2. И яндя́ раша́й Е́здра Зако́но анги́л скэдыибэ́н муршэнгиро и джувленгиро и сарэ́ манушэ́нгиро, савэ́ могиндлэ́ тэ ґалён, дро пэ́рво (англатуно́) дывэ́с эфтатонэ-чхонэ́скиро;
3. и гиндя лэ́стыр пэ форуны́ (плошча), саво́ сыс анги́л Панитко по́рта, злоко́стыр кэ пашдывэс, анги́л муршэндэ и джувлендэ и сарэ́ндэ, савэ́ могиндлэ́ тэ ґалён: и сарэ́ манушэ́нгирэ кана́ шундлэ́ Законоскири лылвари́.
4. Лылваритко Е́здра тэрдия́ пэ каштуно вучипэ́н, саво́ ваш дова́ мануша́ кэрдэ́: пашы́л лэ́стэ, пир лэ́скиро право (чачо́) васт, тэрдинэ́ Матифия, и Шэма, и Анаия, и Урия, и Хелкия, и Маасея, а пир лэ́скиро ле́во (зэ́рво) васт Федаия, и Масаило, и Малхия, и Хашумо и Хашбадано, и Заха́рия, и Мешуламо.
5. И отчхакирдя́ лылвари́ Е́здра анги́л сарэ́-манушэ́нгирэ якха́, пал-дова́ со ёв сыс тэрдо́ вучэды́р сарэ́ манушэ́ндыр. И ко́ли ёв отчхакирдя́ ла, сарэ́ мануша́ уштынэ́.
6. И Е́здра бахтякирдя́ Рас-Дэвлэ́с, Дэвлэ́с вучэ́с. И сарэ́ мануша́ отпхэндлэ́: “Ами́нь, ами́нь”, ґаздыи упрэ́ пэ́скирэ васта́, – мангнэпэ и дынэ́ паклоно анги́л Растэ-Дэвлэ́стэ мо́са кэ пхув.
8. И гиндлэ́ (дынэ упрэ) лылварьятыр, Дэвлэ́скирэ Законо́стыр, яснэс, и причхувэнас смысло, и мануша́ ґалёнас, со сыс прогиндло.
9. Тэды Ниеми́я, ёв жэ Тиршафо, и лылвари́тко Е́здра, раша́й, и Леви́ты, савэ́ сыклякирдэ́ манушэ́н, пхэндлэ́ сарэ́ манушэ́нгэ: “Дывэ́с дава́ исын свэ́нто Ра́скэ-Дэвлэ́скэ, тумарэ́ Дэвлэ́скэ; на пиридживэн и на ровэ́н”; пал-дова́ со сарэ́ мануша́ рондлэ́, шуны Законо́скирэ лава́.
10. И пхэндя́ лэ́нгэ: “Джа́н, хан тхуло, и пьен гудло́, и бичхавэн хабнытка котэра́ (куски) одолэ́нгэ, конэ́стэ ничы́ нанэ заготовиндло; пал-дова́ со дывэ́с дава́ исын свэ́нто амарэ́ Ра́скэ-Дэвлэ́скэ. И на пиридживэн, пал-дова́ со ра́дыма Раскири-Дэвлэ́скири дэ́ла зор тумэ́нгэ.
11. Леви́ты штылякирдэ сарэ́ манушэ́н, ракири́: “Пириячэн, пал-дова́ со дава́ дывэ́с исын свэ́нто, на пиридживэн.”
12. И гинэ́ сарэ́ мануша́ тэ хан, и тэ пьен, и тэ бичхавэн хабнытка паша́ (котэра́), и тэ свэнкинэн барэ́ радыма́са; пал-дова́ со ёнэ ґалынэ́ лава́, савэ́ пхэндлэ́ лэ́нгэ.
6. Ту, Раё Дэ́вла, сан Екх, Ту создыян болыбэ́н, болыбэ́н пэ болыбэ́н и халадэ́н лэнгирэн, пхув и саро́, со исын пэ ла́тэ, мо́рё (дэрья́в) и саро́, со исын дрэ лэ́стэ, и Ту дэ́са джиибэ́н далэскэ сарэскэ и болыбны́тка халадыбэна дэ́на паты́в Ту́кэ.
7. Ту Кокоро́, Раё Дэ́вла, выкэдыян Авраамос, вылыджиян лэс Уростыр Халдеенгирэндыр и дыя́н лэ́скэ лав Авраа́мо,
8. и Ту ґалыян лэс чачунэса анги́л Пэ́стэ и дыя́н лэ́скэ завето, соб (кай) тэ дэс лэ́скирэ чхавэ́нгэ пхув Хананеенгири, Хетеенгири, Амореенгири, Ферезеенгири, Евусеенгири, Гергесеенгири. И Ту кэрдя́н пир Пэ́скиро лав, пал-дова́ со Ту сан чачуно́.
9. Ту дыкхця́н би́да амарэ́-дадэнгири дро Еги́пто, и Ту шундя́н лэ́нгири годлыма пашы́л Лоло́ мо́рё (дэрья́в).
10. Ту кэрдя́н знаме́нии (ґертыка́) и ди́вы анги́л фараоностэ и анги́л сарэ́ндэ пэскирэндэ писхарьендэ, и анги́л саро́ лэ́скиро народо, пал-дова́ со Ту джиндян, со ёнэ кэрдэ́ накуч лэ́нца и кэрдя́н пэ́скэ малва кэ ададывэсатуно дывэ́с.
11. Ту ростырдыян анги́л лэ́ндэ мо́рё (дэрья́в) и ёнэ машки́р пани́ гинэ́, сыр пир шуки́ пхув, и одолэ́н, кон традыяпэ пал лэ́ндэ, Ту тасадякирдян лэн сыр бар дрэ барэ́ паня́.
13. Ту явдя́н пэ бэ́рга Синаё и ракирдян лэ́нца болыбна́стыр и дыя́н лэ́нгэ чачунэ́ сэнды, патяибнытка зако́ны, лачхэ́ упхэныбэна́ и припхэныбэна́.
14. Пхэндя́н лэ́нгэ пал свэ́нто Тыро́ са́вато, и припхэныбэна́, и упхэныбэ́н и сэнды пиридыян лэ́нгэ пир Пэ́скирэ писхаристэ, Мойзастэ.
15. Ту дыя́н лэ́нгэ маро́ болыбна́стыр, сыр ёнэ сыс бокхалэ́, и пани́ барэстыр Ту дыя́н, ке́ли ёнэ камлэ́ тэ пьен, и пхэндя́н лэ́нгэ, соб (кай) ёнэ тэ джа́н, и тэ лэн пхув, пал сави́ Ту совлахадян лэ́нгэ тэ дэс, сыр Ту ґаздыян васт Пэ́скиро.
16. Нэ ёнэ и дада́ амарэ́ сыс нахрата и рикирдэ пэ́скири мэн вучэ́с, и на шундлэ́ Тырэ́ припхэныбэна́.
17. Ёнэ на закамлэ тэ поддэнпэ, на пририпирдэ ди́вы тырэ́, савэ́ ту кэрдя́н лэ́нца, и рикирдэ мэн упрэ́ и пир пэ́скири во́ля палэ чхудэ́ анги́л пэ́стэ шэралэс, соб (кай) тэ явэ́н писхарье́нца. Нэ Ту, сан Дэ́вла, Саво́ выкэдэ́ла тэ отмэкэ́л грэ́хи, Саво́ длэнгэс вырикирэ́ла, и Ту на ячкирдян лэн.
18. На дыкхи́, со ёнэ кэрдэ́ пэ́скэ сувнакуно́ вычхудо гуруворо и пхэндлэ́: “Дава́ исын амаро́ дэвэл, саво́ вылыджия́ тут Египто́стыр, и на дыкхи́, со ёнэ кэрдэ́ баро́ обракирибэн.
20. И Ту дыя́н лэ́нгэ Пэ́скиро лачхо́ Ду́хо, соб (кай) тэ сыклякирэс лэн и мана пэ́скири на отлэсас лэ́нгирэ мо́стыр и пани́ дыя́н лэ́нгэ тэ пьен.
21. Штардэша́ бэрш Ту дыя́н лэ́нгэ тэ хас пэ чхучи́ пхув, ёнэ ни дро со на маиндлэ трэ́бима; и́дя лэ́нгири на пхурия, и ґэра́ на шулынэ.
22. И Ту дыя́н лэ́нгэ кралипэна́ и народы и росчхудян лэн пэ паша́ и пхув Сигоноскири яця́ лэ́нгири, и пхув Есевонэскири, и пхув Огоскири, крали́скирэ Васаноскири.
23. Чхавэ́н лэнгирэн Ту убарьякирдян пэ бут сыр чэргэня́ пэ болыбэ́н и лыджиян лэн пэ пхув, пал сави́ Ту ракирдян лэ́нгирэ дадэ́нгэ, со ёй явэ́ла лэ́нгири.
24. И загинэ́ чхавэ́ лэ́нгирэ и пхув яця́ лэ́нгири. Ту отдыян Хананеенгирэ манушэ́н лэ́нгэ дрэ васта́ и кра́лья лэ́нгирэ ячнэ́ тырэ́ и манушэ́н, соб (кай) ёнэ тэ кэрэ́н лэ́нца, со закамэна.
25. И залынэ ёнэ зоралэ́ фо́рья и лачхи́ пхув и лынэ́ ёнэ пэ́скэ кхэра́ сарэ́ барвалыпнаса, колба́ни (водоёмы), савэ́ сыс барэстыр, винаграды́тка и маслинитка унты (сады) и бут дрэвы плодэнца ваш хабэ́н. Ёнэ ханэ́, чалынэ, тхулынэ и коштындлэ пир Тыри́ ла́ска.
26. И кэрдэ́пэ ёнэ нахрата (упряма), и на лынэ́ тэ кутякирэн Тут и ячкирдэ́ Зако́но, замардэ́ пророкэ́н, савэ́ дэ́нас лэ́нгэ годы́ тэ патяс дрэ Ту́тэ, и кэрдэ́ барэ́ калякирибэна.
27. Ту отдыян лэн лэ́нгирэ вэргэ́нгэ, савэ́ притасавэнас лэн. Нэ, сыр дро пхаро́ часо, ёнэ кхардэ́ Тут, Ту шундя́н лэн болыбна́стыр, пир Пэ́скири ла́ска Ту дэсас лэ́нгэ зракхибнаскирэн, и ёнэ зракхэнас лэн вэргэ́ндыр.
28. Сыр саро́ сыс куч и штыл, нэвэ́с ёнэ лэнаспэ пал налачхипэн, и Ту отдэсас лэн вэргэ́нгэ дрэ васта́ и вэ́рги сыс хулая́ пэ лэ́ндэ. Нэ сыр ёнэ нэвэ́с кхардэ́ тут, Ту шундя́н лэн и брониндян лэн (затэрдиян пал лэ́ндэ) бут мо́лы пир Тыри́ лачхэ́-илы́ткима.
29. Ту пририпирэсас лэ́нгэ тэ дживэ́н пир Зако́но, нэ ёнэ на лыджинэ́ пэ́скиро джиибэ́н адя́кэ, и на шундлэ́ Тырэ́ припхэныбэна́ и гинэ́ на долэ́ дромэ́са, сыр Тыро́ стату́то (уставо) ракирдя́, савэ́нца тэ явэ́л джидо́ ману́ш, ко́ли кэрдя́ бы пир стату́то (уставо), и думо пэ́скиро кэрдэ́ твардо и мэн пэ́скири рикирдэ вучэ́с и на кандэнас Тут.
30. Ужакири лэ́нгиро рисибэн кэ Ту, Ту учхакирдян бут бэ́рги и пририпирэсас лэ́нгэ Пэ́скирэ Духо́са пир пророкэ́ндэ, нэ ёнэ на шундлэ́. И ту пиридыян лэн тэ васта́ явирэ народэнгэ.
31. Нэ, пир Пэ́скири лачхэ́-илы́ткима Ту на замардян лэн кэ ко́нцо, и на мэкцян лэн, пал-дова́ со Ту сан Дэвэ́л лачхо́ и лачхэ́-дескиро.
33. Дро саро́, со амэ́нца кэрдя́пэ, Ту сан чачуно (право), пал-дова́ со Ту кэрдэн пир чачипэ́н и амэ сам бангэ́.
34. Амарэ́ кра́лья, тхага́рья амарэ́, рашая́ и дада́ амарэ́ на дживдэ́ пир Зако́но и на шундлэ́ Тырэ́ припхэныбэна́ и пририпирибэна Тырэ́.
35. И дро лэ́скиро кралипэ́н ёнэ на дынариндлэ́ Ту́кэ, пир Тыро́ баро́ лачхипэ́н, саво́ Ту дыя́н лэ́нгэ, и пэ буґлы и тхулы пхув, сави́ Ту откэдыян ваш лэ́нгэ, и ёнэ на рисёнас пэ́скирэ фуе́ рэндэ́ндыр.
36. И, акэ, амэ сам писха́рья акана́, пэ дая́ пхув, сави́ Ту дыя́н амарэ́ дадэ́нгэ, соб (кай) тэ хас ла́кирэ барьякирдэ́ (пло́ды), и тэ чараваспэ ла́кирэ лачхипна́са, акэ, амэ сам писха́рья пэ дая́ пхув.
37. И ла́кирэ барьякирдэ́ ёй дэ́ла бутэ́ кральенгэ, пир савэ́ндэ Ту лыян зор пэ амэ́ндэ пал грэ́хи амарэ́. И ёнэ рикирна зор пэ амарэ́ маса́ и пэ амарэ́ кхэритконэ́ мурдалэ́ндэ (ското) пир пэ́скиро ило́, и амэ сам притасадэ.
38. И пир саро́ дава́ амэ даса зорало́ отпхэныбнытко лав, и подчхинаса, и пэ дава́ подчхиныбэн явэ́ла чэргэн амарэ́ тхагарьендыр, и амарэ́ Левитэндыр, и амарэ́ рашандыр.”
11. Ту пхарадян Еги́пто пэ котэра́, сыр кодолэ́с, кон исын мулякирдо; Ту росчхурдыян Тырэ вэргэ́н Тырэ зоралыпнаскирэ вастэ́са.
12. Тыро́ исын болыбэ́н и Тыри́ исын пхув, свэ́то и саро́, со́са ёв исын пхэрдо́. Ту зачхудян лэн.
13. Ту создыян паш-рати́тко и паш-дывэсы́тко риг, Фаворо и Ермоно радынэ́напэ Тырэ́ лавэ́стыр.
42. Халадэ́ кэдынэпэ тэ замарэ́н сарэ́н штарибнаскирэн, соб (кай) нико́н лэ́ндыр тэ на выплывинэл (тэ на дэл плима пэскэ криг) и тэ на нашэ́л.
43. Нэ тысёнцэнгиро барыдыро́ камдя́ тэ зракхэ́л Павли́с и на домэкця лэн тэ кэрэ́н дава́ и припхэндя́ одолэ́нгэ, кон джинэ́ла тэ плывинэл, тэ ухтэн дро пани́ и тэ выджа́н пэ пхув,
44. а кодолэ́нгэ, со ячнэ́пэ, тэ выкэдэнпэ кэ па́рма, конэ́скэ пэ пхаля, а конэ́скэ пэ дова́, со яця́пэ парма́тыр, и адя́кэ выгия́, со сарэ́ зракхнэпэ пане́стыр пэ пхув.
Romani Bible Baltic 2019
United Bible Societies for the Baltic Romani Mission