрэ со тэ допхэнас пэ́скиро набангипэн.”
41. И далэ́ лавэ́нца ёв розмэкця скэдыибэ́н.
Romani Bible Baltic 2019
United Bible Societies for the Baltic Romani Mission