Bible in one year
August 6

1. Пало́ дава́ Ио́во псирадя пэ́скиро муй и прокостя (кэрдя́ арманя) дывэ́с, дро саво́ ёв бия́ндыя.
2. И отпхэндя́ Ио́во лавэ́нца:
3. “Мэк тэ хасёл дывэ́с, дро саво́ мэ бияндыём, и рат, со ракирэ́на тэды: ‘О муршоро латхэлапэ.’
4. Дова́ дывэ́с – мэк ёв тэ явэ́л цямло; мэк Дэвэ́л тэ на рипирэл пал дова́ дывэ́с, ци мэк дуд тэ на зяинэл пэ дова́ дывэ́с.
5. Мэк калыпэ́н и мэрибнаскири зэр (тень) тэ учхакирэл дова́ дывэ́с, мэк о́блоки тэ ячэ́нпэ ўса́ды (сак) пэ лэ́стэ, мэк дывэсэнгиро калыпэ́н тэ страхакирэл дова́ дывэ́с.
6. И пэ кодоя рат, соб (кай) цёмныма тэ заухтылэл ла, мэк тэ на чхувэ́н андрэ́ кодоя рат кхэтанэ́ бэршэскирэ дывэсэнца; мэк ёй тэ на заджа́л дро чхонэнгиро гиныбэ́н.
7. Мэк тэ явэ́л чхучи́ (пусто) кодоя рат, мэк радымакири го́дла тэ на явэ́л ние́кхвар дро кодоя рат.
8. Мэк одолэ́, кон прокошэла (кэрэ́ла арманя) дывэ́с, тэ прокошэн (тэ кэрэ́н арманя) пэ доя́ рат, савэ́ исын скэдынэ́ тэ ґаздэ́н Левиафанос;
9. мэк тэ мурдён тасярлакирэ (ранкоскирэ) чэргэня́; мэк кодоя рат тэ ужакирэл дуд (свэ́то), нэ лэс нанэ, и мэк ёй тэ на дыкхэ́л ранкоскирэ цымблы (ресницы):
10. пал-дова́, сыр ёй на запхандя пэ клыдын вудара́ мирэ́-да́кирэ лочовя́тыр, со лыджинэ́ ман, сыр и на гарадя пхарипэ́н мирэ́ якхэ́ндыр.
11. Со́скэ мэ на мыем дрэ да́кирэ маса́, – сыр мэ выджавас да́кирэ лочовя́тыр и тэ на пхарадёвав?
12. Со́скэ, мири́ дай лыя́ ман пэ чанга́? И ваш со трэиндя́ ма́нгэ тэ жуискирав дакири цюци?
13. Ваш дова́, соб (кай) мэ тэ пасёвав штылэ́с пэ́скэ, мэ явавас суто́ пэ́скэ: мэ откхинёвавас пэ́скэ,
14. кхэтанэ́ кральенца и годы́-дыибнаскирэнца, кон сыс пэ пхув, савэ́ ґаздынэ́ фелатиня пэ́скэ пэ наобдживдлэ штэ́ты,
15. ци тхагарьенца, конэ́стэ сыс сувнака́й, савэ́ пхэрдякирдэ пэ́скирэ кхэра́ рупэ́са:
16. ци со́скэ мэ на яцём сы́рбы вычхурдыпнытко чхаворо́ ци сы́рбы тыкномас, саво́ ние́кхвар на дыкхця́ дуд (свэ́то).
17. Одо́й бибахталэ́ пириячэна тэ кэрэ́н дош, и одо́й кхинякирдэ откхинёна (отпхурдэна).
18. Одо́й штарибнаскирэ мануша́ откхинёна кхэтанэ́, ёнэ на явэ́на тэ шунэ́н зан, кон притасавэлас лэн.
19. Тыкнэ́ и древа́н барэ́ исын одо́й, и писха́рья исын вольна пэ́скирэ рандыр.
20. Ваш со исын манушэ́скэ дуд (свэ́то), савэ́стэ исын бари би́да, и джиибэ́н одолэ́нгэ, конэ́скэ исын кирко пэ ди,
21. и одолэ́нгэ, кон тырдэлапэ, соб (кай) тэ мэрэ́н, нэ мэрибэ́н на явэ́ла, и одолэ́нгэ, кон родэ́ла мэрибэ́н зоралэды́р сыр родэ́на гарадэ́ барвалыпэна,
22. и савэ́ зоралэ́с радынэнаспэ и явэ́нас ра́да, ко́ли ёнэ латхэнас ко́нцо (маґила)? –
23. ци конэ́скиро дром исын гарадо́, и конэ́с Дэвэ́л учхакирдя́ явре́стыр, сыр тыноса.
24. Пал-одова́ мэ да́ва гондя анги́л, сыр тэ хав, и мирэ́ годля, сыр мэ да́ва гондя (уздыхинава), чхувэнапэ сыр паня́.
25. Пал-одова́ со доя́-паць дар, – со́стыр мэ дарандыём, и пыя́ пэ ма́ндэ и дова́-паць, – со́стыр мэ трашадыём, – дова́ явдя́ кэ мэ.
26. Мэ сом дрэ дар, мэ на сом штыл, мэ на откхиныём, и бари би́да явдя́.”
1. О, Элифазо Феманиностыр, отпхэндя́ и ракирдя́:
2. “Ко́ли явэ́на тэ ракирэ́н лав кэ ту, соб (кай) ту тэды тэ на пэрэс дро ду́хо (фа́но)? Нэ кон сатаки могинэ́ла тэ обрикирэл явирэ́с тэ ракирэ́л?
3. Чачо́, со ту сыклякирэсас бутэн, и ту зоралякирдян бизорья́кирэ васта́.
4. Тырэ́ лава́ подрикирэнас одолэ́н, кон обштавэлапэ, и ту зоралякирдян кодолэ́н, савэ́ндэ чанга́ бандинэ.
5. Нэ акана́ биба́хт пыя́ пэ ту́тэ, и ту пэрэса дро ду́хо (фа́но); ёй чиладя́ тут и ту́кэ акана́ исын пхаро́.
6. Ци тыри́ вага (бари паты́в) кэ Дэвэ́л на дэ́ла ту́кэ зорало́ патяибэ́н; ци тырэ́ бидошэнгирэ джиибнастыр нашты́ тэ ужакирэс лачхипэ́н?
7. Пририпир пэ́скэ, ци хасия́ вари-кон, кон сыс бибангипнаскиро? И, ци сыс адя́кэ, соб (кай) дэвлытконэ́ манушэ́н тэ чхурдэ́н тэ хасён.
8. Со мэ могиндём тэ дыкха́в, сыс дова́, со кон пхаравэла фуй пхувья́, и кон росчхурдэла биба́хт сыр зя́рки дрэ пхув, одолэ́-паць мануша́ и одова́-паць чхинэна тэлэ́.
9. Ёнэ хасёна Дэвлэ́скирэ пхурдыпнастыр, Лэ́скирэ-духоскири холы́ похала лэн сарэ́са.
10. Мэк ёнэ тэ рыкинэн сыр шчэра́ (ле́вы), и тэ рыкинэн ёнэ сыр древа́н мижэх шчэрицы, сароекх тэрнэ́ – шчэрэнчирэ данда́ пхадёна.
11. Пхурано́ шчэр мулёла, пал-дова́ со лэ́скэ на ухтылэ́ла (на́доси) со тэ рискирэ́л дандэнца, а шчэрицакирэ шчэнкэн росчхурдэна.
12. Акана́ екх лав чораханэ́с явдя́ кэ мэ, и миро кан шундя́, со ёв гундяриндя (шэпчындя) ма́нгэ:
13. дрэ на́бут трашанэ зданки, со ману́ш дыкхэ́ла дро суно́ раты́, ке́ли хор соибэн лэ́ла манушэ́с:
14. дар пыя́ пэ ма́ндэ, и мэ издрава адя́кэ, со сарэ́ мирэ́ кокалы́ тринскирэнапэ;
15. и о ду́хо прогия́ пашы́л ма́ндэ, и мирэ́ бала́ пэ шэро́ тэрдинэ́.
16. Ёв уштыя́ и мэ на могиндём тэ роздыкхав, сыр ёв выдыцёла: лэ́скиро ста́но сыс анги́л мирэ́ якха́; и мэ шундем локхи зан (глос), со пхэндя́:
17. Ци сашты́ тэ явэ́л соб (кай) ману́ш тэ явэ́л чачунэдыр Дэвлэ́стыр? Ци сашты́ тэ явэ́л, соб (кай) ману́ш тэ явэ́л буты́р бибангипнаскиро сыр Дэвэ́л?
18. Дыкх, Ёв на допатяла Пэ́скирэ (болыбна́скирэ) дынарье́нгэ, и, Ёв гинэ́ла, со Лэ́скирэ Янго́лы исын нагодэ,
19. и пэ кицы́ буты́р Ёв на допатяла манушэ́нгэ, кон дживэ́ла дрэ кхэра́ блататыр, со кирнёна, кон выгинэ́ прахостыр, кон роспхаравэлапэ сыр моль (мэль)!
20. Ёнэ пхарадёна марибнастыр пэ котэра́ злокостыр (ранкостыр) кэ бэльвэ́ль, ёнэ хасёна пэ-усады (пэ сак), со ние́кх и на подыкхэла пэ дава́.
21. Ци на кошэнапэ лэ́нгирэ шатракирэ шэлэ (ци на хасёла лэ́нгиро лачхипэ́н)? Ёнэ мэрэ́на, и на джинэ́на годыпэ́н.
14. “Пал-дова́ со лэ́скэ яцём дро́го Мэ”, – ракирэ́ла Рай Дэвэ́л, – “Мэ зракха́ва лэс, Мэ чхува́ва вучэ́с лэс, пал-дова́ со ёв джинэ́ла Миро лав.
15. Ёв прикхарэла Ман и Мэ отпхэнава лэ́скэ, Мэ ява́ва лэ́са, ке́ли явэ́ла пхаро́ лэ́скэ, Мэ зракха́ва лэс и Мэ ява́ва тэ кутякирав лэс.
16. Мэ да́ва чалэ́с джиибэ́н лэ́скэ и сыкава́ва лэ́скэ, сыр Мэ зракха́ва лэс.”
15. Дылныпэ́н припхандяпэ кэ чхавэ́скиро ило́, нэ ран (розга), савья́са сыклякирэ́на пхарэ́с, традэ́ла дылныпэ́н криг.
1. Тэды, нанэ какана́ нисаво́ обракирибэн ваш одолэ́нгэ, савэ́ дживэ́на дрэ Исусо́стэ Христосо́стэ на пир лоч (плоть), а пир Ду́хо (Фа́но).
2. Пал-дова́ со джиибна́скиро Духоскиро Зако́но пир Исусо́стэ Христосо́стэ кэрдя́ ман вольнонэса грэхоскирэ Законо́стыр и мэрибна́стыр.
3. Пал-дова́ со, сыр Зако́но на могиндя́ тэ пиризорьякирэл манушэскири лоч, и хасякирдя́ пэ́скири зор, тэды Дэвэ́л бичхадя́ Пэ́скирэс Чхавэ́с, Саво́ сыс дрэ лоч (плоть), сыр грэхи́тко ману́ш, соб (кай) Ёв тэ явэ́л сыр свэ́нто дыибэ́н (жэ́ртва) пал грэ́хо и тэ сэндякирэ́л грэ́хо дрэ манушэ́стэ,
4. ваш дова́, соб (кай) дова́ чачипэ́н, саво́ Зако́но трэбинэла, тэ сполнинэ́лпэ пхэрдэ́с дрэ манушэ́ндэ, савэ́ дживэ́на на пир лоч, а пир Ду́хо (Фа́но).
5. Пал-дова́ со, кон дживэ́ла пир лоча́киро тырдыпэ́н, одова́ и думинэ́ла пал лоч, а кон дживэ́ла пир Ду́хо (Фа́но), одова́ думинэ́ла и пал Ду́хо (Фа́но).
6. Пал-дова́ со лоча́кирэ-грэхо́скирэ Манушэ́скиро тырдыпэ́н лыджа́ла кэ мэрибэ́н, а Духоскиро тырдыпэ́н дэ́ла джиибэ́н и рама́нё (миро).
7. Пал-дова́ со лочакирэ-грэхоскирэ-манушэ́скиро тырдыпэ́н исын проти Дэвлэ́стэ: ёнэ ж на кандэ́на Дэвлэ́скиро Зако́но, и ёнэ на могинэ́на тэ кандэ́н;
8. и кодолэ́, кон дживэ́ла пир пэ́скирэ-грэхоскиро тырдыпэ́н, на могинэ́на тэ явэ́н лачхэ́ Дэвлэ́скэ.
9. Нэ ко́ли тумэ́ дживэ́на на пир лоча́кирэ-грэхо́скиро тырдыпэ́н, тэды, чачэс, Дэвлэ́скиро Ду́хо (Фа́но) дживэ́ла дрэ тумэ́ндэ; а, ко́ли вари-конэ́стэ нанэ Христосо́скиро Ду́хо (Фа́но), одова́ исын на Лэ́скиро:
10. ко́ли Христо́со дживэ́ла дрэ тумэ́ндэ, то тумари́ лоч исын мулы ваш грэ́хо, нэ Ду́хо (Фа́но) исын джидо́ пирда́л чачипэ́н.
11. А ко́ли Одолэскиро Ду́хо (Фа́но), Кон отджидякирдя́ мулэ́ндыр Исусо́с, дживэ́ла дрэ тумэ́ндэ, тэды Одова́, Кон отджидякирдя́ Христосо́с мулэ́ндыр, отджидякирэла и тумарэ́ маса́, савэ́ исын на вечна, Пэ́скирэ Духо́са, саво́ дживэ́ла дрэ тумэ́ндэ.
12. И тэды, пшала́лэ, амэ на сам бангэ́ грэхо́скирэ лоча́кэ, соб (кай) тэ джива́с пир лочакиро тырдыпэ́н;
13. пал-дова́, со ко́ли тумэ́ дживэ́на пир лочакиро тырдыпэ́н, тэды тумэ́ ж мэрэ́на, нэ ко́ли тумэ́ мулякирэна тумарэ́ свэтытка рэ́нды Духо́са, тумэ́ явэ́на тэ дживэ́н:
14. пал-дова́ со сарэ́, кон кэрэ́ла пир Дэвлэ́скиро Ду́хо (Фа́но), исын чачунэ́ Дэвлэ́скирэ Чхавэ́.
15. Палдова́ со тумэ́ на прилынэ́ Ду́хо (Фа́но), Саво́ кэрэ́ла тумэн писхарье́нца, соб (кай) нэвэ́стыр тэ дживэ́н дрэ дар, а тумэ́ прилынэ́ Ду́хо (Фа́но), Саво́ кэрдя́ тумэн пэ́скирэ чхавэ́нца, савэ́са амэ кхараса Дэвлэ́с: “Авва, Да́до!”
16. Дэвлэ́скиро Ду́хо (Фа́но) допхэнэ́ла кхэтанэ́ амарэ́ духо́са пал дова́, со амэ сам Дэвлэ́скирэ чхавэ́.
17. Нэ ко́ли амэ сам Лэ́скирэ чхавэ́, тэды амэ́ндэ исын паш дро мэкно́ миштыпэ́н Дэвлэ́скиро и паш дро Христосо́скиро мэкно́ миштыпэ́н, ко́ли амэ чачунэ́с Лэ́са мэнчынасапэ, соб (кай) кхэтанэ́ Лэ́са адя́кэ-паць тэ прославинаспэ.
18. Палдава́ мэ думинава, со ададывэсатуно амаро́ пиридживибэн нисо́ на мол анги́л дая́ сла́ва, сави́ отчхакирэлапэ амэ́нгэ.
19. Палдава́ кажно джидо́ создыибэн пэ пхув, барэ́ надеяса ужакирэ́ла, ке́ли Дэвлэ́скирэ чхавэ́ явэ́на хулая́ пир свэ́то:
20. пал-дова́ со саро́ джидо́ создыибэн пэ пхув гия́ тэл бизладоскири зор на пир пэ́скиро выкэдыибэн, нэ пир Одолэскиро выкэдыибэн, Кон кэрдя́ адя́кэ и дрэ Савэ́стэ исын наде́я пэ дава́,
21. со дава́ саро́ джидо́ создыибэн кокоро́ явэ́ла во́льно мулыканэ писхарибнастыр, ваш дова́, соб (кай) тэ явэ́л дова́-паць славу́тно вольныма, сави́ исын Дэвлэ́скирэ чхавэ́ндэ.
Romani Bible Baltic 2019
United Bible Societies for the Baltic Romani Mission