Beblia

1. Сыр догия́ кэ Санавалатоскирэ кана́ и кэ Товия и кэ Гешэмо Аравитянино, и кэ сарэ́ яви́р амарэ́ вэ́рги, со мэ нэвякирдём ва́нта, и со на яця́пэ дрэ ла́тэ доша – акэ, мэк кэ/жы́ко дова́ часо мэ ишчо (инкэ́) на чхудём вудара́ дрэ по́рта и,

2. тэ́ньчи бичхадя́ о Санавалато и о Гешэмо кэ мэ тэ пхэнэ́н: “Яв адари́к, зджасапэ дро екх гав пэ Оноскиро штэ́то.” Ёнэ задуминдлэ тэ кэрэ́н ма́нгэ фуипэ́н.

3. Нэ мэ бичхадём кэ ёнэ э послэн тэ пхэнэ́н: “Мэ сом залыно барэ́ рэндоса, мэ на могина́ва тэ джав; и тэрдёлас бы рэ́ндо, ко́ли мэ мэкавас о рэ́ндо и джавас кэ тумэ́.”

4. Штар мо́лы бичхавэнас ёнэ кэ мэ кадасавэ́-паць кхарибнаса, и мэ одпхэнавас лэ́нгэ адя́кэ-паць.

5. Тэды бичхадя́ кэ мэ о Санавалато дро па́нджто мо́ло пэ́скирэ писхари́с, савэ́стэ дро васт сыс одкэрдо лыл.

6. Дро лэ́стэ сыс чхиндло́: “Вурняла малва народэндэ, и о Гешэмо раки́рла, со, хачи, ту, и э Юдэя́кирэ задуминдлэ тэ отпэрэн, ваш кодова́ ту кэрэ́са ва́нта, со камэ́са тэ явэс лэ́ндэ крали́са, пир кодоя-паць ма́лва;

7. о пророкэ́н ту чхудя́н упрэ́, соб (кай) ёнэ тэ годлякирэн пал ту́тэ дро Ерусалимо и тэ ракирэ́н: ‘Юдэя́киро кра́ли!’ И дасавэ́ лава́ доджана кэ кра́ли. Адя́кэ яв, обракираса кхэтанэ́.”

8. Нэ мэ бичхадём лэ́скэ тэ пхэнэ́н: “Ничи на сыс, пал со ту ракирэ́са – ту придуминдян саро́ пэ́скирэ годя́са.”

9. Пал-дова́ сарэ́ ёнэ трашавэнас амэн, думини: “Обмэкэнапэ тэлэ́ васта́ лэ́нгирэ далэ́ рэндостыр, и на выджа́ла ёв”; нэ мэ-далэ́са бутэды́р зоралякирдём мирэ́ васта́.

10. Явдём мэ дро Шэмаия́скиро кхэр, кэ Дэлаияскиро чхаво́, Мегетавелоскиро чхаво́, и ёв пхандя вудара́ и пхэндя́: “Явэ́н дро Дэвлэ́скиро Кхэр, андрэ́ Кхангири́, пхандаса пал пэ́стэ сарэ́ Кхангирья́кирэ вудара́, пал-дова́ со явэ́на тэ мулякирэ́н тут, и явэ́на тэ мулякирэ́н тут раты́.”

11. Нэ мэ пхэндём: “Сашты́ (могинэ́ла) тэ нашэ́л адасаво́ ману́ш, сыр мэ сом?” Сашты́ адасаво́ тэ явэ́л, со, сыр дасаво сыр мэ сом, тэ джал андрэ́ Кхангири́ (Свэнто-свэнтонэнгиро), соб (кай) тэ ячэ́л джидэса? На джа́ва.”

12. Мэ джиндём, со на Дэвэ́л бичхадя́ лэс, на дыкхи́, со ёв ракирэ́лас ма́нгэ сыр о проро́ко, нэ со лэс подкиндлэ о Товия, и о Санавалато.

13. Ёв ваш дова́ сыс подкиндло, соб (кай) мэ тэ страхадёвав, и тэ кэра́в адя́кэ, и тэ пэрав дро грэ́хо, и соб (кай) ёнэ могиндлэ́ тэ думинэн фуипэ́н пал ма́ндэ и тэ обракирэн ман.

14. Ри́пир, миро Дэ́вла, Товияс и о Санавалатос пир дасавэ́ лэ́нгирэ рэ́нды, и ишчо (инкэ́) э пророчица Ноадия и явирэ пророкэ́н, савэ́ камлэ́ тэ трашавэн ман!

15. Ва́нта сыс кэрды дрэ биш тэ па́нджто дывэ́с, дро чхон Елуло, пал пандждэшадуй дывэса́.

16. Ке́ли шунэнас пал дава́ сарэ́ амарэ́ вэ́рги, и дыкхнэ́ дава́ сарэ́ народы, савэ́ сыс трусця́л амэ́ндэ, то ёнэ бут пынэ́ дрэ лэ́нгирэ якха́, и ґалынэ́, со дава́ рэ́ндо сыс кэрдо́ амарэса Дэвлэ́са.

17. Апри́ч дова́ дрэ долэ́ дывэса́ славутна Юдэи чхинэнас бут лыла́, савэ́ бичхавэнас кэ Товия; лыла́ Товияскирэ джа́нас кэ ёнэ.

18. Пал-дова́ со бутджинэ пэ Юдэитко тхэм сыс дрэ совлаха́ лэ́са, пал дова́ со ёв сыс Шэханияскиро зятё (джамутро), Арахоскиро чхаво́, и лэ́скиро чхаво́ Иоханано лыл пал пэ́стэ чхаёрья Мешуламоскирья, Верехияскирэ-чхавэскири.

19. Анги́л ма́ндэ ёнэ аж шарэнас лэ́скиро лачхипэ́н дескиро, и мирэ́ лава́ ёнэ лыджа́нас кэ ёв. И о Товия бичхавэлас лыла́, соб (кай) тэ трашавэл ман.

1. И сыс адя́кэ: ке́ли ґаздынэ́ ва́нта, и мэ чхудём вудара́, и сыс чхудэ́ тэ дынаринэ́н (тэ служынэн) ракхибна́рья пэ по́рта, и багаибнаскирэ, и Леви́ты,

2. то тэ́ньчи мэ припхэндём мирэ́ пшалэ́скэ Хананискэ и барыдырэ́скэ пэ тва́рдыма (диз) Хананияскэ, саво́ сыс дро Ерусалимо, пал-дова́ со ёв сыс патяибны́тко ману́ш буты́р явирэндыр и ёв дарандыя Дэвлэ́стыр буты́р явирэндыр.

3. И пхэндём мэ лэ́нгэ: “Мэк тэ на псиравэн по́рта Ерусалимо́скири, пака кхам тэ на татькирэл ла; и ке́ли ёй исын тэрды, мэк тэ запхандэн ла.” И мэ чхудём стрэгарьенца манушэ́н Ерусалимо́стыр каждонэс пэ пэ́скири стрэ́га, и, соб (кай) каждо тэ явэ́л тэрдо́ пэ стрэ́га проти пэ́скиро кхэр.

4. Нэ фо́ро сыс баро́ и дро лэ́стэ сыс баро́ штэ́то: нэ мануша́ сыс на́бут одо́й, и кхэра́ на сыс чхудэ́.

5. И чхудя́ миро Дэвэ́л дро миро ило́, соб (кай) мэ тэ скэдав лачхэ́-родоскирэ манушэ́н, и барыдырэ́н и явирэ манушэ́н, соб (кай) ма́нгэ тэ пиричхинав лэн пир лэ́нгиро ро́до. И мэ латхём родэнгиро пиричхиныбэн (списко) одолэ́н, савэ́ явнэ́ палэ пэ́рва, и дро списко сыс зачхиндло́:

6. Акэ, исын мануша́ округатыр, савэ́ гинэ́ плено́стыр одолэ́ндыр, савэ́н лыджия́ дро пле́но Навуходоносо́ро, кра́ли Вавилоно́скиро, и савэ́ рисинэ́ дро Ерусалимо, и дрэ Юдэ́я, кажно дро пэ́скиро фо́ро.

7. Акэ, исын одолэ́, савэ́ гинэ́ Зоровавелёса, Исусо́са (Ёхошуаса), Ниемияса, Азарияса, Раамияса, Нахманиёса, Мардохеёса, Билшаноса, Мисферефоса, Бигваёса, Нехумоса, Ваанаса. И, акэ, кицы́, сыс мануша́ Израилёскирэ:

8. Чхавэ́ Парошоскирэ, дуй тысёнцы, шэл тэ эфтадэшадуй;

9. Чхавэ́ Сафатияскирэ, дуйшэла́, эфтадэша́ дуй;

10. Чхавэ́ Арахоскирэ, шовшэла́ пандждэша́.

11. Чхавэ́ Пахат-Моавоскирэ, чхавэ́ндыр Исусоскирэн и Иоавоскирэндыр, дуй тысёнцы, охтошэла дэшуохто;

12. Чхавэ́ Эламоскирэ, тысёнцо дуйшэла́ пандждэша́ штар.

13. Чхавэ́ Затоскирэ, охто́ шэла́ пандждэша́ пандж:

14. Чхавэ́ Закхаёскирэ, эфташэла́ шовдэша́;

15. Чхавэ́ Бинуёскирэ, эфташэла́ шовдэша́;

16. Чхавэ́ Беваёскирэ, шовшэла́ биш тэ охто́;

17. Чхавэ́ Азгадоскирэ, дуй тысёнцы, триншэла́ биш тэ дуй;

18. Чхавэ́ Адоникамоскирэ, шовшэла́ шовдэша́ эфта́;

19. Чхавэ́ Бигваёскирэ, дуй тысёнцы шовшэла́ эфта́;

20. Чхавэ́ Адиноскирэ, шовшэла́ пандждэша́ дуй;

21. Чхавэ́ Атэроскирэ, Езэкияскирэ кхэрэ́стыр сыс енядэша охто́;

22. Чхавэ́ Хашумоскирэ, триншэла́ биш тэ охто́;

23. Чхавэ́ Вецаёскирэ, триншэла́ биш тэ штар;

24. Чхавэ́ Харифоскирэ, шэл тэ дэшуду́й;

25. Савэ бия́ндынэ дрэ Гавао́но, енядэша пандж;

26. Савэ дживдэ́ кэ Вифлее́мо и кэ Нетофа, шэл тэ охтодэша́ охто́;

27. Савэ дживдэ́ кэ Анафофо, шэл тэ биш тэ охто́;

28. Савэ дживдэ́ кэ Беф-Азмавефо, штардэша́ дуй;

29. Савэ дживдэ́, кэ Кариафиаримо, кэ Кефира и кэ Беерофо эфташэла́ штардэша́ трин;

30. Савэ дживдэ́ кэ Фама и кэ Гева, шовшэла́ биш тэ екх;

31. Савэ дживдэ́ кэ Михмасо, шэл тэ биш тэ дуй;

32. Савэ дживдэ́ кэ Вефи́лё и кэ Гаё, шэл тэ биш тэ трин;

33. Савэ дживдэ́ кэ яви́р Нево, пандждэша́ дуй,

34. Чхавэ́ явирэ Эламоскирэ, тысёнцо дуйшэла́ пандждэша́ штар;

35. Чхавэ́ Харимоскирэ, триншэла́ биш;

36. Савэ дживдэ́ кэ Ерихо́но, триншэла́ штардэша́ пандж;

37. Савэ дживдэ́ кэ Лодо, Хадидо и Оно, эфташэла́ биш тэ екх;

38. Савэ бия́ндынэ кэ Сенаё, трин тысёнцо еняшэла трия́нда;

39. Рашая́, Иодаияскирэ чхавэ́н, Исусо́скирэ кхэрэ́стыр (Ёхошуаскирэ), еняшэла эфтадэша́ трин;

40. Чхавэ́ Имероскирэ, тысёнцо пандждэша́ дуй;

41. Чхавэ́ Пашхуроскирэ, тысёнцо дуйшэла́ штардэша́ эфта́;

42. Чхавэ́ Харимоскирэ, тысёнцо дэшуэфта.

43. Леви́ты, чхавэ́ Исусо́скирэ (Ёхошуаскирэ), Кадмиилоскирэ кхэрэ́стыр, кхэрэ́стыр, саво́ сыс Годеваскирэ чхавэ́ндэ, эфтадэша́ штар;

44. Багаибнаскирэ: чхавэ́ Асафоскирэ, шэл тэ штардэша́ охто́;

45. Ракхибна́рья пэ по́рта: чхавэ́ Шалумоскирэ чхавэ́ Атэроскирэ, чхавэ́ Галмоноскирэ, чхавэ́ Акувоскирэ, чхавэ́ Хатитоскирэ, чхавэ́ Шоваёскирэ, – шэл тэ трия́нда охто́.

46. Нефинеи: чхавэ́ Цыхаскирэ, чхавэ́ Хасуфаскирэ, чхавэ́ Табаофоскирэ:

47. Чхавэ́ Кирососкирэ, чхавэ́ Сияскирэ, чхавэ́ Фадоноскирэ;

48. Чхавэ́ Леванаскирэ, чхавэ́ Хагаваскирэ, чхавэ́ Салмаёскирэ;

49. Чхавэ́ Хананаскирэ, чхавэ́ Гиделоскирэ, чхавэ́ Гахароскирэ;

50. Чхавэ́ Реаияскирэ, чхавэ́ Рецыноскирэ, чхавэ́ Некодоскирэ;

51. Чхавэ́ Газамоскирэ, чхавэ́ Узаскирэ, чхавэ́ Пасеахоскирэ;

52. Чхавэ́ Весаёскирэ, чхавэ́ Меунимоскирэ, чхавэ́ Нефишсимоскирэ;

53. Чхавэ́ Ваквукоскирэ, чхавэ́ Хакуфаскирэ, чхавэ́ Хархуроскирэ;

54. Чхавэ́ Вацлифоскирэ, чхавэ́ Мехидаскирэ, чхавэ́ Харшаскирэ;

55. Чхавэ́ Варкососкирэ, чхавэ́ Сисараскирэ, чхавэ́ Фамахоскирэ;

56. Чхавэ́ Нецыахоскирэ, чхавэ́ Хатифаскирэ.

57. Чхавэ́ Соломоно́скирэ писхарьендыр: чхавэ́ Сотаёскирэ, чхавэ́ Соферефоскирэ, чхавэ́ Феридаскирэ;

58. Чхавэ́ Иалоскирэ, чхавэ́ Дарноноскирэ, чхавэ́ Гидэлоскирэ;

59. Чхавэ́ Сафатияскирэ, чхавэ́ Хатилоскирэ, чхавэ́ Похереф-Гацэваимоскирэ, чхавэ́ Амоноскирэ.

60. Сарэ́ Нефинеи и писха́рья Соломоно́скирэ сыс триншэла́ енядэша дуй.

61. И, акэ, сыс одолэ́, савэ́ адя́кэ-паць выгинэ́ Телмелахостыр, Телхаратыр, Херув-Адоностыр и Имеростыр; нэ ёнэ на могиндлэ́ тэ досыкавэн пал пэ́скиро ро́до, ни пал пэ́скири сэмэ́нца, со ёнэ сыс Израилёстыр.

62. Машкир лэ́ндэ сыс: чхавэ́ Делаияскирэ, чхавэ́ Товияскирэ, чхавэ́ Некодаскирэ – шовшэла́ штардэша́ дуй.

63. Рашандыр: чхавэ́ Ховаияскирэ, чхавэ́ Гакоцоскирэ, чхавэ́ Верзелиёскирэ, саво́ лыя́ палоро́м екха чхаендыр Верзелиёскирэ Галаадоскирэндыр и лэс ячнэ́ тэ кхарэ́н лэ́нгирэ лавэ́са.

64. Ёнэ родынэ лэ́нгирэ-родэнгиро пиричхиныбэн, и на латхнэ́, и палдава́ лэн вычхурдынэ рашандыр.

65. И Тиршафо пхэндя́ лэ́нгэ, соб (кай) ёнэ тэ на хан сама свэ́нта хабэна анги́л дова́, сыр явэ́ла раша́й уримоса и тумимоса.

66. Сарэ́ манушэ́н кхэтанэ́ сыс штардэша́ дуй тысёнцы, триншэла́ шовдэша́.

67. На гины́ дава́, лэ́ндэ сыс эфта́ тысёнцы триншэла́ трия́нда эфта́ писха́рья и писхарицы и пашы́л лэ́ндэ сыс дуйшэла́ штардэша́ пандж багаибнаскирэ и багаибнарки.

68. Лэ́ндэ сыс эфташэла́ трияндаэфта шов граё, и сыс дуйшэла́ штардэша́ пандж лошаки.

69. Лэ́ндэ сыс штаршэла́ трияндапандж верблюды, и сыс шов тысёнцы эфташэла́ биш ослы (мега́рья).

70. Вари-савэ́ барыдыра́ пэ стрэ́чы (поколении) дынэ́ кокорэ́ пэ́стыр паша́, соб (каи) тэ кэрэ́н бутя́. О Тиршафо дыя́ дрэ пиралы́ бар драхмы сувнака́са, пандждэша́ тахтая́, панджшэла́ трия́нда рашаитка и́ди.

71. И вари-савэ́ барыдырэндыр пэ стрэ́чы дынэ́ дрэ пиралы́, соб (кай) тэ кэрэ́н бутя́ биш тысёнцы драхмы сувнака́са.

72. И яви́р мануша́ дынэ́ биш бара́ драхмы сувнака́са, и дуй бара́ мины (1300 кило) рупэ́са, и шовдэша́ эфта́ рашаитка и́ди.

73. И ячнэ́ тэ дживэ́н рашая́, и Леви́ты, и ракхибна́рья пэ по́рта, и багаибнаскирэ и яви́р мануша́, и, Нефинеи и саро́ Израилё дрэ пэ́скирэ фо́рья.

5. Мэ да́ва зор Тырэ́ родо́скэ пэ сарэ́ ве́ки, и ґазда́ва Тыро́ троно пэ сарэ́ ро́ды. Сэ́ла.

6. И болыбна́скирэ Янго́лы явэ́на тэ шарэ́н Тут пал Тырэ́ ди́вы, Раё Дэ́вла, адя́кэ-паць пал Тыро́ патяибэ́н пэ свэнтонэнгиро скэдыибэ́н.

7. Кон пэ болыбэ́н исын равно Ра́скэ-Дэвлэ́скэ? Конэ́с машки́р болыбна́скирэ Янголэндэ сашты́ тэ припарувэн Ра́са-Дэвлэ́са.

8. Дэвэ́л исын баро́ кэ дар пэ свэнтонэнгиро скэдыибэ́н, Ёв исын зоралыпнаскиро, соб (кай) сарэ́, кон исын пашы́л Лэ́стэ, тэ дэн бари паты́в Лэ́скэ.

9. О, Раё Дэ́вла, Дэвэ́л болыбна́скирэ-янголэ́нгиро! Конэ́стэ исын дасаво зоралыпэ́н сыр Ту́тэ, Раё Дэ́вла? Ту сан патяибны́тко дро саро́.

10. Ту рикирэса зор пэ мо́рё (дэрья́в), сыр ёв холямэс ґлуминэла: ке́ли лэ́скирэ валны ґаздэ́напэ вучэ́с, Ту штылякирэса лэн.

21. Кон родэ́ла и джа́ла дурэды́р пир чачипэ́н и лачхэ́-илы́ткима, одова́ ману́ш латхэ́ла джиибэ́н, чачипэ́н и паты́в.

22. Годо́ ману́ш ублавэла (важынэла) фо́ро, кай зоралэ́ мануша́ исын, и пхагирэ́ла тэлэ́ форо́скиро рикирибэн, дро саво́ ёнэ зоралэ́с патя́на.

23. Кон приракхэла пэ́скиро муй и чиб, одова́ ману́ш ракхэ́ла пэ́скиро джиибэ́н пхарипнастыр.

24. Пхутькирдо ману́ш, и ману́ш, саво́ задэлапэ, кхарэ́лапэ бипатывакиро, ёв кэрэ́ла саро́ холямэ́ пхутькирибнаса.

25. Дова́, со зоралэ́с трэй кирнэ-масэнгирэ манушэ́скэ, мулякирэ́ла лэс, пал-дова́ со лэ́скирэ васта́ отпхэнэнапэ тэ кэрэ́н пхари́ буты́;

26. ёв исын ґа́лко и скэмпо саро́ дывэ́с, нэ чачуно́ ману́ш дэ́ла и на тангинэла.

27. Фуе-манушэ́нгиро свэ́нто дыибэ́н выкхарэла джунгалыпэ́н (брыткима), пэ кицы́ джунгалэдыр (брыткэдыр) исын дава́ чуин, ке́ли ёв янэ́ла свэ́нто дыибэ́н, фуес думиндой.

28. Хохано́ якхи́тко хасёла (пэрэ́ла), нэ ману́ш, саво́ ракирэ́ла саро́, со ёв джинэ́ла, явэ́ла тэ ракирэ́л усады (сак).

1. Ке́ли сыс прилыно тэ плывинас (дас пли́ма) дрэ Италия, тэды Павли́с и явирэ́н штарибнаскирэн здынэ тысенцэнгирэ-халадэ́нгирэ барыдырэ́скэ, савэ́с кхардэ́ Юлиё, ёв исын Аугустоскирэ полкостыр.

2. Амэ бэсцям пэ Адрамитоскири па́рма (кораблё), савэ́скэ трэиндя́ тэ традэл пашы́л Азиякирэ штэ́ты и традыям, амэ́нца сыс Аристархо, Македонянино Фесалоникэндыр.

3. И пэ яви́р дывэ́с амэ притрадыям дро Сидоно. Юлиё отлыджаласпэ илэ́са кэ Па́вли, дэ́лас во́ля лэ́скэ тэ псирэ́л кэ дру́ги (мала́), соб (кай) ёнэ тэ дыкхэ́н пал лэ́стэ.

4. И традыи одотхы́р, амэ традыям пашы́л Кипро балвалякирэ рига́тыр, пал-дова́ со яця́ бари балва́л маму́й (прямэс) дрэ амари́ риг.

5. Ке́ли амэ пириплывиндям (дыям плима) мо́рё (дэрья́в) Киликиякирэ и Памфилиякирэ брэгостыр, амэ притрадыям дрэ Ликиякирэ Миры:

6. одо́й халадэ́нгиро барыдыро́, латхя́ Александриякири па́рма, сави́ традыя́ кэ Италия, и чхудя́ амэн пэ ла́тэ тэ традас.

7. Амэ бут дывэса́ и пэ на́бут плывинасас (дасас плима), и пир бари зор амэ догиям кэ Книдо адя́кэ, со пир бари балва́л амэ на могиндям тэ плывинас дурэды́р, и амэ подтрадыям кэ Крито Салмоноскирэ рига́тыр.

8. И барэ́ пхарипнаса амэ традасас пашы́л Кипроскиро брэ́го, и явдя́м кэ екх штэ́то, саво́ кхарэнас Лачхэ́ Пристани (Затоки), на́дур одотхы́р сыс фо́ро Ласея.

9. Нэ адя́кэ, сыр прогия́ древа́н бут часо, и тэ плывинэс сыс дарано, пал-дова́ со и посто прогия́, тэды Па́вли лыя́ тэ патякирэл лэн,

10. и ёв ракирдя́ лэ́нгэ: “Мурша́лэ! Мэ дыкха́ва, со дава́ плывиныбэн явэ́ла бидаса и барэ́ хасякирибнаса на екх ваш екх пхарипэн (грузо) и па́рма, нэ и ваш манушэ́нгиро джиибэ́н.”

11. Нэ халадэ́нгиро барыдыро́ бутэды́р патяндыя манушэ́скэ, саво́ лыджалас па́рма и лэ́скирэ хула́скэ, а на Павлискирэ лавэнгэ.

12. И пал-дова́ со, сыр кадава́ затоко на подджалас, соб (кай) одо́й тэ явас саро́/и́ ивант (зима), и бут мануша́ сыс пал дова́, соб (кай) тэ традас криг одотхы́р, и, ко́ли тэ явэ́л саштыпэн тэ докэдаспэ кэ Финика и одо́й тэ джива́с ивантэ (зимакиро), Финика сыс Критоскиро порто, карик могиндлэ́ тэ заджа́н па́рмы, и сыс зачхакирдо балвалятыр паш-дывэсытконэ́-западнонэнгирэ и паш-ратитконэ́-западнонэ ригэ́ндыр.

13. И ке́ли яця́ набари балва́л паш-дывэсытконэ́ рига́тыр, ёнэ подуминдлэ, со ёнэ дорэснэ́ дова́, со лэ́нгэ трэй, ґаздынэ́ якорё тэ плывинэн (тэ дэн плима) на́дур брэгостыр пашы́л Крито.

14. Нэ сыг ґаздыя́пэ пэ Крито баро́ штормо, саво́ кхарэ́лапэ Евроклидоно.

15. И пал-дова́, со амари́ па́рма подухтылдя балва́л, ёй на могиндя́ тэ плывинэл (тэ дэл плима) дурэды́р проти балва́л, амэ мэкцям па́рма тэ плывинэл (дэл пли́ма) балваляса и амэн чхурдэлас дрэ сарэ́ рига́.

16. А ке́ли амэ сы́рбы пириурняндыям маму́й набаро́ котэ́р пхув, саво́ кхарэ́на Клавда, одо́й амэ барэ́ пхарипнаса пиризорьякирдям (збердындям) тэ рикирас пармакири ба́рка (лодка),

17. савья́ ґаздынэ́ пэ па́рма, ке́ли протырдынэ шолэ трусця́л и тэл па́рма и обпхандлэ́ ла; ёнэ дара́ндынэ, соб (кай) тэ на явэ́н вычхурдынэ балваляса пэ пра́хо дрэ Сирто, палдава́ ёнэ змэкнэ балвалунэ́ (па́русы) и дурэды́р ёнэ адя́кэ традэнас.

18. Нэ пал баро́ штормо, саво́ зоралэ́с чхурдэлас амари́ па́рма дрэ сарэ́ рига́, пэ яви́р дывэ́с амэ лыям тэ вычхурдас пхарипэ́н (грузо) дро пани́,

19. а пэ три́то дывэ́с ёнэ пэ́скирэ вастэ́нца вычхурдынэ саро́ пармакиро миштыпэ́н (оснашчэниё) дро пани́.

20. И сыр бут дывэса́ на сыс бицяло́ ни кхам, ни чэргэня́, и штормо на пириячэлас тэ штылёл; амэ хасякирдям кажно наде́я тэ зракхаспэ.

21. Палдава́ со древа́н ґара́ на ханэ́ нисо́, ёнэ хасякирдэ́ зор, то Па́вли тэрдия́ машкира́л лэ́ндэ, и пхэндя́: “Тумэ́нгэ трэиндя́ тэ кандэ́н ман: тэ на традас Критостыр, тэды амэ на пиридживасас дасави́ би́да и хасибэ́н.

22. Какана́ Мэ манга́ва тумэн, тэ на дарэ́н, пал-дова́ со ни екх ману́ш тумэ́ндыр на хасёла апри́ч па́рма.

23. Палдова́ со дрэ дая́-паць рат Дэвлэ́скиро Янго́ло явдя́ кэ мэ, Конэ́скиро мэ сом и Конэ́скэ мэ дынаринава,

24. и пхэндя́: “На андырша, Павле! Ту явэ́са тэ тэрдёс пэ сэ́ндо анги́л кхенинго́стэ (кесарёстэ); и, ґа́да, Дэвэ́л даринэла джиибэ́н сарэ́нгэ, кон плывинэла (дэла плима) ту́са.”

25. Палдава́ на дарэ́н, пал-дова́ со мэ патя́ва Дэвлэ́скэ, со саро́ явэ́ла адя́кэ, сыр Ёв пхэндя́ ма́нгэ.

26. Амэ сам бангэ́ тэ явас вычхурдынэ пэ вари-саво́ о́строво (джип).”

Romani Bible Baltic 2019

United Bible Societies for the Baltic Romani Mission