Bible in one year August 31Ecclesiastes 11:1-101. Дэ тыро́ маро́ бутэ́ манушэ́нгэ, пал-дова́ со ту дорэсэса да́ры палэ бут дывэса́.2. Роскэр, со исын ту́тэ, машки́р эфта́ (эфтанэ) манушэ́ндэ, ци адя́кэ-паць машки́р охто́ (бидуе́нгиро дэш) манушэ́ндэ, пал-дова́, со ту на джинэ́са, саво́ бэдыпэн явэ́ла пэ пхув.3. Ко́ли о́блоки исын пхэрдэ́ брышындэса, тэды ёнэ чхувэ́на тэлэ́ паня́ пэ́стыр; и ко́ли кашт (дрэ́во) пэрэ́ла кэ паш-дывэсы́тко риг, ци кэ паш-рати́тко риг, тэды пэ штэ́то кашт пэрэ́ла, ёв явэ́ла тэ пасёл.4. Кон дыкхэ́ла пэ балва́л, одова́ на явэ́ла тэ почхувэл зя́рка дрэ пхув, и кон дыкхэ́ла патыва́са пэ о́блоки, одова́ на явэ́ла тэ счхинэл гив.5. Сыр ту на джинэ́са, савэ́ дромэ́са ду́хо (фа́но) джа́ла, и дова́, сыр тыкнэ́-масэнгирэ кокалкицы барьёна дрэ лэ́скирэ-да́киро пэр, адя́кэ-паць ту и на ґалёса Дэвлэ́скири буты́, Кон кэрэ́ла дава́ саро́.6. Тасярлатунэ (раннёнэ) злокостыр почхув пэ́скири зя́рка дрэ пхув, нэ бэльвэлятыр на тангинэ (на жалин) тыро́ васт ваш буты́, пал-дова́ со ту на джинэ́са, со удэлапэ кэ миштыпэ́н, ци дава́ рэ́ндо, ци дова́ рэ́ндо, ци дуй далэ́ рэ́нды, явэ́на лачхэ́.7. Какана́, дыкх. Дуд исын гудло́, и гожэс исын якхэнгэ тэ дыкхэ́н кхам;8. нэ ко́ли ману́ш дживэ́ла бут бэрш, тэды мэк ёв тэ радынэ́лпэ зоралэ́с кажнонэ́ бэршэстыр, нэ мэк ёв и тэ рипирэл пал калэ́ дывэса́, пал-дова́, со ёнэ явэ́на бут: саро́, со явэ́ла, исын харныпэ́н.9. Ра́дынпэ (лошалёв), тэрно́ ману́ш, тырэ́ тэрныпнастыр, и мэк тыро́ ило́ тэ ґаздэл тыро́ ду́хо (фа́но) дрэ дывэса́, ке́ли ту сан тэрно́; и псир одо́й, кай тыро́ ило́ подпхэнэла, и одори́к, карик тырэ́ якха́ тырдэнапэ, нэ ту екх джин, со пал дава́ саро́ Дэвэ́л выкхарэла тут пэ сэ́ндо.10. Тэ́ньци, на тугин дро пэ́скиро ило́, и чхув криг биба́хт тырэ́ масэ́ндыр [лочатыр-ю.о.], пал-дова́ со чхаворипэн и тэрныпэн исын харныпэ́н.Ecclesiastes 12:1-141. И ри́пир тырэ́ Создыибнаскирэс дрэ тырэ́ тэрныпнаскирэ дывэса́ анги́л дова́, сыр явэ́на пхарэ́ дывэса́ кэ пхурипэн, и сыр явэ́на дасавэ́ бэрша́, со ту пхэнэ́са пал лэ́ндэ: “Ма́ндэ нанэ лош (весёлыма) лэ́ндыр.”2. Анги́л дава́, сыр кхам и дуд, чхон и чэргэня́ ячэ́на цямлэ, и анги́л дава́, сыр о́блоки рисёна палэ брышындэстыр;3. анги́л дывэса́, сыр кхэри́тко ракхибнаскиро явэ́ла тэ издрал, и сыр зоралэ́ мурша́ явэ́на тэ кэрэ́н тэлэ́ шэрэнца; анги́л, сыр сявитка (мельницытка) бара́ тэрдёна дрэ буты́ пал дова́, со ёнэ явэ́на куты́ мануша́, и сыр мануша́, кон дыкхэ́на пир далэ́ дудаля (ставни), явэ́на сы́рбы дрэ мигла (мрако) тэ дыкхэ́н;4. анги́л дова́, сыр и вудара́ запхандэна пэ вули́ца (пэ га́са), ке́ли сявитконэскири (пхуртэскири) буты́ на явэ́ла шундлы; и ке́ли ёнэ явэ́на тэ уштэ́н чириклякирэ багаибнастыр, и ке́ли сарэ́ багаибнытка чхая́ явэ́на штыл.5. И адалэ́ мануша́ адя́кэ-паць явэ́на тэ дарэ́н вучипна́стыр, и ёнэ явэ́на тэ страхандён тэ джа́н пир дром, и лэ́нгирэ бала́ явэ́на парнэ́ адя́кэ, сыр миндалитко кашт лулудёла (цвэцинэла), и сыр скочко (грасторо) на явэ́ла дрэ ра́дыма, и сыр паты́в хасёла сы́рбы каперсытко кашт шутёла; пал-дова́ со мануша́ явэ́на тэ джа́н кэ лэ́нгиро ве́чно кхэр, и тэ́ньчи лэ́нгирэ ровибнаскирэ явэ́на тэ псирэ́н пир га́сы (пир вули́цы).6. [Ри́пир тырэ́ Создыибнаскирэс-ю.о.], анги́л дова́, сыр рупуно шэло кошэлапэ, ци сыр сувнакуно́ чаро́ пхадёла, ци сыр кхоро́ пхарадёла пашы́л фолахар (фонтано), ци сыр рота пхадёла пашы́л ґаны́нг;7. и рисёла пра́хо дрэ пхув, кай сыс ёв, а ду́хо (фа́но) рисёла кэ Дэвэ́л, Кон дыя́ лэс манушэ́скэ.8. Харныпэ́н харныпнастыр”, – пхэндя́ Сыклякирибна́скиро пал Дэвлэ́стэ. “Саро́ исын харныпэ́н.”9. И кэ дова́, со Сыклякирибна́скиро пал Дэвлэ́стэ сыс годо́, ёв усае́кх сыклякирдя́ манушэ́н джиныбнаскэ, и ёв роздыкхэлас кучэс, и родыя, и ёв чхувэлас екх пал екх сыр трэй притчы.10. Сыклякирибна́скиро пал Дэвлэ́стэ родыя тэ латхэл гожа лава́ и тэ зачхинэл пир чачипэ́н патяибнытка лава́.11. Годэ́-манушэ́нгирэ лава́ исын сы́рбы сувья [пхусадытка бустя́/стре́лы-ю.о.], а лэ́нгирэ притчы исын сы́рбы гвозди (карфина), со хор замарнапэ: ёнэ исын сарэ́ екхэ чхупнаристыр12. И ишчо (инкэ́): приракхпэ екхэстыр, ми́ро чха́ва: джинэ́са, нанэ ко́нцо (яго́ро) манушэ́ндыр тэ чхинэн лылваря, и ко́ли ту древа́н бут явэ́са тэ сыклёс, тэды ту кхинякирэса пэ́скирэ маса́.13. Явэ́н, вышунаса кэ ко́нцо (кэ яго́ро) чачипэ́н пал саро́ дава́: “Дар Дэвлэ́стыр и ри́кирпэ кэ Лэ́скирэ припхэныбэна́; пал-дова́ со дрэ далэ́ дуй чачипэна́ исын саро́, со трэй манушэ́скэ.14. Палдова́ со Дэвэ́л янэ́ла кажно буты́ тэ сэндякирэ́л, и кхэтанэ́ кажнонэ́ гарадэ́ кэрибнаса, ци ёв тэ явэ́л лачхо́, ци ёв тэ явэ́л бибахтало́.Psalms 103:15-2215. Манушэ́скирэ дывэса́ исын сы́рбы чар, сыр лулуди́ (цвэто), со исын пэ фэ́лда, адя́кэ-паць и ману́ш дживэ́ла:16. сы́рбы балва́л, со сы́гэс провурняла и нанэ лэс и нико́н на уджинэла лэ́скиро штэ́то.17. Нэ Ра́скирэ-Дэвлэ́скири лачхэ́-илы́ткима исын биконио́скиро (биягоро́скиро) ваш одолэ́нгэ, савэ́ дарэ́на Лэ́стыр, а лэ́скиро чачипэ́н ваш чхавэ́нгирэ чхавэ́нгэ,18. ваш одолэ́нгэ, савэ́ рикирэнапэ кэ Лэ́скиро Завето, савэ́ рипирэна и кэрэ́на адя́кэ-паць пир Лэ́скирэ припхэныбэна́.19. Рай Дэвэ́л зачхудя троно Пэ́скэ пэ болыбэ́н и лэ́скиро кралипэ́н рикирэ́ла зор пир саро́.20. Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ Янго́лы, савэ́ исын древа́н зоралыпнаскирэ, савэ́ кэрэ́на пир лэ́скиро лав, савэ́ кандэ́на лэ́скиро лав.21. Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ болыбна́скирэ Янго́лы, сарэ́ тумэ́, кон дынаринэла Лэ́скэ, кон кэрэ́ла пир Лэ́скири во́ля.22. Славинэ́н и парикирэ́н Ра́скэ-Дэвлэ́скэ, сарэ́ Лэ́скирэ бутя́, дрэ сарэ́ Лэ́скирэ штэ́ты, кай Ёв рикирэ́ла зор! Славин и парикир Ра́скэ-Дэвлэ́скэ, миро ди.Proverbs 24:13-1413. Мро чха́ва? Ха авги́н, пал-дова́ со ёв исын лачхо́, и авгинытко сото, саво́ исын гудло́ ваш тыро́ кирло [смако-ю.о.]:14. адя́кэ-паць явэ́ла ваш тумаро́ ди джиныбэ́н пал годыпэ́н; ке́ли тумэ́ латхнэ́ лэс, тэды исын англыпэ́н, и тумари́ наде́я на хасёла.1 Korinťanenge 11:1-161. Кэрэ́н адя́кэ-паць, сыр и мэ, пал-дова́ со мэ кэра́ва адя́кэ-паць, сыр Христо́со.2. Мэ шарава тумэн, пшала́лэ, со тумэ́ рипирэна пал ма́ндэ; и пал дова́, со тумэ́ рикирэ́на далэ́ упхэныбэна́, сыр мэ и сыклякирдём тумэн.3. Нэ мэ кама́м, соб (кай) тумэ́ тэ джинэ́н, со Христо́со исын Шэрало́ пэ сарэ́ муршэндэ, а ром исын шэрало́ пэ ромня́тэ, и Дэвэ́л Дад исын Шэрало́ пэ Христосо́стэ.4. Мурш, саво́ мангэлапэ Дэвлэ́скэ, ци ангилпхэнэла запхандлэ вари-со́са шэрэ́са, сы́рбы подчхувэла лэ́скиро шэро́ ваш Христосо́скиро ладжаипэ́н.5. Нэ джувлы́, сави́ мангэлапэ Дэвлэ́скэ, ци ангилпхэнэла назапхандлэ нисоса шэрэ́са сы́рбы подчхувэла пэ́скиро шэро́ ваш Христосо́скиро ладжаипэ́н; пал-дова́ со кадава́ исын адя́кэ, сы́рбы ёй тэ явэ́л мурадэ́ шэрэ́са.6. Палдава́, ко́ли джувлы́ на запхандэла нисоса пэ́скиро шэро́, мэк ла́кирэ бала́ тэ явэ́н обчхиндлэ́.7. А ко́ли исын ладжаво джувля́кэ, соб (кай) ла́кирэ бала́ тэ явэ́н обчхиндлэ́ ци тэ явэ́н мурадэ́, мэк ёй тэ запхандэл вари-со́са шэро́. Палдава́ муршэскэ на трэй тэ запхандэл шэро́, пал-дова́ со мурш исын сы́рбы Дэвлэ́скири патри́н (о́бразо) дрэ манушэ́стэ, и мурш сы́рбы зяинэла Дэвлэ́скирэ ярконэ слава́са, а джувлы́ сы́рбы зяинэла ла́кирэ-ромэскирэ слава́са.8. Пал-дова́ со мурш нанэ создыно́ джувлятыр, а джувлы́ исын муршэстыр.9. И мурш нанэ создыно́ ваш джувля́кэ, а джувлы́ исын создыны́ ваш муршэ́скэ.10. Палдава́ джувля́кэ трэй тэ лыджа́л шпэ́ра (знако) пэ шэро́, со ёй исын вари-конэ́скири ваш Янголэнгэ.11. Нэ усае́кх ромны́ нанэ во́льно ромэстыр, ни ром исын во́льно ромнятыр дро джиибэ́н, саво́ исын дро кхэтаныпэн Исусо́са.12. Палдава́, сыр ромны́ исын ромэстыр, адя́кэ-паць ром пир ромня́тэ, нэ усае́кх саро́ исын Дэвлэ́стыр.13. Сэндинэн кокорэ́: ци дава́ исын шука́р джувля́кэ тэ мангэ́лпэ Дэвлэ́скэ назапхандлэ́ шэрэ́са?14. Ци свэ́то кокоро́ на сыклякирэ́ла тумэн со, ко́ли ром барьякирэ́ла бала́, дава́ исын ладж лэ́скэ?15. Нэ джувлы́, ко́ли барьякирэ́ла бала́, дава́ исын сла́ва ла́кэ; пал-дова́ со длэнгэ бала́ исын сы́рбы дыкхло.16. А ко́ли вари-кон камэ́ла тэ чингардэлпэ, амэ́ндэ нанэ дасаво присыкляибэн, адя́кэ-паць и пэ Дэвлэ́скирэ скэдыибэна. Romani Bible Baltic 2019 Maintained by the United Bible Societies for the Baltic Romani Mission