Bible in one year - Пэ Балтитко Романи чиб

Bible in one year August 30

1. Кон исын годо́ ману́ш? И кон джинэ́ла тэ роспхэнэл пал сарэ́ рэ́нды, сыр лэн трэй тэ кэрэ́н? Манушэ́скиро годыпэ́н зачхувэла лэ́скиро муй тэ зяинэл, и наковло лэ́скиро муй парудёла.

2. Мэ пхэна́ва: “Кандэ, со кра́ли припхэнэла тэ кэрэ́с ваш паты́в пал тыри́ совла́х Дэвлэ́скэ.”

3. На яв сы́гно тэ джас криг Лэ́скирэ якхэ́ндыр. На тэрдёв дрэ стонка пал бибахтало́ рэ́ндо, пал-дова́ со кра́ли кэрэ́ла дова́, со исын лачхо́ лэ́скэ,

4. пал-дова́ со крали́скиро лав исын зорало́, и кон сашты́ тэ пхэнэ́л лэ́скэ: “Со ту кэрэ́са?”

5. Кон рикирэ́лапэ кэ лэ́скиро припхэныбэ́н, кодолэ́скэ на явэ́ла биба́хт и годэ́-манушэ́скиро ило́ розґалёла часо (цы́ро) и дром, сыр трэй тэ кэрэ́л?

6. Пал-дова́ со ваш кажно рэ́ндо исын пэ́скиро часо и дром, сыр трэй тэ кэрэ́л? Бари би́да тасавэла манушэ́с;

7. пал-дова́ со ёв на джинэ́ла, со явэ́ла; кон могинэ́ла тэ пхэнэ́л лэ́скэ, ке́ли, и, сыр саро́ дава́ явэ́ла?

8. Ниекхэстэ нанэ зор пэ ду́хо (фа́но), соб (кай) ману́ш тэ рикирэ́л зоралэ́с ду́хо (фа́но), и ниекхэстэ нанэ зор дро дывэ́с, сыр мэрэ́на. Нашты́ нисыр и тэ отпхандэспэ марибнастыр проти мэрибэ́н, адя́кэ-паць и биба́хт на выракхэла одолэ́н, кон присыклынэ тэ кэрэ́н адя́кэ.

9. Саро́ дава́ мэ дыкхцём и рискирдём пэ́скиро ило́ кэ кажно буты́, со кэрэ́лапэ тэл кхам: исын часо, ке́ли ману́ш рикирэ́ла зор пэ явирэ́стэ и дукхавэла лэс.

10. И мэ адя́кэ-паць дыкхцём, сыр гаравэнас фуе́ манушэ́н, савэ́ явэ́нас и джа́нас криг адя́кэ, сы́рбы ёнэ кэрэ́нас пир чачипэ́н, и, ке́ли мануша́ уджанас свэнтонэ́ штэто́стыр и, тэды ёнэ бистрэнас пал лэ́ндэ дро фо́ро, кай ёнэ кэрдэ́ биба́хт. Дава́ адя́кэ-паць исын харныпэ́н.

11. Сыр сэ́ндо пэ одолэ́ндэ, кон кэрэ́на бибахталэ́ бутя́, насыгэс кэрэ́лапэ, адя́кэ-паць пал-дава́ манушэ́нгирэ-чхавэ́нгиро ило́ исын хор залымо, соб (кай) тэ кэрэ́л биба́хт.

12. Мэк грэхи́тко ману́ш тэ кэрэ́л биба́хт шэл мо́лы и тэ дживэ́л ґара́, нэ мэ джино́м миштэ́с, со явэ́ла лачхэ́с одолэ́нгэ, кон дарэ́ла Дэвлэ́стыр, кон дарэ́ла анги́л Лэ́стэ.

13. Нэ на явэ́ла лачхэ́с фуе́ манушэ́нгэ, ци сы́рбы зэр (тенё) ёв на явэ́ла ґара́ тэ дживэ́л, пал-дова́ со ёв на дарэ́ла анги́л Дэвлэ́стэ.

14. Дава́ исын харныпэ́н, со кэрэ́лапэ пэ пхув: чачунэ́ манушэ́нца кэрэ́лапэ дова́, со треиндя тэ явэ́л фуе́ манушэ́нца пир лэ́нгири буты́; и исын фуй мануша́, конэса кэрэ́лапэ дова́, со трэиндя́ тэ явэ́л чачунэ́ манушэ́нгэ пир лэ́нгири буты́. Мэ пхэндём, со дава́ исын адя́кэ-паць харныпэ́н.

15. И мэ шардём, соб (кай) мануша́ тэ санпэ радыма́са, пал-дова́ со нисо́ нанэ фэды́р тэл кхам сыр тэ хан, тэ пьен, и тэ явэ́н радымакирэса, пал-дова́ со дава́ помогинэла лэ́скэ дрэ лэ́скири пхари́ буты́, со Дэвэ́л дыя́ лэ́скэ тэл кхам.

16. Ке́ли мэ рискирдём миро ило́ тэ уджинэл годыпэ́н, и тэ роздыкхэл намило пхари́ буты́, со кэрэ́лапэ пэ пхув: и адя́кэ-паць ние́кх ману́ш нанэ, соб (кай) тэ совэ́л ци дывэсэ́, ци раты́;

17. тэды мэ дыкхцём Дэвлэ́скири сари́ буты́, со ману́ш нашты́ тэ ґалёл сарэ́са, со кэрэ́лапэ тэл кхам. Мэк ману́ш и тэ кэрэ́л буты́ пхарэ́с, и тэ джинэ́л буты́р, нэ сароекх ёв на ґалёла сарэ́са; адя́кэ-паць, ко́ли годо́ ману́ш думинэ́ла, со ёв джинэ́ла дава́, нэ ёв нашты́ дава́ тэ ґалёл сарэ́са.

Ecclesiastes 9:1-18

1. Пал саро́ дава́, мэ роздуминдём пэ́скирэ илэ́са, соб (кай) тэ розгалёвав буты́р саро́ дава́: чачо́, и чачунэ́, и годэ́ мануша́, и лэ́нгирэ бутя́ исын дро Дэвлэ́скиро васт: ние́кх ману́ш на джинэ́ла, ци явэ́на тэ сыкавэ́н паты́в лэ́скэ, ци явэ́на тэ бидыкхэн лэс пал дава́: саро́ дава́ исын анги́л лэ́ндэ.

2. Саро́ адя́кэ кэрэ́лапэ сарэ́нца пир екх дром: екх тала́но ваш чачунэнгэ и ваш фуе́ манушэ́нгэ; ваш лачхэ́, и ваш бибахталэ́, жужэ́ и нажужэ́ манушэ́нгэ. Ваш одолэ́скэ, кон янэ́ла свэ́нто дыибэ́н, и ваш одолэ́скэ, кон на янэ́ла свэ́нто дыибэ́н: адя́кэ лачхэскэ, адя́кэ-паць и грэхитконэ́ манушэ́скэ; адя́кэ одолэ́скэ, кон совлахала, адя́кэ-паць и кодолэ́скэ, кон на совлахала.

3. Дава́ исын биба́хт машки́р сарэ́ндэ, со кэрэ́лапэ тэл кхам – со екх тала́но (судьба) ужакирэ́ла сарэ́н: чачо́, манушэ́нгирэ-чхавэ́нгирэ илэ исын пхэрдэ́ бибахтяса, и бигодыпэн исын дрэ лэ́нгирэ илэ, пака ёнэ дживэ́на, а пало́ (после) дова́ ёнэ джа́на криг одори́к, кай мулэ́ исын.

4. Нэ одова́, кон исын машки́р джидэндэ, ишчо (инкэ́) ужакирэ́ла лачхипэ́н анги́л, пал-дова́ со джидо́ джукэл исын фэды́р мулэ́ шчэрэстыр (левостыр).

5. Джидэ́ мануша́ джинэ́на, со ёнэ мэрэ́на, нэ мулэ́ на джинэ́на нисо́, и адя́кэ-паць нанэ лэ́нгэ буты́р мазу́ри (награда), и мануша́ бистырдэ сарэ́са пал лэ́ндэ.

6. Адя́кэ-паць и лэ́нгири паты́в кэ яви́р мануша́, и одова́, со ёнэ зоралэ́с бидыкхнэ, и лэ́нгиро зэвлыныпэ́н какана́ хасинэ́ – адя́кэ-паць лэ́нгэ нанэ буты́р и бажын дро дова́, со кэрэ́лапэ тэл кхам.

7. Джа́ и ха пэ́скиро маро́ радаса, и пи мол радымакирэ илэ́са; пал-дова́ со Дэвлэ́скэ ґара́ ячнэ́ лачхэ́ тырэ́ бутя́.

8. Мэк тырэ́ и́ди тэ явэ́н парнэ́, мэк тэ ухтылэл (тэ явэ́л до́си) оливи́тко дзэт (елеё) пэ тыро́ шэро́.

9. Джив и ра́дынпэ ромня́са, савья́ ту камэ́са сарэ́ дывэса́ дро тыро́ харныпнытко джиибэ́н, со Дэвэ́л дыя́ ту́кэ тэл кхам пэ сарэ́ дывэса́ дро тыро́ харныпнытко джиибэ́н; пал-дова́ со дасави́ исын тыри́ бажын дро джиибэ́н и дрэ буты́, со ту кэрэ́са тэл кхам.

10. Саро́, со тыро́ васт латхэ́ла тэ кэрэ́л, кэр дава́ сарэ́ тырэ́ зоралыпнастыр, пал-дова́ со нанэ ни буты́, ни придуминэса нисо́, ни джиныбэ́н, ни годыпэ́н дрэ маґила (дрэ кула), карик ту кэдэсапэ тэ джас.

11. Мэ рисиём и дыкхцём, со кэрэ́лапэ тэл кхам: со призо выкхэлэла на одова́, кон исын най сыгэды́р, ци марибэ́н на одова́, кон исын най зоралэды́р, ци маро́ на одова́, кон исын най годэдыр, ци барвалыпэ́н на одова́, кон исын най годьварэдыр, ци ла́ска, на одова́, кон исын най фэдэды́р; нэ исын часо и ваканцыя (случаё) ваш кажнонэ́ манушэ́скэ.

12. Пал-дова́ со ману́ш адя́кэ-паць на джинэ́ла пэ́скиро часо: ёв попэрэлапэ сыр мачхэ́ дрэ бибахталы кхуды́ (сеть), сыр чирикля́ дрэ фэлы́, адя́кэ-паць и манушэ́нгирэ чхавэ́ исын дрэ фэля́ дро бибахтало́ часо, ке́ли екха́тыр бари би́да пэрэ́ла пэ лэ́ндэ.

13. Акэ, адя́кэ-паць исын екх годыпэ́н, со мэ адя́кэ-паць дыкхцём тэл кхам и со сыкадыя́ баро́ ваш ма́нгэ:

14. ґа́да, сыс екх форицо, кай исыс на́бут (куты́) мануша́, и баро́ кра́ли гия́ марибна́са пэ дава́ форицо, и ёв обгия трусця́л дава́ форицо халадэнца, и ёв ґаздыя́ барэ́ ва́нты тэ лэл дава́ форицо.

15. Нэ, ґалёв, екх чороро́, нэ годо́ ману́ш латхяпэ дро форицо, и ёв выракхця дава́ форицо пэ́скирэ годыпнаса. Нэ ние́кх ману́ш на рипирэлас кадалэ́ чорорэ́ манушорэс.

16. Тэ́ньци пхэндём мэ: “Годыпэ́н исын фэды́р зоралыпнастыр”, нэ сароекх – чорорэ́-манушэ́нгиро годыпэ́н исын на дрэ паты́в и лэ́скирэ лава́ на шунэ́на.

17. Годэ́-манушэ́нгирэ лава́ шунэ́на буты́р, со штылэ́с пхэнэнапэ сыр одолэскири го́дла, кон хулаинэла пэ дылыниньконэндэ.

18. Годыпэ́н исын фэды́р марибнытконэ́ састырэндыр; нэ екх грэхи́тко ману́ш хасякирэ́ла бут лачхипэ́н.

Ecclesiastes 10:1-20

1. Мулэ́ матля (мухи) дошакирэна аптекароскиро драб тэ кхосэн адя́кэ, со дава́ куч драб лэ́ла тэ кхандэл кирныпнаса;

2. адя́кэ-паць и екх тыкно́ дылныпэ́н кэрэ́ла патывалэ́ манушэ́са, кон исын годо́ и савэ́с яви́р мануша́ кутякирэна.

3. И дава́ адя́кэ-паць исын: ке́ли дылынинько ману́ш джа́ла вари-савэ́ дроморэса; лэ́скэ сароекх на ухтылэ́ла (на́доси) годыпэ́н, и ёв сыкавэ́ла кажнонэ́ манушэ́скэ, со ёв исын дылынинько.

4. Ко́ли тхэмэ́скирэ-барыдырэскиро ду́хо (фа́но) ґаздэ́лапэ проти ту́тэ, на ячкив (на ячав) пэ́скиро штэ́то, пал-дова́ со рама́нё (миро) барыдырэ́са чхакирэла штылэ́с барэ́ грэ́хи.

5. Дава́ исын биба́хт, со мэ дыкхцём тэл кхам, сыр тхэмэскиро барыдыро́ дэ́лапэ дукха́.

6. Дылныпэ́н чхувэ́лапэ анги́л барэ́ патыва́са; барвалэ́ мануша́ исын бэштэ́ пэ тэлатунэ́ штэ́ты.

7. Мэ дыкхцём дынарье́н пэ грэ́ндэ, и крали́скирэ чхавэ́н, савэ́ псирэ́на пэзал пир пхув сыр дына́рья.

8. Кон ґанавэла ґанби́н, одова́ пэрэ́ла дрэ ла́тэ, и кон пхагирэ́ла тэлэ́ тыно, одолэ́с сап дандырэла.

9. Кон выпхагирэла бара́, одолэ́с бар могинэ́ла тэ пэкавэл палэ; кон пхаравэла кашта́, одолэ́с кашт могинэ́ла тэ дукхавэл.

10. Ко́ли товэр исын тэмпо, и ко́ли кон на востринэла чхиныбнытко (лезвиё), то манушэ́скэ трэй буты́р тэ причхувэл зор. Фэды́р годыпнаса тэ думинэс пал дава́ анги́л.

11. Ко́ли сап дандырэла манушэ́с анги́л, сыр тэ заракирэс лэс, тэды укротителё ужэ на трэй.

12. Лава́ годэ́-манушэ́нгирэ уштэндыр исын бахталыпэ́н, нэ дылыниньконэскирэ ушта́ сы́рбы накхавэна лэс кокорэс.

13. Лэ́скиро муй лэ́ла тэ ракирэ́л нагодэ лава́, нэ дро ко́нцо (дро яго́ро) ёв ракирэ́ла сы́рбы бишэрэскиро.

14. И ракирэ́ла бут лава́ дылынинько, нэ ние́кх ману́ш на джинэ́ла, со явэ́ла анги́л, кон могинэ́ла тэ пхэнэ́л лэ́скэ?

15. Дылынинька мануша́ кхинякирэна пэс пхарэ́ бутяса адя́кэ, со ёнэ на джинэ́на, сыр тэ джа́н пэ фо́ро.

16. Бида ту́кэ, пхув, ко́ли тыро́ кра́ли исын тэрнэ́-бэршэнгиро и, ке́ли тырэ́ тхага́рья (кня́зи) [крали́скирэ чхавэ́-ю.о.] ха́на тася́рлэс (ра́нэс).

17. Бахталы́ ту сан, пхув, ко́ли тыро́ кра́ли исын барэ́-рангирэ родо́стыр и тырэ́ тхага́рья (кня́зи) ха́на тэды, ке́ли трэй ваш зоралыпэ́н, а на ваш матыбэн.

18. Пал древа́н кирнэ-масэнгирэ васта́ кхэрэ́скиро каркасо пэрэ́ла, и пир чучэ васта́ кхэр тхадэ́ла.

19. Хабэ́н исын кэрдо́, соб (кай) тэ санпэ, и мол розрадынэла джиибэ́н, пэ пал ловэ́ сашты́ тэ лэс саро́ дава́.

20. На прокош крали́с аж и дрэ годы́, на прокош барвалэн дрэ шту́ба, кай совэса; пал-дова́ со чириклы дро фа́но (воздухо) могинэ́ла тэ лыджа́л тыро́ лав [зан-ю.о.], и вурняибнытко пхакэнца создыибэн (крылато) пхэнэ́ла пал дава́ рэ́ндо.

Psalms 103:6-14

6. Рай Дэвэ́л кэрэ́ла саро́ и сэндякирэ́ла пир чачипэ́н одолэ́н, савэ́ исын притасадэ.

7. Ёв сыкадя́ Пэ́скирэ дрома́ Мойза́скэ, Пэ́скирэ кэрибэна Израилёскирэ чхавэ́нгэ.

8. Рай Дэвэ́л исын лачхэ́-илэ́скиро и тангинэла сарэ́н, Ёв насыгэс холясо́ла и исын барвало́ тэ сыкавэ́л Лэ́скири лачхэ́-илы́ткима.

9. Ёв на сыклякирэ́ла холя́са саро́ часо, Ёв на рикирэ́ла ўса́ды (сак) Лэ́скири холы́.

10. Ёв на кэрдя́ адя́кэ, соб (кай) амэ тэ явас бангэ́ пал амарэ́ грэ́хи, Ёв на отдыя́ палэ фуипнаса амэ́нгэ пал амаро́ чорипэ́н.

11. Пал-дова́ со сыр вучэ́с исын болыбэ́н пхувья́тыр, ада́кицы-паць бут исын лачхэ́-илы́ткима Дэвлэ́стэ ваш одолэ́нгэ, савэ́ дарэ́на Лэ́стыр.

12. Ада́кицы дур исын чачэ́ рига́тыр кэ зэ́рво (ле́во) риг пэ пхув, ада́кицы-паць дур ёв чхувэ́ла криг амарэ́ грэ́хи.

13. Сыр ада́кицы бут дад тангинэла пэ́скирэ чхаворэ́н, адя́кэ-паць зорало́ Рай Дэвэ́л тангинэла одолэ́н, савэ́ дарэ́на Лэ́стыр.

14. Пал-дова́ со Ёв джинэ́ла, со́стыр амэ сам создынэ, Ёв рипирэла, со амэ сам фэ́ни (то́ка) пра́хо.

Proverbs 24:10-12

10. Ко́ли ту пэрэса дро ило́ дро трашакиро дывэ́с, то ту́тэ исын набари зор.

11. Зра́кх одолэ́н, савэ́н лыджа́на пэ мэрибэ́н, и зарикир одолэ́н, савэ́ обштавэнапэ анги́л мулякирибэн [исын сэндякирдэ тэ мэрэ́н-р.с.].

12. Ко́ли тумэ́ пхэнэ́на: “Чачо́, амэ на джиндям дава́”, тэды Кодова́, Саво́ ублавэла (важынэла) илэ, ци на ґалёла дава́? Кодова́, Саво́ ракхэ́ла тыро́ ило́, ци на джинэ́ла Ёв дава́? И Ёв отдэ́ла кажнонэ́ манушэ́скэ ада́кицы, кицы́ ёв исын мол пал лэ́скирэ рэ́нды.

1 Korinťanenge 10:19-33

19. Со тэды мэ пхэна́ва? Ци дова́, со идоло исын мол вари-со? Ци свэ́нто дыибэ́н идолоскэ исын мол вари-со?

20. Над. А дова́, со ке́ли На́юды янэ́на лэ́нгирэ свэ́нта дыибэна́, ёнэ янэ́на лэн налачхэ́ духэнгэ, а на Дэвлэ́скэ. Нэ мэ кама́м, соб (кай) тумэ́ тэ на кхэтанякирэнпэ пашэнца налачхэ́ духэнца.

21. Тумэ́ на могинэ́на тэ пьен Ра́скирэ-Дэвлэ́скиро тахта́й, и налачхэ́-духэнгиро тахта́й: тумэ́ на могинэ́на тэ лэн паша́ Ра́скирэ-Дэвлэ́скирэ скаминдэстыр и налачхэ́-духэнгирэ скаминдэстыр.

22. Нау́што амэ ява́са тэ муршкинаспэ тэ холякирас Дэвлэ́с? Нау́што амэ сам зоралэды́р Лэ́стыр?

23. Саро́ сашты́ (можна), нэ на саро́ кэ лачхипэ́н амэ́нгэ; саро́ сашты́, нэ на саро́ кэ подрикирибэ́н дро патяибэ́н.

24. Мэк ние́кх ману́ш тэ на родэ́л бахт екх пэ́скэ, а мэк кажно ману́ш тэ родэ́л бахт ваш явирэскэ.

25. Саро́, со мануша́ бикнэна пэ тарги, сашты́ тэ хан, на пхучэ́н нисо́, и на издран ладжатыр.

26. Пал-дова́ со пхув исын Дэвлэ́скири и саро́, со исын пэ пхув, исын Дэвлэ́скиро.

27. Нэ ко́ли вари-саво́ напатяибнаскиро кхарэ́ла тумэн кэ пэ, и тумэ́ камэ́на тэ джа́н, хан саро́, со исын чхудо анги́л тумэ́ндэ, на пхучэ́н нисо́ и на издран ладжатыр.

28. Нэ ко́ли вари-кон пхэнэ́ла тумэ́нгэ: ґа́да, исын яндло сыр свэ́нто дыибэ́н, на хан ваш одолэ́ манушэ́скэ, саво́ пхэндя́ дава́ лав тумэ́нгэ, соб (кай) адалэ́ манушэскири ладж тэ явэ́л штыл;

29. мэ ракира́ва дава́ на пал тумари́ ладж, а пал дая́ манушэскири ладж: со́скэ явирэ манушэскири ладж явэ́ла тэ сэндякирэ́л мири́ вольныма?

30. Ко́ли мэ ла́ва хабэ́н парикирибнаса, палсо́ тэ ракирэ́н чорипэ́н пал ма́ндэ, пал дова́ со мэ парикирава.

31. Палдава́, ко́ли тумэ́ вари-со ха́на, ци пьена, ци кэрэ́на вари-со, саро́ дава́ кэрэ́н адя́кэ, соб (кай) тэ барьякирэ́н кэ вучипэ́н Дэвлэ́с.

32. На чхувэ́н бар пэ дром сыр Юдэ́нгэ, адя́кэ-паць и Грекэ́нгэ (Баламэ́нгэ), и Дэвлэ́скирэ кхангирьякэ.

33. Адя́кэ-паць сыр и мэ кэра́ва, со исын зор, тэ явав лачхо́ сарэ́нгэ дро саро́; и мэ на родава льго́та пэ́скэ, а лачхипэ́н сарэ́нгэ, соб (кай) ёнэ тэ зракхэнпэ.

Romani Bible Baltic 2019

Maintained by the United Bible Societies for the Baltic Romani Mission