Bible in one year
August 2

1. Пэ три́то дывэ́с Эстэ́ра уридяпэ дрэ крали́тко и́дя, и тэрдия́ ёй пэ андратунэ́ крали́скирэ-кхэрэ́скири грэ́да, анги́л крали́скиро кхэр; кра́ли тэды сыс бэшто́ пэ пэ́скирэ-крали́скиро троно, дро крали́скиро кхэр, маму́й (проти) дро загиибэ́н дро кхэр. Ке́ли кра́ли дыкхця́ кра́лица Эстэ́ра, сави́ сыс тэрды пэ грэ́да; ёй латхя́ тангипэ́н (жалима) дрэ лэ́скирэ якха́.
2. И протырдыя́ кра́ли кэ Эстэ́ра сувнакуно́ дэсто́, саво́ сыс дрэ лэ́скирэ васта́, и подги́я Эстэ́ра, и лыяпэ пал дэстоскиро яго́ро (концо).
3. И пхэндя́ ла́кэ кра́ли: “Со ту́кэ трэй, кра́лица Эстэрэ, и саво́ исын мангипэ́н тыро́? Аж кэ паш мирэ́ кралипнастыр явэ́ла дыно́ ту́кэ.”
4. И пхэндя́ Эстэ́ра: “Ко́ли крали́скэ явэ́ла пир ило́, мэк тэ явэ́л кра́ли Аманоса ададывэ́с пэ свэ́нко, саво́ мэ кэрдём лэ́скэ.”
5. И пхэндя́ кра́ли: “Джа́н сыгэды́р пал Аманостэ, соб (кай) тэ кэрэ́н пир Эстэракиро лав.” И явдя́ кра́ли Аманоса пэ свэ́нко, саво́ кэрдя́ Эстэ́ра.
6. И пхэндя́ кра́ли Эстэракэ, сыр ёнэ пинэ́ мол (вино): “Со явэ́ла пир ило́ ту́кэ? Ёв явэ́ла сполниндло; и саво́ исын тыро́ мангипэ́н? Мэк кэ паш кралипэ́н, ёй явэ́ла сполниндло.”
7. И отпхэндя́ Эстэ́ра, и пхэндя́: “Ѓа́да, исын пэ ило́ ма́ндэ и миро мангипэ́н:
8. ко́ли мэ латхём ла́ска дрэ крали́скирэ якха́, и ко́ли явэ́ла пир ило́ крали́скэ, соб (кай) тэ сполнинэс пир ило́ ма́нгэ и миро мангипэ́н, тэды мэк кра́ли Аманоса тэ явэ́н пэ свэ́нко, саво́ мэ кэра́ва ваш лэ́нгэ, и атася́ мэ сполнинава лав крали́скиро.”
9. И выгия́ Ама́но дрэ дова́ дывэ́с лошало (весёло) и лачх-дескиро. Нэ ке́ли дыкхця́ Ама́но Мардохеёс пашы́л крали́скирэ вудара́, и одова́ на уштыя́, и штэто́стыр на ґаздыя́пэ анги́л лэ́стэ, тэды пхэрдия Ама́но барэ́ холя́са пэ Мардохеёстэ.
10. Нэ Ама́но зрикирдяпэ. А кеды явдя́ дрэ пэ́скиро кхэр, тэды бичхадя́ тэ кхарэ́н пэскирэн малэн, и пэскирья́ ромня́ Зэрэша.
11. И роспхэндя́ лэ́нгэ Ама́но пал древа́н баро́ пэ́скиро барвалыпэ́н, и пал древа́н бут пэ́скирэ чхавэ́ндэ, и пал саро́ дова́, сыр лэс кра́ли ґаздыя́ вучэ́с и сыр чхудя́ лэс пэ тхэмэ́скирэ рандэ и бутярнэндэ кралискирэндэ.
12. И пхэндя́ Ама́но: “И кра́лица Эстэ́ра никонэ́с на кхардя́ крали́са пэ свэ́нко, саво́ ёй кэрдя́, апри́ч ма́ндэ; адя́кэ и пэ атася́ мэ сом кхардо кэ ёй крали́са.
13. Нэ саро́ дава́ на ухты́лла ваш ма́нгэ, пака мэ дыкха́ва Мардохеёс, Юдос, бэшындой пашы́л крали́скирэ вудара́.”
14. И пхэндя́ лэ́скэ Зэрэш, лэ́скири ромны́, и сарэ́ лэ́скирэ мала́: “Мэк тэ кэрэ́н вэшына (кашт) вучипна́са дрэ пандждэша́ куня́ (локти), и пэ зло́ко (ра́нко) пхэн крали́скэ, соб (кай) тэ ублавэн Мардохеёс пэ лэ́стэ: и тэды лошалэс джа́ пэ свэ́нко крали́са.” И сыс пир ило́ дава́ лав Аманоскэ, и ёв кэрдя́ вэшына.
1. Дрэ доя́ рат крали́скэ на совэласпэ, и ёв пхэндя́ тэ янэ́н дывэсэнгирэ-зачхиныбнаскири лылвари́ ваш рипирибэ́н; и гиндлэ́ ла анги́л крали́стэ.
2. И латхно сыс, со сыс чхиндло́ одо́й, сыр допхэндя Мардохе́ё пэ Гавафостэ (Бигтэностэ) и Фарастэ (Тэрэшостэ), дуе́ндэ крали́скирэ евнухэндэ, савэ́ ракхнэ прого, савэ́ задуминдлэ тэ чхувэ́н васт пэ крали́стэ Артаксерксостэ.
3. И пхэндя́ кра́ли: “Сави́ дынэ́ паты́в и сла́ва Мардохеёскэ пал дава́?” И пхэндлэ́ тэрнэ́ мануша́ крали́скирэ, савэ́ сыс бутярнэ́ пашы́л лэ́стэ: “Нисо́ на сыс кэрдо́ лэ́скэ.”
4. И пхэндя́ кра́ли: “Кон исын пэ грэ́да (дво́ро)?” Ама́но тэды явдя́ пэ андратунэ́ крали́скирэ-кхэрэ́скири грэ́да тэ ракирэ́л крали́са, соб (кай) тэ ублавэн Мардохеёс пэ вэшына, саво́ ёв приготовиндя ваш лэ́скэ.
5. И пхэндлэ́ тэрнэ́ мануша́ крали́скэ: “Ѓа́да, Ама́но исын тэрдо́ пэ грэ́да.” И пхэндя́ кра́ли: “Мэк ёв тэ заджа́л.”
6. И загия́ Ама́но. И пхэндя́ лэ́скэ кра́ли: “Со трэй тэ кэрэ́н одолэ́ манушэ́скэ, савэ́с кра́ли древа́н камэ́ла тэ патывакирэс слава́са?” Ама́но подуминдя дрэ пэ́скиро ило́: “Конэ́скэ ж явирэскэ закамэ́ла кра́ли тэ кэрэ́л сла́ва, апри́ч ма́ндэ?”
7. И пхэндя́ Ама́но крали́скэ: “Кодолэ́скэ манушэ́скэ, савэ́с кра́ли камэл тэ патывакирэл слава́са,
8. мэк лэ́скэ тэ янэ́н крали́скири и́дя, дрэ сави́ урьелапэ кра́ли, и янэ́на грэс, пэ савэ́стэ традэ́ла кра́ли, тэ чхувэ́н крали́скири коро́на пэ грэскиро шэро́,
9. и мэк тэ подэн и́дя и грэс дрэ васта́ екхэ англатунэ́-крали́скирэ тхагарье́ндыр, и урьена одолэ́с манушэ́с, савэ́с кра́ли камэ́ла тэ патывакирэл слава́са, и вылыджан лэс пэ грэстэ пэ форитко га́сы [пэфоруны́ (пло́шча)-р.с.], и пхэнэ́на анги́л лэ́стэ: адя́кэ кэрэ́на кодолэ́ манушэ́скэ, савэ́с кра́ли камэ́ла тэ патывакирэл слава́са!”
10. И пхэндя́ кра́ли Аманоскэ: “Дро дава́-паць моме́нто лэ и́дя и грэс, сыр ту пхэндя́н, и кэр дава́ Мардохеёскэ Юдоскэ, саво́ исын бэшто́ пашы́л крали́скирэ вудара́; нисо́ на промэк сарэ́стыр, со ту ракирдян.”
11. И лыя́ Ама́но и́дя и грэс, и уридя Мардохеёс, и вылыджия́ лэс пэ форитко маркплацо (форуны́/пло́шча), и пхэндя́ анги́л лэ́стэ: “Адя́кэ кэрэ́на одолэ́ манушэ́скэ, савэ́с кра́ли камэ́ла тэ патывакирэл слава́са!”
12. И рисия́ Мардохе́ё кэ крали́скирэ вудара́. Ама́но сыгэды́р гия́ дрэ пэ́скиро кхэр, смэнтно и зачхакирдя шэро́.
13. И пирипхэндя Ама́но Зэрэшакэ, пэ́скирэ ромнякэ, и сарэ́нгэ пэ́скирэ малэнгэ, со кэрдя́пэ лэ́са. И пхэндлэ́ лэ́скэ лэ́скирэ годэ́ мануша́ и лэ́скири ромны́ Зэрэш: “Ко́ли Мардохе́ё исын Юдэ́нгирэ родо́стыр, пир савэ́стэ ту лыян тэ пэрэс, тэды ту на пиризорьякирэса лэс, а сыгэды́р пэрэса анги́л лэ́стэ.”
14. Ёнэ ишчо (инкэ́) ракирдэ́ лэ́са, сыр явнэ́ крали́скирэ е́внухи, и лынэ́ тэ сыгнякирэн Аманос тэ джал пэ свэ́нко, саво́ кэрдя́ Эстэ́ра.
1. Мойзаскири Па́тери (Моли́тва), Саво́ сыс Дэвлэ́скиро Ману́ш.
2. О, Раё Дэ́вла! Ту са́нас усады (сак) амэ́нгэ сыр амаро́ кхэр ваш сарэ́ ро́ды!
3. Анги́л, сыр Ту создыян бэ́рги, ци сыр Ту зачхудян пхув и свэ́то и аж векостыр кэ ве́ко Ту сан Дэвэ́л.
4. Ту кэрэ́са, со ману́ш пирикэрэлапэ дро пра́хо и ракирэ́са: “Рисён, манушэ́нгирэ чхавэ́.”
5. Пал-дова́ со бар (тысёнцо) бэрш ваш Ту́кэ исын сыр атасятуно дывэ́с, со прогия́ (накхця), и сыр стрэ́га (стража) ратякири.
6. Ту лыджа́са криг амарэ́ бэрша́ сыр тасадыпнаскиро панинг (наводнениё); ёнэ исын сыр линдра (дремота): тасярлатыр ёнэ исын сыр чар, со барьёла: и злокостыр (ранкостыр) ёй лулудёла (цвэтинэла) и ячэ́лапэ зэлэно, а бэльвэле́ ёй мурдалёла (вянинэла) и вышутёла.
9. Кон исын барвалэ́-илэ́скиро, кодова́ явэ́ла бахтякирдо́, пал-дова́ со ёв дэ́ла пэ́скиро маро́ чорорэнгэ.
1. Со амэ пхэна́са, пал амарэ́ прададэстэ пир лоч (плоть) Авраамостэ, со ж лэ́стэ сыс, сыр ёв исыс джидо́.
2. Пал-дова́ со, ко́ли Авраа́мо исыс приджиндло чачунэса рэндэ́нца (делэнца), ёв могиндя́ тэ шарэлпэ анги́л манушэ́ндэ, нэ на анги́л Дэвлэ́стэ;
3. палдава́ со ракирэ́ла Свэ́нто Чхиныбэ́н? “Авраа́мо упатяндыя дрэ Дэвлэ́стэ, и пир дава́ Дэвэ́л злыя́ сарэ́ лэ́скирэ грэ́хи, и лэ́скиро упатяибэн загиндяпэ дро чачипэ́н лэ́скэ.”
4. Дэвлэ́скиро приджиндлыпэн чачунэса на загинэлапэ одолэ́ манушэ́скэ, саво́ кэрэ́ла лачхэ́ рэ́нды на пир бахталыпэ́н, а пир вужлыпэ́н;
5. а одолэ́скэ, кон на кэрэ́ла лачхэ́ рэ́нды, а кон патя́ла дрэ Одолэ́стэ, Кон приджинэла чачунэнца грэхитконэ́ манушэ́н, лэ́скиро патяибэ́н явэ́ла загиндло лэ́скэ дрэ чачипэ́н.
6. Адя́кэ-паць, сыр и Дави́до ракирэ́ла пал бахтякирибэ́н, саво́ дорэсэ́ла (долэла) ману́ш, савэ́с Дэвэ́л гинэ́ла чачунэса, на дыкхи́ пэ лэ́скирэ рэ́нды:
7. “Бахталэ́ исын одолэ́, конэскирэ налачхэ́ рэ́нды исын примангнэ и конэ́скэ грэ́хи исын чхакирдэ;
8. бахтало́ исын одова́ ману́ш, конэ́скэ Дэвэ́л на загинэла грэ́хо.”
9. Ци отлыджалапэ дава́ бахтякирибэ́н кэ обчхиндлэ́ мануша́, ци кэ наобчхиндлэ мануша́? Амэ ж ракираса пал дова́, со Авраамо́скэ сыс загиндло патяибэ́н дро чачипэ́н.
10. Сыр тэды дава́ сыс загиндло? Анги́л обчхиныбэн ци пало́ (после) обчхиныбэн, нэ на коригэды́р (позжэ) обчхиныбнастыр, а анги́л обчхиныбэн.
11. И ёв дорэсця́ (долыя) обчхиныбнаскири шпэ́ра (знако) сыр допхэныбэ́н долэ́скэ, со ёв сыс чачуно́ патяибна́скэ анги́л лэ́скиро обчхиныбэн, соб (кай) ёв тэ явэ́л дад ваш сарэ́ патяибна́скирэ́нгэ, савэ́ исын дасавэ́ би обчхиныбнаскирэ, соб (кай) и лэ́нгэ тэ явэ́л загиндло лэ́нгиро патяибэ́н дро чачипэ́н;
12. и соб (кай) тэ явэ́л дад и ваш обчхиндлэнгэ, нэ фэ́ни, савэ́ исын обчхиндлэ́, нэ и одолэ́нгэ, савэ́ джа́на патяибна́скирэ́ дромэ́са, савэ́са гия́ амаро́ дад Авраа́мо анги́л, сыр ёв на сыс обчхиндло.
13. Палдова́ со на пир Зако́но Авраа́мо и лэ́скиро ро́до дорэсця́ (долыя) Дэвлэ́стыр лав тэ явэ́л свэто́скирэ хула́са, а пирда́л патяибнаскиро чачипэ́н.
14. Ко́ли тэ явэ́н свэто́скирэ хуланца одолэ́, кон дживэ́ла пир Зако́но, тэды патяибэ́н явэ́ла чхучо́ (пусто) и лав нисо́ на явэ́ла мол.
15. Пал-дова́ со пир Зако́но явэ́ла Дэвлэ́скири холы́, кай нанэ Зако́но, одо́й и нанэ грэ́хо.
16. Патяибэ́н ваш дова́ трэй, соб (кай) амэ́нгэ Дэвэ́л тэ примангэл пир тангипэ́н, и соб (кай) дыно́ лав тэ явэ́л екх ваш сарэ́ Авраамо́скирэ родо́скэ, а ваш екхэ одолэ́нгэ, кон отлыджалапэ кэ ёнэ пир Зако́но, нэ и ваш сарэ́нгэ, кон исын Аврамоскирэ чхавэ́ пир патяибэ́н и саво́ исын дад амэ́нгэ сарэ́нгэ,
17. и сыр исын чхиндло́: “Мэ чхудём тут дадэ́са ваш бутэ́-манушэ́нгирэ на́цыи” анги́л Дэвлэ́стэ, дрэ Савэ́стэ Авраа́мо упатяндыя, Саво́ отджидякирэла мулэн, и ракирэ́ла пал долэ́ рэ́нды, со какана́ нанэ, нэ адя́кэ сы́рбы ёнэ исын;
18. ке́ли на сыс нисави́ наде́я Авраамо́скэ, усае́кх ёв на хаськирдя надеиныбэн и патяндыя, палдава́ ёв и яця́ дадэ́са бутэ́ манушэ́нгирэ нацые́нгэ, сыр лэ́скэ сыс пхэндло́: “Адя́кэ явэ́ла баро́ тыро́ ро́до.”
19. И лэ́скиро патяибэ́н на тыкныя, хоць ёв джиндя́, со дрэ лэ́скирэ маса́ нанэ ни сави́ джиибнытко зор, пал-дова́ со лэ́скэ исыс пашы́л шэл бэрш и ромны́ лэ́скири Сара сыс древа́н пхури ваш дава́, соб (кай) тэ биянэ́л,
20. и ёв на куниндяпэ дрэ Дэвлэ́скиро дыно́ лав, а ёв сыс твардо дро патяибэ́н и славиндя Дэвлэ́с,
21. Ёв древа́н патяндыя, со Дэвлэ́стэ исын зор, и ёв кэрэ́ла дова́, пал со Ёв дыя́ лав;
22. дава́ и сыс загиндло лэ́скэ дро чачипэ́н.
23. А лава́, савэ́ исыс чхиндлэ́ пал лэ́стэ, отлыджанапэ на кэ екх Авраа́мо.
24. Нэ ёнэ адя́кэ-паць отлыджанапэ и кэ амэ, савэ́нгэ явэ́ла загиндло чачипэ́н, кон патя́ла дрэ Одолэ́стэ, Кон отджидякирдя́ мулэ́ндыр, амарэ́ Рас-Дэвлэ́с, Исусо́с,
25. Саво́ сыс здыно пал амарэ́ грэ́хи и Саво́ отджидыя́, соб (кай) тэ приджинэл амэн чачунэнца бангипнастыр анги́л Дэвлэ́стэ.
Romani Bible Baltic 2019
United Bible Societies for the Baltic Romani Mission