Bible in one year
July 5

1. И закончындяпэ сари́ буты́, сави́ кэрдя́ Соломо́но ваш Ра́скирэ-Дэвлэ́скиро Кхэр. И яндя́ Соломо́но да́ры, со отдыя́ Дави́до, лэ́скиро дад; и руп, и сувнака́й, и сарэ́ струме́нты отдыя́ дрэ Дэвлэ́скирэ-Кхэрэскирэ пираля́.
2. Тэды скэдыя́ Соломо́но Израилёскирэ пхурыдырэн и сарэ́н шэралэн пэ ро́дыцы, барыдырэ́н Израилёскирэн пэ чхавэ́нгирэ стрэ́чы, дро Ерусалимо, соб (кай) тэ лыджа́н пэ яви́р штэ́то Дэвлэ́скирэ-завето́скиро ковчэго Давидо́скирэ форо́стыр, Сионо́стыр.
3. И скэдынэ́пэ кэ кра́ли сарэ́ Израильтя́ни пэ свэ́нко, пэ эфта́то чхон.
4. И явнэ́ сарэ́ Израилёскирэ пхурыдыра́. Леви́ты лынэ́ ковчэго;
5. и лыджинэ́ ковчэго, и скэдыибна́скири ски́ния, и сарэ́ свэ́нта кхорэ́, савэ́ сыс дрэ ски́ния, лыджинэ́ лэн рашая́ и Леви́ты.
6. Кра́ли Соломо́но и сарэ́ Израилёскирэ мануша́, савэ́ скэдынэ́пэ кэ ёв анги́л ковчэго, янэ́нас свэ́нта дыибэна́ Ра́скэ-Дэвлэ́скэ бакрэ́ндыр и гурувэндыр, савэ́н сыс нашты́ тэ згинэс и тэ уджинэс, пал-дова́ со лэн сыс древа́н бут.
7. И яндлэ́ рашая́ Ра́скирэ-Дэвлэ́скирэ завето́скиро ковчэго пэ лэ́скиро штэ́то, дрэ Кхангирья́киро давиро – дрэ Свэ́нто-свэнтонэнгиро, тэл пхака́ (крылы) херувимэнгирэ.
8. И херувимы росчхудэ пхака́ пэ ковчэгоскиро штэ́то и баландиня́ (шосты) лэ́скирэ упра́л.
9. И вытырдынэ пэ баландиня́ (шосты) ковчэгоскирэ адя́кэ, со яго́ры (краи́) баладине́нгиро сыс бицялэ анги́л давиро, нэ на сыкадынэ яври́, и ёнэ одо́й кэ дава́ дывэ́с.
10. На сыс дро ковчэго ничы́ апри́ч дуй скрижа́ли (таблицы), савэ́ чхудя́ Мо́йза пэ Хориво, ке́ли Рай Дэвэ́л кэрдя́ заве́то Израилёскирэ чхавэ́нца, пир лэ́нгиро выгиибэн Египто́стыр.
11. Ке́ли рашая́ выгинэ́ свэнтонэ́ штэто́стыр, пал-дова́ со сарэ́ рашая́, савэ́ сыс одо́й, высвэнцындлэпэ, би дыкхибнаскиро пэ отде́лы, савэ́ндыр сыс ёнэ;
12. и Леви́ты-багаибнарья, – савэ́ сыс Асафо, Эмано, Идифуно, и лэ́нгирэ чхавэ́, и лэ́нгирэ пша́ла, – уридэ́ дро парно́ похтан, цымбалэнца, и лутэнца, и арфэнца сыс тэрдэ́ пэ васточно риг алтарёскири, и лэ́нца сыс шэл тэ биш рашая́, трубиндлэ рогэ́нца,
13. и сыс, сыр екх трубиндлэ и багандлэ, выдыи екхэ заня́са кэ шарибэ́н и кэ парикирибэн Ра́скэ-Дэвлэ́скэ; и, ке́ли загреминдя зан рогэнгири, и цымбалэнгири, и багаибнытконэ-струментэнгири, и шардэ Рас-Дэвлэ́с, и багандлэ: “Ёв исын лачхо́, пал-дова́ со дро ве́ко тангипэ́н Лэ́скиро”, тэды Кхэр, Ра́скирэ-Дэвлэ́скиро Кхэр пхэрдякирдя́ о́блоко,
14. и на могиндлэ́ рашая́ тэ тэрдён пэ дынарибэ́н (служба) пирда́л о́блоко; пал-дова́ со сла́ва Ра́скирэ-Дэвлэ́скири пхэрдякирдя́ Дэвлэ́скиро Кхэр.
1. Тэды пхэндя́ Соломо́но: “Рай Дэвэ́л пхэндя́, со Ёв камэ́ла тэ дживэ́л дро калыпэ́н (мрако),
2. ΄мэ кэрдём Кхэр ваш джиибэ́н Ту́кэ, штэ́то ваш Ту́кэ тэ дживэ́с (тэ ячэс ве́чнэс).”
3. И рисия́ кра́ли пэ́скирэ мо́са, и бахтякирдя́ саро́ Израильёскиро скэдыибэ́н, саро́ Израильёскиро скэдыипэн сыс тэрдо́, –
4. и пхэндя́: “Тэ явэ́л бахтякирдо́ Рай Дэвэ́л, Дэвэ́л Израилёскиро, Саво́, со пхэндя́ Пэ́скирэ уштэ́нца Давидо́скэ, мирэ́ дадэ́скэ, то кэрдя́ акана́ Пэ́скирэ вастэ́са!” Ёв ракирдя́:
5. “Долэ́ дывэсэ́стыр, сыр Мэ вылыджиём манушэ́н Мирэн Египто́скирэ пхувья́тыр, Мэ на выкэдыём фо́ро ни дрэ екх родыцэндыр Израилёскирэндыр ваш Ма́нгэ тэ кэрэ́н кхэр, дрэ саво́ явэ́лас бы лав Миро, и на выкэдыём манушэ́с, саво́ тэ явэ́л бы Мирэ́ Израилёскирэ манушэ́нгирэ крали́са,
6. нэ Мэ выкэдыём Ерусалимо, соб (кай) одо́й тэ явэ́л Миро лав, и Мэ выкэдыём Давидо́с, соб (кай) ёв тэ явэ́л пэ Мирэ́ Израилёскирэ манушэ́ндэ.’
7. И сыс пэ ило́ Давидо́стэ, мирэ́ дадэ́стэ, тэ кэрэ́л Кхэр ваш лав Ра́скирэ-Дэвлэ́скиро, Израилёскирэ Дэвлэ́скиро.
8. Нэ Рай Дэвэ́л пхэндя́ Давидо́скэ, мирэ́ дадэ́скэ: “Ту́тэ исын пэ ило́ тэ кэрэ́с Кхангири́ Мирэ́ лавэ́скэ; шука́р, со дава́ исын пэ ило́ ту́тэ:
9. нэ ту усае́кх на кэрэ́са Кхангири́, а тыро́ чхаво́, саво́ явэ́ла тырэ́ масэ́ндыр, ёв кэрэ́ла Кхэр (Кхангири́) Мирэ́ лавэ́скэ.
10. И кэрдя́ кэ ко́нцо/яго́ро (сполниндя) Рай Дэвэ́л Пэ́скиро лав, саво́ ракирдя́: “Мэ тэрдиём пэ Давидо́скиро штэ́то, мирэ́ дадэ́скиро, и бэсцём пэ Израилёскиро троно, сыр пхэндя́ Рай Дэвэ́л, и кэрдём Кхэр Ра́скирэ-Дэвлэ́скиро, Израилёскирэ Дэвлэ́скирэ лавэ́скэ.
11. И мэ чхудём одо́й ковчэго, дро саво́ исын Ра́скирэ-Дэвлэ́скиро заве́то, саво́ кэрдэ́ Лэ́са Израилёскирэ чхавэ́.”
12. И тэрдия́ Соломо́но пашы́л Ра́скирэ-Дэвлэ́скиро алта́рё анги́л саро́ Израилёскиро скэдыибэ́н, и ґаздыя́ пэ́скирэ васта́, –
13. пал-дова́ со Соломо́но кэрдя́ харкуно амвоно, длэнгипна́са дрэ пандж куня́ и буґлыпнаса дрэ пандж куня́, а вучипна́са дрэ трин куня́, и чхудя́ лэс машки́р грэ́да; и тэрдия́ пэ лэ́стэ, и тэрдия́ пэ чанга́ анги́л саро́ Израильёскиро скэдыибэ́н, и ґаздыя́ пэ́скирэ васта́ кэ болыбэ́н,
14. и пхэндя́: “Раё Дэ́вла, Дэ́вла Израилёскиро! Нанэ Дэвлэ́с, адасавэс сыр Ту сан, ни пэ пхув, ни пэ болыбэ́н. Ту ракхэса завето и тангипэ́н кэ Тырэ́ писха́рья, савэ́ псирэ́на анги́л Ту́тэ сарэ́ пэ́скирэ илэ́са.
15. Ту кэрдя́н Тырэ́ писхари́скэ Давидо́скэ, мирэ́ дадэ́скэ, со Ту ракирдян лэ́скэ; со ракирдя́ Ту Тырэ́ уштэ́нца, дро дова́ дывэ́с кэрдя́н Ту Тырэ́ вастэ́са.
16. И акана́, Раё Дэ́вла, Дэ́вла Израилёскиро! Кэр Тырэ́ писхари́скэ Давидо́скэ, мирэ́ дадэ́скэ, дова́, со Ту пхэндя́н Лэ́скэ, ракири́: “На пириячэ́ла ту́тэ мурш, саво́ явэ́ла тэ бэшэ́л анги́л Миро муй пэ Израилёскиро троно, ко́ли екх тырэ́ чхавэ́ явэ́на тэ дыкхэ́н пал пэ́скирэ дрома́, псири пир Миро Зако́но адя́кэ, сыр ту псирдян анги́л Ма́ндэ.’
17. И акана́, Раё Дэ́вла, Дэ́вла Израилёскиро! Мэк тэ явэ́л чачуно́ Тыро́ лав, саво́ Ту ракирдян Тырэ́ писхари́скэ Давидо́скэ.
18. Ци пир чачипэ́н Дэвлэ́скэ тэ дживэ́с манушэ́нца пэ пхув? Ко́ли болыбэ́н и болыбна болыбна́скирэ исын тыкнэ́ ваш Ту́кэ, – долэса тыкнэды́р исын Кхангири́ дая́, сави́ мэ кэрдём.
19. Нэ подыкх пэ Тырэ́ писхарискири па́тери (моли́тва) и пэ лэ́скиро мангипэ́н, Раё Дэ́вла, Дэвэ́л миро! Пришунпэ кэ го́дла и кэ па́тери, савья́са Тыро́ писха́ри мангэлапэ анги́л Ту́тэ.
20. Мэк тэ явэ́н Тырэ́ якха́ отчхакирдэ пэ дая́ Кхангири́ дывэсэ́ и раты́, пэ штэ́то, кай Ту дыя́н лав тэ чхувэ́с Тыро́ лав, соб (кай) тэ шунэ́с па́тери, савья́са Тыро́ писха́ри явэ́ла тэ мангэ́лпэ пэ дава́ штэ́то.
21. Вышу́н мангипэ́н Тырэ́-писхарискиро и Тырэ́-Израилёскирэ манушэ́нгиро, савэ́нца ёнэ явэ́на тэ мангэ́нпэ пэ дава́ штэ́то; вышу́н Тырэ́ джиибна́скирэ штэто́стыр, болыбна́стыр, вышу́н и отмэк грэ́хо!
22. Ке́ли вари-кон кэрэ́ла грэ́хо проти пэ́скирэ пашатунэстэ и пхучэла лэ́стыр совэ́л, соб (кай) ёв тэ совлахал, и явэ́ла тэ кэрэ́лпэ совэ́л анги́л алта́рё Тыро́ дрэ дая́ Кхангири́:
23. то тэды Ту вышу́н болыбна́стыр и кэр сэ́ндо пэ Тырэ́ писхарье́ндэ, отдэ́ бангэскэ, чхуви, со ёв кэрдя́ пэ лэ́скиро шэро́, и оправдын (чачакир) чачунэ́с, дэ лэ́скэ пир лэ́скиро чачипэ́н.
24. Ке́ли явэ́на домардэ́ мануша́ Тырэ́ Израилёскирэ вэргоса пал дова́, со ёнэ кэрдэ́ грэ́хо анги́л Ту́тэ, и ёнэ рисёна илэ́са кэ Ту, и приґалёна лав Тыро́, и явэ́на тэ мангэ́н и тэ мангэ́нпэ анги́л Ту́тэ дро дова́ Кхэр (дрэ дая́ Кхангири́),
25. то тэды Ту вышу́н болыбна́стыр и отмэк Тырэ́ Израилёскирэ манушэ́нгиро грэ́хо, и ри́скир лэн пэ пхув, сави́ Ту дыя́н лэ́нгэ и лэ́нгирэ дадэ́нгэ.
26. Ке́ли зачхакирлапэ болыбэ́н, и на явэ́ла брышы́нд пал дова́, со ёнэ кэрдэ́ грэ́хо анги́л Ту́тэ, и явэ́на тэ мангэ́нпэ пэ дава́ штэ́то, и приґалёна лав Тыро́, и отджана пэ́скирэ грэхостыр, пал-дова́ со Ту чхудя́н лэн тэлэ́,
27. тэды Ту вышу́н болыбна́стыр, и отмэк грэ́хо Тырэ́ писхарьенгиро и Израилёскиро Тырэ́-манушэ́нгиро, упхэн лэ́нгэ лачхо́ дром, пир саво́ тэ джа́н лэ́нгэ, и бичха́в брышы́нд пэ Тыри́ пхув, сави́ Ту дыя́н Тырэ́ манушэ́нгэ дрэ мэкно́ миштыпэ́н.
28. Ци бокх явэ́ла пэ пхув, ци мороскирэ фра́нсы явэ́на, ци хачкирды балва́л явэ́ла, ци ржа, ци пхакитка скочки, ци кирмо, ци явэ́на тэ притасавэн лэс лэ́скирэ вэ́рги пэ пхув, сави́ исын лэ́скири, ци явэ́ла сави́ би́да, ци саво́ насвалыпэн,
29. то Ту кажно па́тери (моли́тва), кажно мангипэ́н, саво́ явэ́ла вари-савэ́ манушэ́стыр, ци сарэ́ Тырэ́ Израилёскирэ манушэ́ндыр, ке́ли ёнэ почуинэна кажно пэ́скири би́да и пэ́скиро горё, и протырдэна пэ́скирэ васта́ кэ дая́ Кхангири́,
30. Ту вышу́н болыбна́стыр – Тырэ́ джиибна́скирэ штэто́стыр, и отмэк (простин), и отдэ́ сваконэскэ (кожнонэскэ) пир сарэ́ лэ́скирэ дрома́, сыр Ту джинэ́са лэ́скиро ило́, – пал-дова́ со Ту джинэ́са манушэ́нгирэ-чхавэ́нгиро ило́, –
31. соб (кай) ёнэ тэ дарэ́н Ту́тыр и тэ псирэ́н Тырэ́ дромэ́нца дрэ сарэ́ дывэса́, пака ёнэ дживэ́на пэ пхув, сави́ Ту дыя́н амарэ́ дадэ́нгэ.”
32. Нэ и ману́ш явирэ-родоскиро, саво́ исын на Тырэ́ Израилёскирэ манушэ́ндыр, ке́ли ёв явэ́ла дуратунэ́ пхувья́тыр ваш Тыро́ баро́ лав, и ваш Тыро́ васт зоралыпнаскиро, и псико́ Тыро́, со исын протырдыно, и явэ́ла и лэ́ла тэ мангэ́лпэ дрэ дая́ Кхангири́:
33. то Ту вышу́н болыбна́стыр, Тырэ́ джиибна́скирэ штэто́стыр, и кэр саро́, пал со явэ́ла тэ рисёл илэ́са кэ Ту явирэ-родоскиро ману́ш, соб (кай) сарэ́ мануша́ пхувья́кирэ тэ уджинэ́н Тыро́ лав, и, соб (кай) тэ дарэ́н Ту́тыр, сыр Тырэ́ мануша́, Израилё, и, соб (кай) джиндлэ́, со Тырэ́ лавэ́са кхарэ́лапэ дава́ Кхэр, саво́ кэрдём мэ.
34. Ке́ли выджа́на Тырэ́ мануша́ пэ марибэ́н пэ пэ́скирэ вэргэ́ндэ дромэ́са, савэ́нгэ Ту бичхавэса лэн, и явэ́на тэ мангэ́нпэ Ту́кэ, рисёви кэ дава́ фо́ро, саво́ Ту выкэдыян, и кэ Кхангири́, сави́ мэ кэрдём Тырэ́ лавэ́скэ,
35. то тэды Ту вышу́н болыбна́стыр лэ́нгири па́тери и лэ́нгиро мангипэ́н и кэр, со трэй ваш лэ́нгэ.
36. Ке́ли ёнэ кэрэ́на грэ́хо анги́л Ту́тэ, – пал-дова́ со нанэ манушэ́с, саво́ на кэрдя́ грэ́хо, – и Ту росхолясоса пэ лэ́ндэ, и отдэса лэн вэргоскэ, и отлыджана лэн мануша́, савэ́ лынэ́ лэн дро пле́но пэ дуратуны пхув ци пашатуны,
37. и ке́ли ёнэ пэ пхув, пэ сави́ ёнэ явэ́на дро пле́но, заджа́на дрэ пэ́стэ и рисёна илэ́са, и явэ́на тэ мангэ́нпэ Ту́кэ пэ пхув, пэ сави́ ёнэ явэ́на дро пле́но, ракири́: “Амэ кэрдя́м грэ́хо, кэрдя́м на пир Зако́но, амэ бангэ́ сам,
38. и рисёна кэ Ту сарэ́ пэ́скирэ илэ́са и сарэ́ пэ́скирэ де́са, пэ пхув, пэ сави́ ёнэ явэ́на дро пле́но, карик отлыджана лэн дро пле́но, и явэ́на тэ мангэ́нпэ, рисии кэ пэ́скири пхув, сави́ Ту дыя́н лэ́нгирэ дадэ́нгэ, и кэ фо́ро, саво́ Ту выкэдыян, и кэ Кхангири́, сави́ мэ кэрдём Тырэ́ лавэ́скэ, –
39. то Ту вышу́н болыбна́стыр, Тырэ́ джиибна́скирэ штэто́стыр, па́тери (моли́тва) лэ́нгири и мангипэ́н лэ́нгиро, и кэр, со трэй ваш лэ́нгэ, и отмэк (простин) Тырэ́ манушэ́нгэ, дрэ со ёнэ кэрдэ́ грэ́хо анги́л Ту́тэ.
40. Дэ́вла миро! Мэк тэ явэ́н Тырэ́ якха́ отчхакирдэ и кана́ Тырэ́ откэрдэ кэ па́тери пэ дава́ штэ́то.
41. И акана́, Раё Дэ́вла, Дэ́вла, тэрдёв пэ штэ́то, кай рама́нё Тыро́, Ту и ковчэго Тырэ́ зоралыпнаскэ. Рашая́ Тырэ́, Раё Дэ́вла, мэк тэ урьенпэ дро зракхибэ́н, и мэк свэ́нта Тырэ́ тэ чалён лачхипна́са.
42. Раё Дэ́вла! На отрискир муй Тырэ́ помакхибнарискиро, ри́пир тангипэ́н кэ Тыро́ писха́ри Дави́до.”
11. Мэк Ту тэ шунэ́с, сыр пхандло ману́ш дэ́ла ґондя́ (ўздыхинэла) годла́са. Ракх чхавэ́н, савэ́ джа́на пэ мэрибэ́н Тырэ́ барэ́-вастэскирэ зорья́са.
12. И отдэ́ палэ дрэ эфта́ (битринэ́нгиро дэш) мо́лы фуеды́р обракирибэн амарэ́ котарьенгэ (суседэнгэ) дро лэ́нгиро брэг пал дова́, со ёнэ обракирэнас Тут, о Раё Дэ́вла.
13. Тэды амэ, савэ́ сам Тырэ́ мануша́ и бакрэ́ Тырэ́ ґуртоскирэ, амэ ява́са ўса́ды (сак) тэ парикирас Ту́кэ, амэ ява́са тэ сыкавас анги́л ро́до кэ ро́до Тыри́ сла́ва.
13. На кам тэ совэс, соб (кай) тэ на явэс чороро́: откэр пэ́скирэ якха́ и ту явэ́са чало марэ́са.
14. “Биба́хт, биба́хт!” – ракирэ́ла ману́ш, кон кинэла; нэ ке́ли ёв джа́ла криг, тэ́ньчи ёв шарэлапэ.
1. Дрэ Антио́хия, дрэ штэты́тко кхангири́ сыс проро́ки и сыклякирибнаскирэ: Варнава, и Симеоно, савэ́с кхардэ́ Нигеро, и Луцыё Киринеянино, и Манаило, саво́ бария кхэтанэ́ Ирадоса тетрархоса и Савло.
2. Екхвар, ке́ли ёнэ мангнэпэ Ра́скэ-Дэвлэ́скэ и постиндлэ, Свэ́нто Ду́хо (Фа́но) пхэндя́ лэ́нгэ: “Отдэ́н Ма́нгэ Варнавас и Савлос пэ рэ́ндо (де́ло), ваш саво́ Мэ лэн кхардём.”
3. И ёнэ, пало́ посто и мангипэ́н, чхудэ́ упрэ́ васта́ пэ лэ́ндэ, и отбичхадэ лэн.
4. Варнава и Савло, савэ́н бичхадя́ Свэ́нто Ду́хо (Фа́но), явнэ́ дрэ Селевкия, а одотхы́р отплывиндлэ (дынэ́ пли́ма криг) пэ Кипро.
5. Ке́ли ёнэ явнэ́ дро Саламино, одо́й ёнэ роспхэнэнас Дэвлэ́скиро лав дрэ Юдэя́кирэ синагоги. Иа́но сыс кхэтанэ́ лэ́нца и дэ́лас васт лэ́нгэ.
6. Ёнэ гинэ́ пир саро́ о́строво (джип) и явнэ́ дро Пафосо, одо́й стрэниндлэ манушэ́с, саво́ сыс човахано, хохано́ проро́ко Юдо, лэс кхардэ́ Вариисусо,
7. ёв сыс мал (дру́го) Римо́скирэ балунитконэскэ Серьгаскэ Павлискэ, годьварэ́ манушэ́скэ. Балунитко кхардя́ Варнавас и Савлос, пал-дова́ со камдя́ тэ шунэ́л Дэвлэ́скиро лав.
8. Нэ Елимо, човахано (лав лэ́скиро значынэ́ла “човахано”), саро́ кэрдя́ проти лэ́ндэ; ёв камдя́ тэ отрискирэл Римо́скирэ балунитконэс патяибнастыр.
9. Нэ Савло, савэ́с адя́кэ-паць кхардэ́ Па́вли, сарэ́ Свэнтонэ́ Духо́скирэ зорья́са, дыкхця маму́й пэ лэ́стэ,
10. и пхэндя́: “Ту, сан налачхэскиро чхаво́ и вэ́рго сарэ́ чачипнаскэ: ту сан пхэрдо́ хохаибнаса и калэ́ рэндэ́нца; ци пириячэса ту тэ злыджас манушэ́н чачунэ́ Ра́скирэ-Дэвлэ́скирэ дромэ́стыр?
11. И какана́, ґа́да, Дэвлэ́скиро васт исын пэ ту́тэ: Ту явэ́са короро́ и ту на явэ́са тэ дыкхэ́с кхам кэ саво́ трэй часо.” И екха́тыр згия пэ лэ́стэ калыпэ́н, и ёв лыя́ тэ чхурдэлпэ пир сарэ́ рига́, родыи вари-конэ́с тэ лыджа́л лэс пал васт.
12. Ке́ли балуни́тко (консуло) дыкхця́, со кэрдя́пэ, ёв лыя́ тэ патял, и ёв дивиндяпэ пэ Ра́скирэ-Дэвлэ́скиро сыклякирибэ́н.
13. Па́вли и лэ́скирэ мала́ отплывиндлэ (дынэ́ пли́ма криг) Пафостыр и явнэ́ дрэ Пергия и Памфилия; нэ Иа́но мэкця́ лэн одо́й и кокоро́ рисия́ дро Ерусалимо.
14. А ёнэ прогинэ́ Пергиятыр и явнэ́ дрэ Писидиякири Антио́хия, саватонэ́ (суботонэ́) ёнэ явнэ́ дрэ синагога и бэшнэ́.
15. Пало́ (после) гиныбэ́н Мойза́скирэ Законо́стыр и пророкэ́нгирэ сыклякирибнастыр, синагогакирэ барыдыра́ бичхадэ́ лав лэ́нгэ: “Мануша́лэ-Пшала́лэ! Ко́ли тумэ́ндэ исын лав ваш сыклякирибэ́н тэ пхэнэ́н манушэ́нгэ, то ракирэ́н.
16. Па́вли уштыя́ и сыкадя́ вастэ́са, соб (кай) ёнэ тэ шунэ́н, пхэни́: “Мануша́лэ Израилёскирэ! Лачхэ́ яви́р мануша́, савэ́ кутякирэна Дэвлэ́с, вышунэн ман:
17. Дэвэ́л Израилёскирэ манушэ́нгиро выкэдыя́ амарэ́ дадэн, Ёв кэрдя́ лэ́ндыр бари и патывалы́ нацыя, ке́ли ёнэ сыс дро Еги́пто, и Ёв барэ́-зорьякирэ вастэ́са лыджия́ лэн одолэ́ рига́тыр,
18. И пашэ́ штардэша́ бэрш Ёв дыкхця́ пал лэ́ндэ пэ чхучи́ пхув.
19. Дэвэ́л пэ Ханаано́скири пхув хасякирдя́ охто́ (бидуе́нгиро дэш) на́цыи и отдыя́ лэ́нгири пхув, сыр мэкно́ миштыпэ́н.
20. И пало́ дава́, пашэ́ штаршэла́ пандждэша́ бэрш, кэ/жы́ко проро́ко Самуи́ло, Дэвэ́л дэ́лас лэ́нгэ сэндарьен.
21. Коригэды́р (позжэ) ёнэ лынэ́ тэ мангэ́н пэ́скэ Крали́с, и Дэвэ́л дыя́ лэ́нгэ Саулос, Кисаскирэ чхавэ́с, Вениамино́скирэ родо́стыр пэ штардэша́ бэрш.
22. Дэвэ́л злыя́ Саулос кралипнастыр и чхудя́ лэ́нгэ Давидо́с сыр крали́с, пал савэ́стэ и пхэндя́ дро допхэныбэ́н: “Мэ латхём Давидо́с, Есеёскирэ чхавэ́с, адава́ ману́ш Ма́нгэ исын пир ило́, саво́ кэрэ́ла саро́ пир Мири́ во́ля.
23. И Давидо́скирэ родо́стыр Дэвэ́л, сыр Ёв дыя́ лав, яндя́ Израилёскэ Исусо́с Зракхибнаскирэс;
24. анги́л дава́, сыр Ису́со явдя́, Иа́но пхэнэлас лав тэ рискирэ́н пэ́скиро джиибэ́н кэ Дэвэ́л ваш болдыипэн сарэ́ Израилёскирэ манушэ́нгэ.”
25. Дро палатуно́ (последнё) пэ́скиро пхэныбнытко лав, Иа́но ракирдя́: “Пал конэ́стэ тумэ́ ман гинэ́на? Мэ на сом одова́; нэ ґа́да, джа́ла пал ма́ндэ Одова́, Савэ́скэ мэ на сом мол тэ роспхандав Лэ́скирэ ґэритка.”
Romani Bible Baltic 2019
United Bible Societies for the Baltic Romani Mission