Bible in one year - Пэ Балтитко Романи чиб

Bible in one year August 3

1. И явнэ́ кра́ли Аманоса пэ свэнкитко хабэ́н кэ кра́лица Эстэ́ра.

2. И пхэндя́ кра́ли Эстэрэ и дрэ дава́ яви́р дывэ́с пэ свэ́нко (банке́то): “Со исын пэ ило́ ту́тэ, кра́лица Эстэ́ра? Дава́ явэ́ла кэрдо́ пир лав. И саво́ исын мангипэ́н тыро́? Мэк кэ паш кралипэ́н, дава́ явэ́ла кэрдо́ пир лав.”

3. Тэ́ньци отпхэндя́ кра́лица Эстэ́ра, и пхэндя́: “Ко́ли мэ латхём тангипэ́н (жалима) дрэ тырэ́ якха́, о Кра́ли, и ко́ли крали́скэ явэ́ла пир ило́, тэды мэк тэ явэ́л дариндло миро джиибэ́н ма́нгэ, пир ило́ миро, и мирэ́ манушэ́нгэ, пир миро мангипэ́н!

4. Палдава́ со бикиндлэ амэн, ман и мирэ́ манушэ́н, пэ традыпэн криг, умарибэн и хасибэ́н. Ко́ли амэ тэ явас бикиндлэ сыр писха́рья и писхарицы, то мэ ява́ва штыл, усае́кх вэ́рго на рискирэ́ла уре́жа крали́скири.”

5. И отпхэндя́ кра́ли Артаксе́рксо, и пхэндя́ кралицакэ Эстэракэ: “Кон исын адасаво́, и кай исын кодова́, саво́ сыс тромало (муршкано́) дрэ пэ́скиро ило́ тэ кэрэ́л адя́кэ?”

6. И отпхэндя́ Эстэ́ра: “Вэ́рго и на́лачхо ману́ш – кадава́ исын захало Ама́но!” И Ама́но страхадыя анги́л крали́стэ и кралицатэ.

7. И кра́ли уштыя́ дрэ бари холын пэ́скири свэнкостыр моляса, и гия́ дрэ фэлатинякири у́нта (садо); нэ Ама́но яця́пэ тэ мангэ́л пал джиибэ́н пэ́скиро кра́лица Эстэ́ра, пал-дова́ со ёв дыкхця́, со ужакирэ́ла лэс па́нда (фуй судьба) крали́стыр.

8. Ке́ли кра́ли рисия́ фэлатинякирэ унтатыр пэ штэ́то дро кхэр, кай сыс свэ́нко, Ама́но сыс пыи кэ чхуибэ́н, пэ саво́ сыс Эстэ́ра. И пхэндя́ кра́ли: “Аж камэ́ла и тэ лэл пэ зор кра́лица дрэ кхэр ма́ндэ, ке́ли мэ сом!” Лав выгия́ крали́скирэ уштэндыр, и зачхакирдэ муй Аманоскэ!

9. И пхэндя́ Харбона, екх евнухэндыр, саво́ сыс пашы́л крали́стэ: “Ѓа́да, и вэшына (кашт) исын”, саво́ кэрдя́ Ама́но ваш Мардохеёскэ, саво́ ракирдя́ лачхипэ́н ваш крали́скэ, исын тэрдо́ пашы́л кхэр Аманоскиро, вучипна́са дрэ пандждэша́ куня́. И пхэндя́ кра́ли: “Ублавэн лэс пэ лэ́стэ.”

10. Адя́кэ ёнэ убладэ Аманос пэ кашт, саво́ ёв кэрдя́ Мардохеёскэ. Тэ́ньци бари холын крали́скири штылыя.

Esther 8:1-17

1. Дро до-паць дывэ́с кра́ли Артаксе́рксо отдыя́ кралицакэ Эстэракэ Аманоскиро кхэр, Юдэ́нгирэ-вэргоскиро; а Мардохе́ё загия́ анги́л муй крали́скиро, пал-дова́ со ёв сыс ла́киро как.

2. И злыя́ кра́ли пэ́скири ангрусты чэргэнорьяса, сави́ ёв отлыя Аманостыр, и отдыя́ Мардохеёскэ; Эстэ́ра чхудя́ Мардохеёс дыкхибнаскирэса пэ Аманоскиро кхэр.

3. И дурэды́р Эстэ́ра ракирдя́ анги́л крали́стэ, и пыя́ кэ лэ́скирэ ґэра́, и рондя́, и мангдя́ лэс тэ рискирэ́л холы́ Аманоскири Вугеяниноскири и плано лэ́скиро, саво́ ёв задуминдя пэ Юдэ́ндэ.

4. И протырдыя́ кра́ли кэ Эстэ́ра сувнакуно́ дэсто́; и ґаздыя́пэ Эстэ́ра, и тэрдия́ анги́л муй крали́скиро.

5. И пхэндя́: “Ко́ли крали́скэ явэ́ла пир ило́, и ко́ли мэ латхём тангипэ́н анги́л муй лэ́скиро, и чачуно́ дава́ рэ́ндо анги́л муй крали́скиро, и со мило сом мэ якхэнгэ лэскирэнгэ; тэды мэк тэ явэ́л чхиндло́, соб (кай) тэ явэ́н рискирдэ́ лыла́ пир задуминыбэн Аманоскиро, чхавэ́скирэ Гамедатоскирэ, Вугеяниноскирэ, савэ́ ёв чхиндя́ пал Юдэ́нгиро замарибэн дрэ сарэ́ провинцыи крали́скирэ.

6. Пал-дова́ со, сыр мэ могина́ва тэ дыкха́в би́да, сави́ явэ́ла пэ мирэ́ манушэ́ндэ, и сыр мэ могина́ва тэ дыкха́в мэрибэ́н мирэ́ манушэ́нгиро?”

7. И пхэндя́ кра́ли Артаксе́рксо кралицакэ Эстэракэ и Мардохеёскэ Юдоскэ: “Ѓа́да, мэ Аманоскиро кхэр отдыём Эстэракэ, и кокорэс лэс убладэ пэ вэшына пал дова́, со ёв чхудя́ пэ́скиро васт пэ Юдэ́ндэ.

8. Чхинэн и тумэ́ упхэныбэ́н пал Юдэ́ндэ, со исын тумэ́нгэ лачхо́, крали́скирэ лавэ́стыр, и пхандя́н крали́скирэ ангрустяса чэргонорьяса: пал-дова́ со лыла́, савэ́ сыс чхиндлэ́ крали́скирэ лавэ́стыр и пхандя́н крали́скирэ ангрустяса, нашты́ тэ отпарувэн.”

9. И кхардэ́ тэды крали́скирэ лыла́-пиричхиныбнаскирэн дро три́то чхон, дро чхон Сивано, пэ лэ́скиро биш тэ три́то дывэ́с, и сыс чхиндло́ саро́ адя́кэ, сыр припхэндя́ Мардохе́ё, кэ/жы́ко Юды, и кэ/жы́ко барыдыра́ пэ провинцыи и тхэмэ́скирэ барыдырэ́нгэ, и кэ/жы́ко тхага́рья провинцыякирэ Индиятыр кэ/жы́ко Ефиопия, шэл тэ биш тэ эфта́ провинцыи дрэ кажно провинцыя лылэнца лакирэнца и кэ/жы́ко сарэ́ мануша́ пэ лэ́нгири чиб, и кэ/жы́ко Юды лэ́нгирэ чхиныбнаса и пэ лэ́нгири чиб.

10. И чхиндя́ Мардохе́ё крали́скирэ Артаксерксоскирэ лавэ́стыр, и пхандя крали́скирэ ангрустяса чэргонорьяса, и бичхадя́ лыла́ пир манушэ́ндэ, савэ́ традэ́на пэ грэ́ндэ, пэ верблюдэндэ (дромадарэндэ), и ослэндэ кралискирэндэ.

11. Пал-дова́, со далэ́ лыла́ дынэ́ во́ля Юдэ́нгэ, савэ́ дживдэ́ дро кажно фо́ро, тэ скэдэ́нпэ и тэ затэрдён пал пэ́скиро джиибэ́н – тэ традэ́н криг, тэ замарэ́н и тэ хасякирэ́н сарэ́н зоралэн дрэ манушэ́ндэ и дрэ провинцыя, савэ́ исын дрэ холы́ лэ́нца: биятэ́н и джувле́н и барвалыпэ́н лэ́нгиро тэ залэн.

12. Дро екх дывэ́с пир сарэ́ крали́скирэ Артаксерксоскирэ провинцыи пэ дэшутрито дывэ́с дэшудуенгирэ чхонэ́скиро, Адароскиро чхон.

13. Пиричхиныбэн далэ́ упхэныбнаскиро тэ отдэ́н дрэ каажно провинцыя сыр зако́но, дыно тэ джинэн (объявиндло) ваш сарэ́ манушэ́нгэ, соб (кай) Юды тэ явэ́н скэдынэ́ кэ дова́ дывэ́с тэ отхан палэ пэ́скирэ вэргэ́нгэ.

14. Тэ́ньци мануша́, савэ́ традынэ уклистэ́ пэ крали́скирэ прастыбнытконэ грэ́ндэ, традынэ сыг и сыгэды́р крали́скирэ упхэныбнаса. Дава́ упхэныбэ́н сыс объявиндло (пхэндло́) и дрэ крали́скири фэлатин [шэрутно фо́ро-р.с.] тва́рдыма Сузы.

15. И, акэ, Мардохе́ё выгия́ крали́стыр дрэ крали́скиро урибэ́н яхонтовонэ и парнэ́ цвятоса, и барэ́ сувнакунэ́ коронаса, и дрэ мантия, висонытко и пурпурытко. И фо́ро Сузы отджидыя́ и зоралэ́с обрадындяпэ.

16. А Юдэ́ндэ сыс тэды свэнцыныбэн, и ра́дыма, и лош (весе́лиё), и свэ́нко.

17. И дрэ кажно провинцыя и дро кажно фо́ро, и пэ кажно штэ́то, карик догия́ припхэныбэ́н крали́скиро и лэ́скиро упхэныбэ́н, сыс ра́дыма Юдэ́ндэ и лош (веселиё), свэ́нко и свэнкитко дывэ́с. И бут мануша́ рига́тыр ячнэ́ Юдэнца, пал-дова́ со пыя́ пэ лэ́ндэ дар анги́л Юдэ́ндэ.

Psalms 90:7-17

7. Пал-дова́ со амэ хасёваса Тырэ́ холя́тыр, и амэ́нгэ исын пхаро́, сыр Ту зоралэ́с холясоса.

8. Ту чхудя́н амарэ́ чорэ́ рэ́нды анги́л Пэ́стэ, амарэ́ гарадэ́ грэ́хи тэ дыкхэ́н лэн.

9. Пал-дова́ со сарэ́ амарэ́ дывэса́ джа́на криг Тырэ́ холякирибнастыр: амаро́ джиибэ́н прастала кэ ко́нцо (кэ яго́ро) сыр екх пхурдыпэн ґондяса (ўздохоса).

10. Амарэ́-джиибна́скирэ дывэса́ джа́на кэ эфтадэша́ (битрияндэнгиро шэл) бэрш, а ко́ли амэ сам зоралэ́, то кэ охтодэша́ (бибишэнгиро шэл) бэрш. Нэ най фэды́р пора амарэ́ джиибнастыр исын доя́, сыр амэ сам насвалэ ци кхинэ бутя́тыр-дава́ проджа́ла (накхэла) сы́гэс и амэ вурняса криг.

11. Кон джинэ́ла Тырэ́-холякири зор? Кон уґалёла дар, со явэ́ла Тырэ́ холякирибнастыр?

12. Сыкля́кир амэн тэ гинас амарэ́ дывэса́, соб (кай) тэ явэ́л годыпэ́н дро амаро́ ило́?

13. Рисёв, о Раё Дэ́вла: кицы́ сашты́ тэ холясос? Яв лачхэ́-илэ́скиро кэ Тырэ́ писха́рья.

14. Чалякир амэн тасярлатыр Пэ́скирэ лачхэ́-илыткимаса и амэ ява́са весе́ла (лошалэ́) и ява́са тэ радынаспэ сарэ́ амарэ́ дывэса́.

15. Обрадын амэн пэ ада́кицы дывэса́, кицы́ Ту притасавэсас амэн, пэ ада́кицы бэрша́, кицы́ амэ пиридживдям чорипэ́н.

16. Мэк тэ дыкхэ́н Тырэ́ бутя́ Тырэ́ писха́рья, мэк тэ дыкхэ́н Тыри́ райканы сла́ва амарэ́ чхавэ́.

17. И мэк шукарипэ́н амарэ́-Ра́скирэ-Дэвлэ́скиро, амарэ́ Дэвлэ́скиро тэ явэ́л пэ амэ́ндэ: дэ зор амарэ́-вастэнгирэ бутенгэ, зорьякир амарэ́ васта́, со кэрэ́на бутя́.

Proverbs 22:10-11

10. Традэ криг адасавэс, саво́ исын бипатывакиро кэ яви́р мануша́, и чинга́рд дурьёла; и кошыбэ́н, и обракирибэн пириячэна.

11. Кон тырдэлапэ кэ жужо́ ило́, и конэ́стэ исын бахталыпэ́н пэ лэ́скирэ ушта́, кадасавэ́ манушэ́скэ кра́ли исын лэ́скиро мал.

Rimanenge 5:1-21

1. И пал-дова́ со амэн приґалынэ пал чачунэндэ пир патяибэ́н, амэ́ндэ исын рама́нё (миро) Дэвлэ́са пир амарэ́ Растэ-Дэвлэ́стэ, Исусо́стэ Христосо́стэ,

2. пир Савэ́стэ амэ сам домэкнэ пир патяибэ́н кэ дава́ бахтякирибэ́н, дрэ саво́ амэ какана́ дживаса, и амэ радынасапэ, со амэ́ндэ исын наде́я пэ Дэвлэ́скири сла́ва.

3. Нэ на дрэ екх дава́ исын амари́ ра́дыма, а амэ адя́кэ-паць радынасапэ дрэ амарэ́ пхарипэна, пал-дова́ со амэ джина́са, со пир пхарипэ́н барьёла амаро́ вырикирибэн.

4. Пир вырикирибэн амэ ячасапэ твардэдыр дро характеро, а характеро дурэды́р дэ́ла наде́я.

5. И амари́ наде́я на подлыджала амэн, пал-дова́ со Дэвлэ́скири ла́ска пир Свэ́нто Ду́хо (Фа́но) пхэрдякирдя́ амарэ́ илэ ласкаса, сави́ дыны́ амэ́нгэ:

6. пал-дова́ со Христо́со, ке́ли амэ са́мас грэхи́тка, дро часо, Саво́ Дэвэ́л упхэндя, мыя́ пал надэвлытконэндэ.

7. Ци мэрэ́ла вари-кон пал чачунэ́ манушэ́стэ? Сашты́ (могинэ́ла) тэ явэ́л, со пал вари-савэ́ лачхэстэ, вари-кон и скэдэ́ла муршыпэн тэ мэрэ́л,

8. нэ Дэвэ́л допхэнэ́ла Пэ́скирэ ласкаса кэ амэ, со Христо́со мыя́ пал амэ́ндэ, ке́ли амэ ишчо (инкэ́) са́мас грэхи́тка.

9. Палдава́ какана́, ке́ли амэ сам приджиндлэ чачунэнца Лэ́скирэ ратэ́са, амэ буты́р патя́са дрэ дова́, со амэ зракхасапэ пир Лэ́стэ Дэвлэ́скирэ холя́тыр.

10. Ко́ли англэды́р амэ са́мас вэ́рги Дэвлэ́скэ и какана́ амэ яця́м дро рама́нё (миро) Лэ́са пир Лэ́скирэ Чхавэ́скиро мэрибэ́н, тэды буты́р сарэ́стыр какана́, сыр амэ яця́м дро рама́нё, амэ надеинасапэ тэ зракхаспэ Лэ́скирэ джиибнаса.

11. И на екх дава́, нэ амэ и радынасапэ пир амарэ́ Растэ-Дэвлэ́стэ, Исусо́стэ Христосо́стэ, пир Савэ́стэ амэ дорэсцям (долыям) какана́ рама́нё Дэвлэ́са.

12. Палдава́, сыр пир екхэ манушэ́стэ грэ́хо загия́ дро свэ́то, и пал дава́ грэ́хо яця́ мэрибэ́н, адя́кэ мэрибэ́н яця́ пэ сарэ́ манушэ́ндэ, пал-дова́ со сарэ́ кэрдэ́ грэ́хо:

13. пал-дова́ со грэ́хо сыс дро свэ́то англэды́р Законо́стыр, нэ грэ́хо на гинэлапэ, ко́ли нанэ Зако́но;

14. нэ мэрибэ́н рикирдя зор пэ манушэ́ндэ Адамостыр кэ Мо́йза, адя́кэ-паць и пэ одолэ́ндэ, кон на кэрдя́ дасаво грэ́хо, сыр Адамо, саво́ сыс, сыр о́бразо Одолэ́скэ, Конэ́скэ трэиндя́ тэ явэ́л.

15. Нэ Дэвлэ́скиро тала́но пир бахталыпэ́н, дава́ нанэ ж дова́-паць, сыр Адамоскиро грэ́хо? Пал-дова́ со, ко́ли пир екхэ-манушэ́скиро проштавибэн бут мануша́ мынэ́, тэды ци пэ бут буты́р мануша́ дорэсэ́на Дэвлэ́скиро бахталыпэ́н и тала́но пир бахталыпэ́н екхэ Манушэ́стыр Исусо́стыр Христосостыр дэ́лапэ ваш сарэ́нгэ.

16. Нэ Дэвлэ́скиро тала́но исын на сы́рбы сэ́ндо пал екхэ манушэ́стэ, саво́ кэрдя́ грэ́хо; пал-дова́ со грэ́хо, саво́ кэрдя́ екх ману́ш, лыджа́ла кэ сэ́ндо, нэ Дэвлэ́скиро тала́но пир бахталыпэ́н исын сы́рбы чачипна́скиро приджиныбэн пал бутэ́нгирэ-манушэ́нгирэ грэ́хи?

17. А ко́ли пир екхэ́-манушэ́скиро проштавибэн мэрибэ́н лыя́ тэ рикирэ́л лофо (зор), тэды ци пэ бут бутэды́р во́льно чачипна́скиро да́ро и бут бут бахталыпэ́н явэ́на тэ кралинэн дро одолэнгиро джиибэ́н, савэ́ прилэ́на лэн пир Екхэ́стэ Исусо́стэ Христосо́стэ:

18. палдава́, сыр екхэскиро манушэ́скиро грэ́хо яндя́ сэ́ндо сарэ́ манушэ́нгэ, адя́кэ-паць екхэ Манушэ́скиро чачуно́ рэ́ндо приджинэла сарэ́ манушэ́н чачунэнца ваш джиибэ́н, саво́ дэ́ла джиибэ́н сарэ́нгэ.

19. Пал-дова́ со, сыр пал екхэ манушэ́скиро накандыпэн кэрдэ́пэ бут мануша́ грэхитконэнца, адя́кэ-паць и пал Екхэ Манушэ́скиро кандыпэн бут мануша́ ячэ́напэ чачунэнца.

20. А Зако́но сыс дыно́, соб (кай) тэ явэ́л буты́р и бицялэдыр грэхоскиро ґалыибэ́н; нэ одо́й, кай сыс буты́р грэ́хо, одо́й сыс и буты́р бахталыпэ́н;

21. пал-дова́ со, сыр грэ́хо рикирдя зор пэ мэрибэ́н, адя́кэ-паць и бахталыпэ́н явэ́ла тэ лыджа́л тэ рикирэ́л ло́фо (зор) пэ чачипэ́н, саво́ янэ́ла кэ ве́чно джиибэ́н пир Исусо́стэ Христосо́стэ, амарэ́ Растэ-Дэвлэ́стэ.

Romani Bible Baltic 2019

Maintained by the United Bible Societies for the Baltic Romani Mission