Bible in one year - Пэ Балтитко Романи чиб

Bible in one year July 4

1. И лыя́ Соломо́но тэ кэрэ́л Ра́скирэ-Дэвлэ́скиро Кхэр дро Еруса-лимо, пэ бэ́рга Мориа, сави́ сыс упхэндлы Давидо́скэ, лэ́скирэ дадэ́скэ, пэ штэ́то, саво́ приготовиндя Дави́до, пэ Орнаскирэ-Иевусеяниноскири шу́рна.

2. Лыя́ ёв тэ кэрэ́л пэ яви́р дывэ́с явирэ чхонэ́скиро, дро шта́рто бэрш пэ́скирэ кралипнаскиро.

3. И акэ, подмуровка, сави́ чхудя́ Соломо́но, ке́ли кэрэ́нас Ра́скирэ-Дэвлэ́скиро Кхэр: длэнгипэ́н лэ́скиро сыс шовдэша́ куня́, пир доя́ ме́ра, а буґлыпэ́н биш куня́;

4. и трэ́мо, саво́ сыс анги́л кхэр, длэнгипна́са, пир кхэрэ́скиро буґлыпэ́н, сыс дрэ биш куня́, а вучипна́са дрэ шэл тэ биш. И обчхудя́ лэс андрэ́ жужэ́ сувнака́са.

5. Англуно кхэр обсудя ёв кипарисытконэ вэшэса и обчхудя́ лэс фэдыршонэ сувнака́са, и кэрдя́ пэ лэ́стэ пальмы и зандирорья́ (цэпочки).

6. И обчхудя́ Кхэр дрогонэ́ барэ́нца ваш шукарипэ́н; сувнака́й сыс Парваимостыр.

7. И учхакирдя́ Кхэр, брэвны, проги, и ва́нты лэ́скирэ, и вудара́ лэ́скирэ сувнака́са, и вычхиндя пэ ва́нты херувимы.

8. И кэрдя́ ёв Свэ́нто-свэнтонэнгиро: длэнгипэ́н лэ́скиро, пир буґлыпэ́н кхэрэ́скиро, сыс дрэ биш куня́, и буґлыпэ́н лэ́скиро дрэ биш куня́, и лэ́скиро буґлыпэ́н дрэ биш куня́; и учхакирдя́ лэс фэдыршонэ сувнака́са, пэ шовшэла́ тала́нты.

9. Дрэ гвозды (карфина) пхарипэн (весо) вага сыс пэ пандждэша́ шэ́кели сувнака́й. Залы адя́кэ-паць ёв учхакирдя́ сувнака́са.

10. И кэрдя́ ёв дрэ Свэ́нто-свэнтонэнгиро дуй херувимы вычхиндытконэ бутя́тыр, и учхакирдя́ лэн сувнака́са.

11. Пхака́ (крылы) херувимэнгирэ сыс длэнгипна́са дрэ биш куня́. Екх пхак дрэ пандж куня́ дорэсэ́ла кэ Кхэрэ́скири ва́нта, а яви́р пхак дрэ пандж куня́ зджалапэ пхакаса явирэ херувимоскирьяса;

12. дасави́-паць сыс и пхак явирэ херувимоскиро дрэ пандж куня́ и дорэсэ́ла кхэрэ́скирэ ва́нты, а яви́р пхак дрэ пандж куня́ зджалапэ пхакаса явирэ херувимоскирэса.

13. Пхака́ далэ́ херувимэнгирэ сыс розмэкнэ пэ биш куня́; и ёнэ сыс тэрдэ́ пэ пэ́скирэ ґэра́, пэ́скирэ муе́нца кэ Кхангири́.

14. И кэрдя́ ёв полого яхонтытконэ, пурпуронэ, и ярконэ-лолэ́ тханэстыр/матер΄алостыр (похтанэстыр) и вылыджия́ пэ лэ́стэ херувимы.

15. И кэрдя́ ёв анги́л Кхангири́ дуй сты́лбы, длэнгипна́са пир трия́нда пандж куня́, и капитэль упра́л кажно сыс дрэ пандж куня́.

16. И кэрдя́ зандирорья (цэпочки), сыр дрэ свэ́нто штэ́то, и чхудя́ упрэ́ пэ сты́лбы, и кэрдя́ шэл гранатытка пхаба́, и чхудя́ лэн пэ зандирорья.

17. И чхудя́ сты́лбы анги́л Кхангири́, екх пэ чачи́ (право) риг, яви́р пэ зэ́рво (ле́во) риг и дыя́ лав чачунэскэ Иахино (Яхино), а зэрвонэскэ лав Воазо.

2 Chronicles 4:1-22

1. И кэрдя́ ёв харкуно алта́рё: лэ́скиро длэнгипэ́н сыс биш куня́, и биш куня́ сыс лэ́скиро буґлыпэ́н, и вучипэ́н лэ́скиро сыс дэш куня́.

2. И кэрдя́ ёв мо́рё (дэрья́в) вычхудо, – лэ́скирэ ягоро́стыр кэ лэ́скиро яви́р яго́ро сыс дэш куня́, – саро́ крэнгло, вучипна́са сыс дрэ пандж куня́; и дрэ трия́нда куня́ облэлас лэс трусця́л (кругоса);

3. и вычхудэ́ копии гурувэ́н, со сыс тэрдэ́ тэл лэ́стэ трусця́л сарэ́ ригэ́ндыр; пэ дэш куня́ облэнас мо́рё (дэрья́в) трусця́л дуй ряды гурувэ́н, вычхудэ́ екхэ чхуибнаса лэ́са.

4. Тэрдо́ сыс ёв пэ бишэ́ гурувэндэ: трин дыкхнэ́ пэ паш-рат (пэ северо), и трин дыкхнэ́ пэ западо (пал-панитко риг) и трин дыкхнэ́ пэ паш-дывэ́с (пэ юго), и трин дыкхнэ́ пэ васто́ко, – и мо́рё (дэрья́в) упра́л пэ лэ́ндэ; лэ́нгирэ палуя сыс рискирдэ́ андрэ́ тэл лэ́стэ.

5. Грэмбипнаса ёв сыс дрэ бурнык (ладонь); и лэ́скирэ яго́ры (краи́), кэрдэ́ сыс, сыр тахтаскирэ яго́ры (краи́), савэ́ поджанас пэ лилия, сави́ розмэкцяпэ. Дрэ лэ́стэ заджалас кэ трин тысёнцы баты.

6. И кэрдя́ ёв дэш москирэ чарэ́, и чхудя́ пандж пир чачи́ риг и пандж пир зэ́рво риг, соб (кай) дова́, со сыс приладиндло кэ цэ́ло схачкирибэ́н тэ морэн дрэ лэ́ндэ; мо́рё (дэрья́в) – ваш рашангэ, соб (кай) ёнэ тэ морэнпэ дрэ лэ́стэ.

7. И кэрдя́ ёв дэш сувнакунэ́ момолытка (светильники), сыр лэ́нгэ трэй тэ явэ́н, и чхудя́ дрэ Кхангири́, пандж пир зэ́рво риг и пандж пир чачи́ риг.

8. И кэрдя́ ёв дэш скаминда, и чхудя́ дрэ Кхангири́, пандж пэ чачи́ риг и пандж пэ зэ́рво риг, и кэрдя́ шэл сувнакунэ́ тахтая́ (чашы).

9. И кэрдя́ ёв рашангири грэ́да (дво́ро), и бари грэ́да, и вудара́ кэ грэ́да, и вере́и лэ́нгирэ обчхудя́ харкомаса (медяса).

10. Мо́рё (дэрья́в) чхудя́ пэ чачи́ риг, пэ паш-дывэ́с-васто́ко.

11. И кэрдя́ Хирамо барэ́ чарэ́ (мыски) и лопатки, и тахтая́. И кэрдя́ Хирамо буты́, сави́ кэрдя́ ваш крали́скэ Соломоно́скэ дрэ Ра́скирэ-Дэвлэ́скиро Кхэр.

12. Дуй сты́лбы, и дуй кустыка венцэнгирэ пэ стылбэнгиро вучипэ́н, и дуй кхудя ваш учхакирибэн дуй кустыка вэнцэнгирэ, савэ́ сыс пэ стылбэнгиро шэро́,

13. и штаршэла́ гранатытка пхаба́ пэ дуй кхудя, дуй ряды гранатытка пхаба́ ваш кажно кхуды́, ваш учхакирибэн дуй кустыка вэнцэнгирэ, савэ́ сыс пэ сты́лбы.

14. И подчхуибэна кэрдя́ ёв, и москирэ чарэ́ кэрдя́ пэ подчхуибэна;

15. екх мо́рё (дэрья́в), и дэшуду́й гурува тэл лэ́стэ,

16. и барэ́ чарэ́ (мыски), и лопатки, и бустя́, и сарэ́ струме́нты лэ́нгирэ кэрдя́ Хирам-Авиё крали́скэ Соломоно́скэ, ваш Ра́скирэ-Дэвлэ́скиро Кхэр, полированонэ харкома́тыр.

17. Дрэ штэ́ты пашэ́-форитка Иорда́но вычхудя́ лэн кра́ли, дрэ ґлэитко (глинытко) пхув, машки́р Сокхофомо и Цэреда.

18. И кэрдя́ Соломо́но сарэ́ далэ́ предметы (чы́сы) древа́н бут адя́кэ, со на джиндлэ́ харкунакэ (медяке) вага.

19. Адя́кэ-паць кэрдя́ Соломо́но сарэ́ кхорэ́ (сасу́ды) ваш Ра́скирэ-Дэвлэ́скиро Кхэр и сувнакуно́ алта́рё, и скаминда, пэ савэ́ свэ́нто маро́ чхувэ́нас,

20. и момолытка (светильники), и лампадки лэ́нгирэ, соб (кай) тэ захачкирэс лэн пир упхэныбэ́н анги́л давиро, ёнэ сыс жужэ́ сувнака́стыр;

21. и лулудя́ (цвэты), и лампадки, и обцуги (шчыпцы) сувнака́стыр, най жужэ́ сувнака́стыр,

22. и чхурья, и копаныцы, и тахтая́, и лотки сувнака́стыр най жужэстыр; и вудара́ Кхангирья́кирэ, – вудара́ ла́кирэ андратунэ́ дрэ Свэ́нто-свэнтонэнгиро, и вудара́ Кхангирья́кирэ пэ са́мо свэ́нто штэ́то, сувнака́стыр.

Psalms 79:5-10

5. Сыр ґара́, о Раё Дэ́вла! Ци Ту ўса́ды (сак) явэ́са тэ холясос пэ амэ́ндэ? Ци явэ́ла Тыро́ зэвлыныпэ́н (ревность) тэ хачол сыр яг?

6. Вымэк Пэ́скири бари холын пэ Наюды́тка на́цыи, савэ́ на джинэ́на Тут, и пэ кралипэна́, со на прикхарэна Тыро́ лав.

7. Пал-дова́ со ёнэ ханэ́ Яково́скиро ро́до и роспхагирдэ́ кэ пхув штэ́то, кай ёв дживдя́.

8. На ри́пир грэ́хи, амарэ́ прапапэнгирэ, мэк Тыри́ бари лачхэ́-илы́ткима тэ пирилэл амэн най сыгэды́р: пал-дова́ со амэ догиям сарэ́са кэ пхув.

9. Подэ васт, о Дэ́вла, Саво́ зракхэ́са амэн ваш сла́ва Тырэ́ лавэ́скэ, зра́кх и отмэк амэ́нгэ амарэ́ грэ́хи ваш Тыро́ лав.

10. Со́скэ Наюды́тка на́цыи ракирэ́на: “Кай исын лэ́нгиро Дэвэ́л? Мэк амарэ́ якха́ тэ дыкхэ́н, сыр Ту отдэса палэ Наюдытконэ́ нацыенгэ, со ёнэ прочхудэ рат Тырэ́ писхарьенгиро.

Proverbs 20:10-12

10. Нароўна ублады́тка (весы) и нароўна меры (тырдынэ) исын сарэ́ дуй начачипэна, савэ́ исын джунгалэ́ (брыдка) Ра́скэ-Дэвлэ́скэ.

11. Адя́кэ-паць и биято́с [тэрнэ́-бэршэнгирэс-р.с.] уджинэна пир лэ́скирэ кэрибэна, ци пир лэ́скири буты́, ци ёй тэ явэ́л бидошэнгири, ци чачуны́.

12. Кан, со шунэ́ла, и якх, со дыкхэ́ла-исын далэ́ дуй льготы, со Рай Дэвэ́л создыя́.

Skutki 12:1-25

1. Дрэ дова́ часо кра́ли Иродо нэвэ́стыр лыя́ тэ традэл дэвлытконэн и закэдыя вари-кицы́ манушэ́н лэ́нгирэ кхангирья́тыр, соб (кай) тэ кэрэ́л фуипэ́н лэ́нгэ,

2. И мулякирдя́ Яково́с, Ианоскирэ пшалэ́с куртала́са.

3. Ке́ли ёв дыкхця́, со дава́ исын пир ило́ Юдэ́нгэ, ёв закамдя́ тэ закэдэл апри́ч дова́ и Пэтрис; а сыс дава́ пэ Юды́тко свэ́нко, ке́ли ха́на би рошчынакиро (дрожджэнгиро) маро́.

4. И Ёв закэдыя Пэтрис, и чхудя́ лэс дро штарибэ́н, и припхэндя́ халадэнгэ тэ тэрдён дрэ штар ряды пэ штар манушэ́н дрэ кажно рядо и тэ ракхэ́н лэс; Иродо кэдэласпэ пало́ Патради́ тэ лыджа́л Пэтрис пэ манушы́тко сэ́ндо.

5. И адя́кэ Пэтрис ракхнэ дро штарибэ́н; а мануша́ Кхангирья́тыр древа́н мангнэпэ Дэвлэ́скэ пал лэ́стэ.

6. Ратя́киро, анги́л дова́, ке́ли Иродо кэдыяпэ тэ вылыджал лэс пэ манушы́тко сэ́ндо, Пэ́три сыс суто́ машкира́л дуе халадэ́ндэ, пхандло дуенца зандирьенца, и халадэ́ сыс тэрдэ́ пашы́л вудара́ и ракхнэ штарибэ́н.

7. И, ґа́да, явдя́ Дэвлэ́скиро Янго́ло, тэрдия́ пашы́л, и яг зазяиндя дро штарибэ́н; Янго́ло пэкадя́ Пэтрис дро пашваро, джангадя лэс, пхэни́: “Ушты́ сыгэды́р.” И зандирья́ (цэ́пи) пынэ́ лэ́скирэ вастэ́ндыр.

8. И Янго́ло пхэндя́ лэ́скэ: “Подпхандэпэ и ури ґэра́.” И ёв кэрдя́ адя́кэ. Коригэды́р ракирэ́ла лэ́скэ: “Ури тыри́ и́дя и джа́ пал ма́ндэ.”

9. И сыр Пэ́три выгия́ штарибнастыр, ёв гия́ пал Янголостэ, на джины́, со саро́ дава́, со Янго́ло кэрдя́, исын дро чачипэ́н, а лэ́скэ здыяпэ, со ёв дыкхэ́ла дыкхибэ́н сы́рбы дрэ сунэ́.

10. Ёнэ прогинэ́ маму́й екхэндэ и явирэ ракхибнарьендэ и подгинэ́ кэ саструны по́рта, сави́ лыджа́ла дро фо́ро, вудара́ отчхакирдэпэ анги́л лэ́ндэ кокорэ́ пэ́стыр; ёнэ выгинэ́, и прогинэ́ екх вули́ца (га́са), и ада́й жэ Янго́ло мэкця́ Пэтрис.

11. Ке́ли Пэ́три явдя́ дрэ пэ́стэ, ёв пхэндя́: “Мэ какана́, чачэс, дыкха́ва, со Дэвэ́л бичхадя́ Пэ́скирэ Янголо́с и ракхця́ ман Иродоскирэ вастэ́ндыр и сарэ́стыр, со камлэ́ Юдэя́кирэ мануша́ тэ кэрэ́н.”

12. Ке́ли Пэ́три кокоро́ саро́ ґалыя́, ёв явдя́ кэ Мариякиро кхэр, ёй сыс Ианоскири дай, савэ́с кхардэ́ адя́кэ-паць Марко, кай бут скэдынэ́пэ мануша́ и мангнэпэ Дэвлэ́скэ.

13. Ке́ли Пэ́три пэкадя́ дрэ вудара́, дына́рица выгия́ тэ уджинэл, савья́ кхардэ́ Рода;

14. и ке́ли ёй уджиндя́ Пэтрис пири́ зан, ёй радыма́тыр бистырдя тэ отчхакирэл вудара́, а праста́ндыя палэ и пхэндя́, со Пэ́три сыс тэрдо́ анги́л вудара́.

15. И ёнэ пхэндлэ́ ла́кэ: “Ци дрэ пэ́скири годы́ ту сан? Нэ ёй сароекх ракирдя́ пэ́скиро, со дава́ исын чачо́.” Ёнэ ракирдэ́: “Дава́ исын лэ́скиро Янго́ло.”

16. Нэ Пэ́три ўса пэкавэлас дрэ вудара́: ке́ли отчхакирдэ вудара́, тэды дыкхнэ́ лэс и дивиндлэ́пэ.

17. Ёв сыкадя́ вастэ́са, соб (кай) тэ на ракирэ́н, роспхэндя́ лэ́нгэ, сыр Дэвэ́л вылыджия́ лэс штарибнастыр и пхэндя́: “Пиридэ́н дая́ зан Яково́скэ и явирэ пшалэ́нгэ.” Ёв гия́ и гия́ одотхы́р пэ яви́р штэ́то.

18. А ке́ли яця́ дывэ́с, сыс бари годлыма машки́р халадэ́ндэ пал дова́, со кэрдя́пэ Пэтриса.

19. А Иродо родыя Пэтрис и никай на латхя́, а ке́ли ёв допхуця халадэндыр, тэды припхэндя́ тэ мулякирэ́н лэн. Тэ́ньци ёв гия́ Юдэя́тыр дрэ Кесария и одо́й яця́пэ.

20. Иродо сыс древа́н холямо́ пэ Тираноскирэ и Сидоноскирэ манушэ́ндэ; нэ ёнэ явнэ́ кэ ёв ваш дова́, соб (кай) ёв лэн тэ прилэл и подракирдэ пэ пэ́скири риг Властос, саво́ сыс крали́скиро штубатуно (пхурэды́р) и помангнэ “рама́нё (миро)”, пал-дова́ со лэ́нгири риг чарадяпэ крали́скирэ рига́тыр.

21. Пэ выкэдыно дывэ́с Иродо уридя пэ пэ́стэ крали́тко и́дя, бэсця́ пэ троно и ракирдя́ анги́л сарэ́ндэ.

22. И мануша́ дэ́нас го́дла: “Дава́ исын зан Дэвлэ́скири, а на манушэскири.”

23. Нэ дро дова́-паць моменто Дэвлэ́скиро Янго́ло мулякирдя́ Иродос, пал-дова́ со Иродо на славиндя Дэвлэ́с, лэс джидэс ханэ́ кирмэ, и ёв мыя́.

24. Нэ Дэвлэ́скиро лав уса́ буты́р шундёлас и розджалас машки́р манушэ́ндэ.

25. Варнава и Савло кэрдэ́, со лэ́нгэ сыс пхэндло́ и явнэ́ палэ Ерусалимо́стыр дрэ Антио́хия; ёнэ лынэ́ Пэ́са Ианос, савэ́с кхардэ́ “Марко.”

Romani Bible Baltic 2019

Maintained by the United Bible Societies for the Baltic Romani Mission