Bible in one year - Пэ Балтитко Романи чиб

Bible in one year August 21

Job 33:1-33

1. Нэ мэ манга́ва тут, Ио́во, шун, со мэ пхэна́ва ту́кэ, и пришунпэ миштэ́с кэ сарэ́ мирэ́ лава́.

2. Ѓа́да, акана́, мэ отпхандава пэ́скиро муй, мири́ чиб явэ́ла ракирэ́л дро миро муй.

3. Мирэ́ лава́ джа́на мирэ́-илэ́скирэ чачипнастыр, и мирэ́ ушта́ выпхэнэна екх джиныбэ́н.

4. Дэвлэ́скиро Ду́хо создыя́ ман, и Сарэзорьякирэрэ Дэвлэ́скиро пхурдыпэн дыя́ джиибэ́н ма́нгэ.

5. Ко́ли ту нашты́ тэ отпхэнэс ма́нгэ, пхэн пэ́скирэ лава́ екх, пал яви́р анги́л ма́ндэ: тэрдёв анги́л ма́ндэ.

6. Акэ, мэ сом дасаво-паць анги́л Дэвлэ́стэ сыр ту, мэ адя́кэ-паць сом создыно́ прахостыр.

7. Шун, на андарша (на дар) мирэ́ минатыр, и мирэ́ вастэ́стыр, со явэ́ла пхаро́ ту́кэ.

8. Ѓа́да, со мирэ́ кана́ шундлэ́, и мэ шундём тырэ́-лавэнгири зан:

9. “Мэ сом бидошэ́нгиро, мэ на кэрдём чорипэ́н.

10. Нэ Дэвэ́л латхэ́ла банг дрэ ма́ндэ, Ёв гинэ́ла ман пал Лэ́скирэ вэргостэ,

11. Ёв чхувэ́ла мирэ́ ґэра́ дрэ калодки, Ёв дыкхэ́ла пал сарэ́ мирэ́ дрома́!”

12. Дыкх! Дро дава́ ту на сан чачикано (оправдано), – мэ пхэна́ва ту́кэ: Дэвэ́л исын вучэды́р манушэ́стыр.

13. Со́скэ ту лыджа́са чинга́рд Лэ́са? Ёв, хай, на дэ́ла отпхэныбэ́н пал Лэ́скирэ рэ́нды!

14. Пал-дова́ со Дэвэ́л ракирэ́ла е́кхвар, дуй мо́лы, нэ ману́ш на ґалёла анги́л;

15. Дэвэ́л сы́рбы пхэнэ́ла дро суно́, дрэ зданки (дыкхибэ́н) раты́, сыр хор соибэн пэрэ́ла пэ манушэ́стэ, ци сыр ману́ш линдрэла (дреминэла) пэ чхуибэ́н,

16. тэды Дэвэ́л отпхандэла манушэ́нгирэ кана́ и Ёв чхувэ́ла сы́рбы якхи́тко пэ Пэ́скиро упхэныбэ́н,

17. соб (кай) тэ обрикирэл манушэ́с тэ кэрэ́л чорэ́ рэ́нды, соб (кай) тэ гаравэл пхутькирибэ́н манушэ́стыр.

18. Ёв ракхэ́ла Манушэ́скиро ди маґилатыр, и лэ́скиро джиибэ́н куртала́тыр.

19. Дэвэ́л адя́кэ-паць пирисыклякирэла манушэ́с насвалыпнаса дро лэ́скиро чхуибэ́н, и зоралэ́ дукхаса дрэ лэ́скирэ бут кокалы́ адя́кэ,

20. со лэ́стэ буты́р нанэ камибэн тэ хал маро́, и лэ́скиро ди буты́р на камэ́ла смашно хабэ́н.

21. Лэ́скирэ маса́ хасёна пэ якха́, и лэ́скирэ кокалы́, со на дыкхнэ́ сыгэды́р, акана́ бицялэ яври́.

22. И лэ́скиро ди джа́ла пашэдыр кэ мулытко ґанби́н, и лэ́скиро джиибэ́н кэ мэрибэ́н.

23. Ко́ли тэ явэ́л бичхаибнаскиро Янго́ло ваш лэ́скэ, ману́ш, кон розлэла годя́са, екх тысёнцэндыр, соб (кай) тэ сыкавэ́л адалэ́ манушэ́скэ лэ́скиро маму́й дром,

24. тэ́ньчи Дэвэ́л потангинэла манушэ́с и пхэнэ́ла: “Выракх лэс, соб (кай) ёв тэ на джал дрэ маґила (кула); Мэ латхём выкиныбэ́н пал лэ́стэ.”

25. Лэ́скирэ маса́ явэ́на зоралэды́р сыр дрэ лэ́скирэ тэрнэ́ бэрша́, ёв сы́рбы рисёла тэды кэ лэ́скирэ тэрнэ́ бэрша́.

26. Ёв явэ́ла тэ мангэ́лпэ Дэвлэ́скэ, и Дэвэ́л прилэ́ла лэс ласкаса, и ёв явэ́ла тэ дэл паты́в анги́л Лэ́стэ барэ́ радыма́са, пал-дова́ со Дэвэ́л рискирэ́ла палэ лэ́скиро чачипэ́н.

27. Ёв явэ́ла тэ дыкхэ́л пэ явирэ манушэ́ндэ, и тэ ракирэ́л: “Мэ кэрдём грэ́хи, и мэ пиририскирдём чачипэ́н. И мэ на дорэсцём даб палэ.

28. Дэвэ́л выракхця миро ди мулытконэ ґанбинатыр, и миро джиибэ́н удыкхэ́ла дуд!”

29. Акэ, Дэвэ́л кэрэ́ла саро́ дава́ дуй трин мо́лы манушэ́са,

30. соб (кай) тэ янэл палэ Манушэ́скиро ди маґилатыр (кулатыр), соб (кай) тэ обсвэнцынэл лэс джиибна́скирэ дудэса (свэтоса).

31. Дыкх миштэ́с, Ио́во, шун откэрдэ канэнца ман, яв штыл, и мэ ява́ва тэ ракира́в.

32. Ко́ли исын вари-со ту́тэ тэ пхэнэ́с, то отпхэн ма́нгэ: ра́кир, пал-дова́ со мэ древа́н кама́м тэ чачакирав (тэ оправдынав) тут.

33. Ко́ли над, тэды шун ман: яв штыл, и мэ ява́ва тэ сыклякирав тут годыпнаскэ.”

Job 34:1-37

1. И отпхэнэ́лас Элиуё (Элюё) дурэды́р и пхэндя́:

2. “Шунэ́н мирэ́ лава́ тумэ́, кон сан годэ́; причхувэ́н кан кэ мэ, тумэ́, кон джинэ́ла бут.

3. Пал-дова́ со кан спробинэла лава́, сыр талой (гортань) коштынэла хабэ́н.

4. Явэ́н, выкэдаса пэ́скэ чачипэ́н; явэ́н, джина́са буты́р кхэтанэ́, со исын лачхипэ́н.

5. Пал-дова́ со Ио́во пхэндя́: “Мэ сом чачуно́, нэ Дэвэ́л лыя́ криг миро чачипэ́н.”

6. Со ж ма́нгэ тэ хохавав пэ миро чачипэ́н? Мири́ даб (рана) на састия, мэк мэ и сом бичорипнаскиро.

7. Кай исын дасаво ману́ш сыр Ио́во исын? Кон пьела холямипэн сы́рбы ёв пьела пани́?

8. И кон кумплинэлапэ адасавэ́ манушэ́нца, кон кэрэ́ла чорипэ́н, и кон псирэ́ла фуе́ манушэ́нца?

9. Пал-дова́ со ёв пхэндя́: “Нанэ лачхипэ́н манушэ́скэ, со ёв зоралэ́с радынэ́лапэ Дэвлэ́стыр.”

10. Палдава́ шунэ́н миштэ́с ман, тумэ́, кон сан годэ́: нашты́ тэ явэ́л, соб (кай) Дэвэ́л тэ думинэл, тэ кэрэ́л фуипэ́н, и нашты́ тэ явэ́л чорипэ́н Сарэзорьякирэ Дэвлэ́стыр.

11. Пал-дова́ со Ёв отдэ́ла палэ манушэ́скэ пир лэ́скири буты́, соб (кай) кажно ману́ш тэ дорэсэл мазу́ри (награда) пир дова́, со Ёв кэрдя́.

12. Сарэ́ джинэ́на, со Дэвэ́л ние́кхвар на кэрэ́ла фуипэ́н, и Сарэзорья́киро Дэвэ́л на пиририскирэла чачипэ́н.

13. Кон дыя́ зор дрэ Лэ́скири васта́ пэ сари́ пхув? Нико́н жа и дыя́ зор Лэ́скэ тэ раинэл пэ саро́ свэ́то.

14. Ко́ли Ёв фэ́ни тэ думинэл пал Пэ́стэ, и тэ кэдэл криг Пэ́скиро Ду́хо (Фа́но) и Пэ́скиро пхурдыпэн тэ дживэ́н;

15. то саро́ джидо́ хасёлас, и ману́ш рисёлас дро пра́хо.

16. Ко́ли тумэ́ сан годэ́, шунэ́н дава́; пришунэнпэ кэ мирэ́-лавэнгирэ заня́ (глося́):

17. “Ци сашты́ тэ раинэл одова́, кон зоралэ́с на камэ́ла чачипэ́н? Ци сашты́ ту тэ обсэндякирэс зоралэ́с кодолэ́с, Кон исын Сарэчачипнаскиро?

18. Ци исын лачхэ́с тэ пхэнэ́л крали́скэ: “Ту сан злыдня!” Ци лачхэ́-родоскирэ ра́скэ: “Ту сан биба́хт.”

19. Дэвэ́л на прилэ́ла тхагарьенгири риг, адя́кэ-паць Ёв на гинэ́ла барвалэн вучэды́р чорорэндыр, пал-дова́ со Ёв создыя́ и екхэ́с и явирэ́с.

20. Ѓа́да, ёнэ мэрэ́на и дрэ паш-рат, и мануша́ издрана и хасёна, и зоралыпнаскирэ мурша́ пириячэна тэ явэ́н дро свэ́то биманушэскирэ-вастэскиро.

21. Пал-дова́ со Дэвлэ́скирэ якха́ исын пэ дрома́, савэ́нца ману́ш псирэ́ла, и Ёв дыкхэ́ла сарэ́ лэ́скирэ шаги (ламня).

22. Ни дро калыпэ́н (цямлыпэ́н), ни дрэ мэрибнаскири зэр (тень) нашты́ тэ гарадён Дэвлэ́стыр мануша́, кон кэрэ́ла чорипэ́н.

23. Дэвлэ́скэ на трэй, соб (кай) ману́ш тэ обдуминэл, сыр лэ́скэ тэ тэрдёл пэ сэ́ндо анги́л Растэ-Дэвлэ́стэ.

24. Ёв пхагэла пэ котэра́ зоралыпнаскирэ муршэ́н, и Ёв чхувэ́ла явирэ манушэ́н пэ лэ́нгирэ штэ́ты.

25. Дава́ исын чачипэ́н, со Дэвэ́л джинэ́ла лэ́нгирэ рэ́нды, Ёв равэла тэлэ́ лэн раты́, адя́кэ, со ёнэ хасинэ́.

26. Ёв пэкавэла лэн сыр фуе́ манушэ́н анги́л явирэ-манушэ́нгирэ якха́,

27. пал-дова́ со ёнэ рисинэ́ палэ Лэ́стыр, и ёнэ на обдуминэнас Лэ́скирэ дрома́ кэ дасави́ ме́ра.

28. Пал-дова́ со чорорэ́-манушэ́нгирэ роибэ́н догия́ кэ Ёв, пал-дова́ со Ёв шунэ́ла, сыр притасадэ мануша́ ровэна.

29. Ко́ли Ёв исын штыл, кон тэды сашты́ тэ кэрэ́л шумо? И ко́ли Ёв ґаравэла Пэ́скиро муй, тэды, кон сашты́ тэ дыкхэ́л Лэс? Ци тэ явэ́л дава́ ваш сари́ нацыя, ци ваш екхэ манушэ́скэ?

30. соб (кай) тэ на раинэн дуе-муенгирэ мануша́, соб (кай) тэ на явэ́н мануша́ хохадэ сыр фэляса.

31. Ци пхэндя́н ту, Ио́во, сыр и яви́р ману́ш Дэвлэ́скэ: мэ на ява́ва буты́р тэ кэра́в грэ́хи!

32. Со мэ на дыкха́ва, далэскэ сыкля́кир ман; ко́ли мэ кэрдём начачунэс, мэ на ява́ва буты́р.

33. Ци явэ́ла Дэвэ́л тэ отдэ́л палэ пир тыри́ годы́? Пал-дова́ со ту отпхэндянпэ Лэ́скирэ сэндостыр!? Дава́ ту́кэ трэй тэ выкэдэс, на ма́нгэ, пхэн акана́ амэ́нгэ, сыр ту джинэ́са.

34. Годьварэ́, и годэ́ мануша́ пхэнэ́на ма́нгэ, савэ́ шунэ́на ман:

35. “Ио́во пхэндя́ адя́кэ, сыр лэ́стэ нанэ джиныбэ́н, лэ́скирэ лава́ исын нагодэ.”

36. О, соб (кай) Ио́во тэ явэ́л пирипробиндло кэ ко́нцо (яго́ро)! Пал-дова́ со ёв отпхэндя́ адя́кэ, сыр фуй мануша́!

37. Пал-дова́ со Ёв дочхувэла бу́нто пэ Дэвлэ́стэ кэ лэ́скирэ грэ́хи, ёв марэла дрэ васта́ машки́р амэ́ндэ и ёв бутэдырьякирэла пэ́скирэ лава́ пэ Дэвлэ́стэ.”

Psalms 98:4-9

4. Бага́н и радынэ́нпэ зоралэ́с анги́л Растэ-Дэвлэ́стэ, сарэ́ мануша́ пхувья́тыр, лошалён (веселинэнпэ) и радынэ́нпэ, шарэ́н псалмэнца Лэс.

5. Бага́н псалмы Ра́скэ-Дэвлэ́скэ пэ гусли; пэ гусли и заненгирэ (глосенгирэ) багаибнаса.

6. Башавэн пэ ро́го (труба) и горно, радынэ́нпэ анги́л Кхенинго́стэ, Растэ-Дэвлэ́стэ.

7. Мэк тэ брилинэн (тэ ривинэн) мо́ри (дэрьява́) и саро́, со дживэ́ла дрэ лэ́стэ.

8. Мэк тэ пэкавэн дрэ васта́ рэ́ки (лэня́), мэк тэ ґаздэ́нпэ радыма́тыр бэ́ргицы.

9. Анги́л Растэ-Дэвлэ́стэ, пал-дова́ со Ёв джа́ла тэ сэндякирэ́л пхув: Ёв явэ́ла тэ сэндякирэ́л свэ́то пир чачипэ́н и Ёв чачунэ́с явэ́ла тэ сэндякирэ́л манушыпнаскирэ на́цыи.

Proverbs 23:19-21

19. Мро чха́ва! Шун, и яв годо́, и приракх пэ́скиро ило́ пэ маму́й дром.

20. На яв кхэтанэ́ манушэ́са, кон пьела древа́н бут мол (вино), ци кон ха́ла бут мас.

21. Пал-дова́ со матымари (матяри) и бутэ́-хабнаскиро ману́ш (обхаячо) ячэ́на чорорэ́, и ману́ш, кон совэла бут, явэ́ла уридо́ дрэ мэлалэ патавэ.

1 Korinťanenge 3:1-23

1. Пшала́лэ, мэ на могиндём тэ ракира́в тумэ́нца сыр манушэ́нца, конэ́стэ исын Ду́хо (Фа́но), а сыр одолэнца, савэ́ дживэ́на пир лочакиро (плотякиро) тырдыпэ́н, сыр бияторэнца (чхаворэнца) пир патяибэ́н дрэ Христосо́стэ.

2. Мэ чалякирдём тумэн тхудэ́са, а на масэ́са, пал-дова́ со тумэ́ са́нас бизорья́кирэ, и какана́ ишчо (инкэ́) тумэ́ндэ нанэ зор;

3. пал-дова́ со тумэ́ сан ишчо (инкэ́) мануша́, савэ́ дживэ́на пир лочакиро тырдыпэ́н. Палдава́, ко́ли машки́р тумэ́ндэ исын зэвлыныпэ́н, и кошыбэ́н, тэды, ци на сан тумэ́ мануша́, савэ́ дживэ́на пир лочакиро (плотякиро) тырдыпэ́н; и савэ́ лыджа́на пэс сыр мануша́ кадалэ́ свэто́стыр?

4. Пал-дова́ со, ке́ли вари-кон пхэнэ́ла: “Мэ сом Павли́скиро”, ци яви́р: “Мэ сом Аполососкиро”, тэды, ци на сан тумэ́ мануша́, савэ́ дживэ́на пир лочакиро тырдыпэ́н?

5. Кон тэды исын Па́вли? Кон исын Аполосо? Ёнэ ж исын екх Дэвлэ́скирэ слу́ги (дына́рья), пир конэ́стэ тумэ́ упатя́ндынэ, сыр и дыя́ Дэвэ́л буты́ кажнонэ́скэ (сваконэскэ).

6. Мэ чхудём дрэ пхув, о Аполосо панякирдя, нэ Дэвэ́л дыя́ прибарипэн.

7. Палдава́, кон чхудя́ дрэ пхув, кон панякирдя, дава́ нисо́ на мол, а саро́ джа́ла Дэвлэ́стыр, Кон дыя́ прибарипэн.

8. Нэ кон чхудя́ дрэ пхув, и кон панякирдя-дава́ усае́кх, а кажно дорэсэ́ла (долэла) отдыибэ́н пир пэ́скири буты́.

9. Пал-дова́ со амэ кхэтанэ́ кэра́са буты́ ваш Дэвлэ́скэ, а тумэ́, сан Дэвлэ́скири фэ́лда, Дэвлэ́скиро Кхэр.

10. Мэ чхудём фунда́менто пир тала́но (дарованиё) бахталыпнастыр, саво́ Дэвэ́л дыя́ ма́нгэ сыр годьваро́ архитекторо, а яви́р ману́ш кэрэ́ла кхэр пэ дава́ фунда́менто. Нэ кажно дыкх, сыр ёв кэрэ́ла кхэр.

11. Палдава́ ние́кх ману́ш на могинэ́ла тэ чхувэ́л яви́р духовно фунда́менто апри́ч одолэ́стэ, саво́ исын Ису́со Христо́со ваш кхангири́ пир саро́ свэ́то.

12. А ко́ли вари-кон кэрэ́ла кхэр пэ дава́ фунда́менто сувнака́стыр, рупэ́стыр, дрогонэ́ барэндыр, каштэ́стыр, чарьятыр, пхусэстыр,

13. тэды кажно манушэскири буты́ сыкадёла дро Христосо́скиро дывэ́с, пал-дова́ со яг сыкавэ́ла саро́, и яг спробинэла кажно буты́, сави́ ёй исын.

14. Ко́ли вари-конэ́скири буты́, сави́ ёв кэрдя́ пэ дава́ фунда́менто, вытэрдёла, тэды адава́ ману́ш дорэсця́ отдыибэ́н.

15. А ко́ли вари-конэ́скири буты́ схачола, тэды адава́ ману́ш хасякирэ́ла пэ́скиро отдыибэ́н, нэ ёв зракхэ́лапэ сы́рбы одова́, кон прогия́ пир яг.

16. Тумэ́ джинэ́на, со тумэ́ сан Дэвлэ́скири Кхангири́, и со Дэвлэ́скиро Ду́хо (Фа́но) дживэ́ла дрэ тумэ́ндэ.

17. Ко́ли вари-кон хасякирэ́ла Дэвлэ́скирэ-кхангирья́киро скэдыибэ́н кэрибнаса, саво́ нанэ лачхо́ Дэвлэ́скэ, тэды одолэ́с хасякирэ́ла Дэвэ́л; пал-дова́ со Дэвлэ́скирэ-кхангирья́киро скэдыибэ́н исын свэ́нто и тумэ́ патяибнаскирэ, сан дасавэ́.

18. Мэк ние́кх тэ на хохавэ́л кокоро́ пэс; ко́ли вари-кон думинэ́ла пэ́скэ, со ёв исын годьваро́ машки́р тумэ́ндэ пир дава́ свэтоскиро годьварипэн, тэды мэк адава́ ману́ш тэ ячэ́л дылынэса, соб (кай) ёв могинэлас тэ явэ́л годьварэса.

19. Пал-дова́ со годьварипэн кадалэ́ свэтоскиро исын дылныпэ́н анги́л Дэвлэ́стэ; палдава́ исын чхиндло́: “Ёв ухтылэ́ла годьварэн дро лэ́нгири фротыма.”

20. И нэвэ́стыр: “Рай Дэвэ́л джинэ́ла саро́, со годьварэ́ думинэ́на, и со дрэ лэ́ндэ нанэ ни сави́ льго́та.”

21. Мэк нико́н тэ на шарэлпэ манушэ́нца; пал-дова́ со саро́-исын тумаро́.

22. Ци Па́вли, ци Аполосо, ци Кифа, ци дава́ свэ́то, ци джиибэ́н, ци мэрибэ́н, ци саро́, со амэ́ндэ исын какана́; ци саро́, со явэ́ла амэ́нца анги́л, саро́-исын тумаро́:

23. и тумэ́ сан Христосо́скирэ, а Христо́со исын Дэвлэ́скиро.

Romani Bible Baltic 2019

Maintained by the United Bible Societies for the Baltic Romani Mission