Bible in one year
August 28

1. И мэ рисиём и дыкхцём, сыр притасавэ́на манушэ́н, и дава́ кэрэ́лапэ тэл кхам: и дыкх! Манушэ́нгирэ ясва, конэ́с притасавэ́на, нэ лэ́ндэ нанэ нико́н тэ подрикирэ́л лэ́нгиро ду́хо (фа́но), нэ пэ кадалэнгири риг, кон притасавэла сыс зор, нэ лэ́ндэ нанэ нико́н тэ подрикирэ́л лэ́нгиро ду́хо (фа́но).
2. Палдава́ мэ шардём мулэн, савэ́ ужэ мынэ́, буты́р далэндыр, савэ́ исын джидэ́.
3. Нэ, чачэс, фэды́р, кадалэ́ дуендыр исын кодова́ ману́ш, кон ишчо (инкэ́) на сыс пэ свэ́то (лот), кон на дыкхця́ бибахталы буты́, со кэрэ́лапэ тэл кхам.
4. И мэ дыкхцём, со пал кажно пхари́ буты́ и кажно рангири буты́, ману́ш зэвлынэла явирэ манушэ́скэ. Дава́ исын адя́кэ-паць харныпэ́н и сы́рбы тэ традэспэ пал балва́л.
5. Дылынинько исын бэшто́, счхуви васта́ кхэтанэ́ и ха́ла кокоро́ пэс.
6. Дава́ исын фэды́р тэ дорэсэс бурнык (пригоршня) раманёса (миро́са), сыр пхэрдэ́ дуй васта́ намилэ пхарэ́ бутя́тыр и традыпнаса пал балва́л.
7. И мэ рисиём и дыкхцём харныпэ́н тэл кхам.
8. Исын екхджино́ ману́ш и лэ́стэ ние́кх нанэ тэ явэ́л пашы́л лэ́стэ; лэ́стэ нанэ ни пшал, ни чхаво́: нэ нанэ ко́нцо (яго́ро) лэ́скирэ пхарэ́ бутякэ и лэ́скирэ якха́ нанэ чалэ барвалыпнастыр и пхучэла ёв: “Ваш конэ́скэ мэ кэра́ва буты́ пхарэ́с и отпхэнава пэ́скэ лачхипнастыр.” Дава́ исын адя́кэ-паць харныпэ́н и буты́, со пхарьякирэла ило́.
9. Дуенгэ исын фэды́р, сыр екхэ́скэ: пал-дова́ со лэ́нгэ явэ́ла лачхи́ мазу́ри (награда) пал лэ́нгири кхэтаны́ буты́:
10. ко́ли екх дуендыр пэрэ́ла, тэды яви́р ΄газдэла пэ́скирэ дрогонэ́ малэс. Нэ би́да явэ́ла одолэ́скэ, кон исын екхджино́: ке́ли ёв пэрэ́ла, лэ́стэ нанэ яви́р ману́ш тэ под ΄газдэл ґодлэл лэс.
11. Адя́кэ-паць, ко́ли дуйджинэ́ пасёна кхэтанэ́, тэды ёнэ татёна екх екхэстыр, и сыр екхджино́ могинэ́ла тэ татёл?
12. Нэ ко́ли ману́ш сашты́ тэ пиризорьякирэн екхджинэс явирэ́с, тэды дуйджинэ́ сашты́ тэ отмарэнпэ, и тринэ́ – тхавэнгиро шэло насыг и кошэлапэ.
13. Чороро́ и годо́ тэрно́ ману́ш исын фэды́р пхурэстыр, нэ дылынинько исын кра́ли, савэ́с нашты́ буты́р тэ сыклякирэс тэ приракхэлпэ.
14. Пал-дова́ со дава́ тэрно́ ману́ш сашты́ тэ явэ́л кадасаво́, кон гия́ яври́ бэшыбнастыр пэ кралипэ́н, мэк ёв и тэ бияндёл чороро́ дро пэ́скиро кралипэ́н.
15. Мэ дыкхцём, сыр сарэ́ джидэ́, кон исын тэл кхам, сыс пал явирэ манушэ́стэ, саво́ тэрдия́ пэ лэ́скиро штэ́то.
16. Нанэ ко́нцо (яго́ро) манушэ́нгэ, анги́л конэ́стэ ёв яця́ крали́са, нэ одолэ́, кон явдя́ коригэды́р (позжэды́р), на явэ́на зоралэ́с тэ радынэ́напэ лэ́стыр. Пал-дова́ со саро́ дава́ исын харныпэ́н и сы́рбы тэ традэспэ пал балва́л.
1. [2-ю.о.] На яв сы́гно тэ пхэнэ́с пэ́скирэ мо́са, и мэк тыро́ ило́ тэ на выпхэнэл сы́гно лав анги́л Дэвлэ́стэ: пал-дова́ со Дэвэ́л исын пэ болыбэ́н, нэ ту сан пэ пхув, палдава́ на ра́кир бут.
2. [3] Палдова́ со ману́ш дыкхэ́ла сунэ́, ке́ли лэ́стэ исын бут рэ́нды, и дылыниньконэскири зан пинджкирэса (уджинэса) пир бут лава́.
3. [4] Ке́ли ту совлахаса Дэвлэ́скэ, на тырдэ тэ кэрэ́с пир совла́х, пал-дова́, со Лэ́скэ исын на дро́га дылынинька: кэр, сыр ту дыя́н совла́х.
4. [5] Исын фэды́р тэ на совлахас, сыр тэ совлахас, и тэ на кэрэ́с пир совла́х.
5. [6] На домэк, соб (кай) тырэ́ ушта́ тэ лыджа́н лоч (плоть) тэ кэрэ́л грэ́хо, ци, соб (кай) тэды тэ пхэнэ́с Дэвлэ́скирэ Янголоскэ [бичхаибнаскирэскэ-ю.о.]: “Дро дава́ мэ дыёмпэ дукха́.” Ваш со дава́ трэй, соб (кай) Дэвэ́л тэ холясол пэ тыри́ зан, и, соб (кай) тэ хасякирэ́л тырэ́-вастэнгири буты́?
6. [7] Пал-дова́ со одо́й, кай бут сунэ́ дыкхэ́на, одо́й и бут лава́ ракирэ́на, нэ саро́ дава́ исын харныпэ́н. Нэ ту дар Дэвлэ́стыр.
7. [8] Ко́ли ту дыкхэ́са, сыр притасавэ́на чорорэс пэ пхув, и нахратэс рискирэна Зако́но и чачипэ́н дрэ мижэх риг, тэды на дивинпэ пэ дава́, пал-дова́ со вучэды́р барыдыро́ дыкхэ́ла пал вучэ́ барыдырэндэ, и ишчо (инкэ́) вучэды́р барыдыра́ исын пэ лэ́ндэ.
8. [9] И ко́фо (льґота) пхувья́тыр исын ваш сарэ́нгэ, и кра́ли кокоро́ джидёла фэлдатыр.
9. [10] Конэ́скэ пир ило́ исын руп, одова́ на явэ́ла чало рупэ́стыр, ци, конэ́скэ пир ило́ баро́ барвалыпэ́н, кодолэстэ на явэ́ла ада́кицы, кицы́ лэ́скэ трэй. Саро́ дава́ адя́кэ-паць исын харныпэ́н.
10. [11] Сыр барьёла миштыпэ́н, явэ́ла бутэды́р мануша́, кон чаравэлапэ лэ́стыр, и, саво́ ко́фо исын одолэ́нгэ, конэ́скиро исын дава́ миштыпэ́н, сыр екх фэ́ни тэ дыкхэ́н пэ лэ́стэ?
11. [12] Бутярно исын суто́ гудлэс, ци ёв ха́ла бут, ци на́бут (куты́): нэ баро́ барвалыпэ́н на дэ́ла тэ совэ́л лэ́скэ.
12. [13] Исын пхари́ биба́хт, со мэ дыкхцём тэл кхам: барвалыпэ́н, со ману́ш приракхэла пэ́скэ, дукхавэла лэс,
13. [14] ци дава́ барвалыпэ́н могинэ́ла тэ хасёл бибахталэ́ ваканцыятыр (случаёстыр). А ке́ли чхаворо́ латхэлапэ, ёв нисо́ на дорэсэ́ла дро васт.
14. [15] Сыр ёв явдя́ пэ свэ́то (лот) нанго да́кирэ штэто́стыр, дасаво-паць нанго ёв рисёла палэ, сыр ёв явдя́. И ёв нисо́ на лэ́ла пэ́скирэ пхарэ́ бутя́тыр, со ёв могинэлас тэ лыджа́л криг пэ́скирэ вастэ́са.
15. [16] И дава́ исын адя́кэ-паць пхари́ биба́хт: дро саро́ саво́ ману́ш явдя́, рэх (украт) дасаво-паць ёв ячкирэ́ла дава́ свэ́то (лот), и, саво́ ко́фо явэ́ла лэ́скэ, со ёв кэрдя́ пхари́ буты́ ваш балва́л?
16. [17] Ёв хая дро цямлыпэ́н дрэ сарэ́ пэ́скирэ дывэса́ бутэ́ дукхэнца, насвалыпнаса и барэ́ холя́са.
17. [18] Акэ, со мэ дыкхцём: дава́ исын лачхэ́с и миштэ́с тэ хал, и тэ пьел, и зоралэ́с тэ радынэ́лпэ лачхипнастыр, со исын сарэ́ лэ́скирэ пхарэ́ бутя́тыр, со ёв кэрдя́ буты́ пхарэ́с тэл кхам дрэ сарэ́ дывэса́ лэ́скирэ джиибнастыр, со Дэвэ́л дыя́ лэ́скэ, пал-дова́ со дава́ исын лэ́скири паш миштыпна́стыр.
18. [19] И адя́кэ-паць кажно ману́ш, конэ́скэ Дэвэ́л дыя́ барвалыпэ́н и миштыпэ́н, и дыя́ зор лэ́скэ тэ лэл дава́, и тэ лэл пэ́скири паш миштыпна́стыр и зоралэ́с тэ радынэ́лпэ пэ́скирэ пхарэ́ бутя́тыр-дава́ исын лэ́скиро тала́но Дэвлэ́стыр.
19. [20] Пал-дова́ со ёв на явэ́ла ўса́ды (сак) тэ рипирэл дывэса́ лэ́скирэ джиибнастыр, палдава́ Дэвэ́л и обрадынэла лэ́скиро ило́.
20. Дава́ исын биба́хт, со мэ дыкхцём тэл кхам, и дава́ исын сы́рбы со дывэ́с машки́р манушэ́ндэ:
1. ману́ш, конэ́скэ Дэвэ́л дыя́ ада́кицы барвалыпэ́н, миштыпэ́н и паты́в, со лэ́скэ ухтылэ́ла (до́си) саро́, соб (кай) ёв тэ на закамэл; нэ Дэвэ́л на дэ́ла зор лэ́скэ тэ лэл ко́фо далэ́ сарэ́стыр, нэ чу́жо ману́ш лэ́ла ко́фо пэ́скэ лэ́стыр: дава́ исын харныпэ́н и бибахталы дукх.
2. Ко́ли манушэ́стэ латхэнапэ шэл чхаворэ́, и ёв продживэла барэ́ бэрша́, со явэ́на бут бут дывэса́ дро лэ́скиро джиибэ́н, нэ ко́ли лэ́скиро ди на явэ́ла чало лачхипнастыр, ци лэс гаравэна накучэс, тэды мэ пхэнавас, со муло́ тыкномас, саво́ исын дро да́киро пэр, исын фэды́р кадасавэ́ манушэ́стыр;
3. пал-дова́ со ёв явэ́ла ваш нисо́, и ёв джа́ла криг дро калыпэ́н (цямлыпэ́н), и лэ́скиро лав исын чхакирдо цямлыпнаса;
4. и мэк ёв на дыкхця́ кхам, и мэк ёв на джиндя́ нисо́, усае́кх лэ́скэ исын буты́р рама́нё (пакоё), сыр кодолэ́ манушэ́стэ, конэ́стэ сыс саро́.
5. Нэ мэк ёв и тэ дживэ́л дуй мо́лы пир тысёнцо бэрш, нэ ко́ли ёв на дыкхця́ лачхипэ́н, тэды со лэ́скэ далэ́стыр? Ци на саро́ джа́ла дро екх штэ́то?
6. Ману́ш кэрэ́ла пхари́ буты́ ваш пэ́скиро муй, нэ лэ́скиро ди ние́кхвар исын на чало.
7. Пал-дова́ со сави́ льго́та (лачхипэ́н) исын годэ́ манушэ́стэ анги́л чорорэ́ манушэ́стэ, и сави́ льго́та исын чорорэ́ манушэ́стэ, кон фэ́ни джинэ́ла, сыр тэ лыджа́л пэс пэ манушэ́ндэ?
8. Исын фэды́р тэ лэл лачхипэ́н долэ́стыр, со якха́ дыкхэ́на, сыр ўса тэ тырдэспэ деса кэ вари-со яви́р. Дава́ исын адя́кэ-паць харныпэ́н и сы́рбы тэ традэспэ пал балва́л.
9. Сарэскэ, со какана́ исын, ґара́ анги́л сыс дыно́ лав и дава́ исын джиндло́, саво́ кажно ману́ш исын, и со ёв нашты́ тэ лыджа́л рэ́ндо проти одолэ́стэ, кон исын зоралэды́р лэ́стыр.
10. Пал-дова́ со исын бут рэ́нды и лава́, со́стыр исын буты́р харныпэ́н; саво́ ж лачхипэ́н исын манушэ́скэ?
11. И кон джинэ́ла, со дасаво исын лачхипэ́н ваш манушэ́скэ дро лэ́скиро джиибэ́н, дрэ сарэ́ дывэса́ лэ́скирэ джиибнастыр, со проджа́ла сыр зэр (тенё)? И кон сашты́ тэ пхэнэ́л манушэ́скэ, со явэ́ла пало́ лэ́стэ тэл кхам?
12. Ёв явэ́ла тэ дэл паты́в бизорья́кирэ манушэ́нгэ, савэ́ мангэ́напэ Лэ́скэ, и Ёв на явэ́ла тэ дыкхэ́л вучипна́стыр, сыр ёнэ мангэ́напэ Лэ́скэ.
18. Пал дава́ явэ́ла чхиндло́ родо́скэ, со явэ́ла, соб (кай) мануша́, савэ́ бияндёна, тэ славинэ́н Рас-Дэвлэ́с.
19. Пал-дова́ со Ёв дыкхця́ сы́гэс вычипнастыр Пэ́скирэ Свэнтонэ́ Штэто́стыр, Рай Дэвэ́л обдыкхця пхув болыбна́стыр;
20. соб (кай) тэ шунэ́л, сыр дэ́ла ґондя́ годла́са одова́, кон исын дро штарибэ́н, соб (кай) Ёв тэ мэкэл пэ во́ля одолэ́ чхавэ́н, савэ́н мэрибэ́н ужакирэ́ла,
21. соб (кай) тэ ракирэ́н сарэ́нгэ пал Ра́скирэ-Дэвлэ́скиро лав пэ Сио́но, соб (кай) тэ шарэ́н Лэс дро Ерусалимо,
22. ке́ли Наюды́тка на́цыи и кралипэна́ зджанапэ кхэтанэ́, тэ дэн паты́в ёнэ Ра́скэ-Дэвлэ́скэ.
23. Ёв тыкнякирдя мири́ зор дрэ мирэ́ лачхэ́ бэрша́, Ёв кроткэдыр кэрдя́ миро джиибэ́н.
24. Мэ пхэндём: “Миро Дэ́вла! На закэ́дэ ман джиибнастыр акана́, пака мэ на сом пхуро́. О, Раё Дэ́вла! Сарэ́ ро́ды дыкхэ́на, со Ту ве́чнэс дживэса.
25. Ту чхудя́н пхув ґарым-ґара́, Ту создыян болыбэ́н Пэ́скирэ вастэ́нца:
26. ёнэ хасёна, нэ Ту явэ́са, ёнэ сарэ́ ячэ́на пхуранэ́ сыр и́дя, и сыр урибэ́н Ту парувэса лэн, и ёнэ парудёна.
27. Нэ Ту сан Кадасаво́ пэ сарэ́ ве́ки, и Тырэ́ бэрша́ на кончынэнапэ.
28. Годо́ ману́ш исын зорало́; и годьваро́ ману́ш прибарьякирэла зоралыпэ́н кэ пэ́скири зор.
5. Пал-дова́ со го́дла годьварэ́-дыибнаса тумэ́ лыджа́на пэ́скиро марибэ́н; и кай бут исын мануша́, савэ́ дэ́на го́дла, одо́й явэ́ла зракхибэ́н.
6. Ци на сом мэ во́льно? Ци на сом мэ Апостоло? Ци на дыкхцём мэ Исусо́с Христосо́с, амарэ́ Рас-Дэвлэ́с? Ци тумэ́ на сан сы́рбы отдыибэ́н мирэ́ бутя́тыр ваш Ра́скэ-Дэвлэ́скэ?
1. Ко́ли мэ на сом Апостоло ваш явирэ́нгэ, нэ мэ сом Апостоло ваш тумэ́нгэ; пал-дова́ со тумэ́, савэ́ исын дро екхипэ́н Исусо́са Христосо́са, тумэ́ сан сы́рбы допхэныбэ́н пал мири́ Апостолоскири буты́.
2. Мэ затэрдёвава пал пэ́стэ ваш одолэ́нгэ, савэ́ пропатякирэна ман дро дава́:
3. “Ци нанэ амэ́ндэ право тэ хас и тэ пьяс?
4. Ци нанэ амэ́ндэ право тэ лас палоро́м патяибнаскирья пхэня́ пир Растэ-Дэвлэ́стэ сыр ромня́, адя́кэ-паць сыр яви́р Апо́столы кэрдэ́, мирэ́ пша́ла, пир Растэ-Дэвлэ́стэ, и Кифа?
5. Ци ма́ндэ кокорэстэ и Варнавастэ нанэ право тэ на кэра́с буты́?
6. Саво́ халадо (рулдо) лыджа́ла марибэ́н пал пэ́скирэ ловэ́? Кон исын, саво́ чхудя́ винагра́днико, соб (кай) тэ на хал му́ри? Кон исын, саво́ чаравэла гурто, соб (кай) тэ на пьел тхуд лэ́ндыр?
7. Ци мэ ракира́ва пир манушы́тко годы́? Ци на дова́ ракирэ́ла и Зако́но?
8. Ци нанэ адя́кэ зачхиндло́ дро Мойза́скиро (Моисеёскиро) Зако́но: “На закэр муй бутярнэ́ гурувэскэ пэ гив.” Ци пал гурувэндэ адя́кэ думинэ́ла Дэвэ́л?
9. Ци адя́кэ-паць Дэвэ́л на ракирэ́ла ваш амаро́ лачхипэ́н? Палдава́ исын пхэндло́ ваш амаро́ лачхипэ́н, со одова́, кон пахинэла (пхаравэла) пхув, мэк ёв тэ пахинэл лачхэ́ ужакирибнаса, и одова́, кон марэла гив, мэк тэ марэл лачхэ́ ужакирибнаса тэ лэл пэ́скири паш далэ́стыр.
10. Ко́ли амэ чхудям Духоскири зя́рка дро тумаро́ ило́, ци баро́ исын дава́ рэ́ндо (де́ло), ко́ли амэ скэдаса тумэ́ндыр дова́, со исын трэй ваш джидэ́ маса́?
11. Ко́ли явирэндэ исын право пэ тумэ́ндэ ваш дава́, ци нанэ амэ́ндэ буты́р правы? Нэ амэ на лыям нисо́ пир дава́ право, а амэ пирилыджаса саро́, соб (кай) амэ́нгэ тэ на кэра́с вари-сави́ ва́нта анги́л роспхэныбэн пал Христососкири бахталы́ зан (звесь).
12. Ци тумэ́ на джинэ́на, со одолэ́, кон кэрэ́ла свэ́нто буты́, чалякирэнапэ далэ́стыр, со исын яндло сыр свэ́нто дыибэ́н дрэ Кхангири́; одолэ́, савэ́ дынаринэна пашы́л алта́рё, лэ́на пэ́скири паш долэ́стыр, со янэлапэ пэ алта́рё.
13. И адя́кэ-паць Дэвэ́л дыя́ упхэныбэ́н одолэ́нгэ, кон роспхэнэ́ла бахталы́ зан (звесь), тэ дживэ́н далэ́ бутя́тыр, со ёнэ кэрэ́на.
14. Нэ мэ на́ ла́вас нисо́ дасаво. Ѓа́да, мэ чхиндём дава́ на ваш дова́, соб (кай) адя́кэ тэ явэ́л ма́нца; пал-дова́ со фэды́р бы сыс ваш ма́нгэ тэ мэрав, соб (кай) вари-кон тэ на шарэл ман, со мэ кэрдём дава́ би ловэнгиро.
15. Палдава́, ко́ли мэ роспхэнава бахталы́ зан (звесь), ма́ндэ нанэ со́са тэ шаравпэ; пал-дова́ со дава́ исын мири́ трэ́бима; дава́ явэ́лас пхарипэ́н ма́нгэ, ке́ли мэ тэ на роспхэнав бахталы́ зан (звесь).
16. Пал-дова́ со, ко́ли мэ кэра́ва дава́ пир пэ́скири во́ля, ма́нгэ исын отдыибэ́н, а ко́ли на пир пэ́скири во́ля, тэды мэ кэра́ва допхэндлы ма́нгэ буты́.
17. Саво́ ж тэды ма́нгэ мазу́ри (награда)? Дро дова́, со ке́ли мэ роспхэнава бахталы́ зан (звесь), тэды мэ джиндлякирава бахталэ́ заня́са би ловэнгиро, мэ на лава́ льго́та мирэ́ правэндыр роспхэныбнастыр.
18. Палдава́, ке́ли мэ сом во́льно сарэ́ндыр, мэ кэрдём пэс писхариса ваш сарэ́нгэ, соб (кай) ма́нгэ тэ кэдав лэн со буты́р ваш Христосо́скэ.
19. И мэ яцём Юдоса ваш Юдэ́нгэ ваш дова́, соб (кай) ма́нгэ тэ кэдав лэн ваш Христосо́скэ: ваш одолэ́нгэ, кон исын тэл Мойза́скиро Зако́но, мэ со́мас сы́рбы тэл Мойза́скиро (Моисеёскиро) Зако́но, соб (кай) ма́нгэ тэ кэдав тэл-Законоскирэн ваш Христосо́скэ:
20. ваш одолэ́нгэ, конэ́стэ нанэ Зако́но, мэ со́мас сы́рбы би Законоскиро (нэ мэ на гиём тэлэ́ Дэвлэ́скиро Законо́стыр, а мэ сом пир чачипэ́н тэл Христосо́скиро Зако́но) ваш дова́, соб (кай) ма́нгэ тэ кэдав кодолэ́н, конэ́стэ нанэ Мойза́скиро Зако́но.
21. Мэ яцём сы́рбы бизорья́киро дро патяибэ́н ваш одолэ́нгэ, конэ́стэ нанэ зорало́ патяибэ́н ваш одова́, соб (кай) ма́нгэ тэ кэдав одолэ́н, конэ́стэ нанэ зорало́ патяибэ́н. Ваш сарэ́ манушэ́нгэ мэ кэрдёмпэ сы́рбы кажнонэса лэ́ндыр ваш дова́, соб (кай) ма́нгэ тэ зракхав вари-конэ́с, сыр фэ́ни сашты́.
22. И мэ кэра́ва дава́ саро́ ваш бахталэ́-занякиро лачхипэ́н, соб (кай) ма́нгэ тэ явав бутярнэса пир мири́ паш лэ́нца.
23. Ци джинэ́на тумэ́, со сарэ́, кон прастала пэ стадионо, праста́на со исын сыгэды́р екх анги́л екхэ́стэ, нэ фэ́ни екх лэ́ла призо. Палдава́, прастан сарэ́, соб (кай) тумэ́нгэ тэ выбашавэн призо.
24. Нэ кажно ману́ш, кон марэлапэ пал призо, обрикирлапэ сарэ́стыр, со исын намишто ваш лэ́скиро прастаибэн: кодолэ́ мануша́ ваш дова́, соб (кай) лэ́нгэ тэ лэн вя́нка (коро́на), сави́ кирнёла, а амэ ваш кодоя вя́нка, сави́ на кирнёла.
25. И палдова́ мэ прастава на сы́рбы ману́ш, конэ́скэ нанэ смысло, палдава́ мэ маравпэ пал призо на сыр ману́ш, саво́ пэкавэла пир фа́но (воздухо).
26. Нэ мэ кхинякирава мирэ́ маса́ и рикирава лэс дрэ васта́, соб (кай) ке́ли мэ ява́ва тэ роспхэнав бахталы́ зан явирэ́нгэ, ма́нгэ тэ на ячавпэ налачхэса ваш прастаибэн.
Romani Bible Baltic 2019
United Bible Societies for the Baltic Romani Mission