Bible in one year August 17Job 26:1-141. И отпхэндя́ Ио́во лавэ́нца:2. “Сыр ту подыян васт одолэ́скэ, конэ́стэ нанэ зор? Сыр ту приракхцян кодолэскиро васт, со издрала?3. Сыр ту дыя́н годы́ одолэ́скэ, савэ́стэ наны годыпэ́н? И сыр пхэрдэ́с ту подыян зан и годы́ лэ́скэ пал чачипэ́н?4. Конэ́скэ ту выпхэндян лава́? И конэ́скиро ду́хо (фа́но) ракирдя́ тырэ́ уштэ́нца?5. Рефаимы (мулэ́-манушэ́нгирэ тени) издрана тэл пани́ и саро́, со дживэ́ла одо́й.6. Лю́но исын псирадо анги́л Дэвлэ́стэ, и Абадоно нанэ учхакирдо Лэ́скирэ якхэ́ндыр.7. Дэвэ́л роздиндькирэла паш-ратякири риг пир чхучэ́ штэ́ты; Ёв ублавэла пхув пэ нисо́.8. Ёв пхандэла кхэтанэ́ пани́ дрэ ґэнста о́блоки, пхарадёна пане́ндыр,9. Ёв чхудя́ Пэ́скиро троно, и Ёв росчхувэла Лэ́скиро о́блоко упра́л пэ лэ́стэ.10. Ёв отчэртиндя круго пэ панескирэ яго́ры, кай кусты́к (граница) машки́р дуд и калыпэ́н.11. Болыбна́скирэ сты́лбы издрана, и ёнэ дарэ́на Лэ́скирэ трашаибнастыр.12. Ёв роскунякирэла паня́ дро мо́рё (дэрья́в) Пэ́скирэ зорья́са и Ёв пхагирэ́ла пэ котэра́ морёскирэ (дэрьявэ́скирэ) драконос Рахабос.13. Пэ́скирэ духо́са Ёв вышукарьякирэла болыбэ́н и Лэ́скиро васт прокурдя сыгнонэ сапэс.14. Акэ, дава́ исын яго́ры Лэ́скирэ дромэндыр, и амэ шунаса Лэ́скиро лав адя́кэ на́бут (куты́), сы́рбы локхо гундякирибэн! Нэ кон сашты́ тэ ґалёл Лэ́скирэ-зоралыпнаскиро грумо?”Psalms 96:11-1311. Тэ явэ́н ра́да сарэ́ на́цыи и мэк тэ радынэ́лпэ пхув, мэк тэ ревинэл мо́рё (дэрья́в) радыма́тыр, и саро́, со дживэ́ла андрэ́.12. Мэк тэ обрадынэлпэ фэ́лда и саро́, со исын пэ ла́тэ. Мэк тэ радынэ́нпэ кашта́ (дрэвы) дро вэш,13. анги́л Растэ-Дэвлэ́стэ, Саво́ джа́ла тэ сэндякирэ́л пхув. Ёв явэ́ла тэ сэндякирэ́л свэ́то чачунэ́с, и Ёв явэ́ла тэ сэндякирэ́л манушэ́н Пэ́скирэ патяибна́са.Proverbs 23:10-1210. На пиричхув ґаратуны шпэ́ра пэ пхув, на рэс пэ фэ́лда, кай дживэ́на бидадэнгирэ чхавэ́.11. Пал-дова́ со лэ́нгиро Выракхибнаскиро [Затэрдыипнаскиро-р.с.], Рай Дэвэ́л исын зорало́, Ёв затэрдёла пал лэ́нгиро рэ́ндо пэ ту́тэ.12. Бандякир тыро́ ило́, ке́ли сыклякирэ́на тут, и тырэ́ кана́ кэ годьварэ́ лава́.Rimanenge 15:25-3325. нэ какана́ мэ джа́ва дро Ерусалимо тэ дынаринав свэнтонэнгэ;26. пал-дова́ со Македония и Ахия закамлэ тэ скэдэ́н тэ дэн ловэ́ илэ́стыр свэнтонэнгэ Ерусалимо́стыр.27. Ёнэ кокорэ́ закамлэ дава́, пал-дова́ со ёнэ исын вужлэ анги́л лэ́ндэ, ко́ли На́юды ячнэ́ кхэтанэ́ Юдэнца дро Духоскиро бахтякирибэ́н, тэды лэ́нгэ трэй тэ помогинэн лэ́нгэ и пэ джиибэ́н.28. Сыр мэ кэра́ва дава́, мэ отда́ва лэ́нгэ, со скэдыно́, тэды мэ джа́ва пирда́л тумарэ́ штэ́ты дрэ Испания.29. Мэ джино́м, со ке́ли мэ ява́ва кэ тумэ́, мэ ява́ва дро пхэрдо́ Христосо́скиро бахтякирибэ́н.30. Нэ, акана́ мэ манга́ва тумэн, пша́ла, амарэ́ Ра́са-Дэвлэ́са, Исусо́са Христосо́са и Духо́скирэ патыва́са тэ явэ́н ма́нца дро хор мангипэ́н пал ма́ндэ кэ Дэвэ́л;31. соб (кай) ма́нгэ тэ зракхавпэ Юдэндыр, савэ́ на патя́на дрэ Исусо́стэ и, соб (кай) миро дынарибэ́н дро Ерусалимо тэ явэ́л шука́р прилыно свэнтонэнца;32. соб (кай) ма́нгэ дрэ ра́дыма, ко́ли Дэвлэ́скэ дава́ явэ́ла трэй, тэ явав кэ тумэ́ и кхэтанэ́ тумэ́нца тэ откинёвав.33. Мэк Дэвэ́л, Саво́ дэ́ла рама́нё, тэ явэ́л сарэ́нца тумэ́нца. Ами́нь. Romani Bible Baltic 2019 Maintained by the United Bible Societies for the Baltic Romani Mission