Bible in one year - Пэ Балтитко Романи чиб

Bible in one year July 19

1. Охто́ бэрш сыс Иосияскэ, ке́ли ёв яця́ крали́са, и трия́нда екх бэрш сыс ёв крали́са дро Ерусалимо.

2. И кэрдя́ ёв лачхэ́с дрэ Ра́скирэ-Дэвлэ́скирэ якха́, и псирдя́ Давидо́скирэ дромэ́нца, пэ́скирэ дадэскирэнца, и ёв на рисёлас ни пэ чачи́ риг, ни пэ зэ́рво (ле́во) риг.

3. Пэ охто́то бэрш пэ́скирэ кралипнаскиро, ке́ли сыс ёв ишчо (инкэ́) тэрно́ ману́ш, ёв лыя́ тэ явэ́л кэ пэ́скирэ-дадэ́скиро Давидо́скиро Дэвэ́л; а пэ дэшуявир бэрш лыя́ тэ жужакирэл Юдэ́я и Ерусалимо вучипнэндыр и свэнцонэ вэшэ́стыр и кажнонэ́ вычхиндлэ́ и вычхудэ́ идолэндыр.

4. И роспхагирдэ́ анги́л лэ́скиро муй Ваалэнгирэ алта́ри и статулы, савэ́ сыс вучэ́с пэ лэ́ндэ; и свэнцындлэ вэша́ ёв вычингирдя, и кажна вычхиндлэ́ и вычхудэ́ муя́ роспхагирдя́, и розмардя́ дро пра́хо, и росчхудя́ пэ коплицы долэнгирэ, савэ́ янэ́нас лэ́нгэ свэ́нто дыибэ́н.

5. И кокалы́ жрецэнгирэ схачкирдя́ пэ лэ́нгирэ алта́ри, и выжужакирдя́ Юдэ́я и Ерусалимо.

6. И дрэ фо́рья Манасия́скирэ, и Ефремо́скирэ, и Симеоноскирэ, аж кэ Нефалимоскиро ро́дыцо, и дрэ лэ́скирэ чхучэ́ рига́.

7. И ёв роспхагирдя́ алта́ри и свэнцона вэша́, и вычхудэ́ муя́ розмардя́ дро пра́хо, и сарэ́ статулы роспхагирдя́ пэ сари́ Израилёскири пхув; и рисия́ дро Ерусалимо.

8. Пэ дэшуохтото бэрш пэ́скиро кралипнаскиро, сыр Иосия жужакиридя пхув и Дэвлэ́скиро Кхэр, ёв бичхадя́ Шафанос, Ацалияскирэ чхавэ́с, и Маасеёс, форо́скирэ барыдырэ́с, и Иоахос, Иоахазоскирэ чхавэ́с, лыла́-чхиныбнаскирис (писарёс), тэ нэвякирэн Ра́скирэ-Дэвлэ́скиро, пэ́скирэ Дэвлэ́скиро Кхэр.

9. И явнэ́ ёнэ кэ Хэлкия, англатуно́ раша́й, и отдынэ́ руп, саво́ сыс яндло дрэ Ра́скирэ-Дэвлэ́скиро Кхэр, саво́ Леви́ты, савэ́ сыс тэрдэ́ пэ ракхибэн пашы́л прого, скэдынэ́ вастэ́ндыр Манасияскирэндыр и Ефремоскирэндыр и сарэ́ндыр явирэ Израильтянэндыр, и сарэ́ Юдастыр и Вениаминостыр, и Ерусалимо́скирэ манушэ́ндыр;

10. И отдынэ́ ёнэ дрэ васта́ манушэ́нгэ, савэ́ дыкхнэ́ пал буты́, и чхудэ́ лэн кэ Ра́скирэ-Дэвлэ́скиро Кхэр, соб (кай) ёнэ тэ роздэн лэс бутярнэнгэ, савэ́ кэрдэ́ буты́ дро Ра́скирэ-Дэвлэ́скиро Кхэр, и кэрдэ́ ремо́нто и нэвякирдэ Кхэр.

11. И ёнэ роздынэ кхэра́-кэрибнаскирэнгэ (плотникэнгэ) и манушэ́нгэ, савэ́ кэрдэ́ яви́р бутя́ тэ кинэн вычингирдэ бара́ и вэш ваш спхандыпэн, соб (кай) тэ учхакирэн Кхэр, савэ́ роспхагирдэ́ Юдэя́кирэ кра́лья.

12. Адалэ́ мануша́ кэрдэ́ чачунэ́с бутя́, и тэ дыкхэ́н пал лэ́ндэ чхудэ́ сыс: Иахафо и Овадия, Леви́ты Мерарискирэ чхавэ́ндыр, и Заха́рия и Мешулам /Каафоскирэ чхавэ́ндыр, и сарэ́ Леви́ты, савэ́ джиндлэ́ тэ башавэн пэ башаибнытка струме́нты.

13. Ёнэ сыс чхудэ́ пэ манушэ́ндэ, савэ́ лыджа́нас и дыкхэнас пал сарэ́ндэ бутярнэндэ пашы́л кажно буты́; вари-савэ́ Левитэндыр адя́кэ-паць сыс и лыла́-чхиныбнаскирэ, и дыкхибнарья (надзиратели), и ракхибна́рья пэ по́рты.

14. Ке́ли вылынэ ёнэ руп, саво́ сыс яндло дро Ра́скирэ-Дэвлэ́скиро Кхэр, тэды Хелкия, раша́й, латхя́ (ластя) лылвари́ Ра́скирэ-Дэвлэ́скирэ Законоса, сави́ сыс дыны́ Мойза́скирэ вастэ́са.

15. И лыя́ Хелкия, и пхэндя́ Шафаноскэ лыла́-чхиныбнаскирэскэ: “Лылвари́ Законоскири латхём мэ дро Ра́скирэ-Дэвлэ́скиро Кхэр.” И отдыя́ Хелкия доя́ лылвари́ Шафаноскэ.

16. И лыджия́ Шафано лылвари́ кэ кра́ли, и яндя́ ла далэ́ нэвипнаса: “Саро́, со сыс допатяндло тырэ́ писхарье́нгэ, ёнэ кэрэ́на”;

17. И вычхудэ́ руп, саво́ латхнэ́ дро Ра́скирэ-Дэвлэ́скиро Кхэр, и пиридынэ лэс дрэ васта́ дыкхибнарье́нгэ и дрэ васта́ манушэ́нгэ, савэ́ кэрэ́на буты́.

18. И адя́кэ-паць роспхэндя́ Шафано, лыла́-чхиныбнаскиро крали́скэ, ракири́: “Лылвари́ дыя́ ма́нгэ Хелкия, раша́й.” И гиндя ла Шафано анги́л крали́стэ.

19. Ке́ли шундя́ кра́ли Законо́скирэ лава́, то тэды роскусця пэ́скирэ и́ди.

20. И дыя́ кра́ли упхэныбэ́н Хелкияскэ и Ахикамоскэ, Шафаноскирэ чхавэ́скэ, и Авдоноскэ, Михеёскирэ чхавэ́скэ, и Шафаноскэ, лыла́-чхиныбнаскирэскэ, и Асаияскэ, крали́скирэ дынари́скэ, ракири́:

21. “Джа́н, пхучэнпэ Ра́стыр-Дэвлэ́стыр пал ма́ндэ, и пал манушэ́ндэ, савэ́ ячнэ́пэ дро Израилё, и пал Юдастэ пал лава́ далэ́, савэ́ латхнэ́ лылварьякирэ; пал-дова́ со бари исын холы́ Ра́скирэ-Дэвлэ́скири, Саво́ росхолясыя пэ амэ́ндэ пал дова́, со на ракхнэ амарэ́ дада́ Ра́скирэ-Дэвлэ́скирэ лава́, соб (кай) тэ кэрэ́с пир саро́, со исын зачхиндло́ дрэ дая́ лылвари́.”

22. И гия́ Хелкия и одолэ́ мануша́, савэ́ сыс крали́стыр, кэ Олдана, пророчыца, Шалумоскири ромны́, Тавкегафоскирэ чхавэ́скирэ, Хасраскирэ чхавэ́скирэ, саво́ ракхця́ и́ди, а дживдя́ ёй дрэ яви́р паш Ерусалимо́скири, – и ракирдэ́ ла́са пал дава́.

23. И ёй пхэндя́ лэ́нгэ: “Адя́кэ ракирэ́ла Рай Дэвэ́л, Дэвэ́л Израилёскиро: ‘Пхэнэ́н одолэ́ манушэ́скэ, саво́ бичхадя́ тумэн кэ мэ:

24. адя́кэ ракирэ́ла Рай Дэвэ́л: Ѓа́да, Мэ яна́ва би́да пэ дава́ штэ́то и пэ лэ́скирэ манушэ́ндэ сарэ́ прокошыбэна, савэ́ исын зачхиндлэ́ дрэ лылвари́, сави́ гиндлэ́ анги́л Юдэя́кирэ-крали́скиро муй.

25. Пал-дова́, со ёнэ ячкирдэ́ Ман и кадиндлэ явирэ дэвлорэ́нгэ, соб (кай) тэ росхолякирэн Ман сарэ́ пэ́скирэ вастэнгирэ рэндэ́нца. И Мири́ холы́ захачола пэ дава́ штэ́то, и на мурдёла.’

26. А крали́скэ Юдеякирэскэ, саво́ бичхадя́ тумэн тэ пхучэнпэ Ра́стыр-Дэвлэ́стыр, адя́кэ пхэнэ́н: ‘Адя́кэ ракирэ́ла Рай Дэвэ́л, Дэвэ́л Израилёскиро, пал лава́, савэ́ ту шундя́н:

27. адя́кэ, сыр ковлыя ило́ тыро́, и ту чхудя́н пэс тэлэды́р (змириндянпэ) анги́л Дэвлэ́стэ, ке́ли шундя́н Лэ́скирэ лава́ пал дава́ штэ́то и пал лэ́скирэ манушэ́ндэ, – и ту чхудя́н пэс тэлэды́р анги́л Ма́ндэ, и роскустян пэ́скирэ и́ди, и рондян анги́л Ма́ндэ, тэды и Мэ шундём тут, ракирэ́ла Рай Дэвэ́л.

28. Ѓа́да, Мэ чхува́ва тут кэ тырэ́ дада́, и ту явэ́са чхудо дрэ копли́ца тыри́ раманёса (миро́са), и на дыкхэ́на тырэ́ якха́ доя́ би́да, сави́ Мэ яна́ва пэ дава́ штэ́то и пэ лэ́скирэ манушэ́ндэ.’” И яндлэ́ отпхэныбэ́н крали́скэ.’”

29. И бичхадя́ кра́ли, и скэдыя́ сарэ́н Юдэякирэн и Ерусалимоскирэн пхурыдырэн.

30. И гия́ кра́ли дро Ра́скирэ-Дэвлэ́скиро Кхэр, и лэ́са сарэ́ Юдэя́кирэ, и Ерусалимо́скирэ мануша́, и рашая́, и Леви́ты, и сарэ́ мануша́ барэстыр кэ тыкно́; и ёв гиндя дро шуныбэ́н (дыя́ упрэ́) лэ́нгиро сарэ́ заветоскирэ лылварьякирэ лава́, сави́ латхнэ́ дро Ра́скирэ-Дэвлэ́скиро Кхэр.

31. И тэрдия́ кра́ли пэ пэ́скиро штэ́то, и кэрдя́ завето анги́л Ра́скирэ-Дэвлэ́скиро муй – тэ джа́н пал Дэвлэ́стэ и тэ ракхэ́н Лэ́скирэ припхэныбэна́ (заповеди), и Лэ́скирэ сыкадыипэна, и Лэ́скирэ упхэныбэна́, сарэ́ пэ́скирэ илэ́стыр и сарэ́ пэ́скирэ де́стыр, соб (кай) тэ кэрэ́н саро́ пир заветоскирэ лава́, савэ́ исын чхиндлэ́ дрэ дая́ лылвари́.

32. И припхэндя́ кра́ли тэ досыкавэн дава́ саро́ манушэ́нгэ, савэ́ сыс дро Ерусалимо и пэ Вениаминоскири пхув; и лынэ́ тэ кэрэ́н Ерусалимо́скирэ мануша́ пир пэ́скирэ дадэ́нгиро Дэвлэ́скиро, Дэвлэ́скиро заве́то.

33. И вычхурдыя Иосия сарэ́ магирибэна сарэ́ пхувья́тыр, савэ́ сыс Израилёскирэ чхавэ́ндэ; и припхэндя́ сарэ́нгэ, кон дживдя́ пэ Израилёскири пхув, тэ дынаринэ́н (тэ служынэн) Ра́скэ-Дэвлэ́скэ, пэскирэскэ Дэвлэ́скэ. И дрэ сарэ́ лэ́скирэ джиибна́скирэ дывэса́ ёнэ на отгинэ́ пэ́скирэ дадэнги́рэ Ра́стыр-Дэвлэ́стыр.

2 Chronicles 35:1-27

1. И кэрдя́ Иосия дро Ерусалимо Патради́ Ра́скэ-Дэвлэ́скэ, и зачхиндлэ́ патрадитконэс бакрорэс пэ дэшуштарто дывэ́с, англатунэ́-чхонэ́скиро.

2. И чхудя́ ёв раша́н пэ лэ́нгирэ штэ́ты, и дыя́ ду́хо (фа́но) лэ́нгэ тэ дынаринэ́н дро Ра́скирэ-Дэвлэ́скиро Кхэр.

3. И пхэндя́ Левитэ́нгэ, савэ́ сыклякирдэ́ сарэ́н Израильтянэ́н, савэ́ сыс высвэнцындлэ Ра́скэ-Дэвлэ́скэ: “Чхувэ́н свэ́нто ковчэго дрэ Кхангири́, сави́ кэрдя́ Соломо́но, Давидо́скиро чхаво́, Израилёскиро кра́ли; нанэ тумэ́нгэ трэ́бима тэ лыджа́н лэс пэ псикэ́; дынаринэ́н акана́ Ра́скэ-Дэвлэ́скэ, Дэвлэ́скэ амарэскэ, и Лэ́скирэ манушэ́нгэ Израилёскирэнгэ.

4. Тэрдён пир тумарэ́ стрэ́чы (поколе́нии), пир зме́ны тумарэ́, сыр упхэндя Дави́до, Израилёскиро кра́ли, и сыр зачхиндя́ Соломо́но, лэ́скиро чхаво́;

5. И тэрдён пэ свэ́нто штэ́то, пир стрэчэнгиро росчхуибэн (дадэ́нгирэ титулы) тумарэ́ пшалэ́ндэ, манушэ́нгирэ чхавэ́ндэ, и пир дова́, сыр Леви́ты росчхудэ пэс пэ стрэ́чы.

6. И зачхинэн патрадитконэс бакрорэс, и высвэнцынэнпэ, и приготовинэн лэс ваш тумарэ́ пшалэ́нгэ, кэрэ́н саро́ Ра́скирэ-Дэвлэ́скирэ лавэ́са пир Мойзастэ.

7. И дыя́ Иосия дро дыибэ́н сарэ́нгэ манушэ́нгирэ чхавэ́нгэ, савэ́ сыс одо́й, тыкнэ́ кхэритконэ́ мурдалэ́ндыр бакрорэ́н и бузнэн (козлэн) тэрнэн, саро́ ваш свэ́нто яныбэ́н Дэвлэ́скэ патрадитко, саро́ трия́нда тысёнцы, и трин тысёнцы гурувэ́н. Дава́ сыс крали́скирэ миштыпна́стыр.

8. И лэ́скирэ тхага́рья (кня́зи) илэ́стыр дынэ́ дро дыибэ́н манушэ́нгэ, рашангэ и Левитэ́нгэ. Хелкия́, и Заха́рия и Иехиило, савэ́ исыс барыдырэ́нца дро Дэвлэ́скиро Кхэр, дынэ́ рашангэ ваш патрадитко свэ́нто яныбэ́н Дэвлэ́скэ дуй тысёнцы шовшэла́ бакрен, бакрорэ́н и бузнэн (козлэн) и триншэла́ гурувэ́н;

9. И Хонаеия и Шемаия́, и Нафанаи́ло, лэ́скирэ пша́ла, и Хашавия́, и Иеиэло, и Иозава́до, барыдыра́ Левитэ́нгирэ, дынэ́ Левитэ́нгэ патрадитко ваш свэ́нто яныбэ́н Дэвлэ́скэ бакрен пандж тысёнцы, и панджшэла́ тэрнэ́ гурувэ́н.

10. Адя́кэ кэрдо́ сыс дынарибэ́н (служба). И тэрдинэ́ рашая́ пэ пэ́скиро штэ́то и Леви́ты пэ пэ́скирэ зме́ны пир крали́скиро упхэныбэ́н.

11. И зачхиндлэ́ патрадитконэ бакрорэс. И чхувэ́нас рашая́ ратэ́са, лыи́ лэс Левитэ́нгирэ вастэ́ндыр, а Леви́ты злынэ цы́па.

12. И росчхудэ ёнэ дова́, со сыс припхэндло ваш саро́ схачкирибэ́н, соб (кай) тэ роздэн дова́ пир отде́лы дрэ стрэ́чы манушэ́нгирэ чхавэ́ндэ, тэ янэ́н Ра́скэ-Дэвлэ́скэ, сыр исын зачхиндло́ дрэ Мойзаскири лылвари́. Дова́-паць кэрдэ́ и гурувэнца.

13. И пэкнэ патрадитконэ бакрорэс пэ яг, пир упхэныбэ́н; и свэ́нта яныбэна́ кэрадэ дрэ пирья, какавя (котлы) и мыски (каструли), и сы́гэс роздынэ сарэ́ манушэ́нгэ;

14. А тэ́ньчи (после) кэрдэ́ ваш пэ́скэ и ваш рашангэ: пал-дова́ со рашая́, Аароно́скирэ чхавэ́ сыс залынэ (залымэ) яныбнаса цэлонэ́ схачкирибнастыр кэ рат; палдава́ и кэрадэ Леви́ты ваш пэ́скэ и ваш рашангэ, Аароно́скирэ чхавэ́нгэ.

15. И багаибнарья, Асафоскирэ чхавэ́, ячнэ́пэ пэ пэ́скирэ штэ́ты, пир упхэныбэ́н Давидо́скиро, и Асафоскиро, и Еманоскиро и Идифуноскиро, крали́скирэ магикоскиро, и ракхибна́рья пашы́л по́рта: на ваш со сыс лэ́нгэ тэ отджан пэ́скирэ дынарибнастыр, адя́кэ сыр лэ́нгирэ пша́ла кэрадэ ваш лэ́нгэ.

16. Адя́кэ сыс кэрдо́ саро́ дынарибэ́н Ра́скэ-Дэвлэ́скэ дрэ дова́ дывэ́с, соб (кай) тэ свэнкинэн Патради́ и тэ янэ́н цэ́ло схачкирибэ́н пэ Ра́скирэ-Дэвлэ́скиро алта́рё, пал Иосияскирэ крали́скиро упхэныбэ́н.

17. И свэнкиндлэ Израилёскирэ чхавэ́, савэ́ сыс одо́й, Патради́ дрэ дова́ часо (цы́ро) и свэ́нко опрэснокэнгиро дрэ эфта́ дывэса́.

18. И на свэнкиндлэ дасави́ Патради́ Израилёстэ пророкоскирэ-Самуилоскирэ дывэсэ́ндыр; и сарэ́ Израилёскирэ кралье́ндыр ние́кх на справиндя дасави́ Патради́, сави́ кэрдя́ Иосия, и рашая́, и Леви́ты, и сарэ́ Юдэя́кирэ, и Израильтя́ни, савэ́ сыс одо́й, и Ерусалимо́скирэ мануша́.

19. Дрэ дэшуохтото бэрш Иосия́скиро, сыр ёв сыс кра́ли, свэнкиндлэ дая́ Патради́.

20. Пало́ (после) саро́ дава́, со кэрдя́ Иосия дро Дэвлэ́скиро Кхэр, гия́ Нехар, Египто́скиро кра́ли, пэ марибэ́н кэ Кархемисо пэ Евфрато; и Иосия выгия́ гил (пэ стреч) лэ́скэ.

21. И гил бичхадя́ кэ ёв Нехао манушэ́н тэ пхэнэ́н: “Со ма́нгэ и ту́кэ, Юдэя́киро кра́лё? На проти ту́тэ акана́ джа́ва мэ, нэ одори́к, кай ма́ндэ марибэ́н. И Дэвэ́л припхэндя́ ма́нгэ тэ сыгнякирав; на яв проти Дэвлэ́стэ, Саво́ исын ма́нца, соб (кай) Ёв тэ на хасякирэ́л тут.”

22. Нэ Иосия на отгия́ лэ́стыр, а скэдыяпэ, соб (кай) тэ марэ́лпэ лэ́са, и на шундя́ Нехаоскирэ лава́ Дэвлэ́скирэ мо́стыр, и выгия́ пэ марибэ́н, пэ лошчы́на Мегидо.

23. И дынэ́ карье́ лукэ́ндыр дрэ крали́стэ Иосиястэ; и пхэндя́ кра́ли пэ́скирэ дынарье́нгэ: “Лыджа́н ман, пал-дова́ со мэ пхарэ́с чхиндло́.”

24. И злынэ лэс дына́рья лэ́скирэ марибнытконэ́ вурдэнэстыр, и чхудэ́ тэ бэшэ́л лэс дрэ яви́р вурдэ́н, саво́ сыс лэ́стэ, и лыджинэ́ лэс дро Ерусалимо. И мыя́ ёв, и сыс гарадо́ дрэ пэ́скирэ дадэнги́рэ коплицы. И сарэ́ Юдэя́кирэ и Ерусалимо оброндлэ Иосияс.

25. Оброндя Иосияс и Ереме́ё дрэ роибнаскири гилы́; и ракирдэ́ сарэ́ багаибнарья и багаибнарицы пал Иосиястэ дрэ роибнытка пэ́скирэ гиля́, савэ́ исын джиндлэ́ кэ дава́ дывэ́с, и пиридынэ лэн дро багаибэн Израилёскэ; и ґа́да, ёнэ исын зачхиндлэ́ дрэ лылвари́, роибнытконэ-гиленгири.

26. Яви́р рэ́нды Иосияскирэ и лачхипэ́н лэ́скиро, зджанапэ долэса, со исын зачхиндло́ дро Ра́скирэ-Дэвлэ́скиро Зако́но,

27. И рэ́нды лэ́скирэ, англатунэ́ и палатунэ́ (последня), исын зачхиндлэ́ дрэ Израилёскирэ и Юдэя́кирэ-кралье́нгири лылвари́.

2 Chronicles 36:1-23

1. И лынэ́ мануша́ пэ доя́ пхув Иоахазос, Иосияскирэ чхавэ́с, и чхудэ́ лэс крали́са, пэ штэ́то лэ́скирэ дадэ́скиро, дро Ерусалимо.

2. Биш тэ трин бэрш сыс Иоахазоскэ, ке́ли ёв яця́ крали́са, и трин чхона́ сыс ёв крали́са дро Ерусалимо.

3. И злыя́ лэс Египто́скиро кра́ли дро Ерусалимо, и чхудя́ пэ пхув притасады (пеня) шэл тала́нты руп и екх таланто сувнака́й.

4. И чхудя́ Египто́скиро кра́ли пэ Юдэ́я и Ерусалимо Елиакимос, лэ́скирэ пшалэ́с, и парудя лэ́скиро лав пэ Иоакимо; а Иоахазос, лэ́скирэ пшалэ́с, лыя́ Нехао и залыджия́ лэс дро Еги́пто.

5. Биш тэ пандж бэрш сыс Иоакимоскэ, ке́ли ёв яця́ крали́са, и дэшуекх бэрш ёв сыс крали́са дро Ерусалимо. И кэрдя́ налачхэ́с дрэ якха́ пэ́скирэ Ра́скирэ-Дэвлэ́скирэ.

6. Проти лэ́стэ выгия́ Навуходоносо́ро, Вавилоно́скиро кра́ли, и закуиндя лэс састырэнца, соб (кай) тэ лыджа́л лэс дро Вавило́но.

7. И паш кхорэндыр Ра́скирэ-Дэвлэ́скирэ Кхэрэскир пирилыджия Навуходоносо́ро дро Вавило́но, и чхудя́ лэн дро пэ́скиро мангипнытко штэ́то дро Вавило́но.

8. Яви́р рэ́нды Иоакимоскирэ и лэ́скирэ магирибэна, савэ́ ёв кэрдя́ и савэ́ латхнэ́ дрэ лэ́стэ, исын зачхиндлэ́ дрэ Израилёскирэ и Юдэя́кирэ-кралье́нгири лылвари́. И яця́ крали́са Иехония, лэ́скиро чхаво́, пэ штэ́то лэ́скиро.

9. Дэшуохто бэрш сыс Ехонияскэ, ке́ли яця́ ёв крали́са, и трин чхона́ и дэш дывэ́с ёв сыс крали́са дро Ерусалимо. И кэрдя́ ёв налачхэ́с дрэ Ра́скирэ-Дэвлэ́скирэ якха́.

10. Сыр гия бэрш, бичхадя́ кра́ли Навуходоносо́ро, и припхэндя́ тэ лэн лэс дро Вавило́но кхэтанэ́ дрогонэ́ кхорэнца Ра́скирэ-Дэвлэ́скирэ Кхэрэскир, и яця́ крали́са пэ Юдэе́ндэ и Ерусалимо о Сэдэки́я, лэ́скиро пшал.

11. Биш тэ екх бэрш сыс Сэдэкияскэ, ке́ли яця́ ёв крали́са, и дэшуекх бэрш ёв сыс крали́са дро Ерусалимо.

12. И кэрдя́ ёв налачхэ́с дрэ пэ́скирэ Ра́скирэ-Дэвлэ́скирэ якха́. Ёв на лыя́ тэ кандэл пророко́с Еремеёс, саво́ ракирдя́ Ра́скирэ-Дэвлэ́скирэ уштэндыр.

13. И отгия́ ёв крали́стыр Навуходоносоростыр, саво́ лыя́ лэ́стыр совэ́л Дэвлэ́скирэ лавэ́са, – и кэрдя́ зоралы́ пэ́скири мэн, холякирдя пэ́скиро ило́ кэ дова́, со на рисия́ илэ́са кэ Рай Дэвэ́л, Дэвэ́л Израилёскиро.

14. Адя́кэ и сарэ́ барыдыра́ пэ рашандэ и пэ манушэ́ндэ кэрдэ́ бут грэ́хи, дыкхи́ пэ сарэ́ магирипэна Наюдытконэ́ нацые́ндыр, и магирдэ́ ёнэ Ра́скирэ-Дэвлэ́скиро Кхэр, саво́ Ёв свэнцындя дро Ерусалимо.

15. И бичхадя́ кэ ёнэ Рай Дэвэ́л, Дэвэ́л лэ́нгирэ-дадэ́нгиро, Пэ́скирэ бичхаибнаскирэн тася́рлэс пэ зло́ко (пэ ра́нко), пал-дова́ со Ёв тангиндя Пэскирэн манушэ́н и Пэ́скиро Кхэр.

16. Нэ ёнэ сандлэпэ напатывалэс (здикиндлэпэ) Дэвлэ́скирэ бичхаибнаскирэндыр, и на шундлэ́ Лэ́нгирэ лава́, и кошнэпэ пэ Лэ́скирэ пророкэ́ндэ, пака згия Ра́скирэ-Дэвлэ́скири холы́ пэ Лэ́скирэ манушэ́ндэ адя́кэ, со на сыс лэ́скэ зракхибэ́н.

17. И Ёв яндя́ пэ лэ́ндэ Халдеенгирэ крали́с, – и одова́ мулякирдя́ тэрнэ́ манушэ́н лэ́нгирэ куртала́са дрэ лэ́нгиро свэнтыныбнаскиро кхэр, и на потангиндя ни тэрнэ́ чхавэ́с, ни патываля чха, ни пхурэс, ни богос: саро́ отдыя́ Дэвэ́л дрэ лэ́скиро васт.

18. И сарэ́ Дэвлэ́скирэ Кхэрэскирэ кхорэ́ (сасу́ды) барэ́ и тыкнэ́, и кучипэна Ра́скирэ-Дэвлэ́скирэ Кхэрэскирэ, и барвалыпэ́н лэ́скирэ крали́скиро и тхагарьенгиро (князенгиро), саро́ ёв яндя́ дро Вавило́но.

19. И хачкирдэ́ ёнэ Дэвлэ́скиро Кхэр, и роспхагирдэ́ Ерусалимо́скири ва́нта; и сарэ́ лэ́скирэ фэлатиня́ схачкирдэ́ яга́са, и сарэ́ дро́га кхорэ́ лэ́скирэ домардэ́.

20. И пирилыджия ёв манушэ́н, савэ́ ячнэ́пэ джидэ́ куртала́тыр дро Вавило́но; и сыс ёнэ лэ́скирэ дынарье́нца и лэ́скирэ чхавэнгирэнца, кэ Персиякирэ-крали́скиро кралипэ́н.

21. Анги́л дова́, соб (кай) тэ сполнинэн Ра́скирэ-Дэвлэ́скиро лав, саво́ сыс пхэндло́ Еремеёскирэ уштэ́нца, сыр пхув отсвэнкиндя пэ́скирэ са́ваты (суботы). Дрэ сарэ́ чхучэ́ дывэса́ ёй ракхця́ са́вато кэ сполниныбэн эфтадэша́ бэрш.

22. И дро англатуно́ (пэ́рво) бэрш Кираскиро, Персиякирэ крали́скиро, соб (кай) тэ сполнинэн Ра́скирэ-Дэвлэ́скиро лав, саво́ пхэндлэ́ Еремеёскирэ ушта́, Рай Дэвэ́л ґаздыя́ ду́хо (фа́но) Кираскиро, Персиякирэ крали́скиро, и ёв припхэндя́ тэ дэн тэ джинэ́н пир саро́ пэ́скиро кралипэ́н, лавэ́нца и чхиныбнаса, и тэ пхэнэ́н:

23. “Адя́кэ ракирэ́ла о Кира, Персиякиро кра́ли: ‘Сарэ́ кралипэна́ пэ пхув дыя́ ма́нгэ Рай Дэвэ́л, болыбна́скиро Дэвэ́л; и Ёв припхэндя́ ма́нгэ тэ кэра́в Лэ́скэ Кхэр дро Ерусалимо, со исын дрэ Юдэ́я. Кон исын тумэ́ндыр-сарэ́ Лэ́скирэ манушэ́ндыр, мэк тэ явэ́л лэ́скиро Рай Дэвэ́л, Дэвэ́л лэ́са, и мэк ёв одори́к тэ джал.’”

Psalms 86:1-5

1. Давидоскири Па́тери (Моли́тва). О, Раё Дэ́вла, причху́в тэлэ́ Тыро́ кан, отпхэн ма́нгэ, пал-дова́ со мэ сом чороро́ и дрэ трэ́бима.

2. Ракх миро ди, пал-дова́ со мэ сом дэвлы́тко. Ту сан, миро Дэ́вла, Саво́ зракхэ́ла Пэ́скирэ писхари́с, кон рисёла кэ Ту тэ зракхэлпэ.

3. Яв тангипнаскиро кэ мэ, о Раё Дэ́вла, пал-дова́ со, мэ со дывэ́с прикхарава Тут сарэ́ зорья́тыр.

4. Обрадын Тырэ́-писхарискиро ди, пал-дова́ со мэ ґазда́ва пэ́скиро ди кэ Ту, Раё Дэ́вла.

5. Пал-дова́ со Ту, Раё Дэ́вла, сан лачхо́ и Ту камэ́са тэ примангэс: Ту сан барвало́ лачхэ́-илыткимаса сарэ́нгэ, кон прикхарэла Тут.

Proverbs 21:13-14

13. Кон запхандэла кан, ке́ли чороро́ ману́ш дэ́ла го́дла, кодова́ адя́кэ-паць явэ́ла тэ дэл го́дла чорорипнастыр и лэс на явэ́на тэ шунэ́н.

14. Да́ро, саво́ дэ́лапэ, соб (кай) нико́н тэ на дыкхэ́л, штылякирэла бари холы́, и мыто (взятка), со дэ́лапэ пало́ думо, кэрэ́ла баро́ холякирибэ́н.

Skutki 21:13-14

13. Нэ Па́вли отпхэндя́: “Со тумэ́ кэрэ́на? Со́скэ тумэ́ ровэна и кушэна миро ило́? Мэ кама́м тэ явав на со пхандло, нэ и тэ мэрав дро Ерусалимо пал Дэвлэ́скирэ-Исусо́скиро лав.

14. Ке́ли амэ ґалыям, со на могинаса лэс тэ отракирас, амэ пирияцям лэс тэ отракирас и пхэндям: “Мэк дро саро́ тэ явэ́л Дэвлэ́скири во́ля.”

Romani Bible Baltic 2019

Maintained by the United Bible Societies for the Baltic Romani Mission