Beblia

1. Ци манушэ́скиро джиибэ́н нанэ саро́ дрэ пхари́ буты́ пэ дая́ пхув? Ци манушэ́скирэ дывэса́ исын на сы́рбы андынаршчыкоскирэ (поробкоскирэ) дывэса́?

2. Сыр писха́ри хачкирдэс выкэдэ́ла зэр (тень), адя́кэ-паць и, андынаршчыко ужакирэ́ла пэ́скири мазу́ри (награда).

3. Адя́кэ-паць и ма́нгэ дынэ́ хартытка (суетна) чхона́ и кхинякирдэ ратя упхэндлэ ма́нгэ.

4. Ке́ли мэ пасёвава, тэды мэ пхэна́ва: “Ке́ли да мэ уштава, и рат джа́ла криг? И мэ пиририсёвава сари́ рат анги́л зло́ко (ра́нко).

5. Мирэ́ маса́ исын чхакирдэ кирмэнца и прахоса, мири́ цы́па пхарадыя и кирнёла.

6. Мирэ́ дывэса́ праста́на сыгэды́р тхачоскирэ ротатыр, и проджа́на адя́кэ, со нанэ со́стыр тэ ужакирав лачхипэ́н.

7. Ри́пир, Дэ́вла, со миро джиибэ́н исын балва́л, мирэ́ якха́ буты́р ние́кхвар на дыкхэ́на лачхипэ́н.

8. Кодоя якх, кон дыкхця́ ман, на удыкхэ́ла буты́р ман: ке́ли Тырэ́ якха́ рисёна пэ ма́ндэ, ман на явэ́ла буты́р.

9. Сыр о́блоко розджалапэ и нашадёла, адя́кэ-паць и дова́, кон джа́ла тэлэ́ дро лю́но (адо), на явэ́ла палэ.

10. Ёв буты́р на рисёла дро пэ́скиро кхэр, ние́кх лэ́скирэ штэто́стыр буты́р на явэ́ла тэ джинэ́л лэс.

11. Пир дая́ причына мэ на ява́ва тэ пхандав пэ́скиро муй: мэ ява́ва тэ ракира́в мирэ́-духо́скирэ тугатыр; мэ ява́ва тэ жалинавпэ мирэ́ илэ́скирэ киркипнаса.

12. О, Дэ́вла! Ци мэ сом мо́рё (дэрья́в), ци мэ сом морёскиро (дэрьявэ́скиро) рупучо (чудовишчо), со Ту чхувэ́са стрэ́га пэ ма́ндэ?

13. Ке́ли мэ пхэна́ва пэ́скэ: “Миро чхуибэ́н раманякирэла ман, и мири́ пасиндлы (кровать) локхякирэла мири́ жалоба;

14. то тэды Ту трашакирэса ман сунэнца, и страхакирэса дыкхибнаскирэ зданкэнца;

15. палдава́ Миро ди выкэдыя́, соб (кай) тэ затасавэн ман; мэрибэ́н явэ́лас фэды́р дасавэ́ джиибнастыр мирэ́ кокалэнгэ.

16. Ма́нгэ яця́ джунгало́ (брыдиндя) миро джиибэ́н, мэ на ява́ва ўса́ды (сак) тэ джива́в, мэк ман екхджинэс, пал-дова́ со мирэ́ дывэса́ исын чхучэ́ сы́рбы пхурдыпэн.

17. Со дасаво исын ману́ш, со Ту адя́кэ барьякирэса лэ́скиро штэ́то, со Ту рискирэса ило́ пэ лэ́стэ,

18. со Ту явэ́са кэ ёв кажно зло́ко (ра́нко), со Ту спробинэса лэс кажно мэнта (минута)?

19. Со́скэ ґара́ Ту на рискирэса Пэ́скирэ якха́ ма́ндыр, и мэк ман екхджинэс анги́л, сыр мэ накхавава (глытынава) пэ́скирэ саля (слина).

20. Ко́ли мэ кэрдём грэ́хи, тэды со кэрдём мэ ту́кэ, о Манушэ́скиро Стрэгари, со́скэ Ту выкэдыян ман сыр бакрэ́с, адя́кэ со мэ сы́рбы ґа́мо уридём пэ пэ́стэ.

21. Со́скэ тэды Ту на отмэкэса миро чорипэ́н, и на лэ́са криг мири́ биба́хт? Пал-дова́ со мэ ява́ва тэ пасёвав дро пра́хо, и Ту зоралэ́с явэ́са тэ родэс ман ранкоса (злокоса), нэ ман буты́р на явэ́ла.”

1. И отпхэндя́ Вилдадо Шуахостыр и пхэндя́:

2. “Сыр ґара́ ту явэ́са тэ ракирэ́с адя́кэ? И тырэ́ лава́, со ту ракирэ́са, исын сы́рбы зоралы́ балва́л?

3. Ци Дэвэ́л пиририскирэла сэ́ндо, ци Сарэзорья́киро Дэвэ́л пиририскирэла чачипэ́н?

4. Ко́ли тырэ́ чхавэ́ кэрдэ́ грэ́хи проти Лэ́стэ, тэды Ёв и сэндякирдя лэн пал лэ́нгиро чорипэ́н.

5. Ко́ли ту явэ́са тэ родэс хачкирдэс Дэвлэ́с, и тэ чхувэ́с пэ́скирэ мангипэна анги́л Сарэзорьякирэстэ;

6. ко́ли ту сан бибангякиро и дэвлы́тко, тэды, чачо́, Ёв уштэ́ла пал ту́тэ, и Ёв кэрэ́ла адя́кэ, соб (кай) тэ явэ́л миштыпэ́н тырэ́ кхэрэ́скэ.

7. Мэк вагэдыр (англэды́р) ту́тэ сыс на́бут (куты́), нэ дро яго́ро (дро ко́нцо) ту́тэ явэ́ла древа́н бут.

8. Палдова́ пхучпэ, мэ манга́ва тут, пал ро́ды, со сыс вагэдыр и обдумин дова́, со лэ́нгирэ дада́ латхнэ́,

9. пал-дова́ со, амэ сам адасавэ́, сы́рбы тася́ бияндыям, и амэ нисо́ на джина́са, и амарэ́ дывэса́ пэ пхув праста́на сыр зэр (тень).

10. Ци на сыклякирдэ́ прапапы тут, ци на пхэндлэ́ ту́кэ, ци на выпхэндлэ лава́ лэ́нгирэ илэ́стыр?

11. Ци могинэ́ла папирусо тэ барьёл би дричакиро (би болотоскиро)? Ци могинэ́ла сил (камышо) тэ барьёл би панескиро?

12. Ке́ли дая́ раслина ишчо (инкэ́) зэлэны и наны чингирды, ей вышутёла сыгэды́р кажнонэ́ чарьятыр.

13. Адя́кэ-паць и кодолэнгирэ дрома́, кон бистрэл Дэвлэ́с и фуе́-манушэ́нгиро ужакирибэ́н пэ лачхипэ́н, адя́кэ-паць хасёла,

14. лэ́нгиро зорало́ патяибэ́н хасёла, и дова́ пэ со ёв розгинэла, исын сыр мизгирёскири (паукоскири) тхава (плева).

15. Ёв подрикирэ́ла пэс пал пэ́скиро кхэр, кхэр на тэрдёла, ёв ухтылэлапэ пал лэ́стэ, нэ кхэр на вырикирэ́ла лэс.

16. Кадасаво́ ману́ш барьёла сы́рбы дылыны чар тэл кхам, и ла́кирэ рандя́ пирибарьёна бар;

17. ла́кирэ ко́рни (рукха́) кхувэнапэ трусця́л барэнгири бэ́ргица, ёнэ промарэна штэ́то машки́р бара́.

18. Нэ ко́ли Дэвэ́л выкошэла лэн лэ́нгирэ штэто́стыр, тэды пэ дова́ штэ́то отпхэнэнапэ лэ́ндыр, пхэни́: “Мэ на дыкхцём тумэн!””

19. Акэ, сави́ исын ра́дыма кадалэ́ фуе́-манушэ́нгири далэ́ джиибнастыр, и прахостыр яви́р барьёна.

20. Акэ, Дэвэ́л на отчхурдэла Пэ́стыр бидошэнгирэ манушэ́с, сыр Ёв и на подрикирэ́ла пало́ васт одолэ́с, кон кэрэ́ла биба́хт.

21. Ишчо Ёв пхэрдякирэла тыро́ муй сабнаса, и тырэ́ ушта́ барэ́ радыма́са,

22. Ёв учхакирэ́ла ладжаса тырэ́ вэргэ́н, и ша́тры, кай дживэ́на фуй мануша́, хасёна!”

8. ке́ли фуй мануша́ барьёна сыр чар и мэк кодолэ́, савэ́ кэрэ́на чорипэ́н, мэк ёнэ тэ явэ́н най шукарэдыр дро джиибэ́н, сароекх Дэвэ́л хасякирэ́ла лэн пэ ўса́ды (сак).

9. И Ту, Раё Дэ́вла, сан вучэды́р сарэ́стыр пэ сарэ́ ве́ки.

10. Пал-дова́ со, акэ, Тырэ́ вэ́рги, Раё Дэ́вла: акэ, Тырэ́ вэ́рги хасёна и сарэ́, кон кэрэ́ла чорипэ́н, явэ́на росчхурдынэ.

11. Нэ Ту ґаздэса мири́ зор сы́рбы шынга́ (ро́ги) рискирибна́скирэ гурувэстэ: и мэ сом помакхно ялунэ (свяжонэ) оливитконэ дзэтэса (елеёса).

12. Мирэ́ якха́ явэ́на тэ радынэ́нпэ, дыкх, со кэрэ́лапэ вэргэнца; мирэ́ кана́ явэ́на тэ шунэ́н радыма́са, со кэрэ́лапэ фуе́ манушэ́нца, савэ́ ґаздынэ́пэ пэ ма́ндэ.

13. Чачуно́ ману́ш явэ́ла най шукарэдыр, сыр пальма ёв явэ́ла тэ барьёл, сыр кедро дро Лива́но.

14. Ёв исын сы́рбы рандь (вэтка), со исын чхуды́ дрэ Ра́скирэ-Дэвлэ́скиро Кхэр, пэ Дэвлэ́скирэ грэды (дворы) ёв явэ́ла най шукарэдыр.

15. Ёв явэ́ла дрэ зор дрэ пхуранэ́ бэрша́, ёв явэ́ла соко́са (хумэ́са) и зэлэно,

17. Причху́в пэ́скиро кан и пошун годьварэ́-манушэ́нгирэ лава́, и бандякир тыро́ ило́ кэ миро джиныбэ́н;

18. пал-дова́ со куч явэ́ла, ко́ли ту явэ́са тэ рикирэспэ кэ ёнэ пэ́скирэ илэ́са, соб (кай) ёнэ тэ явэ́н адя́кэ-паць скэдынэ́ пэ тырэ́ ушта́.

19. Соб (кай) ту́тэ тэ явэ́л зорало́ патяибэ́н дрэ Растэ-Дэвлэ́стэ, мэ сыклякирава тут и ададывэ́с, и ту ри́пир.

20. Ци мэ на чхиндём ту́кэ трин мо́лы най кучэдыр годэ́ и джиныбнытка лава́,

21. соб (кай) мэ могинавас тэ пиридав ту́кэ патяибнытка лава́ пал чачипэ́н, соб (кай) ту могинэсас тэ отпхэнэс палэ патяибнытконэ лавэ́нца кодолэ́нгэ, савэ́ бичхавэна тут.

1. Мэ ракира́ва чачипэ́н дрэ Христосо́стэ и мэ на хохавава, мири́ паты́в допхэнэ́ла пал дава́ Свэнтонэ́ Духо́са;

2. со исын ма́ндэ баро́ пиридживибэн, и на пириячэ́ла тэ дукхал миро ило́;

3. пал-дова́ со мэ камамас кокоро́ тэ явав тэл Дэвлэ́скири прокошыбэна (арманя́), соб (кай) ман тэ чхувэ́н дрэ риг Христосостыр пал мирэ́ пшалэ́ндэ, савэ́ исын сэмэ́нца ма́нгэ пир рат;

4. ґа́да, ёнэ исын Израилёскирэ мануша́, лэ́нгэ сыс дыно́ тэ ячэн Дэвлэ́скирэ чхавэ́нца тэ прилэ́н миштыпэ́н, исын дыно́ и сла́ва и завето, и Зако́но тэ прилэ́н, и мангипэ́н Дэвлэ́скэ, и лав анги́л;

5. ёнэ исын чхавэ́ пэ́скирэ дадэнги́рэ, савэ́ндыр пир лоч и выгия́ Христо́со, Ёв исын Дэвэ́л пэ сарэ́ манушэ́ндэ, Ёв исын бахтякирдо́ пэ сарэ́ бэрша́. Ами́нь.

6. Нэ адя́кэ дава́ на могинэ́ла тэ явэ́л, соб (кай) Дэвлэ́скиро лав тэ хасякирэ́л зор; пал-дова́ со на сарэ́ мануша́, савэ́ дживэ́на кэ Израилё, исын Дэвлэ́скирэ мануша́;

7. и на сарэ́ Авраамо́скирэ чхавэ́, савэ́ исын бияндлэ Авраамо́скирэ родо́стыр, екх дава́ на кэрэ́ла лэн Авраамо́скирэ чхавэ́нца; а сыр исын чхиндло́: “Исаакостыр дэ́лапэ ту́кэ ро́до!”

8. Явирэ лавэ́нца, на сарэ́ кадалэ́ чхавэ́, савэ́ бияндлэ Авраамо́скирэ родо́стыр, исын Дэвлэ́скирэ чхавэ́: нэ кодолэ́ исын чхавэ́, пал савэ́ндэ Ёв дыя́ лав.

9. Нэ лав, саво́ Дэвэ́л дыя́, исыс дасаво: “Дро дасаво часо (моменто) Мэ ява́ва и явэ́ла чхаво́ Саратэ.”

10. И на екх дава́; нэ адя́кэ-паць сыс и Ревекаса, ке́ли ёй пхария дро екх часо близнятэнца Исаакостыр, амарэ́ дадэ́стыр,

11. и анги́л лэ́нгиро бияныпэ́н, ке́ли ёнэ ишчо (инкэ́) на кэрдэ́ нисаво́ лачхипэ́н ци фуипэ́н, Дэвэ́л кэрдя́ пэ́скиро выкэдыибэн,

12. и дава́ на сыс спхандло рэндэ́нца, а саро́ кэрэ́ла Одова́, Кон прикхардя, тэды Ревекакэ сыс пхэндло́: “Пхурэды́р пшал явэ́ла тэ дынаринэ́л тыкнэдырэскэ”:

13. и, сыр исын чхиндло́ пал дава́: “Ма́нгэ яця́ дро́го Яково, а Исавос Мэ древа́н на камдём тэ дыкха́в.”

14. Со амэ тэды пхэна́са пэ дава́? Нау́што начачипэ́н исын Дэвлэ́стэ? Над.

15. Дэвэ́л ракирэ́ла Мойза́скэ: “Мэ примангава одолэ́нгэ, конэ́с трэй тэ примангав, и конэ́с трэй тэ тангинав, Мэ потангинава.”

Romani Bible Baltic 2019

United Bible Societies for the Baltic Romani Mission