Bible in one year - Пэ Балтитко Романи чиб

Bible in one year July 24

1. Акана́, ке́ли сарэ́ далэ́ рэ́нды сыс кэрдэ́, явнэ́ кэ мэ, кэ Е́здра, э лыджаибна́скирэ (шэрэ́ мануша́), пхэны: “Израилёскирэ мануша́, и рашая́, и Леви́ты, на мэкнэ́ пэ́скирэ Наюдытконэ́ манушэ́н кхэтанэ́ лэ́нгирэ джунгалыпнаса (брыткимаса): Хананее́ндыр Хетеендыр, Ферезеендыр, Евусее́ндыр, Амонитянэндыр, Моавитянэндыр, Египтянэндыр и Аморее́ндыр.

2. Ёнэ лынэ́ пэ́скэ лэ́нгирэ чхае́н и ваш пэ́скирэ чхавэ́нгэ, и свэ́нто рат дрэ Дэвлэ́скиро ро́до змешындяпэ явирэ-манушытконэ́ нацые́нца пэ долэ́ пхувья́, и чачэс, тхагарье́нгиро и тхэмэ́скирэ-барыдырэнгиро васт лыджия́ явирэ́н кэ чорипэ́н.”

3. И ке́ли мэ шундём дава́, то мэ кусцём мири́ и́дя, и шални́ро (пальто), и мэ рискирдём бала́ мирэ́ шэрэстыр и чхорэндыр (бродатыр), и мэ со́мас бэшто́ дрэ бари дар.

4. Тэ́ньци кажно ману́ш, кон издрандыя лавэ́стыр Израилёскирэ Дэвлэ́стыр, пал-дова́ со напатяибнытка сыс одолэ́, савэ́ сыс дро пле́но, и мэ со́мас бэшто́ дрэ бари дар анги́л дова́, сыр яндлэ́ бэльвэлякиро свэ́нто дыибэ́н.

5. Пэ бэльвэлякиро свэ́нто дыибэ́н мэ уштыём постостыр, и дрэ роскушны и́дя и шалниро, мэ пыём пэ чанга́ и диндькирдём мирэ́ васта́ кэ Рай Дэвэ́л, миро Дэвэ́л,

6. и пхэндём мэ: “О миро Дэ́вла! Мэ ладжава и ма́нгэ нанэ муршкипэн тэ ґаздав миро муй кэ Ту, миро Дэ́вла; пал-дова́ со амаро́ чорипэ́н ґаздыя́пэ вучэды́р амарэ́ шэрэндыр, и амари́ банг бария кэ болыбэ́н.

7. Амарэ́-дадэ́скирэ дывэсэ́ндыр кэ дава́ дывэ́с амэ́ндэ исын бари банг. Пал амаро́ чорипэ́н амэ, амарэ́ кра́лья, амарэ́ рашая́, пыям дрэ Кралье́нгирэ васта́ явирэ тхэмэндыр, кон тэл курта́ла, кон дро пле́но, конэ́с росчордэ, конэ́с ладжакирдэ́, сыр исын ададывэ́с.

8. И, акана́, пэ набаро́ цы́ро (часо) амаро́ Рай Дэвэ́л, амаро́ Дэвэ́л сыкадя́ ла́ска, со Ёв дыя́ амэ́нгэ, ячкирдэ́ манушэ́нгэ, тэ ячаспэ джидэ́, и со Ёв дыя́ амэ́нгэ бидарипнаскиро штэ́то тэ скэдас зор пэ Лэ́скиро свэ́нто штэ́то, соб (кай) Ёв, амаро́ Дэвэ́л, могинэлас тэ дэл дуд (све́то) амарэ́ якхэнгэ, соб (кай) тэ дэл амэ́нгэ на́бут тэ отджидёвав дрэ амари́ наволя.

9. На дыкхи́ пэ дова́, со амэ сам писха́рья, сарое́кх Ёв, амаро́ Дэвэ́л, на мэкця́ амэн дрэ амари́ наволя; нэ Ёв рискирдя́ кэ амэ ла́ска Персиякирэ Кралье́ндыр, соб (кай) амэ́нгэ тэ отджидёвас тэ ґаздас Кхэр (Кхангири́), амарэ́ Дэвлэ́скиро, тэ подкэрас ла́кирэ руи́ны, и тэ дэл амэ́нгэ ва́нта тэ зракхаспэ дрэ Юдэ́я и дро Ерусалимо.

10. И акана́, со амэ́нгэ тэ пхэнас, Дэ́вла амаро́, пал саро́ дава́? Пал дова́, со амэ ж мэкцям Тырэ́ упхэныбэна́,

11. савэ́ Ту припхэндян амэ́нгэ пир Тырэ́ пророкэ́ндэ, пхэны: ‘Пхув, пэ сави́ тумэ́ заджа́на тэ лэн пэ́скэ ла, исын магирды джунгалыпнаса, савья́ магирдэ́ яви́р манушы́тка на́цыи лэ́нгирэ накуч рэндэ́нца, савэ́нца ёнэ пхэрдякирдэ ла екхэ ягоро́стыр (краёстыр) кэ яви́р пал лэ́нгиро биладжакуно кэрибэн.”

12. Тэды пхэндя́н жа Ту пир Тырэ́ пророкэ́ндэ, соб (кай) амэ тэ на дас амарэ́ чхае́н сыр ромне́н пал лэ́ндэ, и, соб (кай) амэ тэ на лас амэ лэ́нгирэ чхае́н ваш амарэ́ чхавэ́нгэ. Соб (кай) амэ никели и тэ на родас лэ́нгиро рама́нё (миро) ци лэ́нгиро лачхипэ́н ваш дова́, соб (кай) амэ могинасас тэ явас зоралэ́, и тэ чалякираспэ лачхипна́са лэ́нгирэ пхувья́тыр, и тэ ячкирас ла сыр мэкно́ миштыпэ́н амарэ́ чхавэ́нгэ пэ сарэ́ ве́ки.’

13. И пало́ саро́ (после) дава́, со явдя́ пэ амэ́ндэ пал сарэ́ амарэ́ чорэ́ рэ́нды, и пал сари́ амари́ бари банг, дыкхи́, со Ту, Дэ́вла амаро́, сэндякирдян амэн на адя́кэ пхарэ́с, кицы́ амэ са́мас бангэ́, и Ту зракхця́н амэ́нгэ ада́кицы манушэ́н, –

14. Нау́што (неужэли) амэ нэвэ́стыр ява́са тэ на кандас Тырэ́ припхэныбэна́, и ява́са тэ кхэтанякираспэ кадалэ́ накучонэ манушытконэ́ нацые́нца? Ци на холясоса Ту пэ амэ́ндэ пэ ада́кицы, со Ту хасякирэса амэн, соб (кай) ние́кх тэ на зракхэлпэ, и нико́н тэ на ячэ́лпэ джидо́?

15. О, Раё Дэ́вла! Дэ́вла Израилёскиро, Ту сан чачипна́скиро! Ту ж ячкирдян амэн тэ джива́с, сыр дава́ исын кэ ададывэ́с. Акэ, амэ сам анги́л Ту́тэ амарэ́ чорипнаса; пал-дова́ со пал дова́ саро́ амэ́нгэ нашты́ тэ тэрдёвас анги́л Ту́тэ.”

Ezra 10:1-44

1. Акана́, сыр о Е́здра мангэласпэ Дэвлэ́скэ, и сыр Ёв приджинэлас лэ́нгирэ грэ́хи, рови́ и пэри шэрэ́са анги́л Кхэр (Кхангири́) Дэвлэ́скиро древа́н бут мануша́ скэдынэ́пэ: мурша́, джувля́ и бияты Израилёскирэ, ёнэ тэрдинэ́ екх пашы́л екхэ́стэ, ёнэ адя́кэ-паць рондлэ́ киркэс.

2. И о Шэхания, екх чхаво́ Иехиилоскиро, Еламоскирэ чхавэ́ндыр, отпхэнэ́лас, и пхэндя́ Ездраскэ: “Амэ кэрдя́м чорипэ́н анги́л амарэ́ Дэвлэ́стэ, и амэ лыям джувле́н пэ́скэ Наюдытконэ́ нацые́ндыр, савэ́ сыс чужонэ́-манушытконэ́ нацые́ндыр, нэ акана́ усае́кх исын наде́я ваш Израилё дро дава́ рэ́ндо.”

3. И акана́ счхуваса Заве́то амарэ́ Дэвлэ́са, соб (кай) тэ мэкэ́н криг сарэ́ джувле́н, и кодолэ́н, кон бия́ндыя лэ́ндыр пир лав амарэ́ Дэвлэ́скиро и пир одолэнгирэ лава́, савэ́ дарэ́на амарэ́ Дэвлэ́скирэ припхэныбнэндыр, и мэк тэ явэ́л кэрдо́ пир зако́но.

4. Тэрдёв пэ ґэра́! Пал-дова́ со кадава́ рэ́ндо исын дрэ тырэ́ васта́: амэ адя́кэ-паць ява́са ту́са. Рикирпэ муршканэ́с и кэр дава́.”

5. Тэ́ньци тэрдия́ пэ ґэра́ Е́здра и зачхудя шэралэн пэ рашандэ, пэ Левитэндэ, и пэ саро́ Израилё тэ дэн совла́х, со ёнэ кэрэ́на пир дава́ лав.

6. И ёнэ дынэ́ совла́х. И тэрдия́ пэ ґэра́ Е́здра анги́л Кхэр (Кхангири́) Дэвлэ́скиро, и гия́ дро кхэр Иохананоскиро, кон сыс Елияшывоскиро чхаво́. И ке́ли ёв сыс одо́й, ёв на хая, и на пия, пал-дова́ со ёв тугиндя ясвэ́нца пал одолэнгири банг, савэ́ сыс дро пле́но.

7. И пхэндлэ́ ёнэ дая́ звесь (зан) зоралэ́с анги́л манушэ́ндэ дрэ Юдэ́я, и дро Ерусалимо сарэ́нгэ, кон сыс дро пле́но, соб (кай) ёнэ тэ кэдэнпэ дро Ерусалимо,

8. и со, ко́ли вари-кон на явэ́ла пир трин дывэса́, то, соб (кай) саро́ лэ́скиро миштыпэ́н тэ явэ́л конфисковиндло пир лав тхагарье́ндыр и пхурыдырэндыр, а кхэтаныпэн манушэ́нгиро, кон сыс дро пле́но, тэ чхувэ́л лэс яври́.

9. И кэдэнапэ сарэ́ мануша́ Юдэя́тыр и Веньяминоскирэ пхувья́тыр пал трин дывэса́. Дава́ сыс дро еня́то чхон, пэ бишэнгиро дывэ́с дро дова́ чхон, и сарэ́ мануша́ сыс бэштэ́ яври́ пэ форуны́ (пло́шча) анги́л Кхэр (Кхангири), Дэвлэ́скиро, издраиндой далэ́ бангипнастыр и барэ́ брышындэстыр.

10. И Е́здра, о раша́й, уштыя́ и пхэндя́ лэ́нгэ: “Тумэ́ кэрдэ́ напатяибныткэс и тумэ́ лынэ́ пэ́скэ джувле́н явирэ-тхэмэ́скирэ нацые́ндыр, и далэ́са тумэ́ кэрдэ́ барэды́р банг Израилёскири.

11. И акана́ приджинэнпэ анги́л Растэ-Дэвлэ́стэ тумарэ́-дадэнги́рэ, и кэрэ́н пир Лэ́скири во́ля. Дурьякирэн пэс явирэ-манушытконэ́ нацые́ндыр и явирэ-тхэмэ́скирэ джувле́ндыр.”

12. И отпхэндя́ саро́ лэ́нгиро скэдыибэ́н зоралэ́ заня́са: “Чачо́! Амэ сом бангэ́ тэ кэра́с, сыр ту пхэндям.

13. Нэ исын ада́кицы бут мануша́; и, ґа́да, исын часо (цы́ро) тэ дэл зорало́ брышы́нд, и дава́ нашты́ тэ тэрдён яври́. Апри́ч дава́, дава́ рэ́ндо на кэрэ́лапэ пал екх ци дуй дывэса́, пал-дова́ со амэ сам ада́кицы бут мануша́, савэ́ кэрдэ́ чорипэ́н пир дава́ рэ́ндо.

14. Мэк акана́ амарэ́ барыдыра́ тэ тэрдён пал сарэ́ндэ, и мэк одолэ́ сарэ́, кон лыя́ явирэ-тхэмэ́скирэ джувле́н пир амарэ́ фо́рья, тэ явэ́н кэ упхэндло́ часо, и тэ явэ́н лэ́нца пхурыдыра́ кажнонэ́ форо́стыр, и тэ явэ́н адя́кэ-паць сэнда́рья пэ ада́кицы бут анги́л дова́, сыр бари холы́ амарэ́ Дэвлэ́скири тэ рисёл амэ́ндыр пал дава́ рэ́ндо.”

15. Фэ́ни (то́ка) о Ионафа́но, чхаво́ Асаилоскиро, и о Яхзэия, чхаво́ Фихваскиро, тэрдинэ́ проти дава́, и о Мешуламо, и о Левито Шамфаё [Шабетаё-ю.о.], подрикирдэ лэн.

16. И одолэ́, кон явдя́ плено́стыр, кэрдэ́ адя́кэ. И о Е́здра, раша́й, кхэтанэ́ шэралэнца пэ стрэ́чы /лэ́нгирэ-дадэнги́рэ ро́ды (поколении), савэ́ сыс выкэдынэ́ пир дадэнги́рэ ро́ды (стрэ́чы), кажно сыс кхардо пир лав. Пэ пэ́рво дывэ́с дро дэ́што чхон бэшнэ́ ёнэ тэ выпхучэн е́кх явирэстыр пал дава́ рэ́ндо.

17. И пэ пэ́рво дывэ́с дро пэ́рво чхон ёнэ кончындлэ тэ пхучэнпэ манушэ́ндыр, кон лыя́ пэ́скирэ джувле́н явирэ-манушытконэ́ нацые́ндыр.

18. И латхнэ́ машки́р раша́нгирэ чхавэ́ндэ кодолэ́н, савэ́ лынэ́ джувле́н Наюдытконэ́ нацые́ндыр: Исусо́скирэ (Ёхошуаскирэ) чхавэ́ндыр, кон сыс Иоседэкоскиро чхаво́, и лэ́скирэ пшалэ́ндыр: Маасе́я, Елиезэро, Яриво и Гедалия.

19. И ёнэ дынэ́ васта́ сыр совла́х, со бичхавэна криг лэ́нгирэ джувле́н, и со ёнэ янэ́на бакрэ́с стадатыр сыр лэ́нгиро свэ́нто дыибэ́н пал чорэ́ рэ́нды.

20. И Имэроскирэ чхавэ́ндыр: Хананиё и Зевадия;

21. И Харимоскирэ чхавэ́ндыр: Маасея, Елия, Шэмаия, Иехиило, и Узия;

22. Пашхуроскирэ чхавэ́ндыр: Елиоэнаё, Маасе́я, Исмаило, Нафанаило, Иозавадо и Эласа.

23. И Левитэндыр: Иозавадо, Шыме́ё, Келаия (ёв адя́кэ-паць сыс Клита); Пафахия, Юда, и Елиезэро.

24. И багаибнаскирэндыр: Елияшыво. И паш-вударэнгирэ стрэгарье́ндыр: Шалумо, и Теле́мо, и Уриё.

25. И яви́р Израилёскирэндыр: Парошоскирэ чхавэ́ндыр: Рамаия, и Изия, и Малхия, и Миямино, и Елиза́ро (Елеазаро), и Малхия, и Венаия.

26. И Еламоскирэ чхавэ́ндыр: Матфания, Заха́рия, Иехиэлё, и Авдиё, и Еремофо, и Елия.

27. И Зафускирэ чхавэ́ндыр: Елиоэнаё, Елияшыво, Матфания, и Иремофо, и Завадо, и Азиза.

28. И Беваёскирэ чхавэ́ндыр: Иохонано, Ханания, Забваё, и Афлаё.

29. И Ваниёскирэ чхавэ́ндыр: Мешуламо, Малухо, Адая, Яшуво, Шэало, и Иерамофо.

30. И Пахаф-Моавоскирэ чхавэ́ндыр: Адна, Хелало, Венаия, Маасе́я, Матфания, Веселеило, Бинуё, и Мана́сия.

31. И Харимоскирэ чхавэ́ндыр: Елиезэро, Ишыя, Малхия, Шэмаия, Симеоно (Семёно),

32. Вениамино, Малухо, Шэмария.

33. И Хашумоскирэ чхавэ́ндыр: Мафнаё, Мафафа, Завадо, Елифеле́то, Еремаё, Мана́сия, и Шыме́ё.

34. Ваниёскирэ чхавэ́ндыр: Маадаё;

35. Бенаия, Бидья, Келуги;

36. Ванея, Меремофо, Елиашыво,

37. Матфания, Мафнаё, Ясаё, –

38. Ваниё, Бинуё, Шыме́ё;

39. Шэлэмия, Нафано, Адаия;

40. Махнадбаё, Шашаё;

41. Азариэлё, Шэлэмиягу, Шэмария;

42. Шалумо, Амария, и Ёза (Иосифо);

43. И Невоскирэ чхавэ́ндыр: Иеилё, Матфия, Завадо, Зевина, Иаедаё, Иоэлё, и Бенаия.

44. Сарэ́ кадалэ́ лынэ́ пэ́скэ джувле́н явирэ-тхэмэ́скирэ нацые́ндыр, и сыс машки́р лэ́ндэ джувля́, савэ́ндэ сыс бияты (чхаворэ́).

Psalms 88:6-10

6. Саво́ исын мэкно́ машки́р мулэндэ, сы́рбы одолэ́, со исын замардэ́ и паштэ́ дрэ ґанби́н, конэ́с Ту буты́р на рипирэса, и савэ́ исын чхурдынэ́ тэ хасён Тырэ́ вастэ́са.

7. Ту чхудя́н ман дрэ са́мо тэлатуны ґанби́н дрэ калэ́ (цямлэ) штэ́ты, дро са́мо хорипэ́н.

8. Тыро́ холякирибэ́н чхудо пэ ма́ндэ и Ту тасавэсас ман сарэ́ Тырэ́ валнэнца. Сэ́ла.

9. Ту дурьякирдян мирэ́ малэн (другэн), Ту кэрдя́н, соб (кай) ёнэ тэ ячэн джунгалэ́ ма́нца: мэ сом запхандло, мэ на могина́ва тэ джав яври́.

10. Мири́ якх кэрдёла фуеды́р ровибнастыр. О, Раё Дэ́вла! Мэ со дывэ́с кхаравас Тут ясвэ́нца, мэ тырдава Пэ́скирэ васта́ кэ Ту.

Proverbs 21:23-24

23. Кон приракхэла пэ́скиро муй и чиб, одова́ ману́ш ракхэ́ла пэ́скиро джиибэ́н пхарипнастыр.

24. Пхутькирдо ману́ш, и ману́ш, саво́ задэлапэ, кхарэ́лапэ бипатывакиро, ёв кэрэ́ла саро́ холямэ́ пхутькирибнаса.

Skutki 24:1-27

1. Пир пандж дывэса́ раша́нгиро барыдыро́ Анания явдя́ годэпхурэ́нца, и вари-савэ́ славутнонэ пхарэ́-лавэ́скирэ́са (оратороса/ритороса) Тертулоса, и ёнэ пхэндлэ́ пал Павлискири банг анги́л балунитконэстэ Феликсостэ.

2. Ке́ли ёнэ яндлэ́ Павли́с, о Тертуло лыя́ тэ допхэнэл Павлискири банг, ракири́: “Парикираса ту́кэ, со, сыр ту яця́н балунитконэса, амари́ риг яця́ раманёно́ (мирноо) и яця́ мишто́ тэ дживэ́л и амарэ́-манушэ́нгиро джиибэ́н яця́ фэдэды́р, пир тырэ́ паруибэна.

3. Савэ амэ приласа, Най Фэдыдыр Феликсо, дро саро́ и пир саро́ свэ́то сарэ́ парикирибнаса.

4. Нэ, соб (кай) тут ґара́ (длу́гэс) тэ на кхинякирас, мэ манга́ва Тут тэ вышунэс набаро́ мангипэ́н пир тыро́ ковло ило́.

5. Амэ джина́са, со адава́ ману́ш исын сы́рбы фра́нсо и ёв ґаздэ́ла бу́нто машки́р сарэ́ Юдэ́ндэ и пир саро́ свэ́то, ёв исын шэрало́ пир Назареёскири секта;

6. ёв камдя́ тэ магирэл амари́ Кхангири́, палдава́ амэ лэс зарикирдям и кэдыямпэ тэ сэндякирас пир амаро́ Зако́но;

7. нэ тысёнцэнгиро барыдыро́ Лисо явдя́ и отлыя зорья́са лэс амарэ́ вастэ́ндыр и бичхадя́ кэ ту,

8. и ёв припхэндя́ амэ́нгэ тэ джас и анги́л ту́тэ тэ допхэнас лэ́скири банг, а ке́ли ту допхучэса лэ́стыр, ту кокоро́ явэ́са тэ джинэ́с, со амаро́ допхэныбэ́н пэ лэ́стэ исын чачуно́”

9. И Юды подрикирдэ лэ́нгиро допхэныбэ́н, ракири́, со саро́ дава́, со ёнэ ракирдэ́ пэ лэ́стэ, сыс чачипэ́н.

10. Ке́ли балунитко сыкадя́ вастэ́са Павлискэ тэ ракирэ́л, ёв отпхэндя́: “Пал-дова́ со Мэ джино́м, со ту сан сэнда́ри бут бэрш пэ адалэ́ манушэ́ндэ, мэ гинава дава́ пал бари бахт и древа́н сом радо, со ма́нгэ сашты́ тэ отпхэнав анги́л ту́тэ пал миро рэ́ндо (де́ло).

11. Сыр ту могинэ́са дава́ саро́ тэ пропатяс, дэшуду́й дывэса́ палэ мэ явдём ваш мангипэ́н Дэвлэ́скэ дро Ерусалимо,

12. и адалэ́ мануша́, савэ́ анги́л ту́тэ допхэнэна мири́ банг, ёнэ ние́кхвар ман на дыкхнэ́ ни дрэ Кхангири́ ни дрэ синагога, соб (кай) мэ вари-конэса тэ лыджав чинга́рд, ци тэ ґаздав манушэ́н пэ бу́нто дро фо́ро,

13. адя́кэ-паць ёнэ на могинэ́на тэ допхэнэн мири́ банг пир рэ́ндо, дро саво́ ёнэ какана́ бангякирэна ман.

14. Нэ мэ дрэ екх могина́ва тэ приґалёвавпэ ту́кэ, со мэ дынаринава амарэ́-дадэнги́рэ Дэвлэ́скэ и джа́ва пир дава́ Дром, саво́ ёнэ кхарэ́на “ересь (секта),” мэ патя́ва сарэскэ, со исын чхиндло́ дро Зако́но и Проро́ки;

15. и ма́ндэ исын лачхо́ ужакирибэ́н Дэвлэ́стыр, со явэ́ла отджидякирибэн мулэ́ндыр, сыр чачунэн, адя́кэ-паць и начачунэ манушэ́н, дова́-паць ёнэ и кокорэ́ ужакирэ́на.

16. Ваш дава́ мэ кокоро́ дыкха́ва пал дова́, соб (кай) ма́ндэ ўса́ды (сак) тэ явэ́л жужы паты́в анги́л Дэвлэ́стэ и манушэ́ндэ.

17. Коригэды́р (позжэ), сыр гинэ́ бэрша́, мэ явдём дро Ерусалимо, ваш дова́, соб (кай) тэ отдав скэдыибнытко дыибэ́н мирэ́ манушэ́нгэ, и соб (кай) тэ янав свэ́нто дыибэ́н Дэвлэ́скэ;

18. тэды ёнэ и латхнэ́ ман, ке́ли мэ кэрдём жужакирибэн пир Зако́но дрэ Кхангири́, и на сыс мануша́ пашы́л ма́ндэ, на сыс ни саво́ бу́нто.

19. Нэ ада́й жа трэиндя́ тэ явэ́н Юдэ́нгэ Асиятыр, тэ явэ́н кэ ту и тэ допхэнэн мири́ банг, ко́ли вари-со исын лэ́ндэ проти ма́ндэ;

20. ци мэк ёнэ кокорэ́ тэ пхэнэ́н, дрэ со ёнэ латхнэ́ мири́ банг, ке́ли мэ явдём анги́л сэндоскиро скэдыибэ́н,

21. а сыс екх дава́ лав, саво́ мэ зоралэ́с пхэндём, ке́ли мэ со́мас тэрдо́ машки́р лэ́ндэ: “Пал отджидякирибэн мулэ́ндыр тумэ́ сэндинэна ададывэ́с ман!”

22. И Феликсо, саво́ миштэ́с джиндя́ дава́ Дром, отчхудя Павли́скиро рэ́ндо и пхэндя́: “Ке́ли явэ́ла тысёнцэнгиро барыдыро́ Лисо, мэ роздыкхава тыро́ рэ́ндо”;

23. и припхэндя́ шэлэнгирэ барыдырэ́скэ тэ ракхэ́н Павли́с, нэ тэ дэл лэ́скэ буты́р во́ля, и тэ на запхэнэл никонэ́скэ лэ́скирэ пашатунэндыр тэ дынаринэ́н лэ́скэ.

24. Пир вари-кицы́ дывэса́ Феликсо явдя́ пэ́скирэ ромня́са Юдыцаса, савья́ кхардэ́ Друзила, и ёв бичхадя́ пал Павлистэ, соб (кай) тэ джинэ́н буты́р пал лэ́скиро патяибэ́н дрэ Исусо́стэ Христосо́стэ.

25. И пал-дова́ со Па́вли ракирдя́ пал чачипэ́н, и пал-дова́, соб (кай) тэ обрикирэл пэс дро джиибэ́н анги́л сэ́ндо, саво́ анги́л явэ́ла, о Феликсо страхадыя и пхэндя́: “Какана́ джа́, нэ сыр явэ́ла ма́ндэ часо, мэ кхара́ва тут”;

26. лэ́стэ сыс лачхо́ ужакирибэ́н, со Па́вли дэ́ла лэ́скэ ловэ́: пал-дова́ ёв бичхавэлас адя́кэ-паць пал лэ́стэ буты́р и ёв ракирдя́ лэ́са.

27. Нэ прогинэ́ (накхлэ) дуй бэрша́, и Порцыё Фесто парудя Феликсос, а Феликсо закамдя́ тэ явэ́л куч Юдэнца, палдава́ мэкця́ Павли́с дро штарибэ́н.

Romani Bible Baltic 2019

Maintained by the United Bible Societies for the Baltic Romani Mission