Bible in one year - Пэ Балтитко Романи чиб

Bible in one year August 7

1. Кхар, Ио́во, ко́ли исын одова́ тэ отпхэнэл ту́кэ? И кэ савэ́ свэ́нта, ту рисёса?

2. Пал-дова́ со холякирибэ́н хасякирэ́ла дылынэ́ манушэ́с, и зэвлыныпэ́н (зависть) марэла простонэ-годякирэ манушэ́с.

3. Мэ дыкхцём, сыр дылынинько мэкэ́ла ко́рни (рукха́), нэ мэ екха́тыр прокостём (кэрдём арманя) лэ́скиро кхэратуно штэ́то.

4. Лэ́скирэ чхавэ́ исын дур, соб (кай) тэ явэ́н бахталэ́, лэн домарэна пашы́л по́рта, и нанэ ние́кх, кон тэ зракхэ́л лэн:

5. о бокхало похала лэ́скиро умалото, аж лэ́ла и пхусадытконэ хрустостыр и бокхалэ́ кэ хабэ́н мануша́ розухтылэна саро́, со исын лэ́стэ.

6. Пал-дова́ со биба́хт на явэ́ла прахостыр (пхувья́тыр), сыр и пхарипэ́н на джа́ла упрэ́ пхувья́тыр;

7. и ману́ш бияндёла ваш мэ́ньки сыр тыкнэ́ ягорья, со вурняна упрэ́.

8. Нэ мэ, пэ тыро́ штэ́то, родавас Дэвлэ́с и мэ чхувавас миро рэ́ндо анги́л Дэвлэ́стэ.

9. Кон кэрэ́ла древа́н барэ́ рэ́нды, со манушэ́скэ нашты́ тэ ґалёл, и бут ди́вна рэ́нды, со нашты́ тэ погинэс.

10. Ёв дэ́ла брышы́нд пхувьякэ, и Ёв бичхавэ́ла паня́ пэ фэ́лды,

11. Ёв чхувэ́ла пэ вучэ́ штэ́ты одолэ́н, кон исын тэлякирдэ, Ёв ґаздэ́ла пэ бидаракирэ штэ́ты одолэ́н, савэ́ зоралэ́с тугинэна.

12. Ёв розмарэла дова́, со фрэнта мануша́ придуминэна адя́кэ, со лэ́нгирэ васта́ тэ на докэрэн лэ́нгирэ рэ́нды.

13. Ёв ухтылэ́ла бут-годякирэ манушэ́н дрэ лэ́нгири фрэнтыма адя́кэ, со мэндронэ – манушэ́нгирэ кхэтанэ́ ду́мы обрисёна фуипнаса пэ лэ́ндэ:

14. ёнэ дыкхэнапэ калыпнаса дывэсэ́, и ёнэ псирэ́на, чилави вастэ́нца сыр корорэ́ дывэсэ́, сы́рбы ёнэ исын раты́.

15. И Ёв выракхэла куртала́тыр одолэ́н, кон исын дрэ трэ́бима, зор-манушэ́нгирэ ракирибнастыр и лэ́нгирэ вастэ́стыр.

16. И чорорэ́ явэ́на тэ ужакирэн лачхипэ́н, и начачунэ пхандэна пэ́скиро муй.

17. Акэ, бахтало́ исын одова́ ману́ш, савэ́с Дэвэ́л зоралэ́с сыклякирэ́ла, палдава́ на отпхэнпэ Сарэзоралыпнаскирэ Дэвлэ́скирэ сыклякирибнастыр кэ дукха́.

18. Пал-дова́ со Ёв пэкавэла кэ калэ́ маса́ (синяки), и Ёв пирипхандэла лэн; Ёв дукхавэла и Лэ́скирэ васта́ састякирэна.

19. Ёв зракхэ́ла тут шовэ бидэндыр и дрэ эфта́то биба́хт на чилавэ́ла тут.

20. Ёв выракхэла тут бокха́тыр, мэрибна́стыр, и курталакирэ зорья́тыр пэ марибэ́н.

21. Ту явэ́са гарадо́ бибахталэ́ чибэндыр (чибьендыр), и ту на явэ́са тэ дарэс хасякирибнастыр, ке́ли ёв явэ́ла.

22. Ту явэ́са тэ саспэ бокха́тыр и хасякирибнастыр, и ту на явэ́са тэ дарэс мурдалэ́ндыр, савэ́ исын пэ пхув.

23. Пал-дова́ со ту́тэ явэ́ла доракирибэ́н барэ́нца фэлдатыр и фэлдакирэ мурдала́ явэ́на дро рама́нё (миро) ту́са.

24. И ту явэ́са тэ джинэ́с, со тыри́ ша́тра исын зракхны, и ту обдыкхэса пэ́скирэ-бакрэнгири шопа, со саро́ одо́й исын пэ пэ́скиро штэ́то.

25. И ту явэ́са тэ джинэ́с, со тырэ́ пала́л-явибнаскирэ чхаворэ́ (патомки) явэ́на бут, и тырэ́-родоскирэ чхавэ́ явэ́на ада́кицы бут, кицы́ исын чаринки пэ пхув.

26. Ту додживэса кэ барэ́ бэрша́ сы́рбы парнэ́-гивэскирэ ґарбы (снопы) доджана кэ спялыма, со лэн чхувэ́на тэлэ́ дро пэ́скиро уляго (пора).

27. Ѓа́да, дава́ исын саро́, со амэ розґалыям, дава́ исын чачипэ́н, шун дава́ и джин, со дава́ исын ваш тыро́ лачхипэ́н.”

Job 6:1-30

1. И отпхэндя́ Ио́во лавэ́нца:

2. “О, тэ чхувэ́н пэ ублады́тка (ве́сы) миро саро́ калыпэ́н, и тэ чхувэ́н сари́ мири́ бари би́да пэ бизьмены?

3. Пал-одова́ со акана́ дая́ би́да явэ́лас пхарэдыр морёскирэ (дэрьявэ́скирэ) прахостыр, палдава́ мирэ́ лава́ исын дасавэ́ сыгна.

4. Пал-одова́ со Сарэзорьякирэ–Дэвлэ́скирэ марибны́тка бустя́ (стре́лы) исын андра́л ма́ндэ, мирэ́ маса́ пьена лэ́нгири трута (отрава): трашаибэ́н анги́л Дэвлэ́стэ тэрдия́ дрэ стонка пэ ма́ндэ.

5. Ци годлэла бусо (дико) о́сло (мега́ри) пашы́л чар, ци брылинэла гурув паш лэ́скиро хахаибэн (месиво)?

6. Ци сашты́ тэ хас би смакоскиро хабэ́н би лондэскиро? Ци исын вари-саво́ смако дро парнорэскиро бялтко?

7. Дова́, со миро ди отпхэнэлапэ тэ хал, палдава́ исын миро намишто хабэ́н;

8. О, соб (кай) фэ́ни мэ могиндёмас тэ помангав, и соб (кай) Дэвэ́л тэ явэ́л дро екхипэ́н мирэ́ мысляса:

9. соб (кай) фэ́ни тэ закамэл Дэвэ́л, соб (кай) Ёв тэ ростасавэл ман, соб (кай) Ёв тэ протырдэл Пэ́скиро васт и тэ хасякирэ́л ман.

10. Тэды явэ́лас ма́нгэ раманипэн (спокойствиё); и мэ зоралэ́с радынаваспэ аж дрэ мири́ дукх, со на жалинэла ман, со мэ на отпхэндёмпэ Свэнтонэ́ Дэвлэ́скирэ лавэ́ндыр.

11. Кай тэ лав зор ма́нгэ, соб (кай) тэ ужакирав лачхипэ́н? И саво́ исын миро ко́нцо (яго́ро), соб (кай) ма́нгэ ишчо (инкэ́) тэ вырикирав?

12. Ци исын мири́ зор дасави́, сыр зоралэ́ бара́ исын? Ци исын мирэ́ маса́ дасавэ́, сыр харко́ма (медь)?

13. Ци дава́ ра́да мэ кокоро́ пэ́скэ? Ци годыпэ́н ячкирдя́ ман?

14. Кодолэ́скэ, кон исын замэнчындло, трэй тэ ужакирэл лачхипэ́н малэндыр? Ко́ли ёв фэ́ни (то́ка) тэ на ячкирэл дар анги́л Сарэзорьякирэ Дэвлэ́стэ.

15. Мирэ́ пша́ла обгинэпэ ма́нца хоханэ́с сы́рбы рэ́кица (лэнори́), сы́рбы рэкицэнгиро тхадыипэн, со лыджа́ла пани́ дурэды́р,

16. саво́ исын цямло лёдостыр, и дро саво́ ив гарадёла:

17. ке́ли ёнэ вышуцёна, тэды ёнэ тыкнёна; ке́ли хачкирибэ́н дэ́ла дрэ лэ́ндэ, ёнэ хасёна пэ́скирэ штэтэ́ндыр:

18. ёнэ бандёна пир бэргакирэ рига́, ёнэ тхадэна пэ чхучи́ пхув и хасёна.

19. Фэманакирэ караваны дыкхэ́на пэ лэ́ндэ, а лодыипнаскирэ мануша́ Савеятыр (Шэбатыр) розгинэна (рикирэ́на наде́я) пэ лэ́ндэ:

20. ёнэ ладжана пэ́скирэ патяибнастыр; ёнэ явэ́на одо́й, и лэ́ндэ саро́ пирипэнтындяпэ дрэ годы́.

21. Адя́кэ-паць и тумэ́ акана́ сан сы́рбы кодолэ́ рэкицы: тумэ́ дыкхэ́на вари-со дарано и тумэ́ акана́ дарэ́на.

22. Ци пхэндём мэ: “Янэ́н вари-со ма́нгэ!” Ци: – “Кэрэ́н да́ро ма́нгэ тумарэ́ барвалыпнастыр!”

23. Ци: – “Зракхэн ман вэргоскирэ вастэ́стыр!” Ци: – “Выракхэн ман притасаибнаскирэ вастэ́стыр!”

24. Сыклякирэ́н ман и мэ ява́ва тэ рикирав чиб, и кэрэ́н адя́кэ, соб (кай) мэ тэ ґалёвав, дро со мэ дыёмпэ дукха́ (хохадёмпэ).

25. Сави́ зор исын дрэ чачунэ́ лава́! Нэ саво́ ж исын лачхипэ́н, со тумэ́ чингардэнапэ ма́нца?

26. Ци тумэ́ придуминэна, соб (кай) тэ бангякирэн ман дрэ лава́, джинэ́н – балвалитка исын манушэ́скирэ лава́, конэ́скэ исын пхаро́.

27. Дыкхэ́н: тумэ́ чхурдэна жре́бие, соб (кай) сирота (пирото) тэ явэ́л тумаро́ писха́ри, и ганавэна ґанби́н (яма) тумарэ́ малэ́скэ.

28. Акана́, дыкхэ́н пэ ма́ндэ: и анги́л тумарэ́ муя́, соб (кай) мэ тэ хохавав?

29. Рисён, мэ манга́ва тумэн, фуй на явэ́ла; рисён ишчо (инкэ́), соб (кай) тумэ́ тэ дыкхэ́н миро чачипэ́н.

30. Ци исын саво́ начачипэ́н мирэ́ чибатыр? Ци на розґалёвава мэ лачхэ́с, кай исын фуипэ́н?

Psalms 92:1-7

1. Пса́лмо Гилы́ ваш Са́вато.

2. Дава́ исын мишто́ тэ парикирас Ра́скэ-Дэвлэ́скэ, и тэ багас шарибнытка гиля́ Тырэ́ лавэ́скэ, о Най Вучэдырэскиро;

3. тасярлатыр тэ ракирас сарэ́нгэ пал Тыри́ лачхэ́-илы́ткима, и кажно рат пал Тыро́ патяибэ́н,

4. башави пэ дэшэ-балытко струменто, и пэ лута и пэ гусли дескирэ мелодияса.

5. Пал-дова́ со Ту обрадындян ман Пэ́скирэ бутенца, мэ ява́ва тэ бага́в зоралэ́с и радыма́кирэс, со Тырэ́ васта́ кэрдэ́.

6. О, Раё Дэ́вла! Савэ барэ́ исын рэ́нды (де́лы), со Ту кэрдя́н! Савэ хор исын Тырэ́ ду́мы!

7. Набарэ́-годя́киро ману́ш на джинэ́ла дава́, дылыно́ на галёла:

Proverbs 22:16-16

16. Кон тасавэла (дукхавэла) чорорэс тэ барьякирэл пэ́скиро барвалыпэ́н; и кодова́, кон дэ́ла барвалэскэ, кадасаво́ ману́ш явэ́ла чороро́.

Rimanenge 8:22-39

22. Палдава́ амэ джина́са, со саро́ дава́ джидо́ создыибэн кэ дава́ часо дэ́ла го́дла дрэ мэ́ньки, сы́рбы анги́л дова́, сыр чхаворо́ бияндёла.

23. И на екх ёнэ, нэ и амэ кокорэ́, савэ́ уджиндям англэды́р явирэндыр Духоскиро тала́но, адя́кэ-паць амэ андра́л пэ́стэ ужакираса и пхарэ́с даса ґондя́ (уздыхинаса), соб (кай) Дэвэ́л тэ прилэл амэн пал пэ́скирэ чхавэ́ндэ, ке́ли амарэ́ маса́ явэ́на выкиндлэ мэрибна́стыр.

24. Палдава́ амэ са́мас зракхнэ́ надеяса; нэ наде́я, ке́ли исын бицялы, дава́ нанэ наде́я: пал-дова́ со, ко́ли кон вари-со дыкхэ́ла, со́скэ лэ́скэ адя́кэ-паць тэ надеинэлпэ?

25. Нэ ке́ли амэ надеинасапэ пэ дова́, со амэ на дыкхаса, тэды амэ ґара́ (длу́гэс) ужакираса.

26. Адя́кэ-паць и Ду́хо (Фа́но) подрикирэ́ла амэн дрэ амаро́ бизорьякирибэн; амэ на джина́са, пал со и сыр трэй тэ мангаспэ Дэвлэ́скэ, нэ Ду́хо кокоро́ мангэ́ла Дэвлэ́с пал дова́, со амарэ́ лава́ исын на дрэ зор тэ пиридэл.

27. А Одова́, Кон пробинэла илэ, джинэ́ла, пал со Ду́хо (Фа́но) мангэ́ла, пал-дова́ со Ёв мангэлапэ пал свэнтонэндэ пир Дэвлэ́скири во́ля.

28. Нэ амэ джина́са, со кон рикирэ́ла сыр Дро́гима Дэвлэ́с дро пэ́скиро ило́ и конэ́с кхардэ́ пир Лэ́скиро упхэныбэ́н, одолэ́н Дэвэ́л лыджа́ла сарэ́н кэ бахт.

29. Палдова́ со, конэ́с Ёв кокоро́ англэды́р выкэдыя́, одолэ́н и освэнцындя тэ кэрэ́н, соб (кай) ёнэ тэ подджан пэ Лэ́скирэ Чхавэ́стэ, адя́кэ, соб (кай) Ёв тэ явэ́л англатуно́ машки́р бутэндэ пшалэ́ндэ.

30. А конэ́с Дэвэ́л освэнцындя англэды́р, одолэ́н Ёв и кхардя́, нэ конэ́с Ёв кхардя́, одолэ́н и приджиндя пал чачунэндэ, и барьякирдя.

31. Со амэ тэды пхэна́са пэ дава́? Ко́ли Дэвэ́л исын пал амэ́ндэ, тэды кон исын проти амэ́ндэ?

32. Одова́, Кон на тангиндя Пэ́скирэ Чхавэ́с, нэ Ёв отдыя́ Лэс пал сарэ́ндэ амэ́ндэ, ци на даринэла Ёв адя́кэ-паць амэ́нгэ кхэтанэ́ Лэ́са саро́?

33. Кон могинэ́ла тэ бангякирэл одолэ́н, конэ́с Дэвэ́л выкэдыя́? Дэвэ́л приджинэла лэн чачунэнца:

34. кон явэ́ла тэ сэндякирэ́л? Ису́со Христо́со, Саво́ мыя́, нэ и Саво́ отджидыя́ мулэ́ндыр? Ёв, Саво́ какана́ исын пир чачуны́ Дэвлэ́скири риг? Ёв и мангэ́ла пал амэ́ндэ.

35. Кон тэрдёла машки́р амэ́ндэ и Христососкири ла́ска? Пиридживибэн, ци пхарипэ́н, ци традыпэн, ци нангипэ́н, ци дар, ци мэрибэ́н?

36. Сыр исын чхиндло́: “Пал Ту́тэ амэ сам тэрдэ́ кажно дывэ́с муй пэ муй мэрибнаса; и дыкхэ́на пэ амэ́ндэ, сыр пэ бакрэндэ, савэ́н сыг чхинэна.”

37. Нэ саро́ дава́ амэ пиризорьякираса Одолэскирэ зорья́са, Конэ́скэ адя́кэ древа́н амэ яця́м дро́га.

38. И мэ миштэ́с джино́м, со ни мэрибэ́н, ни джиибэ́н, ни Янго́лы, ни англыпына, ни дова́, со исын какана́, ни дова́, со явэ́ла анги́л;

39. ни вучипэ́н, ни хорипэ́н, нисо́ яви́р, со исын джидо́ пэ саро́ парно́ свэ́то, на могинэ́ла тэ тэрдёл машки́р амэ́ндэ и Дэвлэ́скири ла́ска дрэ Исусо́стэ Христосо́стэ, амарэ́ Растэ-Дэвлэ́стэ.

Romani Bible Baltic 2019

Maintained by the United Bible Societies for the Baltic Romani Mission