Beblia

1. О Элиуё (Элюё) дурэды́р ракирдя́ и пхэндя́:

2. “Ци думинэса ту, со дава́ исын чачипэ́н, сыр ту пхэндя́н: мэ сом чачунэдыр Дэвлэ́стыр!

3. Пал-дова́ со ту пхуцян Дэвлэ́стыр: “Саво́ лачхипэ́н явэ́ла ма́нгэ [ту́кэ-р.с.]? Сави́ буты́р льго́та явэ́ла ма́нгэ, ко́ли мэ и кэрдём грэ́хи анги́л дава́?”

4. Мэ отпхэнава ту́кэ и тырэ́ дрогонэ́ малэнгэ, кон исын ту́са.

5. Подыкх упрэ́ пэ болыбэ́н, и дыкх, и акэ, исын о́блоки (хмары), со исын упра́л ту́тыр.

6. Ко́ли ту кэрэ́са грэ́хи, со кэрэ́са ту Лэ́скэ? Ци, ко́ли ту бутэдырьякирэса пэ́скиро чорипэ́н, со ту кэрэ́са Лэ́скэ?

7. Ко́ли ту сан чачуно́, со дэ́са ту Лэ́скэ? Ци со Ёв дорэсэ́ла тырэ́ вастэ́стыр?

8. Тыро́ фуипэ́н кэрэ́ла дош адасавэ́ манушэ́скэ, сыр ту сан кокоро́, и тыро́ чачипэ́н исын дасаво-паць, сыр кажнонэ́ явирэ манушэ́стэ.

9. Э мануша́ годлэна, ко́ли лэн бут притасавэ́на, ёнэ годлэна, соб (кай) лэ́нгэ тэ подэн васт зоралыпнаскирэ мануша́.

10. Нэ ние́кх на пхэнэ́ла: “Кай исын Дэвэ́л, миро Создыибнаскиро, Кон дэ́ла гилы́ сыр наде́я раты́?

11. Кон сыклякирэ́ла амэн бутэды́р мурдалэ́ндыр, и кон кэрэ́ла амэн годэдыр чириклендыр пэ болыбэ́н?

12. Ёнэ годлэна роибнаса, нэ Дэвэ́л на отпхэнэ́ла лэ́нгэ пир-дова́, со ёнэ исын бибахталэ́ и пхутькирдэ́.

13. Нэ Сарэзорья́киро Дэвэ́л на шунэ́ла чхучо́ (пусто) ракирибэ́н, и на дэ́ла вага лэ́нгэ.

14. Мэк ту, Ио́во, пхэндя́н, со ту на дыкхэ́са Лэс, нэ тыро́ чачипэ́н исын анги́л Лэ́стэ и ту́кэ трэй тэ ужакирэс Лэс.

15. И акана́, пал-дова́ со Ёв на сэндиндя пхарэ́с тут дрэ пэ́скири холы́, и со Ёв сы́рбы на дыкхця́ пэ тыро́ дылныпэ́н;

16. палдава́ ту, Ио́во, отпхандэса пэ́скиро муй ивья́ (напра́снэс), и ту бутэдырьякирэса пэ́скирэ нагодэ лава́.”

1. И нэвэ́стыр лыя́ тэ пхэнэ́л лав Элиуё (Элюё) и пхэндя́:

2. “Вырикир (потерпин) ман на́бут и пошун, и мэ сыкава́ва ту́кэ, со ма́ндэ ишчо (инкэ́) исын лава́ Дэвлэ́скирэ рига́тыр.

3. Мэ сы́рбы яна́ва миро джиныбэ́н дурипнастыр, и мэ досыкавава чачипэ́н пал мирэ́ Создыибнаскирэстэ.

4. Пал-дова́ со, чачипна́са, мирэ́ лава́ исын на хоханэ́; и анги́л ту́тэ исын мурш, кон исын бидошэ́нгиро дро джиныбэ́н.

5. Акэ, Дэвэ́л исын зоралыпнаскиро, нэ Ёв на дыкхэ́ла бипатывакирэс ни пэ конэ́стэ. Ёв исын древа́н зоралыпнаскиро, и Ёв исын древа́н барэ́-годя́киро.

6. Ёв на ракхэ́ла бибахталэ́-манушэ́нгиро джиибэ́н, нэ Ёв кэрэ́ла пир чачипэ́н кодолэнца, конэ́с притасавэ́на.

7. Ёв на рискирэ́ла криг Пэ́скирэ якха́ чачунэ́ манушэ́ндыр, нэ ёнэ исын пэ троно кральенца, пал-дова́ со Ёв бэшлякирэла лэн пэ ўса́ды (сак), и лэ́нгэ дэ́на бари чол (тими́н).

8. И ко́ли ёнэ исын пхандлэ дрэ састыра́, и лэн рикирэ́на и притасавэ́на сы́рбы шэлэнца;

9. то тэды Дэвэ́л сыкавэ́ла лэ́нгири биба́хт, и лэ́нгиро чорипэ́н, пал-дова́ со ёнэ кэрдэ́ лэн бут;

10. тэ́ньчи Ёв отпхандэла лэ́нгиро кан тэ сыклякирэ́л лэн, и Ёв припхэнэла лэ́нгэ, соб (кай) ёнэ тэ рисён чорипна́стыр.

11. Ко́ли ёнэ пришунэнапэ и явэ́на тэ дынаринэ́н Лэ́скэ, лэ́нгиро джиибэ́н явэ́ла дро миштыпэ́н, и лэ́нгирэ бэрша́ проджа́на дрэ ра́дыма (лош).

12. Нэ ко́ли ёнэ на явэ́на тэ кандэ́н, тэды ёнэ хасёна куртала́тыр, и ёнэ мэрэ́на дро наджиныбэн.

13. Нэ фуе́-муенгирэ мануша́ скэдэ́на холы́ дро ило́; ёнэ годлэна ясвэ́нца, ке́ли Дэвэ́л пхандэла лэн дрэ састыра́.

14. Ёнэ мэрэ́на тэрнэ́, и лэ́нгиро джиибэ́н кончынэлапэ машки́р надэвлытконэ манушэ́ндэ.

15. Дэвэ́л вытэрдэла чорорэ́ манушэ́с мэнькэндыр, и Ёв отпхандэла якха́ лэ́нгэ, ке́ли лэн притасавэ́на.

16. Ёв адя́кэ-паць вытырдэлас и тут даракунэ бибахтятыр, пэ буґло́ штэ́то, кай явэ́ла во́льно; и дова́, со исын чхудо пэ сками́нд, явэ́ла пхэрдо́ тхулэ хабнаса.

17. Нэ акана́ пхэрдо́ сэ́ндо пыя́ пэ ту́тэ, со исын ваш фуе́ манушэ́нгэ, Ио́во, – сэ́ндо и чачипэ́н рикирэ́на тут.

18. Мэк Дэвлэ́скири холы́ тэ на марэл тут тэлэ́ екхэ пэкаибнаса; пал-дова́ со баро́ мыто на зракхэ́ла тут.

19. Ци дэ́ла паты́в Дэвэ́л тырэ́ барвалыпнаскэ? Над, – ни сувнакаскэ, ни савэ́ кучипнаскэ.

20. На кам зоралэ́с доя́ рат, сыр мануша́, хасёна пэ пэ́скирэ штэ́ты.

21. Рикирпэ на рисёв кэ чорипэ́н, пал-дова́ со ж ту ґарэдыр выкэдыян чорипэ́н пэ́скэ сыр тэ страдынэс.

22. Акэ, Дэвэ́л исын древа́н баро́ пир Пэ́скири зор! Кон сыклякирэ́ла амэн сыр Ёв?

23. Кон дыя́ лэ́скэ рэ́ндо адя́кэ тэ кэрэ́л? Ци кон пхэндя́: “Ту кэрдя́н намиштэс?

24. Ри́пир тэ барьякирэс Лэ́скири буты́, пал сави́ мануша́ багана.

25. Кажно ману́ш дыкхця́ дава́, нэ ману́ш сашты́ тэ дыкхэ́л пэ Лэ́скири буты́ дурипнастыр.

26. Акэ, Дэвэ́л исын древа́н баро́, и амэ нашты́ тэ ґалёвас хор Лэс, адя́кэ-паць нашты́ тэ пхэнэ́с Лэ́скирэ бэрша́.

27. Гада, Ёв скэдэ́ла капли (чолыня) пане́са, савэ́ пирикэрэнапэ дро брышы́нд миглатыр;

28. савэ́ о́блоки мэкэ́на тэлэ́ и чхувэ́на древа́н бут пэ кажнонэ́ манушэ́стэ.

29. Чачо́, ци могинэ́ла вари-кон тэ ґалёл, сыр Дэвэ́л роздиндькирэла болыбэна, ци сыр лэ́лапэ блискавица Лэ́скирэ гарадэ́ шатратыр?

30. Дыкх, Ио́во, сыр Ёв розчхурдэла Пэ́скиро дуд пэ ла́тэ, и Ёв учхакирэ́ла морёскиро (дэрьявэ́скиро) дугно (дно).

31. Одотхы́р Ёв сэндякирэ́ла манушы́тка на́цыи; Ёв дэ́ла хабэ́н древа́н бут.

32. Ёв гаравэла блискавица дрэ Пэ́скирэ васта́, и Ёв припхэнэла ла́кэ, кай тэ пэкавэн.

33. Нэ громо подэла зан, со явала блискавица, адя́кэ-паць и кхэритконэ́ мурдалэнгиро (скотоскиро) ило́ шунэ́ла; сыр ёй явэ́ла.

1. Рай Дэвэ́л кралинэла: мэк тэ издран манушы́тка на́цыи. Ёв исын бэшто́ пэ Пэ́скиро троно машки́р Херувимэндэ: мэк тэ кунинэлпэ пхув.

2. Рай Дэвэ́л исын баро́ пэ Сио́но и Ёв исын вучэды́р сарэ́ манушытконэ́ нацые́ндыр.

3. Мэк тэ славинэ́н ёнэ лэ́скиро лав, со Ёв исын древа́н славу́тно кэ дар – Ёв исын Свэ́нто!

4. Ту сан зоралыпнаскиро Кра́ли, Савэ́скэ трэй чачуно́ сэ́ндо. Ту зачхудян чачипэ́н: дава́ исын Ту, Саво́ кэрэ́ла пир чачипэ́н и патяибэ́н дрэ Яковостэ.

5. Барьякирэ́н кэ вучипэ́н Рас-Дэвлэ́с, амарэ́ Дэвлэ́с и дэн паты́в Лэ́скэ анги́л Лэ́скирэ ґэра́. Ёв исын Свэ́нто.

6. Мо́йза и Ароно сыс машки́р Лэ́скирэ рашандэ и Самуи́ло сыс машки́р одолэ́ндэ, савэ́ приракхэнас лэ́скиро лав: ёнэ кхарэнас Рас-Дэвлэ́с, и Ёв отпхэнэ́лас лэ́нгэ.

7. Ёв ракирдя́ лэ́нгэ дро сты́лбо облокэндыр: ёнэ рикирэнаспэ кэ Лэ́скиро допхэныбэ́н и кэ стату́то, со Ёв дыя́ лэ́нгэ.

8. О, Раё Дэ́вла, амаро́ Дэвэ́л, Ту отпхэндян лэ́нгэ: Ту са́нас ваш лэ́нгэ Дэвэ́л, Саво́ примангэла лэ́нгэ, нэ Саво́ чхувэ́ла ка́ра пал фуипэ́н, со ёнэ кэрдэ́.

9. Славинэ́н зоралэ́с Рас-Дэвлэ́с, амарэ́ Дэвлэ́с и дэн паты́в Лэ́скэ пашы́л Лэ́скири Свэ́нто бэ́ргица, пал-дова́ со Рай Дэвэ́л исын амаро́ Свэ́нто Дэвэ́л.

22. Шун пэ́скирэ дадэ́с, конэ́стыр ту латхянпэ, и на дыкх вучипна́стыр пэ пэ́скирэ датэ, ке́ли ёй явэ́ла пхури.

23. Кин (дорэс) патяибэ́н, и на отдэ́ лэс никонэ́скэ; адя́кэ-паць годыпэ́н, сыклякирибэ́н и ґалыибэ́н.

24. Чачунэ́-манушэ́скиро дад явэ́ла древа́н тэ радынэ́лпэ, адя́кэ-паць и кодова́, конэ́стэ годо́ чхаво́ латхяпэ, явэ́ла тэ бахталёл лэ́стыр:

25. мэк тэ явэ́н ра́да тыро́ дад и дай, и мэк кодоя, сави́ бияндя́ тут, зоралэ́с тэ радынэ́лпэ.

1. Тэды мэк мануша́ тэ ґалён амэн сыр Христосо́скирэ дынарье́н и кхэритконэ́ барыдырэ́н пир Дэвлэ́скирэ чораханэ чачипэна́.

2. Екх со трэй ваш кхэритконэ́ барыдырэ́скэ, соб (кай) ёв тэ явэ́л патяибны́тко пир саро́.

3. А ваш ма́нгэ дава́ исын набаро́ рэ́ндо, сыр тумэ́ дэ́на чол (тими́н) ма́нгэ, ци манушы́тко сэ́ндо дэ́ла. Нэ мэ адя́кэ-паць на дава́ чол пэ́скэ.

4. Пал-дова́ со ни саво́ чорипэ́н нанэ пал ма́ндэ; нэ дава́ на допхэнэ́ла, со мэ на сом банго́: дава́ Рай Дэвэ́л, Саво́ дэ́ла чол ма́нгэ.

5. Тэды на сэндякирэн анги́л дова́, сыр Рай Дэвэ́л явэ́ла, Саво́ дудвалякирэла (обсвэнцынэла) и калэ́ (цёмна) чораханыбэна и откэрэла пэ якха́ адя́кэ-паць ґарадэ́ мысли дро манушы́тко ило́; и тэды сва́ко (кажно) ману́ш дорэсэ́ла (долэла) шарибэ́н Дэвлэ́стыр.

6. Ѓа́да, дава́ саро́, отлыджалапэ кэ мэ и кэ Аполосо ваш тумаро́ миштыпэ́н, соб (кай) тумэ́ тэ сыклён амэ́ндыр тэ на думинэн вучыдыр кодолэстыр, со исын чхиндло́, и тэ на пхутён екх анги́л екхэ́стэ.

7. Палдава́, кон жа выкэдэ́ла тут явирэндыр? И со исын ту́тэ, со на сыс дыно́ ту́кэ? Тэды со́скэ ту шарэсапэ, сы́рбы ту на дорэсцян (на долыян) дава́ сыр тала́но?

8. Тумэ́ ужэ чалынэ, тумэ́ акана́ ячнэ́ барвалэ́, тумэ́ ужэ ячнэ́ кральенца би амаро́; и мэ кама́м, соб (кай) тумэ́ чачунэ́с тэ кралинэн, и амэ́нгэ адя́кэ-паць тэ кралинав тумэ́нца.

9. Палдава́ мэ думинава, со Дэвэ́л чхудя́ амэн тэ явас Апостолэнца пэ са́мо ко́нцо (яго́ро) палатунэндыр, савэ́н Ёв выкэдыя́ тэ мэрас, сыр и Христо́со мыя́. Палдава́ амэ яця́м сы́рбы ладжакирдо́ сыкаибэ́н (приме́ро) пэ свэто́скирэ якха́ и Янголэнгэ, адя́кэ-паць и манушэ́нгэ.

10. Амэ сам дылынэ́ пал Христосо́стэ, а тумэ́ сан годьварэ́ дро екхипэ́н Христосо́са; амэ сам бизорья́кирэ, а тумэ́ сан зоралэ́; тумэн славинэна, а амэ сам дрэ ладж.

11. Кэ дава́-паць мардо́ (шту́нда) мэ ишчо (инкэ́) сам бокхалэ́ и амэ́ндэ исын смэга (труш) и амэ сам дрэ патавэ и домардэ́, и амэ псираса сыр бикхэри́тка,

12. нэ амэ кэра́са буты́ пхарэ́с пэ́скирэ вастэ́нца. Амэн кошэна, а амэ бахтякираса; амэн традэ́на, а амэ пирилыджаса;

13. амэн кошэна, а амэ отпхэнаса лачхэ́ лавэ́нца, амэ сам сыр далэ́-свэтоскиро гнэё (мэста), амэ яця́м сыр бла́та далэ́ пхувья́кири кэ/жы́ко какана́.

14. Мэ на чхина́ва дава́, соб (кай) тэ ладжакирав тумэн, а соб (кай) тэ дав годы́ тумэ́нгэ, сыр мирэ́ дрогонэ́ пшалэ́нгэ.

15. Палдава́, ко́ли тумэ́ндэ исын дэш тысёнцы сыклярьен (наставникэн) пир патяибэ́н дрэ Христосо́стэ, нэ усае́кх тумэ́ндэ исын екх дад; пал-дова́ со мэ яцём сы́рбы дад ваш тумэ́нгэ пир бахтало́ лав, со мэ яндём.

16. Палдава́ мэ манга́ва тумэн, тэ кэрэ́н адя́кэ, сыр мэ кэра́ва.

17. Пал-дова́ мэ бичхадём кэ тумэ́ Тимофеёс (Химас), мирэ́ дрогонэ́ и патяибнытконэ сы́рбы чхавэ́с пир патяибэ́н дрэ Растэ-Дэвлэ́стэ, саво́ долыджала кэ тумари́ годы́ миро джиибэ́н дро екхипэ́н Христосо́са, адя́кэ сыр мэ и сыклякирава дрэ кхангирья.

18. И пал-дова́ со мэ какана́ на джа́ва кэ тумэ́, то вари-савэ́ тумэ́ндыр пхутинэ.

19. Нэ мэ сыг ява́ва кэ тумэ́, ко́ли Рай Дэвэ́л дэ́ла, и мэ уджинава ваш пэ́скэ на дова́, со адалэ́ пхутькирдэ́ мануша́ ракирэ́на, а Духоскири зор, сави́ исын лэ́ндэ.

20. Пал-дова́ со Дэвлэ́скиро Кралипэ́н рикирэ́лапэ на лавэ́нца, а Духо́скирэ зорья́са.

21. Со ж тэды тумэ́ камэ́на? Ци ма́нгэ тэ явав кэ тумэ́ дэстэса ци ласкаса и тихонэ Духо́са?

Romani Bible Baltic 2019

United Bible Societies for the Baltic Romani Mission