|
|
| 1. Мэ кэрдём завето мирэ́ якхэ́нца. Со́скэ тэды мэ ява́ва тэ дыкха́в пэ тэрнэ́ патывалэ́ джувля́тэ? |
| 2. Палдава́, сави́ явэ́ла мири́ до́ля Дэвлэ́стыр вучипна́стыр, и, саво́ явэ́ла миштыпэ́н Сарэзорьякирэ Дэвлэ́стыр, Саво́ исын пэ вучипэна́? |
| 3. Ци со, нанэ бари би́да пэ начачунэндэ? Ци со, нанэ биба́хт одолэ́нгэ, кон кэрэ́ла чорипэ́н? |
| 4. Ци на дыкхэ́ла Ёв мирэ́ дрома́, ци на гинэ́ла Ёв мирэ́ шаги (ламня)? |
| 5. Ко́ли псирдём мэ начачунэ дромэ́са, ко́ли джа́лас сыгэды́р мири́ ґэро́й, соб (кай) ма́нгэ тэ хохавав, |
| 6. то тэды мэк тэ ублавэн (тэ важынэн) ман пэ роўна ублады́тка (весы), соб (кай) Дэвэ́л тэ могинэл тэ джинэ́л пал миро чачипэ́н. |
| 7. Ко́ли мирэ́ пирэ́ (сто́пы) рисинэ́ криг дромэ́стыр, ці, ко́ли миро ило́ гия́ пал мирэ́ якха́, ци ко́ли вари-сави́ дош прияця кэ мирэ́ васта́, |
| 8. то тэды мэк ма́нгэ тэ чхував зя́рка дрэ пхув, нэ явирэскэ тэ хал дова́, со барьёла, ци тэ́ньчи мэк миро ро́до тэ рискирэ́н криг корне́нца (рукхэ́нца). |
| 9. Ко́ли вари-сави́ джувлы́ тэ затэрдэл миро ило́, ці, ко́ли мэ тэ гарадёвав паш мирэ́-пашатунэскиро вуда́р, |
| 10. тэды, мэк тэ дэл, соб (кай) мири́ ромны́ тэ мелинэл ваш явирэскэ, и, соб (кай) яви́р мурша́ тэ бандякирэн шэрэ́ анги́л ла́тэ. |
| 11. Пал-дова́ со дава́ явэ́лас проштавибэн (трашаны дош кэ ка́ра), и дава́ исын фуипэ́н тэ сэндинэл сэндарискэ. |
| 12. Пал-дова́ со дава́ явэ́лас сыр яг, сави́ халас саро́ кэ хась, и сави́ рискирэлас криг рукхэ́нца (корне́нца) саро́ миро миштыпэ́н. |
| 13. Ко́ли мэ дыкха́вас вучипна́са пэ мирэ́-штубакирэ дынаристэ ци дынарицатэ, ке́ли ёнэ лыджинэ́ чинга́рд ма́нца; |
| 14. со ж тэды трэиндя́ ма́нгэ тэ кэра́в, ке́ли Дэвэ́л лэ́ла тэ сэндинэл? И ко́ли Ёв пхучэла ма́ндыр, со ж тэды ма́нгэ явэ́лас тэ отпхэнав Лэ́скэ? |
| 15. Ци одова́, Кон создыя́ ман дрэ дакири лоч, ци на Ёв создыя́ кодолэ́ писхарье́н? Ци на Ёв высоздыя дуе́н дрэ лоч? |
| 16. Ко́ли мэ на давас дова́, со чорорэ́ камэнас, ци ко́ли мэ кэравас адя́кэ, со пивленгирэ (удовэнгирэ) якха́ обчхувэнаспэ ясвэ́нца; |
| 17. ци ко́ли мэ хавас кокоро́ миро котэ́р, и соб (кай) пирото (сирота) тэ на хал ма́нца; – |
| 18. пал-дова́ со пирото мирэ́ тэрныпнастыр бария паш ма́ндэ, сыр паш дадэ́стэ, и мэ лыджавас пир джиибэ́н адаля пивля, сыр фэ́ни мэ выгиём да́кирэ лочатыр, |
| 19. ци ко́ли мэ дыкха́вас, со вари-кон хасёлас пир дова́, со на сыс лэ́стэ со тэ урьел, ци чорорэс, конэ́стэ на сыс со́са тэ учхакирэлпэ; |
| 20. ци ко́ли лэ́скиро трушу́л на бахтякирдя́ ман, и ци мирэ́-бакрэнгири вы́лна (шэрсь) на татькирдя лэс, |
| 21. ци ко́ли мэ ґаздавас пэ́скиро васт пэ пиротостэ, мэк мэ и дыкха́вас мирэ́ манушэ́н паш по́рта, |
| 22. тэды мэк тэ пэрэ́л криг миро васт мирэ́ псикэстыр, мэк тэ рискирдёл яври́ миро васт кокалостыр. |
| 23. Пал-дова́ со хась Дэвлэ́стыр зоралэ́с трашакирэлас ман, и пир дова́ мэ на могинавас тэ вырикирав Лэ́скиро фэдырипэн. |
| 24. Ци, ко́ли мэ тэ ужакирав лачхипэ́н сувнака́стыр, ці, ко́ли мэ тэ пхэна́в выкэдынэ́ сувнакаскэ: “Дрэ ту́тэ мэ зоралэ́с патя́ва.” |
| 25. Ци, ко́ли мэ древа́н тэ радынавпэ долэ́стыр, со мэ со́мас древа́н барвало́, ци пир дова́, со миро васт дорэсця́ бут; |
| 26. ці, ко́ли мэ тэ дыкха́в путрадэ якхэ́нца пэ кхам, сыр ёв дэ́лас дуд, ци пэ чхон, сыр ёв джал штэто́стыр пэ штэ́то пир болыбэ́н, зяиндой, |
| 27. и ко́ли кхам и чхон чораханэ́с тэ затырдэн миро ило́, ці, ко́ли мэ тэ чамудав пэ́скиро васт сы́рбы тэ дав паты́в лэ́скэ; |
| 28. тэды дава́ адэкэ-паць явэ́лас чорипэ́н, со исын мол пэ сэ́ндо; пир дова́, со мэ тэды сы́рбы отпхэнаваспэ Дэвлэ́стыр, Саво́ исын пэ вучипэ́н. |
| 29. Ко́ли мэ тэ радынавпэ зоралэ́с, со хасибэ́н пыя́ пэ лэ́стэ, ці, ко́ли мэ тэ ґаздавпэ радыма́тыр, сыр биба́хт пыя́ пэ лэ́стэ; |
| 30. ці, ко́ли, чачипна́са, мэ тэ мэнчынав миро муй тэ пхэнэ́л грэ́хо, ці, соб (кай) мэ камамас прокошыбэ́н (арманя) пэ лэ́скиро ди; |
| 31. ці, ко́ли тэ пхэнэ́н мануша́ мирэ́ шатратыр: “Ци исын вари-кон, саво́ на хая чалэ́с лэ́скиро мас?” |
| 32. ці, ко́ли вари-саво́ чу́жо ману́ш тэ ратькирэл пэ вули́ца (га́са), ці, ко́ли мэ тэ на псиравав мирэ́ вудара́ дромэскирэскэ (прохожонэскэ); |
| 33. ко́ли, мэ тэ чхакирав мирэ́ чорэ́ рэ́нды сыр Адамо, гарави миро чорипэ́н пал брэк, |
| 34. пал-дова́ со мэ дарававас манушэ́нгирэ скопостыр, и сэм΄енгиро накутякирибэн кэ мэ трашавэлас ман, тэды мэ явавас штыл, и мэ на джавас яври́ пал вуда́р. |
| 35. О, ко́ли тэ явэ́л вари-кон ма́ндэ тэ шунэ́л ман! Ѓа́да, исын миро подчхиныбэн: мэк Сарэзорья́киро Дэвэ́л тэ отпхэнэл ма́нгэ! И соб (кай) миро проти – тэрдыпнаскиро ману́ш тэ чхинэл миро бандькирибэн! |
| 36. Чачипна́са, мэ лыджавас дава́ бандькирибэн пэ миро псико́; и мэ пхандавас лэс пэ шэро́ сыр крали́тко стадык; |
| 37. мэ приджинаваспэ Дэвлэ́скэ пал кажно миро шаго (ламны), мэ сы́рбы тхага́ри джавас пашэдыр кэ Ёв. |
| 38. Ко́ли мири́ пхув тэ дэл го́дла пэ ма́ндэ, и ко́ли ла́кирэ лесьни (борозды) тэ ровэ́н кхэтанэ́ пэ ма́ндэ, |
| 39. ко́ли мэ хаём ла́кирэ барьякирдэ́ (пло́ды) биловэнгиро, и ко́ли мэ мэнчындём кэ мэрибэ́н дия́, конэ́скири пхув дая́ сыс, |
| 40. то мэк тэ барьён канралэ раслины пэ гивэскиро штэ́то, и мэк тэ барьёл дылыны чар (куколь) пэ ґэрстоскиро (ячменёскиро) штэ́то (Иовоскирэ лава́ кончындлэпэ). |
|
|
| 1. И кадалэ́ трин мануша́ пириячнэ тэ отпхэнэн Иовоскэ, пал-дова́ со Ёв сыс чачуно́ дрэ пэ́скирэ якха́. |
| 2. Тэ́ньци захачи́я Элюёскири холы́, кон сыс Варахоскиро чхаво́ Вузитэндыр, савэ́ исын Рамоскирэ сэм΄ятыр: лэ́скири холы́ захачи́я пэ Иовостэ; пал-дова́ со ёв чачакирдя пэс буты́р Дэвлэ́стыр. |
| 3. Лэ́скири холы́ росхачия адя́кэ-паць пэ тринэ́ малэндэ, пал-дова́ со лэ́ндэ нисо́ на сыс тэ отпхэнэн, и со ёнэ сэндиндлэ зоралэ́с лэс. |
| 4. Нэ, Элюё (Элиуё), Варахоскиро чхаво́, ужакирдя, пало́ дова́, сыр Ио́во кончындя тэ ракирэ́л, пал-дова́ со лэ́скирэ трин мала́ сыс пхурэды́р лэ́стыр. |
| 5. И дыкхця́ Элюё, со на сыс лав дрэ лэ́нгирэ муя́ адалэ́ тринэ́ манушэ́ндэ, то лэ́скири холы́ росхачия буты́р. |
| 6. И Элюё, Варахоскиро чхаво́ Вузитэндыр, отпхэндя́ лавэ́нца: “Мэ сом тэрно́, нэ тумэ́ сан дрэ бэрша́, палдова́ мэ со́мас ладжакуно, и мэ дарандыём тэ сыкавав, со мэ джино́м.” |
| 7. Мэ пхэндём: “Мэк дывэса́ тэ ракирэ́н, и бэршэнгиро бутыпэн тэ сыклякирэ́л годыпнаскэ.” |
| 8. Нэ дрэ манушэ́стэ исын ду́хо (фа́но), саво́ дэ́ла Сарэзорья́киро Дэвэ́л, Саво́ дэ́ла годы́ манушэ́нгэ тэ ґалёл. |
| 9. На барэ́-бэршэнгирэ мануша́ исын ўса́ды (сак) най годэдыр, адя́кэ-паць, и ману́ш дрэ бэрша́ на ўса́ды (сак) ґалёла чачипэ́н. |
| 10. Палдава́ мэ пхэна́ва: “Шунэ́н ман миштэ́с, мэ адя́кэ-паць сыкава́ва, со мэ джино́м. |
| 11. Акэ, – мэ ужакирдём тумарэ́ лава́, мэ шундём откэрдэ канэса причыны, со тумэ́ пириракирэнас, сыр акана́ тумэ́ родэнас, со тэ пхэнэ́н. |
| 12. Чачо́, мэ рискирдём ило́ кэ тумарэ́ лава́, и, акэ; ние́кх тумэ́ндыр на пирипатякирэла Иовос, и ние́кх на отпхэндя́ пэ лэ́скирэ лава́, – |
| 13. тэды тумэ́ на ракирэ́н: “Амэ латхям годыпэ́н. Дэвэ́л отпхэнэ́ла, сыр трэй Лэ́скэ, нэ на ману́ш. |
| 14. Ио́во на ракирдя́ пэ́скирэ лава́ маму́й кэ мэ, и мэ на отпхэнавас лэ́скэ тумарэ́ лавэ́нца. |
| 15. Тумэ́ акана́ хокинэ дивостыр, и на отпхэнэна нисо́; тумэ́ндэ и лава́ хасинэ́. |
| 16. И мэ ужакирдём, пал-дова́ со тумэ́ на ракирдэ́, нэ тумэ́ са́нас штыл, и тумэ́ буты́р на отпхэндлэ́. |
| 17. И акана́ мэ адя́кэ-паць отпхэнава мирэ́ рига́тыр: |
| 18. пал-дова́ со ма́ндэ исын пхэрдо́ лава́, ду́хо (фа́но) андра́л ма́ндэ зачхувэла ман тэ ракира́в. |
| 19. Ѓа́да, саро́ андра́л ма́ндэ исын сыр мол (вино), сави́ исын наотпхандлы, сави́, акэ, акана́ пхарадёла. |
| 20. Мэ ява́ва тэ ракира́в, соб (кай) ма́нгэ тэ явэ́л локхэды́р, мэ отпхандава пэ́скиро муй и мэ отпхэнава. |
| 21. Мэ мангавапэ Дэвлэ́скэ, соб (кай) ма́нгэ тэ на явав пэ вари-конэ́скири риг, и соб (кай) ма́нгэ тэ на хохавав гудлэс вари-конэ́с. |
| 22. Пал-дова́ со мэ на джино́м, сыр тэ хохавав гудлэс; ко́ли мэ тэ кэра́в адя́кэ, то миро Создыибнаскиро укэдэла криг ман.” |
|
|
| 1. Пса́лмо. О, бага́н Ра́скэ-Дэвлэ́скэ нэви́ гилы́! Пал-дова́ со Ёв кэрдя́ ди́вна рэ́нды (де́лы). Лэ́скиро чачо́ (право) васт и лэ́скиро чачо́ псико́ помогиндлэ Лэ́скэ тэ пиризорьякирэл. |
| 2. Рай Дэвэ́л сыкадя́, со Ёв зракхэ́ла. Ёв отчхакирдя́ Пэ́скиро чачипэ́н анги́л сарэ́ манушэ́нгирэ якха́. |
| 3. Ёв дыя́ тэ рипирэл пал Пэ́скири лачхэ́-илы́ткима и лэ́скиро чачипэ́н Израилёскирэ кхэрэ́скэ: сарэ́ пхувья́кирэ яго́ры (краи́) дыкхнэ́, сыр амаро́ Дэвэ́л зракхэ́ла Пэ́скиро манушэ́н. |
|
|
| 17. Мэк тыро́ ило́ тэ на зэвлынэл (тэ на завидынэл) грэхитконэ́ манушэ́нгэ, мэк тыро́ ило́ тэ ячэ́лпэ ўса́ды (сак) дрэ дар анги́л Растэ-Дэвлэ́стэ; |
| 18. пал-дова́ со исын англыпэ́н и тыро́ лачхо́ ужакирибэ́н на явэ́ла нашадо. |
|
|
| 1. Сыр мэ со́мас кэ тумэ́, пшала́лэ, мэ явдём на ваш дова́, соб (кай) тэ роспхэнав Дэвлэ́скиро чорахано чачипэ́н пхутькирдэ́ лавэ́нца ци барэ́ годьварипнаса. |
| 2. Палдава́ ма́ндэ пэ годы́ сыс тэ на джина́в нисо́, апри́ч Исусо́стэ Христосо́стэ, Савэс примардэ пэ трушу́л. |
| 3. И ке́ли мэ со́мас тумэ́нца, ма́ндэ на сыс зор, мэ дарандыем и издрандыём; |
| 4. дрэ мири́ зан и пхэныбэ́н на сыс годьварэ́ лава́, нэ ёнэ сыс сыр допхэныбэ́н пал Дэвлэ́скирэ-Духоскири зор; |
| 5. соб (кай) тумаро́ патяибэ́н тэ на рикирэлпэ пэ манушы́тко годьварипэн, а пэ Дэвлэ́скири зор. |
| 6. Нэ амэ ракираса пал годьварипэн машки́р бидошакирэ патяибнаскирэндэ, нэ на адя́кэ, сыр дава́ свэ́то гинэ́ла, ци, сыр тхэмэ́скирэ барыдыра́ далэ́ свэто́стыр ґалёна годьварипэн, савэ́ сыг кончынэнапэ. |
| 7. А амэ ракираса пал Дэвлэ́скиро чорахано годыпэ́н, саво́ Дэвэ́л гарадя и выкэдыя́ ваш амари́ сла́ва анги́л, сыр свэ́то сыс создыно́ (кэрдо́): |
| 8. ние́кх адалэ́ свэто́скирэ барэ́ рандыр на ґалыя́ дава́, пал-дова́ со, ко́ли ёнэ тэ ґалён, тэды ёнэ на примарэнас Рас-Дэвлэ́с, Саво́ исын пхэрдо́ слава́са, |
| 9. нэ сыр исын чхиндло́: “Кодова́ на дыкхця́ якх, на шундя́ кан, на сыс пэ ило́ манушэ́стэ, со Дэвэ́л кэдыя одолэ́нгэ, конэ́скэ яця́ дро́го Ёв; |
| 10. нэ Дэвэ́л откэрдя дава́ Пэ́скирэ Духо́са, пал-дова́ со Ду́хо (Фа́но) доджа́ла кэ саро́, аж кэ ду́мы Дэвлэ́скирэ, со исын ґарадэ́ манушытконэ́ годятыр.” |
| 11. Палдава́, кон манушэ́ндыр джинэ́ла, со исын дрэ явирэ манушэ́стэ, екх дава́ манушы́тко Ду́хо (Фа́но), саво́ дживэ́ла дрэ манушэ́стэ? Адя́кэ-паць и екх Дэвлэ́скиро Ду́хо (Фа́но) джинэ́ла екх пал Дэвлэ́стэ. |
| 12. Нэ амэ прилыям ду́хо (фа́но) на кадалэ́ свэто́стыр, а амэ прилыям Ду́хо (Фа́но), Саво́ Дэвэ́л бичхадя́, соб (кай) амэ́нгэ тэ ґалёвас саро́ дова́, со Дэвэ́л адя́кэ дыя́ амэ́нгэ: |
| 13. пал со амэ ракираса лавэ́нца, савэ́ на манушытконэ́-годьварипнастыр, а лавэ́нца, савэ́ свэ́нто Ду́хо (Фа́но) сыклякирдя́, ке́ли амэ пирипхэнаса Духоскиро одолэ́нгэ, конэ́стэ исын Ду́хо (Фа́но). |
| 14. Ману́ш, савэ́стэ нанэ Ду́хо (Фа́но), на прилэ́ла илэ́са таланы Дэвлэ́скирэ Духо́стыр, пал-дова́ со ёв гинэ́ла лэн пал дылныпэ́н; и ёв на могинэ́ла тэ ґалёл лэн, пал-дова́ со лэ́нгэ дэ́на чол (тими́н) мануша́, конэ́стэ исын Ду́хо (Фа́но); |
| 15. нэ ману́ш, савэ́стэ исын Ду́хо (Фа́но), дэ́ла чол сарэскэ, нэ лэ́скэ ние́кх на могинэ́ла тэ дэл чол. |
| 16. Пал-дова́ со, кон ґалыя́ Дэвлэ́скири годы́, соб (кай) тэ сыклякирэ́л Лэс? А амэ́ндэ исын Христососкири годы́. |
|
|
| Romani Bible Baltic 2019 |
| United Bible Societies for the Baltic Romani Mission |