Bible in one year July 22Ezra 5:1-171. Тэ́ньци проро́ко Аге́ё (Хагаё), и проро́ко Заха́рия, чхаво́ Идоскиро, ракирдэ́ Юдэ́нгэ, со явэ́ла анги́л Дэвлэ́скирэ Израилёскирэ лавэ́стыр, Саво́ сыс пэ лэ́ндэ.2. И о Зоровавелё, чхаво́ Шалтилоскиро, и Ёхошуа́ (Ису́со), чхаво́ Ёзадакоскиро, гинэ́ и лынэ́ тэ кэрэ́н буты́ пэ Кхэр (Кхангири́) Дэвлэ́скиро, саво́ исын дро Ерусалимо, и сыс лэ́нца проро́ки Дэвлэ́скирэ, савэ́ помогинэнас лэ́нгэ.3. Дро до са́мо цы́ро (часо) явнэ́ Фафнае [Татэнаё-ю.о.], тхэмэскиро барыдыро́ пэ доя́ риг округакири и Шэфар-Бознаё, и лэ́нгирэ мала́ пир буты́, и пхучнэпэ лэ́ндыр: “Кон припхэндя́ тумэ́нгэ тэ кэрэ́н Кхэр (Кхангири́), и тэ докончынэн далэ́ ва́нты?”4. Тэды, сыр трэй, амэ пхэндям [пхуцям-ю.о.] манушэ́нгирэ лава́, савэ́ кэрэ́нас буты́ пэ кхэр.5. Нэ якха́ Дэвлэ́скирэ сыс пэ Юдэ́нгирэ пхурыдырэндэ, и Персиякирэ рая на зачхудэ лэн тэ тэрдякирэн лэ́нгири буты́ анги́л дова́, сыр рэ́ндо явдя́ кэ Дариё, и тэ́ньчи анги́л дова́, сыр ёнэ дорэснэ́ отпхэныбэ́н лылэса пэ дава́ рэ́ндо6. Акэ, исын лылэскири копия, саво́ бичхадэ́ о Фафнаё, тхэмэскиро барыдыро́ пэ доя́ риг округакири (пашы́л Рэка Евфрато), и о Шэфар-Бознаё, и лэ́нгирэ мала́ пир буты́, крали́скэ Дариёскэ.7. Ёнэ бичхадэ́ дава́ допхэныбнытко лыл лэ́скэ, дро дава́ лыл ёнэ чхиндлэ́ адя́кэ:8. “Тэ явэ́л рама́нё (миро) Крали́скэ Дариёскэ дро саро́! Тэ явэ́л джиндло́ Крали́скэ, со амэ гиям дрэ округа Юдэ́я, кэ Кхэр (Кхангири́), Барэ́ Дэвлэ́скиро, саво́ обкэрэлапэ пхарэ́ барэ́нца, и каштуно матеряло чхувэ́лапэ дрэ ва́нты, и дая́ буты́ кэрэ́лапэ кучэс, и джа́ла кэ миштыпэ́н дрэ лэ́нгирэ васта́.9. Тэ́ньци амэ пхутямпэ кодолэ́ пхурыдырэндыр, и амэ адя́кэ пхэндям лэ́нгэ: “Кон припхэндя́ тумэ́нгэ тэ кэрэ́н дава́ Кхэр (Кхангири́) и тэ докончынэн далэ́ ва́нты?”10. Амэ адя́кэ-паць пхуцямпэ лэ́ндыр пал лэ́нгирэ лава́, соб (кай) амэ́нгэ тэ зачхинас лава́ манушэ́нгирэ, савэ́ сыс барыдыра́ пэ лэ́ндэ.11. Акэ, со ёнэ пхэндлэ́ дро отпхэныбэ́н: “Амэ сам писха́рья Дэвлэ́скирэ, Саво́ исын пэ болыбэ́н и пэ пхув, и амэ кэра́са нэвэ́с кхэр, саво́ чхудэ́ бут бэрша́ палэ, саво́ чхудя́ баро́ кра́ли Израилёскиро и ёв докончындя лэс.12. Нэ пало́ дова́, сыр амарэ́ дада́ холякирдэ Дэвлэ́с болыбнаскирэс, Ёв выдыя лэн дро Навуходоносороскиро васт, саво́ сыс кра́ли Вавилоно́скиро, кон розмардя́ пэ котэра́ дава́ Кхэр (Кхангири́) и лыджия́ манушэ́н криг кэ Вавило́но.13. Нэ пэ пэ́рво бэрш Кираскиро, крали́скиро Вавилоно́скиро, о кра́ли Кира дыя́ упхэныбэ́н тэ кэрэ́л дава́ Кхэр (Кхангири́) Дэвлэ́скиро.14. И адя́кэ-паць кхорэ́ (сасу́ды) сувнакунэ́ и рупувэ́ кхэрэ́стыр Дэвлэскирэстыр, савэ́ о Навуходоносо́ро лыя́ кхэрэ́стыр Дэвлэскирэстыр, саво́ сыс дро Ерусалимо, и савэ́ ёв яндя́ дро Вавило́но-кодолэ́ сама кхорэ́ о Кра́ли Кира лыя́ кхангирья́тыр дро Вавило́но; и ёнэ сыс дынэ́ екхэ манушэ́скэ пир лав Шэшбацаро, савэ́с кра́ли чхудя́ барыдырэ́са пэ доя́ округа.15. И пхэндя́ кра́ли лэ́скэ: “Лэ кадалэ́ кхорэ́, джа́ и лы́джа лэн дрэ Кхангири́, со исын дро Ерусалимо, и кэрэ́н нэвэ́с Кхэр (Кхангири́) Дэвлэ́скиро пэ лэ́скиро штэ́то.”16. Тэ́ньци одова́ са́мо Шэшбацаро явдя́ и чхудя́ фунда́менто тэл Кхэр (Кхангири́) Дэвлэ́скиро, саво́ исын дро Ерусалимо; и долэ́ поратыр кэ акана́ кэрэ́на Кхэр (Кхангири́) Дэвлэ́скиро, и ёв нанэ ишчо (инкэ́) докончындло.”17. И акана́ палдава́, ко́ли дава́ тэ явэ́л мишто́ ваш крали́скэ, мэк тэ родэ́н дрэ пиралы́, сави́ исын дро крали́скиро кхэр, одо́й дро Вавило́но, ци дава́ исын чачо́, со о кра́ли Кира припхэндя́ тэ кэрэ́н дава́ Кхэр (Кхангири́) Дэвлэ́скиро кэ Ерусалимо, и, ко́ли тэ явэ́л лачхо́ крали́скэ, тэ бичхавэл Лэ́скиро лав амэ́нгэ пал дава́ рэ́ндо.Ezra 6:1-221. Тэ́ньци о кра́ли Дариё дыя́ припхэныбэ́н и обродынэ кхэр, дро саво́ ракхнэ архивна свитки, кай сыс чхудэ́ кучипэна кэ Вавило́но.2. И дро Актабано, пэ штэ́то, саво́ сыс дрэ Мидиякири округа, латхнэ́ дасаво зачхиныбэн дро сви́тко:3. “Пэ пэ́рво бэрш, сыр о Кира яця́ крали́са, ёв дыя́ припхэныбэ́н пал Кхэр (Кхангири́) Дэвлэ́скиро кэ Ерусалимо: “Мэк тэ кэрэ́н Кхэр (Кхангири́) Дэвлэ́скиро пэ штэ́то, кэ саво́ ёнэ янэ́на свэ́нта дыибэна́; и мэк лачхэ́ фундаменты тэ чхувэ́н пир кадасавэ́ барипэна: лэ́скиро вучипэ́н тэ явэ́л шовдэша́ куня́, и лэ́скиро буґлыпэ́н тэ явэ́л шовдэша́ куня́;4. тэ явэ́н трин ряды барэ́ барэндыр, и екх рядо каштунэ матер΄ялостыр, соб (кай) тэ плэскирэн пал дава́ крали́скирэ кхэрэ́стыр.5. И адя́кэ-паць сувнакунэ́ и рупувэ́ кхорэ́ Кхэрэ́стыр Дэвлэскирэстыр, савэ́ о Навуходоносо́ро лыя́ Кхэрэ́стыр и яндя́ кэ Вавило́но, соб (кай) тэ отдэ́н палэ и тэ янэ́н палэ дро кхэр, саво́ исын кэ Ерусалимо, пэ лэ́нгиро штэ́то и, соб (кай) тэ чхувэ́н палэ лэн дро Кхэр (Кхангири́) Дэвлэ́скиро.6. Акана́, палдава́, Фафнаё (Фафнаё), тхэмэскиро барыдыро́ пэ округа пал Рэка, и Шэфар-Бознаё, и тумарэ́ дромэскирэ мала́ Пе́рсы, савэ́ исын палэ Рэка, рикирэнпэ дура́л одотхы́р.7. Мэк буты́ пэ Кхэр (Кхангири́) Дэвлэ́скиро тэ кэрэ́лпэ дурэды́р; мэк Юдэ́нгирэ-тхэмэскиро шэрало́ и Юдэ́нгирэ пхурыдыра́ тэ чхувэ́н дава́ Кхэр (Кхангири́) Дэвлэ́скиро пэ лэ́скиро штэ́то.8. И мэ адя́кэ-паць дава́ припхэныбэ́н пал дова́, со тумэ́нгэ трэй тэ кэрэ́н ваш Юдэ́нгирэ пхурыдырэнгэ пэ Кхэр (Кхангири́) Дэвлэ́скиро: мэк тэ плэскирэн пал дая́ буты́ крали́скирэ бажынятыр, сави́ скэдэлапэ манушэ́ндыр дрэ провинцыя палэ Рэка, дава́ екха́тыр трэй тэ дэн кодолэ́ манушэ́нгэ, соб (кай) тэ на тэрдёл дая́ буты́.9. И соб (кай) тэ дэн ада́кицы, кицы́ трэй – тэрнэ́ гуруворэ́н, бакрэ́н и бакрорэ́н тэ янэ́н цэ́ла хачкирибна Дэвлэ́скэ болыбнаскирэскэ, и гивны (парно́ гив), и лонд, и мол (вино). Маслинитко дзэт, сыр пхэнэ́на рашая́, савэ́ исын дро Ерусалимо, соб (кай) тэ дэн лэ́нгэ со дывэ́с би зарикирибнаскиро,10. соб (кай) ёнэ могиндлэ́ тэ янэ́н гудлэ́-кхандыпнаскирэ свэ́нта дыибэна́ Дэвлэ́скэ болыбнаскирэскэ, и соб (кай) ёнэ тэ мангэ́нпэ Дэвлэ́скэ пал крали́скиро састыпэн и лэ́скирэ-чхавэ́нгиро.11. Мэ адя́кэ-паць припхэндём, со, ко́ли вари-кон парувэла миро чхиндло́ припхэныбэ́н, мэк тэ вытырдэн бэрно лэ́скирэ кхэрэ́стыр, и тэ чхувэ́н лэс упрэ́, и мэк тэ кэрэ́н далэ́ кхэрэ́стыр груда пхагирдэ́-котэрэнгири.12. И мэк Дэвэ́л, Саво́ кэрдя́ адя́кэ, соб (кай) Лэ́скиро Лав тэ ячэ́лпэ одо́й, тэ равэл тэлэ́ кажнонэ́ крали́с ци манушэ́н, ко́ли вари-кон лэ́ндыр тэ ґаздэл анги́л васт тэ парувэл ци тэ пхагирэл дая́ Кхангири́, сави́ исын дро Ерусалимо. Мэ, Дариё, дыём дава́ припхэныбнытко стату́то, тэ кэрэ́н добусо́вэс (кучэс) саро́ пир лэ́стэ”.”13. Тэ́ньци о Фафэнаё, тхэмэскиро барыдыро́, пир округа, со сыс палэ рэка (лэнь), о Шэфар-Бознаё, и лэ́нгирэ мала́ добусовэс кэрдэ́ саро́ пир дова́, со бичхадя́ тэ кэрэ́н кра́ли Дариё.14. Адя́кэ кэрдэ́ буты́ пхурыдыра́ Юдэ́нгирэ, и лэ́нгэ удэласпэ кэ миштыпэ́н пир Агеёскиро ангилпхэныбэ́н, кон сыс проро́ко, и сыр ангилпхэнэлас о Заха́рия, чхаво́ Идоскиро. И ёнэ кэрдэ́ буты́ и кончындлэ ла, сыр и припхэндя́ Дэвэ́л Израилёскиро, и сыр припхэндлэ Кира, Дариё, Артаксерксо-кра́лья Персиякирэ.15. И акэ, Кхэр (Кхангири́) сыс докэрдо пэ три́то дывэ́с дро чхон Адаро, саво́ сыс дро шо́вто бэрш, сыр лыя́ тэ кралинэ́л кра́ли Дариё.16. И чхавэ́ Израилёскирэ, рашая́ и Леви́ты, и сарэ́ яви́р мануша́, кон рисия́ плено́стыр, свэнкиндлэ радыма́са, со сыс обсвэнцындло Кхэр (Кхангири́) Дэвлэ́скиро.17. И яндлэ́ ёнэ свэ́нта дыибэна́, ке́ли свэнцынэнас Кхэр (Кхангири́) Дэвлэ́скиро шэл гурува, дуйшэла́ бакрэ́ штаршэла́ бакрорэ, дэшуду́й бузнэ (козлы), сыр свэ́нто дыибэ́н пал Израилё пир дова́, со исын дэшуду́й ро́дыцы Израилёскирэ.18. И ёнэ чхудэ́ раша́н пир лэ́нгирэ-бутякирэ штэ́ты и Левитэ́н пир бутя́ дрэ лэ́нгирэ групы тэ кэрэ́н буты́ ваш Дэвлэ́скэ дро Ерусалимо, сыр чхиндло́ дрэ Мойзаскири лылвари́.19. И свэнкиндлэ Патради́ чхавэ́ Юдэ́нгирэ, кон сыс дро пле́но, пэ дэшуштарто дывэ́с дро пэ́рво чхон.20. Пал-дова́ со э рашая́ и Леви́ты жужакирдэ́ (чыстиндлэ) пэс со кэ е́кх ману́ш: ёнэ сарэ́ сыс жужэ́. И ёнэ замардэ́ Патрадитконэ бакрорэ́н пал манушэ́нгирэ чхавэ́ндэ, савэ́ сыс дро пле́но, пал лэ́нгирэ пшалэ́ндэ, пал рашандэ, и пал пэ́стэ.21. И ханэ́ чхавэ́ Израилёскирэ, савэ́ рисинэ́ плено́стыр, кхэтанэ́ сарэ́ одолэнца, кон дурия ваш пэ́скэ магирибнастыр, саво́ гия́ Наюдытконэ́ нацые́ндыр пэ пхув, соб (кай) тэ родэ́н древа́н Рас-Дэвлэ́с, Дэвлэ́с Израилёскирэс.22. И ёнэ кэрдэ́ опреснокэнгиро Свэ́нко пэ эфта́ дывэса́ радыма́са, пал-дова́ со Рай Дэвэ́л обрадындя лэн, и Ёв рискирдя́ ило́ крали́скиро Асириятыр кэ ёнэ, тэ зоралякирэн лэ́нгирэ васта́ дрэ буты́ пэ Кхэр (Кхангири́) Дэвлэ́скиро, Дэвлэ́скирэ Израилёскиро.Psalms 87:1-71. Кареёскиро Чхавэ́нгиро. Пса́лмо. Гилы́. Рай Дэвэ́л зачхудя Пэ́скиро фо́ро пэ свэ́нта бэ́рги.2. Ра́скэ-Дэвлэ́скэ исын дро́го Ерусалимо́скири по́рта (врата) буты́р сарэ́ Яково́скирэ шатрэндыр.3. Славутка лава́ кэ баро́ шарибэ́н пхэнэ́на пал ту́тэ, Дэвлэ́скиро фо́ро. Сэ́ла.4. Мэ ява́ва тэ рипирав Еги́пто и Вавило́но одолэ́нгэ, савэ́ джинэ́на Ман: Ѓа́да, Филистия и Ти́ро Ефиопияса пхэнэ́на-кадава́ ману́ш бия́ндыя одо́й.5. И ёнэ явэ́на тэ ракирэ́н пал Сио́но: “Кадава́ ману́ш бия́ндыя одо́й и Най Вучэдырэскиро зачхудя дава́ фо́ро.”6. Рай Дэвэ́л чхувэ́ла нанглоро́ (заковычка) маму́й лава́ далэ́ манушэ́нгирэ, ке́ли Ёв явэ́ла тэ пиригинэл далэ́ манушэ́н: “Кадава́ ману́ш бия́ндыя ада́й.” Сэ́ла.7. И башаибнаскирэ и багаибнаскирэ пхэнэ́на: “Саро́ лачхипэ́н джа́ла ту́тыр, Сио́но.”Proverbs 21:19-2019. Фэды́р тэ джива́с пэ чхучи́ пхув, сыр холямэ́ джувля́са, сави́ чингардэлапэ.20. Кай дживэ́ла годо́ ману́ш, одо́й исын кучипэ́н и оливи́тко дзэт, нэ дылыно́ розмэкэла лэн.Skutki 23:1-151. Па́вли дыкхця маму́й пэ манушэ́ндэ, савэ́ кэдынэпэ, и пхэндя́: “Мурша́лэ, пшала́лэ, дадолэ! Мэ лачхэ́ и чачунэ́ илэ́са дживдём пэ́скиро джиибэ́н анги́л Дэвлэ́стэ кэ/жы́ко ададывэсатуно дывэ́с.”2. Нэ раша́нгиро барыдыро́ Анания припхэндя́ манушэ́нгэ, савэ́ сыс тэрдэ́ пашы́л Павлистэ тэ марэ́н лэс пир ушта́.3. Тэды Па́вли пхэндя́ лэ́скэ: “Дэвэ́л явэ́ла тэ марэл тут, ва́нта подмакны ту сан! И бэшто́ ту сан одо́й, ваш дова́, соб (кай) тэ сэндякирэс ман пир Зако́но, а кокоро́ ту кэрэ́са на пир Зако́но, ко́ли припхэнэса тэ марэ́н ман?”4. Одолэ́, кон сыс тэрдо́ пашы́л Павлистэ, пхэндлэ́ лэ́скэ: “Ту кошэса Дэвлэ́скирэ-раша́нгирэ барыдырэ́с.”5. И Па́вли отпхэндя́: “Мэ на джиндём, пшала́лэ, со ёв исын раша́нгиро барыдыро́, пал-дова́ со дро Свэ́нто Чхиныбэ́н ракирэлапэ: ‘На кош манушэ́нгирэ барыдырэ́с.’”6. Нэ Па́вли джиндя́, со екх паш лэ́ндыр сыс Садукеи, а яви́р паш Фарисе́и, палдава́ ёв лыя́ зоралэ́с тэ ракирэ́л Синедрионоскэ (сэндоскирэ скэдыибнаскэ): “Пшала́лэ мирэ́! Мэ сом Фарисеё, чхаво́ Фарисеёскиро; и сэндинэна ман пал миро лачхо́ ужакирибэ́н дро отджидыибэн мулэ́ндыр.”7. Ке́ли ёв пхэндя́ дава́, машки́р Фарисеендэ и Садукеендэ выгия́ кошыбэ́н, и мануша́ Скэдыибнастыр розгинэпэ пэ дуй рига́.8. Пал-дова́ со Садукеи ракирэ́на, со нанэ отджидыибэн мулэ́ндыр, ни Янголэн, ни ду́хо (фа́но); а Фарисе́и патя́на дрэ саро́ дава́.9. И ґаздыя́пэ бари го́дла, и уштынэ́ лылвари́тка Фарисее́нгирэ рига́тыр и лынэ́ тэ ракирэ́н: “Амэ нисаво́ чорипэ́н на латхям дрэ адалэ́ манушэ́стэ; ко́ли ду́хо (фа́но) ци Янго́ло ракирдя́ лэ́скэ?”10. Нэ адя́кэ, сыр кошыбэ́н яця́ барэды́р, тэды тысёнцэнгиро барыдыро́ страхадыя, соб (кай) ёнэ тэ на роскушэн Павли́с, и припхэндя́ халадэнгэ тэ джа́н и тэ лэн лэс одотхы́р зорья́са и тэ отлыджан дро штарибэ́н.11. Дрэ яви́р рат кэ ёв явдя́ Рай Дэвэ́л и пхэндя́: “Яв муршкано́; пал-дова́ со сыр ту са́нас Миро якхи́тко дро Ерусалимо, адя́кэ-паць ту явэ́са якхи́тко и дро Римо.”12. Ке́ли яця́ дывэ́с, Юды зракирдэпэ машкира́л пэ́стэ и дынэ́ совла́х, тэ на хан и тэ на пьен, пака ёнэ замарэна Павли́с.13. Дро дава́ зракирибэ́н сыс буты́р, сыр штардэша́ мануша́;14. и ёнэ явнэ́ кэ раша́нгирэ барыдыра́ и кэ годэпхурэ́ и пхэндлэ́: “Амэ дыям пэ́скэ совла́х тэ на хас нисо́, пака амэ замараса Павли́с.15. Тумэ́ и сэндоскиро скэдыибэ́н мангэ́н тысёнцэнгиро барыдырэ́с, соб (кай) тэ янэ́н лэс кэ тумэ́, сы́рбы ваш дова́, соб (кай) фэдэды́р тэ роздыкхэс лэ́скиро рэ́ндо, а мэ ява́са тэ тэрдёвас пэ стрэ́га и да́са муло́ (мулякираса) лэс англэды́р, сыр ёв доджа́ла адари́к.” Romani Bible Baltic 2019 Maintained by the United Bible Societies for the Baltic Romani Mission