Bible in one year July 23Ezra 7:1-281. Акана́, пало́ (после) вари-кицы́ бэрша́, сыр дава́ кэрдя́пэ, ке́ли кралиндя Артаксе́рксо, кра́ли Персиякиро, о Е́здра, чхаво́ Сэраияскиро, чхаво́ Азарияскиро, чхаво́ Хелкиякиро,2. чхаво́ Шалумоскиро, чхаво́ Садокоскиро, чхаво́ Ахитувоскиро,3. чхаво́ Амарияскиро, чхаво́ Азарияскиро, чхаво́ Мараёфоскиро,4. чхаво́ Захарияскиро, чхаво́ Узияскиро, чхаво́ Букиёскиро,5. чхаво́ Абишуёскиро, чхаво́ Финехасоскиро, чхаво́ Елизароскиро, чхаво́ Ароноскиро, кон сыс барыдыр раша́й6. дова́ са́мо Е́здра гия́ Вавилоно́стыр. Ёв сыс сыклякирдо сыр лылвари́тко пир Мойза́скиро Зако́но, саво́ Рай Дэвэ́л Израилёскиро дыя́. О кра́ли дыя́ саро́ лэ́скэ, со ёв мангдя́, пир дова́, со Ра́скирэ-Дэвлэ́скиро васт сыс пэ лэ́стэ.7. И гинэ́ лэ́са вари-савэ́ чхавэ́ Израилёскирэ, и рашая́, и Леви́ты, и багаибнаскирэ, и стрэгарья паш-вударэнгирэ, и Нефине́и дро Ерусалимо дрэ эфта́то бэрш, сыр кралиндя Артаксе́рксо.8. И о Е́здра явдя́ дро Ерусалимо дро па́нджто чхон, дро эфта́то (битринэ́нгиро дэш) бэрш крали́скиро.9. Пал-дова́ со ёв дыяпэ дро дром Вавилоно́стыр пэ пэ́рво дывэ́с дро па́нджто чхон, и ёв явдя́ дро Ерусалимо пэ пэ́рво дывэ́с пэ пэ́рво чхон, пир дова́ со лачхо́ васт Дэвлэ́скиро сыс пэ лэ́стэ.10. Пал-дова́ со о Е́здра рискирдя́ пэ́скиро ило́ тэ сыклёл Зако́но Дэвлэ́скиро, и тэ рикирэлпэ кэ Зако́но, тэ сыклякирэ́л дро Израилё.11. Дава́ исын копия лылэскири, саво́ дыя́ кра́ли Артаксе́рксо Ездраскэ, раша́скэ, кон сыс лылвари́тко, кон сыклякирдя́ лавэнгэ Ра́скирэ-Дэвлэ́скирэ припхэныбэндыр (запове́дендыр) и лэ́скирэ законэндыр дро Израилё:12. “Артаксерксостыр, саво́ исын кра́ли кралье́ндыр, Ездраскэ раша́скэ, саво́ исын лылвари́тко пир Зако́но Дэвлэ́скирэ болыбна́скиро: рама́нё (миро) тумэ́нгэ акана́.13. Мэ припхэнава, соб (кай) сарэ́ одолэ́, савэ́ исын мануша́ Израилёскирэ, и рашая́, и Леви́ты дро миро крали́тко тхэм, кон камэ́ла пир пэ́скири во́ля тэ джал дро Ерусалимо, -мэк ёнэ тэ джа́н ту́са.14. И пал-дова́, со тут бичхавэ́ла кра́ли и лэ́скирэ эфта́ сове́тники (юнкары), соб (кай) тэ роспхучэн пал рэ́нды дрэ Юдэ́я и дро Ерусалимо пир тырэ́ Дэвлэ́скиро Зако́но, сави́ копия исын дро тыро́ васт;15. и соб (кай) тэ янэс руп и сувнака́й, савэ́ о кра́ли и лэ́скирэ юнкары дынэ́ пэ́скирэ илэ́стыр Дэвлэ́скэ Израилёскирэскэ, Савэскиро кхэр исын кэ Ерусалимо;16. и саро́ руп, и сувнака́й, со тумэ́ могинэ́на тэ латхэ́н дрэ округа Вавилоноскири, на гины́ свэ́нта дыибэна́, савэ́ дынэ́ пэ́скирэ илэ́стыр э мануша́, и рашая́, кон янэ́ла пэ́скирэ илэ́стыр ваш Кхэр (Кхангири́) лэ́нгирэ Дэвлэ́скиро кэ Ерусалимо,17. акана́ палдава́ кин сы́гэс пэ далэ́ ловэ́ гурувэ́н, бакрэ́н и бакрорэ́н кхэтанэ́ лэ́нгирэ свэнтонэ́ дыибнаса гивэстыр и лэ́нгирэ тхадунэ свэнтонэ́ дыибнаса, и ян лэн пэ алта́рё дро Кхэр (Кхангири́) тумарэ́ Дэвлэ́скиро кэ Ерусалимо.18. И со явэ́ла лачхэ́с пир тыри́ годы́ и тырэ́-пшалэскири тэ кэрэ́н одолэ́ рупэ́са и сувнака́са, со ячэ́лапэ, кэрэ́н пир во́ля тумарэ́ Дэвлэ́скири.19. И кхорэ́ (сасу́ды), со дынэ́ ту́кэ, соб (кай) лэ́нца тэ дынаринэ́н дро Кхэр (Кхангири́) Дэвлэ́скиро, ян анги́л Дэвлэ́стэ Ерусалимоскирэстэ.20. И дова́ яви́р, со явэ́ла трэй ваш Кхэр (Кхангири́) тырэ́ Дэвлэ́скиро, и со ту янэса пир Пэ́скири годы́, отдэ́/плэскир пиралятыр дро кхэр Крали́скиро.21. И мэ, кра́ли Артаксе́рксо, акана́ дава́ припхэныбэ́н сарэ́ ракхибнаскирэнгэ пэ пиралы́, савэ́ исын палэ рэка (лэнь), со ко́ли Ездраскэ, кон исын раша́й и лылвари́тко пир Зако́но Дэвлэ́скиро, Саво́ исын пэ болыбэ́н, явэ́ла вари-со трэй, соб (кай) тэ дэн лэ́скэ саро́,22. кэ екх шэл тала́нты руп, кэ екх шэл ме́ры парно́ гив кэ екх шэл баты мол (вино), кэ екх шэл баты оливи́тко дзэт, и лонд би меракиро.23. Со тэ на припхэнэл Дэвэ́л болыбна́скиро, соб (кай) тэ кэрэ́н сыр трэй ваш Кхэр (Кхангири́) Дэвлэ́скиро, Саво́ исын пэ болыбэ́н. Ваш одова́, соб (кай) тэ на явэ́л Лэ́скири бари холы́ пэ крали́скири тхэм, и лэ́скирэ чхавэ́ндэ.24. Адя́кэ-паць амэ пхэна́са тумэ́нгэ, со дава́ явэ́ла на пир зако́но тэ зачхувэн тэ плэскирэн намирья, мыто и такса раша́н, Левитэ́н, багаибнаскирэн, стрэгарье́н пашвударэнгирэн, Нефинее́н, ци вари-савэ́ дынарье́н дро Кхэр (Кхангири́) Дэвлэ́скиро.25. И ту, Е́здра, пир годыпэ́н, со Дэвэ́л дыя́ ту́кэ, чхув дрэ зор барыдырэ́н [барэ́ сэндарье́н-ю.о.], сэндарье́н, савэ́ могинэ́нас тэ сэндякирэн пир чачипэ́н сарэ́ манушэ́н, кон исын дрэ округа палэ рэка (лэнь), сарэ́н кадасавэн, кон джинэ́ла зако́ны тумарэ́ Дэвлэ́скирэ, и сыклякирэ́н одолэ́н, савэ́ на джинэ́на лэн.26. Ко́ли вари-кон на явэ́ла тэ кэрэ́л саро́ пир Зако́но тумарэ́ Дэвлэ́скиро, и пир зако́но крали́скиро, мэк тэ сэндякирэн пхарэ́с лэс, ци пэ мэрибэ́н, ци тэ традэ́н лэс яври́ тхэмэстыр (странатыр), ци пэ конфискацыя маёнкоскэ, ци дро штарибэ́н.”27. “Мэк тэ явэ́л бахтякирдо́ Рай Дэвэ́л, Дэвэ́л амарэ́-дадэ́нгиро, Саво́ чхудя́ кадасави дума дро крали́скиро ило́, соб (кай) тэ шукарьякирэн Кхэр (Кхангири́) Ра́скирэ-Дэвлэ́скиро, саво́ исын кэ Ерусалимо;28. И Саво́ рискирдя́ лачхэ́-илы́ткима кэ мэ анги́л крали́стэ и лэ́скирэ советникэндэ (юнкарэндэ), и анги́л зор тхагарье́ндэ крали́скирэ. И мэ, Е́здра, яцём зоралэды́р дро ду́хо (фа́но), адя́кэ сыр васт Ра́скирэ-Дэвлэ́скиро, мирэ́ Дэвлэ́скиро сыс пэ ма́ндэ, и мэ скэдыём сарэ́ Израилёскирэ шэралэ́ муршэ́н, соб (кай) ёнэ тэ джа́н ма́нца.”Ezra 8:1-361. Акэ, и сын шэралэ́ пэ стрэ́чы /лэ́нгирэ-дадэнги́рэ ро́ды (поколении), и, акэ, исын зачхиныбэн пал ро́до дрэ родэнгири матрия (лылвари́ пал ро́до) пал кодолэндэ, кон гия́ ма́нца Вавилоно́стыр, ке́ли кралиндя о кра́ли Артаксе́рксо:2. о Гирсоно [Герша-ю.о.], Финхасоскирэ чхавэ́ндыр; о Дание́лё, Ифамароскирэ чхавэ́ндыр, о Хатушо, Давидо́скирэ чхавэ́ндыр;3. о Заха́рия, Шэханияскирэ, Парошоскирэ чхавэ́ндыр, и лэ́са сыс шэл тэ пандждэша́ мурша́, савэ́ сыс зачхиндлэ́ дрэ родэнгири матрия;4. о Эльегоэнаё, чхаво́ Зэрахияскиро, Пахав-Моавэнгирэ чхавэ́ндыр, и лэ́са сыс дуй шэла́ мурша́;5. о чхаво́ Яхазиилоскиро, Шэха-нияскиро чхавэ́ндыр, и лэ́са сыс трин шэла́ мурша́;6. о Еве́до, чхаво́ Ионафаноскиро, Адиноскирэ чхавэ́ндыр, и лэ́са сыс пандждэша́ мурша́;7. о Иешаия, чхаво́ Афалияскиро, Еламоскирэ чхавэ́ндыр и лэ́са сыс эфтадэша́ мурша́;8. Зэвадея, чхаво́ Михаилоскиро, Шэфатияскирэ чхавэ́ндыр, и лэ́са сыс охтодэша́ мурша́;9. о Овадия, чхаво́ Ехиелёскиро, Иавоскирэ чхавэ́ндыр, и лэ́са сыс дуйшэла́ тэ дэшуохто мурша́;10. о чхаво́ Шэломифоскиро, чхаво́ Ёзафаёскиро, и лэ́са сыс шэл тэ охтодэша́ мурша́;11. о Заха́рия, чхаво́ Беваёскиро, Бебаёскирэ чхавэ́ндыр, и лэ́са сыс бэш тэ охто́ мурша́;12. о Иоханано, чхаво́ Гакатаноскиро, Азгадоскирэ чхавэ́ндыр, и лэ́са сыс шэл тэ дэш мурша́;13. Адоникамоскирэ чхавэ́ндыр – палатунэ́, конэскирэ лава́ исын: о Елифеле́то, о Иеилё, и о Шэмая – и лэ́нца сыс шовдэша́ мурша́;14. Бигваёскирэ, Уфаёскирэ, и Забудоскирэ чхавэ́ндыр, и лэ́нца сыс эфтадэша́ мурша́:15. И мэ, Е́здра, скэдыём лэн кхэтанэ́ пашы́л рэка (лэнь), сави́ тхадэ́ла дрэ Агава; и одо́й амэ росчхудям таборо (лод) пэ трин дывэса́: и мэ обдыкхцём сарэ́ манушэ́н и раша́н, и мэ на латхём ниекхэс Левиёскирэ чхавэ́ндыр.16. Тэ́ньци мэ бичхадём, соб (кай) тэ кхарэ́н Елиэзэрос, Ариэлёс, Шэмаяс, Бинафанос, Яривос, Элнафанос, Нафанос, Захарияс, и Мешуламос, савэ́ сыс шэралэ́ мануша́; и тэ кхарэ́н Иоярифос, и Элнафанос, савэ́ сыс барэ́-годякирэ мануша́.17. И мэ бичхадём лэн мирэ́ лавэ́са кэ Идо, саво́ сыс шэрало́ пир штэ́то Касифия, и мэ пхэндём лэ́нгэ, со тэ пхэнэ́н Идоскэ, и лэ́скирэ пшалэ́нгэ Нефинее́нгэ пэ штэ́то Касифия, соб (кай) ёнэ тэ янэ́н помогибнаскирэн рашаскирэн тэ дынаринэ́н дро Кхэр (Кхангири́), амаро́ Дэвлэ́скиро.18. Адя́кэ, сыр амарэ́-Дэвлэ́скиро лачхо́ васт сыс пэ амэ́ндэ, то ёнэ яндлэ́ амэ́нгэ барэ́ – годякирэ манушэ́с Махлияскирэ чхавэ́ндыр, чхавэ́с Левияскирэс, чхавэ́с Израилёскирэс пир лав Шэре́вия; и лэ́скирэ чхавэ́нца, и лэ́скирэ пшалэ́нца, дэшуохто мануша́;19. и Хашавияс, и лэ́са Иешаияс, Мэрарискирэ чхавэ́ндыр, лэ́скирэ пшалэ́н и лэ́скирэ чхавэ́н, биш мануша́;20. и адя́кэ-паць Нефинее́ндыр, конэ́с о Дави́до и шэралэ́ чхудэ́ дрэ зор тэ дынаринэ́н (тэ служынэн) Левитэ́нгэ, дуй шэла́ тэ биш Нефине́и: кажно ману́ш лэ́ндыр сыс выкхардо пир лав.21. И пхэндём мэ зоралэ́с анги́л манушэ́ндэ, соб (кай) тэ постинас пашы́л рэка (лэнь) Агава, соб (кай) тэ тыкнякирас пэс дрэ амарэ́ илэ анги́л амарэ́ Дэвлэ́стэ, тэ вымангас Лэ́стыр бахтало́ дром амэ́нгэ и амарэ́ тыкнэнгэ, и ваш саро́ амаро́ миштыпэ́н.22. Пал-дова́ со мэ ладжандыём тэ мангав крали́стыр стрэ́га халадэндыр и уклистэнгирэ рулдэ́ндыр тэ ракхэ́н амэн дромэ́са проти вэргэ́ндэ, пал-дова́ со амэ пхэндям крали́скэ, ракири́: “Амарэ́-Дэвлэ́скиро васт исын ваш лачхипэ́н сарэнгиро, кон родэ́ла Лэс, нэ Лэ́скири зор и Лэ́скиро мижэхипэн пэрэ́на пэ одолэ́ндэ, савэ́ мэкэ́на Лэс.”23. И амэ постиндям и амэ мангдям Лэс, и Ёв отпхэндя́ пэ амаро́ мангипэ́н.24. И мэ выкэдыём дэшудуен барыдырэ́н пэ рашандэ Шэревияс, и Хашавияс, и дэш пшалэ́н лэнгирэн –25. и мэ убладём (отважындём) лэ́нгэ руп, сувнака́й, и хор кхорэ́ (сасу́ды), свэ́нта дыибэна́ ваш Кхэр (Кхангири́) Дэвлэ́скиро, со яндлэ́ кра́ли, и лэ́скирэ юнкары (советники), и лэ́скирэ тхага́рья (кня́зи), и сарэ́ мануша́ Израилёстыр, кон сыс.26. И мэ убладём дрэ лэ́нгирэ васта́ шов шэла́ тэ пандждэша́ тала́нты руп, рупувэ́ кхорэ́ (сасу́ды), савэ́ важындлэ шэл тала́нты, е́кх таланто сувнака́й,27. биш сувнакунэ́ хор тахтая́ (чашы), со сыс мол екх бар драхмы, дуй кхорэ́ шукаронэ харкома́тыр, сави́ хачолас, и сыс дро́го сыр сувнака́й.28. И мэ пхэндём лэ́нгэ: “Тумэ́ сан высвэнцындлэ Ра́скэ-Дэвлэ́скэ; и кхорэ́ адя́кэ-паць исын обсвэнцындлэ; и руп и сувнака́й, со яндлэ́ илэ́стыр Ра́скэ-Дэвлэ́скэ, Дэвлэ́скэ тумарэ́ дадэнгирэскэ.29. Дыкхэ́н цямкэс (дуе якхэ́нца) и ракхэ́н лэн анги́л дова́, сыр тумэ́ ублавэна (отважынэна) лэн анги́л шэралэндэ рашангирэндэ, Левитэндэ, и анги́л шэралэндэ пэ стрэ́чы /тумарэ́-дадэнги́рэ ро́ды (поколении) Израилёстыр дро Ерусалимо, дрэ пиралы́тка комо́ры дро Кхэр (Кхангири́) Ра́скирэ-Дэвлэ́скиро.”30. И рашая́ и Леви́ты дорэснэ́ руп, сувнака́й, и кхорэ́ пир ублаибэн, соб (кай) тэ янэ́н лэн кэ Ерусалимо дрэ амарэ́ Дэвлэ́скиро Кхэр (Кхангири́).31. Тэ́ньци амэ дыямпэ дро дром рэка́тыр (лэня́тыр) Агаватыр пэ дэшудуйто дывэ́с дро пэ́рво чхон, тэ джас пэ Ерусалимо. И сыс васт Дэвлэ́скиро пэ амэ́ндэ, и Ёв зракхэлас амэн вэргоскирэ вастэ́стыр, и кадасавэ́ манушэ́ндыр, савэ́ подракхэнас тэ замарэ́н пэ дром.32. И амэ явдя́м дро Ерусалимо и яцямпэ одо́й трин дывэса́.33. И пэ шта́рто дывэ́с руп, сувнака́й, и кхорэ́ (сасу́ды) сыс убладэ пэ ублады́тка (весы) Меремофоскирэ вастэ́са, кон сыс чхаво́ рашаскирэ-Урияскиро; и сыс лэ́са Елиза́ро (Елеазаро), чхаво́ Финехасоскиро, и сыс лэ́нца Леви́ты: Ёзавадо, чхаво́ Ёшуаскиро, Ноадия, чхаво́ Винуёскиро;34. Саро́ сыс пиригиндло, пириубладо, и саро́ пхарипэ́н (ве́со) дрэ тала́нты сыс зачхиндло́ пэ штэ́то ада́й.35. Э чхавэ́ кодолэнгирэ, конэскирэн дадэн лыджинэ́ дро пле́но, савэ́ явнэ́ плено́стыр, яндлэ́ цэ́ла схачкирибнаскирэ свэ́нта дыибэна́ Израилёскирэ Дэвлэ́скэ: дэшуду́й гурувэ́н пал саро́ Израилё, еня́ дэша шов бакрэ́, эфтадэша́ эфта́ бакрорэ и дэшуду́й бузнэ (козлы) сыр свэ́нто дыибэ́н пал грэ́хо. Саро́ дава́ сыс цэлонэс тэ хачкирэ́н сыр свэ́нто дыибэ́н Ра́скэ-Дэвлэ́скэ.36. И ёнэ подынэ крали́скирэ припхэныбэна́ крали́скирэ барэдырэнгэ дрэ округа, и шэралэ́ рангэ дрэ доя́ пхув, со исын пэ дая́ риг рэкакири (лэнякири). И ёнэ кэрдэ́ паты́в манушэ́нгэ и Кхэрэ́скэ (Кхангирьякэ) Дэвлэскирэскэ.Psalms 88:1-51. Гилы́ и Пса́лмо Кареёскирэ Чхавэ́нгиро. Хоро́скирэ Дирижоро́скэ. Мелодия Тугаса. Эманакирэ-Эзрахитоскиро Сыклякирибэ́н.2. О, Раё Дэ́вла, Дэвлалэ, Саво́ зракхэ́ла ман. Мэ ровава годла́са дывэ́с и рат анги́л Ту́тэ.3. Мэк тэ доджал мири́ па́тери (моли́тва) кэ Ту, причху́в тэлэ́ кан, сыр мэ ровава.4. Пал-дова́ со миро ди исын пхэрдо́ пхарипнэнца и миро джиибэ́н доджа́ла кэ маґила.5. Ман гинэ́на акана́ кхэтанэ́ одолэнца, савэ́ джа́на кэ ґанби́н (яма); мэ сом ману́ш, савэ́стэ нанэ зор:Proverbs 21:21-2221. Кон родэ́ла и джа́ла дурэды́р пир чачипэ́н и лачхэ́-илы́ткима, одова́ ману́ш латхэ́ла джиибэ́н, чачипэ́н и паты́в.22. Годо́ ману́ш ублавэла (важынэла) фо́ро, кай зоралэ́ мануша́ исын, и пхагирэ́ла тэлэ́ форо́скиро рикирибэн, дро саво́ ёнэ зоралэ́с патя́на.Skutki 23:16-3516. Ке́ли пал дава́ зракирибэ́н шундя́ Павлискирэ – пхэнякиро чхаво́, ёв явдя́ дро штарибэ́н и роспхэндя́ лэ́скэ и пал дава́.17. Тэды Па́вли кхардя́ екхэ шэлэнгирэ барыдырэ́с и пхэндя́ лэ́скэ: “Лы́джа кадалэс тэрнэ́ манушэ́с кэ тысёнцэнгиро барыдыро́, пал-дова́ со ёв камэ́ла вари-со тэ пхэнэ́л лэ́скэ.”18. Одова́ лыджия́ лэс кэ тысенцэнгиро барыдыро́ и ракирэ́ла: “Штарибнаскиро Па́вли, кхардя́ ман и мангдя́ тэ янав кэ ту кадалэ́ тэрнэ́ манушэ́с, саво́ камэ́ла вари-со тэ пхэнэ́л ту́кэ.”19. Тысёнцэнгиро барыдыро́ лыя́ лэс пал васт, лыджия́ лэс дрэ риг и пхуця́: “Со ту дасаво камэ́са ма́нгэ тэ пхэнэ́с?”20. Ёв пхэндя́: “Юды скэдынэ́пэ тэ мангэ́н тут, соб (кай) атася́ ту тэ янэс Павли́с пэ скэдыибэ́н, сы́рбы ваш дова́, со ёнэ камэ́на фэдэды́р тэ роскэдэнпэ дрэ лэ́скиро рэ́ндо.21. Нэ тумэ́ на патя́н лэ́нгэ, пал-дова́ со лэс подракхэна буты́р, сыр штардэша́ мануша́, савэ́ дынэ́ совла́х тэ на хан и тэ на пьен, пака ёнэ замарэна лэс; и ёнэ какана́ исын тэрдэ́ пэ стрэ́га и ужакирэ́на тыро́ упхэныбэ́н.”22. Тысёнцэнгиро отмэкця́ тэрнэ́ манушэ́с, и припхэндя́ лэ́скэ: “Никонэ́скэ на ра́кир пал дава́, со ту роспхэндян ма́нгэ.”23. И ке́ли ёв выкхардя дуе́н пэ́скирэ барыдырэ́н и припхэндя́ лэ́нгэ: “Кэдэн дуйшэла́ халадэ́н тэ джа́н кэ Кесария, охтодэша́ уклистэ́ пэ грэ́ндэ и дуйшэла́ халадэ́ лукэнца пир трин мардэ́ коригэды́р (позжэды́р) долэ́стыр, сыр калёла яври́ дрэ еня́ (биекхэ́скиро дэш) мардэ́ (часы).24. И дэн Павлискэ осло́с, соб (кай) ёв тэ бэшэ́л уклисто/э пэ лэ́стэ и тэ янэ́н джидэс лэс кэ балунитко (правителё) Феликсо,25. И ёв чхиндя́ адасаво́ лыл:26. “Клавдиёстыр Лисиёстыр Най Фэдыдырэскэ балунитконэскэ Феликсоскэ, лачхо́ дывэ́с!27. Кадалэ́ манушэ́с ухтылдэ́ Юды и кэдынэпэ тэ мулякирэ́н; мэ явдём халадэнца и зракхцём лэс, адя́кэ сыр мэ уджиндём, со ёв бия́ндыя дро Римо.28. Пал-дова́ со мэ закамдём тэ уджинав, дрэ со исын лэ́скири банг анги́л лэ́ндэ, мэ яндём лэс анги́л лэ́нгиро сэндоскиро скэдыибэ́н;29. и мэ ґалыём, со банг лэ́скири исын спхандлы лэ́нгирэ Законоса, и со нанэ дрэ лэ́стэ нисави́ банг, соб (кай) ёв тэ явэ́л мол мэрибна́скэ ци тэ чхувэ́с лэс дро штарибэ́н.30. А сыр мэ уджиндём, со Юды зракирдэпэ тэ мулякирэ́н адалэ́ манушэ́с, мэ дрэ дова́-паць часо бичхадём лэс кэ ту и припхэндём манушэ́нгэ, савэ́ бангякирэна лэс, тэ ракирэ́н проти лэ́стэ анги́л ту́тэ. Яв састо́.”31. Палдава́ халадэ́ пир упхэныбэ́н, саво́ лэ́нгэ сыс дыно́, лынэ́ Павли́с и гинэ́ раты́ кхэтанэ́ лэ́са дрэ Анципатрида,32. и пэ яви́р дывэ́с, ёнэ бичхадэ́ халадэ́н, савэ́ традынэ уклистэ́ пэ грэ́ндэ, тэ лыджа́н Павли́с, а кокорэ́ рисинэ́ дрэ казарма.33. И одолэ́, ке́ли явнэ́ дрэ Кесария, пиридынэ балунитконэскэ лыл и адя́кэ-паць чхудэ́ Павли́с анги́л лэ́стэ.34. Балунитко гиндя лыл и пхуця́ Павли́стыр, савэ́ ёв сыс штэто́стыр, и ке́ли ёв уджиндя́, со ёв сыс Киликиятыр, тэды пхэндя́:35. “Мэ вышунава тут пхэрдэ́с, ке́ли адари́к явэ́на мануша́, савэ́ бангякирэна тут.” И ёв припхэндя́ халадэнгэ тэ рикирэ́н лэс пэ Иродоскири грэ́да (дво́ро). Romani Bible Baltic 2019 Maintained by the United Bible Societies for the Baltic Romani Mission