1. И бичхадя́ Езэки́я пэ сари́ Израилёскири и Юдэякири пхув, и чхиндя́ лыла́ кэ Ефре́мо и Мана́сия, соб (кай) ёнэ тэ явэ́н дрэ Ра́скирэ-Дэвлэ́скиро Кхэр дро Ерусалимо, тэ кэрэ́н Патради́ Ра́скэ-Дэвлэ́скэ, Израилёскирэ Дэвлэ́скэ.
2. И обракирдэ кра́ли, и лэ́скирэ тхага́рья, и саро́ скэдыибэ́н дро Ерусалимо – тэ кэрэ́н Патради́ пэ яви́р чхон;
3. Пал-дова́ со ёнэ на могиндлэ́ тэ кэрэ́н ла дро ла́киро дывэ́с, пал-дова́ со рашая́ ишчо (инкэ́) на высвэнцындлэпэ, ци бут лэн трэй, и мануша́ на скэдынэ́пэ дро Ерусалимо.
4. И сыс дава́ пир ило́ крали́скэ и сарэ́ скэдыибнаскэ.
5. И скэдынэ́пэ тэ дэн тэ джинэ́н дро саро́ Израилё, Вирсавиятыр кэ Дано, соб (кай) тэ джа́н дро Ерусалимо тэ свэнкинэн Патради́ Ра́скэ-Дэвлэ́скэ, Израилёскирэ Дэвлэ́скэ, пал-дова́ со ґара́ на свэнкиндлэ ла, сыр исын зачхиндло́.
6. И гинэ́ [праста́ндынэ-ю.о.] мануша́ лылэнца крали́стыр и лэ́скирэ тхагарье́ндыр пэ сари́ Израилёскири пхув и Юдэякири, и дро крали́скиро упхэныбэ́н ракирдэ́: “Чхавэ́ Израилёскирэ! Рисён кэ Рай Дэвэ́л, Дэвэ́л Авраамо́скиро, Исаакоскиро и Израилёскиро, и Ёв рисёла кэ мануша́, савэ́ ячнэ́пэ, и савэ́ зракхнэпэ тумэ́ндэ вастэ́стыр Асирия́кирэ кралье́ндыр.
7. И на явэ́н адасавэ́, сыр тумарэ́ дада́ и тумарэ́ пша́ла, савэ́ на пир Зако́но кэрдэ́ анги́л Растэ-Дэвлэ́стэ, пэ́скирэ дадэнги́рэ Дэвлэ́стэ; и Ёв отдыя́ лэн пэ хасибэ́н, сыр тумэ́ дыкхэ́на.
8. Акана́ на явэ́н пхарэ́-шэритка, сыр тумарэ́ дада́, кандэ́н Рас-Дэвлэ́с и явэ́н дрэ Лэ́скири Кхангири́, сави́ Ёв обсвэнцындя пэ ве́ко; и дынаринэ́н (служынэн) Ра́скэ-Дэвлэ́скэ, тумарэ́ Дэвлэ́скэ, и Ёв отрискирэла тумэ́ндыр Пэ́скирэ-холякири яг.
9. Ке́ли тумэ́ рисёна илэ́са кэ Рай Дэвэ́л, тэды тумарэ́ пшалэ́н и тумарэ́ чхавэ́н явэ́на тэ тангинэн (тэ жалинэн) мануша́, савэ́ лынэ́ лэн дро пле́но, и рисёна пэ дая́ пхув; пал-дова́ со лачхо́ и лачхэ́-илытко исын Рай Дэвэ́л, Дэвэ́л тумаро́, и на отрискирэла муй тумэ́ндыр, ко́ли тумэ́ рисёна илэ́са кэ Ёв.”
10. И псирдэ́ мануша́ форо́стыр дро фо́ро пэ пхув Ефремо́скири и Манасияскири и кэ Завулоноскири; нэ лэ́ндыр сандлэпэ и кэрдэ́ напатывалэс (здикиндлэпэ).
11. Усае́кх вари-савэ́ Асироскирэ, Манасия́скирэ и Завулоноскирэ родо́стыр кандынэ́ лэн и явнэ́ дро Ерусалимо.
17. Адя́кэ сыр бут сыс пэ скэдыибэ́н дасавэн, савэ́ на высвэнцындлэпэ, то пал нажужэндэ, Леви́ты зачхинэнас патрадитконэс бакрорэс, соб (кай) тэ высвэнцынэн лэн ваш Ра́скэ-Дэвлэ́скэ.
18. Бут манушэ́ндыр, барэды́р паш родыцо́стыр Ефремоскирэстыр и Манасияскирэстыр, Исахароскирэстыр и Завулоноскирэстыр на жужакирдэпэ; усае́кх ёнэ ханэ́ Патради́, на пир упхэныбэ́н.
22. И ракирдя́ Езэки́я пир ило́ сарэ́нгэ Левитэ́нгэ, савэ́ миштэ́с галёнас дро дынарибэ́н (служыныбэн) Ра́скэ-Дэвлэ́скэ. И ханэ́ свэнкитка эфта́ дывэса́, и янэ́нас мирна свэ́нта дыибэна́ Ра́скэ-Дэвлэ́скэ и шардэ Рас-Дэвлэ́с, Дэвлэ́с пэ́скирэ дадэнгирэс.
23. И скэдыяпэ саро́ скэдыибэ́н тэ свэнкинэл яви́р эфта́ дывэса́ и пролыджинэ далэ́ эфта́ дывэ́с дрэ ра́дыма;
24. Пал-дова́ со Езэки́я, Юдэя́киро кра́ли, чхудя́ ваш манушэ́нгэ, савэ́ скэдынэ́пэ, тысёнцо гуруворэ́н и дэш тысёнцы тыкнэ́ кхэритконэ́ мурдалэ́н, и барэ́ раё чхудэ́ ваш манушэ́нгэ, савэ́ скэдынэ́пэ, тысёнцо гуруворэ́н и дэш тысёнцы тыкнэ́ кхэритконэ́ мурдалэ́н; и бут рашая́ высвэнцындлэпэ.
25. И радындлэпэ сарэ́ мануша́, савэ́ скэдынэ́пэ Юдэндыр, и рашая́, и Леви́ты, и сарэ́ скэдынэ́ мануша́, савэ́ явнэ́ Израилёстыр, и мануша́, савэ́ явнэ́ явирэ ригэ́ндыр, яви́ Израильсконэ пхувья́тыр и савэ́ дживдэ́ кэ Юдэ́я.
26. И сыс бари ра́дыма дро Ерусалимо, пал-дова́ со Соломоно́скирэ дывэсэ́ндыр, Давидо́скирэ чхавэ́скирэ, Израилёскирэ крали́скирэ, на сыс дасаво дро Ерусалимо.
27. И уштынэ́ рашая́ и Леви́ты, и бахтякирдэ манушэ́н; и сыс шундлы лэ́нгири зан, и загия́ лэ́нгири па́тери (моли́тва) дрэ свэ́нто Кхэр Лэ́скиро пэ болыбэ́н.
1. И пэ ко́нцо (яго́ро) сарэ́ далэскэ, гинэ́ сарэ́ Израильтя́ни, савэ́ одо́й сыс, дрэ Юдэя́кирэ фо́рья, и розмардэ статулы, чингирдэ тэлэ́ свэнцона вэша́, и роспхагирдэ́ вучипэна́ и алта́ри пэ сари́ Юдэ́я и пэ пхув Вениаминоскири, Ефремо́скири и Манасияскири, пэ ко́нцо (яго́ро). И пало́ дова́ рисинэ́ сарэ́ Израилёскирэ чхавэ́, кажно дро пэ́скиро хулаибэн, дрэ пэ́скирэ фо́рья.
2. И чхудя́ Езэки́я змены раша́нгирэ и Левитэ́нгирэ, пэ лэ́нгиро росчхуибэн, кажнонэс пашы́л пэ́скиро рэ́ндо, раша́нгиро ци Левитэнгиро, пашы́л цэ́ло схачкирибэ́н и пашы́л мирна свэ́нта дыибэна́ Ра́скэ-Дэвлэ́скэ, ваш служыныбэн, ваш шарибэ́н и славиныбэн, пашы́л Ра́скирэ-Дэвлэ́скири Кхэрэ́скири по́рта.
3. И отдыя́ кра́ли пэ́скири паш барвалыпнастыр пэ цэ́ло схачкирибэ́н; пэ злокоскиро и бэльвэлякиро цэ́ло схачкирибэ́н, и пэ цэ́ло схачкирибэ́н дрэ са́ваты и дрэ нэво́ чхон, и пэ свэ́нки, сыр исын зачхиндло́ дрэ Ра́скирэ-Дэвлэ́скиро Зако́но.
8. И явнэ́ Езэки́я и тхага́рья, и дыкхнэ́ груды, и парикирдэ Ра́скэ-Дэвлэ́скэ и Лэ́скирэ Израилёскирэ манушэ́нгэ.
9. И пхуцяпэ Езэки́я рашандыр и Левитэндыр пал далэ́ груды.
10. И отпхэндя́ лэ́скэ Аза́рия, англатуно́ раша́й, Садоскирэ кхэрэ́стыр, и пхэндя́: “Долэ́ дывэсэ́стыр, сыр лынэ́ тэ янэ́н яныбэ́н дро Ра́скирэ-Дэвлэ́скиро Кхэр, то амэ хаям чалэ́с, и бут яця́пэ; пал-дова́ со Рай Дэвэ́л бахтякирдя́ Пэ́скирэ манушэ́н. Далэ́стыр, со яця́пэ, сыс древа́н бут.”
11. И припхэндя́ Езэки́я тэ кэрэ́н скэдынэ́ шту́бы пашы́л Ра́скирэ-Дэвлэ́скиро Кхэр. И кэрдэ́ адя́кэ.
12. И пирилыджинэ одори́к яныбэ́н, и дэшэнгирья, и отдынэ́ миштыпэна сарэ́ чачипна́са. И сыс барыдырэ́са пэ лэ́ндэ Хонания, Левито, и Симе́ё, лэ́скиро пшал, явирэса.
13. А Иехиило, и Азазия, и Нахафо, и Асаило, и Иеримофо, и Иозавадо, и Елиэло, и Исмахия, и Махафо и Бенания сыс дыкхибнарье́нца тэл васт Хонанияскиро и Симеёскиро, лэ́скирэ пшалэскиро, пир упхэныбэ́н крали́скиро Езэкия́скиро и Азариёскиро, саво́ сыс барыдыро́ пэ Ра́скирэ-Дэвлэ́скиро Кхэр.
15. И тэл лэ́скиро васт сыс Едено, и Миниамино, и Иешуа, и Шэмаия, и Амария, и Шэхания дрэ свэнцыбнаскирэ фо́рья, соб (кай) чачунэ́с тэ роздэн пэ́скирэ пшалэ́нгэ паша́, сыр барэскэ, адя́кэ и тыкнэскэ.