Bible in one year
July 25

1. Лава́ Ниемияскирэ, Ахалииноскирэ чхавэ́скирэ. Дро чхон Кислев, дро бишто бэрш, со́мас мэ кэ Сузы, дро шэрутно фо́ро [крали́скири фэлатин-ю.о.].
2. И явдя́ о Ханани, екх мирэ́ пшалэ́ндыр, ёв и вари-кицы́ мануша́ Юдэя́тыр. И пхуцёмпэ мэ лэ́ндыр пал Юдэ́ндэ, савэ́ ячнэ́пэ джидэ́ плено́стыр, и пал Ерусалимо.
3. И пхэндлэ́ ёнэ ма́нгэ: “Ячадэ мануша́, савэ́ ячнэ́ джидэ́ плено́стыр, исын одо́й, дро лэ́нгиро тхэм, дрэ бари би́да и дрэ напатыв; ва́нта Ерусалимо́скири исын пхагирды, и по́рты лэ́скирэ исын хачкирдэ́ яга́са.
4. Сыр мэ шундём, мэ бэсцём и зарондём, и со́мас мэ дрэ ту́га ада́кицы дывэса́, рикирдём мэ бокхало посто и мангдёмпэ анги́л болыбна́скирэ Дэвлэ́стэ,
5. и ракиравас мэ: “Раё Дэ́вла, болыбна́скиро, Дэ́вла баро́ и трашадо, Саво́ ракхэ́ла завето и ла́ска кэ сарэ́, савэ́нгэ Ту сан дро́го, и савэ́ рикирна Тырэ́ припхэныбэна́!
6. Тэ явэ́н Тырэ́ кана́ и якха́ Тырэ́ откэрдэ, соб (кай) тэ шунэ́с па́тери (моли́тва) Тырэ́ писхарискири, савья́са мэ мангавпэ анги́л Ту́тэ акана́ рат и дывэ́с пал Израилёскирэ чхавэ́ндэ, Тырэ́ писхарьендэ, и приґалёвавпэ мэ дрэ грэ́хи Израилёскирэ чхавэ́нгирэ, савэ́нца кэрдя́м амэ грэ́хо анги́л Ту́тэ, грешындям – и мэ и мирэ́-дадэ́скиро кхэр.
7. Амэ яця́м дошалэ́ анги́л Ту́тэ, и на зракхцям припхэныбэна́ и стату́ты (уставы) и сыклякирибэ́н, савэ́ Ту припхэндян о Мойза́скэ, Тырэ́ писхари́скэ.
8. Нэ ри́пир лав, саво́ Ту дыя́н дро припхэныбэ́н Мойза́скэ, Тырэ́ писхари́скэ, ракири́: “Ко́ли тумэ́ тэ кэрэнпэ прахарьенца, то Мэ росчхурдава тэ дживэ́н тумэн пир манушэ́ндэ;
9. а ко́ли рисёна тумэ́ кэ Мэ, и лэ́на тэ ракхэ́н Мирэ́ припхэныбэна́, и тэ кэрэ́н пир лэ́ндэ, тэ́ньчи, мэк тэ явэ́н вытырдынэ кэ болыбнытко яго́ро (краё), и одотхы́р Мэ скэда́ва тумэн и лыджа́ва пэ штэ́то, саво́ Мэ выкэдыём, соб (кай) тэ чхувэ́н одо́й Миро лав.
10. Ёнэ исын Тырэ́ писха́рья и народо Тыро́, саво́ Ту выкиндян Тырэ́ баря зорья́са и Тырэ́ зоралэ́ вастэ́са.
11. Мэ манга́ва зоралэ́с Тут, Раё Дэ́вла! Тэ явэ́л Тыро́ кан откэрдо тэ шунэ́л па́тери (моли́тва) Тырэ́ писхарискиро и па́тери Тырэ́ писхарьенгиро, савэ́ камэ́на тэ лэн шукарипэ́н анги́л Тыро́ Лав. И тэ дэс Ту лачхыпэн Тырэ́ писхари́скэ акана́, и тэ дэс лэ́скэ ла́ска кадасавэ́ манушэ́стэ. Мэ со́мас моля́киро дыибна́ри (кучика́ри) крали́стэ.
1. Дро чхон Нисано, дро бишто бэрш, сыр кралиндя Артаксерксо, сыс анги́л лэ́стэ мол (вино). И мэ лыём мол, и подыём э крали́скэ, и, сыкадыя́, со мэ на со́мас смэнтно (скучно) анги́л лэ́стэ.
2. Нэ о кра́ли пхэндя́ ма́нгэ: “Палсо́ ту́тэ исын смэнтно муй; на сан ту насвало́, дава́ нанэ, ай, ґалёв, ту́га исын пэ ило́?” Мэ древа́н дарандыём,
3. и пхэндём крали́скэ: “Мэк тэ дживэ́л о кра́ли дро ве́ко! Сыр тэ на явэ́л ту́га мрэ москэ, ко́ли фо́ро, кхэр, кай исын дадэнги́рэ коплицы, дро чхучипэн (запустениё), и по́рты лэ́скирэ хачкирдэ́ яга́са!”
4. И пхэндя́ ма́нгэ о кра́ли: “Со жэ ту камэсас?” Мэ помангдёмпэ э Дэвлэ́скэ болыбнаскирэскэ,
5. и пхэндём мэ крали́скэ: “Ко́ли крали́скэ исын мишто́ пэ ило́ ма́ндыр, и, ко́ли дро лачхипэ́н исын о писха́ри тыро́ анги́л тыро́ муй, то бичха́в ман дрэ Юдэ́я, дро фо́ро, кай исын коплицы мирэ́ дадэнги́рэ, соб (кай) мэ тэ кэра́в ремо́нто лэ́нгэ.”
6. И пхэндя́ ма́нгэ о кра́ли и э кра́лица, сави́ сыс бэшты пашы́л лэ́стэ: “Кицы́ дывэса́ тырдэлапэ тыро́ дром, ке́ли ту рисёса?” И лачхэ́ волятыр сыс крали́скэ тэ бичхавэл ман пало́ дава́, сыр мэ дыём лэ́скэ часо.
7. Мэ пхэндём крали́скэ: “Ко́ли кра́ли адя́кэ шука́р камэ́ла, мэк тэ дэл ма́нгэ лыла́ кэ палэ́-рэки́тка барыдыра́ округэ́нгирэ, соб (кай) ёнэ тэ дэн ма́нгэ отмэкибнытко (пропуско), пака мэ доджава кэ Юдэ́я;
8. и лыл кэ Асафо, крали́скиро вэшытко ракхибнари, соб (кай) ёв тэ дэл ма́нгэ кашта́ ваш по́рта твардымакири (диза́кири), сави́ исын пашы́л Дэвлэ́скиро Кхэр, и ваш ва́нта форитко, и ваш кхэр, дро саво́ мэ ла́ва тэ джива́в.” И дыя́ ма́нгэ кра́ли адя́кэ, сыр бахтякирдо́ васт мирэ́ Дэвлэ́скиро сыс упра́л ма́ндэ.
9. И явдём мэ кэ палэ-рэкитка барыдыра́ пэ округи, и отдыём лэ́нгэ крали́скирэ лыла́. Бичхадя́ о кра́ли ма́нца о халадытконэ барыдырэ́н уклистэнца.
10. Ке́ли шундя́ дава́ о Санавалато, о Хоронито и о Товия, Амонытко писха́ри, то сыс лэ́нгэ древа́н пхаро́, со явдя́ о ману́ш, и исын насвало́ пало́ лачхипэ́н Израилитконэ чхавэ́нгиро.
11. И явдём мэ дро Ерусалимо. И со́мас мэ одотхэ трин дывэса́,
12. и уштыём мэ ратя́киро набутэ манушэ́нца, кай сыс пашы́л ма́ндэ, и никонэ́скэ на пхэндём, со Миро Дэвэ́л чхудя́ ма́нгэ пэ ило́ тэ кэра́в ваш Ерусалимо; мурдалэс нисавэс на сыс ма́нца, фэ́ни кодова́, пэ савэ́стэ традыём мэ.
13. И традыём пэскэ мэ ратя́киро пирда́л по́рты Долинакирэ анги́л Драконоскири ґаны́нг кэ по́рта Гнэёскири, и обдыкхцём мэ, со Ерусалимо́скирэ ва́нты сыс пхагирдэ́, и лэ́скирэ по́рты схачкирдэ́ яга́са.
14. И подтрадыём мэ кэ по́рты Фонтаноскирэ, и кэ крали́скири колбань (водоёмо), нэ одо́й на сыс штэ́то тэ проджал о мурдалэскэ, саво́ сыс тэл ма́ндэ.
15. И мэ ґаздыёмпэ пала́л пиро́ тэлуны фэ́лда ратя́киро, и обдыкхтём ва́нта, и традыи́ англэ́ ишчо (инкэ́), кай сыс Долинакири по́рта, рисиём палэ.
16. И э барыдыра́ на ґалынэ́, карик мэ псиравас, ни со на одкэравас: ани Юдэ́нгэ, ани рашангэ, ани славутнонэнгэ, ани барыдырэ́нгэ, ани явирэ бутярьенгэ мэ кэ часо ничи́ на одкэравас.
17. И пхэндём мэ лэ́нгэ: “Тумэ́ дыкхэ́на би́да, дрэ сави́ амэ-да сам; Ерусалимо исын чхучо́ и по́рта лэ́скири хачкирды яга́са; явэ́н, и кэрасам ва́нта Ерусалимо́скири, и амэ на ява́са дро англыпэ́н дро дасаво обракирибэн.”
18. И мэ роспхэндём лэ́нгэ пало́ лачхо́ васт ваш ма́нгэ мирэ́ Дэвлэ́скиро, и ишчо (инкэ́) лава́ кралитка, савэ́ ёв ракирдя́ ма́нгэ. И пхэндлэ́ ёнэ ма́нгэ: “Ласам амэ тэ кэра́с”, – и зорьякирдэ лэ́нгирэ васта́ пэ дава́ лачхо́ рэ́ндо.
19. Шуны́ дава́, о Санавалато, о Хоронито и о Товия, Амонытко писха́ри, и о Гешэмо, Аравитяно, сандлэпэ амэ́ндыр, и пхутибнаса ракирэ́нас: “Саво́ дава́ исын рэ́ндо тумаро́, саво́ тумэ́ кэрэ́на? Хабись, тумэ́ думинэ́на тэ бунтуинэн проти крали́стэ?”
20. Мэ дыём лэ́нгэ отпхэныбэ́н, и ракирдём лэ́нгэ: “О Дэвэ́л болыбна́скиро, Ёв шука́р дэ́ла амэ́нгэ, и амэ, Лэ́скирэ писха́рья, ласам тэ кэра́с буты́, тумэ́нгэ нанэ ни котэ́р, ни право, ни рипирибэ́н дро Ерусалимо.
11. Ци явэ́са Ту тэ кэрэ́с ди́вы мулэнгэ? Ци уштэна мулэ́ и парикирэна Ту́кэ. Сэ́ла.
12. Ци явэ́ла пхэндло́ сарэ́нгэ дрэ ґанби́н пал Тыри́ лачхэ́-илы́ткима? Ци пал Тыро́ патяибэ́н дро штэ́то, кай хасёна?
13. Ци явэ́ла джиндло́ пал Тырэ́ ди́вы дро калыпэ́н (цямлыпэ́н), ци пал Тыро́ чачипэ́н пэ пхув, кай бистрэса?
14. Нэ мэ да́ва го́дла кэ Ту, Раё Дэ́вла и пэ зло́ко (ра́нко) миро мангипэ́н анги́л Ту́тэ.
15. О, Раё Дэ́вла, со́скэ Ту ячкирдян миро ди? Со́скэ Ту гаравэса Пэ́скиро муй ма́ндыр?
16. Мирэ́ чхаворипнастыр ман тасавэна и мэ на́бут со на мэра́ва. Мэ мэнчынавпэ дара́тыр кэ мэрибэ́н, Мэ сарэ́са пыём дро ду́хо (фа́но).
17. Тыри́ ягуны бари холын гия́ пир ма́ндэ; Ту даракирдян ман кэ хасибэ́н:
18. Ёнэ облэнас трусця́л ман сыр баро́ пани́; ёнэ тасавэнас ман кхэтанэ́ сарэ́ ригэ́ндыр.
25. Дова́, со зоралэ́с трэй кирнэ-масэнгирэ манушэ́скэ, мулякирэ́ла лэс, пал-дова́ со лэ́скирэ васта́ отпхэнэнапэ тэ кэрэ́н пхари́ буты́;
26. ёв исын ґа́лко и скэмпо саро́ дывэ́с, нэ чачуно́ ману́ш дэ́ла и на тангинэла.
1. И палдава́, ке́ли Феликсо явдя́ пэ дая́ риг, ёв пир трин дывэса́ гия́ Кесариятыр дро Ерусалимо.
2. Дро Ерусалимо раша́нгирэ барыдыра́ и Юдэ́нгирэ шэралэ́ явнэ́ бангякирибнаса пэ Павлистэ кэ ёв и мангнэ́ лэс,
3. соб (кай) ёв тэ отпхэнэл пэ лэ́нгиро мангипэ́н и тэ выкхарэл Павли́с дро Ерусалимо; а кокорэ́ ёнэ камлэ́ тэ подракхэн лэс пир дром и тэ замарэ́н.
4. Нэ Фесто отпхэндя́ лэ́нгэ, со Па́вли сыс бэшто́ дро штарибэ́н дрэ Кесария, и со ёв сыг кокоро́ джа́ла одори́к.
5. “Палдава́, – пхэндя́ ёв, – кон тумэ́ндыр исын барыдыра́, мэк тэ джа́н кхэтанэ́ ма́нца, и тэ допхэнэн одо́й лэ́скири банг, ко́ли ёв кэрдя́ саво́ фуипэ́н.”
6. Ёв яця́пэ машки́р лэ́ндэ эфта́ (битринэ́нгиро дэш) ци дэш дывэса́, а тэды рисия́ дрэ Кесария, и пэ яви́р дывэ́с бэсця́ пэ сэндарискиро штэ́то и пхэндя́ тэ янэ́н Павли́с.
7. Ке́ли Па́вли явдя́, Юды, савэ́ явнэ́ Ерусалимо́стыр, тэрдинэ́ трусця́л лэ́стэ и лынэ́ тэ чхувэ́н пэ Павлистэ древа́н бари банг, нэ тэ допхэнэн ла ёнэ на могиндлэ́.
8. Тэды Па́вли отпхэндя́ пал пэ́скиро чачипэ́н: “Мэ на кэрдём ни саво́ чорипэ́н ни проти Юды́тко Зако́но, ни проти Кхангири́, ни проти кхенинго́стэ (кесарёстэ).”
9. О Фесто камдя́ тэ заджа́л дрэ паты́в Юдэ́нгэ, и палдава́ пхуця́ Павли́стыр: “Ци ту камэ́са тэ джас дро Ерусалимо, соб (кай) мэ одо́й тэ сэндинав тут дрэ дова́, дрэ со тут бангякирэна?”
10. Нэ Па́вли пхэндя́: “Мэ сом тэрдо́ анги́л кхенингоскиро сэ́ндо, и ада́й ман исын бангэ́ тэ сэндинэ́н; мэ на кэрдём нисаво́ чорипэ́н Юдэ́нгэ, сыр и ту кокоро́ шука́р джинэ́са мишто́ дава́.
11. Тэды, ко́ли мэ сом банго́ и кэрдём вари-со, пал со мэ сом мол мэрибна́скэ, тэды мэ на давапэ палэ мэрибна́стыр; нэ ко́ли нисо́ дава́ нанэ, дрэ со ёнэ бангякирэна ман, тэды нико́н на могинэ́ла тэ выдэл ман лэ́нгэ. Мэ трэбинава кхенингоскиро сэ́ндо.”
12. Тэды Фесто пириракирдя пэ́скирэ манушэ́нца скэдыибна́стыр и отпхэндя́: “Ту мангдян, соб (кай) тут тэ сэндинэл кхенинго, кэ кхенинго ту и джа́са.”
13. Пир вари-кицы́ дывэса́ кра́ли Агри́па и Вереника явнэ́ дрэ Кесария тэ дэн “паклоно” Фестоскэ.
14. И адя́кэ, сыр ёнэ сыс одо́й бут дывэса́, Фесто роспхэндя́ пал Павли́скиро рэ́ндо крали́скэ: “Ада́й исын екх ману́ш, савэ́с Феликсо чхудя́ дро штарибэ́н,
15. пэ савэ́стэ, ке́ли мэ со́мас дро Ерусалимо раша́нгирэ барыдыра́ и Юдэ́нгирэ годэпхурэ́ явнэ́ бангякирибнаса пэ лэ́стэ; ёнэ мангнэ́, соб (кай) мэ лэс тэ сэндинав:
16. а мэ отпхэндём лэ́нгэ, со Римлянэндэ адя́кэ на лыджалапэ, соб (кай) тэ выдэс вари-савэ́ манушэ́с пэ мэрибэ́н; кэ/жы́ко дова́ часо, пака лэ́скэ явэ́ла допхэндлы лэ́скири банг муй кэ муй и явэ́ла сашты́ (можно), соб (кай) ёв тэ ракирэ́л пал пэ́скиро чачипэ́н.
17. И ке́ли ёнэ явнэ́ адари́к кхэтанэ́ ма́нца, и мэ тэды на отчхудём, нэ пэ яви́р дывэ́с, бэсцём пэ сэндарискиро штэ́то и пхэндём тэ янэ́н адалэ́ манушэ́с:
18. лэс обштадэ мануша́, савэ́ явнэ́ тэ бангякирэн лэс и нико́н лэ́ндыр на допхэндя дрэ долэ́ налачхэ́ рэ́нды, пал савэ́ мэ думиндём;
19. а лэ́ндэ сыс пхучибэна кэ ёв пал лэ́нгирэ патяибнаскири шта́ма (сво́до), и пал вари-савэ́ Исусо́стэ, саво́ мыя́, нэ пал Савэ́стэ Па́вли допхэнэлас, со Ёв исын джидо́.
20. Мэ на джиндём, сыр ма́нгэ роскэдавпэ дрэ дава́ рэ́ндо, мэ пхуцём лэ́стыр, ци камэ́ла ёв тэ джал дро Ерусалимо и тэ явэ́л сэндиндло одо́й?
21. Нэ адя́кэ, сыр Па́вли мангдя́, соб (кай) лэс и лэ́скиро рэ́ндо ячкирав пэ Августоскиро роздыкхибэн, мэ припхэндём тэ рикирэ́н лэс дрэ штарибэ́н, пака ма́нгэ явэ́ла сашты́ тэ бичхавав лэс кэ кхенинго.”
22. Агри́па пхэндя́ Фестоскэ: “Мэ и кокоро́ кама́м тэ шунав кадалэ́ манушэ́с.” Одова́ отпхэндя́: “Атася́ шунэса лэс.”
23. Пэ яви́р дывэ́с, ке́ли Агри́па и Вереника барэ́ пхутькирибнаса гинэ́ андрэ́ сэндоскиро кхэр кхэтанэ́ тысёнцэнгирэ барыдырэ́нца и патывалэ́ манушэ́нца, пир Фестоскиро припхэныбэ́н яндлэ́ Павли́с.
24. И Фесто лыя́ тэ ракирэ́л: “Кра́лё Агри́па! Сарэ́ мануша́, кон исын кхэтанэ́ амэ́нца, тумэ́ дыкхэ́на кадалэ́ манушэ́с, пал савэ́стэ бут Юды явэ́нас кэ мэ дро Ерусалимо и ада́й годла́са и мангипнаса, со кадава́ ману́ш на мол буты́р тэ дживэ́л.
25. Нэ мэ роскэдыёмпэ, со ёв на кэрдя́ нисо́ дасаво, соб (кай) тэ явэ́л мол мэрибна́скэ, и сыр ёв кокоро́ мангдя́ Августоскиро сэ́ндо, мэ кэдыёмпэ тэ бичхавав лэс кэ ёв;
26. нэ мэ на дыкха́ва нисо́ дасаво, со тэ чхинав пал адалэ́ манушэ́стэ мирэ́ Ра́скэ. Палдава́ мэ яндём лэс кэ тумэ́, нэ буты́р сарэ́стыр кэ ту, кра́лё Агри́па, соб (кай) коригэды́р (позжэ), сыр ту лэ́стыр допхучэса, ма́нгэ тэ джина́в, со ма́нгэ тэ чхинав.
27. Ма́нгэ здэлапэ, со нашты́ тэ бичхавэс штарибнаскирэс, ко́ли мэ тэ на упхэнав пэ лэ́скири банг.”
Romani Bible Baltic 2019
United Bible Societies for the Baltic Romani Mission