Bible in one year
August 24

1. Ци джинэ́са ту часо (цы́ро) ке́ли буса бэргитка бузня (козы) лотькирэна тыкнэн? Ци дэ́са ра́да ту тэ дыкхэ́с, ке́ли мирги (лани) лотькирэна?
2. Ци могинэ́са ту тэ погинэс, кицы́ чхона́ ёнэ исын пхарэ́ тыкнэнца? Ци джинэ́са ту часо, ке́ли мирги дая́ лотькирэна лэн?
3. Ёнэ выбандёна, ке́ли ёнэ лотькирэна: ёнэ чхурдэна яври́ пэ́скирэ дукха́ пэ́скирэ пала́л-явибнаскирэнца (патомкэнца).
4. Лэ́нгирэ тэрнэ́ исын зоралэ́, ёнэ барьёна пэ гив, ёнэ уджана, и ёнэ на рисёна кэ ёнэ.
5. Кон вымэкця пэ во́ля бусонэ (диконэ) осло́с? Кон роспхандя пенты онагэроскэ?
6. Кон лэ́скэ кэрдя́ кхэр чхучэ́ пхувья́тыр, и джиибнытко штэ́то лондэ штэтэ́ндыр?
7. Адава́ мурда́л дыкхэ́ла вучипна́стыр пэ форо́скири го́дла, ёв на шунэ́ла, со пэ лэ́стэ дэ́ла го́дла потрадыпнаскиро.
8. Ёв чарадёла пэ сама вучипэна́ пэ бэ́рги, ёв родэ́ла кажно зэлэныбэн.
9. Ци закамэ́ла лэскаро гурув тэ дынаринэ́л ту́кэ? Ци явэ́ла ёв тэ ратькирэл пашы́л тыри́ ясла?
10. Ци дэ́са ра́да ту шэлэнца тэ припхандэс бусонэ гурувэ́с кэ ле́сьни (борозны)? Ци явэ́ла ёв тэ пхаравэл пхув пал ту́тэ?
11. Ци явэ́са ту тэ допатяс лэ́скэ, пал-дова́ со лэ́стэ исын бари зор? Ци мэкэса ту пэ лэ́стэ пэ́скири буты́?
12. Ци допатяса ту лэ́скэ, соб (кай) ёв тэ янэл кхэрэ́ тыро́ гив? И, соб (кай) ёв тэ скэдэл гив дрэ тыри́ шу́рна (гумно)?
13. Страусица марэла пэ́скирэ пхакэнца радыма́тыр, нэ ла́тэ нанэ адасавэ́ пхака́ и шука́р пора сыр павлиностэ,
14. ёй ячкирэ́ла пэ́скирэ парнорэ пэ пхув, и ёй татькирэла лэн пэ пхув.
15. Ёй бистрэла, со ґэро́й могинэ́ла тэ тасавэл лэн, ці, со фэлдытко мурда́л (зве́рё) могинэ́ла тэ пхагирэл лэн.
16. Страусица пхарьякирэла пэ́скиро ило́ кэ ла́кирэ тыкнэ́, сы́рбы ёнэ исын на ла́кирэ, ёй на дарэ́ла, со ла́кирэ пхарэ́ бутя́ исын ивья́.
17. Пал-дова́ со дава́ Мэ, Дэвэ́л, лыём криг годыпэ́н ла́тыр, и мэ на дыём годы́ ла́кэ.
18. Ке́ли ёй ґаздэ́лапэ вучэ́с, ёй дыкхэ́ла вучипна́са пэ грэстэ, и пэ манушэ́стэ, кон исын уклисто пэ грэстэ.
19. Ци дава́ ту, Ио́во, дыя́н зор грэскэ и уридян грива пэ лэ́скири Мэн?
20. Ци могинэ́са ту тэ затрашавэс грэс сыр скочкос? Ёв адя́кэ даранэс фырскинэла, со ґаздэ́ла траш.
21. Ёв ґанавэла копытэнца пхув и древа́н радынэ́лапэ пэ́скирэ зорья́тыр; ёв прастала ґалопоса одори́к, кай мануша́ зджанапэ мардытконэнца (оружыёса).
22. Ёв сы́рбы салапэ, и на джинэ́ла дар; ёв на ґалёла траш, ёв на рисёла палэ куртала́тыр;
23. колчано брязгинэла сцял лэ́стэ, марибны́тко буст и чхурье – чхурдыпнытко (дротико) зяинэна анги́л.
24. Ёв накхавэла пхув сы́гэс и холя́са, и ёв на могинэ́ла тэ тэрдёл пэ штэ́то, ке́ли ёв шунэ́ла ро́го (труба).
25. Сыр ро́го забашавэла, грай дэ́ла зан “Ага”; ёв сунгавэла марибэ́н дурипнастыр, сыр раё дэ́на го́дла зоралэ́ заненца (заненца).
26. Ци тырэ́ годыпнастыр кагненгиро (ястребо) вурняла, и роздиндькирэла пэ́скирэ пхака́ кэ паш-дывэсы́тко риг?
27. Ци тырэ́ лавэ́стыр ґаздэ́лапэ маму́й упрэ́ (о́рло) ки́до и кэрэ́ла пэ́скири ґнязда пэ вучипэ́н?
28. Ёв дживэ́ла пэ скалы и ёв ратькирэла пэ скалэнгирэ востримэ, штэ́ты, со на доджаса,
29. одотхы́р ёв выродэла со тэ рискирэ́л дандэнца; ёв чхувэ́ла пэ́скирэ якха́ пэ вари-со дурипнастыр;
30. и лэ́скирэ тыкнорэ пьена рат; – кай исын мулыпэн, одо́й исын лэ́скирэ тыкнорэ.”
1. [6] Тэ́ньци отпхэндя́ Рай Дэвэ́л Иовоскэ рискирибна́скирэ балвалятыр (вихростыр) и пхэндя́:
2. [7] “Подпхандэпэ и яв скэдыно́ сыр мурш; Мэ ява́ва тэ пхучав ту́тыр, а ту явэ́са тэ отпхэнэс ма́нгэ:
3. [8] Ци пхагирэса ту, чачэс, Миро чачипэ́н? Ци явэ́са ту зоралэ́с тэ обсэндинэс Ман, соб (кай) ту тэ явэс чачакирдо?
4. [9] Ци сан ту зорало́ адя́кэ, сыр Мэ сом? Ци исын ту́тэ дасави́ зан сыр громостыр?
5. [10] Тэ́ньци гожакир пэс барипнаса и кучипнаса, урипэ дро райканыпэн и шук.
6. [11] Вычхув сари́ пэ́скири холы́, подыкх пэ кажнонэ́стэ, кон исын пхутькирдо и тэлякир лэс;
7. [12] Подыкх пэ сваконэстэ, кон пхуцёла, чхув тэлэ́ лэс; штакур тэлэ́ фуе́ манушэ́н пэ лэ́нгирэ штэ́ты.
8. [13] Гарав лэн кхэтанэ́ дро пра́хо, и чхакир лэ́нгирэ муя́ чораханэ́с,
9. [14] тэды Мэ адя́кэ-паць приджинава тут, со тыро́ чачо́ васт могинэ́ла тэ ракхэ́л тут.
10. [15] Дыкх акана́ пэ бегемотостэ, савэ́с Мэ создыём сыр и тут: ёв ха́ла чар сыр гурув.
11. [16] Ѓа́да, дыкх, саво́ зоралыпэ́н исын дрэ лэ́скирэ ґэрьякирэ стаця, и сави́ зор исын дрэ лэ́скирэ-пэрэскирэ маса́.
12. [17] Ёв бандькирэла порьяса сыр кедроса, а жылы пэ лэ́скиро пэр зоралэ́с кходэ.
13. [18] Лэ́скирэ кокалы́ исын сы́рбы бронзытка трубы, а лэ́скирэ пашварэ исын сы́рбы састырины (жэлезины).
14. [19] Ёв исын най зоралэды́р, конэ́с Дэвэ́л создыя́: екх Ёв, Саво́ создыя́ лэс, дэ́ла ра́да тэ янэл пашэдыр Пэ́скири курта́ла кэ ёв.
15. [19] Бэ́рги, кай броинэна сарэ́ фэлды́тка мурдала́, дэ́на хабэ́н лэ́скэ.
16. [20] Ёв пасёла тэл лотоскирэ кашта́, кай гаравэна лэс тришчына (троснико) и дрич (болото).
17. [21] Лотоскирэ кашта́ учхакирэна лэс пэ́скирэ зэрьяса, лэс обчхувэна вербы паш рэкицы.
18. [22] Мэк рэка (лэнь) ґаздэ́лапэ пане́са, нэ ёв исын штыл: ёв исын зоралэ́с тэрдо́, мэк кокоро́ Иорда́но (Ёрдано) тэ чхувэлпэ дро лэ́скиро муй.
19. [23] Кон дэ́ла ра́да тэ лэл лэс анги́л лэ́скирэ якха́? Ци кон пусавэла лэ́скэ дро накх фэлякирэ спицаса?
20. [24] Ци вытэрдэса ту Левиафанос нанглэса, и ци притасавэса ту лэ́скири чиб шэлэса?
21. [41.1-ю.о.] Ци дэ́са ра́да ту тэ вчхувэс шэло тришчынатыр дрэ лэ́скирэ рутхуня (ноздри)?
22. [2] Ци явэ́ла дава́ Левиафано бут тэ мангэ́л тут, соб (кай) ту тэ потангинэс Лэс? Ци явэ́ла ёв тэ ракирэ́л ковлэс ту́са?
23. [3] Ци явэ́ла ёв тэ кэрэ́л штама (доракирибэ́н) ту́са? Ци лэ́са ту лэс сыр писхари́с пэ усады (сак)?
24. [4] Ци явэ́са ту тэ броинэс лэ́са сыр чирикляса? Ци дэ́са ра́да ту тэ пхандэс лэс ваш пэ́скирэ-штубакирэ раклорьенгэ?
1. Давидо́скиро Пса́лмо. Мэ ява́ва тэ бага́в пал лачхэ́-илы́ткима и чачуно́ сэ́ндо: Ту́кэ, Раё Дэ́вла, мэ ява́ва тэ бага́в псалмы.
2. Мэ ява́ва тэ рикиравпэ годьварэс кэ бидошакиро джиибэ́н. Ке́ли Ту явэ́са кэ мэ? Мэ ява́ва тэ джива́в дро миро кхэр чачунэ́ илэ́са.
3. Мэ на домэкава, соб (кай) мирэ́ якха́ тэ дыкхэ́н пэ фуипэ́н, со кэрэ́на мануша́; ма́нгэ исын на́ пир ило́ одолэ́ рэ́нды, со кэрэ́на мануша́, ке́ли рисёна криг Дэвлэ́стыр, и ёнэ на приячэна кэ мэ.
4. Розмэкно ило́ явэ́ла тэ дурьёл ма́ндыр, мэ на кама́м тэ джина́в чорэ́ манушэ́с.
29. Конэ́стэ исын роибэ́н? Конэ́стэ исын дукх? Конэ́стэ исын кошыбэ́н? Кон исын би́да, и кон жалинэлапэ? Конэ́стэ исын даба (калэ́ маса́) ни палсо́? Конэ́стэ исын лолыпэн дрэ якха́?
30. Дава́ исын кодолэ́ндэ, савэ́ кэ коригуно́ (позно) уля́го (пора) исын бэштэ́ пашы́л мол и кодолэндэ, савэ́ джа́на тэ родэ́н змешындлы мол (вино).
1. Сыр дава́ нанэ ладжаво, ко́ли вари-кон тумэ́ндыр, ке́ли лэ́стэ исын холы́ пэ явирэ́стэ, тэды тэ джал пэ сэ́ндо анги́л напатяибнаскирэ манушэ́ндэ (Наюдэ́ндэ), заме́ст дова́, соб (кай) тэ джал кэ свэ́нта?
2. Ци тумэ́ на джинэ́на, со свэ́нта явэ́на тэ сэндинэ́н саро́ свэ́то? Ко́ли тумэ́нгэ тэ сэндинэ́н свэ́то, тэды со ж тумэ́ на сан мол, соб (кай) тэ сэндинэ́н набарэ́ рэндорэ́ (де́лыцы)?
3. Ци тумэ́ на джинэ́на, со амэ́нгэ тэ сэндинас Янголэн? Тэды со тумэ́ на могинэ́на тэ роскэдэнпэ дрэ далэ́ джиибна́скирэ рэ́нды?
4. А ке́ли тумэ́ндэ исын далэ́ джиибна́скирэ рэндорэ́, тэды со́скэ тумэ́ чхувэ́на пэ́скирэ сэндарьенца дасавэ́ манушэ́н, савэ́н на кутякирэна мануша́ кхангирья́тыр.
5. Мэ пхэна́ва тэ ладжакирав тумэн. Ци нанэ ниекхэс годьварэ́ манушэ́с машки́р тумэ́ндэ, соб (кай) ёв могинэлас тэ роскэдэлпэ дро рэ́ндо машки́р тумэ́ндэ?
6. Дыкхэ́н: пшал сэндинэлапэ пшалэса, и дава́ исын анги́л напатяибнаскирэндэ!
7. И дава́ исын буты́р блатуно рэ́ндо ваш тумэ́нгэ, со тумэ́ сэндинэнапэ екх екхэ́са. Со́скэ тумэ́нгэ тэ на пирилыджас пхарипэ́н ни пал со? Тумэ́нгэ фэды́р тэ дэнпэ дукха́?
8. Нэ тумэ́ ж кокорэ́ кэрэ́на чорипэ́н и хохавэна явирэ́н, и кэ тумари́ ладж, хохавэна тумарэ́ пшалэ́н.
9. Ци тумэ́ на джинэ́на, со начачунэнгэ на явэ́ла паш дро Кралипэ́н дро Болыбна́скиро Раё? На хохавэнпэ: ни одолэ́, савэ́ кэрэ́на блэ́ндо, ни идолэ-мангипнаскирэ, ни одолэ́, савэ́ кэрэ́на марки, ни одолэ́ мурша́, савэ́ исын сы́рбы джувля́, ни одолэ́, савэ́ дживэ́на муршэнца сыр джувле́нца,
10. ни чора́, ни сквапныма́рья, ни матыма́рья, ни кошыбна́рья, ни праха́рья-лэ́нгэ на явэ́ла паш дро Кралипэ́н дро Болыбна́скиро Раё.
11. Вари-савэ́ тумэ́ндыр са́нас адасавэ́. Нэ тумэ́ сан обмордэ, освэнцындлэ, нэ тумэ́ сан приджиндлэ сыр чачунэ́ амарэ́ Ра́скирэ-Дэвлэ́скирэ лавэ́са, Исусо́скирэ Христососкирэса и амарэ́ Дэвлэ́скирэ Духо́са.
12. Ма́нгэ саро́ сашты́, нэ льго́та (польза) исын на сарэ́стыр; ма́нгэ саро́ сашты́, нэ нашты́, соб (кай) вари-со тэ лэл упралыпэ́н пэ ма́ндэ.
13. Хабэ́н исын ваш пэр, и пэр исын ваш хабэ́н, нэ Дэвэ́л хасякирэ́ла и екх, и яви́р: нэ маса́ исын дынэ́ на ваш биладжаипэ́н, а маса́ исын дынэ́ ваш Ра́скэ-Дэвлэ́скэ и Рай Дэвэ́л исын ваш маса́.
14. Дэвэ́л отджидякирдя́ Рас-Дэвлэ́с, и Ёв адя́кэ-паць отджидякирэла амэн Пэ́скирэ зорья́са.
15. Ци тумэ́ на джинэ́на, со тумарэ́ маса́ исын сы́рбы паша́ Исусо́скирэ масэ́ндыр? Со ж, тэды, мэ отлава паш Христосостыр, соб (кай) тэ кэра́в далэ́ пашатыр паша́ биладжакунэ́ джувля́кэ? Тэ на явэ́л адя́кэ.
16. Ци тумэ́ на джинэ́на, со одова́, кон исын кхэтанэ́ биладжакунэ́ джувля́са, ячэ́лапэ ла́са сыр екх маса́? Палдава́ ж, исын пхэндло́: “Дуйджинэ́ явэ́на сыр екх лоч.”
17. Нэ одова́, кон исын кхэтанэ́ Дэвлэ́са, исын сы́рбы дро екх ду́хо (фа́но) Ра́са-Дэвлэ́са.
18. Нашэ́н биладжакунэ́ рэндэ́ндыр. Кажно ману́ш, кон кэрэ́ла яви́р грэ́хо, кэрэ́ла сы́рбы на ваш пэ́скэ, нэ одова́, кон дживэ́ла джувле́нца би сэвлакиро, кэрэ́ла грэ́хо пэ́скирэ масэнгэ.
19. Ци тумэ́ на джинэ́на, со тумарэ́ маса́ исын сы́рбы кхангири́ ваш Свэ́нто Ду́хо (Фа́но), Саво́ дживэ́ла дрэ тумэ́ндэ и исын Дэвлэ́стыр; и со ж тумэ́ на сан хулая́ пэ́скирэ масэнгэ?
20. Тумэ́ сан киндлэ пал бари тими́н (кимин); палдава́ славинэ́н тумэ́ Дэвлэ́с пэ́скирэ масэнца и Духо́са, савэ́ исын Дэвлэ́скирэ.
Romani Bible Baltic 2019
United Bible Societies for the Baltic Romani Mission