Beblia

Bible in one year August 16

Job 23:1-17

1. И отпхэндя́ Ио́во лавэ́нца:

2. “Адя́кэ-паць и кэ ададывэ́с мэ ишчо (инкэ́) жалинавапэ; мирэ́ мэ́ньки исын пхарэдыр мирэ́ гонде́ндыр (уздохэндыр).

3. О, соб (кай) ма́нгэ тэ джина́в, кай мэ могинавас тэ латхав Лэс, соб (кай) ма́нгэ тэ явав кэ Лэ́скиро штэ́то!

4. Мэ чхувавас анги́л миро рэ́ндо анги́л Лэ́стэ и миро муй явэ́лас пхэрдо́ зоралэ́ лавэ́нца;

5. соб (кай) мэ тэ джина́в лава́, савэ́нца Ёв отпхэнэ́лас ма́нгэ, и соб (кай) мэ тэ ґалёвав, со Ёв пхэнэ́ла ма́нгэ.

6. Нау́што Ёв явэ́лас тэ лыджа́л чинга́рд ма́нца сарэ́ Лэ́скирэ барэ́ зорья́тыр? Над. Нэ Ёв рисёла тэ шунэ́л ман.

7. Одо́й дэвлы́тка мануша́ могинэ́нас тэ пириракирэн причыны Лэ́са, и мэ выракхаваспэ ўса́ды (сак) мирэ́ сэндаристыр.

8. Акэ, – мэ джа́ва анги́л, нэ Ёв нанэ одо́й, и мэ палэ, нэ мэ нашты́ тэ роздыкхав Лэс;

9. сыр Ёв кэрэ́ла буты́ пэ зэ́рво (ле́во) риг, мэ нашты́ тэ дыкха́в Лэс; ке́ли Ёв рисёла пэ чачи́ (право) риг, мэ на могина́ва тэ дыкха́в Лэс.

10. Нэ Ёв джинэ́ла дром, савэ́са мэ джа́ва, и Ёв пропатякирдя ман и мэ выджава сыр сувнака́й.

11. Мири́ ґэро́й рикирдяпэ зоралэ́с пэ Лэ́скирэ дрома́; мэ гиём украт (точнэс) Лэ́скирэ дромэ́са, и мэ на рисиём дрэ риг.

12. Мэ на чхурдыём пэ риг припхэныбэна́ Лэ́скирэ уштэндыр, мэ ракхцём дрэ годы́ сыр сувнака́й Лэ́скирэ – уштэнгирэ лава́ фэды́р мирэ́ хабнастыр, со трэй ма́нгэ.

13. Нэ Лэ́скири годы́ на парудёла, кон сашты́ тэ рискирэ́л Лэс Лэ́скирэ дромэ́стыр? Дова́, со Лэ́скиро ди камэ́ла, кодова́ Ёв и кэрэ́ла.

14. И Ёв выпхэрдякирдя дова́, со исын припхэндло ма́нгэ, и кадасавэ́ припхэныбэна́ исын бут Лэ́стэ.

15. Палдава́ ма́ндэ трашаибэ́н кэ мэрибэ́н анги́л Лэ́стэ: сыр мэ обдуминава дава́, тэды мэ дарава Лэ́стыр.

16. Пал-дова́ со Дэвэ́л кэрдя́ миро ило́ ковло, и дава́ Ёв, Сарэзоралыпнаскиро Дэвэ́л, страхакирэла ман;

17. сыр Ёв на чхурдыя́ ман тэ хасёвав анги́л, сыр явдя́ калыпэ́н, и Ёв на гарадя ту́га калыпнаса мирэ́ якхэ́ндыр.”

Job 24:1-25

1. Со́скэ Сарэзорья́киро Дэвэ́л на упхэндя часы тэ сэндякирэ́л? Со́скэ кодолэ́, кон джинэ́ла Лэс, на дыкхэ́на Лэ́скирэ дывэса́, со Ёв выкэдыя́ ваш сэ́ндо?

2. Э мануша́ пиричхувэна шпэры пэ пхув тэ лэн буты́р, ёнэ нахратэс заухтылэна бакрэ́нгирэ гурты и ёнэ чаравэна лэн кэ пэ.

3. Ёнэ традэ́на зорья́са кэ пэ пиротэнгирэ (сиротэнгирэ) ослэн, ёнэ лэ́на пивленгирэ (удовэнгирэ) гурувэ́н сыр сымады́ (залого).

4. Ёнэ шпулэна (пихинэна) богэн криг дромэ́стыр: чорорэнгэ пэ дая́ пхув трэй тэ гарадён.

5. Акэ, ёнэ исын сы́рбы буса (дика) ослы (мега́рья) пэ чхучэ́ прахи, ёнэ джа́на пэ буты́, и ёнэ родэ́на тася́рлэс (ра́нэс) хабэ́н: чхучэ́ сте́пи (маля) дэ́на хабэ́н лэ́нгэ и лэ́нгирэ чхаворэнгэ.

6. Чорорэ́ чхинэна тэлэ́ на пэ́скиро хахаибэн пэ фэ́лда, ёнэ кэдэна винаграды́тка му́ри кэ фуй мануша́;

7. ёнэ ратькирэна нангэ, би урибнаскиро, лэ́ндэ нанэ со́са тэ чхакирэнпэ дрэ шыл.

8. Ёнэ киндёна бэргитконэ брышындэндыр, и ёнэ облэна скалы сыр гаравипнаскири (убежышча) пэ́скэ.

9. А кадалэ́ фуй мануша́ отлэна криг пиротэн (сиротэн) колынэстыр и ёнэ лэ́на сымады́ чорорэндыр:

10. а кадалэ́ чорорэ́ псирэ́на нангэ, би идякиро, и бокхалэ́, лыджа́на ґарбы (снопы);

11. ёнэ тасавэна оливи́тко дзэт машки́р ва́нты, и ёнэ штавэна винаграды́тка му́ри дро тасавильня (пресо) и ёнэ мэнчынэнапэ трушатыр (смэгатыр).

12. Э мануша́ дэ́на ґондя́ годла́са форо́стыр, и дукхадэ дия́ годлякирэна; – нэ Дэвэ́л на причхинэла банг фуе́ манушэ́нгэ пал грэхи́тка рэ́нды.

13. Одолэ́ фуе́-манушэ́ндыр исын кадасавэ́ вэ́рги, кон бунтуинэна сы́рбы пэ дуд; ёнэ на джинэ́на ни Лэ́скирэ дрома́, ёнэ на ячэ́напэ пэ дром дудэса (светоса).

14. Сыр дывэсёла, уштэ́ла замарибнаскиро, ёв мулякирэ́ла чорорэн и богэн, а раты́ ёв чорэла.

15. Биладжакунэскирэ якха́ ужакирэ́на бэльвэ́ль, пхэни́ пэ́скэ: “Ние́кх на дыкхэ́ла ман”, и ёв гаравэла пэ́скиро муй.

16. Дро калыпэ́н ёнэ подганавэнапэ тэл кхэра́, пэ савэ́ ёнэ чхудэ́ шпэ́ра дывэсэ́, ёнэ на джинэ́на дуд.

17. Зло́ко (ра́нко) исын ваш лэ́нгэ сы́рбы мэрибнаскири зэр (тень), пал-дова́ со ёнэ джинэ́на ратякири зэр, сави́ на трашавэла лэн.

18. Тумэ́ ракирэ́на! Ёв, хачи, исын сы́рбы котэрорэ пэ пани́, со валны (вэлны) сы́гэс лыджа́на криг лэн, нэ лэ́нгири пхув исын тэл прокошыбэ́н (арманя), и ние́кх на рисёла пэ дром кэ лэ́нгири бар винаградоса.

19. Шутькирибэн и хачкирибэ́н выхала ивитка паня́, адя́кэ-паць и лю́но (преисподня) кэрэ́ла кодолэ́ манушэ́нца, савэ́ кэрдэ́ грэ́хи.

20. Дакири лочови́ (утроба) бистрэла лэс, кирмо явэ́ла тэ чарадёл лэ́стыр: лэс буты́р на явэ́на тэ рипирэ́н мануша́, и фуй ману́ш пхадёла сыр кашт.

21. Пал-дова́ со ёв притасавэла бичхаворэнгирья джувля́, сави́ на биянэ́ла, и ёв на кэрэ́ла лачхипэ́н пивлякэ (удовакэ).

22. Нэ Дэвэ́л тырдэла зоралыпнаскирэ манушэ́н Пэ́скирэ зорья́са, ману́ш ґаздэ́лапэ, нэ ние́кх ману́ш зоралэ́с на патя́ла дро пэ́скиро джиибэ́н.

23. Дэвэ́л дэ́ла лэ́нгэ ракхибэн, пэ саво́ ёнэ розгинэна, нэ Лэ́скирэ якха́ дыкхэ́на пэ лэ́нгирэ дрома́.

24. Ёнэ ґаздэ́напэ пэ набаро́ часо, тэ́ньчи ёнэ нашадёна. Тэ́ньци Дэвэ́л чхувэ́ла лэн тэлэ́; ёнэ джа́на криг дромэ́стыр сыр и яви́р мануша́, ёнэ вышутёна сыр гивэскирэ шэрорэ (колосы).

25. Ко́ли на адя́кэ джа́ла акана́, кон допхэнэ́ла, со мэ хохавава, и со миро ракирибэ́н нисо́ нанэ мол?”

Job 25:1-6

1. О Вилдадо Савхеянино (Шуахостыр) ракирэ́лас три́то мо́ло,

2. и отпхэндя́ ёв дасавэ́ лавэ́нца: “Дэвэ́л кралинэла и сарэ́ндэ исын дар анги́л Лэ́стэ, Ёв рикирэ́ла рама́нё (миро) пэ Лэ́скирэ вучэ́ штэ́ты.

3. Ци сашты́ тэ погинэс Лэ́скирэ Янголэн (халадэ́н), савэ́ дынаринэна сыр халадэ́ (воины)? И пэ конэ́стэ на ґаздэ́лапэ Лэ́скиро дуд?

4. Сыр ману́ш могинэ́ла тэ явэ́л чачуно́ анги́л Дэвлэ́стэ? Ци сыр могинэ́ла вари-кон тэ явэ́л жужо́, кон бия́ндыя джувлятыр?

5. Акэ, и чхон адя́кэ-паць на зяинэла сыр трэй, и чэргэня́ исын на жужэ́ анги́л Лэ́скирэ якха́.

6. Пэ кицы́ тыкнэды́р исын ману́ш, кон исын сыр кирмо, и Манушэ́скиро чхаво́, кон исын сыр моль (мэль)?”

Psalms 96:7-10

7. Славинэ́н Рас-Дэвлэ́с, народы, славинэ́н Рас-Дэвлэ́с и Лэ́скири зор.

8. Славинэ́н Рас-Дэвлэ́с пал Лэ́скиро лав, янэ́н свэ́нто дыибэ́н и явэ́н пэ Лэ́скирэ грэды (дворы):

9. дэн паты́в Ра́скэ-Дэвлэ́скэ дрэ Лэ́скири Свэ́нто Кхангири́, издран анги́л Лэ́стэ, сари́ пхув.

10. Пхэнэ́н машки́р Наюды́тка на́цыи, со Рай Дэвэ́л кралинэла! Ёв адя́кэ-паць зоралэ́с зачхудя свэ́то, со на кхарэ́лапэ криг (на зджа́ла) штэто́стыр. Дэвэ́л явэ́ла тэ сэндякирэ́л манушэ́н пир чачипэ́н.

Proverbs 23:9-9

9. На ра́кир дрэ дылыниньконэскирэ кана́, пал-дова́ со ёв дыкхэ́ла вучипна́стыр пэ тырэ́-лавэнгиро годыпэ́н.

Rimanenge 15:1-24

1. Амэ, савэ́ сам зоралэды́р, сам бангэ́ (мусинаса) тэ примангас доша одолэ́ манушэ́нгэ, савэ́ндэ нанэ зор, а на тэ кэра́с екх со пир пэ́скиро ило́.

2. Кажнонэ́ амэ́ндыр трэй тэ думинэл пал пэ́скирэ пашатунэ́ манушэ́стэ ваш дова́, соб (кай) ёв тэ барьёл дрэ ду́хо (фа́но).

3. Палдава́ и Христо́со на кэрдя́ екх со пир Лэ́скиро ило́, нэ, сыр исын чхиндло́: “Одолэ́-манушэ́нгиро кошыбэ́н, савэ́ кошэна Тут, пынэ́ пэ Ма́ндэ.”

4. Палдава́ саро́, со исыс чхиндло́ англэды́р, сыс чхиндло́ ваш амэ́нгэ, соб (кай) амэ тэ сыклёвас, соб (кай) амэ́ндэ тэ явэ́л наде́я вырикирибнаса и подрикирибнаса Свэнтонэ́ Чхиныбна́стыр.

5. Мэк Дэвэ́л, саво́ дэ́ла вырикирибэн и подрикирибэ́н, тэ дэл тумэ́нгэ, соб (кай) тумэ́ тэ явэ́н кхэтанэ́ дро ду́хо (фа́но) машки́р пэ́стэ пир Исусо́скирэ-Христосо́скиро сыкляибэн,

6. соб (кай) тумэ́ сарэ́ кхэтанэ́ екхэ уштэ́нца тэ славинэ́н Дэвлэ́с и амарэ́ Ра́скирэ-Дэвлэ́скирэ Дадэ́с.

7. Палдава́, прилэ́н екх екхэ́с, сыр и Христо́со прилыя́ тумэн, ваш сла́ва Дэвлэ́скири.

8. Палдава́ мэ ракира́ва, со Ису́со Христо́со яця́ дына́ри (слу́га) обчхиндлэнгэ ваш Дэвлэ́скиро чачипэ́н, соб (кай) Лэ́скэ тэ сполнинэл дыно́ лав, саво́ Ёв дыя́ дадэ́нгэ;

9. и соб (кай) На́юды тэ славинэ́н Дэвлэ́с пал Лэ́скиро тангипэ́н, сыр исын чхиндло́: “Пал дава́ мэ ява́ва тэ славинав Тут машки́р Наюдэ́ндэ, и мэ ява́ва тэ бага́в гиля́ Тырэ́ лавэ́скэ!”

10. И нэвэ́стыр Исаё ракирэ́ла: “Радынэ́нпэ На́юды кхэтанэ́ Лэ́скирэ манушэ́нца.”

11. И нэвэ́стыр пхэндло́: “Шарэ́н Рас-Дэвлэ́с, сарэ́ На́юды и мэк сарэ́ мануша́ тэ шарэ́н Лэс.”

12. И нэвэ́стыр Исаё ракирэ́ла: “Ёв явэ́ла Есеёскиро родо́стыр и Ёв явэ́ла тэ хулаинэ́л манушэ́нца: пэ Лэ́стэ На́юды явэ́на тэ розгинэн.”

13. Дэвэ́л, Саво́ дэ́ла наде́я, – мэк тэ пхэрдякирэл тумэн кажнонэ́ радыма́са и раманёса дро тумаро́ патяибэ́н, соб (кай) наде́я тэ барьёл Свэнтонэ́ Духо́скирэ зорья́са дрэ тумэ́ндэ.

14. Мэ кокоро́ джино́м пал тумэ́ндэ, мирэ́ пша́ла, со тумарэ́ илэ исын пхэрдэ́ лачхипна́са, и тумаро́ джиныбэ́н дэ́ла саштыпэн тумэ́нгэ тэ сыклякирэ́н екх екхэ́с.

15. Нэ мэ чхиндём тумэ́нгэ муршканэдыр пал вари-савэ́ рэ́нды, соб (кай) тумэ́ тэ рипирэ́н пал бахталыпэ́н, саво́ Дэвэ́л дыя́ ма́нгэ,

16. тэ явав Исусо́скирэ-Христосо́скиро дына́ри ваш Наюдэ́нгэ и сыр раша́скэ тэ сыклякирав Дэвлэ́скири бахталы́ зан, соб (кай) дава́ Наюдэнгиро свэ́нто дыибэ́н тэ янэл Дэвлэ́скэ ра́дыма и тэ явэ́л посвэнцындло Свэнтонэ́ Духо́са.

17. И палдава́ пир Исусо́стэ Христосо́стэ мэ могина́ва тэ шаравпэ мирэ́ дынарибнаса анги́л Дэвлэ́стэ.

18. Пал-дова́ со ма́ндэ нанэ муршыпэн тэ ракира́в пал вари-со, со на кэрдя́ Христо́со пир ма́ндэ, ваш дова́, соб (кай) тэ янэл Наюдэн кэ патяибэ́н, лавэ́са и рэндоса, савэ́ Ёв кэрдя́,

19. ґэртыкакирэ зорья́са и дивэнца, Дэвлэ́скирэ Духо́скирэ зорья́са адя́кэ, со мэ пхэрдэ́с роспхэндём Христососкири бахталы́ зан (звесь) Ерусалимо́стыр и пашы́л дава́ фо́ро кэ Илирика;

20. и мэ причхудём зор (стариндёмпэ) тэ ракира́в на одо́й, кай сыс пхэндло́ Христосо́скиро лав, соб (кай) тэ на чхував пэ дава́ фунда́менто, саво́ кэрдэ́ анги́л ма́ндэ;

21. нэ сыр исын чхиндло́: “Одолэ́, конэ́скэ на сыс роспхэндло пал Лэ́стэ, одолэ́ кокорэ́ дыкхэ́на, и одолэ́, савэ́ на шундлэ́, уджинэна.”

22. Палдава́ ма́ндэ сыс бут тэрдо́ пэ дром, со на дэ́лас ма́нгэ саштыпэн тэ явав кэ тумэ́.

23. Нэ какана́, ма́ндэ нанэ буты́р рэ́нды пэ далэ́ пхувья́, нэ сыр ма́ндэ ґаратунэ́ бэршэ́ндыр сыс бари ла́ска тэ явав кэ тумэ́,

24. какана́, ке́ли мэ ява́ва тэ традав дрэ Испания, мэ затрадава кэ тумэ́, пал-дова́ со ма́ндэ исын наде́я тэ дыкха́в тумэн, и со тумэ́ ман пролыджана дрэ дром коригэды́р (позжэды́р) долэ́стыр, сыр Мэ чалёвава радыма́са тэ ракира́в тумэ́нца,

Romani Bible Baltic 2019

Maintained by the United Bible Societies for the Baltic Romani Mission