Bible in one year August 10Job 11:1-201. Тэ́ньци Софаро Наамостыр отпхэндя́ лавэ́нца:2. “Ци нашты́ тэ отпхэнэс пэ бут пхучибэна? Ци бутэ́-ракирибнытконэ манушэ́нгэ яви́р мануша́ исын бангэ́ тэ пхэнэ́н, со лэ́скиро исын чачипэ́н?3. Ци со тыро́ хохано́ ракирибэ́н зачхувэла манушэ́н тэ явэ́н дро рама́нё (миро)? Ци сыр ту сасапэ холямэс, тэды со ж нашты́ тэ ладжакирэн тут?4. Пал-дова́ со ту ж пхэндя́н: “Мирэ́-патяибнаскиро сыклякирибэ́н исын бибангякири, и мэ сом бидошэ́нгиро дрэ тумарэ́ якха́.”5. Нэ, соб (кай) Дэвэ́л тэ лэл тэ ракирэ́л и тэ откэрэл Пэ́скирэ ушта́ пэ ту́тэ;6. и, соб (кай) Ёв тэ сыкавэ́л ту́кэ годыпнаскирэ чораханыбэна, сыр дава́ исын, со ёнэ дрэ дуй мо́лы пириджана дова́, со Тыри́ годы́ сашты́ тэ подуминэл. Джин, со Дэвэ́л отмэкэ́ла ту́кэ бут тырэ́ чорипна́стыр.7. Ци могинэ́са ту тэ розґалёс саро́ хорипэ́н, Саво́ Дэвэ́л исын?8. Ци могинэ́са ту тэ ґалёс Сарэзорьякирэ Дэвлэ́с кэ пхэрдыпэн?9. Джиныбэ́н пал Дэвлэ́стэ исын длэнгэдыр пхувья́тыр и исын буґлэдыр морёстыр (дэрьявэстыр).10. Ко́ли Ёв проджа́ла пашы́л, Ёв пхандэла дрэ зандирья́ (цэ́пи/ковы) и Ёв кхарэ́ла пэ сэ́ндо, кон могинэ́ла (сашты́) тэ тэрдёл проти Лэ́стэ?11. Пал-дова́ со Ёв джинэ́ла годякирэ манушэ́н; Ёв адя́кэ-паць дыкхэ́ла фуипэ́н тэды, ке́ли ману́ш нашты́ аж и тэ подуминэл;12. нэ бигодыпнаскиро ману́ш нашты́ тэ явэ́л годытко, ровнэс адя́кэ-паць сыр и ману́ш сашты́ тэ бияндёл дасаво сы́рбы кхуроро бусонэ (диконэ) ослицатыр.13. Ко́ли ту рискирэса миштэ́с тыро́ ило́ и протырдэса пэ́скирэ васта́ кэ Ёв,14. и чхувэ́са чорипэ́н дур пэ́скирэ вастэ́ндыр и ту на домэкэса, соб (кай) фуипэ́н тэ дживэ́н дрэ тырэ́ ша́тры,15. тэды ту би кунипнаскиро могинэсас тэ ґаздэс пэ́скиро бидошэ́нгиро шэро́, и ту явэ́са набадякирибнытко, и ту на дарэсас нисостыр,16. пал-дова́ со ту бистрэса пал тыри́ бари би́да, и пририкирэса пал ла́тэ сы́рбы пал паня́, со нашнэ́ криг,17. и тыро́ джиибэ́н явэ́ла яснэдыр парнэ́ дывэсэ́стыр, мэк и сыс цямло ту́тэ дрэ якха́, на явэ́ла ясно сыр зло́ко (ра́нко).18. И явэ́ла ту́тэ зорало́ патяибэ́н, пал-дова́ со ту́тэ явэ́ла наде́я, и кай ту на роздыкхэса паш пэ́стэ, явэ́са тэ откхинёс би дара́киро.19. И явэ́са ту тэ пасёс, и ние́кх на явэ́ла тэ даракирэл тут, и бут мануша́ явэ́на тэ пхэнэ́н помия (плётки), соб (кай) тэ покэрэнпэ ту́кэ.20. Нэ фуе́-манушэ́нгиро дыкхибэ́н хасёла, и ёнэ на нашэ́на бидатыр, и лэ́нгири наде́я пириячэ́ла тэ дыхинэл сыр и лэ́нгиро джиибэ́н.”Job 12:1-251. И отпхэндя́ Ио́во лавэ́нца:2. “Чачо́, тумэ́ сан мануша́ и годыпэ́н мэрэ́ла тумэ́нца.3. Нэ мэ адя́кэ-паць бут ґалёвава, сыр и тумэ́, мэ на сом тэлэды́р тумэ́ндыр; и, чачо́, кон на джинэ́ла саро́ дава́, со тумэ́ пхэндлэ́?4. Мэ сом екх ману́ш, пэ конэ́стэ дру́го (мал) дыкхэ́ла бангэ́ мо́са, – мэ, кон кхарэ́ла Дэвлэ́с, и конэ́скэ Ёв отпхэнэ́ла: Мэ, дэвлы́тко и чачуно́ ману́ш, яцём сабнаса ваш явирэ́нгэ.5. Вольна мануша́ дрэ годы́ сы́рбы дыкхэ́на бангэ́ мо́са пэ одолэ́ндэ, савэнгирэ ґэра́ бандинэ сы́рбы би́да.6. Розмарибнытконэнгирэ ша́тры зяинэна миштыпнаса, и кодолэ́, савэ́ прэзэнтынэна Дэвлэ́с, дживэ́на бидаракиро, – дава́ дэ́ла лэ́нгэ Дэвэ́л Пэ́скирэ вастэ́са.7. Нэ акана́ пхучэнпэ кхэритконэ́ мурдалэ́ндыр (ското́стыр), и ёнэ явэ́на тэ сыклякирэ́н тумэн и болыбна́скирэ чириклендыр, и ёнэ пхэнэ́на тумэ́нгэ;8. ци ракирэ́н пхувья́са, и ёй высыклякирэла тумэн, ци морёскирэ (дэрьявэ́скирэ) мачхэ́ пхэнэ́на тумэ́нгэ.9. Кон джинэ́ла дава́, со Дэвлэ́скиро васт создыя́ лэн;10. со Лэ́скиро васт рикирэ́ла джиибэ́н пэ кажно (сва́ко) джидо́ ди.11. Ци на спробинэна тумарэ́ кана́ лава́, сыр и муй чуинэла хабэ́н?12. Годыпэ́н исын пхурэ́ манушэ́ндэ, и ману́ш лэ́ла тэ ґалёл буты́р джиибна́скирэ дывэсэ́ндыр.13. Нэ Дэвлэ́стэ исын годыпэ́н и зоралыпэ́н, Ёв дэ́ла годы́ и ґалёла.14. Ѓа́да, Ёв пхагирэ́ла, и дова́ ужэ на кэрэ́са нэвэ́стыр (зноко): Ёв пхандэла манушэ́с дро штарибэ́н и нанэ отмэкибэн пэ во́ля.15. Ѓа́да, Ёв пририкирэла паня́, и ёнэ вышутёна: и Ёв бичхавэ́ла лэн англэ, и ёнэ рискирэна тэлэ́ пхув.16. Дэвлэ́стэ исын зоралыпэ́н и годыпнаскиро джиныбэ́н, хохадэ мануша́ и хохаибнаскирэ исын дрэ Лэ́скири зор.17. Ёв лыджа́ла годы́-дыибнаскирэн тэ кэрэ́н доша, Ёв кэрэ́ла сэндарьен дылынэнца.18. Ёв лэ́ла криг зор кралье́ндыр, Ёв пхандэла кустыка пэ лэ́нгирэ трушула (чре́сло).19. Ёв лыджа́ла раша́н тэ кэрэ́н доша, и равэла тэлэ́ зоралыпнаскирэн,20. Ёв лэ́ла криг чиб шука́р-ракирибнаскирэндыр (велеречывонэндыр) и кэрэ́ла адя́кэ, со пхурэ́ пириячэна лачхэ́с тэ розґалён;21. Ёв вычхувэла накутякирибэн пэ тхагарье́ндэ и Ёв розвастакирэла зоралыпнаскирэн;22. Ёв росчхакирэла хор котэра́ цямлыпнастыр и Ёв янэ́ла мэрибнаскири зэр (тень) пэ дуд;23. Ёв прибарьякирэла манушы́тка на́цыи и вымарэла лэн; Ёв росчхурдэла манушы́тка на́цыи и кэдэла лэн кхэтанэ́.24. Ёв лэ́ла криг годы́ манушэ́нгирэ шэралэндыр пэ пхув, и кэрэ́ла адя́кэ, со ёнэ псирэ́на адя́кэ, сыр пир бидромэскири чхучи́ пхув.25. Ёнэ псирэ́на, чилави вастэ́нца дро калыпэ́н, кай дуд нанэ, и Ёв кэрэ́ла адя́кэ, со ёнэ кунинэнапэ (шатынэнапэ) сыр матэ.Psalms 94:1-111. О, Раё Дэ́вла, Саво́ чхувэ́ла ка́ра, Дэвлалэ, Саво́ чхувэ́ла ка́ра (хась), сыкадёв Кокоро́.2. Газдэ Пэс, Ту, Сэнда́ри, пир сари́ пхув, сэндякир чачунэ́с пхутькирдэн.3. О, Раё Дэ́вла, кицы́ явэ́на фуй мануша́, кицы́ явэ́на фуй мануша́ тэ радынэ́нпэ?4. Ёнэ выпхэнэнапэ, ёнэ ракирэ́на бариканэс, сарэ́, кон кэрэ́ла чорипэ́н, пхутёна пэ́са.5. Ёнэ роспхаравэна Тырэ́ манушэ́н пэ котэра́ (куски), о Раё Дэ́вла, ёнэ притасавэ́на Тыро́ миштыпэ́н;6. ёнэ замарэна пивлен (удовэн) и чужонэ́ манушэ́н и мулякирэна пиротэн (сиротэн).7. И ёнэ ракирэ́на: “Рай Дэвэ́л на дыкхэла дава́, ци Израилёскиро Дэвэ́л на рискирэ́ла годы́ пэ дава́.8. Ѓалён тумэ́, хрустэнгирэ (бигодякирэ), машки́р манушэ́ндэ; тумэ́ сан дылынэ́, ке́ли тумэ́ явэ́на годэ́?9. Ци на дошунэла Одова́, Кон чхудя́ кан? Ци на додыкхэла Одова́, кон кэрдя́ якх?10. Ци на явэ́ла тэ сэндякирял Одова́, Кон сыклякирэ́ла на́цыи? Кодова́, Саво́ дэ́ла годы́ манушэ́нгэ?11. Рай Дэвэ́л джинэ́ла манушэ́нгирэ ду́мы, со ёнэ исын хартытка (суетна).Proverbs 22:24-2524. На яв мал (на дружын) холынакирэ манушэ́скэ, на ра́кир [на джа́-ю.о.] яглунэ манушэ́са,25. соб (кай) ту тэ на сыклёс, сыр ёв кэрэ́ла, и соб (кай) ту тэ на чхувэ́с фэлы́ ваш тыро́ ди.Rimanenge 10:1-211. Пшала́лэ! Шук мирэ́ илэскири и мангипэ́н кэ Дэвэ́л исын пал дова́, соб (кай) Израилё тэ явэ́л зракхно.2. Мэ сом лэ́нгиро якхи́тко (свидете́лё), со ёнэ зоралэ́с рикирэ́на сыр Дро́гима Дэвлэ́с дро пэ́скиро ило́ кэ зэвлыныпэ́н, нэ на пир джиныбэ́н.3. Пал-дова́ со ёнэ на уджиндлэ́ Дэвлэ́скиро чачипэ́н, и чхувэ́нас зорья́са ёнэ пэ́скиро чачипэ́н, пал-дова́ ёнэ на чхудэ́ пэс тэл Дэвлэ́скиро чачипэ́н.4. Зако́но кончындяпэ Христосо́са, соб (кай) кажно, кон патя́ла, тэ явэ́л приджиндло чачунэса.5. Мо́йза (Моисеё) чхинэла пал чачипэ́н пир Зако́но: “Со ману́ш, саво́ явэ́ла тэ кэрэ́л пир Зако́но, явэ́ла тэ дживэ́л Лэ́са.”6. А чачипэ́н, саво́ исын патяибнастыр, ракирэ́ла адя́кэ: “На ра́кир дро пэ́скиро ило́: ‘Кон джа́ла упрэ́ пэ болыбэ́н?’” (Соб (кай) одотхы́р тэ янэл тэлэ́ Христосо́с упралыпнастыр)7. ци ‘Кон могинэ́ла тэ змэкэлпэ тэл пхув?’ (Соб (кай) тэ ґаздэл Христосо́с мулэ́ндыр).8. Со ракирэ́ла Свэ́нто Чхиныбэ́н? “Лав исын дыно́ ту́кэ, ёв исын дрэ тырэ́ ушта́ и дрэ тыро́ ило́”, ґа́да, исын дова́ лав, савэ́са амэ пхэна́са лав,9. пал-дова́ со, ко́ли ту приґалёса тырэ́ уштэ́нца и явэ́са тэ ракирэ́с сарэ́нгэ, со ‘Ису́со исын Дэвэ́л’ и явэ́са тэ патяс тырэ́ илэ́са, со Дэвэ́л отджидякирдя́ Лэс мулэ́ндыр, тэды ту зракхэсапэ.10. Пал-дова́ со, кон патя́ла илэ́са, дава́ патяибэ́н лыджа́ла кэ чачипэ́н, а кон приґалёла уштэ́нца, дава́ лыджа́ла кэ зракхибэ́н.11. Палдава́ Свэ́нто Чхиныбэ́н ракирэ́ла: “Кон патя́ла дрэ Лэ́стэ, одолэ́скэ на явэ́ла ладжаво.”12. Пал-дова́ со нанэ нисаво́ выкэдыибэн машки́р Юдэ́ндэ и Элинэ́нгэ (Грекэ́нгэ/Баламэ́нгэ); пал-дова́ со екх Одова́-паць Дэвэ́л исын ваш сарэ́нгэ, и Саво́ бахтякирэ́ла барвалэс сарэ́н, кон прикхарэла Лэс.13. Пал-дова́ со со екх ману́ш, кон прикхарэла Дэвлэ́скиро лав, зракхэ́лапэ.14. Нэ сыр сашты́ тэ прикхарэс Одолэ́с, дрэ Конэ́стэ ёнэ на упатя́ндынэ? И сыр лэ́нгэ тэ упатян дрэ Одолэ́стэ, пал Конэ́стэ ёнэ нисо́ на шундлэ́? И сыр ёнэ могинэ́на тэ шунэ́н, ко́ли нико́н на явэ́ла тэ пхэнэ́л лав лэ́нгэ?15. Нэ сыр вари-кон явэ́ла тэ пхэнэ́л лав лэ́нгэ, ко́ли ёв на явэ́ла бичхадо́? Сыр исын чхиндло́ пал дава́: “Савэ бахталэ́ исын ґэра́ одолэ́ манушэ́нгирэ, савэ́ псирэ́на пир свэ́то и роспхэнэна бахталы́ зан пал рама́нё, пал Лэ́скирэ лачхэ́ рэ́нды.”16. Нэ на сарэ́ Юды прилынэ́ бахталы́ зан (звесь). Палдава́ Исаё ракирэ́ла: “Раё Дэ́вла! Кон патяндыя дрэ амари́ бахталы́ зан (звесь).”17. Патяибэ́н явэ́ла шуныбнастыр, а шуныбэ́н явэ́ла Дэвлэ́скирэ лавэ́ндыр.18. Нэ мэ пхучава: “Нау́што (неужэли) ёнэ на шундлэ́? Шундлэ́, чачэс; лэ́нгири зан прогия́ пир сари́ пхув, и лэ́нгирэ лава́ сыс шундлэ́ пэ свэто́скирэ яго́ры (кра́и).”19. Нэ мэ нэвэ́стыр ракира́ва: “Ци могинэ́ла адя́кэ тэ явэ́л, соб (кай) Израилё тэ на джинэ́л дава́? Мо́йза пэ́рво ракирдя́: ‘Мэ джангавава тумэн, соб (кай) тумэ́ тэ зэвлынэн пир одолэ́ манушэ́ндэ, савэ́ на гинэнапэ пал нацыя: мэ ґазда́ва дрэ тумэ́ндэ холы́ пир манушэ́ндэ, савэ́ на джинэ́на Ман.’”20. Исаё муршканэ́с ракирэ́ла: “Ман латхнэ́ одолэ́, савэ́ на родынэ Ман; Мэ сыкадём пэс одолэ́нгэ, савэ́ на пхучнэ́ пал Ма́ндэ.”21. А Израилёскэ Ёв ракирэ́ла: “Саро́ дывэ́с Мэ протырдавас мирэ́ васта́ кэ адалэ́ мануша́, савэ́ на кандэ́на и кэрэ́на проти Ма́ндэ.” Romani Bible Baltic 2019 Maintained by the United Bible Societies for the Baltic Romani Mission