Beblia

1. Акэ, дро дэшуявир чхон, дро чхон Адаро, пэ лэ́скиро дэшутрито дывэ́с, дрэ саво́ явдя́ часо тэ сполнинэ́лпэ крали́скиро припхэныбэ́н и лэ́скирэ упхэныбэ́н, дро дова́ дывэ́с, ке́ли мыслиндлэ дро ило́ Юдэ́нгирэ вэ́рги тэ пиризорьякирэн лэн, а выгия́ пэ яви́р, со кокорэ́ Юды лынэ́ зор пэ лэ́нгирэ вэргэ́ндэ.

2. Скэдынэ́пэ Юды дрэ пэ́скирэ фо́рья, пир сарэ́ провинцыи Артаксерксоскирэ крали́скирэ, соб (кай) тэ чхувэ́н васт пэ пэскирэндэ вэргэ́ндэ; и нико́н на могиндя́ тэ вытэрдёл анги́л лэ́нгиро муй, пал-дова́ со дар анги́л лэ́ндэ пыя́ пэ сарэ́ манушэ́ндэ.

3. И сарэ́ тхэмэ́скирэ (государствалэ) рая дрэ провинцыи, и шэралэ́ и тхэмэ́скирэ барыдыра́, и мануша́, савэ́ сполнинэна крали́скирэ рэ́нды подрикирэнас Юдэ́н, пал-дава́ со пыя́ пэ лэ́ндэ дар анги́л Мардохеёстэ.

4. Пал-дова́ со Мардохе́ё барэ́ манушэ́са яця́ дрэ крали́скири фэлатин, и мавлы́н (малва) пал лэ́стэ псирдя́ пир сарэ́ провинцыи, адя́кэ сыр дава́ ману́ш, Мардохе́ё, ґаздэласпэ вучэ́с и вучэ́с.

5. И мардэ́ Юды сарэ́н пэскирэн вэргэ́н, чингирдэ куртала́са, мулякирдэ́ и традынэ, и кэрдэ́ пэ́скирэ вэргэнца со сыс лэ́ндэ пэ годы́.

6. Дрэ Сузы, шэрутно фо́ро, замардэ́ Юды и мулякирдэ́ панджшэла́ манушэ́н.

7. И Паршандафос, и Далфонос, и Асфафос.

8. И Порафос, и Адальяс, и Аридафас,

9. И Пармашфас, и Арисаёс, и Аридаёс, и Ваиезафос, –

10. Дэшэн Аманоскирэ чхавэ́н Амадафоскирэ [Гамедатоскирэ-ю.о.] чхавэ́с, Юдэ́нгирэ вэргос, замардэ́ ёнэ, а пэ чорибэн ёнэ на чхудэ́ пэ́скиро васт.

11. Дрэ дова́-паць дывэ́с роспхэндлэ́ крали́скэ, кицы́ манушэ́н замардэ́ дрэ крали́скири фэлатин Сузы.

12. И пхэндя́ кра́ли кралицакэ Эстэракэ: “Дрэ крали́скири фэлатин Сузы Юды замардэ́ и мулякирдэ́ панджшэла́ манушэ́н и дэшэн Аманоскирэ чхавэ́н; со кэрдэ́ ёнэ дрэ яви́р провинцыи крали́скирэ? Саво́ исын мангипэ́н тыро́? И ёв явэ́ла кэрдо́. И саво́ ишчо (инкэ́) мангипэ́н исын тыро́? И ёв явэ́ла кэрдо́.”

13. И пхэндя́ Эстэ́ра: “Ко́ли крали́скэ явэ́ла пир ило́, тэды мэк тэ явэ́л дэны во́ля Юдэ́нгэ, савэ́ исын дрэ Сузы, тэ кэрэ́н дова́-паць и атася́, со ададывэ́с, и соб (кай) тэ ублавэн дэшэн Аманоскирэ чхавэ́н пэ кашт.”

14. И припхэндя́ кра́ли тэ кэрэ́н адя́кэ; и дыно́ пэ дава́ упхэныбэ́н дрэ Сузы, и дэшэн Аманоскирэ чхавэ́н убладэ.

15. И скэдынэ́пэ Юды, савэ́ сыс дрэ Сузы, адя́кэ и пэ дэшуштарто дывэ́с чхонэ́скиро Адароскиро, и замардэ́ дрэ Сузы триншэла́ манушэ́н, а пэ чорибэн на чхудэ́ пэ́скиро васт.

16. И яви́р Юды, савэ́ сыс дрэ крали́скирэ провинцыи, скэдынэ́пэ, соб (кай) тэ затэрдён пал пэ́скиро джиибэ́н и, соб (кай) тэ явэ́л рама́нё (миро) пэ́скирэ вэргэ́ндыр, и ёнэ замардэ́ пэ́скирэ вэргэ́ндыр охтодэша́ пандж тысёнцы (бара́), а пэ чорибэн на чхудэ́ пэ́скиро васт.

17. Дава́ сыс пэ дэшутрито дывэ́с чхон Адароскиро; а пэ дэшуштарто дывэ́с дова́-паць чхон ёнэ штылынэ и кэрдэ́ лэс свэнкитконэ дывэсэса и радыма́са.

18. Юды, савэ́ сыс дрэ Сузы, скэдынэ́пэ пэ лэ́скиро дэшутрито дывэ́с и пэ лэ́скиро дэшуштарто дывэ́с; а пэ лэ́скиро дэшупанджто дывэ́с штылынэ, и кэрдэ́ лэс свэнкитконэ дывэсэса и радыма́са.

19. Палдава́ Юды гавитка, савэ́ дживдэ́ дрэ отчхакирдэ гава́, пролыджана дэшуштарто чхонэ́скиро дывэ́с Адаро дрэ ра́дыма и свэ́нко, сыр свэнкитко дывэ́с, би́чхави почасту́нки екх екхэ́скэ.

20. И зачхиндя́ Мардохе́ё дая́ ваканцыя (случаё), и бичхадя́ лыла́ кэ сарэ́ Юды, савэ́ дживдэ́ пир Артаксерксоскирэ-крали́скирэ провинцыи, кэ пашатунэ́ и кэ дуратунэ́,

21. ваш дова́, соб (кай) ёнэ тэ кэрэ́н кажно бэрш свэ́нко пэ́стэ пэ дэшуштарто дывэ́с чхонэ́скиро Адаро и пэ лэ́скиро дэшупанджто дывэ́с.

22. Адя́кэ дасавэ́ дывэса́, дрэ савэ́ Юды кэрдэ́пэ штыл пэ́скирэ вэргэ́ндыр, и адя́кэ дасаво чхон, дрэ саво́ пиририсия лэ́ндэ смэнтныма дрэ ра́дыма, и пхарипэ́н – дро свэнкитко дывэ́с, соб (кай) тэ кэрэ́н лэ́нгирэ мануша́ свэ́нко и ра́дыма (лош), бичхави екх екхэ́скэ почасту́нки и дыибэ́н чорорэнгэ.

23. И прилынэ́ Юды дова́ присыкляибэн, со кокорэ́ лынэ́ тэ кэрэ́н, и пал со Мардохе́ё чхиндя́ кэ ёнэ.

24. Сыр Ама́но, Гамедатоскиро чхаво́, Вугеянино, сарэ́-Юдэ́нгиро вэ́рго, думиндя тэ замарэ́л Юдэ́н и чхурдыя́ Пур, со исын кокалко (жрэбиё) пал лэ́нгиро традыпэн криг и замарибэн.

25. Нэ сыр Эстэ́ра догия́ кэ кра́ли, и сыр кра́ли припхэндя́ нэвонэ́ лылэса, соб (кай) калэ́ задумки Аманоскирэ, савэ́ ёв придуминдя пэ Юдэ́ндэ, обрисинэ пэ лэ́скиро шэро́, и соб (кай) лэс и чхавэ́н лэскирэн тэ ублавэн пэ вэшына (кашт).

26. Палдава́ и кхардэ́ далэ́ дывэса́ Пурим, лавэ́стыр “пур.” Палдава́, пир сарэ́ далэ́ лылэскирэ лава́ и долэса, со кокорэ́ дыкхнэ́ и кэ со лэ́ндэ догия́,

27. зачхудэ Юды и прилынэ́ пэ пэ́стэ и пэ чхавэ́ндэ пэскирэндэ и пэ сарэ́ндэ, кон кхэтанякирэлапэ лэ́нца, на отпаруви, соб (кай) тэ свэнкинэн далэ́ дуй дывэса́, пир чхиныбнаскиро упхэныбэ́н пал лэ́ндэ и дрэ пэ́скиро ваш лэ́нгэ часо, кажно бэрш.

28. И, соб (кай) далэ́ дывэса́ тэ рипирэ́н и тэ свэнкинэн дрэ сарэ́ ро́ды, дрэ кажно чэ́карь (кхэри́тко ро́до), дрэ кажно провинцыя и дро кажно фо́ро; и соб (кай) далэ́ дывэса́ Пурим тэ на отпарувэнпэ Юдэ́ндэ, и рипирибэ́н пал лэ́ндэ тэ на хасёл лэ́нгирэ чхавэ́ндэ.

29. Адя́кэ-паць зачхиндя́ кра́лица Эстэ́ра, Абихаилоскири чхай, и Мардохе́ё Юдо, сарэ́ зорья́са, соб (кай) тэ сполнинэн дава́ яви́р лыл пал Пуримо.

30. И бичхадя́ Мардохе́ё лыла́ кэ сарэ́ Юды, кэ шэл тэ биш тэ эфта́ Артаксерксоскирэ-кралипнэнгирэ провинцыи, мироскирэ и чачипнаскирэ лавэ́нца,

31. соб (кай) ёнэ зоралэ́с тэ ракхэ́н далэ́ дывэса́ ваш Пуримо дрэ пэ́скиро часо, саво́ чхудя́ пал лэ́ндэ Мардохе́ё Юдо и кра́лица Эстэ́ра, и сыр ёнэ кокорэ́ упхэндлэ ваш пэ́скэ и ваш пэ́скирэ чхавэ́нгэ дрэ пхарэ́ дывэса́, ке́ли ёнэ постинэнас и ровэнас годлэнца.

32. Адя́кэ Эстэракиро упхэныбэ́н кэрдя́ зоралэды́р дава́ лав пал Пуримо, и ёв сыс зачхиндло́ дрэ лылвари́.

1. Пало́ (после) дова́ чхудя́ такса кра́ли Артаксе́рксо тэ подэн пэ пхув и пэ морёскирэ (дэрьявэ́скирэ) островы (джипа́).

2. Акэ, сарэ́ лэ́скирэ барэ́ рэ́нды, и укратуно (точно) сыкаибэ́н пал Мардохеёскиро барипэ́н, савэ́са ґаздыя́ лэс кра́ли, чхиндло́ дрэ лылвари́ ваш дывэсэнгирэ чхиныбэ́н Мидиякирэ и Персиякирэ кралье́нгирэ.

3. Адя́кэ-паць, сыр и дова́, со Мардохе́ё Юдо сыс яви́р ману́ш пал крали́стэ Артаксерксостэ и сыс баро́ ману́ш ваш Юдэ́нгэ и ёв сыс пир ило́ ваш бутэнгэ пэскирэндэ пшалэ́нгэ, пал-дова́ со ев родыя лачхипэ́н пэ́скирэ манушэ́нгэ и ракирдя́ пал рама́нё (миро) сарэ́ пэ́скирэ родо́скэ.

1. Кодова́, Саво́ дживэ́ла дро Най Вучэдырэскиро штэ́то, явэ́ла тэ дживэ́л тэл Сарэзорьякири зэр (тенё).

2. И ёв тэ пхэнэ́л Ра́скэ-Дэвлэ́скэ: “Миро гарадыипэн и мири́ тва́рдыма (диз). Миро Дэ́вла! Мэ рисёва́ва кэ Ту тэ зракхавпэ.”

3. Чачо́, Ёв вытырдэла тут чирикларискирэ (ловцоскирэ) фэлятыр, хасибнытконэ франсэндыр.

4. Ёв учхакирэ́ла тут Пэ́скирэ порэнца и ту латхэса гарадаипэн тэл Лэ́скирэ пхака́: лэ́скиро чачипэ́н явэ́ла тэ бронинэл и тэ затэрдёл пал Ту́тэ.

5. Ту на явэ́са тэ дарэс трашаибнастыр раты́, и марибнытконэ́ бустятыр (стрелатыр), со вурняла дывэсэ́;

6. и франсэндыр (язватыр), со псирэ́на раты́, ци хасякирибнытконэ моровостыр (заразатыр), со чорьёла дывэсэ́.

12. Ра́скирэ-Дэвлэ́скирэ якха́ ракхэна джиныбэ́н, нэ Ёв равэла тэлэ́ лава́, савэ́ исын напатяибнаскирэ манушэ́ндыр.

1. Со ж амэ пхэна́са? Ци тэ ячаспэ амэ́нгэ дро грэ́хо, соб (кай) тэ барьёл Дэвлэ́скиро бахталыпэ́н?

2. Над. Амэ мыям ваш грэ́хо, сыр амэ могинаса дурэды́р тэ джива́с дрэ лэ́стэ?

3. Ци тумэ́ на джинэ́на, со сарэ́ амэ, кон болдяпэ дрэ Исусо́стэ Христосо́стэ, дрэ Лэ́скиро мэрибэ́н болдямпэ?

4. И адя́кэ амэ мыям кхэтанэ́ Лэ́са пир болдыипэн дрэ мэрибэ́н, соб (кай), сыр Христо́со сыс отджидякирдо мулэ́ндыр Дэвлэ́скирэ слава́са, адя́кэ и амэ́нгэ тэ джива́с дрэ нэво́ джиибэ́н.

5. Пал-дова́ со, ко́ли амэ кхэтанякирдямпэ Лэ́са дро Лэ́скиро мэрибэ́н, тэды амэ сам бангэ́ (мусинаса) тэ явас адасавэ́-паць, сыр екх Лэ́са и дро Лэ́скиро отджидыибэн,

6. и амэ джина́са, со ману́ш, саво́ англэды́р сы́рбы дживдя́ дрэ амэ́ндэ, сыс примардо пэ трушу́л Лэ́са ваш дова́, соб (кай) амарэ́ грэхи́тка маса́ тэ хасякирэ́н пэ́скири зор ваш чорипэ́н, и соб (кай) амэ тэ на явас буты́р дына́рья грэхо́скэ.

7. Пал-дова́ со, кон мыя́, буты́р на могинэ́ла тэ кэрэ́л грэ́хо.

8. Ко́ли амэ мыям Христосо́са, тэды амэ патя́са, со и тэ джива́с ява́са Лэ́са,

9. и амэ джина́са, со Христо́со отджидыя́ мулэ́ндыр, и какана́ буты́р мэрибэ́н на рикирэ́ла зор пэ Лэ́стэ.

10. Пал-дова́ со, ке́ли Ёв мыя́, тэды Ёв мыя́ е́кхвар ваш грэ́хо, нэ Ёв какана́ дживэ́ла ваш Дэвлэ́скэ.

11. Адя́кэ-паць и тумэ́ гинэн пэс мулэ́нца ваш грэ́хо, нэ тумэ́ гинэн пэс джидэ́нца ваш Дэвлэ́скэ дрэ Исусо́стэ Христосо́стэ.

12. Пал-дова́ со, мэк тэ на дживэ́л грэ́хо дрэ тумарэ́ маса́, саво́ дживэ́ла на ве́чнэс, соб (кай) тумэ́нгэ тэ на поддэнпэ лэ́скирэ тырдыпнаскэ.

13. И на отдэ́н тумарэ́ маса́ грэхо́скэ сы́рбы дрэ васта́ ваш начачипэ́н, а тумэ́ отдэ́н фэды́р пэс Дэвлэ́скэ, сыр тумэ́ сы́рбы отджидынэ мулэ́ндыр дрэ джиибэ́н, и отдэ́н тумарэ́ маса́ дрэ Дэвлэ́скирэ васта́ ваш чачипэ́н.

14. Пал-дова́ со грэ́хо на явэ́ла буты́р пэ тумэ́ндэ тэ хулаинэ́л: пал-дова́ со тумэ́ какана́ сан на тэл Зако́но, а тэл бахталыпэ́н.

15. И тэды, ци ява́са амэ тэ кэра́с грэ́хо, пал-дова́ со какана́ амэ сам на тэл Зако́но, а тэл бахталыпэ́н? Над.

16. Ци на джинэ́на тумэ́, со конэ́скэ тумэ́ отдэна пэс сыр дына́ри дрэ кандыпэн, тумэ́ сан и дына́рья одолэ́скэ, конэ́с тумэ́ кандэ́на: ци тэ явэ́л дава́ грэ́хо, саво́ лыджа́ла кэ мэрибэ́н, ци тэ явэ́л дава́ грэ́хо пир кандыпэн, саво́ лыджа́ла кэ чачипэ́н?

17. Нэ парикираса Дэвлэ́скэ, со тумэ́ ж са́нас англэды́р бутярнэ́ ваш грэ́хо, а тумэ́ какана́ лынэ́ тэ шунэ́н сарэ́ илэ́стыр дова́ сыкляибэн, савэ́скэ тумэ́ отдынэ́ пэс.

18. А ке́ли тумэ́ гинэ́ криг грэхостыр, и тэды тумэ́ ячнэ́ писхарьёнца ваш чачипэ́н.

19. Мэ ракира́ва тумэ́нгэ пал дава́ манушытконэ́ лавэ́нца, ваш дова́, соб (кай) тумэ́ тэ ґалён. Адя́кэ, сыр тумэ́ англэды́р отдэнас тумарэ́ лочакирэ маса́ дрэ магирдо́ писхарибэн и проти Зако́но, то какана́ отдэ́н тумарэ́ маса́ дрэ писхарибэн чачипнаскэ пэ свэ́нта рэ́нды.

20. Пал-дова́ со, ко́ли тумэ́ и са́нас грэхоскирэ писха́рья, тэды тумэ́ са́нас вольна чачипнастыр.

21. Савэ лачхэ́ рэ́нды тумэ́ тэды кэрдэ́? Долэ́, савэ́ндыр тумэ́ какана́ кокорэ́ ладжана, пал-дова́ со лэ́нгиро ко́нцо (яго́ро) исыс мэрибэ́н.

22. Нэ какана́, ке́ли тумэ́ сан вольна грэхостыр и ячнэ́ Дэвлэ́скирэ писхарье́нца, тумэ́ндэ исын свэ́нто отдыибэ́н Лэ́стыр и тумэ́ндэ исын ко́нцо (яго́ро) пэ дава́, саво́ исын ве́чно джиибэ́н.

23. Пал-дова́ со плэскирибэн пал грэ́хо исын мэрибэ́н, а Дэвлэ́скиро тала́но пир бахталыпэ́н исын ве́чно джиибэ́н дрэ Исусо́стэ Христосо́стэ, амарэ́ Растэ-Дэвлэ́стэ.

Romani Bible Baltic 2019

United Bible Societies for the Baltic Romani Mission