Bible in one year - Пэ Балтитко Романи чиб

Bible in one year August 26

1. Еклесиастоскирэ Давидо́скирэ–чхавэ́скирэ лава́, Ерусалимо́скирэ крали́скирэ, кон сыклякирдя́ пал Дэвлэ́стэ.

2. “Харныпэ́н (суе́та) харныпнастыр”, – ракирэ́ла Еклесиасто (Сыклякирибна́скиро) пал Дэвлэ́стэ-харныпэ́н харныпнастыр. Саро́ исын харныпэ́н.”

3. Саво́ ко́фо (льґота) исын манушэ́скэ сарэ́ лэ́скирэ пхарэ́ бутя́тыр, со ёв кэрэ́ла буты́ пхарэ́с тэл кхам.

4. Екх ро́до джа́ла пэ́скэ, и яви́р ро́до явэ́ла, нэ пхув ячэ́лапэ пэ сарэ́ ве́ки.

5. Кхам уштэ́ла, и кхам джа́ла тэлэ́, и сы́гэс рисёла кэ дова́ штэ́то, каты́р ёв уштыя́.

6. Балва́л пхурдэла кэ паш-дывэсы́тко (таты) риг, и ёй рисёла пэ паш-рати́тко (шылалы) риг: балва́л усады (сак) обрисёла трусця́л, и ёй рисёла палэ пэ пэ́скирэ круги.

7. Сарэ́ рэ́ки (лэня́) тхадэна дро мо́рё (дэрья́в), нэ мо́рё (дэрья́в) усае́кх нанэ пхэрдо́: кэ долэ́ штэ́ты, карик рэ́ки (лэня́) тхадэна, и одотхы́р рэкакирэ (лэнякирэ) паня́ рисёна, соб (кай) нэвэ́стыр тэ тхадэн.

8. Саро́, со исын дро свэ́то (лот), исын пхарэ́ бутя́тыр: ние́кх ману́ш нашты́ тэ выпхэнэл саро́. Якх исын на чалы дыкхибнастыр, и кан исын на пхэрдо́ шуныбнастыр.

9. Дова́, со сыс, явэ́ла нэвэ́стыр; и дова́, со кэрдя́пэ, явэ́ла нэвэ́стыр тэ кэрэ́лпэ: и нанэ нисо́ нэво́ тэл кхам.

10. Ци исын вари-со, пал со сашты́ тэ пхэнэ́с: “Дыкх, ци дава́ исын нэво́?” Дава́ сыс дрэ ґаратунэ́ бэрша́, со сыс анги́л амэ́ндэ.

11. Ние́кх ману́ш на рипирэла дова́, со сыс анги́л лэ́стэ, ние́кх, кон ишчо (инкэ́) явэ́ла, на явэ́ла тэ рипирэл пал дова́, со ишчо (инкэ́) явэ́ла анги́л.

12. Мэ, Еклесиасто, Дэвлэ́скиро сыклякирибна́скиро, со́мас кра́ли пэ Израилё дро Ерусалимо.

13. Мэ рискирдём пэ́скиро ило́ тэ родав, и тэ розґалёвав годыпнаса саро́, со кэрэ́лапэ тэл болыбэ́н: дасаво пхаро́ задыибэн Дэвэ́л дыя́ манушэ́нгирэ чхавэ́нгэ, соб (кай) ёнэ далэ́са тэ залэнпэ пхарэ́с.

14. Мэ дыкхцём сарэ́ бутя́, со кэрэ́напэ тэл кхам, и, акэ – саро́ исын ивья́ и традэлапэ балваляса.

15. Со исын банго́, нашты́ тэ явэ́л маму́й (прямэс); и дова́, со нанэ, нашты́ тэ гинэс.

16. Мэ пхэндём пэ́скирэ илэскэ: “Дыкх! Мэ яцём барэ́ манушэ́са и яцём годэдыр сарэ́ манушэ́ндыр, кон сыс анги́л ма́ндэ дро Ерусалимо. Ма́ндэ исын баро́ годыпэ́н и джиныбэ́н.”

17. И мэ рискирдём пэ́скиро ило́ тэ джина́в буты́р пал годыпэ́н; со исын бигодякирибэн и дылныпэ́н. Мэ ґалыём анги́л, со дава́ исын адя́кэ-паць, сы́рбы тэ традэспэ пал балва́л.

18. Пал-дова́ со, кай исын баро́ годыпэ́н, одо́й исын баро́ калыпэ́н пэ ило́ и кон прибарьякирэла джиныбэ́н, кодолэскиро ду́хо (фа́но) буты́р пэрэ́ла.

Ecclesiastes 2:1-26

1. Мэ пхэндём дро пэ́скиро ило́: “Яв! Мэ спробинава тут радымакирэ сабнаса, палдава́ яв лошало (весёло) пхэрдэ́с. Нэ, акэ, дава́ исын адя́кэ-паць харныпэ́н.

2. Мэ пхэндём пал сабэн: “Бигодякирибэн!” И пал ра́дыма сабнаса: “Со дава́ дэ́ла?”

3. Мэ розґалёвавас пэ́скирэ илэ́са, сыр тэ лошакирав (тэ усладинав) мирэ́ маса́ моляса (виноса), нэ, соб (кай) миро ило́ тэ ячэ́л годэдыр, и адя́кэ-паць тэ рикиравпэ кэ дылныпэ́н пэ ада́кицы, кицы́ трэй, соб (кай) тэ дыкха́в, саво́ лачхипэ́н исын ваш манушэ́нгирэ чхавэ́нгэ тэ кэрэ́н тэл болыбэ́н дрэ сарэ́ дывэса́ дро лэ́нгиро джиибэ́н.

4. Мэ кэрдём пэ́скэ барэ́ бутя́, мэ ґаздыём пэ́скэ кхэра́, и мэ зачхудём пэ́скэ винагра́днико (дракхин).

5. Мэ кэрдём пэ́скэ унты (сады) и парки, и мэ зачхудём сарэ́-сортэнгирэ фруктытка кашта́ (дрэвы).

6. Мэ кэрдём пэ́скэ сажалки (вэндэриня́), савэ́ндыр мэ почхувава пане́са рошча (вэлади́н), кай кашта́ (дрэвы) барьёна.

7. Мэ киндём пэ́скэ дынарье́н и дынарицэн, и сыс ма́ндэ дына́рья, кон бия́ндыя дро миро кхэр. Чачо́, ма́ндэ адя́кэ-паць исыс бут ґурты и бакрэ́нгирэ ста́ды; бутэды́р сарэ́ндыр, савэ́ сыс дро Ерусалимо анги́л ма́ндэ.

8. Мэ скэдыём адя́кэ-паць руп и сувнака́й, и древа́н выкэдынэ́ кучипэна (сокровишчы) кральендыр и пхувья́кирэ ригэ́ндыр. Ма́ндэ сыс багаибнаскирэ и багаибнаскирья-дова́, со древа́н радынэла манушэ́нгирэ чхавэ́н, и сарэ́ башаибнаскирэ струме́нты.

9. И мэ яцём баро́ и пирибариём сарэ́н, кон сыс анги́л ма́ндэ дро Ерусалимо. Саро́ миро годыпэ́н адя́кэ-паць яця́пэ ма́нца.

10. И саро́, соб (кай) мирэ́ якха́ зоралэ́с тэ притырдэнпэ, мэ на рикирдём дрэ риг пэ́стыр: мэ на дыёмпэ палэ мирэ́ илэ́са кажнонэ́ радыма́тыр, пал-дова́ со миро ило́ древа́н радындяпэ мирэ́ пхарэ́ бутя́тыр, и дава́ исын мири́ бажын сарэ́ мирэ́ пхарэ́ бутя́тыр.

11. Тэ́ньци мэ подыкхцём пэ сарэ́ бутя́, со мирэ́ васта́ кэрдэ́, и пэ сари́ пхари́ буты́, со мэ кэрдём пхарэ́с, и, чачо́, саро́ исын харныпэ́н и, сыр тэ традэспэ пал балва́л. На сыс ко́фо тэл кхам.

12. И мэ рискирдём годы́ кэ дава́-паць годыпэ́н, бигодякирибэн и дылныпэ́н: хачы, со ману́ш явэ́ла кра́ли, сашты́ тэ кэрэ́л пал крали́стэ, исын какана́? Ци екх дова́, со ужэ сыс кэрдо́?

13. И мэ дыкхцём, со годыпэ́н исын фэды́р дылныпнастыр, со дуд (свэ́то) исын фэды́р калыпна́стыр (цямлыпнастыр).

14. Годэ́ манушэ́стэ якха́ исын дро лэ́скиро шэро́, нэ дылынинько псирэ́ла дро цямлыпэ́н; нэ мэ адя́кэ-паць кокоро́ ґалыём хор, со екх ко́нцо (яго́ро) ужакирэ́ла и екхэ́с, и явирэ́с.

15. Мэ пхэндём дро пэ́скиро ило́: “Сыр дава́ кэрэ́лапэ дылыниньконэса, дава́ адя́кэ-паць явэ́ла тэ кэрэ́лпэ и ма́нца, и, со́скэ тэды мэ сом годо́?” Тэ́ньци мэ пхэндём дро пэ́скиро ило́, со саро́ дава́ адя́кэ-паць исын харныпэ́н.

16. Пал-дова́ со мануша́ на явэ́на тэ рипирэ́н годэс пэ сарэ́ ве́ки, сыр и дылыниньконэс; пал-дова́ со саро́ ужэ бистрэна дрэ бэрша́, со явэ́на. И сыр дава́ исын, со годо́ ману́ш мэрэ́ла адя́кэ-паць, сыр и дылынинько?

17. И мэ лыём зоралэ́с тэ на дав чол (тэ на цэнинав) джиибэ́н. Пал-дова́ со буты́, со сыс кэрды тэл кхам, пхарьякирдя миро ило́; пал-дова́ со саро́ исын харныпэ́н и сы́рбы тэ традэспэ пал балва́л.

18. И мэ лыём зоралэ́с тэ на дав чол сарэ́ мирэ́ пхарэ́ бутякэ, со мэ кэрдём пхарэ́с тэл кхам, пал-дова́ со мэ ж ячкирава манушэ́скэ, кон явэ́ла пал ма́ндэ.

19. И кон джинэ́ла, ци ёв явэ́ла годо́ ци дылынинько? Нэ ёв жа явэ́ла тэ хулаинэ́л пэ мири́ сари́ пхари́ буты́, со мэ кэрдём буты́ пхарэ́с, и дро со мэ сыкадём пэ́скиро годыпэ́н тэл кхам. Дава́ исын адя́кэ-паць харныпэ́н.

20. Тэ́ньци мэ рискирдём пэ́скиро ило́ и лыём тэ отпхэнавпэ сарэ́ пхарэ́ бутя́тыр, со мэ кэрдём буты́ пхарэ́с тэл кхам.

21. Исын ману́ш, кон кэрдя́ буты́ пхарэ́с годыпнаса, джиныбнаса и кэрдя́, и ёв ячкирэ́ла пэ́скиро миштыпэ́н манушэ́скэ, саво́ на кэрдя́ буты́ пхарэ́с пашы́л лэ́стэ. Дава́ исын адя́кэ-паць харныпэ́н и бари биба́хт.

22. Со ж манушэ́скэ явэ́ла сарэ́ лэ́скирэ пхарэ́ бутя́тыр и илэ́скирэ тугатыр, ке́ли ёв кэрдя́ буты́ пхарэ́с тэл кхам.

23. Пал-дова́ со сарэ́ лэ́скирэ дывэса́ исын дукханэ, и сарэ́ лэ́скирэ бутендыр исын ту́га пэ ило́, аж дро рат лэ́скиро ило́ на откхинёла. Дава́ исын адя́кэ-паць харныпэ́н.

24. Нанэ нисо́ фэды́р ваш манушэ́скэ, соб (кай) ёв тэ хал, и тэ пьел, и, соб (кай) лэ́скиро ило́ тэ радынэ́лпэ зоралэ́с лэ́скирэ бутя́тыр. Дава́ исын адя́кэ-паць, мэ ґалыём, Дэвлэ́скирэ вастэ́стыр.

25. Пал-дова́ со, кон сашты́ тэ хал, ци кон сашты́ тэ радынэ́лпэ буты́р би Лэ́скиро?

26. Дэвэ́л дэ́ла годыпэ́н, и джиныбэ́н, и ра́дыма одолэ́ манушэ́скэ, кон исын лачхо́ ваш Лэ́скэ; нэ Ёв дэ́ла буты́ и грэхитконэ́ манушэ́скэ, тэ скэдэл и тэ чхувэ́л кхэтанэ́, соб (кай) ёв могинэлас тэ отдэ́л кодолэ́скэ, саво́ исын лачхо́ ваш Дэвлэ́скэ. Дава́ исын адя́кэ-паць харныпэ́н и, сы́рбы тэ традэспэ пал балва́л.

Psalms 102:1-11

1. Притасадо Ману́ш мангэлапэ Дэвлэ́скэ, ке́ли лэ́скиро Ду́хо (Фа́но) пхадия и ёв выпхэнэла пэ́скиро Калыпэ́н пэ Ило́ анги́л Растэ-Дэвлэ́стэ.

2. О, Раё Дэ́вла, пошун мири́ па́тери (моли́тва), мэк миро ровибэн тэ доджал кэ Ту.

3. На гарадёв ма́ндыр, ке́ли ма́нгэ исын пхаро́; рисёв палэ и шун ракхунэс мирэ́ лава́. Дро дывэ́с, ке́ли мэ прикхарава Тут, сы́гэс вышу́н ман.

4. Пал-дова́ со мирэ́ дывэса́ проджа́на (накхэ́на) сыр тхув, и мирэ́ кокалы́ обхачинэ сыр ґлоўні.

5. Миро ило́ исын дукхадо и вышутия сыр чар, со мэ аж бистрава тэ хав миро маро́,

6. Мирэ́ кокалы́ припынэ кэ мири́ цы́па, пал-дова́, со мэ да́ва ґондя́.

7. Мэ сом сыр пеликано пэ чхучэ́ прахи, мэ яцём сыр сова пэ чхучо́ штэ́то

8. Мэ сом пашто́ джангадо, Мэ сом сы́рбы чириклы пэ кхэрэ́скири стрэ́ха (чхаки́н).

9. Мирэ́ вэ́рги обракирэна ман со дывэ́с, и кодолэ́, савэ́ санапэ холямэс ма́ндыр, прокошэна ман.

10. Мэ хаём пра́ска сыр маро́, и дова́, со мэ пиём, сыс пхэрдо́ мирэ́ ясвэ́нца.

11. Ту пэ́скирэ холя́тыр и барэ́ холынатыр, ґаздыян ман и чхурдыян дро хма́ро (туча),

Proverbs 24:1-2

1. На зэвлынэ (на ревнин) бибахталэ́ манушэ́нгэ, и на манг зоралэ́с тэ явэс лэ́нца;

2. пал-дова́ со лэ́нгиро ило́ придуминэла нахратыма (насилиё), и лэ́нгирэ ушта́ ракирэ́на, соб (кай) тэ кэрэ́н дош (фуипэ́н).

1 Korinťanenge 7:20-40

20. Мэк кажно ману́ш тэ ячэ́лпэ пэ пэ́скиро штэ́то машки́р манушэ́ндэ, савэ́стыр ёв сыс кхардо.

21. Ци са́нас ту кхардо писхариса, на ладжа зоралэ́с, а ко́ли тэ могинэ́са тэ ячэс вольнонэ манушэ́са, тэды кэр дава́.

22. Палдава́ писха́ри, савэ́с Рай Дэвэ́л кхардя́ кэ Пэ, исын во́льно ману́ш анги́л Растэ-Дэвлэ́стэ; адя́кэ-паць и во́льно ману́ш, савэ́с Рай Дэвэ́л кхардя́ кэ Пэ, исын Христосо́скиро писха́ри.

23. Тумэн киндлэ пал Христососкири тими́н; на явэ́н манушытконэ́ писхарье́нца.

24. Пшала́лэ, мэк кажно ману́ш, сыр ёв сыс кхардо кэ, адя́кэ тэ ячэ́лпэ анги́л Дэвлэ́стэ.

25. А со пал патывалэ́ чхаендэ, ма́ндэ нанэ ни саво́ припхэныбэ́н Дэвлэ́стыр; нэ дава́ мэ ракира́ва пир пэ́скири годы́ сыр ману́ш, савэ́скэ Дэвэ́л дыя́ паты́в пир Пэ́скиро тангипэ́н.

26. Мэ думинава, со пал дава́ пхаро́ джиибэ́н, со исын какана́, фэды́р ваш манушэ́скэ тэ ячэ́лпэ адя́кэ, сыр ёв исын.

27. Исын ту́тэ ромны́? На ро́дэ, соб (кай) тэ розджаспэ. Нанэ ту́тэ ромня́? На ро́дэ пэ́скэ ромня́.

28. А ко́ли ту лэсапэ, адя́кэ-паць на кэрэ́са грэ́хо, и ко́ли чхай выджа́ла палоро́м, ёй адя́кэ-паць на кэрэ́ла грэ́хо: нэ кадасавэндэ явэ́на мэ́ньки дро палоромитко джиибэ́н, палдава́ мэ анги́л приракхава тумэн.

29. Нэ мэ пхэна́ва, пшала́лэ, со часо нанэ бут. Пал явирэндэ ж; конэ́стэ исын ромны́, явэ́н сы́рбы тумэ́ сан биромненгирэ;

30. и одолэ́, кон ровэла, явэ́н сы́рбы тумэ́ на ровэна; и одолэ́, кон радынэ́лапэ, явэ́н сы́рбы на радынэ́напэ; и одолэ́, кон кинэла, явэ́н сы́рбы лэ́ндэ нанэ ничы́;

31. и одолэ́, кон лэ́ла вари-со далэ́ свэто́скирэ джиибнастыр, явэ́н сы́рбы ёнэ на залынэ пхэрдэ́с далэ́са; пал-дова́ со дава́ свэ́то, саво́ ёв исын какана́, джа́ла криг сы́гэс.

32. Мэ кама́м, соб (кай) тумэ́ тэ явэ́н вольна пиридживипнастыр. А наромандуно ману́ш пэкэлапэ (заботисола) пал дова́, со исын Ра́скиро-Дэвлэ́скиро, сыр тэ явэ́л лачхо́ Ра́скэ-Дэвлэ́скэ;

33. нэ одова́, кон исын романдуно, пэкэлапэ пал далэ́-свэто́скирэ джиибнытка рэ́нды, сыр тэ явэ́л лачхо́ пэ́скирэ ромнякэ.

34. Исын рознь машки́р палоромитконатэ и патывалэ́ чхатэ. Напалоромитко пэкэлапэ пал дова́, со исын Ра́скиро-Дэвлэ́скиро, соб (кай) тэ отдэлпэ Дэвлэ́скэ Духо́са и масэнца; а палоромитко пэкэлапэ пал далэ́-свэто́скирэ джиибнытка рэ́нды, сыр тэ явэ́л лачхо́ пэ́скирэ ромэскэ.

35. Нэ мэ пхэна́ва дава́ ваш тумаро́ миштыпэ́н, соб (кай) тэ на чхував фэлы́ (петля) анги́л тумэ́ндэ, соб (кай) тумэ́ тэ отдэ́н пэс бутякэ ваш Ра́скэ-Дэвлэ́скэ и тэ на уджан дрэ риг.

36. Нэ ко́ли вари-кон думинэ́ла, со ёв нашукар отлыджалапэ кэ пэ́скири патывалы́ чхай, ке́ли ёй исын дрэ бэрша́ и нанэ палоро́м; мэк ёв тэ кэрэ́л, сыр камэ́ла-дава́ нанэ грэ́хо, мэк ёв тэ отдэ́л ла палоро́м.

37. А одова́, кон исын твардо дро пэ́скиро ило́ и лэ́стэ нанэ трэ́бима, а пир пэ́скири во́ля ёв кэдыяпэ дро пэ́скиро ило́ тэ ракхэ́л пэ́скирэ чха, ёв шука́р кэрэ́ла.

38. Палдава́ одова́, кон отдэ́ла пэ́скирэ чха палоро́м, кэрэ́ла шука́р; а кон на отдэ́ла, одова́ кэрэ́ла фэдэды́р.

39. Ромны́ исын сыс спхандлы пэ́скирэ ромэса пэ ада́кицы, пака ла́киро ром исын джидо́; нэ ко́ли ёв мэрэ́ла, тэды ёй исын во́льно тэ джал палоро́м, пал конэ́стэ ёй камэ́ла, нэ фэ́ни пал патяибнаскирэстэ дрэ Растэ-Дэвлэ́стэ.

40. Нэ ёй исын бахталэдыр, ко́ли ёй адя́кэ ячэ́лапэ би ромэскиро пир мири́ годы́; нэ мэ думинава, со мэ радинава (мэ да́ва годы́) дава́ пир Дэвлэ́скиро Ду́хо (Фа́но), саво́ адя́кэ-паць исын дрэ ма́ндэ.

Romani Bible Baltic 2019

Maintained by the United Bible Societies for the Baltic Romani Mission