Bible in one year July 30Nehemiah 12:1-471. Ѓа́да, исын рашая́ и Леви́ты, савэ́ явнэ́ Зоровавелёса, Салафилоскирэ чхавэ́са и Исусо́са (Ёхошуаса): Сераия, Ереме́ё, Е́здра,2. Амария, Малухо, Хатушо,3. Шэхания, Рехумо, Меремофо,4. Идо, Гинефоё, Авия́,5. Миямино, Маадия, Вилга,6. Шэмаия, Иоарифо (Еяриво), Иедая,7. Салу, Амоко, Хелкия, Едаия. Акэ, ёнэ сыс раша́нгирэ шэралэ́ и лэ́нгирэ пша́ла дрэ Исусо́скирэ (Ёхошуаскирэ) дывэса́.8. А Леви́ты: Ису́со (Ёхошуа́), Бинуё, Кадмиило, Шэревия, Юда, Матфания, шэрало́ тэ парикирэ́н Дэвлэ́скэ псалмэнца, ёв и лэ́скирэ пша́ла,9. И Бакбукия и Униё, лэ́нгирэ пша́ла, кон адя́кэ-паць, сыр ёнэ, ракхнэ по́рта.10. Исусо́стыр бия́ндыя Иоакимо, Иоакимостыр бия́ндыя Елиашыво, Елиашывостыр бия́ндыя Иоуада,11. Иоаидастыр бия́ндыя Ионафа́но, Ионафаностыр бия́ндыя Иадуё.12. Дрэ Иоакимоскирэ дывэса́ сыс рашая́, родоскирэ (стрэчакирэ) шэралэ́: Сераияскирэ кхэрэ́стыр Мераёскирэ, и Еремеёскирэ, кхэрэ́стыр Ханания,13. Ездраскирэ кхэрэ́стыр Мешуламо, Амарияскирэ кхэрэ́стыр Иоханано,14. Мелихоскирэ кхэрэ́стыр Ионафа́но, Шэванияскирэ кхэрэ́стыр Иосифо (Ёза),15. Харимоскирэ кхэрэ́стыр Адна, Мераиофоскирэ кхэрэ́стыр Хелкия,16. Идоскирэ кхэрэ́стыр Заха́рия, Гинефоноскирэ кхэрэ́стыр Мешуламо,17. Авиёскирэ кхэрэ́стыр Заха́рия, Миниаминоскирэ кхэрэ́стыр, Моадиёскирэ кхэрэ́стыр Пилтаё,18. Вилгаскирэ кхэрэ́стыр Шамуё, Шэмаияскирэ кхэрэ́стыр Ионафа́но,19. Иояривоскирэ кхэрэ́стыр Мафнаё, Едаияскирэ кхэрэ́стыр Узиё,20. Салаёскирэ кхэрэ́стыр Калаё, Амокоскирэ кхэрэ́стыр Еверо,21. Хелкияскирэ кхэрэ́стыр Хашавия, Недаияскирэ кхэрэ́стыр Нафанаило.22. Акэ, исын Леви́ты, шэралэ́ пэ стрэ́чы дрэ дывэса́ Елиашывоскирэ, Иоиадаскирэ, Ехананоскирэ и Иадуёскирэ, савэ́ залыджинэ сыс дрэ зачхиныбэн, и адя́кэ-паць рашая́, ке́ли кралиндя Дариё Персиятыр.23. Чхавэ́ Левиёскирэ, савэ́ сыс шэралэ́ пэ стрэ́чы, сыс зачхиндлэ́ дрэ родоскири лылвари́ кэ дывэсэ́ Иохананоскирэ, кон сыс чхаво́ Елишывоскиро.24. Шэралэ́ Левитэ́нгирэ сыс: Хашавия, Шэревия, и Ису́со (Ёхошуа́), чхаво́ Кадмиилоскиро, и пша́ла лэ́нгирэ, ёнэ сыс чхудэ́ тэ бахтякирэн, ке́ли парикирэна, пир Давидо́скиро упхэныбэ́н, кон сыс ману́ш Дэвлэ́скиро – екх змена пал яви́р змена.25. Матфания, Бакбукия, Овадия, Мешуламо, Талмоно, Акуво-стрэгарья, ракхибна́рья пэ проги кэ по́рта.26. Ёнэ дживдэ́ дрэ дывэса́, ке́ли сыс Иоакимо, чхаво́ Исусо́скиро, чхаво́ Ёседэкоскиро, и дрэ дывэса́, ке́ли барыдыро́ пэ округа сыс Ниеми́я, и лылвари́тко сыс Е́здра, раша́й.27. Акана́, сыр обсвэнцынэна ва́нты Ерусалимо́скирэ, то лэ́нгэ трэиндя́ тэ латхэ́н Левитэ́н пир сарэ́ штэ́ты, соб (кай) тэ янэ́н лэн дро Ерусалимо, соб (кай) тэ свэнкинэн, ке́ли обсвэнцынэна и ваш ра́дымакиро свэ́нко, парикирибнаса и багаибнаса тэл зан цымбалэнгири, псалтиренгири и арфакири.28. И скэдынэ́пэ чхавэ́ багаибнаскирэ округатыр Ерусалимсконатыр и гавэндыр Нетофафоскирэндыр,29. и Беф-Гагилгалостыр и фэлдэндыр дрэ Гева и Азмавето; пал-дова́ багаибнаскирэ чхудэ́ пэ́скэ гава́ трусця́л Ерусалимо.30. И жужакирдэ́ (очистиндлэ) пэс рашая́, и Леви́ты, и жужакирдэ́ явирэ манушэ́н, и по́рта, и ва́нта.31. Адя́кэ мэ лыджиём барыдырэ́н Юдэя́тыр пэ ва́нта, и мэ чхудём дуй барэ́ хоры тэ джа́н парикирибнаса, и екх хоро гия́ пэ чачи́ риг вантакири кэ/жы́ко Гнэёскири по́рта.32. Пал лэ́ндэ гия́ Гашаия, и паш барыдыра́ пэ Юдэ́я;33. Аза́рия, Е́здра и Мешуламо,34. Юда, и Вениамино, и Шэмаия, и Ереме́ё;35. и вари-савэ́ чхавэ́ раша́нгирэ рогэ́нца (трубэнца): Заха́рия, чхаво́ Ёнафаноскиро, чхаво́ Шэмаияскиро, чхаво́ Матфанияскиро, чхаво́ Михеёскиро, чхаво́ Закуроскиро, чхаво́ Асафоскиро;36. и пша́ла лэ́скирэ: Шэмаия, Азариило, Милалаё, Гилалаё, Мааё, Нафанаило, Юда, и Хананиё музыкальнонэ струментэнца Давидостыр, саво́ сыс Дэвлэ́скиро ману́ш, и лылвари́тко Е́здра гия́ анги́л лэ́ндэ.37. Пашы́л фолахароскири (фонтаноскири) по́рта анги́л лэ́ндэ, ёнэ гинэ́ упрэ́ пир ґэруня (ступеньки) кэ фо́ро Давидо́скиро, пэ стылба/уклани (лесвица), сави́ сыс пэ ва́нта пал кхэр Давидо́скиро адя́кэ дур, сыр кэ Панескири по́рта кэ васто́ко.38. Яви́р хоро, саво́ парикирэлас, гия́ дрэ яви́р риг, и пал лэ́ндэ мэ, и паш народоскири пир ва́нта Бовэскирэ вучардятыр (башнятыр) и кэ буґлы ва́нта.39. И Ефремо́скирэ портатыр, пашы́л пхураны по́рта, пашы́л Мачхэнгири по́рта, и Хананелоскири портатыр, Меяскирэ портатыр, кэ Бакрэнгири по́рта, и тэрдинэ́ пашы́л Штарибнаскири по́рта.40. Тэ́ньци дуй далэ́ хоры парикирибнытка тэрдинэ́ проти Кхэр Дэвлэ́скиро, мэ и пашы́л ма́нца паш барыдырэ́н.41. И рашая́: Елиакимо, Маасея, Миниамино, Михеё, Елиоэнаё, Заха́рия, Ханания рогэ́нца,42. и адя́кэ-паць: Маасея, и Шемаия, и Елиза́ро, и Узиё, и Ёханано, и Малхия, и Еламо, и Езеро. И багандлэ зоралэ́с багаибнаскирэ: лэ́нгиро барыдыро́ сыс Израхия.43. И янэ́нас дро дова́ дывэ́с барэ́ дыибэна́, и радындлэпэ, пал-дова́ со Дэвэ́л дыя́ лэ́нгэ бари ра́дыма. Радындлэпэ лошаса (радыма́са) и джувля́, и бияты, и ра́дыма (лош) Ерусалимо́скири сыс шундлы дур.44. И дро дова́-паць дывэ́с сыс чхудэ́ мануша́ пир шту́бы дрэ пиралы́ (кладовка) тэ янэ́н свэ́нта дыибэна́, соб (кай) тэ скэдэ́н фэлдэндыр трусця́л фо́рья паша́, савэ́ трэиндя́ рашангэ и Левитэ́нгэ пир Зако́но ваш рашангэ и Левитэ́нгэ; пал-дова́ со Юдэенгэ сыс радыпныткэс тэ дыкхэ́н пэ рашандэ, и пэ Левитэндэ, савэ́ сыс тэрдэ́.45. Савэ кэрдэ́ свэ́нто буты́ пэ́скирэ Дэвлэ́скэ, и савэ́ жужакирдэ́ манушэ́н, и ёнэ сыс багаибнаскирэ и ракхибна́рья пэ по́рта пир упхэныбэ́н Давидо́скиро и лэ́скиро-чхавэ́скиро Соломо́но.46. Пал-дова́ со ґара́ дрэ дывэса́ Давидо́скирэ и Асафоскирэ, сыс чхудэ́ шэралэ́ пэ багаибнаскирэндэ, и шарибнытка гиля́ и гиля́ Дэвлэ́скэ, тэ барьякирэ́н и тэ парикирэ́н.47. Дрэ дывэса́, ке́ли дживдэ́ Зоровавелё и Неемия, сарэ́ Израильтя́ни дэ́нас лэ́нгирэ хабнытка порцыи багаибнаскирэнгэ пэ кажно дывэ́с, и ёнэ отдэнас обсвэнцындлэ предметы (чы́сы) Левитэ́нгэ, а Леви́ты пиридэнас обсвэнцындлэ предметы Аароно́скэ.Nehemiah 13:1-311. Дро дова́ дывэ́с гиндлэ́ машки́р манушэ́ндэ лылвари́ Мойзаскири и ґалынэ́ дрэ ла́тэ: “Амонитянино и Моавитянино на могинэ́на тэ заджа́н дро Дэвлэ́скиро кхэтаныпэн никели,2. пал-дова́ со ёнэ на стрэниндлэ Израилёскирэ чхавэ́н марэ́са и пане́са и лынэ́ пэ лэ́ндэ Валамос, соб (кай) тэ магирэс лэн; но Дэвэ́л амаро́ пирикирдя магирибэн дро бахтякирибэ́н.”3. Сыр ёнэ шундлэ́ дава́ Зако́но, ёнэ вылыджинэ́ саро́ народо, саво́ на сыс Израилёскирэ манушэ́ндыр.4. Анги́л дава́ раша́й Елиашыво, саво́ сыс тырдо паш шту́бы (комнаты) дро амаро́ Дэвлэ́скиро Кхэр, саво́ сыс пашатуны сэмэ́нца Тонияскэ,5. кэрдя́ ваш лэ́скэ бари шту́ба, дрэ сави́ англэды́р чхувэ́нас да́ры марэстыр, ладано и штэклы и дэшэнгири (ме́ра) марэстыр, моля́тыр (виностыр) и ксилэстыр, савэ́ трэй тэ явэ́н пир Зако́но ваш Левитэ́нгэ, багаибнаскирэнгэ и ракхибнарьенгэ, и да́ры ваш рашангэ.6. Сыр саро́ дава́ сыс, мэ на со́мас дро Ерусалимо, пал-дова́ со дро трия́нда яви́р бэрш Вавилоно́скирэ крали́скирэ Артаксеркоскирэ мэ псирдём кэ кра́ли и пир вари-савэ́ дывэса́ нэвэ́с вымангдёмпэ крали́стыр.7. Сыр мэ явдём дро Ерусалимо и уджиндём пал на́лачхо рэ́ндо, саво́ кэрдя́ Елиашыво, саво́ кэрдя́ шту́ба ваш Тонияскэ дро Дэвлэ́скиро Кхэр,8. то ма́нгэ сыс зоралэ́с пхарэ́с (на пир ило́), и мэ вычурдыём сарэ́ кхэри́тка предметы (чы́сы) Тонияскирэ яври́ штубэндыр.9. И пхэндём, соб (кай) тэ выжужакирэн шту́бы, и чхурдыём лав (пропониндём), соб нэвэ́с тэ залыджан кхорэ́ (сасу́ды) Дэвлэ́скирэ Кхэрэскир одори́к, да́ры марэстыр и ладано.10. Кэ саро́ уджиндём мэ, со Левитэ́нгэ на отдэнас лэ́нгири паш, и со Леви́ты и багаибнаскирэ рознашнэпэ кажно пир пэ́скири фэ́лда.11. Мэ костём пал дава́ шэралэн, и пхэндём: “Пал со ячкирдям амэ Дэвлэ́скиро Кхэр?” И мэ скэдыём лэн и чхудём лэн пэ пэ́скиро штэ́то.12. Сарэ́ Юдэи ячнэ́ тэ янэ́н дэ́што паш пир маро́, мол (вино), ксил дрэ пиралы́.13. Мэ чхудём паш пираля́ раша́с Шэлэмияс и Садокос лылваритконэс, и о Феданияс Левитэндыр и паш лэ́ндэ сыс Ханана, чхаво́ Матфанияскиро, пал дова́, со ёнэ сыс чачунэ́. И пэ лэ́ндэ сыс зор тэ роздэн дава́ лэ́нгирэ пшалэ́нгэ.14. Ри́пир ман пал дава́, миро Дэ́вла, и на бистыр мирэ́ лачхэ́ рэ́нды, савэ́ мэ кэрдём ваш миро Дэвлэ́скиро Кхэр и ваш раша́нгирэ рэ́нды (де́лы) паш лэ́стэ.15. Дрэ долэ́ дывэса́ дыкхцём мэ дрэ Юдэ́я, со дро са́вато (субо́та) тасавэна дро пресо, лыджа́на ґарбы (снопы) и чхувэ́на мол, винаградо, инжыро и кажно пхарипэ́н и лыджа́на дро са́вато дро Ерусалимо. И мэ зоралэ́с выпхэндём лэ́нгэ дро дова́ дывэ́с, сыр ёнэ бикнэнас хабнытко.16. Тиряни дживдэ́ кэ Юдэ́я и янэ́нас мачхэ́ и разно товаро (арцикуло) и бикнэнас лэс дро са́вато манушэ́нгэ Юдэя́тыр и Ерусалимо́стыр.17. И мэ костём барыдырэ́н Юдеятыр и пхэндём лэ́нгэ: “Пал со тумэ́ кэрэ́на дасаво налачхипэн и магирэна са́вато?18. Хай, на адя́кэ-паць кэрдэ́ тумарэ́ дада́ и пал дава́ Дэвэ́л амаро́ яндя́ пэ амэ́ндэ и пэ дава́ фо́ро сари́ дая́ би́да? Тумэ́ холякирэна буты́р Дэвлэ́с пэ Израилё, магири са́вато (субо́та).19. Пало́ (после) дава́, сыр кэрдя́пэ цямло (кало́) пашы́л Ерусалимо́скири по́рта, анги́л са́вато, мэ припхэндём тэ закэрэн вудара́ и пхэндём, соб (кай) тэ на псиравэн (отпхандэн) лэн анги́л злоко пало́ (после) са́вато.20. Бикибнарья и кофарья кажнонэ́ товароса (арцикулоса) ратькирдэ на дро Ерусалимо и е́кхвар и буты́р.21. Мэ шылалэс выпхэндём лэ́нгэ, и пхэндём: “Пал со тумэ́ ратькирна паш дая́ ва́нта? Ко́ли тумэ́ ишчо (инкэ́) е́кхвар адя́кэ кэрна, то мэ чхува́ва васт пэ тумэ́ндэ.” Далэ́ дывэсэ́стыр ёнэ буты́р на явэ́нас дро са́вато.22. Мэ припхэндем Левитэ́нгэ, соб (кай) ёнэ тэ кэрэнпэ жужэ́ (чыста) и тэ явэ́н тэ рикирэ́н стрэ́га пэ по́рта, ваш дова́, соб (кай) тэ свэнкинэн дывэ́с саватытко. И пал дава́, “Ри́пир пал ма́ндэ, Дэ́вла, и приманг ман пир Пэ́скири лачхэ́-илы́ткима.”23. Ишчо дрэ долэ́ дывэса́ мэ дыкха́вас Юдэ́н, савэ́ лынэ́ пэ́скэ борьен Азотянкэндыр, Моавитянэндыр и Аммонитянэндыр,24. И пал дова́ чхавэ́ лэ́нгирэ ракирна паш пир пир-азотытко, ци пэ чиба́ явирэ-манушэ́нгирэ и на джинэ́на тэ ракирэ́н Юдыткэс.25. Мэ костём лэн пал дова́ и магирдём лэн, и вари-савэ́н муршэ́н лэ́ндыр мардём, костём пал лэ́нгирэ бала́ и мангдём лэн Дэвлэ́са, соб (кай) ёнэ тэ на отдэ́н пэскирэн чхае́н пал лэ́нгирэ чхавэ́ндэ, и тэ на лэн чхае́н лэнгирэн пал пэ́скирэ чхавэ́н и пал пэ́стэ.26. Ци на пал лэ́ндэ, – ракирдём мэ, – кэрдя́ грэ́хи Соломо́но, кра́ли Израилёскиро? На сарэ́ндэ манушэ́ндэ сыс дасаво кра́ли, сыр Соломо́но. Лэ́скэ сыкадя́ лэ́скиро Дэвэ́л и Дэвэ́л чхудя́ лэс крали́са пэ сарэ́ндэ Юдэ́ндэ: и явирэ пхувья́тыр джувля́ залыджинэ лэс дро блэ́ндо.27. И сашты́ ли амэ́нгэ тэ шунэ́с пал амэ́ндэ, со тумэ́ кэрна саро́ дава́ налачхипэн анги́л амарэ́ Дэвлэ́стэ, ко́ли ла́са явирэ джувле́н?”28. Иоидаскиро чхавэ́ндыр, чхавэ́с барэ́ раша́с Елиашывос, лэ́скиро дад сыс джамутрэса (зятёса) Санавалатоскирэса, Хоронитконэса. Мэ вытрадыём лэс пэ́стыр.29. “Ри́пир лэ́нгэ, миро Дэ́вла, пал-дова́ со ёнэ магирдэ́ рашаибэн и завето раша́нгиро и Левитэнгиро.”30. Адя́кэ, мэ вымордём лэн сарэ́ манушэ́ндыр на Израилёскирэ манушэ́ндыр и кэрдём дынарибэ́н раша́нгиро и Левитэнгиро, кажнонэскиро пир лэ́скиро рэ́ндо.31. И кашта́ тэ янэ́н кэ пэ́скиро часо и англатунэ́ барьякирдэ́ (пло́ды). Ри́пир ман, Дэ́вла миро, ваш миро миштыпэ́н!Psalms 89:30-3730. И мэ ўса́ды (сак) ява́ва тэ зорьякирав лэ́скирэ чхавэ́н и лэ́скиро троно явэ́ла ада́кицы дывэса́, кицы́ исын болыбэ́н.31. Ко́ли лэ́скирэ чхавэ́ мэкэ́на Ман, и на явэ́на тэ дживэ́н пир Мирэ́ припхэныбэна́;32. пал-дова́ со ёнэ явэ́на тэ пхагирэн Мирэ́ стату́ты (уставы) и на явэ́на тэ ракхэ́н Мирэ́ припхэныбэна́:33. тэды Мэ чхува́ва ка́ра дэстэса пэ лэ́ндэ пал лэ́нгирэ чорэ́ рэ́нды, и Мэ пэкавава лэн пал лэ́нгирэ грэ́хи.34. Нэ мэ на лава́ криг Мири́ лачхэ́-илы́ткима Давидостыр и Мэ на домэкава, соб (кай) миро патяибэ́н тэ хасёл;35. Мэ на пхагирава Миро завето, Мэ на парувава дова́, со выгия́ Мирэ́ мо́стыр.36. Екхвар мэ совлахадём Мирэ́ Свэнтымаса, со мэ ние́кхвар на хохавава Давидо́с:37. лэ́скиро ро́до ўса́ды (сак) ячэ́лапэ и лэ́скиро троно явэ́ла ґара́ (длу́гэс), сыр кхам, со свэнцынэла анги́л Ма́ндэ.Proverbs 22:3-43. Барэ́-годя́киро ману́ш дыкхэ́ла анги́л биба́хт (би́да) и гарадёла, нэ просто джа́ла анги́л и явэ́ла сэндякирдо.4. Кон кандэ́ла, и дарэ́ла Ра́стыр-Дэвлэ́стыр, кодова́ дорэсэ́ла барвалыпэ́н, паты́в и джиибэ́н.Rimanenge 1:1-321. Па́вли, Исусо́скиро Христосо́скиро писха́ри (рабо), савэ́с Дэвэ́л кхардя́ кэ Пэ тэ явэ́л Апостолоса и выкэдыя́ тэ роспхэнэл Дэвлэ́скири бахталы́ зан (звесь),2. пал савэ́стэ Дэвэ́л англэды́р дыя́ лав пир Пэ́скирэ пророкэ́ндэ дрэ Свэ́нта Чхиныбэна,3. пал Пэ́скирэ Чхавэ́стэ, Саво́ пир Пэ́скиро манушы́тко бияныпэ́н яця́ Давидо́скирэ родо́стыр,4. отджидыя́ мулэ́ндыр, амаро́ Рай Дэвэ́л Ису́со Христо́со, Саво́ сыс свэ́нто бияныпнастыр и допхэндя барэ́ зорья́са, со Ёв исын Дэвлэ́скиро Чхаво́;5. пир Лэ́стэ амэ дорэсцям (долыям) Дэвлэ́скиро бахталыпэ́н тэ явас Апостолэ́нца, соб (кай) дрэ Лэ́скиро лав тэ сыклякирас патяибна́скэ и кандыпна́скэ сарэ́ на́цыи,6. машки́р савэ́ндэ и тумэ́ сан, конэ́с кхардя́ Ису́со Христо́со:7. сарэ́нгэ, кон дживэ́ла кэ Римо, савэ́ ячнэ́ дро́га Дэвлэ́скэ и савэ́ исын кхардэ́ тэ явэ́н Лэ́скирэ свэнтонэнца: бахталыпэ́н и рама́нё (миро) тумэ́нгэ Дэвлэ́стыр Дадэ́стыр амарэстыр, и Ра́стыр-Дэвлэ́стыр, Исусо́стыр Христосостыр.8. Англыдыр сарэ́стыр мэ парикирава Дэвлэ́скэ Мирэ́скэ пир Исусо́стэ Христосо́стэ пал сарэ́ндэ тумэ́ндэ, пал-дова́ со патяибэ́н тумаро́ исын джиндло́ сарэ́ свэтоскэ.9. Пал-дова́ со Дэвэ́л исын якхи́тко (свидетелё) ма́нгэ, Савэ́скэ мэ дынарина́ва (служына́ва) мирэ́ духо́са и роспхэнава бахталы́ звесь пал Лэ́скирэ Чхавэ́стэ, со мэ саро́ часо дрэ пэ́скиро мангипэ́н Дэвлэ́скэ рипирава пал тумэ́ндэ,10. мэ ўса́ды (сак) мангавапэ, соб (кай) тэ явэ́л Дэвлэ́скири во́ля, вари-ке́ли тэ явав кэ тумэ́.11. Пал-дова́ со мэ древа́н кама́м тэ дыкха́в тумэн, и тэ подрикирав тумэн Духо́са и розделинав тумэ́нца духовно тала́но: явэ́н зоралэды́р дрэ патяибэ́н;12. соб (кай) фэды́р сарэ́стыр амэ тэ помогинас и тэ подрикирас екх екхэ́с дро амаро́ патяибэ́н.13. Нэ мэ кама́м, мирэ́ пша́ла, соб (кай) тумэ́ тэ джинэ́н, со мэ бут мо́лы скэдаваспэ тэ явав кэ тумэ́, нэ вари-со ман на домэкэлас, соб (кай) ма́нгэ тэ дыкха́в миштыпэ́н мирэ́ бутя́тыр и машки́р тумэ́ндэ, адя́кэ-паць сыр и машки́р яви́р на́цыи.14. Мэ сом банго́ сыр Элинэнгэ (Грекэ́нгэ), адя́кэ-паць и насыклэ манушэ́нгэ, савэ́ на шундлэ́, адя́кэ-паць годьварэнгэ и бигодякирэнгэ:15. адя́кэ-паць и мэ ужакирава, ко́ли сашты́, соб (кай) тэ роспхэнав бахталы́ зан (звесь) и тумэ́нгэ, кон дживэ́ла кэ Римо.16. Мэ на ладжава тэ роспхэнав бахталы́ зан (звесь), пал-дова́ со ёй исын Дэвлэ́скири зор ваш зракхибэ́н кажнонэ́скэ дэвлытконэскэ: англэды́р Юдэ́нгэ, нэ коригэды́р (тэ́ньчи) Элинэ́нгэ (Грекэ́нгэ/Баламэ́нгэ):17. пал-дова́ со дрэ Ева́нгелия отчхакирэлапэ Дэвлэ́скиро чачипэ́н патяибнастыр дро патяибэ́н: сыр пал дава́ исын чхиндло́: “Ману́ш чачунэ́ патяибна́са явэ́ла тэ дживэ́л.”18. Пал-дова́ со болыбна́стыр зджа́ла Дэвлэ́скири холы́ пэ кажно бидэвлыткима и пэ манушэ́нгиро хохаибэ́н, савэ́ пэ́скирэ начачипнаса хасякирэна чачипэ́н.19. Саро́, со сашты́ джиндло́ тэ джинэ́н пал Дэвлэ́стэ, ёнэ джинэ́на, пал-дова́ со Дэвэ́л сыкадя́ дава́ лэ́нгэ.20. Пал-дова́, сыр Дэвэ́л создыя́ свэ́то, Лэ́скири векоскири зор и Дэвлыткима бицялэ дрэ Лэ́скирэ рэ́нды (де́лы), ке́ли ману́ш шука́р думинэ́ла пал дава́; адя́кэ со манушэ́нгэ нанэ примангипэн, ко́ли ёнэ ракирна, со ёнэ на джинэ́на Дэвлэ́с.21. Ёнэ джиндлэ́ Дэвлэ́с, нэ ёнэ на славиндлэ Лэс, сыр Дэвлэ́с, и на парикирэнас Лэ́скэ: ёнэ ячнэ́ тэ кошэнпэ, ке́ли пириракирэнас, и лэ́нгирэ нагодьварэ илэ тасадынэ дро калыпэ́н:22. ке́ли ёнэ гиндлэ́ пэс годьварэнца, нэ сыр выгия́, ячнэ́ дылынэнца,23. и ёнэ парудэ бимэрибнаскири Дэвлэ́скири сла́ва пэ манушы́тко о́бразо, саво́ мэрэ́ла, и чириклытко, и мурдалытко и одолэнгиро, савэ́ ползынэна.24. Палдава́ Дэвэ́л отдыя́ лэн пир лэ́нгирэ-грэхэнгиро камибэн дро ило́ и ёнэ лынэ́ тэ магирэ́н пэ́скирэ маса́ екх екхэ́са:25. кадалэ́ мануша́ парудэ Дэвлэ́скиро чачипэ́н хохаибнаса, ёнэ мангэ́напэ и дынаринэна (служынэна) одолэ́скэ, конэ́с ёнэ выдуминдлэ кокорэ́, буты́р сыр Кодолэ́скэ, Саво́ кэрдя́ дава́ саро́, Саво́ исын мол вечнонэ славакэ. Ами́нь.26. Палдава́ Дэвэ́л отдыя́ лэн биладжаипнытконэ камибнаскэ: и лэ́нгирэ джувля́ парудынэ тэ дживэ́н пэ́скирэ ромэнца адя́кэ, сыр натрэй;27. адя́кэ-паць и мурша́, пириячнэ тэ дживэ́н джувле́нца, сыр трэй, а ёнэ хачонас камибнаса екх пэ екхэ́стэ, и лынэ́ тэ кэрэ́н магирипэ́н мурш муршэса, и ёнэ дорэсэ́на (долэна) кокорэ́ дрэ пэ́стэ ка́ра пал пэ́скиро блэ́ндо.28. И пал-дова́, сыр ёнэ на камлэ́ тэ джинэ́н пал Дэвлэ́стэ, тэды Дэвэ́л и мэкця́ лэн, соб (кай) ёнэ тэ кэрэ́н пир налачхи годы́, нэ со лэ́нгэ камэлапэ;29. и ёнэ исын пхэрдэ́ кажнонэ́ начачипнаса, злыднимаса, бокхаса кэ ловэ́, чорипнаса, зэвлыныпнаса, розмарибнаса, выпробинэна екх екхэ́с, обракирибнаса, плёткэнца;30. ёнэ хохавэна екх екхэ́с, и ёнэ на рикирэ́на сыр Дро́гима Дэвлэ́с дро пэ́скиро ило́; биладжаипнытка, пхутькирдэ́, шарибнытка; ёнэ уса́ кэрэ́на нэво́ фуипэ́н, на кандэ́на пэскирэн дадэн.31. Ёнэ исын бигодякирэ, нашты́ лэ́нгэ тэ патяс, нанэ лэ́ндэ ни ла́ска, ни тангипэ́н;32. ёнэ джинэ́на чачуно́ Дэвлы́тко сэ́ндо, со мануша́, савэ́ кэрэ́на дасавэ́ рэ́нды исын мол мэрибна́скэ, нэ ёнэ на, со кокорэ́ дурэды́р кэрэ́на грэ́хо, нэ ёнэ и шарэна явирэ́н, кон кэрэ́ла дова́-паць. Romani Bible Baltic 2019 Maintained by the United Bible Societies for the Baltic Romani Mission