Bible in one year July 20Ezra 1:1-111. Дро пэ́рво бэрш крали́скирэ Кираскиро, ке́ли Ёв лыя́ тэ кралинэ́л пэ Пе́рсия, соб (кай) тэ сполнинэ́лпэ лав Ра́скирэ-Дэвлэ́скиро, саво́ ракирдя́ проро́ко Ереме́е, о Рай-Дэвэ́л джангадя ду́хо (фа́но) Кираскиро, Персиякирэ крали́скиро, и ёв дыя́ припхэныбэ́н тэ пхэнэ́н анги́л сарэ́ндэ пир саро́ кралипэ́н, и адя́кэ-паць тэ зачхинэн далэ́ лава́:2. “Адя́кэ ракирэ́ла Кира, кра́ли Персиякиро: ‘О Рай Дэвэ́л, Дэвэ́л болыбна́скиро, дыя́ ма́нгэ сарэ́ кралипэна́ пэ пхув. И Ёв припхэндя́ ма́нгэ тэ чхував Кхэр (Кхангири́) Лэ́скэ дро Ерусалимо, пэ Юдэ́я.3. Кон исын машки́р тумэ́ндэ Лэ́скирэ манушэ́ндыр, мэк тэ явэ́л Лэ́скиро Дэвэ́л лэ́са! Акана́, мэк ёв тэ джал дро Ерусалимо, саво́ исын пэ Юдэ́я, и мэк ёв тэ чхувэ́л Кхэр (Кхангири́) Ра́скэ-Дэвлэ́скэ, Саво́ исын дро Ерусалимо.4. И пэ кажно штэ́то, пир савэ́ дживэ́на Юды дро пле́но, мэк штэтытка мануша́ тэ помогинэн лэ́нгэ рупэ́са, сувнака́са, и явирэ дарэнца, кхэритконэ́ мурдалэ́нца, адя́кэ-паць сыр и тэ дэн свэ́нто дыибэ́н, со кон камэ́ла, ваш Кхэр (Кхангири́) Дэвлэ́скиро, саво́ исын дро Ерусалимо.’”5. Тэ́ньци шэралэ́ пэ стрэ́чы /дадэнги́рэ-ро́ды (поколении) Юдастыр и Веньяминостыр, и рашая́, и Леви́ты, кажно ману́ш, дрэ савэ́ндэ Дэвэ́л джангадя ду́хо (фа́но), ґаздынэ́пэ тэ джа́н тэ чхувэ́н нэвэ́с Кхэр (Кхангири́), Ра́скирэ-Дэвлэ́скиро, саво́ исын дро Ерусалимо.6. И сарэ́ одолэ́, кон сыс пашы́л лэ́ндэ, зорьякирдэ лэ́нгирэ васта́ рупувэ́ чарэнца, предметэнца (чысэ́нца) сувнака́стыр, явирэ дарэнца маёнкостыр, и кхэритконэ́ мурдалэ́нца, и кучипнэнца (дрогонэ́ предметэнца), адя́кэ-паць, сыр и сарэ́ дарэнца, со сыс яндло сыр свэ́нто дыибэ́н, со кон камдя́”.”7. И кра́ли Кира лыджия́ кхорэ́ (сасу́ды). Кхэрэ́стыр (Кхангирья́тыр) Ра́скирэ-Дэвлэскирэстыр, савэ́ о Навуходоносо́ро лыджия́ криг Ерусалимо́стыр и чхудя́ дро лэ́скирэ-дэвлорэскиро кхэр.8. И о Кира, кра́ли Персиякиро, лыджия́ яври́ лэн Мифредатоскирэ вастэ́са, кон сыс ракхибнаскиро (хранителё) пэ пиралы́ (сокровишчо), саво́ пиригиндя лэн Шэшбацароскэ, тхагарискэ Юдаскирэскэ.9. Акэ, исын гиныбэ́н, со и кицы́ сыс: трия́нда сувнакунэ́ барэ́ чарэ́, екх бар (тысёнцо) рупувэ́ барэ́ чарэ́, биш тэ еня́ чхурья;10. трия́нда хор тахтая́ (чашы) сувнака́стыр, штар шэла́ тэ дэш кадасавэ́-паць тахтая́ рупэ́стыр, и бар (тысёнцо) яви́р кхорэ́ (сасу́ды).11. Сыс пандж бара́ штар шэла́ кхорэ́ (сасу́ды) сувнака́стыр и рупэ́стыр. Сарэ́ далэ́ да́ры лыя́ о Шэшбацаро пленнонэнца, савэ́н лыджинэ́ Вавилоно́стыр кэ Ерусалимо.Ezra 2:1-701. Акана́, акэ, исын мануша́ долэ́ округа́тыр, савэ́ выгинэ́ плено́стыр кодолэндыр, савэ́н вылыджия́ о Навуходоносо́ро, кра́ли Вавилоно́скиро, кэ Вавило́но, и кон рисия́ палэ кэ Ерусалимо и кэ Юдэ́я, кажно дро пэ́скиро фо́ро,2. кон явдя́ кхэтанэ́ Зоровавелёса, Исусо́са (Ёхошуаса), Ниемияса, Сараияса, Реелаёса, Мардохеёса (Мордэхаёса), Билшаноса, Мисфароса, Бигваёса, Рехумоса и Вааноса. Акэ, кицы́ сыс мануша́ Израилёстыр:3. чхавэ́ Парошоскирэ, дуй тысёнцы екх шэл и эфтадэша́ дуй;4. чхавэ́ Сафатияскирэ (Шэфатияскирэ), трин шэла́ и эфтадэша́ дуй;5. чхавэ́ Арахоскирэ, эфта́ шэла́ и эфтадэша́ пандж;6. чхавэ́ Пахаф-Моавоскирэ, мануша́ Исусо́скирэ и Иоавоскирэ, дуй тысёнцы охто́ шэла́ и дэшуду́й;7. чхавэ́ Эламоскирэ, екх тысёнуцо дуй шэла́ и пандждэша́ дуй;8. чхавэ́ Затуёскирэ, еня́ шэла́ и штардэша́ дуй;9. чхавэ́ Закаёскирэ, эфта́ шэла́ и шовдэша́;10. чхавэ́ Ваниёскирэ, шов шэла́ и штардэша́ дуй;11. чхавэ́ Бебаёскирэ, шов шэла́ и биш тэ трин;12. чхавэ́ Азгадоскирэ, екх бар дуй шэла́ и биш тэ дуй;13. чхавэ́ Адоникамоскирэ, шов шэла́ и шовдэша́ шов;14. чхавэ́ Бигваёскирэ, дуй тысёнцы (бара́) и пандждэша́ шов;15. чхавэ́ Адиноскирэ, штар шэла́ и пандждэша́ штар:16. чхавэ́ Атэроскирэ, Езэкиястыр, енядэша охто́;17. чхавэ́ Бецаёскирэ, трин шэла́ и биш тэ трин;18. чхавэ́ Иораскирэ, екх бар и дэшуду́й;19. чхавэ́ Хашумоскирэ, дуй шэла́ и биш тэ трин;20. чхавэ́ Гибароскирэ, енядэша пандж;21. мануша́ Вифлеемостыр екх шэл и биш тэ трин;22. мануша́ Нетофатыр пандждэша́ шов;23. мануша́ Амафофостыр екх шэл и биш тэ охто́;24. мануша́ Азмавефоскирэ, штардэша́ дуй;25. мануша́ Кири́аф-Яриматыр, Кефиратыр и Беерофостыр эфта́ шэла́ и штардэшадуй;26. мануша́ Раматыр и Гефатыр шов шэла́ биш тэ е́кх;27. мануша́ Михмасостыр екх шэл и биш тэ е́кх;28. мануша́ Вефилёстыр и ґаёстыр дуй шэла́ и биш тэ трин;29. мануша́ Невостыр штардэша́ дуй;30. мануша́ Магбишостыр екх шэл и пандждэша́ шов;31. чхавэ́ явирэ Эламоскирэ, екх тысёнцо (бар) дуй шэла́ и штардэшаштар;32. чхавэ́ Харимоскирэ трин шэла́ биш;33. мануша́ Лидатыр (Лёдостыр), Хадидостыр и Оностыр эфта́ шэла́ тэ биш тэ пандж.34. Мануша́ Ерихоностыр трин шэла́ штардэшапандж;35. мануша́ Сенаятыр трин бара́ шовшэла́ трия́нда.36. Э Рашая́: чхавэ́ Иедаяскирэ Исусо́скирэ (Ёхошуаскирэ) кхэрэ́стыр, еня́ шэла́ шовдэша́ пандж;37. чхавэ́ Имэроскирэ екх тысёнуо (бар) пандждэша́ дуй;38. чхавэ́ Пашхуроскирэ екх тысёнцо (бар) дуй шэла́ и штардэша́ эфта́;39. чхавэ́ Харимоскирэ екх бар дэшуэфта.40. Э Леви́ты: чхавэ́ Исусо́скирэ (Ехошуаскирэ) и Кадмиилоскирэ, чхавэ́ Годавияскирэ кхэрэ́стыр эфтадэшадуй.41. Э Багаибна́скирэ: чхавэ́ Асафоскирэ шэл биш тэ охто́.42. Э чхавэ́ стрэгарье́нгирэ пашвударэнгирэ: чхавэ́ Шалумоскирэ, чхавэ́ Атэроскирэ, чхавэ́ Талмоноскирэ, чхавэ́ Акувскирэ, чхавэ́ Хатитаскирэ, чхавэ́ Шоваёскирэ, -саро́ пэ саро́ екх шэл трияндаеня.43. Э Нефине́и: чхавэ́ Цыхаскирэ, чхавэ́ Хасуфаскирэ, чхавэ́ Табаофоскирэ;44. чхавэ́ Кероскирэ, чхавэ́ Сиагаскирэ, чхавэ́ Фадоноскирэ,45. чхавэ́ Лебанаскирэ, чхавэ́ Хагабаскирэ, чхавэ́ Акувоскирэ;46. чхавэ́ Хагавоскирэ, чхавэ́ Шамлаёскирэ; чхавэ́ Хананоскирэ;47. чхавэ́ Гидэлёскирэ, чхавэ́ Гахароскирэ, чхавэ́ Рэаёскирэ;48. чхавэ́ Рециноскирэ, чхавэ́ Некодаскирэ, чхавэ́ Газамоскирэ;49. чхавэ́ Узаскирэ, чхавэ́ Пасеахоскирэ, чхавэ́ Бесаёкирэ;50. чхавэ́ Аснаскирэ, чхавэ́ Меунимоскирэ, чхавэ́ Нефисимоскирэ;51. чхавэ́ Бакбукоскирэ, чхавэ́ Хакуфаскирэ, чхавэ́ Хархуроскирэ;52. чхавэ́ Бацлуфоскирэ, чхавэ́ Мехидаскирэ, чхавэ́ Харшаскирэ;53. чхавэ́ Баркососкирэ, чхавэ́ Сисраскирэ, чхавэ́ Фамахоскирэ;54. чхавэ́ Нецыахоскирэ, и чхавэ́ Хатифаскирэ.55. Э чхавэ́ Соломоно́скирэ-писхарье́нгирэ: чхавэ́ Сотаёскирэ, чхавэ́ Гасоферефоскирэ, чхавэ́ Ферудаскирэ;56. чхавэ́ Иалоскирэ (Яалоскирэ), чхавэ́ Дарконоскирэ, чхавэ́ Гиделоскирэ;57. чхавэ́ Сефатияскирэ (Шэфатияскирэ), чхавэ́ Хатилоскирэ, чхавэ́ Похере́ф-Гацэбаимоскирэ, и чхавэ́ Амиёскирэ.58. Сарэ́н: Нефинее́н и чхавэ́н Соломоно́скирэ-писхарье́нгирэн сыс трин шэла́ енядэша дуй.59. И, акэ, сыс одолэ́, савэ́ явнэ́ Тэл-Мелахостыр, Тэл-Харшыстыр, Херубостыр-Аданостыр-Имэростыр, савэ́ на саштындлэ (могиндлэ́) тэ досыкавэн пал стрэч/лэ́нгирэ-дадэ́нгиро ро́до (поколениё) ци пал лэ́нгиро кхэри́тко ро́до (племё), со ёнэ сыс Израилёстыр:60. ґа́да, сыс чхавэ́ Делаияскирэ, чхавэ́ Товияскирэ, чхавэ́ Некодаскирэ, шов шэла́ пандждэша́ дуй;61. и раша́нгирэ чхавэ́ндыр: чхавэ́ Хабаияскирэ, чхавэ́ Гакоцоскирэ, и чхавэ́ Верзелиёскирэ (Барцылаёскирэ), саво́ лыя́ ромня́ пэ́скэ Верзелиёскирэ чхае́ндыр, кон сыс Галаадостыр и кадасаво́ лэ́скиро лав яця́.62. Ёнэ родынэ лэ́нгирэ-родэнгиро зачхиныбэн дро списко, нэ ёнэ на латхнэ́ нисо́; палдава́ лэн сыр мешындлэн пир ро́до, отчхудэ дрэ риг раша́нгирэ бутя́тыр.63. И о Тиршафа, барыдыро Персиякиро, пхэндя́ лэ́нгэ, соб (кай) ёнэ тэ на хан най свэ́нта яныбэна́ хабнастыр анги́л дова́, сыр тэ явэ́л раша́й Уримоса и Тумимоса (тэ мангэ́лпэ Дэвлэ́скэ пал лэ́ндэ).64. Сарэ́ манушэ́н скэдыяпэ тэ рисён плено́стыр, сыс штардэша́ бара́ трин шэла́ шовдэша́ мануша́,65. апри́ч лэ́нгирэ писхарье́ндэ и штубакирэ дынарицэндэ, савэ́н сыс эфта́ тысёнцы (бара́) трин шэла́ трия́нда мануша́. Лэ́ндэ сыс адя́кэ-паць дуйшэла́ багаипнытка мурша́ и багаипнытка джувля́.66. Лэ́ндэ сыс эфта́ шэла́ трияндашов грая; лэ́ндэ сыс дуй шэла́ штардэша́ пандж лошаки (мулы);67. лэ́ндэ сыс штар шэла́ трия́нда пандж верблюды (дромадара); шов тысёнцы (бара́) эфта́ шэла́ биш ослы (мега́рья).68. Вари-савэ́ э шэралэ́ стрэчэнгирэ (пэ поколении), ке́ли ёнэ явнэ́ кэ Кхэр (Кхангири́) Ра́скирэ-Дэвлэ́скиро, со исын дро Ерусалимо, яндлэ́ да́ры сарэ́ илэ́стыр ваш Кхэр (Кхангири́) Дэвлэ́скиро, соб (кай) тэ чхувэ́н палэ лэс пэ лэ́скиро штэ́то;69. ёнэ дынэ́ дава́ пир лэ́нгиро маёнко дрэ пиралы́ ваш буты́ тэ кэрэ́н: шовдэша́ екх бар сувнакунэ́ драхмы, пандж бара́ рупувэ́ мины, и екх шэл рашаитка и́ди.70. И э рашая́, и э Леви́ты, и вари-савэ́ яви́р мануша́, и багаибнаскирэ, и стрэгарья пэ вудара́, и Нефенеи, лынэ́ тэ дживэ́н дрэ лэ́нгирэ фо́рья, и саро́ Израилё дрэ пэ́скирэ фо́рья.Psalms 86:6-106. Причху́в кан, о Раё Дэ́вла, сыр мэ мангавапэ Ту́кэ, пришунпэ кэ мангипэ́н, сыр мануша́ прикхарэна Тут.7. Мэ ява́ва тэ прикхарав Тут дро дывэ́с, сыр исын пхаро́ ма́нгэ, пал-дова́ со Ту отпхэнэса ма́нгэ.8. Нанэ ние́кх дасаво машки́р дэвлорэндэ, сыр Ту сан, Раё Дэ́вла, ние́кх на кэрэ́ла дасавэ́ бутя́, сыр Ту.9. Сарэ́ на́цыи, савэ́ Ту создыян, явэ́на и дэ́на паты́в Ту́кэ. О, Раё Дэ́вла, ёнэ дэ́на сла́ва Тырэ́ лавэ́скэ.10. Пал-дова́ со Ту сан баро́ кэ вучипэ́н и кэрэ́са барэ́ ди́вна бутя́: Ту сан фэ́ни (то́ка) Екх Дэвэ́л.Proverbs 21:15-1615. Дава́ исын ра́дыма ваш чачунэ́ манушэ́скэ тэ кэрэ́л пир чачипэ́н, нэ хасякирибэн ваш фуе́ манушэ́скэ.16. Кон джа́ла дрэ риг чачунэ́ дромэ́стыр, кодова́ явэ́ла тэ откхинёл мулэнца пэ скэдыибэ́н.Skutki 21:18-4018. Пэ яви́р дывэ́с амэ Павлиса явдя́м кэ Яково, одо́й скэдынэ́пэ сарэ́ кхангирьенгирэ годэпхурэ́.19. Пал дава́, сыр Па́вли дыя́ “добридим” лэ́нгэ, ёв лыя́ тэ роспхэнэл саро́ пал дова́, со Дэвэ́л кэрдя́ машки́р Наюдэ́ндэ пир лэ́скиро дынарибэ́н.20. Ке́ли ёнэ вышундлэ лэс, ёнэ прославиндлэ Дэвлэ́с, нэ коригэды́р (позжэ) ёнэ пхэндлэ́ Павлискэ: “Ту дыкхэ́са, пша́ла, со бут тысёнцы Юды лынэ́ тэ патя́н, и сарэ́ ёнэ шылалэс ракхэна Мойза́скиро Зако́но;21. лэ́нгэ роспхэндлэ́ пал дова́, со ту сыклякирэса сарэ́н Юдэ́н, савэ́ дживэ́на машки́р Наюдэ́ндэ, тэ отджан Мойза́скирэ Законо́стыр, соб (кай) ёнэ буты́р тэ на обчхинэн пэ́скирэ чхаворэ́н и тэ на дживэ́н пир амаро́ сыкляибэн.22. Со амэ́нгэ тэ кэра́с? Дава́ трэй тэ джинэ́с, со кэдэнапэ бут мануша́, сыр шунэ́на пал дова́, со ту явдя́н.23. Палдава́, кэр дова́, со амэ ту́кэ пхэна́са: исын амэ́ндэ штар мануша́, савэ́ндыр исын пэ пэ́стэ совла́х;24. лэ лэн, и прилэ́ кхэтанэ́ лэ́нца жужакирибэн и заплэскир пал лэ́ндэ, соб (кай) ёнэ тэ обмуравэн пэ́скэ шэро́, тэды сарэ́ уджинэна, со саро́, со ракирдэ́ пал ту́тэ, на чачипэ́н, и со ту кокоро́ дживэса пир Зако́но.25. А пал дэвлытконэ́ Наюдэ́ндэ амэ лэ́нгэ чхиндям, со лэ́нгэ сыс нашты́ тэ на хан дова́ хабэ́н, саво́ янэ́на сыр свэ́нто дыибэ́н идолэ́нгэ, и рат, адя́кэ-паць и мас мурдалэ́ндыр, саво́ исын затасадо и тэ на кэрэ́н биладжаипэ́н.”26. Тэды Па́вли лыя́ одолэ́н манушэ́н и кхэтанэ́ лэ́нца прилыя́ жужакирибэн, нэ пэ яви́р дывэ́с ёв загия́ дрэ Кхангири́ и пхэндя́, ке́ли проджа́на (накхэ́на) жужакирибнаскирэ дывэса́ и пал кажнонэ́стэ лэ́ндыр явэ́ла яндло свэ́нто дыибэ́н.27. Ке́ли далэ́ эфта́ дывэса́ кончындлэпэ, Юды Асиятыр дыкхнэ́ лэс дрэ Кхангири́, и ґаздынэ́ манушэ́н и ухтылдэ́ лэс,28. и лынэ́ тэ дэн го́дла: “Израилёскирэ Мурша́лэ! Дэн васт! Дава́ исын кадава́ ману́ш, саво́ сарэ́н и пир саро́ свэ́то сыклякирэ́ла проти амарэ́ манушэ́ндэ, проти Зако́но, и проти дава́ штэ́то; апри́ч саро́ ёв и Грекэ́н (Баламэ́н) яндя́ дрэ Кхангири́ и магирдя дава́ свэ́нто штэ́то.”29. Пал-дова́ со ёнэ англэды́р дыкхнэ́ Трафимос Ефесянинос кхэтанэ́ Павлиса дрэ фо́ро: ёнэ думиндлэ, со Па́вли яндя́ лэс дрэ Кхангири́.30. Дрэ фо́ро ґаздыя́пэ бизладо и скэдынэ́пэ бут мануша́; и ёнэ ухтылдэ́ Павли́с, тырдынэ яври́ Кхангирья́тыр, и дрэ дова́-паць часо чхакирдэ вудара́.31. Ёнэ камлэ́ тэ замарэ́н лэс, ке́ли халадэ́нгирэ – тысёнцэнгирэ барыдырэ́скэ пиридынэ зан (звесь) пал дова́, со пир саро́ фо́ро мануша́ кэрэ́на бизладо.32. Ёв дро дова́-паць часо, лыя́ халадэнгирэн барыдырэ́н и халадэ́н и гия́ пэ лэ́ндэ. Ке́ли ёнэ дыкхнэ́ тысёнцэнгирэ барыдырэ́с и халадэ́н, то пириячнэ тэ марэ́н Павли́с.33. Тэды барыдыро́ подги́я, закэдыя лэс и припхэндя́ тэ пхандэн лэс дуе зандирьенца, ёв пхуця́ манушэ́ндыр, кон ёв сыс и со ёв кэрдя́?34. Мануша́, кон пэ́скэ дынэ́ го́дла, и адя́кэ, сыр пир дасави́ го́дла, ёв нисо́ на могиндя́ тэ уджинэл, припхэндя́ тэ лыджа́н лэс дрэ казарма.35. Ке́ли ёв сыс пэ ΄гэруня (ступеньки), халадэнгэ приявдяпэ тэ лыджа́н Павли́с, мануша́ на дэ́нас лэ́нгэ тэ проджан.36. Пал-дова́ со бут мануша́ гинэ́ пала́л, и дынэ́ го́дла: “Мэрибэ́н лэ́скэ!”37. Анги́л дова́, сыр тэ заджа́л дрэ тва́рдыма (диз), Па́вли ракирэ́ла тысёнцэнгирэ барыдырэ́скэ: “Ци сашты́ (можна) ма́нгэ тэ пхэна́в вари-со ту́кэ?” И одова́ пхэндя́: “Ту джинэ́са Греки́тко (Балами́тко) чиб?”38. Адя́кэ, со ту на сан одова́ Египтянино, саво́ наґара газдыя и лыджия́ пэ́са пэ чхучи́ пхув штар тысёнцы розмарибнарьен?”39. Нэ Па́вли отпхэндя́: “Мэ сом Юдо, Тарсянино, ману́ш Киликиякирэ барэ́ форо́стыр; и мэ манга́ва тут тэ дэс во́ля ма́нгэ тэ пхэна́в манушэ́нгэ.”40. Ке́ли тысёнцэнгиро барыдыро́ дыя́ во́ля лэ́скэ тэ ракирэ́л, Па́вли тэрдия́ пэ стылба (лесвица), сыкадя́ вастэ́са манушэ́нгэ, соб (кай) ёнэ тэ шунэ́н; и, ке́ли сарэ́ ячнэ́ штыл, ёв лыя́ лэ́нгэ тэ ракирэ́л пэ Юды́тко чиб, ракири́: Romani Bible Baltic 2019 Maintained by the United Bible Societies for the Baltic Romani Mission