|
|
| 1. Ваш саро́, со кэрэ́лапэ дро дава́ свэ́то (лот), исын пэ́скиро уляго (пора), и исын часо (цы́ро) кажнонэ́ рэндоскэ тэл кхам; |
| 2. и часо тэ обкошэн дова́, со исын почхудо; часо тэ бияндён, и часо тэ мэрэ́н; тэ почхувэн дрэ пхув, |
| 3. часо тэ мулякирэ́н, и часо тэ састякирэн; часо тэ пхагирэн тэлэ́, и часо тэ ґаздэ́н кхэр; |
| 4. часо тэ тугинэн зоралэ́с, и часо тэ кхэлэн; часо тэ ровэ́н, и часо тэ санпэ; |
| 5. часо тэ облэн, и часо тэ обрикирэнпэ облыибнастыр; часо тэ чхурдэ́н криг бара́: и часо тэ укэдэн бара́; |
| 6. часо тэ родэ́н, и часо тэ нашавэн; часо тэ ракхэ́н, и часо тэ чхурдэ́н криг; |
| 7. часо тэ рискирэ́н, и часо тэ сывэн; часо тэ явэ́н штыл, и часо тэ ракирэ́н; |
| 8. часо ваш марибэ́н, и часо ваш рама́нё (миро); часо тэ сыкавэ́н паты́в, и часо зоралэ́с тэ бидыкхэн. |
| 9. Саво́ ко́фо исын бутярнэскэ далэ́стыр, пашы́л со ёв кэрдя́ буты́ пхарэ́с. |
| 10. Мэ дыкхцём намило пхари́ буты́, со Дэвэ́л дыя́ манушэ́нгирэ чхавэ́нгэ тэ кэрэ́н пхарэ́с. |
| 11. Ёв кэрдя́ саро́ шука́р дро пэ́скиро часо, адя́кэ-паць Ёв дыя́ джиныбэ́н пал свэ́то (лот) дрэ лэ́нгирэ илэ; нэ сароекх ману́ш нашты́ тэ ґалёл дова́ кэрибэн, со Дэвэ́л кэрэ́ла англыпна́стыр кэ ко́нцо (кэ яго́ро). |
| 12. Мэ джино́м, со нисо́ нанэ фэды́р ваш лэ́нгэ, сыр тэ радынэ́нпэ зоралэ́с тэ кэрэ́н лачхипэ́н дро лэ́нгиро джиибэ́н; |
| 13. и адя́кэ-паць, соб (кай) ману́ш тэ хал, и тэ пьел, и тэ радынэ́лпэ зоралэ́с лачхипнастыр сарэ́ лэ́скирэ бутя́тыр-дава́ исын тала́но Дэвлэ́стыр. |
| 14. Мэ джино́м со, соб (каи) Дэвэ́л тэ на кэрэ́л, дава́ явэ́ла пэ сарэ́ ве́ки. Нисо́ нашты́ тэ дочхувэс кэ дова́, и нисо́ нашты́ тэ отлэс далэ́стыр. Дэвэ́л джинэ́ла тэ кэрэ́л адя́кэ, соб (кай) амэ тэ дарас анги́л Лэ́стэ. |
| 15. Дава́, со исын, ужэ сыс ґарым-ґара́, и дова́, со явэ́ла, тэж ужэ сыс, и Дэвэ́л янэ́ла палэ дова́, со сыс. |
| 16. Адя́кэ-паць мэ дыкхцём тэл кхам: одо́й, кай сэндытко штэ́то, одо́й исыс фуипэ́н. И одо́й, кай штэ́то ваш чачипэ́н, одо́й сыс биба́хт. |
| 17. Мэ пхэндём дро миро ило́: “Дэвэ́л явэ́ла тэ сэндякирэ́л чачуно́ и фуе́ манушэ́н, пал-дова́ со одо́й явэ́ла часо ваш кажно выкэдыибэн и ваш кажно буты́.” |
| 18. Мэ пхэндём дро миро ило́: “Адя́кэ исын манушэ́нгирэ чхавэ́нца, со Дэвэ́л спробинэла лэн, соб (кай) ёнэ могинэ́нас тэ дыкхэ́н, со ёнэ исын сы́рбы мурдала́ (жывотна). |
| 19. Пал-дова́ со, со кэрэ́лапэ манушэ́нгирэ чхавэ́нца, адя́кэ-паць кэрэ́лапэ мурдалэ́нца: екх до́ля: сыр екх мэрэ́ла, адя́кэ-паць яви́р мулёла. |
| 20. Сарэ́ джа́на дро екх штэ́то: сарэ́ исын прахостыр, и сарэ́ рисёна дро пра́хо. |
| 21. Кон джинэ́ла, ци манушэ́нгирэ-чхавэ́нгиро ду́хо (фа́но) джа́ла упрэ́? И ци мурдалэнгиро ду́хо (фа́но), ци ёв джа́ла дрэ пхув? |
| 22. И мэ дыкхцём, со нисо́ нанэ фэды́р, сыр манушэ́скэ тэ радынэ́лпэ зоралэ́с лэ́скиро бутендыр, пал-дова́ со дава́ исын лэ́скири до́ля, нэ кон янэ́ла лэс тэ дыкхэ́л, со явэ́ла пал лэ́стэ? |
|
|
| 12. Мирэ́ дывэса́ проджа́на (накхэна) сы́рбы зэр (тенё), сави́ хасёла, Мэ вышутиём сы́рбы чар. |
| 13. Нэ Ту, Раё Дэ́вла, явэ́са ве́чнэс, и сарэ́ ро́ды рипирэна Тыро́ лав. |
| 14. Ту уштэса и сыкавэса лачхэ́-илы́ткима пэ Сио́но; пал-дова́ со явдя́ часо тэ явэс тангипнаскиро кэ ёв, пал-дова́ со упхэндло́ часо явдя́. |
| 15. Тырэ́ писхарье́нгэ ячэ́на дро́га Тырэ́ бара́, и ёнэ жалинэна пра́ска, со яця́пэ форо́стыр. |
| 16. И машки́р Наюды́тка на́цыи явэ́ла трашаибэ́н анги́л Растэ-Дэвлэ́стэ, и сарэ́ кра́лья пэ пхув явэ́на тэ дарэ́н Лэ́скирэ славатыр. |
| 17. Ке́ли Рай Дэвэ́л ґаздэ́ла Сио́но, тэды Ёв сыкавэ́ла Пэ́скири сла́ва. |
|
|
| 3. Кхэр ґаздэ́на (чхувэ́на) годыпнаса, и лэс рикирэ́на годя́са; |
| 4. и лэ́скирэ шту́бы (комнаты) исын пхэрдэ́ дрогонэ́ и кучонэ́ барвалыпнаса. |
|
|
| 1. Пал дова́, со хабэ́н янэ́на сыр свэ́нто дыибэ́н идолэ́нгэ, амэ джина́са (амэ́ндэ сарэ́ндэ исын джиныбэ́н): нэ джиныбэ́н пхутькирэла, а ла́ска (паты́в) кэ яви́р мануша́ подрикирэ́ла дро патяибэ́н. |
| 2. Ко́ли вари-кон думинэ́ла, со ёв джинэ́ла вари-со, ёв на джинэ́ла ничы́ адя́кэ, сыр трэиндя́ лэ́скэ тэ явэ́л. |
| 3. А ко́ли вари-кон рикирэ́ла сыр Дро́гима Дэвлэ́с дро пэ́скиро ило́, то Дэвэ́л джинэ́ла лэс: |
| 4. пал хабэ́н, саво́ янэ́на сыр свэ́нто дыибэ́н идолэ́нгэ, амэ джина́са, со идоло дава́ исын хохано́ дэвлоро дро свэ́то, со Дэвэ́л фэ́ни Екх исын, и яви́р нанэ. |
| 5. Палдава́, ко́ли исын ишчо (инкэ́) вари-савэ́ хоханэ́ дэвлорэ́, со кхарэнапэ “дэвлэнца”, ци дро болыбэ́н, ци пэ пхув (палдова́ со исын бут дэвлорэ́ и исын бут рая́), |
| 6. нэ амэ́ндэ ж исын екх Дэвэ́л Дад, Саво́ создыя́ саро́ и ваш Савэ́скэ амэ дживаса; и исын екх Рай Дэвэ́л, Ису́со Христо́со, пир Савэ́стэ саро́ яця́ и пир Савэ́стэ амэ дживаса. |
| 7. Нэ дасаво джиныбэ́н нанэ сарэ́ндэ: вари-савэ́ манушэ́ндэ далэ́ и́долы адя́кэ исын бэштэ́ дрэ лэ́нгири годы́, со ёнэ ха́на жэртвенно хабэ́н сы́рбы свэ́нто дыибэ́н идолэ́нгэ; а лэ́нгири годы́, сави́ ишчо (инкэ́) исын бизорьякири, сы́рбы магирэлапэ хабнастыр. |
| 8. Нэ мас на чхувэ́ла амэн пашылэды́р кэ Дэвэ́л; ци хаса амэ лэс, ци амэ на хасякираса ничы́, ци на хаса амэ лэс, нанэ ни сави́ льго́та амэ́ндэ. |
| 9. Нэ ракхэ́нпэ, соб (кай) тумаро́ право тэ хан тэ на явэ́л сы́рбы бар пэ дром одолэ́ндэ, савэ́ндэ исын назорало патяибэ́н. |
| 10. Палдава́, ко́ли вари-кон дыкхэ́ла тут, конэ́стэ исын джиныбэ́н, со ту сан бэшто́ пал сками́нд дро идолэнгирэ-мангипнытко кхэр, со ж тэды, ци на подпхэнэла годы́ одолэ́ манушэ́скэ, савэ́стэ нанэ зорало́ патяибэ́н, тэ хал дава́ жэртвенно хабэ́н сы́рбы свэ́нто дыибэ́н идолэ́нгэ? |
| 11. И хасёла тыро́ пшал дро ду́хо (фа́но), савэ́стэ нанэ зорало́ патяибэ́н пал тыро́ джиныбэ́н. |
| 12. Нэ ке́ли тумэ́ кэрэ́на грэ́хо проти пшалэ́стэ пир Растэ-Дэвлэ́стэ далэ́са, со тумэ́ сы́рбы дылнякирэна лэ́скири бизорьякири годы́, тэды тумэ́ кэрэ́на грэ́хо проти Христосо́стэ. |
| 13. Палдава́, ко́ли мас исын сы́рбы фэлы́ ваш грэ́хо пэ дром мирэ́ пшалэ́скэ, тэды мэ ние́кхвар буты́р на ява́ва тэ хав мас, соб (кай) ма́нгэ тэ на явав сы́рбы фэлы́ кэ грэ́хо пэ дром мирэ́ пшалэ́скэ. |
|
|
| Romani Bible Baltic 2019 |
| United Bible Societies for the Baltic Romani Mission |