Beblia

1. Ке́ли кончындя Соломо́но дая́ па́тери, то гия́ тэлэ́ яг болыбна́стыр и накхадя (проглыниндя) цэ́ло схачкирибэ́н и свэ́нта дыибэна́ Ра́скэ-Дэвлэ́скэ, и сла́ва Ра́скирэ-Дэвлэ́скири пхэрдякирдя́ кхэр.

2. И на могиндлэ́ рашая́ тэ заджа́н дро Ра́скирэ-Дэвлэ́скиро Кхэр, пал-дова́ со сла́ва Ра́скирэ-Дэвлэ́скири пхэрдякирдя́ Ра́скирэ-Дэвлэ́скиро Кхэр.

3. И сарэ́ Израилёскирэ чхавэ́, дыкхнэ́, сыр гия́ яг и Ра́скирэ-Дэвлэ́скири сла́ва пэ кхэр, пынэ́ мо́са пэ пхув, пэ чэботарь (помосто), и поклониндлэпэ, и шардэ и парикирдэ Ра́скэ-Дэвлэ́скэ, пхэни́: “Ёв исын лачхо́, пал-дова́ со дро ве́ко тангипэ́н Лэ́скиро.”

4. Кра́ли и сарэ́ мануша́ лынэ́ тэ янэ́н свэ́нта дыибэна́ Ра́скэ-Дэвлэ́скэ [анги́л муй Растэ-Дэвлэ́стэ-р.с.].

5. И яндя́ кра́ли Соломо́но дро свэ́нто яныбэ́н Ра́скэ-Дэвлэ́скэ биш тэ дуй тысёнцы гуруворэ́н и шэл тэ биш тысёнцы бакрэ́н: адя́кэ обсвэнцындлэ Ра́скирэ-Дэвлэ́скиро Кхэр кра́ли и сарэ́ мануша́.

6. Рашая́ сыс тэрдэ́ пэ пэ́скиро дынарибэ́н (служба), и Леви́ты багаибнытконэ струментэнца Дэвлэскирэнца, савэ́ кэрдя́ кра́ли Дави́до тэ славинэ́н (тэ барьякирэ́н) Дэвлэ́с, пал-дова́ со ве́чно исын тангипэ́н Лэ́скиро, адя́кэ сыр Дави́до ракирдя́ пирда́л лэ́ндэ; рашая́ пхурдынэ дрэ ро́ги анги́л лэ́стэ и саро́ Израилё сыс тэрдо́.

7. Обсвэнцындя Соломо́но и андратуны́ паш дрэ грэ́да, сави́ сыс анги́л Ра́скирэ-Дэвлэ́скиро Кхэр, пал-дова́ со яндя́ одо́й цэ́ло схачкирибэ́н и ту́ко (чэкэ́н) мирнонэ свэнтонэ́-дыибна́стыр Ра́скэ-Дэвлэ́скэ, адя́кэ сыр алта́рё сыс харкуно, саво́ кэрдя́ Соломо́но, дро лэ́стэ на могиндлэ́ тэ заджа́н цэ́ло схачкирибэ́н, и маруно́ яныбэ́н, и туки.

8. И кэрдя́ Соломо́но дрэ дова́ часо (цы́ро) эфта́-дывэсы́тко свэ́нко, и саро́ Израилё лэ́са-скэдыибэ́н древа́н баро́, мануша́ скэдынэ́пэ загиибнастыр дро Емафо кэ Египто́скири рэка (лэнь);

9. а пэ охто́то (бидуе́нгиро дэ́што) дывэ́с кэрдэ́ палатуно́ (после́днё) свэ́нко, пал-дова́ со алта́рё обсвэнцындлэ эфта́ дывэса́ и свэ́нко эфта́ дывэса́.

10. И пэ биш тэ три́то дывэ́с эфтатонэ-чхонэ́скиро о кра́ли отмэкця́ манушэ́н пир лэ́нгирэ ша́тры, радыма́са и веселыбнаса дро ило́ пал лачхипэ́н, саво́ кэрдя́ Рай Дэвэ́л Давидо́скэ, и Соломоно́скэ, и Израилёскэ, Пэ́скирэ манушэ́нгэ.

11. И кэрдя́ Соломо́но Кхэр Ра́скирэ-Дэвлэ́скиро и кхэр крали́скиро; и саро́, со чхудя́ Соломо́но пэ ило́ пэ́скиро тэ кэрэ́л дрэ Дэвлэ́скиро Кхэр и дро пэ́скиро кхэр, кэрдя́ ёв миштэ́с.

12. И явдя́ Рай Дэвэ́л Соломоно́скэ раты́, и пхэндя́ лэ́скэ: “Мэ шундём па́тери (моли́тва) тыри́ и выкэдыём Пэ́скэ дава́ штэ́то дро Кхэр, соб (кай) тэ янэ́н свэ́нто дыибэ́н.

13. Ко́ли Мэ зачхакирава болыбэ́н и на явэ́ла брышы́нд, и, ко́ли пхэна́ва пхакитконэ скочкэнгэ тэ хан пхув, ци бичхава́ва мэрибнаскирэ фра́нсы пэ Мирэ́ манушэ́ндэ,

14. и ко́ли ячэ́на штыл (примиринэнапэ) Мирэ́ мануша́, савэ́ кхарэнапэ Мирэ́ лавэ́са, и явэ́на тэ мангэ́нпэ, и латхэ́на Миро муй, и отджана пэ́скирэ налачхэ́ дромэндыр [чхувэ́на тэлэды́р пэ́скиро барипэ́н-р.с.]: то Мэ шунава болыбна́стыр, и отмэка́ва лэ́нгирэ грэ́хи, и высастякирава пхув лэ́нгири.

15. Акана́ якха́ Мирэ́ явэ́на отчхакирдэ и кана́ Мирэ́ шунэ́на ракхунэс па́тери (моли́тва) пэ дава́ штэ́то.

16. И акана́ Мэ выкэдыём и обсвэнцындём дава́ Кхэр, соб (кай) Миро лав тэ явэ́л одо́й дро ве́ко; и якха́ Мирэ́ и ило́ Миро явэ́на одо́й дрэ сарэ́ дывэса́.

17. И ко́ли ту явэ́са тэ псирэ́с анги́л Миро муй, сыр псирдя́ Дави́до, тыро́ дад, и ту явэ́са тэ кэрэ́с саро́, со Мэ ракирдём ту́кэ, и явэ́са тэ ракхэ́с Мирэ́ упхэныбэна́ и Мирэ́ зако́ны,

18. то Мэ зорьякирава троно тырэ́-кралипнаскиро, сыр Мэ дыём лав Давидо́скэ, тырэ́ дадэ́скэ, ракири́: “На пириячэ́ла ту́тэ мурш, саво́ явэ́ла тэ хулаинэ́л Израилёса.”

19. Нэ ко́ли тумэ́ отрисёна и ячкирэна Мирэ́ упхэныбэна́ и Мирэ́ припхэныбэна́, савэ́ Мэ дыём тумэ́нгэ, и джа́на пэ́скэ, и лэ́на тэ дынаринэ́н явирэ дэвлорэ́нгэ и тэ мангэ́нпэ лэ́нгэ:

20. то тэды Мэ традава криг Израилё Мирэ́ пхувья́тыр, сави́ Мэ дыём лэ́нгэ, и дая́ Кхангири́, сави́ Мэ обсвэнцындём Мирэ́ лавэ́са, Мэ отрискирава Мирэ́ мо́стыр и кэра́ва ла́тыр притча и сабэн сарэ́ манушэ́ндэ.

21. И пал дая́ вучи́ Кхангири́ кажно (сва́ко) ману́ш, саво́ джа́ла маму́й ла́тэ, подэлапэ дивоскэ и пхэнэ́ла: “Пал со кэрдя́ адя́кэ Рай Дэвэ́л далэ́ пхувья́са и далэ́ Кхангирьяса?”

22. И пхэнэ́на: “Пал дова́, со ёнэ ячкирдэ́ пэ́скирэ Рас-Дэвлэ́с, дадэнгирэс Дэвлэ́с, Саво́ вылыджия́ лэн Египто́скирэ пхувья́тыр, и приячнэ кэ яви́р дэвлорэ́, и мангнэпэ лэ́нгэ, и дынариндлэ́ лэ́нгэ, пал-дова́ Ёв яндя́ пэ лэ́ндэ сари́ дая́ би́да.’”

1. Сыр прогинэ́ биш бэрш, дрэ савэ́ Соломо́но кэрдя́ Кхэр Ра́скирэ-Дэвлэ́скиро и пэ́скиро кхэр,

2. и обкэрдя Соломо́но и фо́рья, савэ́ дыя́ Соломоно́скэ Хирамо, и чхудя́ тэ дживэ́н дрэ лэ́ндэ Израилёскирэ чхавэ́н,

3. гия́ Соломо́но пэ Емаф-Сува, и лыя́ лэс.

4. И кэрдя́ ёв Фадморо пэ чхучи́ пхув, и сарэ́ фо́рья ваш запасы, савэ́ кэрдя́ дро Емафо.

5. Ёв обкэрдя Вефороно упратуно и Вефороно тэлатуно, фо́рья зоралэ́ вантэнца, вударэнца и шыберэнца (запорэнца),

6. и Ваалафо и сарэ́ фо́рья ваш запасы, савэ́ сыс Соломоностэ, и сарэ́ фо́рья ваш марибны́тка вурдэна́, и фо́рья ваш грэнгэ, и саро́, со камдя́ Соломо́но тэ кэрэ́л дро Ерусалимо, и пэ Лива́но, и пэ сари́ пхув, сави́ сыс лэ́стэ.

7. Сарэ́ мануша́, савэ́ ячнэ́пэ Хетее́ндыр, и Аморее́ндыр, и Ферезее́ндыр, и Евее́ндыр, и Евусее́ндыр, савэ́ сыс на Израилёскирэ чхавэ́ндыр,

8. чхавэ́н лэнгирэн, савэ́ ячнэ́пэ пало́ (после) лэ́ндэ пэ пхув, савэ́н на мулякирдэ́ Израилёскирэ чхавэ́, – кэрдя́ Соломо́но бутярнэнца кэ/жы́ко дава́ дывэ́с.

9. Израилёскирэ чхавэ́н на кэрдя́ Соломо́но бутярнэнца пир пэ́скирэ рэ́нды, нэ ёнэ сыс халадэ́, и барыдыра́ лэ́скирэ пэ ракхибнарьендэ, и шэралэ́ пэ лэ́скирэ марибны́тка вурдэна́ и пэ лэ́скирэ манушэ́ндэ, савэ́ сыс уклистэ́ пэ грэ́ндэ.

10. И сыс шэралэ́ пэ барыдырэндэ крали́стэ Соломоностэ, савэ́ хулаиндлэ манушэ́нца, дуйшэла́ пандждэша́.

11. А чха фараоноскирья пирилыджия Соломо́но Давидо́скирэ форо́стыр дро кхэр, саво́ кэрдя́ ваш ла́кэ; пал-дова́ со, ракирдя́ ёв, нашты́ тэ дживэ́л джувлы́ ма́ндэ дро кхэр Давидо́скиро, Израилёскирэ-крали́скиро, пал-дова́ со свэ́нто ёв, штэ́то, адя́кэ, сыр загия́ дрэ лэ́стэ ковчэго Дэвлэ́скиро.

12. Тэды лыя́ тэ чхувэ́л Соломо́но цэ́ло схачкирибэ́н Ра́скэ-Дэвлэ́скэ пэ алта́рё Ра́скирэ-Дэвлэ́скиро, саво́ ёв кэрдя́ анги́л трэ́мо (притворо),

13. соб (кай) пир упхэныбэ́н кажно дывэ́с тэ янэс цэ́ло схачкирибэ́н, пир Мойза́скиро припхэныбэ́н, дро са́вато (субо́та), и дро нэво́-чхон, и дрэ свэ́нки трин мо́лы дро бэрш: дрэ свэ́нко опресноки, и дрэ свэ́нко эфтуно, и дрэ свэ́нко кушчэнгиро (будэнгиро).

14. И чхудя́ ёв, пир Давидо́скиро припхэныбэ́н, пэ́скирэ-дадэ́скиро, змены, (отде́лы) раша́нгирэ пир лэ́нгиро дынарибэ́н, и Левитэ́н пир лэ́нгирэ стрэги, соб (кай) ёнэ славиндлэ и парикирдэ пашы́л рашандэ пир упхэныбэ́н кажнонэ́-дывэсэскиро, и ракхибнарье́н пэ по́рта пир лэ́нгирэ зме́ны, кэ кажно по́рта, пал-дова́ со дасаво сыс припхэныбэ́н Давидо́скиро, Дэвлэ́скирэ Манушэ́скиро.

15. И, соб (кай) ёнэ тэ на отджан крали́скирэ упхэныбнастыр пал рашандэ и Левитэндэ ни дрэ со, ни пал кучипэна.

16. Адя́кэ кэрды сыс сари́ буты́ Соломоно́скирэ дывэсэ́стыр, ке́ли лынэ́ тэ кэрэ́н Ра́скирэ-Дэвлэ́скиро Кхэр кэ саро́ кэрибэн лэ́скиро – кхэрэ́скиро Ра́скирэ-Дэвлэ́скиро.

17. Тэды гия́ Соломо́но дрэ Ецыон-Гаве́ро и дрэ Елафо, саво́ сыс пэ морёскиро (дэрьявэ́скиро) брэ́го, пэ Идумеенгири пхув.

18. И бичхадя́ лэ́скэ Хирамо пирда́л пэ́скирэ дынарье́ндэ па́рмы (корабли) и бутярнэн, савэ́ джиндлэ́ мо́рё (дэрья́в), и гинэ́ ёнэ Соломоно́скирэ дынарье́нца дро Офиро, и яндлэ́ одотхы́р штаршэла́ пандждэша́ тала́нты сувнака́й, и яндлэ́ крали́скэ Соломоно́скэ.

1. Хоро́скирэ Дирижоро́скэ. Допхэныбэ́н пэ Лилиякири Мелодия. Асафоскиро Пса́лмо.

2. Причху́в кан, Израилёскиро Чхупна́ри! Ту, Саво́ лыджиян Ёзас (Иосифос) сыр ґурто; Ту, Саво́ сан бэшто́ машки́р Херувимэндэ, сыкадёв Пэс.

3. Сыка́в Пэ́скиро зоралыпэ́н анги́л Ефремостэ, Венияминостэ и Манасиястэ, яв тэ зракхэс амэн.

4. О, Дэ́вла! Зоралякир палэ амэн и мэк тэ зяинэл Тырэ́-москиро дуд и амэ зракхасапэ.

5. Раё Дэ́вла, болыбна́скирэ-янголэ́нгиро Дэвэ́л! Ци бут явэ́са Ту тэ холясос пэ мангипэ́н Тырэ́-манушэ́нгиро?

6. Ту чалякирдян лэн марэ́са ясвэ́нца и Ту кэрдя́н, соб (кай) ёнэ тэ пьен ясва барэ́ мераса?

15. Исын сувнака́й, и бут куч бара́, нэ най дрогэдыр кучипэ́н исын годьварэ́ ушта́.

26. Мануша́лэ-Пшала́лэ, Чхавэ́ Авраамо́скирэ, и машки́р тумэ́ндэ исын На́юды, савэ́ кутякирэна Дэвлэ́с! Дава́ зракхибнаскиро лав сыс бичхадо́ амэ́нгэ:

27. со мануша́, савэ́ дживдэ́ кэ Ерусалимо и лэ́нгирэ барыдыра́, на уджиндлэ́ Исусо́с, ёнэ сэндиндлэ пхарэ́с Лэс и далэ́са-паць кэрдэ́ дова́, со ракирдэ́ проро́ки, далэ́ лава́ амэ гинаса кажно саватонэ́ (суботонэ́), сы́рбы сэндинаса Лэс.

28. Ёнэ на латхнэ́ дрэ Лэ́стэ нисави́ банг ваш мэрибэ́н, и усае́кх мангнэ́ Пилатос тэ мулякирэ́н Лэс.

29. Ке́ли ёнэ кэрдэ́ саро́, со сыс чхиндло́ пал Лэ́стэ, ёнэ лынэ́ Лэс трушулэстыр, чхудэ́ Лэс дрэ маґилытко копли́ца.

30. Нэ Дэвэ́л отджидякирдя́ Лэс мэрибна́стыр;

31. И бут дывэса́ Ису́со сыкадёлас кэ одолэ́ мануша́, савэ́ кхэтанэ́ Лэ́са явнэ́ Галилеятыр дро Ерусалимо, савэ́ какана́ исын Лэ́скирэ якхи́тка анги́л манушэ́ндэ.

32. И амэ пиридаса кадая́ бахталы́ зан (звесь) тумэ́нгэ, сыр Дэвэ́л дыя́ лав амарэ́ дадэ́нгэ, Ёв кэрдя́ дава́ ваш амэ́нгэ, лэ́нгирэ чхавэ́нгэ, ке́ли отджидякирдя́ Исусо́с,

33. сыр дава́ исын чхиндло́ дро яви́р пса́лмо: “Ту сан Миро Чхаво́: Мэ ададывэ́с бияндём Тут.”

34. Дэвэ́л отджидякирдя́ Лэс мэрибна́стыр адя́кэ, соб (кай) Ёв буты́р тэ на кирнёл дрэ маґила, пал дава́ Ёв пхэндя́ адя́кэ: “Мэ да́ва Ту́кэ свэ́нто и чачуно́ бахтякирибэ́н, саво́ сыс дыно́ Давидо́скэ.”

35. Палдава́ Ёв ракирэ́ла и яви́р штэ́то: “Ту на дэ́са Свэнтонэскэ тэ дыкхэ́л мэрибэ́н.”

36. Нэ Дави́до кэрдя́ саро́ дро пэ́скиро часо, сыр лэ́скэ пхэндя́ Дэвэ́л, ёв мыя́, и лэс гарадэ́ лэ́скирэ дадэ́нца и тру́по лэ́скиро кирныя.

37. Нэ Одова́, Конэ́с Дэвэ́л отджидякирдя́, на кирныя.

38. Палдава́, Мануша́лэ-Пшала́лэ, мэ кама́м, соб (кай) тумэ́ тэ джинэ́н, со тумэ́нгэ пхэнэ́лапэ лав пал грэхэнгиро отмэкибэн пир Исусо́стэ Христосо́стэ,

39. и дрэ саро́, дрэ со тумэ́ на могиндлэ́ тэ явэ́н зракхнэ́ Мойза́скирэ Законоса, кажно ману́ш, кон патя́ла, ячэ́ла чачипна́скиро пир Исусо́стэ Христосо́стэ.

40. Дыкхэ́н, соб (кай) и тумэ́нгэ тэ на явэ́л адя́кэ, сыр ракирдэ́ проро́ки:

41. “Ракхэ́нпэ тумэ́, кон дыкхэ́ла бипатывакирэс пэ яви́р манушэ́ндэ, тумэ́ здивинэнапэ и хасёна; пал-дова́ со Мэ кэра́ва дасаво рэ́ндо ваш тумэ́ндэ дрэ тумарэ́ дывэса́, савэ́скэ тумэ́ ние́кхвар на патя́на, ко́ли вари-кон роспхэнэ́ла тумэ́нгэ пал дава́.”

42. Ке́ли Па́вли и Варнава джа́нас явирэ синагогатыр, лэн кхардэ́, соб (кай) ёнэ тэ явэ́н дро яви́р са́вато и тэ ракирэ́н дова́-паць.

43. Ке́ли мануша́, савэ́ сыс пэ скэдыибэ́н, лынэ́ тэ розджанпэ, тэды бут Юды и яви́р, савэ́ прилынэ́ Юды́тко сыклякирибэ́н, гинэ́ пал Павлистэ Варнаваса, савэ́ ракирдэ́ лэ́нца и мангэнас, упатякирэнас лэн тэ явэ́н дурэды́р дро Дэвлэ́скиро бахталыпэ́н.

44. Дро яви́р са́вато сарэ́ мануша́ форо́стыр явнэ́ тэ шунэ́н Дэвлэ́скиро лав.

45. Ке́ли Юды дыкхнэ́, со скэдынэ́пэ ада́кицы бут мануша́, ёнэ лынэ́ тэ зэвлынэн и ракирдэ́ древа́н налачхэ́ лава́ пэ саро́ дова́, со ракирдя́ Па́вли.

46. А Па́вли и Варнава ракирдэ́ муршканэ́с и бидаракирэс пхэндлэ́: “Амэ́нгэ трэй англэды́р сарэ́ндыр тумэ́нгэ тэ роспхэнас Дэвлэ́скиро лав: нэ сыр тумэ́ на приґалёна лэс, тумэ́ далэ́са сэндинэна кокорэ́ пэс, со тумэ́ндэ на явэ́ла ве́чно джиибэ́н, палдава́ амэ какана́ рискираса Дэвлэ́скиро лав Наюдэ́нгэ;

47. палдава́, со адя́кэ амэ́нгэ ракирдя́ Рай Дэвэ́л, сыр Ёв пхэндя́: “Мэ кэра́ва Тут, соб (кай) ту тэ явэс дуд Наюдэ́нгэ, соб (кай) пир Ту́тэ мануша́ тэ явэ́н зракхнэ́ пир сари́ пхув.”

48. На́юды, ке́ли шундлэ́ дава́, радындлэпэ и славиндлэ Дэвлэ́скиро лав, и упатя́ндынэ сарэ́, савэ́ сыс выкэдынэ́ кэ ве́чно джиибэ́н;

49. И Дэвлэ́скиро лав розджаласпэ пир сари́ доя́ риг.

50. Нэ Юды, подракирдэ дэвлытконэ́ и барвалэ́ родо́стыр джувле́н и форо́скирэ барыдырэ́н, и ґаздынэ́ манушэ́н проти Павлистэ и Варнавастэ, и традынэ криг лэн пэ́скирэ рига́тыр.

51. Тэды Апо́столы тринскирдэ пэ лэ́ндэ пра́хо пэ́скирэ ґэрэндыр и гинэ́ дрэ Икония.

52. Сыкляибны́тка сыс пхэрдэ́ радыма́са и Свэнтонэ́ Духо́са.

Romani Bible Baltic 2019

United Bible Societies for the Baltic Romani Mission