Bible in one year
August 5

1. Екх ману́ш сыс пэ пхув Уц, лэ́скиро лав сыс Ио́во, ёв сыс бибангипнаскиро и дэвлы́тко ману́ш. Ёв дарандыя (дардяпэ) Дэвлэ́стыр и обрикирэлас пэс тэ кэрэ́л биба́хт.
2. И лэ́стэ латхнэпэ эфта́ чхавэ́, и трин чхая́.
3. И лэ́стэ сыс дасаво миштыпэ́н: эфта́ бара́ (тысёнцы) бакрэ́, трин бара́ верблюды, пандж шэла́ гурувэнгирэ пары тэл ґа́мо, пандж шэла́ ослицы и древа́н бут дына́рья. И ёв сыс най барэды́р ману́ш пэ Васто́ко.
4. И лэ́скирэ чхавэ́ явэ́нас и свэнкинэнас кажно (сва́ко) дро пэ́скиро кхэр, дро дывэ́с, сыр лэ́скэ трэй, и ёнэ бичхавэнас и кхарэнас кэ пэ пэ́скирэ тринэ́ пхэнен тэ хан и тэ пьен лэ́нца.
5. И сыс адя́кэ: сыр свэнкитка дывэса́ кончынэнаспэ, одова́ Ио́во бичхавэлас пал чхавэ́ндэ, соб (кай) тэ освэнцынэн лэн. Ёв уштэлас тася́рлэс (ра́нэс) пэ зло́ко (пэ ра́нко), и ёв хачкирэлас свэ́нто яныбэ́н пал кажнонэ́ (сваконэ) чхавэ́стэ; пал-дова́ со Ио́во ракирдя́: “Мирэ́ чхавэ́, хай, могиндлэ́ тэ кэрэ́н грэ́хи и тэ кошэн Дэвлэ́с дрэ пэ́скирэ илэ.” Адя́кэ ўса́ды (сак) кэрдя́ Ио́во.
6. И, акэ, сыс дывэ́с, ке́ли Дэвлэ́скирэ чхавэ́ (Янго́лы) явнэ́ тэ сыкадён анги́л Растэ-Дэвлэ́стэ, и на́лачхо явдя́ адя́кэ-паць лэ́нца.
7. И пхэндя́ Рай Дэвэ́л налачхэскэ: “Каты́р ту явдя́н?” И на́лачхо отпхэндя́ и пхэндя́: “Мэ псирдём одори́к и палэ пир пхув и штадём пир пхув упрэ́ и тэлэ́.”
8. И пхэндя́ Рай Дэвэ́л налачхэскэ: “Ци придыкхцянпэ ту кэ Миро писха́ри Ио́во? Нанэ манушэ́с пэ пхув, кон исын адасаво́ бидошэ́нгиро и дэвлы́тко, саво́ дарэ́ла Дэвлэ́стыр и обрикирэла пэс тэ кэрэ́л биба́хт?”
9. И на́лачхо отпхэндя́ Ра́скэ-Дэвлэ́скэ и пхэндя́: “Ци простэс Ио́во дарэ́ла Дэвлэ́стыр?
10. Ци на Ту кэрдя́н тыно трусця́л лэ́стэ, и трусця́л лэ́скиро кхэр, и трусця́л кажно миштыпэ́н, со исын лэ́стэ? Ту бахтякирдян лэ́скирэ-вастэнгирэ бутя́ и лэ́скиро барвалыпэ́н адя́кэ бут, со розбария пэ пхув.
11. Нэ Ту, ґа́да, фэ́ни (то́ка) лэ Пэ́скирэ вастэ́са и закэдэ саро́, со исын лэ́стэ, и ёв, чачэс, на явэ́ла тэ бахтякирэ́л Тут!”
12. И пхэндя́ Рай Дэвэ́л налачхэскэ: “Акэ, саро́ лэ́скиро исын дро тыро́ васт, фэ́ни на чилав Иовос кокорэс.” Тэ́ньци на́лачхо гия́ криг одотхы́р, кай сыс Рай Дэвэ́л.
13. И сыс дро е́кх дывэ́с, ке́ли лэ́скирэ чхавэ́ и чхая́ ханэ́ и пинэ́ мол (вино) кэ екхэ-пшалэскиро кхэр, саво́ сыс пэ́рво (англатуно́) дадэ́стэ.
14. И, акэ, явдя́ екх бичхадо́ ману́ш кэ Ио́во и пхэндя́: “Гурува ханэ́ чар и ослицы пал лэ́ндэ,
15. сыр Сабакирэ мануша́ (Савеяни) пынэ́ пэ лэ́ндэ и лынэ́ лэн – дыкхэ́н, ёнэ мулякирдэ́ тырнэ-бэршэскирэн курталакирэ (мечоскирэ) чхиныбнаса: и мэ екхджино́ насцём тэ пхэна́в ту́кэ.”
16. Ке́ли ёв ишчо (инкэ́) ракирдя́, яви́р бичхадо́ ману́ш явдя́ и пхэндя́: “Дэвлэ́скири яг – блискавица, пыя́ болыбна́стыр и схачкирдя́ бакрэ́н и тэрнэ́-бэршэскирэн и выхая лэн, и мэ екхджино́ яцёмпэ джидо́ тэ пхэна́в ту́кэ!”
17. Ке́ли ёв ишчо (инкэ́) ракирдя́, яви́р бичхадо́ ману́ш явдя́ и пхэндя́: “Э Халде́и кэрдэ́ трин шайки, пынэ́ пэ верблюдэндэ и лынэ́ лэн, и чачо́, – замардэ́ курталакирэ чхиныбнаскирэса дынарье́н, и мэ екхджино́ яцёмпэ джидо́ тэ пхэна́в ту́кэ!”
18. Ке́ли ёв ишчо (инкэ́) ракирдя́, три́то бичхадо́ ману́ш явдя́ и пхэндя́: “Тырэ́ чхавэ́ и чхая́ ханэ́ и пинэ́ мол кэ лэ́нгиро пшал, кон исын англатуно́;
19. и, ґа́да, яця́ бари балва́л, со явдя́ чхучэ́ прахэндыр и пэкадя́ пир штар кхэрэ́скирэ кунты и кхэр пыя́ пэ тэрнэ́ манушэ́ндэ, и ёнэ исын мулэ́, и мэ, екхджино́, яцёмпэ джидо́ тэ пхэна́в ту́кэ!”
20. И уштыя́ Ио́во и рискирдя́ пэ́скиро урибэ́н, и мурадя сарэ́са пэ́скиро шэро́, и пыя́ пэ пхув, дыя́ паклоно,
21. и пхэндя́ ёв: “Нанго мэ рисёва́ва одори́к палэ: Рай Дэвэ́л дыя́ и Рай Дэвэ́л лыя́ криг; тэ явэ́л шардо Ра́скирэ-Дэвлэ́скиро лав!”
22. Пало́ саро́ дава́ со кэрдя́пэ, Ио́во на пхэндя́ грэхи́тко лав, ци адя́кэ-паць ёв на бангякирдя Рас-Дэвлэ́с ни дро со.
1. И сыс дывэ́с, ке́ли Дэвлэ́скирэ чхавэ́ (Янго́лы) явнэ́ тэ сыкадён анги́л Растэ-Дэвлэ́стэ, и на́лачхо адя́кэ-паць явдя́ машки́р лэ́ндэ тэ сыкадёл анги́л Растэ-Дэвлэ́стэ.
2. И пхэндя́ Рай Дэвэ́л налачхэскэ: “Каты́р ту явдя́н? И на́лачхо отпхэндя́ Ра́скэ-Дэвлэ́скэ и пхэндя́: “Мэ псирдём одори́к и палэ пир пхув и штадём пир пхув упрэ́ и тэлэ́.”
3. И Рай Дэвэ́л пхэндя́ налачхэскэ: “Ци придыкхцянпэ ту пэ миро дына́ри Ио́во? Нанэ ние́кх ману́ш пэ пхув, кон тэ явэ́л адасаво́ бидошэ́нгиро и дэвлы́тко, саво́ дарэ́ла Дэвлэ́стыр и обрикирэла пэс тэ на кэрэ́л биба́хт? И саво́ сарое́кх рикирэ́лапэ зоралэ́с дро пэ́скиро бибангипэн, на дыкхи́ пэ дова́, со ту подхачкирдян ман пэ лэ́стэ, соб (кай) Мэ тэ хасякира́в лэс би причынакиро.”
4. И на́лачхо отпхэнэ́лас Ра́скэ-Дэвлэ́скэ и пхэндя́: “Цы́па пал цы́па, и, чачо́, ману́ш саро́ отдэ́ла пал пэ́скиро джиибэ́н.
5. Нэ ту протырдэ анги́л Тыро́ васт и чилав лэ́скирэ кокалы́, и, лэ́скирэ маса́, и подыкх, ци бахтякирэ́ла ёв тут [ёв, чалэ́с, кэрэ́ла прокошыбэ́н (арман) пэ ту́тэ кэ муй Тыро́-ю.о.].”
6. И пхэндя́ Рай Дэвэ́л налачхэскэ: “Акэ, ёв исын дро тыро́ васт, нэ ту зра́кх лэ́скиро джиибэ́н.”
7. И на́лачхо гия́ криг Ра́стыр-Дэвлэ́стыр, и ёв дукхадя Иовос холямэ́ проказаса (дукханэ франсэнца) ґэрьякирэ подэшватыр кэ лэ́скиро шэро́.
8. И лыя́ Ио́во ваш пэ́скэ котэ́р (куско) чэрепичнонэ пирьятыр, соб (кай) лэ́са тэ рандэл кокоро́ пэс; и бэсця́ ёв машки́р пра́ска (пе́пло).
9. И пхэндя́ лэ́скири ромны́ лэ́скэ: “Ту сароекх рикирэсапэ зоралэ́с дро пэ́скиро бибангипэн. Прокош (кэр арманя) Дэвлэ́с и мэр.”
10. Нэ ёв пхэндя́ ла́кэ: “Ту ракирэ́са сыр е́кх пхарэ́-шэрэскирэ джувлендыр, сави́ пхэнэлас: амэ адя́кэ-паць дорэсцям лачхипэ́н Дэвлэ́стыр, и ци амэ́нгэ адя́кэ-паць тэ на прилас биба́хт?” Пало́ саро́ дава́ Ио́во на пхэндя́ грэ́хо пэ́скирэ уштэ́нца.
11. И явнэ́ трин Иовоскирэ дру́ги (мала́), ке́ли ёнэ шундлэ́ пал сари́ биба́хт, со пыя́ пэ лэ́стэ. И кажно (сва́ко) лэ́ндыр явдя́ пэ́скирэ штэто́стыр: О Элифазо Феманостыр, о Вилдадо Савхеятыр [Шуахостыр-ю.о.], о Софаро (Цофаро) Наамитостыр; и ёнэ доракирдэпэ тэ явэ́н, соб (кай) тэ тугинэн лэ́са, и соб (кай) тэ подрикирэн лэс дро ду́хо (фа́но).
12. И сыр ёнэ ґаздынэ́ пэ́скирэ якха́ дура́л, тэды ёнэ на пинджкирдэ (на ґалынэ́) лэс; ёнэ дынэпэ тэ ровэ́н зоралэ́с. Кажно лэ́ндыр рискирдя́ пэ́скиро урибэ́н, чхурдыя́ пра́хо упрэ́ пэ болыбэ́н пэ пэ́скиро шэро́.
13. И ёнэ бэшнэ́ кхэтанэ́ лэ́са пэ пхув пэ эфта́ (битринэ́нгиро дэш) дывэса́ и эфта́ ратя, и ние́кх лэ́ндыр на пхэндя́ лав лэ́скэ, пал-дова́ со ёнэ дыкхнэ́, со лэ́скэ сыс древа́н пхаро́.
7. Мэк тысёнцо (бар) манушэ́н тэ пэрэ́н пашы́л тыри́ риг, и дэш бара́ паш тыри́ чачи́ (право) риг, нэ нисо́ на подджа́ла пашылэды́р кэ ту.
8. Ту фэ́ни явэ́са тэ дыкхэ́с пэ́скирэ якхэ́нца и дыкхэ́са отплэскирибэн фуе́ манушэ́нгэ.
9. Пал-дова́ со ту пхэндя́н “Раё Дэ́вла, Ту сан миро ґарадыипэн”, ту выкэдыян Най Вучэдырэскирэс тэ затэрдёл (тэ бронинэл) тут.
10. Ѓа́да, чорипэ́н на пирилэла тут и моро́вы на явэ́на пашы́л Тыри́ ша́тра.
11. Пал-дова́ со Дэвэ́л дэ́ла припхэныбэ́н Лэ́скирэ Янголэнгэ тэ дыкхэ́н пал Ту́тэ:
12. ёнэ явэ́на тэ лыджа́н тут пэ пэ́скирэ васта́, соб (кай) ту тэ на пэкавэс Пэ́скири ґэро́й пир бар.
13. Ту явэ́са тэ штавэс (тэ стэмпинэс упрэ́) пэ шчэрэстэ (левостэ) и сапэстэ ци ту штакирэса (тэ топчынэс) шчэрорэс и драконос.
13. Набутитко (кирнэ-масэ́нгиро) ману́ш пхэнэ́ла: “Шчэр (ле́во) исын яври́! Мэ ява́ва мулякирдо, пэ вули́цы (пэ га́сы).”
14. Фуе-джувленгиро муй исын хор ґанби́н (яма); пэрэ́ла одори́к кодова́ ману́ш, пэ конэ́стэ Рай Дэвэ́л холясо́ла.
1. Ци на джинэ́на тумэ́, пшала́лэ, со (мэ ракира́ва одолэ́нгэ, кон джинэ́ла Зако́но): Зако́но рикирэ́ла зор пэ манушэ́стэ, пака ёв исын джидо́?
2. Пал-дова́ со палоромитко джувлы́ исын спхандлы Законоса джидэ́ ромэса; нэ, ко́ли ла́киро ром мэрэ́ла, ёй ячэ́ла во́льно палоромитконэ Законо́стыр.
3. Ке́ли джувлы́ выджа́ла палоро́м пал явирэ́стэ, ко́ли ла́киро ром исын джидо́, ла явэ́на тэ кхарэ́н биладжакуня́са; нэ ко́ли ла́киро ром мэрэ́ла, тэды ёй исын во́льно Законо́стыр, и ёй на явэ́ла тэ гинэлпэ биладжакуняса, ке́ли ёй выджа́ла палоро́м пал явирэ́стэ.
4. Адя́кэ и тумэ́, пша́ла мирэ́, тумэ́ на сан тэл Законоскири зор, пал-дова́ со тумэ́ сан паш Христосо́скирэ масэ́ндыр, соб (кай) тумэ́ тэ явэ́н трэй Явирэ́скэ, Саво́ отджидыя́ мулэ́ндыр, и соб (кай) амэ тэ янас вари-саво́ лачхо́ дыибэ́н Дэвлэ́скэ.
5. Пал-дова́ со, ке́ли амэ дживдям пир лочакиро тырдыпэ́н, тэды Зако́но джангавэлас амэ́ндэ грэхи́тка камибэна, савэ́ сыс дрэ амарэ́ масэнгирэ паша́ и далэ́са амэ янасас дыибэ́н мэрибна́скэ;
6. а какана́, амэ яця́м вольна Законо́стыр, ке́ли амэ мыям ваш дава́ Зако́но, савэ́са амэ са́мас спхандлэ, соб (кай) тэ дынарина́с амэ́нгэ Дэвлэ́скэ пир нэво́ Ду́хо (Фа́но), а на пир пхурано́ Законоскиро чхиныбэ́н.
7. Со ж амэ пхэна́са? Нау́што Зако́но исын грэ́хо? Нисыр над! Нэ мэ на джинавас, со дава́ дасаво исын грэ́хо, ко́ли тэ на явэ́л Зако́но: мэ на сом Законоскиро, со дава́ исын дасаво тэ причхувэс ило́ кэ дова́, со на трэй, ко́ли Зако́но тэ на ракирэ́л: “На кам.”
8. Нэ грэ́хо латхя́ саштыпэн пир запхэныбэн и подмардя дрэ ма́ндэ кажно тырдыпэ́н, саво́ на трэй, пал-дова́ со би Законоскиро грэ́хо исын муло́.
9. Мэ вари-ке́ли дживдём би Законоскиро: а ке́ли явдя́ запхэныбэн, тэды и грэ́хо отджидыя́,
10. а мэ мыём. И выгия́, со запхэныбэн, саво́ исын дыно́ ваш джиибэ́н, яндя́ ма́нгэ мэрибэ́н:
11. пал-дова́ со грэ́хо пир запхэныбэн хохадя ман и мулякирдя́ лэ́са ман.
12. Палдава́ Зако́но исын свэ́нто, и запхэныбэн исын свэ́нто, и чачуно́ и лачхо́.
13. Ци адя́кэ выгия́, со лачхипэ́н яця́ ваш ма́нгэ мэрибнаса? Над. Нэ грэ́хо, соб (кай) тэ явэ́л бицяло́ сыр грэ́хо, ёв яндя́ ма́нгэ мэрибэ́н пир лачхипэ́н, соб (кай) грэ́хо пир запхэныбэн тэ явэ́л даранэс грэхиткэдыр, со исын буты́р.
14. Амэ джина́са, со Зако́но исын свэ́нто, а амэ сам грэхи́тка, и амарэ́ маса́ исын бикиндло грэхоскэ дро дынарибэ́н.
15. Мэ кокоро́ на ґалёвава, со мэ кэра́ва; пал-дова́ со мэ кама́м, мэ дова́ на кэра́ва, нэ со мэ древа́н на кама́м, мэ дова́ кэра́ва.
16. А ко́ли мэ кэра́ва дова́, со ма́нгэ на пир ило́, тэды мэ сом дро екхипэ́н Законоса, со ёв исын лачхо́.
17. Палдава́, акэ на мэ кокоро́ кэра́ва, а дава́ грэ́хо кэрэ́ла, саво́ дживэ́ла дрэ ма́ндэ.
18. Палдова́ мэ джино́м, со нисаво́ лачхипэ́н на дживэ́ла андра́л ма́ндэ; пал-дова́ со мэ кама́м тэ кэра́в лачхипэ́н, нэ мэ на могина́ва.
19. Пал-дова́ со мэ кэра́ва на дова́ лачхипэ́н, саво́ мэ кама́м, а чорипэ́н, саво́ мэ на кама́м, а мэ дова́ кэра́ва.
20. Ко́ли мэ кэра́ва дова́, со мэ на кама́м, тэды дава́ на мэ кэра́ва, а грэ́хо, саво́ дживэ́ла дрэ ма́ндэ.
21. И адя́кэ мэ ґалыём, со дасаво исын Зако́но, ко́ли мэ кама́м тэ кэра́в лачхипэ́н, а ма́ндэ выджа́ла чорипэ́н.
22. Палдава́ мэ радынавпэ Дэвлэ́скирэ Законо́стыр, саво́ дживэ́ла дрэ манушэ́стэ:
23. нэ дрэ мирэ́ масэнгирэ паша́, мэ дыкха́ва яви́р Зако́но, саво́ исын проти Зако́но мирэ́ годя́киро и саво́ кэрэ́ла ман грэхоскирэ писхариса, саво́ исын дрэ мирэ́-масэнгирэ паша́.
24. Саво́ бэдо мэ сом ману́ш! Кон тэ зракхэлас ман далэ́ мэрибнаскирэ масэ́ндыр?
25. Парикирава Дэвлэ́скэ пир Исусо́стэ Христосо́стэ, амарэ́ Растэ-Дэвлэ́стэ. И ґа́да, мэ кокоро́ годя́са дынарина́ва Дэвлэ́скирэ Законо́скэ, нэ масэнца мэ дынарина́ва (служынава) грэхо́скирэ Законо́скэ.
Romani Bible Baltic 2019
United Bible Societies for the Baltic Romani Mission