Beblia

1. Ио́во затэрдёла пал пэ́стэ палатуно́ (после́днё) мо́ло.

2. “О, соб (кай) ма́нгэ тэ явав кадасавэса сыр дрэ прогинэ́ чхона́, сыр дрэ дывэса́, ке́ли Дэвэ́л приракхэлас ман;

3. и ке́ли Лэ́скиро момолы́тко (свети́льнико) свэнцынэлас анги́л миро шэро́, и ке́ли Лэ́скирэ дудэса мэ гиём пирда́л калыпэ́н (цямлыпэ́н):

4. сыр дава́ сыс дрэ мирэ́ бахталэ́ бэрша́, ке́ли Дэвэ́л набицялэс дыкхця́ пал мири́ ша́тра,

5. ке́ли Сарэзорья́киро Дэвэ́л сыс паш ма́ндэ, сыр мирэ́ тырнэ мануша́ сыс паш ма́ндэ,

6. ке́ли мирэ́ ґэра́ компиндлэпэ дро тхуд, и ке́ли ска́ла чхувэлас пал ма́ндэ оливи́тко дзэт рэкэнца!

7. Ке́ли мэ джавас кэ форо́скири по́рта, ке́ли мэ бэшавас пэ пэ́скиро штэ́то яври́ пэ форуны́ (пло́шча);

8. то тэрнэ́ мануша́ дыкхэнас ман и гарадёнас, и мурша́ дрэ бэрша́ уштэнас и сыс тэрдэ́,

9. тхага́рья пириячэнас тэ ракирэ́н, и ёнэ чхувэ́нас васта́ пэ пэ́скирэ муя́,

10. манушэ́нгири зан, сави́ сыс райканэ родо́стыр, цыция (зникниндя), и лэ́нгири чиб приячэлас кэ талой (нёбо) дрэ лэ́нгирэ муя́.

11. Кажно (сва́ко), кон шундя́ ман, шарэлас ман; а кажно, кон дыкхця́ ман, приджинэлас вагаса ман;

12. пал-дова́ со мэ вытырдавас чорорэс, сыр ёв дыя́ го́дла, и адя́кэ-паць пиротос (бидадэскирэ чхавэ́с), савэ́стэ на сыс ние́кх тэ подэл васт.

13. Одова́, кон хасёлас, шарэлас ман, и мэ кэравас адя́кэ, со ило́ пивлятэ (удоватэ) багалас радыма́тыр.

14. Мэ урьявас чачипэ́н пэ пэ́стэ: и ёв учхакирэлас ман, миро чачипэ́н сыс сыр понча и сыр турбано.

15. Мэ со́мас сы́рбы якха́ ваш корорэскэ, и сы́рбы ґэра́ лангалэскэ.

16. Мэ со́мас дад одолэ́скэ, конэ́стэ сыс трэ́бима; и мэ розґалёвавас саро́ пал рэ́ндо, ко́ли мэ на джиндём лэс.

17. Мэ пхагавас жанды начачипнаскирэндэ, и мэ тырдавас яври́ чордо дорэсыбэ́н лэ́нгирэ дандэндыр.

18. Тэ́ньци мэ пхэндем: “Мэ мэра́ва дрэ пэ́скири гня́зда, и мэ ява́ва тэ джива́в ада́кицы бут дывэса́, кицы́ прахинки исын;

19. миро корнё (рукх) диндькирэлапэ (вытырдэлапэ) кэ паня́, и пахлын (роса) исын пашты сари́ рат пэ мирэ́ рандя́,

20. миро барипэ́н на пхурьёла андра́л ма́ндэ, и миро лу́ко зоралэ́с рикирэ́лапэ дро миро васт.

21. Мануша́ шундлэ́ ман и ужакирдэ, и ёнэ прилэнас штылэ́с, сыр мэ давас го́дла:

22. палэ мирэ́ лава́ ёнэ на ракирдэ́ нэвэ́стыр и миро ракирибэ́н пэрэлас пэ лэ́ндэ сыр капли (чулыня) брышындэстыр,

23. Ёнэ ужакирдэ ман сыр брышы́нд, и ёнэ отпхандэнас пэ́скирэ муя́ буґлэс сыр пэ познё брышы́нд.

24. Ко́ли мэ сандёмпэ холямэс лэ́ндыр, ке́ли ёнэ на патяндынэ́ ма́нгэ, тэды мирэ́-москири мина подрикирэлас лэн.

25. Мэ выкэдавас дром лэ́нгэ, и мэ со́мас бэшто́ сыр шэрало́, и мэ ячаваспэ сыр кра́ли дро халадыбэ́н, сыр кодова́, кон подрикирэлас манушэ́н, савэ́ тугинэна.

1. Нэ акана́ тэрнэ́ мануша́ санапэ холямэс ма́ндыр, савэнгирэ дадэн мэ вычхурдавас илэ́стыр фэды́р, сыр тэ чхував пашы́л джуклэндэ, со ракхэнас мирэ́ – бакрэнгири стада.

2. Дыкхэ́н, саво́ ж ко́фо исын ма́нгэ лэ́нгирэ – вастэнгирэ зорья́тыр? Лэ́нгиро часо (цы́ро) хасия́.

3. Ёнэ вышутинэ бокха́тыр и наухтылыбнастыр; ёнэ нашнэ́ пэ чхучэ́ прахи, кай нанэ мануша́, и кай исын чхучо́;

4. ёнэ, кон обкэдынэ лондэ чарья́ пашы́л хру́сты, и кон ха́ла ракитытка му́ри.

5. Лэн традынэ криг пэ́стыр мануша́, и пэ лэ́ндэ дынэ́ го́дла сыр пэ чорэндэ.

6. Ёнэ сыс бангэ́ тэ дживэ́н дрэ цёмна рыцьвины, дрэ ґебара́ (пешчэры) машки́р пхув, и дрэ скалы,

7. ёнэ годлынэ сы́рбы ослы (мега́рья) машки́р хру́сты, ёнэ притасадёнас екх кэ екх тэ татён тэл пхусадытка хру́сты.

8. Ёнэ сыс чхавэ́ дылынэндыр, чхавэ́ налачхэ́-ирьякирэ манушэ́ндыр; лэн традынэ криг пхувья́тыр.

9. И акана́ мэ яцём сы́рбы сабнытко гилы́; ґалён, мэ яцём сы́рбы сабнытко сыкаибэ́н (приме́ро).

10. Ёнэ древа́н на камэ́на ман, ёнэ исын тэрдэ́ кригал ма́ндыр; ёнэ и на пригаравэнапэ, соб (кай) тэ чунгардэн ма́нгэ дро муй.

11. Пал-дова́ со Дэвэ́л розмэкця шэло мирэ́ лукостыр и кэрдя́ адя́кэ, со мэ яцём напхутькирдо. Ёнэ чхурдынэ́ криг пэ́стыр сы́рбы савари, соб (кай) тэ кэрэ́н, со камэ́на.

12. Мирэ́ чачэ́ рига́тыр лэ́ндыр пирангачы (исчадии) ґаздэ́напэ, ёнэ подчхувэна ґэро́й ма́нгэ, и ёнэ ґаздэ́напэ пэ ма́ндэ пэ́скирэ хасибнытконэ приемэнца,

13. Ёнэ ґэралякирдэ миро дром, ёнэ кэрдэ́, соб (кай) мэ тэ пэрав, и ние́кх нанэ тэ подэл васт ма́нгэ лэ́ндыр.

14. Ёнэ джа́на маму́й пэ ма́ндэ, сыр пирда́л буґло́ выпхарипэн, ёнэ катынэнапэ пэ ма́ндэ сы́рбы штормо чхувэ́лапэ барэ́нца.

15. Трашаибэна рисёна пэ ма́ндэ, ёнэ традэнапэ пал мири́ паты́в сы́рбы балва́л, и миро миштыпэ́н проурняндыя пашы́л ма́ндэ сыр о́блоко пэ болыбэ́н.

16. Нэ акана́ миро ди чхувэ́лапэ криг ма́ндыр хор тугатыр; дывэса́ мэнькаса лынэ́ трусця́л ман.

17. Мирэ́ кокалы́ промардэ дрэ ма́ндэ раты́, и мирэ́ дукха́ ха́на ман би откхиныбнаскиро

18. Древа́н пхаро́ исын ма́нгэ тэ злав мири́ и́дя, мирэ́ дукха́ пхандлэ ман пал мирэ́-шалнироскиро (хитоноскиро) мэнитко.

19. Дэвэ́л чхурдыя́ ман дрэ дрич (болото), и мэ яцём сыр пра́хо и пра́ска (пепло).

20. Дэ́вла! Мэ зоралэ́с кхара́ва Тут, нэ со́скэ Ту на отпхэнэса ма́нгэ; мэ уштава и Ту фэ́ни дыкхэ́са пэ ма́ндэ.

21. Ту яця́н биилытко, и Ту рикирэсапэ проти ма́ндэ сарэ́ Тырэ́ зорья́тыр.

22. Ту ґаздыян ман, и Ту адя́кэ кэрэ́са, соб (кай) мэ тэ вурнявав пэ балва́л; Ту кэрэ́са биба́хт мирэ́ кучипнаскэ.

23. Пал-дова́ со мэ джино́м, со Ту янэса ман кэ мэрибэ́н, и кэ упхэндло́ кхэр, кай скэдэ́напэ сарэ́ джидэ́.

24. Чачо́, кажно мангипэ́н кэ Дэвэ́л нанэ ивья́ (напра́снэс), ке́ли Ёв протырдэла Пэ́скиро васт пэ манушэ́стэ дрэ руи́ны; ко́ли ёнэ явэ́на тэ дэн го́дла, сыр Ёв вымарэла лэн.

25. Ци на рондём мэ пал манушэ́стэ, конэ́скэ сыс пхаро́? Ци на тугинэлас миро ди пал чорорэндэ?

26. Пал-дова́ со мэ ужакирдём лачхипэ́н, нэ биба́хт явдя́, и мэ ужакирдём дуд (свэ́то), нэ явдя́ калыпэ́н.

27. Саро́ андра́л ма́ндэ кирьёла, и на откхинёла; дывэса́ мэнькаса явнэ́ кэ миро муй.

28. Мэ калыём, псириндой, нэ дава́ на кхамэстыр, мэ уштава пэ скэдыибэ́н и мэ да́ва го́дла тэ помогинэн ма́нгэ.

29. Мэ яцём пшалэса шакалэнгэ, и малэса страусэнгэ.

30. Мири́ цы́па калёла и пэрэ́ла ма́ндыр, мирэ́ кокалы́ пэкэнапэ хачкирибнастыр.

31. Мири́ лута (арфа) парудыя тэ тугинэл ровибнаса и мири́ свиролька яця́ заня́са, сави́ ровэла.

7. Сарэ́, кон дынаринэла дэвлорэ́нгэ, со мануша́ вычхиндлэ́, явэ́на ладжакирдэ́ и одолэ́, савэ́ шарэнапэ идолэнца – сарэ́ дэвлорэ́ дэ́на паты́в Лэ́скэ.

8. Мануша́ Сионо́стыр шунэ́на и исын ра́да, и чхая́ Юдэя́тыр радынэ́напэ Тырэ́ сэндостыр, о Раё Дэ́вла.

9. Пал-дова́ со Ту, Раё Дэ́вла, сан Сано (Най) Вучэды́р сарэ́стыр пир пхув; Ту сан ґаздыно́ древа́н вучэды́р сарэ́ дэвлорэндыр.

10. Тумэ́, кон рикирэ́ла Рас-Дэвлэ́с сыр Дро́гима дро ило́, бидыкхэн чорипэ́н: “Ёв приракхэла дия́ Пэ́скирэ Свэнтонэнгиро, Ёв зракхэ́ла лэн вастэ́стыр чорэ́ манушэ́ндыр.”

11. Дуд джа́ла тэлэ́ пэ чачипнаскирэндэ, и ра́дыма пэ одолэ́ндэ, конэ́стэ исын чачуно́ ило́.

12. Радынэ́нпэ Ра́стыр-Дэвлэ́стыр, тумэ́ чачипнаскирэ; парикирэ́н и славинэ́н лэ́скиро Свэ́нто Лав.

15. Мро чха́ва! Ко́ли тыро́ ило́ исын годо́, тэды миро ило́ явэ́ла тэ радынэ́лпэ.

16. И мирэ́ букэ (нутря) явэ́на зоралэ́с тэ радынэ́нпэ, ке́ли тырэ́ ушта́ пхэнэ́на чачипэ́н.

1. Павли́стыр, савэ́с Дэвэ́л прикхардя тэ явэ́л Исусо́скирэ Христосо́скирэ Апостолоса пир Пэ́скири во́ля, и амарэ́ пшалэстыр Сосифаностыр,

2. Дэвлэ́скирэ кхангирьякэ, со исын дро Коринфо, сарэ́ свэнтонэ́ манушэ́нгэ, савэ́ исын прикхардэ тэ ячэн и тэ явэ́н Дэвлэ́скирэ манушэ́нца пир патяибэ́н дрэ Исусо́стэ Христосо́стэ; сарэ́нгэ, кон мангэлапэ Исусо́скирэ Христосо́скирэ лавэ́са пир сарэ́ штэ́ты, Саво́ исын лэ́нгиро и амаро́ Рай Дэвэ́л:

3. Мэк Дэвэ́л Дад амаро́ и Рай Дэвэ́л, Ису́со Христо́со, тэ дэн тумэ́нгэ бахталыпэ́н и рама́нё (миро).

4. Мэ ўса́ды (сак) парикирава Дэвлэ́скэ пал тумэ́ндэ пал бахталыпэ́н, саво́ исын дыно́ тумэ́нгэ пир Исусо́стэ Христосо́стэ.

5. Пал-дова́ со пал Лэ́стэ тумэ́ барвалынэ кажнонэ́ лавэ́са и джиныбнаса,

6. и пал-дова́ сыр амаро́ допхэныбэ́н пал Христосо́стэ яця́ дасаво твардо дрэ тумэ́ндэ,

7. палдава́ тумэ́ндэ нанэ ни саво́ наухтылыбэн ни дро вари-саво́ тала́но (дарованиё), ке́ли тумэ́ ужакирэ́на зоралэ́с Христосо́с тэ явэ́л,

8. Ёв адя́кэ-паць подрикирэ́ла тумаро́ зорало́ патяибэ́н кэ ко́нцо (кэ яго́ро), соб (кай) тумэ́ тэ явэ́н бидошакирэ дро дывэ́с, ке́ли амаро́ Рай Дэвэ́л, Ису́со Христо́со, явэ́ла яви́р мо́ло.

9. Дэвлэ́скэ, Саво́ прикхардя тумэн дро кхэтаныбэн Лэ́скирэ Чхавэ́са, Исусо́са Христосо́са, Амарэ́ Ра́са, трэй тэ патя́н сарэ́са.

10. Мэ древа́н манга́ва тумэн, мирэ́ пшала́лэ, Исусо́скирэ Христосо́скирэ лавэ́са, амарэ́ Ра́скирэ-Дэвлэ́скирэ, тэ ракирэ́н екх, и тэ на явэ́л тумэ́ндэ ракирибэна екх проти явирэ́стэ, соб (кай) тумэ́ тэ явэ́н кхэтанэ́ дро екх ду́хо (фа́но) и дрэ екх годы́.

11. Пал-дова́ со мэ уджиндём Хлоякирэ сэм΄ятыр, пшала́лэ мирэ́, со машки́р тумэ́ндэ исын кошыбэна.

12. Мэ пхэна́ва пал дава́ адя́кэ, со тумэ́ ракирэ́на: “Мэ сом Павли́скиро”, “мэ сом Аполососкиро”, “мэ сом Кифаскиро”, нэ “мэ сом Христосо́скиро”;

13. со ци роспыяпэ Христо́со пэ групы? Ци Па́вли сыс примардо пэ трушу́л пал тумэ́ндэ? Ци тумэ́ болдэпэ дро Павли́скиро лав?

14. Мэ парикирава Дэвлэ́скэ пал дова́, со мэ на болдём никонэ́с тумэ́ндыр апри́ч Криспостэ и Гайостэ,

15. соб (кай) ние́кх ману́ш тэ на пхэнэ́л, со мэ болдём тумэн дро миро лав (мирэ́ лавэ́са).

16. Мэ болдём адя́кэ-паць Стехванос (Стефанос) и лэ́скирэ сэ́м΄я (ири́), нэ ци мэ болдём ишчо (инкэ́) вари-конэ́с, мэ на джино́м (на джина́в).

17. Христо́со на бичхадя́ ман тэ болав. Ёв бичхадя́ ман тэ роспхэнав бахталы́ зан (звесь), и тэ роспхэнав пал дава́ назбит годьварэ́ лавэ́нца, соб (кай) Христосо́скиро мэрибэ́н пэ трушу́л тэ на хасякирэ́л пэ́скири зор.

18. Пал-дова́ со лав (сыклякирибэ́н) пал Христосо́скиро мэрибэ́н пэ трушу́л исын дылныпэ́н ваш одолэ́нгэ, кон исын хасибны́тко, а амэ́нгэ, кон исын зракхно, дава́ дэ́ла Дэвлэ́скири зор.

19. Дро Свэ́нто Чхиныбэ́н ракирлапэ: “Мэ хасякира́ва годьварипэн годьварэнгиро и Мэ отчхувава дрэ риг ґалыибэ́н сыклякирдэнгиро.”

20. Кай исын годьварюко? Кай исын лылвари́тко (кни́жнико)? Кай исын допхэныбнари (споршчыко) дро дава́ ве́ко? А Дэвэ́л пирикэрдя далэ́ свэтоскиро годьварипэн пэ дылныпэ́н.

21. Палдава́ Дэвэ́л пир Пэ́скиро годыпэ́н кэрдя́ адя́кэ, соб (кай) мануша́ тэ на ґалён Дэвлэ́с пэ́скирэ годя́са би патяибнаскиро; Дэвлэ́скэ сыс лачхо́ тэ зракхэ́л одолэ́н, савэ́ патя́на, пир пхэныбнытко лав, саво́ исын сы́рбы дылныпэ́н.

22. Палдава́ Юды пхучэна пал шпэ́ры (зна́ки), и Гре́ки (Баламэ́) родэ́на годьварипэн;

23. нэ амэ роспхэна́са пал Христосо́стэ, Савэс примардэ пэ трушу́л; дава́ пхэныбэ́н исын сы́рбы бар пэ дром, саво́ пропатякирэла Юдэ́н и исын сы́рбы дылныпэ́н ваш Наюдэ́нгэ,

24. нэ Христо́со исын Дэвлэ́скири зор и Дэвлэ́скиро годыпэ́н одолэ́нгэ, савэ́ исын прикхардэ: сыр ваш Юдэ́нгэ, адя́кэ-паць и ваш Грекэ́нгэ (Баламэ́нгэ).

25. Пал-дова́ со Дэвлэ́скиро нагодыпэн исын годьварэдыр манушытконэ́ годьварипнастыр и Дэвлэ́скиро назоралыпэн исын зоралэды́р манушытконэ́ зоралыпнастыр.

26. Палдава́ рипирэ́н, пшала́лэ, кон тумэ́ са́нас анги́л дова́, сыр Дэвэ́л прикхардя тумэн: на́бут тумэ́ндыр са́нас годьварэ́ пир манушы́тко годы́, на́бут тумэ́ндыр са́нас барэ́ мануша́, на́бут тумэ́ндыр са́нас славутнонэ родо́стыр;

27. нэ Дэвэ́л выкэдыя́ пэфроми дова́, со свэ́то гинэ́ла пал дылныпэ́н, соб (кай) тэ ладжакирэл годьварэн, и дова́, со свэ́то гинэ́ла пал назоралыпэн, соб (кай) тэ ладжакирэл зоралыпэ́н,

28. и Дэвэ́л выкэдыя́ буты́р дова́, со свэ́то гинэ́ла пал наджиндлыпэн и дыкхэ́ла вучипна́стыр и гинэ́ла ни палсо́, тэ чхувэ́л тэлэ́ свэтоскиро раипэн,

29. соб (кай) ние́кх ману́ш тэ на шарэлпэ анги́л Дэвлэ́стэ.

30. Нэ адава́ Дэвэ́л чхудя́ тумэн дро кхэтаныпэн Исусо́са Христосо́са амарэса и Ёв кэрдя́ Христосо́с сыр амаро́ годыпэ́н, чачипэ́н; пал Лэ́стэ амэ яця́м Дэвлэ́скирэ свэнтонэ́ и вольнонэ манушэ́нца,

31. соб (кай) тэ явэ́л адя́кэ, сыр исын чхиндло́: “Мэк одова́, кон шарэлапэ, тэ шарэлпэ Дэвлэ́са.”

Romani Bible Baltic 2019

United Bible Societies for the Baltic Romani Mission