Bible in one year - Пэ Балтитко Романи чиб

Bible in one year August 9

1. Тэ́ньци Ио́во отпхэндя́ лавэ́нца:

2. “Мэ джино́м (джина́в), со дава́ исын чачипэ́н; нэ сыр о ману́ш сашты́ тэ явэ́л чачуно́ анги́л Дэвлэ́стэ?

3. Ко́ли ёв выкэдэ́ла тэ чингирэлпэ лавэ́нца Дэвлэ́са, ёв нашты́ тэ отпхэнэл аж ни пэ екх Лэ́скирэ тысёнцы пхучибэна.

4. Дэвэ́л исын годо́ илэ́са и зоралыпнаса: кон тэрдёлас дрэ стонка маму́й Лэ́стэ, ци кодова́ ячэ́лапэ дро рама́нё (покоё)?

5. Кон пиричхувэла бэ́рги, со нико́н на джинэ́ла дава́, ке́ли Ёв лэн равэла тэлэ́ дрэ холы́.

6. Кон тринскирэла пхув ла́кирэ штэто́стыр, и ла́кирэ сты́лбы издрана;

7. Кон припхэнэла кхамэскэ, и кхам на уштэ́ла, и Ёв чхувэ́ла чэргэня́ пэ якхи́тко чэргэнори́ (печать).

8. Дэвэ́л Кокоро́ чхудя́ болыбэ́н, и Ёв штавэла пир вучэ́-морёскирэ (дэрьявэ́скирэ) валны:

9. Ёв создыя́ пэ болыбэ́н Асос, Кесилёс и Химос и пашы́л-дывэсытка чэргэня́.

10. Кон кэрэ́ла древа́н барэ́ рэ́нды, со ние́кх на ґалёла, и ди́вы, со нашты́ тэ погинэн.

11. Акэ, Ёв проджа́ла пашы́л ма́ндэ, и мэ на дыкха́ва Лэс, и Ёв джа́ла пашы́л дурэды́р, и мэ нашты́ тэ роздыкхав Лэс.

12. Ѓа́да, Ёв лэ́ла криг и кон могинэ́ла (сашты́) тэ мешынэл Лэ́скэ? Кон пхэнэ́ла Лэ́скэ: “Со Ту кэрэ́са?”

13. Дэвэ́л на лэ́ла кри Пэ́скири холы́; Шуахостыр помогибнаскирэ бандёна тэл Лэ́стэ:

14. пэ кицы́ тэды мэ сом тыкнэды́р, соб (кай) ма́нгэ тэ отпхэнав Лэ́скэ, тэ выкэдав лава́ тэ чингиравпэ лавэ́нца Лэ́са?

15. Мэк мэ и со́мас чачипна́скиро, мэ на могиндёмас тэ отпхэнав Лэ́скэ, нэ мэ фэ́ни (то́ка) помангавас мирэ́ Сэндарис тэ тангинэ́л ман.

16. Ко́ли мэ кхаравас бы, и Ёв отпхэнэ́лас бы ма́нгэ, мэ на патяндыём, со Ёв шундя́ мири́ зан, –

17. Ёв-Кон лучкирэлас (лутькирэлас) ман сы́рбы зоралы́ балва́л, и дукхавэлас ман буты́р и буты́р би причынакиро.

18. Ёв на домэкэла, соб (кай) мэ тэ выдыхинав, нэ Ёв дэ́ла чалэ́с киркипэн ма́нгэ.

19. Тэ явэ́л дава́ рэ́ндо пал зор, дыкхэ́н, саво́ Ёв исын зоралыпнаскиро; а тэ явэ́л дава́ рэ́ндо пал чачипэ́н, кон сашты́ тэ дэл миро дывэ́с тэ сэндинавпэ Лэ́са?

20. Мэк и тэ явэ́л чачипэ́н пал ма́ндэ, Ёв зоралэ́с сэндякирэлас ман мирэ́ лавэ́нца; мэк мэ и тэ явав бибангипнаскиро, Ёв допхэнэ́ла, со мэ сом начачуно.

21. Мэ на сом банго́, мэ на кама́м тэ джина́в кокоро́ пэс, а миро джиибэ́н яця́ джунгало́ (брыдиндя) ма́нгэ.

22. Сарэнца исын екх; палдава́ мэ пхэндём: Ёв хасякирэ́ла сыр бидошэнгирэс, адя́кэ-паць и фуе́ манушэ́с.

23. Ко́ли чхупны мулякирэ́ла екха́тыр (внезапнэс), Ёв салапэ бибангипнаскирэндыр, савэ́ пиридживэна кэ мэ́ньки.

24. Пхув исын дыны́ дрэ бибахталэ́-манушэ́нгирэ васта́; Ёв учхакирдя́ сэндарье́нгирэ муя́. Ко́ли дава́ нанэ Ёв, то кон ишчо (инкэ́) дава́ сашты́ тэ кэрэ́л?

25. Мирэ́ дывэса́ праста́на сыгэды́р прастаибнаскирэстыр: ёнэ нашэ́на криг, ёнэ на дыкхэ́на лачхипэ́н.

26. Дывэса́ проджа́на сыр сыгна тришчынитка па́рмы (корабли), сы́рбы о́рло (ки́до), саво́ чхурдэлапэ наужакирдэс пэ чордо дорэсыбэ́н.

27. Ко́ли мэ пхэна́ва: “Мэ бистрава пал миро калыпэ́н, со мэ жалиндёмпэ, мэ парувава пэ́скиро рондло муй и мэ подрикирава пэс сабнаса:

28. мэ издрава сарэ́ мирэ́ мэнькэндыр, мэ джино́м, со Ту на приджинэса ман, со Мэ сом бибангипнаскиро.

29. Ко́ли мэ тэ явав дасаво бибахтало́, со́скэ тэды мэ кэра́ва пхари́ буты́ ивья́?

30. Ко́ли мэ выморавапэ ивунэ пане́са, и тэ кэра́в мирэ́ васта́, со енэ ние́кхвар на сыс;

31. нэ Ту и тэды тасадякирэса ман андрэ́ бла́та и мирэ́ и́ди явэ́на сы́рбы тэ дурьён ма́ндыр.”

32. “Пал-дова́ со Дэвэ́л исын на ману́ш, сыр мэ сом, соб (кай) ма́нгэ тэ отпхэнав Лэ́скэ, и соб (кай) амэ́нгэ тэ джас кхэтанэ́ Лэ́са пэ сэ́ндо.

33. Нанэ машкиратуно-ману́ш машки́р амэ́ндэ, кон могинэлас бы тэ чхувэ́л лэ́скиро васт пэ амэ́ндэ.

34. Мэк Дэвэ́л тэ лэл криг Пэ́скири ран ма́ндыр, и мэк тэ явэ́л, соб (кай) Лэ́скиро трашаибэ́н тэ на даракирэл ман.

35. Тэ́ньци мэ ява́ва тэ ракира́в, и мэ на ява́ва тэ дарав Лэ́стыр, нэ мэ на сом дасаво, со тумэ́ думинэ́на.”

Job 10:1-22

1. Миро ди кхиныя мирэ́ джиибнастыр: мэ да́ва во́ля пэ́скэ тэ тангинавпэ (тэ жалинавпэ), мэ ява́ва тэ ракира́в мирэ́ дескирэ киркипнастыр.

2. Мэ пхэна́ва Дэвлэ́скэ: “На сэндякир зоралэ́с ман. Сыка́в ма́нгэ, пал со Ту лыджа́са чинга́рд (сора) ма́нца.”

3. Саво́ ж лачхипэ́н исын Ту́кэ, со Ту тасавэса, со Ту дыкхэ́са вычипнастыр пэ дава́, со Тырэ́ васта́ создынэ? И Ту зяинэса манушэ́нгирэ скэдынятыр?

4. Ци исын Ту́тэ якха́, сыр амэ́ндэ? Ци дыкхэ́са Ту, сыр ману́ш?

5. Ци исын Ту́тэ, дасавэ́-паць дывэса́, сыр манушэ́стэ, кон мэрэ́ла?

6. Со Ту родэса дош дрэ ма́ндэ, и со Ту выпхучэса пал грэ́хо дрэ ма́ндэ?

7. Кон – сыр на Ту, джинэ́са, со мэ на сом фуй, и нанэ ние́кх тэ зракхэ́л ман Тырэ́ вастэ́стыр?

8. Тырэ́ васта́ кхудэ́ кхэтанэ́ ман и создынэ ман – саво́ мэ сом; и акана́ Ту хасякирэса ман!

9. Ри́пир, со Ту создыян ман сыр глэя (глина), и Ту ж пирикирэса ман палэ дро пра́хо.

10. Ци на Ту вычхудян ман сыр тхуд? И ци на Ту вытолчиндян ман сыр ґэнсто кирал?

11. Ту учхакирдян ман цыпаса и масэнца, и Ту пирикхудян ман кокалэнца и жылэнца;

12. Ту дариндян (подыян) ма́нгэ джиибэ́н и Тыри́ ла́ска, и дова́, со Ту пэкэсапэ пал ма́ндэ, ракхцян миро ду́хо (фа́но).

13. И саро́ дава́ Ту гарадян дро пэ́скиро ило́, мэ джино́м: дава́ исыс Ту́тэ пэ годы́.

14. Ко́ли мэ кэра́ва грэ́хи, тэ́ньчи Ту зарикирэса лэн дрэ годы́. И Ту на отчхакирэса ман мирэ́ чорипна́стыр.

15. Ко́ли мэ сом фуй ману́ш, тэды би́да пэ ма́ндэ! Ровнэс сыр и ко́ли чачипэ́н исын пал ма́ндэ, мэ нашты́ тэ ґаздав миро шэро́. Мэ сом, дрэ бипатыв, ма́ндэ исын пхэрдо́ бибахтя.

16. Мири́ биба́хт барьёла: Ту традэсапэ пал ма́ндэ сы́рбы древа́н мижэх шчэр (ле́во); и нэвэ́стыр Ту сыкавэса пэ́скиро зоралыпэ́н кэ дар пэ ма́ндэ.

17. Ту бичхавэса ўса нэвонэ́ якхитконэн пэ ма́ндэ, и Ту барьякирэса пэ́скири холы́ пэ ма́ндэ, Ту ўса парувэса Пэ́скиро марибэ́н пэ ма́ндэ.

18. И ваш со Ту домэкхцян, соб (кай) мэ тэ выджав да́кирэ лочатыр? Ма́нгэ явэ́лас ко́нцо (яго́ро) и ние́кх якх тэ на дыкхэ́лас ман.

19. Мэ явавас сы́рбы мэ и на со́мас ние́кхвар, ман пирилыджанас лочовя́тыр кэ мулыкано (кэ ґробо).

20. Ци на́бут (куты́) дывэса́, со ячнэ́пэ ваш ма́нгэ? Пирияч, Дэ́вла! Ячкир ман екхджинэс, соб (кай) ма́нгэ на́бут тэ отджидёвав.

21. Анги́л дова́, сыр мэ джа́ва и ние́кхвар на рисёва́ва палэ, – кэ цьмакиро тхэм (страна) и тэл мэрибнаскири зэр (тень);

22. кэ тугитко тхэм калыпнаса, саво́ исын сыр калыпэ́н кокоро́, со кай нанэ гиибэн, кай дуд исын сыр ґэнсто калыпэ́н.”

Psalms 93:1-5

1. Рай Дэвэ́л кралинэла, Ёв уридя пэ Пэ́стэ райканы сла́ва: Рай Дэвэ́л уридяпэ и подпхандяпэ зоралыпнаса и Ёв зачхудя свэ́то, Саво́ на тринскирлапэ.

2. Тыро́ троно исын зачхудо ґаратунэ́ (вагунэ́) бэршэ́ндыр, Ту сан ве́чно.

3. Барэ́ панинга́ ґаздынэ́пэ, о Раё Дэ́вла, барэ́ панинга́ ґаздынэ́ пэ́скирэ заня́ (глося́), барэ́ панинга́ ґаздынэ́ пэ́скирэ валны.

4. Рай Дэвэ́л, Саво́ исын пэ вучипэ́н, исын зоралэды́р бутэ́-паненгирэ шумостыр, зоралэ́ валнэндыр, со джа́на пир мо́рё (дэрья́в).

5. Тырэ́ допхэныбэна на парудёна; свэнтыма гожакирэла Тыро́ кхэр, о Раё Дэ́вла, пэ сарэ́ ве́ки.

Proverbs 22:22-23

22. На чор чорорэстыр, пал-дова́ со ёв исын чороро́, на тасав одолэ́н, савэ́н притасавэ́на пашы́л по́рта:

23. пал-дова́ со Рай Дэвэ́л затэрдёла пал лэ́нгиро рэ́ндо, и лэ́ла криг кодолэнгиро ди, савэ́ обчорэна лэн.

Rimanenge 9:16-33

16. Тэды джинэ́н, со примангипэн манушэ́скэ на пир лэ́скиро ило́ ци стариныбэн, а пир Дэвлэ́скиро тангипэ́н.

17. Свэ́нто ж Чхиныбэ́н ракирэ́ла Фараоно́скэ: “Ваш дова́ Мэ тут и чхудём ра́са, соб (кай) тэ сыкавав пэ ту́тэ Мири́ зор, и соб (кай) тэ явэ́л джиндло́ Миро лав пир сари́ пхув.”

18. Тэды джинэ́н, со Дэвэ́л тангинэла одолэ́с, конэ́с Ёв кокоро́ выкэдэ́ла, и Ёв пхарьякирэла ило́ одолэ́скэ, кон исын дро́го Лэ́скэ.

19. Вари-кон тумэ́ндыр могинэ́ла тэ пхэнэ́л ма́нгэ тэды: “Пал со, Дэвэ́л бангякирэла амэн? Пал-дова́ со, кон могинэ́ла тэ явэ́л проти Лэ́скири во́ля?”

20. А кон ту сан адасаво́ ману́ш? Соб (кай) ту́тэ тэ явэ́л отпхэныбэ́н Дэвлэ́скэ? Ци могинэ́ла дова́, со исын кэрдо́, тэ пхэнэ́л одолэ́скэ, кон кэрдя́ лэс: “Со́скэ ту кэрдя́н ман дасавэса?”

21. Ци нанэ право одолэ́ манушэ́стэ, саво́ кэрэ́ла пирья ґлэя́тыр (глина́тыр), соб (кай) екхэ замесостыр тэ кэрэ́л пири́ ваш свэнкитко дывэ́с, и яви́р ваш кажно дывэ́с?

22. И ко́ли Дэвэ́л камэ́ла тэ кэрэ́л чачуно́ сэ́ндо и тэ сыкавэ́л Пэ́скири зор, Ёв тангинэла ґара́ манушэ́н, савэ́ исын создынэ ваш хасибэ́н;

23. соб (кай) ты сыкавэ́л Пэ́скиро барвалыпэ́н дрэ сла́ва тангипнаса пэ манушэ́ндэ, савэ́н Ёв выкэдыя́ ваш сла́ва,

24. и пэ амэ́ндэ, савэ́н Ёв адя́кэ-паць кхардя́ на екхэ Юдэндыр, нэ и Наюдэндыр?

25. И Ёв адя́кэ-паць пхэндя́ Осияскэ: “На Мирэ́ манушэ́н Мэ ява́ва тэ кхарав Мирэ́ манушэ́нца, и одолья, савья́ Мэ на покэрдём (сави́ на яця́ пир ило́ Ма́нгэ), Мэ ява́ва тэ кхарав ‘мирэ́ дрогонаса.’

26. И явэ́ла пэ дова́ штэ́то, кай сыс пхэндло́ лэ́нгэ: ‘Тумэ́ сан на Мирэ́ мануша́, одо́й ёнэ явэ́на тэ кхарэнпэ джидэ́ Дэвлэ́скирэ чхавэ́нца.’”

27. Исаё ракирэ́ла роибнаса пал Израилё: “Мэк Израилёскирэ чхавэ́ тэ явэ́н ада́кицы бут, кицы́ исын морёскиро (дэрьявэ́скиро) пра́хо, а усае́кх набари паш лэ́ндыр зракхэ́лапэ:

28. пал-дова́ со Дэвэ́л зрикирэла Пэ́скиро лав кэ ко́нцо (кэ яго́ро); Ёв кэрэ́ла далэ́ пхувья́са дова́, со Ёв пхэндя́.”

29. Сыр и англэды́р Исаё пхэндя́ пал дава́: “Ко́ли болыбна́скирэ-янголэ́нгиро Рай Дэвэ́л тэ на ячкирэл амэ́нгэ ро́до, то амэ́нца явэ́ла дова́-паць, со яця́ Содомо́скирэ и Гоморакирэ манушэ́нца.”

30. Со амэ тэды какана́ пхэна́са? На́юды, савэ́ на камлэ́ тэ родэ́н чачипэ́н, дорэснэ́ (долынэ) чачипэ́н пир пэ́скиро патяибэ́н.

31. А Израилё, саво́ родыя Зако́но пир чачипэ́н, адя́кэ ёв на догия́ кэ Зако́но.

32. Со́скэ? Палдова́ со ёнэ на дыкхнэ́ пэ патяибэ́н, а пэ Законо́скирэ рэ́нды. Ёнэ обштадэпэ пал бар, саво́ лэн на домэкэла,

33. сыр и исын чхиндло́ пал дава́: “Ѓа́да, Мэ чхува́ва пэ Сио́но бар, пал саво́ бут мануша́ обштавэнапэ и пэрэ́на: и кажно, кон патя́ла дрэ Лэ́стэ, одова́ ние́кхвар на явэ́ла тэ ладжал.”

Romani Bible Baltic 2019

Maintained by the United Bible Societies for the Baltic Romani Mission