|
|
| 1. Ма́ндэ нанэ ду́хо (фа́но), мирэ́ дывэсэнгэ исын ко́нцо (яго́ро), маґила (кула) исын скэдыны ваш ма́нгэ [мулыканэ/гробы-р.с.]. |
| 2. Пашы́л ма́ндэ исын мануша́, кон салапэ холямэс, нэ мирэ́ якха́ дыкхэнас, сыр ёнэ биманушыткэс пэрэ́на пэ ма́ндэ. |
| 3. Дэ́вла! Яв миро дудвало! Чхув сымады́ (залого) пал ма́ндэ Пэ́скэ. Кон жа яви́р сашты́ тэ марэл пир васта́ пал ма́ндэ? |
| 4. Пал-дова́ со Ту гарадян лэ́нгирэ-малэнгирэ илэ тэ ґалён, палдава́ Ту на домэкэса, соб (кай) ёнэ тэ ґаздэ́нпэ. |
| 5. Кон ракирэ́ла хоханэ́с пэ́скирэ малэнца, кодолэ́-чхавэ́нгирэ якха́ пириячэна тэ дыкхэ́н. |
| 6. И Дэвэ́л кэрдя́ адя́кэ, со мэ яцём сыр притча ваш манушэ́нгэ; мэ яцём кадасаво́ ману́ш, пэ конэ́стэ чунгардэна дро муй. |
| 7. Мирэ́ якха́ пириячнэ тэ дыкхэ́н мирэ́ тугатыр, и сарэ́ мирэ́ кокалы́ ячнэ́ сыр зэр (тень). |
| 8. Чачунэ́ мануша́ дивинэнапэ далэ́стыр, и бибангипнаскиро ґаздэ́лапэ холя́са пэ ма́ндэ сы́рбы пэ дуе́-муе́нгирэстэ. |
| 9. Нэ чачуно́ явэ́ла тэ рикирэлпэ кэ пэ́скиро дром, и конэ́стэ исын жужэ́ васта́, одова́ ману́ш явэ́ла зоралэды́р дро пэ́скиро ду́хо. |
| 10. Нэ, мэ манга́ва, явэ́н сарэ́ палэ, палэ-дова́ со мэ на латхём машки́р тумэ́ндэ екхэ годэ́ манушэ́с. |
| 11. Мирэ́ дывэса́ прогинэ́, миро камибэн дро джиибэ́н биладыя (растопиндя), адя́кэ-паць и мирэ́-илэ́скирэ ду́мы. |
| 12. Мирэ́ мала́ парудэ рат дро дывэ́с, и ке́ли явэ́ла калыпэ́н, ёнэ ракирэ́на, со сыг дуд явэ́ла. |
| 13. Ко́ли вари-со исын ма́нгэ тэ ужакирав, дава́ исын лю́но (преисподня), соб (кай) ёв тэ явэ́л сыр кхэр ма́нгэ, и соб (кай) ма́нгэ тэ кэра́в миро чхуибэ́н дро калыпэ́н: |
| 14. тэды мэ да́ва го́дла маґилакэ: “Ту сан сыр дад ма́нгэ!” И кирмэскэ: “Ту сан сыр дай и пхэн ма́нгэ.” |
| 15. Со́стыр ма́нгэ тэды тэ ужакирав лачхипэ́н? О, мири́ наде́я, ци вари-кон джинэ́ла пал дава́? |
| 16. Ци ёй, мири́ наде́я сашты́ тэ джал тэлэ́ пал ма́ндэ кэ люноскири по́рта (вра́ты), соб (кай) амэ́нгэ кхэтанэ́ тэ откхинёвас дро пра́хо.” |
|
|
| 1. О Вилдадо Савхеянино (Шуахостыр) ракирэ́лас яви́р мо́ло, и отпхэндя́ лавэ́нца: |
| 2. “Ке́ли кончынэса ту тэ чингирэспэ лавэ́нца? Яв годыпнаскиро, и тэ́ньчи (после) амэ ява́са тэ ракирас. |
| 3. Со́скэ ту дыкхэ́са пэ амэ́ндэ сыр пэ мурдалэ́ндэ (жывотнонэндэ)? Ио́во, со́скэ амэ сам нажужэ́ дрэ тумарэ́ якха́? |
| 4. Ту роскушэса пэс пэ́скирэ холя́тыр, ци со тэды пал ту́тэ манушэ́нгэ тэ ячавэн пхув? Ци, со ска́ла кхарэ́лапэ пэ́скирэ штэто́стыр? |
| 5. Нэ фуе́-манушэ́нгиро дуд мурдёла, и момолы лэ́скирэ ягатыр на явэ́ла тэ зяинэл. |
| 6. Дуд ячэ́ла цямло дрэ лэ́скири ша́тра, и лэ́скиро момолы́тко (свети́льнико) мурдёла. |
| 7. Зор явэ́ла тэ уджал лэ́скирэ шагэндыр (ламне́ндыр), а лэ́скиро плано лыджа́ла лэс кокорэс тэ пэрэ́л. |
| 8. Пал-дова́ со лэ́скирэ ґэра́ кокорэ́ лыджа́на лэс дрэ кхуды́ (мире́жа), и ёв штавэла кэ фэля́. |
| 9. Чирикленгири фэлы́ подтырдэла лэс пал пента (кхур), а фэлы́ пэ пхув ухтылэ́ла лэс пал ґэро́й. |
| 10. Шошкэнгиро (хорёскиро) капкано исын гарадо́ лэ́стыр, и фэлы́ сеткаса исын пэ дром. |
| 11. Трашаибэ́н пал трашаибэ́н дарьякирэна лэс кажнонэ́ рига́тыр, и пал лэ́стэ традэнапэ пала́л лэ́скирэ пе́нты (кхурья). |
| 12. Бокх сы́рбы выхая лэ́скиро зоралыпэ́н, и бари би́да, исын паш лэ́стэ, ужакирэ́ла пэ лэ́стэ. |
| 13. Мэрибнытко насвалыпэн схала сарэ́са лэ́скирэ маса́, ёв похая сарэ́са лэ́скирэ ґэра́ и васта́. |
| 14. Мэрибэ́н вырискирэла лэс лэ́скирэ шатратыр, кай ёв сыс би дара́киро, и лыджа́ла лэс тэлэ́ кэ кра́ли пэ барэ́ биды. |
| 15. Дрэ лэ́скири ша́тра явэ́на тэ дживэ́н чу́жа мануша́, а се́ра (дзэвэ́ля) почхувэна пир лэ́скиро кхэратуно штэ́то: |
| 16. лэ́скирэ ко́рни (рукха́) вышутёна тэлалэстыр, а лэ́скирэ рандя́ зашутёна упра́л. |
| 17. Рипирибэ́н пал лэ́стэ хасёла пэ пхув, и лэ́скиро лав бистрэна пэ вули́цы (пэ га́сы). |
| 18. Лэс традэ́на криг дудэ́стыр (свэто́стыр) дро калыпэ́н, лэс вытрадэна пхувья́тыр, кай мануша́ дживэ́на. |
| 19. Лэ́стэ на явэ́ла ни чхаво́, ни плименико машки́р лэ́скирэ манушэ́ндэ, ние́кх на ячэ́лапэ пэ лэ́скиро кхэратуно штэ́то. |
| 20. Ди́во кэ дар ухтылэ́ла манушэ́н западостыр долэ́ дывэсэ́стыр, а мануша́ вастоко́стыр трашадёна. |
| 21. Адя́кэ исын кхэратунэ штэтоса, кай дживдя́ начипнаскиро ману́ш, дасаво-паць исын дром кодолэ́скэ, кон на джинэ́ла Дэвлэ́с.” |
|
|
| 1. Явэ́н тэ багас зоралэ́с Ра́скэ-Дэвлэ́скэ, явэ́н тэ багас зоралэ́с радыма́тыр бэргакэ, сави́ зракхэ́ла амэн; |
| 2. явэ́н тэ заджа́н анги́л Лэ́стэ шарибнаса, явэ́н тэ радынаспэ зоралэ́с псалмэнца анги́л Лэ́стэ. |
| 3. Пал-дова́ со Рай Дэвэ́л исын баро́ Дэвэ́л и баро́ Кра́ли, Саво́ исын вучэды́р сарэ́ дэвлорэндыр. |
| 4. Ёв исын хула́й пэ хор штэ́ты пэ пхув, и адя́кэ-паць пэ вучипэна́ бэргэнгирэ. |
| 5. Ёв исын хула́й пэ мо́рё (дэрья́в), и Ёв создыя́ лэс и Лэ́скирэ васта́ создынэ пхув. |
|
|
| 1. Сыр ту бэшэса тэ хас барыдырэ́са, то придыкхпэ шука́р, кон исын анги́л ту́тэ; |
| 2. и чхув чхури кэ пэ́скиро кирло, ко́ли ту сан ману́ш, саво́ исын ґа́лко кэ хабэ́н. |
| 3. На ха древа́н бут лэ́скирэ бонбоны (присмаки), пал-дова́ со ёнэ исын хохано́ хабэ́н. |
|
|
| 1. Палдава́, пшала́лэ, мэ манга́ва тумэн Дэвлэ́скирэ тангипнаса, тэ отдэ́н пэс сарэ́са сыр свэ́нто джидо́ отдыибэ́н и саво́ трэй Дэвлэ́скэ ваш тумаро́ годьваро́ дынарибэ́н (служэние) Лэ́скэ годя́са и илэ́са. |
| 2. На дживэ́н адя́кэ, сыр адалэ́-векоскирэ мануша́ дживэ́на, нэ парувэн пэс, нэвякирэн тумари́ годы́, соб (кай) тумэ́нгэ тэ джинэ́н, со Дэвлэ́скири во́ля исын лачхи́, бидошэнгири и чачуны́. |
| 3. Палдава́ мэ ракира́ва кажнонэ́скэ тумэ́ндыр: на думинэн пал пэ́стэ бутэды́р, сыр трэй тэ думинэс; нэ думинэн годьварэс пир тумаро́ патяибэ́н, саво́ Дэвэ́л дыя́ кажнонэ́скэ тумэ́ндыр. |
| 4. Палдава́, сыр манушэ́стэ исын екх маса́ и бут паша́ дрэ лэ́стэ, нэ на сарэ́ паша́, со кэ екх, кэрэ́на дова́-паць; |
| 5. адя́кэ-паць и амэ сарэ́ кхэтанэ́ сам сы́рбы екх маса́ дрэ Христосо́стэ, а ко́ли амэ на сам кхэтанэ́, тэды амэ сам паша́ екх екхэ́скэ. |
| 6. Нэ палдова́, сыр амэ́ндэ исын ра́зна таланы пир бахталыпэ́н, саво́ исын дыно́ амэ́нгэ, тэды ява́са тэ дынарина́с Дэвлэ́скэ лэ́нца, конэ́скэ исын дыно́ тала́но: тэ явэ́л проро́ко, мэк тэ ракирэ́л пир патяибэ́н, саво́ исын лэ́стэ: |
| 7. ко́ли вари-конэ́скэ дыно́ тэ помогинэл явирэ́нгэ, мэк одова́ ману́ш тэ помогинэл; ци, ко́ли вари-конэ́скэ дыно́ тэ явэ́л сыклякирибна́скиро, мэк одова́ ману́ш тэ сыклякирэ́л. |
| 8. Ци, ко́ли вари-конэ́скэ дыно́ тэ подрикирэ́л манушэ́н, мэк одова́ ману́ш тэ подрикирэ́л; ко́ли вари-конэ́скэ дыно́ тэ роздэл чорорэнгэ, мэк одова́ ману́ш тэ на тангинэ́л, мэк тэ дэл сарэ́ илэ́стыр; ци ко́ли вари-конэ́скэ дыно́ тэ явэ́л ра́са, мэк одова́ ману́ш тэ кэрэ́л миштэ́с пэ́скири буты́. Ко́ли вари-конэ́скэ дыно́ тэ дыкхэ́л пал явирэндэ, мэк одова́ ману́ш тэ кэрэ́л дава́ радыма́са. |
| 9. Мэк тэ явэ́л чачуны́ тумари́ пшалы́тко паты́в; рисён криг фуипнастыр и кэрэ́н лачхипэ́н: |
| 10. сыкавэ́н паты́в екх екхэ́скэ пшалытконэ патыва́са и тангинэн екх екхэ́с: кутякирэн (важынэн) екх екхэ́с; |
| 11. на явэ́н кирнэ́-масэ́нгирэ, хачон духо́са, ке́ли тумэ́ дынаринэна Дэвлэ́скэ. |
| 12. Радынэ́нпэ дро тумари́ наде́я: явэ́н зоралэ́ (тварда) дро пиридживипэн; ўса́ды (сак) мангэ́нпэ Дэвлэ́скэ; |
| 13. помогинэн (подэн васт) Дэвлытконэ́ манушэ́нгэ, ке́ли лэ́ндэ исын трэ́бима, дыкхэ́н илэ́са пал одолэ́ манушэ́ндэ, савэ́ явэ́на кэ тумэ́. |
| 14. Бахтякирэн одолэ́ манушэ́н, савэ́ традэ́на тумэн; бахтякирэн, а на кошэн. |
| 15. Радынэ́нпэ кхэтанэ́ одолэ́ манушэ́нца, савэ́ радынэ́напэ, и ровэ́н кхэтанэ́ одолэ́ манушэ́нца, савэ́ ровэна. |
| 16. Дживэ́н сыр мала́ (дру́ги) машки́р пэ́стэ; на пхутён, а явэ́н кандунэ; на думинэн пал пэ́стэ, со тумэ́ сан древа́н годьварэ́: |
| 17. на кэрэ́н чорипэ́н палэ пал холы́ никонэ́скэ, кэрэ́н лачхипэ́н сарэ́ манушэ́нгэ; |
| 18. ко́ли дава́ сашты́ тумарэ́ рига́тыр, дживэ́н дро рама́нё (миро) сарэ́ манушэ́нца. |
| 19. Мирэ́ мала́, на кэрэ́н нисаво́ чорипэ́н никонэ́скэ пал пэ́стэ, пша́ла мирэ́, фэды́р ячкирэн штэ́то ваш Дэвлэ́скири холы́; пал-дова́ со, сыр исын чхиндло́: “Ячкирэн дава́ Ма́нгэ, Мэ кэра́ва”, – ракирэ́ла Рай Дэвэ́л. |
| 20. И ко́ли тыро́ вэ́рго (врого) исын бокхало, чарав лэс; ко́ли ёв камэ́ла тэ пьел, дэ тэ пьел лэ́скэ; пал-дова́ со, ко́ли ту кэрэ́са адя́кэ, ту кэдэса лэ́скэ пэ шэро́ хачкирдэ́ вангара. |
| 21. На домэк, соб (кай) холы́ тэ лэл ло́фо (зор) пэ ту́тэ, нэ кокоро́ пиризорьякир холы́ лачхипна́са. |
|
|
| Romani Bible Baltic 2019 |
| United Bible Societies for the Baltic Romani Mission |