Bible in one year August 18Job 27:1-231. И ракирдя́ Ио́во дурэды́р пэ́скири притча (масал) кадасавэ́ лавэ́нца:2. “Мэ совлахава джидэ́ Дэвлэ́са, Саво́ лыя́ криг ма́ндыр чачипэ́н, и Ёв Сарэзорья́киро, Саво́ кирнякирдя миро ди,3. адя́кэ ґара́ (длу́гэс), пака миро ду́хо (фа́но) исын ма́ндэ и Дэвлэ́скиро пхурдыпэн джа́ла мирэ́ рутхунендыр (ноздрендыр),4. ада́кицы ґара́ мирэ́ ушта́ на явэ́на тэ ракирэ́н биба́хт, и мири́ чиб на выпхэнэла хохаибэ́н!5. Мэ сом дур далэ́стыр, соб (кай) мэ тэ чачакирав тумэн, пака мэ сом джидо́, мэ на дурьякирава пэ́стыр миро бидошэнгирибэн.6. Мэ рикирдёмпэ зоралэ́с кэ миро чачипэ́н, и мэ на мэкава дава́ пэ́стыр: миро ило́ на бангякирэла ман ни дро саво́ дывэ́с мирэ́ джиибнастыр.7. Мэк тэ явэ́л мирэ́ вэргэ́нгэ сыр бибахталэнгэ, и кодолэ́скэ, кон ґаздэ́лапэ пэ ма́ндэ, мэк тэ явэ́л лэ́скэ, сыр начачунэ манушэ́нгэ.8. Пал-дова́ со саво́ лачхипэ́н ужакирэ́ла фуемуенгирэс, мэк ёв и тэ скэдэл бут, ко́ли Дэвэ́л отлэла лэ́стыр джиибэ́н?9. Ци явэ́ла тэ шунэ́л Дэвэ́л лэ́скири го́дла, сыр бари дар пэрэ́ла пэ лэ́стэ?10. Ци явэ́ла ёв тэ радынэ́лпэ зоралэ́с Сарэзорьякирэ Дэвлэ́стыр? Ци явэ́ла ёв усады (сак) тэ кхарэл Дэвлэ́с?11. Мэ ява́ва тэ сыклякирав тумэн, со Дэвлэ́скиро васт кэрэ́ла, мэ на ява́ва тэ гаравав тумэ́ндыр Сарэзоралыпнаскирэ Дэвлэ́скирэ дрома́.12. Адя́кэ, тумэ́ ж сарэ́ дыкхнэ́ дава́, со́скэ ж тумэ́ выпхэнэна ада́кицы ивья́ (дармэс)?”13. “Кадасави исын фуе́-манушэ́нгири до́ля Дэвлэ́стыр, и мэкно́ миштыпэ́н Сарэзорьякирэ Дэвлэ́стыр, со дорэсэ́ла одова́ ману́ш, кон притасавэла явирэ́н:14. ко́ли бут чхаворэ́ явэ́на лэ́стэ, тэды ёнэ джа́на тэл курта́ла; и лэ́скирэ пала́л-явибнаскирэ чхавэ́ на явэ́на чалэ марэ́са,15. Кодолэ́н, кон ячэ́напэ пал лэ́стэ, лэн гаравэна пхарэ́ насвалыпнэндыр, и лэ́скирэ пивля (удовы) на явэ́на тэ ровэ́н пал лэ́ндэ.16. Мэк ёв явэ́ла тэ кэдэл руп сыр пра́хо, и мэк ёв тэ отчхувэл кхэтанэ́ и́ди сыр ґлэя (глина);17. ёв приготовинэла дава́, нэ чачипна́скиро ману́ш явэ́ла тэ урьел лэс; и бибангипнаскиро явэ́ла тэ роскэрэ́л лэн.18. Ёв чхувэ́ла кхэр сыр моль, и сыр ракхипнаскиро кэрэ́ла пэ́скиро кхэроро (шала́шо).19. Ёв пасёла сыр барвало́ ману́ш, нэ буты́р ёв на явэ́ла кадасаво́, ёв откэрэла якха́, и нанэ ничы́ пашы́л лэ́стэ.20. Трашаибэ́н явэ́ла наужакирдэс пэ лэ́стэ, сыр тасадыипнаскиро панинг, баро́ штормо чорэла лэс раты́.21. Васточно балва́л лыджа́ла криг лэс, и сы́рбы рискирибнаскири балва́л ёв рискирэ́ла яври́ лэс лэ́скирэ штэто́стыр.22. И Дэвэ́л чхурдэлапэ пэ лэ́стэ би тангипнаскиро, ёв на дэ́ла ра́да тэ нашэ́л Лэ́скирэ вастэ́стыр.23. Мануша́ явэ́на тэ марэ́н дрэ васта́ пэ лэ́стэ холямэ́ радыма́тыр, и ёнэ дэ́на шоля пэ лэ́стэ криг лэ́скирэ кхэрэ́стыр.”Job 28:1-281. “Тумэ́ джинэ́на со исын шахта ваш руп, и исын штэ́то, кай билякирэна сувнака́й.2. Састы́р лэ́лапэ пхувья́тыр, и харко́ма (медь) биладёла (плавинэлапэ) барэстыр.3. Ману́ш хачкирэ́ла яг дро калыпэ́н, и ёв пириродэла сыр най фэды́р саро́ кэ яго́ры (краи́): бара́ дро калыпэ́н, кай исын мэрибнаскири зэр (тень).4. Ёв ганавэла шахтытко ґаны́нг криг манушэ́ндыр: кай Манушэ́скиро ґэро́й бистрэла, ёнэ подублавэна пэс пэ шэлэ, ёнэ кунинэнапэ пэ лэ́ндэ упрэ́ и тэлэ́.5. Дрэ пхув барьёла маро́, нэ пхув тэлэ́ исын сы́рбы пиририскирды яга́са.6. Дрэ пхувья́кирэ бара́ исын бут сапфиры и дрэ пхув исын пра́хо сувнака́са.7. Ние́кх рискирибнаскири чириклы на джинэ́ла дроморэ дрэ шахты, и коршуноскири якх на дыкхця́ дава́.8. Пхутькирдэ́ шчэра́ (левы) на штадэ пир дова́, и шакало на псирдя́ пир дова́.9. Ману́ш чхувэ́ла пэ́скиро васт пэ кремнитко бар, ёв рискирэ́ла бэ́рги упрэ́ фундаментэнца.10. Ёв чингирэла анги́л прогиибэна дрэ скалы, и лэ́скири якх дыкхэ́ла кажно куч бар.11. Ёв пиричхакирэла рэкицы, соб (кай) ёнэ тэ на тхадэн, и ёв лыджа́ла пэ дуд (свэ́то) саро́, со исын гарадо́ тэл пхув.12. Нэ кай сашты́ тэ латхэл годыпэ́н? И кай сашты́ тэ сыклёл, соб (кай) хор тэ ґалёл?13. Ману́ш на джинэ́ла тими́н далэскэ, и годыпэ́н нашты́ тэ латхэс пэ пхув, кай дживэ́на.14. Хор паня́ ракирэ́на: “Ма́ндэ на латхэса годыпэ́н,” и мо́рё (дэрья́в) ракирэ́ла: “Ма́ндэ на латхэса годыпэ́н.”15. Годыпэ́н нашты́ тэ кинэс пал выкэдыно сувнака́й, ци тэ ублавэс (тэ важынэс) руп сыр тими́н (цымин) пал годыпэ́н.16. Нэ годыпэ́н нашты́ тэ дэс чол (тими́н) Офисоскирэ сувнака́са, кучонэ́ ониксоса, ци сапфироса.17. Ни сувнака́й, ни кристало нашты́ тэ роўнякирэс кэ годыпэ́н; адя́кэ-паць и кхорэ́ (сасу́ды) сувнака́стыр.18. Пал мириклэ (коралы) и мутин (жэмчуго) и на ракирэ́на; адя́кэ сыр и тими́н (цымин) пал годыпэ́н исын кучэдыр рубинэндыр.19. Топазо Эфиопиятыр нашты́ тэ роўнякирэс кэ годыпэ́н, адя́кэ-паць и нашты́ тэ чхувэ́с тими́н пэ годыпэ́н жужэ́ сувнака́са.20. И, кай сашты́ тэ латхэс годыпэ́н? И кай сашты́ тэ сыклёс, соб (кай) хор тэ ґалёс?21. Дава́ исын гарадо́ манушэ́нгирэ якхэ́ндыр, савэ́ дживэ́на, дава́ гаравэлапэ чириклендыр дро фа́но (воздухо).22. Хась и мэрибэ́н ракирэ́на: “Амэ шундя́м допхэныбэ́н пэ́скирэ канэнца.”23. Дэвэ́л ґалёла дром кэ годыпэ́н, Дэвэ́л джинэ́ла штэ́то тэ латхэс годыпэ́н.24. Пал-дова́ со Ёв дыкхэ́ла пхув кэ сама яго́ры (концы), и Лэ́скэ бицяло́ саро́, со исын тэл болыбэ́н.25. Сыр Ёв чхувэлас весо балвалякэ, и Ёв выгинэлас паня́ мераса,26. и ке́ли Ёв чхувэлас стату́то брышындэскэ и дроморо громоскирэ блискавицакэ;27. то тэ́ньчи Ёв дыкхця́ годыпэ́н и Ёв пхэндя́ статэчнэс; Ёв зачхудя годыпэ́н и Ёв спробиндя годыпэ́н,28. и пхэндя́ Дэвэ́л манушэ́скэ: “Акэ, годыпэ́н исын дро дова́, соб (кай) тэ дарэс Ра́стыр-Дэвлэ́стыр, и ґалыибэ́н исын дро дова́, соб (кай) тэ дурьёс бибахталэ́ рэндэ́ндыр.”Psalms 97:1-61. Рай Дэвэ́л кралинэла: мэк тэ радынэ́лпэ пхув, мэк тэ радынэ́нпэ бут бут островы (джипа́).2. Облоки и калыпэ́н исын трусця́л Лэ́стэ; чачипэ́н и чачуно́ сэ́ндо рикирэ́на лэ́скиро троно.3. Яг джа́ла анги́л Лэ́стэ и хачкирэ́ла сарэ́са Лэ́скирэ сарэ́ вэргэ́н, савэ́ исын трусця́л Лэ́стэ4. Лэ́скирэ блискави́цы екха́тыр (сра́зу) дэ́на дуд (свэ́то) трусця́л свэ́то: пхув дыкхэ́ла и издрала.5. Бэ́рги биладёна, сыр мом анги́л Растэ-Дэвлэ́стэ, сарэ́ пхувьякирэстэ.6. Болыбэ́н ракирэ́ла сарэ́нгэ пал лэ́скиро чачипэ́н и сарэ́ мануша́ дыкхэ́на Лэ́скири сла́ва.Proverbs 23:13-1413. На тангинэ (на жалин) чхавэ́с, ке́ли ту марэ́са лэс раняса, далэ́стыр ёв на мэрэ́ла:14. ту марэ́са лэс раняса и зракхэ́са лэ́скиро ди люностыр (адостыр).Rimanenge 16:1-271. Мэ кама́м тэ пхэна́в тумэ́нгэ лав пал амарьятэ пхэнятэ Фиватэ, ёй исын диакониса дрэ Кенхреенгири кхангири́;2. соб (кай) тумэ́ тэ прилэ́н ла сыр Дэвлэ́скирья манушня́, сыр трэй тэ прилэс свэнтонэн, и помогинэн ла́кэ, дрэ со ёй явэ́ла тэ мангэ́л тумэн, пал-дова́ со ёй кокори помогинэлас бутэнгэ, адя́кэ-паць и ма́нгэ.3. Пиридэ́н “рама́нё” (миро) Прискилоскэ и Акилоскэ, адя́кэ-паць мирэ́ манушэ́нгэ, савэ́ кхэтанэ́ ма́нца кэрдэ́ буты́ ваш Исусо́скэ Христосо́скэ,4. савэ́ пал миро джиибэ́н отдэнас кокорэ́ пэ́скиро шэро́; мэ парикирава лэ́нгэ наекхджино нэ и сарэ́ Наюдэнгирэ кхангирья,5. адя́кэ-паць пиридэ́н “рама́нё” и кхангирьякэ, сави́ скэдэлапэ дрэ лэ́нгиро кхэр. Пиридэ́н “рама́нё” Епенетоскэ, адя́кэ-паць мирэ́ дрогонэ́ малэ́скэ, саво́ англэды́р сарэ́ндыр упатяндыя дрэ Христосо́стэ дрэ Асия.6. Пиридэ́н “рама́нё” Мариякэ, сави́ кэрдя́ адя́кэ бут лачхипэ́н ваш тумэ́нгэ.7. Пиридэ́н “рама́нё” Андроникоскэ и Юниёскэ, мирэ́ сэмэнцакэ, савэ́ сыс бэштэ́ кхэтанэ́ ма́нца дро штарибэ́н; ёнэ исын джиндлэ́ машки́р Апостолэндэ и англэды́р ма́ндыр упатя́ндынэ дрэ Христосо́стэ.8. Пиридэ́н “рама́нё” Амплияскэ, саво́ исын древа́н дро́го ма́нгэ сыр пшал пир патяибэ́н дрэ Растэ-Дэвлэ́стэ.9. Пиридэ́н “рама́нё” Урбаноскэ, саво́ кхэтанэ́ амэ́нца кэрэ́ла буты́ ваш Христосо́скэ, и мирэ́ дрогонэ́ малэ́скэ Стахиёскэ.10. Пиридэ́н “рама́нё” Апелесоскэ, саво́ сыкадя́, со ёв чачуно́ патяибнаскиро дрэ Христосо́стэ, сарэ́нгэ Аристовулоскирэ кхэрэ́стыр.11. Пиридэ́н “рама́нё” Иродионоскэ, мирэ́ сэмэнцакэ, “рама́нё” патяибнаскирэнгэ дрэ Растэ-Дэвлэ́стэ Наркисоскирэ кхэрэ́стыр.12. Пиридэ́н “рама́нё” Трифенакэ и Трифосакэ, савэ́ кэрэ́на буты́ ваш Дэвлэ́скэ. “Рама́нё” дрогонэ́ Персидакэ, сави́ бут кэрдя́ ваш Дэвлэ́скэ.13. Пиридэ́н “рама́нё” Руфаскэ, савэ́с Дэвэ́л выкэдыя́, и лэ́скирэ да́кэ, сави́ сыс сыр дай и ваш ма́нгэ.14. Пиридэ́н “рама́нё” Асинкритоскэ, Флигонтоскэ, Ермаскэ, Патровоскэ, Ермияскэ и явирэ пшалэ́нгэ, савэ́ исын кхэтанэ́ лэ́са.15. Пиридэ́н “рама́нё” Филологоскэ и Юлияскэ, Ниреёскэ и лэ́скирэ пхэнякэ, и Олимпаноскэ и сарэ́ дэвлытконэнгэ, савэ́ исын кхэтанэ́ Лэ́са.16. Дэн “добридим” екх екхэ́скэ Свэнтонэ́ чамудыпнаса. Сарэ́ Христосо́скирэ кхангирья пиридэна “рама́нё” тумэ́нгэ.17. Нэ мэ манга́ва тумэн, пшала́лэ, тэ ракхэ́нпэ одолэ́ манушэ́ндыр, савэ́ кэрэ́на дрэ кхангирья роскэрибэна и пхарипэна, и камэ́на тэ лыджа́н криг тумэн далэ́ сыкляибнастыр, савэ́скэ тумэ́ высыклынэ.18. Палдава́ адасавэ́ мануша́ дынаринэна на амарэ́ Ра́скэ-Дэвлэ́скэ, Исусо́скэ Христосо́скэ, а пэ́скирэ налачхэ́ камибнаскэ; ёнэ хахавэ́на (дэ́на дукха́) лачхэ́-илытконэ манушэ́н гудлэ́ и хоханэ́ лавэ́нца.19. Тумаро кандыпэн патяибнаскэ исын джиндло́ сарэ́нгэ; палдава́ мэ сом древа́н радо пал тумэ́ндэ, мэ кама́м, соб (кай) тумэ́ тэ явэ́н годьварэ́ дро лачхипэ́н и тэ на явэ́н бангэ́ дро фуипэ́н.20. Нэ Дэвэ́л, Саво́ дэ́ла рама́нё, хасякирэ́ла налачхэ́с тэл тумарэ́ ґэра́. Мэк тэ явэ́л бахталыпэ́н амарэ́ Ра́скирэ-Дэвлэ́скирэ, Исусо́скиро Христосо́скиро тумэ́нца! Ами́нь.21. Пиридэла “рама́нё” тумэ́нгэ Хима (Тимофеё), саво́ кэрэ́ла буты́ кхэтанэ́ ма́нца, и Луцыё, Иасоно, и Сосипатро, мири́ сэмэ́нца.22. Мэ, Цэрцыё, саво́ чхиндём дава́ лыл, пиридава “рама́нё” тумэ́нгэ, сыр пшал пир патяибэ́н дрэ Растэ-Дэвлэ́стэ.23. Пиридэла “рама́нё” тумэ́нгэ Гаё, саво́ прилыя́ ман и сари́ кхангири́. Пиридэла “рама́нё” тумэ́нгэ Ерасто, ракхибна́ри пэ фори́тко тыкнори́ (сокровишчы́тко) и пшал Кварто.24. Мэк бахталыпэ́н Ра́скирэ-Дэвлэ́скирэ, амарэ́ Исусо́скирэ Христосо́скиро тэ явэ́л сарэ́нца тумэ́нца. Ами́нь. Romani Bible Baltic 2019 Maintained by the United Bible Societies for the Baltic Romani Mission