Bible in one year August 1Esther 3:1-151. Пало́ (после) дава́ Артаксе́рксо кра́ли дыя́ баро́ право Аманоскэ, Амадафоскирэ чхавэ́скэ, Вугеяниноскэ, и ґаздыя́ лэс, и чхудя́ лэ́скиро штэ́то, кай ёв сыс бэшто́, вучэды́р сарэ́ндыр тхагарье́ндыр, савэ́ сыс лэ́стэ.2. И сарэ́, кон дынариндя́ пашы́л крали́стэ, савэ́ сыс пашы́л крали́скирэ вудара́, клониндэпэ и пынэ́ мо́са пэ пхув анги́л Аманостэ; пал-дова́ со адя́кэ припхэндя́ кра́ли. А Мардохе́ё на клониндяпэ и на пыя́ мо́са пэ пхув.3. И ракирдэ́ мануша́, савэ́ дынариндлэ́ пашы́л крали́стэ, савэ́ сыс пашы́л крали́скирэ вудара́ Мардохеёскэ: “Со́скэ ту пхагирэса крали́скиро упхэныбэ́н?”4. И сыр ёнэ лэ́скэ ракирдэ́ кажно дывэ́с, а ёв на кандыя́ лэн, тэды ёнэ роспхэндлэ́ Аманоскэ, соб (кай) тэ дыкхэ́н, ци вытэрдёла дрэ пэ́скиро лав Мардохе́ё, пал-дова́ со ёв пхэндя́ лэ́нгэ, со ёв сыс Юдо.5. И ке́ли дыкхця́ Ама́но, со Мардохе́ё на клонинэласпэ, и на пэрэлас мо́са пэ пхув анги́л лэ́стэ, тэды пхэрдия холя́са Ама́но.6. И сыкадыя́ лэ́скэ, со нисо́ на мол тэ чхувэ́л васт пэ екхэ́стэ Мардохеёстэ; нэ адя́кэ, сыр пхэндлэ́ лэ́скэ, савэ́ндыр манушэ́ндыр Мардохе́ё, тэды задуминдя Ама́но тэ мулякирэ́н Юдэ́н, савэ́ сыс дрэ саро́ Артаксерксоскиро кралипэ́н, сыр Мардохеёскирэ манушэ́н.7. Дро пэ́рво чхон, саво́ исын чхон Нисано, дрэ дэшуявир бэрш крали́скиро Артаксерксоскиро чхурдынэ́ жре́биё, анги́л Аманоскиро муй дывэ́с дро дывэ́с и чхонэстыр дро чхон, и пыя́ жре́биё пэ дэшуявир чхон, пэ чхон Адаро.8. И пхэндя́ Ама́но Артаксерксоскэ, крали́скэ: ‘Исын екх мануша́, савэ́ росчхурдынэ и выбичхадэ машки́р манушэ́ндэ пир сарэ́ тырэ́-крали́скирэ провинцыи; и лэ́нгирэ зако́ны на зджанапэ сарэ́ манушытконэ́ законэнца, и крали́скирэ зако́ны ёнэ на сполнинэна; и крали́скэ нашты́ адя́кэ тэ ячкирэс лэн.9. Ко́ли крали́скэ явэ́ла пир ило́, тэды мэк тэ явэ́л зачхиндло́ сыр припхэныбэ́н тэ мулякирэ́н лэн; и дэш бара́ тала́нты руп мэ плэскирава дрэ манушэ́нгирэ васта́, кон кэрдя́ дая́ буты́, соб (кай) тэ лыджа́н дрэ крали́скири пиралы́ (казна).’10. Тэды кра́ли злыя́ пэ́скири ангрусты чэргэнорьяса пэ́скирэ вастэ́стыр и отдыя́ ла Аманоскэ, Амадафоскирэ чхавэ́скэ, Вугеяниноскэ, саво́ сыс вэ́рго Юдэ́нгэ.11. И пхэндя́ кра́ли Аманоскэ: “Мэ да́ва ту́кэ дава́ руп и манушэ́н; и кэр лэ́нца адя́кэ, сыр ту́кэ здэлапэ.”12. И сыс кхардэ́ крали́скирэ лыла́-чхиныбнаскирэ дро пэ́рво чхон, пэ лэ́скиро дэшутрито дывэ́с, и сыс чхиндло́, сыр пхэндя́ Ама́но, крали́скирэ барыдырэ́нгэ дрэ провинцыи тхэмэ́скирэ и барыдырэ́нгэ пэ кажно провинцыя и тхагарье́нгэ кажнонэ́ манушэ́нгирэ; дрэ кажно провинцыя ла́кирэ чхиныбнаса и сарэ́ манушэ́нгэ пэ лэ́нгири чиб. Саро́ сыс чхиндло́ Артаксерксоскирэ крали́скирэ лавэ́стыр и спхандло крали́скирэ ангрустяса чэргэнорьяса.13. И бичхадэ́ сыс лыла́ пир манушэ́ндэ дрэ сарэ́ крали́скирэ провинцыи, соб (кай) тэ замарэ́н, (тэ хасякирэ́н) и тэ мулякирэ́н сарэ́н Юдэ́н, тыкнэн и пхуранэн, биятэ́н и джувле́н, дро е́кх дывэ́с, пэ дэшутрито дывэ́с дэшуявир-чхонэ́скиро, дро Адароскири чхон, и барвалыпэ́н лэ́нгиро тэ залэн.14. Пиричхиныбэн далэ́ упхэныбнастыр сыс тэ отдэ́н дрэ кажно провинцыя сыр зако́но, саво́ сыс пхэндло́ (объявиндло) ваш сарэ́ манушэ́нгэ, соб (кай) ёнэ тэ явэ́н скэдынэ́ кэ дова́ дывэ́с.15. Мануша́, савэ́н бичхадэ́, сы́гэс гинэ́ крали́скирэ припхэныбнаса, и упхэныбэ́н сыс пхэндло́ и дрэ крали́скири фэлатин Сузы. И кра́ли и Ама́но сыс бэштэ́ и пинэ́, а фо́ро Сузы сыс дрэ баро́ пиридживипэн.Esther 4:1-171. Ке́ли Мардохе́ё уджиндя́ саро́, со кэрдя́пэ, ёв роскустя пэ́скирэ и́ди, и чхудя́ пэ пэ́стэ балытко гоно́ (вре́тишчо) и пра́ска; и ёв выгия́ пэ машкира́л фо́ро барэ́ и кирконэ ясвэ́нца, и задыя го́дла.2. И догия́ кэ крали́скирэ вудара́; адя́кэ сыр нашты́ сыс тэ заджа́л дрэ крали́скирэ вудара́ дро балытко гоно́.3. Адя́кэ-паць и дро кажно провинцыя и штэ́то, карик догия́ крали́скиро припхэныбэ́н и лэ́скиро упхэныбэ́н, сыс баро́ пиридживипэн Юдэ́нгэ, и посто, и ровибэн, и го́дла; балытко гоно́ и пра́ска сыс чхуибнаса ваш бутэнгэ манушэ́нгэ.4. И явнэ́ бутярнэ́ Эстэракирэ и ла́кирэ е́внухи, и роспхэндлэ́ ла́кэ, и древа́н зоралэ́с лыя́ тэ пиридживэл кра́лица. И ёй бичхадя́ и́дя, соб (кай) Мардохе́ё тэ урьявэл лэн и тэ злэл пэ́стыр пэ́скиро балытко гоно́; нэ ёв на прилыя́.5. Тэды Эстэ́ра кхардя́ Гафахос, екхэ крали́скирэ евнухэндыр, савэ́с кра́ли чхудя́ кэ ёй, и бичхадя́ лэс кэ Мардохе́ё тэ уджинэл: со сыс дасаво и со́стыр дава́ гия́?6. И гия́ Гафахо кэ Мардохе́ё пэ форо́скири форуны́ (пло́шча), сави́ сыс анги́л крали́скирэ вудара́.7. И роспхэндя́ лэ́скэ Мардохе́ё пал саро́, со лэ́са кэрдя́пэ, и пал ци бут руп, пал саво́ дыя́ лав Ама́но тэ плэскирэл дрэ крали́скири пиралы́ (казна) пал Юдэ́ндэ, соб (кай) тэ мулякирэ́н лэн.8. И подыя лэ́скэ манушэ́нгиро пиричхиныбэн припхэныбнастыр, саво́ сыс пхэндло́ дрэ Сузы, и пал мулякирибэн лэ́нгиро, соб (кай) тэ сыкавэ́л Эстэракэ и тэ дэл джиныбэ́н ла́кэ пал саро́; апри́ч дава́ ёв пхэндя́ ла́кэ, соб (кай) ёй тэ джал кэ кра́ли и древа́н тэ мангэ́л лэс тэ потангинэл (тэ жалинэл) лэн и, соб (кай) ёй мангдя́ лэс пал пэ́скирэ манушэ́ндэ.9. И явдя́ Гафахо, и пирипхэндя Эстэракэ Мардохеёскирэ лава́.10. И пхэндя́ Эстэ́ра Гафахоскэ, и бичхадя́ лэс тэ пхэнэ́л Мардохеёскэ:11. “Сарэ́ мануша́, савэ́ кэрэ́на буты́ пашы́л крали́стэ и дрэ крали́скирэ провинцыи джинэ́на, со кажнонэ́скэ манушэ́скэ, и муршэскэ и джувля́кэ, кон заджа́ла кэ кра́ли дрэ андратуны́ грэ́да, и кон на сыс кхардо, екх сэ́ндо – мэрибэ́н; екх одова́, кэ кон протырдэла кра́ли пэ́скиро сувнакуно́ дэсто́, кодова́ ячэ́лапэ джидо́. А мэ на сом кхарды кэ кра́ли, ґа́да, аж трия́нда дывэса́.”12. И пирипхэндлэ Мардохеёскэ Эстэракирэ лава́.13. И пхэндя́ Мардохе́ё дрэ отпхэныбэ́н Эстэракэ: “На думин, со ту екхджины зракхэсапэ дро крали́скиро кхэр сарэ́ Юдэндыр.14. Ко́ли ту дро дава́ часо явэ́са штыл (промолчинэса), тэды васт (помошч) и зракхибэ́н явэ́на ваш Юдэ́нгэ явирэ штэто́стыр, а ту и тырэ́ – дадэ́скиро кхэр, хасёна. И кон джинэ́ла, ци на ваш дава́ часо ту и дорэсцян (долыян) крали́скири паты́в?”15. И пхэндя́ Эстэ́ра адя́кэ дро отпхэныбэ́н Мардохеёскэ:16. “Джа́, скэ́дэ сарэ́ Юдэ́н, савэ́ исын дрэ Сузы, и постинэн ваш ма́нгэ, и на хан и на пьен трин дывэса́, ни дывэсэ́, ни раты́, и мэ пэ́скирэ бутярнэнца адя́кэ-паць ява́ва тэ постинав, и коригэды́р (позжэ) мэ джа́ва кэ кра́ли, хоць дава́ исын проти зако́но, и ко́ли трэй явэ́ла тэ хасёвав, то хасёвава.”17. И гия́ Мардохе́ё, и кэрдя́, сыр припхэндя́ лэ́скэ Эстэ́ра.Psalms 89:46-5246. Ту кэрдя́н тыкнэды́р лэ́скирэ тырнэ бэрша́, Ту учхакирдян лэс ладжаса. Сэ́ла.47. О, Раё Дэ́вла! Кицы́ явэ́са Ту тэ гарадёс? Ци явэ́ла Тыри́ бари холын тэ хачол сыр яг?48. Ри́пир, мэ мангав Тут: саво́ миро джиибэ́н исын. Ваш саво́ харныпэ́н (суе́та) Ту создыян манушытконэ́ чхавэ́н?49. Саво́ ману́ш сашты́ тэ дживэ́л и тэ на дыкхэ́л мэрибэ́н? Ци зракхэ́ла ёв пэ́скиро ди люноскирэ зорья́тыр? Сэ́ла.50. О, Раё Дэ́вла, кай исын Тыро́ дро́го лачхипэ́н, саво́ ґарэдыр сыс Ту́тэ, со Ту совлахадян Давидо́скэ Тырэ́ патяибна́са?51. Ри́пир, о, Раё Дэ́вла, сыр обракирэна Тырэ́ дынари́с! Со мэ пирилыджиём пал брэк, сыр бут мануша́ обракирэна,52. со́са Тырэ́ вэ́рги прокошэна Тут, о Раё Дэ́вла, со́са ёнэ прокошэна пенты (кхурья́) Тырэ́ помакхнэскэ?Proverbs 22:7-87. Барвало́ рикирэ́ла зор пэ чорорэстэ: и кон исын вужло, одова́ исын дына́ри кодолэ́скэ, саво́ покэрдя (конэ́скэ ёв исын банго́).8. Кон почхувэла (сеинэла) начачипэ́н сыр гив пэ фэ́лда, кодова́ кэрэ́ла биба́хт (би́да) пэ́скэ, и лэ́скири зор дрэ холы́ кончынэлапэ.Rimanenge 3:1-311. Тэды, сави́ льго́та (преимушчэство) исын Юдэ́ндэ явирэ манушэ́ндыр, ци саво́ лачхипэ́н исын обчхиныбнастыр?2. Юдэ́ндэ исын бари льго́та дро саро́: буты́р сарэ́стыр дрэ дова́, со лэ́нгэ сыс допатякирдо Дэвлэ́скиро лав.3. И со ж? Ко́ли бут лэ́ндыр на упатя́ндынэ дрэ Дэвлэ́стэ, тэды ци могинэ́ла лэ́нгиро начачипэ́н тэ хасякирэ́л Дэвлэ́скиро чачипэ́н?4. Над, нисыр. Дэвэ́л исын чачуно́, а кажно ману́ш исын хохано́, сыр исын чхиндло́: “Чачунэ́ исын Тырэ́ лава́, и дро сэ́ндо Тыро́ исын чачипэ́н.”5. Нэ ко́ли амаро́ начачипэ́н сыкавэ́ла Дэвлэ́скиро чачипэ́н, тэды со амэ пхэна́са? Нау́што явэ́ла Дэвэ́л начачуно пэ амэ́ндэ дрэ Пэ́скири холы́? Мэ ракира́ва пир манушы́тко годы́.6. Над, ко́ли адя́кэ дава́ тэ явэ́л, тэды сыр Дэвэ́л явэ́ла тэ сэндякирэ́л свэ́то?7. Ко́ли миро начачипэ́н кэрэ́ла бицялэдыр Дэвлэ́скиро чачипэ́н и далэ́са кэрэ́ла барэды́р Лэ́скири сла́ва, тэды пал со ишчо (инкэ́) ман тэ сэндинэ́н, сыр грэхитконэ́ манушэ́с?8. Со́скэ амэ́нгэ тэды дурэды́р тэ на кэра́с фуипэ́н, соб (кай) буты́р тэ барьёл лачхипэ́н, сыр вари-савэ́ мануша́ кошэна амэн и ракирэ́на, со амэ адя́кэ сыклякираса? Чачуно́ сэ́ндо явэ́ла пэ кадасавэ́ манушэ́ндэ.9. Со ж тэды? Ци исын амэ́ндэ вари-сави́ льго́та анги́л явирэ манушэ́ндэ? Нисави́; палдова́ со амэ какана́ допхэндям, со сыр Юды, адя́кэ-паць и Эли́ны (Гре́ки/Баламэ́), амэ сарэ́ сам тэл грэхи́тко зор:10. сыр и исын чхиндло́: “Нанэ ние́кх чачуно́ ману́ш;11. нанэ нико́н, соб (кай) тэ ґалёл и тэ родэ́л Дэвлэ́с.12. Сарэ́ мардэ́пэ дрэ риг дромэ́стыр, и со кэ екх исын хасибны́тка, нанэ ни екх ману́ш, кон кэрэ́ла лачхипэ́н; нанэ нико́н:13. лэ́нгиро кирло исын отчхакирды маґила, ёнэ пэ́скирэ чиба́са (чибьяса) ракирэ́на екх хохаибэ́н; сапитко трута (ядо) исын пэ лэ́нгирэ ушта́:14. лэ́нгирэ лавэ́ндыр исын екх кошыбэ́н и киркипэн;15. лэ́нгирэ ґэра́ лыджа́на сы́гэс тэ прочхувэн манушэ́нгиро рат;16. бизладо и хасибэ́н одо́й, кай ёнэ гинэ́,17. ёнэ на ґалынэ́ дром кэ рама́нё (миро).18. И ёнэ на кутякирэна и на дарна Дэвлэ́стыр.”19. Нэ амэ джина́са, со дова́, со вари-ке́ли Зако́но ракирэ́ла, ёв ракирэ́ла одолэ́ манушэ́нгэ, савэ́ исын тэл Зако́но адя́кэ, соб (кай) кажна лава́ тэ запхэнэн тэ ракирэ́н, и саро́ свэ́то тэ явэ́л банго́ анги́л Дэвлэ́стэ.20. Кон кэрэ́ла пир Зако́но, усае́кх ние́кх на приджинэлапэ чачунэса анги́л Дэвлэ́стэ, пал-дова́ со Зако́но дэ́ла амэ́нгэ тэ джинас, со да дасаво исын грэ́хо.21. Нэ какана́ Дэвэ́л отчхакирэла Пэ́скиро чачипэ́н манушэ́нгэ, савэ́ исын вольна Законо́стыр, а дава́ джа́ла чачипнастыр, пал саво́ допхэнэна Зако́но и Проро́ки;22. дава́ Дэвлэ́скиро чачипэ́н исын пир патяибэ́н дрэ Исусо́стэ Христосо́стэ, саво́ дэ́лапэ сарэ́ манушэ́нгэ би выкэдыибнаскиро, кон патя́ла.23. Пал-дова́ со сарэ́ мануша́ кэрдэ́ грэ́хо и ёнэ дуринэ Дэвлэ́скирэ славатыр.24. Нэ лэ́нгирэ грэ́хи отмэкэнапэ пир Дэвлэ́скиро бахталыпэ́н, пир выкиныбэ́н Исусо́скирэ Христосо́скирэ ратэ́са;25. Савэс Дэвэ́л чхудя́ анги́л сыр свэ́нто дыибэ́н ваш тангипэ́н пир патяибэ́н дро Лэ́скиро рат, кон патя́ла, адя́кэ Дэвэ́л сыкадя́ пэ́скиро чачипэ́н и примангдя грэ́хи манушэ́нгэ, савэ́ ёнэ кэрдэ́ англэды́р;26. пэ́скирэ ґаратунэ́ (длугонэ) вырикирибнаса саро́ дава́ часо, соб (кай) Ёв какана́ тэ сыкавэ́л пэ́скиро чачипэ́н, и со Ёв кокоро́ исын чачуно́, и приджинэла чачунэнца сарэ́н, кон патя́ла дрэ Исусо́стэ.27. Со́са амэ́нгэ какана́ тэ шараспэ? Нанэ со́са. Ко́ли екхэ Законоса? Над, а патяибна́са пир Зако́но;28. пал-дова́ со амэ гинаса, со ману́ш приджинэлапэ чачунэса пир патяибэ́н, на дыкхи́, сыр ёв ракхэ́ла Зако́но.29. Нау́што Дэвэ́л исын екх ваш Юдэ́нгэ? Ци нанэ Ёв Дэвэ́л и Наюдэ́нгэ? Ёв исын Дэвэ́л адя́кэ-паць ваш сарэ́ манушэ́нгэ пэ свэ́то:30. пал-дова́ со исын екх Дэвэ́л, Саво́ приджинэла чачунэнца одолэ́н, кон кэрдя́ обчхиныбэн пир патяибэ́н и кодолэ́н, савэ́ патя́на, нэ савэ́ исын наобчиндлэ.31. Ци дава́ на значынэ́ла, со амэ хасякираса Зако́но патяибна́са? Сарэ́са над, амэ кэра́са Зако́но зоралэды́р. Romani Bible Baltic 2019 Maintained by the United Bible Societies for the Baltic Romani Mission